ଭୁବନେଶ୍ୱର: ସାରା ରାଜ୍ୟରେ ରନ୍ଧନ ଗ୍ୟାସକୁ ନେଇ ସଙ୍କଟ ଜାରି ରହିଛି। ଗ୍ୟାସ ବୁକିଂ କରି ଡିଏସି ନଂ ଆସିବାର ସପ୍ତାହେ ପରେ ମଧ୍ୟ ଗ୍ୟାସ ମିଳୁନି। ଘରୋଇ ଭାବେ ଯେଉଁ ଗ୍ୟାସ ବାହାରେ ବିକ୍ରି ହେଉଥିଲା, ତାହା ଏବେ ୩-୪ ହଜାର ଟଙ୍କାରେ ଚଢ଼ା ଦରରେ ବିକ୍ରି ହେଉଛି। ଏଭଳି ସ୍ଥିତିରେ ରାଜ୍ୟରେ ଗ୍ୟାସ, ପେଟ୍ରୋଲ ଓ ଡିଜେଲର କୌଣସି ଅଭାବ ନାହିଁ ବୋଲି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି। ଗୁରୁବାର ମନ୍ତ୍ରୀ ଶ୍ରୀ ପାତ୍ର କହିଛନ୍ତି ଯେ ରାଜ୍ୟରେ ଏହି ସାମଗ୍ରୀର ଯଥେଷ୍ଟ ମହଜୁଦ ରହିଛି। ହୋଟେଲକୁ ଆବଶ୍ୟକ ଥିବା ରନ୍ଧନ ଗ୍ୟାସର ୫୦  ପ୍ରତିଶତ ଯୋଗାଇବାକୁ ସକ୍ଷମ କରାଯାଇଛି। ଘରୋଇ କ୍ଷେତ୍ରକୁ କୌଣସି ପ୍ରତିବନ୍ଧକ ଲଗାଯାଇ ନାହିଁ। ଅନ୍ୟପଟେ ଗ୍ୟାସ ସଙ୍କଟକୁ ନେଇ ଦିଲ୍ଲୀରେ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ ବସିବ ଓ ୯ଟି ରାଜ୍ୟର ଯୋଗାଣ ମନ୍ତ୍ରୀ ଏଥିରେ ଯୋଗ ଦେବେ ବୋଲି ସେ ସୂଚନା ଦେଇଛନ୍ତି । 

ରାଜ୍ୟରେ ଏବେ ରନ୍ଧନ ଗ୍ୟାସ ଉପଭୋକ୍ତାଙ୍କ ସଂଖ୍ୟା କୋଟିଏରୁ ଅଧିକ। ଉପଭୋକ୍ତାଙ୍କ ପାଇଁ ଦୈନିକ ଓଡ଼ିଶାକୁ ୧ ଲକ୍ଷ ୪୦ ହଜାର ଗ୍ୟାସ ସିଲିଣ୍ଡର ଆସୁଛି; ମାତ୍ର ଏବେ ଦୈନିକ ବୁକିଂ ସଂଖ୍ୟା ୧ଲକ୍ଷ ୭୦ ହଜାରରୁ ଅଧିକ। ଫଳରେ ଗ୍ୟାସକୁ ନେଇ ସଙ୍କଟଜନକ ସ୍ଥିତି ଉପୁଜିଛି। ଲୋକମାନଙ୍କ ଘରେ ଗ୍ୟାସ ମହଜୁଦ ଥିବା ସତ୍ତ୍ୱେ ଛାନିଆ ହୋଇ ବୁକିଂ କରୁଛନ୍ତି ବୋଲି ସଂଘ କହୁଥିଲେ ମଧ୍ୟ ବାସ୍ଥବ ସ୍ଥିତି କିଛି ଅଲଗା। କାରଣ ଗ୍ୟାସ ଅଫିସ୍‌ କିମ୍ବା ଗୋଦାମ ଆଗରେ ଶହ ଶହ ଲୋକ ଧାଡ଼ି ହୋଇ ଗ୍ୟାସ ନେବାକୁ ଅପେକ୍ଷା କରୁଛନ୍ତି। ପଶ୍ଚିମ ଏସିଆରେ ଯୁଦ୍ଧ ସ୍ଥିତି ଯୋଗୁଁ ଗ୍ୟାସ ଆମଦାନୀ ବାଧାପ୍ରାପ୍ତ ହୋଇଥିବାରୁ ବାଣିଜ୍ୟିକ ଗ୍ୟାସ ଉପରେ ବଡ଼ ଧରଣର କଟକଣା ଲାଗିଛି। ତେଣୁ ଉଠା ଦୋକାନୀମାନେ ଚଢ଼ା ଦରରେ ଗ୍ୟାସ କିଣୁଥିବା ଦର୍ଶାଇ ପ୍ରତି ଖାଦ୍ୟ ସାମଗ୍ରୀ ମୂଲ୍ୟ ବୃଦ୍ଧି କରିଛନ୍ତି । 

ଅନ୍ୟପଟେ ରାଜଧାନୀ ଭୁବନେଶ୍ୱର ସମେତ ରାଜ୍ୟର ବିଭିନ୍ନ ସ୍ଥାନରେ ପେଟ୍ରୋଲ ଟାଙ୍କି ମଧ୍ୟ ବନ୍ଦ ହେବା ଆରମ୍ଭ ହୋଇଛି।   ତେଲ କମ୍ପାନୀଙ୍କ କହିବା ଅନୁଯାୟୀ ତେଲ ଟାଙ୍କି ମାଲିକମାନେ ନଗଦ ଟଙ୍କା ଦେଇ କମ୍ପାନୀଠୁ ତେଲ କିଣିବେ। ଏବେ ବାକି କାରବାର ବନ୍ଦ ହୋଇ ଥିବାରୁ ନଗଦ ନ ଦେଲେ ଟାଙ୍କି ମାଲିକଙ୍କୁ ତେଲ ଦିଆଯାଉ ନାହିଁ। ଫଳରେ ଗ୍ରାହକ ହଇରାଣ ହେଉଛନ୍ତି। ପୂର୍ବରୁ ତୈଳ କମ୍ପାନୀମାନେ ବାକିରେ କଞ୍ଚାମାଲ କିଣୁଥିଲେ। ଏବେ ସେମାନଙ୍କୁ ନଗଦ ଟଙ୍କା ଦେଇ କିଣିବାକୁ ପଡ଼ୁଛି। ତେଣୁ ସେମାନେ ନଗଦ ଦେଣନେଣ ଉପରେ ଗୁରୁତ୍ୱ ଦେଉଛନ୍ତି। ଭୁବନେଶ୍ୱରରେ ଏବେ ୪୨ଟି ପେଟ୍ରୋଲ ପମ୍ପ ରହିଛି। ଭୁବନେଶ୍ୱର ଦୈନିକ ୩ଲକ୍ଷ ୧୨ ହଜାର ଲିଟର ପେଟ୍ରୋଲ ଓ ୨ଲକ୍ଷ ୧୫ ହଜାର ଲିଟରରୁ ଊର୍ଦ୍ଧ୍ବ ଡିଜେଲ ବିକ୍ରି ହୁଏ। ଏବେ ଲୋକମନେ ଛାନିଆ ହୋଇ ଅଧିକ ପେଟ୍ରୋଲ ପକାଉଛନ୍ତି। ପୂର୍ବାପେକ୍ଷା ୧୦ ପ୍ରତିଶତ ପେଟ୍ରୋଲ-ଡିଜେଲ ବିକ୍ରି ବୃଦ୍ଧି ପାଇଛି। ତେଣୁ କିଛି ମାତ୍ରାରେ ସମସ୍ୟା ସୃଷ୍ଟି ହୋଇଛି। 

