ବାଲେଶ୍ବର,:ଭାରତ ସରକାରଙ୍କ ଅଧୀନରେ ଥିବା ଇଣ୍ଡିଆ ପୋଷ୍ଟ୍ ତରଫରୁ ପୋଷ୍ଟିଂ ପାଇଁ ବିଜ୍ଞାପନ ପ୍ରକାଶ ପାଇଛି। ଏନେଇ ସମିଗ୍ର ଭାରତରେ ଡ଼ାକ ବିଭାଗରେ ସମୁଦାୟ ୩୮ ହଜାର ୯୨୬ଟିରେ ଜିଡିଏସ୍, ବିପିଏମ୍/ଏବିପିଏମ୍ ଏବଂ ଡାକ ସେବକ ପଦ ପାଇଁ ନିଯୁକ୍ତିବାହାରିଛି। ଯାହାର ଆବେଦନ କରିବାର ଶେଷ ତାରିଖ ଜୁନ୍ ୬ ରହିଛି। ତେବେ ମାଟ୍ରିକରେ ଭଲ ନମ୍ବର ରଖି ପାସ୍ କରିଥିବା ଛାତ୍ରଛାତ୍ରୀ ଏଥିରେ ଆବେଦନ କରିପାରିବେ। ଏଥିସହିତ ବିନା ପରୀକ୍ଷାରେ ମାଟ୍ରିକ ପରୀକ୍ଷା ମାର୍କ ବେସିସ୍ ରେ ଏଥିରେ ଚୟନ ବା ନିଯୁକ୍ତି କରାଯିବ। ତେବେ ଏହାକୁ ନେଇ ଅନେକ ଛାତ୍ରଛାତ୍ରୀ ବିରୋଧ କରିଛନ୍ତି। ଚୟନ ପ୍ରକ୍ରିୟା ମାର୍କ ବେସିସ୍ ରେ ନକରି ପରୀକ୍ଷା କରି ତାହା ମାଧ୍ୟମରେ ଚୟନ କରିବାକୁ ଦାବି କରିଛନ୍ତି।

