ଲକ୍ଷ୍ନୌ: ଘରୋଇ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚାଲିଥିବା ଟି-୨୦ ସିରିଜର ୪ର୍ଥ ମୁକାବିଲା ବୁଧବାର ଖେଳାଯିବ। ସ୍ଥାନୀୟ ଏକନ୍ନା କ୍ରିକେଟ୍‌ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍‌ ଉଭୟ ଦଳ ପାଇଁ ବେଶ୍‌ ଗୁରୁତ୍ୱବହନ କରୁଛି। ପାଞ୍ଚ ମ୍ୟାଚ୍‌ବିଶିଷ୍ଟ ସିରିଜରେ ୨-୧ରେ ଅଗ୍ରଣୀ ରହିଥିବା ସୂର୍ଯ୍ୟକୁମାର ଯାଦବଙ୍କ ନେତୃତ୍ୱାଧୀନ ଟିମ୍‌ ଇଣ୍ଡିଆ ଏଠାରେ ବିଜୟୀ ହୋଇ ଆଗୁଆ ସିରିଜ କବ୍‌ଜା କରିବା ଲକ୍ଷ୍ୟରେ ରହିଛି। ଅପରପକ୍ଷରେ ଭ୍ରମଣକାରୀ ଦକ୍ଷିଣ ଆଫ୍ରିକା କିନ୍ତୁ ଏହି ମୁକାବିଲାକୁ ଜିତି ସିରିଜକୁ ଉଜ୍ଜୀବିତ ରଖିବାକୁ ଉଦ୍ୟମ କରିବ। ପୂର୍ବରୁ ଟି-୨୦ ସିରିଜର ପ୍ରଥମ ଓ ୩ୟ ମ୍ୟାଚକୁ ଭାରତ ଯଥାକ୍ରମେ ୧୦୧ ରନ ଓ ୭ ୱିକେଟ୍‌ରେ ଜିତିଥିଲା। ଦ୍ୱିତୀୟ ମ୍ୟାଚକୁ ଦକ୍ଷିଣ ଆଫ୍ରିକା ୫୧ ରନରେ ବିଜୟୀ ହୋଇଥିଲା।

ସଞ୍ଜୁଙ୍କୁ ମିଳିପାରେ ସୁଯୋଗ:
ଘରୋଇ ଭାରତୀୟ ଦଳ ୨-୧ରେ ସିରିଜ ଅଗ୍ରଣୀ ରହିଥିଲେ ମଧ୍ୟ ଅଧିନାୟକ ସୂର୍ଯ୍ୟକୁମାର ଓ ଉପ-ଅଧିନାୟକ ଶୁବମନ ଗିଲ୍‌ଙ୍କ ଫର୍ମ ଟିମ୍‌ ମ୍ୟାନେଜମେଣ୍ଟ ପାଇଁ ସବୁଠୁ ଚିନ୍ତାର କାରଣ ରହିଛି। ଗିଲ୍‌ ୩ଟି ଯାକ ମ୍ୟାଚରେ ଯଥାକ୍ରମେ ୪, ୦, ୨୮ ରନ କରିଛନ୍ତି। ସେହିଭଳି ସୂର୍ଯ୍ୟକୁମାର କଟକରେ ୧୨, ଚଣ୍ଡିଗଡ଼ରେ ୫ ଓ ତୃତୀୟ ଟି-୨୦ରେ ୧୨ ରନ କରିଥିଲେ। ତେଣୁ ଚତୁର୍ଥ ମୁକାବିଲାରେ ଗିଲ୍‌ଙ୍କୁ ବିଶ୍ରାମ ଦେବାକୁ ଟିମ୍‌ ମ୍ୟାନେଜମେଣ୍ଟ ଚିନ୍ତା କରୁଥିବା ରିପୋର୍ଟରୁ ଜଣାପଡ଼ିଛି। ଯଦି ଗିଲ୍‌ଙ୍କୁ ବିଶ୍ରାମ ଦିଆଯାଏ ତେବେ ଇନଫର୍ମ ୱିକେଟ୍‌କିପର ସଞ୍ଜୁ ସାମସନଙ୍କୁ ଚୂଡ଼ାନ୍ତ ଏକାଦଶରେ ସୁଯୋଗ ମିଳିପାରେ। ସଞ୍ଜୁ ଗତବର୍ଷ ଟି-୨୦ରେ ୩ଟି ଶତକ ମାରିଥିଲେ।

ମ୍ୟାଚ୍‌ ଆରମ୍ଭ: ରାତି ୭ଟା
ପ୍ରସାରଣ: ଷ୍ଟାର୍‌ ସ୍ପୋର୍ଟ୍ସ ନେଟୱର୍କ   

ଗୋଲ୍ଡ କୋଷ୍ଟ: ଆଜି ଖେଳାଯାଇଥିବା ଚତୁର୍ଥ ଟି-୨୦ରେ ଭାରତ ୪୮ ରନରେ ଅଷ୍ଟ୍ରେଲିଆକୁ ହରାଇଛି। ଏହି ବିଜୟ ସହ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ଭାରତ ୨-୧ର ଅଗ୍ରଣୀ ହାସଲ କରିଛି। ପ୍ରଥମେ ବ୍ୟାଟିଂ କରିଥିବା ଭାରତ ୧୬୭ ରନ କରିଥିଲା। ଜବାବରେ ଅଷ୍ଟ୍ରେଲିଆ ୧୮.୨ ଓଭର ଖେଳି ମାତ୍ର ୧୧୯ ରନ୍‌ କରି ଅଲ୍‌ ଆଉଟ ହୋଇଯାଇଛି।