ଗୋଟିଏ ପଟେ ରାଜ୍ୟରେ ଗ୍ୟାସ ସଙ୍କଟ ସ୍ଥିତି ଲାଗି ରହିଥିବା ବେଳେ ମନ୍ତ୍ରୀ କିନ୍ତୁ ଏହି ଘଟଣାକୁ ନେଇ ସମ୍ପୂର୍ଣ୍ଣ ଭିନ୍ନ ମତ ରଖୁଛନ୍ତି। ପୂର୍ବରୁ ଆଳୁ ସଙ୍କଟ ସମୟରେ ମଧ୍ୟ ଏଭଳି ସ୍ଥିତି ସୃଷ୍ଟି ହୋଇଥିଲା। ସେତେବେଳେ ଉତ୍ତର ପ୍ରଦେଶରୁ ଟ୍ରେନ୍‌ରେ ଆଳୁ ଆସୁଥିବା ନେଇ ମନ୍ତ୍ରୀ କହିଥିଲେ। ଏହି କଥାକୁ ନେଇ ଆଜି ପର୍ଯ୍ୟନ୍ତ ବିରୋଧୀ ଯୋଗାଣ ମନ୍ତ୍ରୀଙ୍କୁ ସମାଲୋଚନା କରୁଥିବା ବେଳେ ଏବେ ଗ୍ୟାସ କଥାକୁ ନେଇ ମଧ୍ୟ ତାଙ୍କର ଉକ୍ତି ଚର୍ଚ୍ଚା ସୃଷ୍ଟି କରିଛି।

ନୂଆଦିଲ୍ଲୀ: ଦେଶରେ ଇଣ୍ଡିଗୋ ସଙ୍କଟକୁ ନେଇ ଏବେ ଭାରତର ବିମାନ ଚଳାଚଳ କ୍ଷେତ୍ରରେ ଅସ୍ଥିରତା ଲାଗି ରହିଛି । ଇଣ୍ଡିଗୋ ବିରୁଦ୍ଧରେ କେନ୍ଦ୍ର ସରକାରଙ୍କ କାର୍ଯ୍ୟାନୁଷ୍ଠାନ ଆରମ୍ଭ ହୋଇଛି । ଇଣ୍ଡିଗୋକୁ ଶୀତକାଳୀନ ବିମାନ ସଂଖ୍ୟା ୫ ପ୍ରତିଶତ କମାଇବାକୁ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ନିର୍ଦ୍ଦେଶ ଦେଇଛି । ପରିଚାଳନା ଅକ୍ଷମତା ଯୋଗୁଁ ୨୦୨୫ ଶୀତ ସିଡ୍ୟୁଲ୍‌ କମାଇବାକୁ ନିର୍ଦ୍ଦେଶ ଜାରି ହୋଇଛି ।

ଇଣ୍ଡିଗୋ ପୂର୍ବ ଶୀତ ସିଡ୍ୟୁଲ୍ ତୁଳନାରେ ଡିପାର୍ଚର୍ ୯ ପ୍ରତିଶତରୁ ଅଧିକ ବଢ଼ାଇଥିଲା । କିନ୍ତୁ ଅନୁମୋଦିତ ସଂଖ୍ୟାରୁ ବହୁତ କମ୍ ବିମାନ ପରିଚାଳନା କରୁଥିଲା । ଇଣ୍ଡିଗୋ ଦୈନିକ ୨୨୦୦ ଘରୋଇ ଓ ଅନ୍ତର୍ଜାତୀୟ ବିମାନ ଉଡ଼ାଣ କରେ । ନୂଆ ନିର୍ଦ୍ଦେଶ ଅନୁସାରେ ଦୈନିକ ଇଣ୍ଡିଗୋ ବିମାନ ଉଡ଼ାଣ ସଂଖ୍ୟା ୧୧୦କୁ ହ୍ରାସ ପାଇବ । ଆସନ୍ତାକାଲି ଅପରାହ୍ନ ୫ଟା ସୁଦ୍ଧା ସଂଶୋଧିତ ସିଡ୍ୟୁଲ୍ ଦାଖଲ କରିବାକୁ ନିଦ୍ଦେଶ ଜାରି ହୋଇଛି ।