ସୂଚନାଯୋଗ୍ୟ,ପୋଷ୍ଟାଲରେ ବାହାରିଥିବା ନିଯୁକ୍ତି ପାଇଁ ମାର୍କ ବେସିସ୍ ରେ ଚୟନ ବଦଳରେ ପରୀକ୍ଷା କରିବା ପାଇଁ ଅଧିକାଂଶ ପିଲାଙ୍କ ଦାବି ରହିଛି। ପ୍ରକାଶ ଥାଉକି,ଏଥିରେ ଆବେଦନ କରିବାର ବୟସ ସୀମା ୧୮ ରୁ ୪୦ ବର୍ଷ ରହିଛି। ତେବେ ୨୨/୨୫ ବର୍ଷ ତଳେ ମାଟ୍ରିକ୍ ପାସ କରିଥିବା ଜଣେ ବ୍ୟକ୍ତି ଏ ନିଯୁକ୍ତିରେ ମଧ୍ୟ ଆବେଦନ କରିପାରିବ। ମାତ୍ର ସେତେବେଳେ ମାଟ୍ରିକ ପାସ ହାର ଆଉ ଏବେର ପାସ ହାର ଭିତରେ ବହୁ ତଫାତ ରହିଛି। ଏବେ କିଛି ବର୍ଷ ହେଲା ଓଏମଆର୍ ବ୍ୟବସ୍ଥାରେ ଦଶମ ପରୀକ୍ଷା ଦେଇ ଅଧିକ ମାର୍କ ଏବଂ ଅଧିକ ପ୍ରତିଶତ ମଧ୍ୟ ରଖୁଛନ୍ତି। ୧୦୦ ନମ୍ବର ମଧ୍ୟରେ ୫୦ ମାର୍କ ମଲଟିପଲ୍ ଚଏସ୍, ୩୦ ମାର୍କ ପ୍ରଶ୍ନର ଉତ୍ତର ଏବଂ ବାକି ୨୦ ମାର୍କ ସ୍କୁଲ ଶିକ୍ଷକ ଶିକ୍ଷୟିତ୍ରୀ ପ୍ରଦାନ କରିବେ। ଏହି ଧାରାରେ ବର୍ତ୍ତମାନ ଛାତ୍ରଛାତ୍ରୀ ଦଶମ ପରୀକ୍ଷାରେ ବହୁତ ଭଲ ପ୍ରତିଶତ ରଖି ପାସ୍ ହେଉଛନ୍ତି। ତେଣୁ ୬/୭ ତଳେ ପରୀକ୍ଷା ଦେଇଥିବା ଏବଂ ତା’ଠୁ ପୂର୍ବରୁ ମଧ୍ୟ ପରୀକ୍ଷା ଛାତ୍ରଛାତ୍ରୀ ଏବଂ ଏବେର ଛାତ୍ରଛାତ୍ରୀଙ୍କ ମଧ୍ୟରେ ଏହାକୁ ନେଇ ଏକପ୍ରକାର ଭେଦଭାବ ସୃଷ୍ଟି ହୋଇଥିବା ଜଣାପଡିଛି। ଏପରି ନିଯୁକ୍ତିରେ ବର୍ତ୍ତମାନର ପିଲାମାନେ ନିଯୁକ୍ତି ପାଇଯାଉଥିବା ବେଳେ ପୂର୍ବରୁ ମେଧାବୀ ଛାତ୍ରଛାତ୍ରୀ ମାର୍କ ବେସିସ୍ ଚୟନରେ ନିଯୁକ୍ତିରୁ ବଞ୍ଚିତ ହେଉଥିବା କହିଛନ୍ତି। ତେଣୁ ମାର୍କ ବେସିସ୍ ଚୟନ ନକରି ପରୀକ୍ଷା ମାଧ୍ୟମରେ ନିଯୁକ୍ତି ଦେଲେ ନିଯୁକ୍ତିରେ ଅନ୍ୟମାନେ ମଧ୍ୟ ସୁଯୋଗ ପାଇପାରିବେ। କାରଣ ଏବେ ଲକ୍ଷ୍ୟ ଲକ୍ଷ୍ୟ ପିଲା ବେକାରୀ ସମସ୍ୟାରେ ବେକାର ବୁଲୁଛନ୍ତି। ଏପରି ସମୟରେ ପୋଷ୍ଟାଲ ବିଭାଗ ପରୀକ୍ଷା ନକରି ମାର୍କ ବେସିସ୍ ରେ ନିଯୁକ୍ତି ଦେବା ମେଧାବୀ ଛାତ୍ରଛାତ୍ରୀଙ୍କ ପ୍ରତି ଉପହାସ ବୋଲି କହିଛନ୍ତି। ଅନ୍ୟପଟେ ସବୁ ନିଯୁକ୍ତି ପରୀକ୍ଷା ମାଧ୍ୟମରେ ହେଉଥିବା ବେଳେ ଡାକ ବିଭାଗରେ ନିଯୁକ୍ତି ମାର୍କ ବେସିସ୍ ରେ ହେବା ନିହାତି ଭୁଲ ଏବଂ ଏହି ମାର୍କ ବେସିସ୍ ବ୍ୟବସ୍ଥା ନ ବଦଳିଲେ ଆନ୍ଦୋଳନ କରିବେ ବୋଲି ପିଲାମାନେ ଚେତାବନୀ ଦେଇଛନ୍ତି।

ନୂଆଦିଲ୍ଲୀ: ଡାକଘର ଗ୍ରାହକଙ୍କ ପାଇଁ ବଡ ଖବର। ଯଦି ଡାକଘରେ ଆପଣଙ୍କର ଖାତା ରହିଛି, ତେବେ ଆପଣଙ୍କୁ କେତେକ ପରିବର୍ତ୍ତିତ ନିୟମ ସମ୍ପର୍କରେ ଜାଣିବାକୁ ହେବ। କାରଣ କେନ୍ଦ୍ର ସରକାର ଡାକ ଘର ସଞ୍ଚୟ ଜମା ସଂପର୍କିତ ନିୟମରେ କେତେକ ପରିବର୍ତ୍ତନ ଘଟାଇଛନ୍ତି। ଏହି ନିୟମ ଚଳିତମାସ ପହିଲାଠାରୁ ଲାଗୁ କରାଯାଇଛି।  ଇଣ୍ଡିଆ ପୋଷ୍ଟ ପେମେଣ୍ଟବ୍ୟାଙ୍କ ବର୍ତ୍ତମାନ ଏହାର ଟଙ୍କା ଉଠାଣ, ଜମା କରିବା ଏବଂ ଆଧାର ଆଧାରିତ ପେମେଣ୍ଟ ବ୍ୟବସ୍ଥା ଉପରେ ଚାର୍ଜ ଲଗାଇବାକୁ ନିଷ୍ପତ୍ତି ନେଇଛି। ଏହାର ଅର୍ଥ ହେଉଛି ଏହି ନୂଆ ନିୟମ ଲାଗୁ କରାଯିବା ପରେ ଆପଣଙ୍କୁ ଟଙ୍କା ଜମା କରିବା ଏବଂ ଉଠାଣ ପାଇଁ ମଧ୍ୟ ଚାର୍ଜ ଦେବାକୁ ପଡିବ।