ଭୁବନେଶ୍ୱର: ଦୁଇ ଦିନ ତଳେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେପି ନଡ୍ଡାଙ୍କୁ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଭେଟି ମେଡିକାଲ ସିଟ୍‌ ସଂଖ୍ୟା ବୃଦ୍ଧି କରିବା ପାଇଁ ନିବେଦନ କରିଛନ୍ତି। ମାତ୍ର ରାଜ୍ୟରେ ହଜାର ହଜାର ସଂଖ୍ୟାରେ ଡାକ୍ତର ଓ ବିଶେଷଜ୍ଞ ଡାକ୍ତର ପଦବୀ ଖାଲି ପଡ଼ିଥିଲେ ବି ସେଥିପ୍ରତି ମନ୍ତ୍ରୀ କିମ୍ବା ସ୍ୱାସ୍ଥ୍ୟ ବିଭାଗ ଦୃଷ୍ଟି ଦେଉନାହାନ୍ତି। ଫଳସ୍ୱରୂପ ସାମାନ୍ୟତମ ସ୍ୱାସ୍ଥ୍ୟ ସମସ୍ୟା ହେଲେ ବି ରୋଗୀମାନେ ବାଧ୍ୟହୋଇ ଭୁବନେଶ୍ୱର, କଟକ ଆଦି ସହରକୁ ଦୌଡୁଛନ୍ତି। କିଛି ରୋଗୀ ‘ଗୋପବନ୍ଧୁ’ ଓ ‘ଆୟୁଷ୍ମାନ’ ଯୋଜନାରେ ସହାୟତା ପାଉଥିବାବେଳେ ଆଉ କିଛି ରୋଗୀ ଘରୋଇ ଡାକ୍ତରଖାନାକୁ ଯାଇ ଖର୍ଚ୍ଚାନ୍ତ ହେଉଛନ୍ତି। ଏମିତିକି ‘ଆୟୁଷ୍ମାନ’ କାର୍ଡରେ ମାତ୍ରାଧିକ ସମସ୍ୟା ହେତୁ ଲୋକମାନେ ନିଜର ଜମିବାଡ଼ି ବିକ୍ରି କରି ଘରୋଇ ଡାକ୍ତରଖାନାରେ ଚିକିତ୍ସା ଖର୍ଚ୍ଚ ତୁଲାଉଛନ୍ତି।

ଗତ ମାର୍ଚ୍ଚ ମାସରେ ସରକାର ବିଧାନସଭାରେ ଦେଇଥିବା ତଥ୍ୟ ମୁତାବକ, ରାଜ୍ୟର ମୋଟ ମଞ୍ଜୁରୀପ୍ରାପ୍ତ ଡାକ୍ତରଙ୍କ ସଂଖ୍ୟା ୧୫,୭୭୪ ଥିବାବେଳେ ସେଥିମଧ୍ୟରୁ ୫୮୩୪ ଡାକ୍ତର ପଦବୀ ଖାଲିପଡ଼ିଛି। ଅର୍ଥାତ୍‌ ପାଖାପାଖି ୩୭ ପ୍ରତିଶତ ଡାକ୍ତର ପଦବୀ ରାଜ୍ୟର ସରକାରୀ ଡାକ୍ତରଖାନାଗୁଡ଼ିକରେ ଖାଲି ପଡ଼ିଛି। ରାଜ୍ୟର ୩୦ଟି ଜିଲ୍ଲାରେ ଥିବା ସରକାରୀ ଡାକ୍ତରଖାନାଗୁଡ଼ିକ ପାଇଁ ୨୮୨୩ଟି ମଞ୍ଜୁରୀପ୍ରାପ୍ତ ବିଶେଷଜ୍ଞ ଡାକ୍ତର ପଦବୀ ଥିବାବେଳେ ସେଥିମଧ୍ୟରୁ ୧୫୪୦ ପଦବୀରେ ଡାକ୍ତର ନାହାନ୍ତି। ଅର୍ଥାତ୍‌ ରାଜ୍ୟର ସରକାରୀ ଡାକ୍ତରଖାନାଗୁଡ଼ିକରେ ପାଖାପାଖି ୫୫ ପ୍ରତିଶତ ବିଶେଷଜ୍ଞ ଡାକ୍ତର ନାହାନ୍ତିି। ସୁନ୍ଦରଗଡ଼, ରାୟଗଡ଼ା, ନୂଆପଡ଼ା, ନବରଙ୍ଗପୁର, ମୟୂରଭଞ୍ଜ, ମାଲକାନଗିରି, କୋରାପୁଟ, କେନ୍ଦୁଝର, କନ୍ଧମାଳ, କଳାହାଣ୍ଡି, ଗଞ୍ଜାମ, ଗଜପତି, ଢେଙ୍କାନାଳ, ଦେବଗଡ଼, ବୌଦ୍ଧ, ବଲାଙ୍ଗିର, ବରଗଡ଼ ଭଳି ଆଦିବାସୀ ଅଧ୍ୟୁଷିତ ଜିଲ୍ଲାଗୁଡ଼ିକରେ ଅଧାରୁ ଅଧିକ ବିଶେଷଜ୍ଞ ଡାକ୍ତର ପଦବୀ ଖାଲି ପଡ଼ିଛି। ସେହିପରି ରାଜ୍ୟରେ ୩୨୦ଟି ଭେଷଜ ବିଶେଷଜ୍ଞ ପଦବୀ ଖାଲି ପଡ଼ିଥିବାବେଳେ ୨୩୫ଟି ସ୍ତ୍ରୀ ଓ ପ୍ରସୂତି ରୋଗ ବିଶେଷଜ୍ଞ ପଦବୀରେ ଡାକ୍ତର ନାହାନ୍ତି। ଶିଶୁମାନଙ୍କ ସ୍ୱାସ୍ଥ୍ୟ ରକ୍ଷା ପାଇଁ ସରକାର ଚିନ୍ତିତ ଥିବାବେଳେ ଗତ ମାର୍ଚ୍ଚ ପହିଲା ସୁଦ୍ଧା ଓଡ଼ିଶାରେ ୫୯୧ଟି ମଞ୍ଜୁରୀପ୍ରାପ୍ତ ଶିଶୁ ରୋଗ ବିଶେଷଜ୍ଞ ପଦବୀ ମଧ୍ୟରୁ ୩୬୯ଟି ଖାଲି ପଡ଼ିଥିଲା। ବିଭିନ୍ନ କାରଣରୁ ଅସ୍ତ୍ରୋପଚାର ଚିକିତ୍ସା ଉପରେ ଚାପ ବଢ଼ୁଥିବାବେଳେ ରାଜ୍ୟରେ ୫୦୦ ମଞ୍ଜୁରୀପ୍ରାପ୍ତ ଶଲ୍ୟ ବିଶେଷଜ୍ଞ ପଦବୀ ମଧ୍ୟରୁ ୩୪୨ଟି ଖାଲି ପଡିଥିଲା। ଅଧାରୁ ଅଧିକ ନିଶ୍ଚେତକ ବିଶେଷଜ୍ଞ ପଦବୀ ଆମ ରାଜ୍ୟରେ ଖାଲି ପଡ଼ିଥିବାବେଳେ ନିଦାନ, ହୃଦରୋଗ, ଟିବି ଆଦି ବିଶେଷଜ୍ଞ ପଦବୀ ମଧ୍ୟ ଅଧାରୁ ଅଧିକ ଖାଲି ପଡିଛି।

ସରକାରୀ ମେଡିକାଲ୍‌ କଲେଜଗୁଡ଼ିକରେ ବି ସ୍ଥିତି ସେତେଟା ଭଲ ନାହିଁ। ୧୫ଟି ସରକାରୀ ମେଡିକାଲ କଲେଜରେ ପ୍ରାୟ ୧୦୦ ପ୍ରଫେସର ପଦବୀ, ପାଖାପାଖି ୨୦୦ ସହଯୋଗୀ ପ୍ରଫେସର ପଦବୀ ଓ ୯୦ରୁ ଅଧିକ ସହକାରୀ ପ୍ରଫେସର ପଦବୀ ମଧ୍ୟ ଖାଲି ଥିବା ଜଣାପଡ଼ିଛି। ମୋଟାମୋଟି ଭାବେ ସରକାରୀ ମେଡିକାଲ୍‌ କଲେଜଗୁଡ଼ିକରେ ବିଭିନ୍ନ ପାହ୍ୟାର ପାଖାପାଖି ୧୦୦୦ ଡାକ୍ତର ଓ ଡାକ୍ତରୀ ଶିକ୍ଷକ ପଦବୀ ଖାଲି ପଡ଼ିଛି। ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବାନୁସାରେ, ଗ୍ରାମାଞ୍ଚଳରେ ଥିବା ସ୍ୱାସ୍ଥ୍ୟ କେନ୍ଦ୍ର, ଉପଖଣ୍ଡସ୍ତରୀୟ ଓ ଜିଲ୍ଲାସ୍ତରୀୟ ଡାକ୍ତରଖାନାଗୁଡ଼ିକରେ ବିଶେଷଜ୍ଞ ଡାକ୍ତରଙ୍କ ଅଭାବ ପରିଲଖିତ ହେଉଥିବାରୁ ବହୁ କ୍ଷେତ୍ରରେ ରୋଗୀମାନଙ୍କୁ ସରକାରୀ ମେଡିକାଲ୍‌ କଲେଜ ଓ ଅନ୍ୟ ଡାକ୍ତରଖାନାଗୁଡ଼ିକୁ ପଠାଇବାକୁ ଚିକିତ୍ସା ଦାୟିତ୍ୱରେ ଥିବା ଡାକ୍ତରମାନେ ବାଧ୍ୟ ହେଉଛନ୍ତି। ସରକାରୀ ଡାକ୍ତରଖାନା ଓ ସରକାରୀ ମେଡିକାଲ କଲେଜଗୁଡ଼ିକ ଉପରେ ସଂଖ୍ୟାଧିକ ରୋଗୀ ଭରସା କରୁଥିବା ବେଳେ ପର୍ଯ୍ୟାପ୍ତ ସଂଖ୍ୟକ ଡାକ୍ତର, ବିଶେଷଜ୍ଞ ଓ ଡାକ୍ତରୀ ଶିକ୍ଷକ ନ ଥିବାରୁ ବାଧ୍ୟ ହୋଇ ଅନେକ କ୍ଷେତ୍ରରେ ରୋଗୀମାନଙ୍କୁ ବ୍ୟୟବହୁଳ କର୍ପୋରେଟ୍‌ ହସ୍ପିଟାଲମାନଙ୍କୁ ଯାଇ ଲୋକେ ତଳିତଳାନ୍ତ ହେଉଛନ୍ତି।

ନୂଆଦିଲ୍ଲୀ: ବର୍ତ୍ତମାନ ସମଗ୍ର ବିଶ୍ୱ ତୁଳନାରେ ଦେଖିଲେ ଚାଇନାରେ ଏକ ଭିନ୍ନ ସମସ୍ୟା ଚାଲିଛି। ସାରା ଦୁନିଆ ବର୍ତ୍ତମାନ ମୁଦ୍ରାସ୍ଫୀତି ସହ ସଂଗ୍ରାମ କରୁଛି। ଯଦିଓ ବିଭିନ୍ନ ଦେଶରେ ମୁଦ୍ରାସ୍ଫୀତି ଟିକେ ତଳମୁହାଁ ହୋଇଛି, ତଥାପି ମୂଲ୍ୟ ଦାରଦାମ୍‌ ରହିଛି। ଅନ୍ୟପକ୍ଷରେ ଚୀନ୍‌ରେ ଏହାର ବିପରୀତ ସ୍ଥିତି ଦେଖିବାକୁ ମିଳିୁଛି। ଚାଇନାରେ ସାମଗ୍ରୀର ମୂଲ୍ୟ କମୁଛି। କାରଣ ସେଠାରେ ଚାହିଦାରେ ତୀବ୍ର ହ୍ରାସ ଘଟୁଛି। ଯେଉଁଠାରେ ସମଗ୍ର ବିଶ୍ୱ ମୁଦ୍ରାସ୍ଫୀତି ସହ ସଂଘର୍ଷ କରୁଛି, ଚାଇନା ଅବସ୍ଫୀତି ସହ ଯୁଝୁଛି। ବିଶ୍ବର ଦ୍ୱିତୀୟ ବୃହତ୍ତମ ଅର୍ଥନୀତି କୁହାଯାଉଥିବା ଚୀନ୍ ଏବେ ଅବସ୍ଫୀତି ସ୍ଥିତିକୁ ଚାଲିଯାଇଛି। ଦୁଇ ବର୍ଷ ମଧ୍ୟରେ ପ୍ରଥମ ଥର ପାଇଁ ଜୁଲାଇରେ ଦେଶ ଅବସ୍ଫୀତିକୁ ପ୍ରବେଶ କରିଛି। ଦେଶରେ ଏବେ ଉପଭୋକ୍ତା ମୂଲ୍ୟ ସୂଚୀ ତଳମୁହାଁ ହୋଇ ୦.