ଇଣ୍ଡିଆ ପୋଷ୍ଟ ଆକାଉଣ୍ଟ ଉପରେ ଲାଗିବ ଚାର୍ଜ: ଆଇପିପିବି ନେଟ୍‌ଓ୍ଵର୍କ ଉପରେ ଅସୀମିତ ମାଗଣା ଅର୍ଥ ନେଣଦେଣ କରାଯାଏ। ମାତ୍ର ଅଣଆଇପିପିବି ପାଇଁ କେବଳ ତିନି ଥର ମାଗଣାରେ ଅର୍ଥ ନେଣଦେଣ କରାଯାଇପାରିବ। ଏହି ନିୟମ ମିନି ଷ୍ଟେଟମେଣ୍ଟ, ଟଙ୍କା ଉଠାଣ ଓ ଟଙ୍କା ଜମା କରିବା ପାଇଁ ଉଦ୍ଦିଷ୍ଟ। ଆଇପିପିବି ନେଟ୍‌ଓ୍ଵର୍କରେ ମାଗଣା କାରବାର ସୀମା ସମାପ୍ତ ହେବା ପରେ ପ୍ରତି କାରବାର ଉପରେ ଏକ ଗ୍ରାହକଙ୍କୁ ଚାର୍ଜ ଦେବାକୁ ପଡିବ। ତେବେ ମାଗଣା କାରବାର ସୀମା ସମାପ୍ତ ହେବା ପରେ କୌଣସି ବି ଜମା ରାଶି ଉପରେ ୨୦ ଟଙ୍କା ଚାର୍ଜ ଲାଗିବ।

ସଞ୍ଚୟ ଜମା ଖାତା ଉପରେ କେତେ ଚାର୍ଜ: ଯଦି ଆପଣଙ୍କ ସଞ୍ଚୟ ଜମା ଖାତା ରହିଛି ତେବେ ଆପଣଙ୍କୁ ୪ ଥର ଟଙ୍କା ଉଠାଇବା ଉପରେ କୌଣସି ଶୁଳ୍କ ଦେବାକୁ ପଡିବନାହିଁ, ମାତ୍ର ସେଥିରୁ ଅଧିକ ଥର କାରବାର ଉପରେ ଆପଣଙ୍କୁ ୨୫ ଟଙ୍କା କିମ୍ବା ୦.୫ ପ୍ରତିଶତ ଚାର୍ଜ ଦେବାକୁ ପଡିବ। ଅନ୍ୟପକ୍ଷରେ ଟଙ୍କା ଜମା କରିବା ପାଇଁ କୌଣସି ଶୁଳ୍କ ଦେବାକୁ ପଡିବନାହିଁ।

ସଞ୍ଚୟ ଓ ଚଳନ୍ତି ଖାତା ଉପରେ କେତେ ଚାର୍ଜ: ଯଦି ଆପଣଙ୍କ ସଞ୍ଚୟ ଓ ଚଳନ୍ତି ଖାତା ରହିଛି ତେବେ ଏଥିରୁ ପ୍ରତି ମାସରେ ୨୫,୦୦୦ ଟଙ୍କା ପର୍ଯ୍ୟନ୍ତ ଅର୍ଥ କାଢି ନେଇପାରିବେ। ଏଥିରୁ ଅଧିକ ଟଙ୍କା ଉଠାଣ ଲାଗି ଆପଣଙ୍କୁ ପ୍ରତି ଥର ୨୫ ଟଙ୍କା ଶୁଳ୍କ ଦେବାକୁ ପଡିବ। ଅପରପକ୍ଷେ ୧୦ ହଜାର ଟଙ୍କା ପର୍ଯ୍ୟନ୍ତ ଅର୍ଥ ଜମା କଲେ ଗ୍ରାହକଙ୍କୁ କୌଣସି ଚାର୍ଜ ଦେବାକୁ ହେବ ନାହିଁ। ଅପରପକ୍ଷେ ଏଥିରୁ ଅଧିକ ଟଙ୍କା ଜମା କଲେ ପ୍ରତି ଜମା ପିଛା ଅତି କମ୍‌ରେ ୨୫ ଟଙ୍କା ଚାର୍ଜ ଦେବାକୁ ପଡିବ।