୩ ପ୍ରତିଶତ ହ୍ରାସ ପାଇଛି। ୨୦୨୩ର ଅଧିକାଂଶ ସମୟ ପାଇଁ ଚାଇନାରେ ଦରଦାମ୍ ସ୍ଥିର ରହିଥିଲା, ଯେତେବେଳେ ସାରା ବିଶ୍ୱରେ ମୁଦ୍ରାସ୍ଫୀତି ସହ ସଂଘର୍ଷ କରୁଥିଲା।

ଯଦି ସାମଗ୍ରୀ ମୂଲ୍ୟ କମେ ତେବେ ଏହା ଜନସାଧାରଣଙ୍କ ପାଇଁ ଏକ ଭଲ କଥା। ଏଥିରେ ମହଙ୍ଗା ମାଡ଼ ହୋଇନ ଥାଏ। ଲୋକଙ୍କୁ ସାମଗ୍ରୀ ଆଉ ସେବା ପାଇଁ ଅଧିକ ଟଙ୍କା ଖର୍ଚ୍ଚ କରିବାକୁ ପଡି ନ ଥାଏ। କିନ୍ତୁ ଅର୍ଥନୀତିଜ୍ଞମାନେ ମୁଦ୍ରାସ୍ଫୀତିକୁ ଅର୍ଥନୀତି ପାଇଁ ଏକ ଖରାପ ସଙ୍କେତ ଭାବରେ ବିବେଚନା କରିଥାନ୍ତି। ଯେତେବେଳେ ଦୀର୍ଘ ସମୟ ଧରି ସମାଗ୍ରୀ ଏବଂ ସେବା ମୂଲ୍ୟ ହ୍ରାସ ହୁଏ, ଲୋକମାନେ କମ୍ ଖର୍ଚ୍ଚ କରିଥାନ୍ତି। ଏଭଳି ପରିସ୍ଥିତିରେ କମ୍ପାନୀଗୁଡିକ ଉତ୍ପାଦନ ହ୍ରାସ କରିଥାନ୍ତି। ଫଳସ୍ୱରୂପ, କମ୍ପାନୀଗୁଡିକ କମ୍ ଲୋକଙ୍କୁ ନିଯୁକ୍ତି ମଧ୍ୟ ଦେଇଥାନ୍ତି। ଏଭଳି ପରିସ୍ଥିତିରେ ବ୍ୟାପକ ଛଟେଇ ହୋଇଥାଏ ଏବଂ କର୍ମଚାରୀମାନେ କମ୍ ବେତନ ପାଇଆନ୍ତି। ଚୀନ୍ ପୂର୍ବରୁ ଅବସ୍ଫୀତି ସ୍ଥିତିକୁ ଯାଇସାରିଛି। କିନ୍ତୁ ଅର୍ଥନୀତିଜ୍ଞମାନେ ଏଥର ମୂଲ୍ୟ ହ୍ରାସକୁ ନେଇ ଅଧିକ ଚିନ୍ତିତ ଅଛନ୍ତି। ଶେଷ ଥର ପାଇଁ ୨୦୨୧ ପ୍ରାରମ୍ଭରେ ଚୀନ୍ରେ ସାମଗ୍ରୀ ଏବଂ ସେବାର ମୂଲ୍ୟ ହ୍ରାସ ପାଇଥିଲା। କୋଭିଡ୍ ପ୍ରତିବନ୍ଧକ ହେତୁ ଲକ୍ଷ ଲକ୍ଷ ଲୋକ ଲକ୍‌ଡାଉନ୍‌ରେ ରହିଥିଲେ। ଏଥିରେ କାରଖାନା ବନ୍ଦ ହୋଇଯାଇଥିଲା। ଗତ ବର୍ଷ ଶୂନ କୋଭିଡ ନୀତି ହଟାଇବା ପରେ ଚୀନ୍ ବର୍ତ୍ତମାନ ପୁନରୁଦ୍ଧାର ପଥରେ ରହିଛି। କିନ୍ତୁ ଏ ପର୍ଯ୍ୟନ୍ତ ଚୀନ୍ର ପୁନରୁଦ୍ଧାର ଅସମ୍ଭବ ହୋଇପଡିଛି।