୧୬୮ ରନର ବିଜୟ ଲକ୍ଷ୍ୟ ପିଛା କରିଥିବା ଅଷ୍ଟ୍ରେଲିଆର ଦୁଇ ଓପନର ମିଚେଲ୍ ମାର୍ଶ ଓ ମାଥ୍ୟୁ ସର୍ଟ ୩୭ ରନ ଯୋଡ଼ିଥିଲେ। ସର୍ଟ(୨୫ ରନ)ଙ୍କୁ ଆଉଟ୍ କରି ଅକ୍ଷର ପଟେଲ୍ ଭାରତକୁ ପ୍ରଥମ ସଫଳତା ଦେଇଥିଲେ। ଏହାପରେ ମିଚେଲ ମାର୍ଶ ବଡ଼ ଶଟ୍ ଖେଳି ରନ ଗତି ଆଗକୁ ବଢ଼ାଇବାକୁ ଚେଷ୍ଟା କରିଥିଲେ। ହେଲେ ଶିବମ ଦୁବେଙ୍କ ବଲ୍‌ରେ ମିଚେଲ ମାର୍ଶ(୩୦) ୱିକେଟ୍ ଯାଇଥିଲା। ଏହାପରେ ଅଷ୍ଟ୍ରେଲିଆର କୌଣସି ବ୍ୟାଟର ୨୦ ରନ୍ ବି କରିପାରି ନଥିଲେ। ଦଳ ପକ୍ଷରୁ ଜସ ଇଂଲିସ ୧୨ ରନ୍, ଟିମ ଡେଭିଡ୍ ୧୪, ଜସ ଫିଲିପ ୧୦,ମାର୍କସ ଷ୍ଟୋଇନିସ ୧୭ ରନ୍ କରିଥିଲେ। ମାକ୍ସୱେଲ୍ ମଧ୍ୟ ୫ ରନ୍ କରି ଆଉଟ୍ ହୋଇଯାଇଥିଲେ।

ଭାରତ ପକ୍ଷରୁ ୱାଶିଂଟନ ସୁନ୍ଦର ସର୍ବାଧିକ ୩ଟି ୱିକେଟ୍ ନେଇଥିବା ବେଳେ ଶିବମ ଦୁବେ,ଅକ୍ଷର ପଟେଲ ଦୁଇଟି ଲେଖାଏ ୱିକେଟ ନେଇଥିଲେ। ସେହିପରି ଅର୍ଶଦୀପ ସିଂହ, ଜସପ୍ରୀତ ବୁମ୍ରା ଓ ବରୁଣ ଚକ୍ରବର୍ତ୍ତୀଙ୍କୁ ଗୋଟିଏ ଲେଖାଏ ସଫଳତା ମିଳିଥିଲା।  

ଗୋଲ୍ଡ କୋଷ୍ଟ: ଭାରତ ଓ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ୫ମ୍ୟାଚ୍‌ ବିଶିଷ୍ଟ ଟି-୨୦ ସିରିଜ୍‌ ବରାବର ସ୍ଥିତିରେ ରହିଛି। ସିରିଜ୍‌ରେ ୩ଟି ମ୍ୟାଚ ପରେ ଉଭୟ ଦଳ ଗୋଟିଏ ଲେଖାଏଁ ମ୍ୟାଚ୍‌ ଜିତି ସମାନ ଅବସ୍ଥାରେ ରହିଛନ୍ତି। ଏହା ମଧ୍ୟରେ ଗୁରୁବାର ଚତୁର୍ଥ ଏବଂ ଶନିବାର ପଞ୍ଚମ ତଥା ଶେଷ ମ୍ୟାଚ୍‌ ଖେଳାଯିବ। ଏହି ମ୍ୟାଚ୍‌ ଜିତି ଉଭୟ ଦଳ ଅଗ୍ରଣୀ ନେବା ଲକ୍ଷ୍ୟରେ ରହିଛନ୍ତି। ବିଶେଷ କରି ଘରୋଇ ଦଳର ପ୍ରତିଷ୍ଠିତ ଖେଳାଳି ଜୋଶ ହାଜ୍‌ଲେଉଡ୍‌,  ଟ୍ରାଭିସ ହେଡ ଓ ସିନ ଆବଟ ଦଳରେ ନାହାନ୍ତି। ଏମାନେ ସମସ୍ତେ ପର୍ଥରେ ନଭେମ୍ବର ୨୧ରୁ ଆରମ୍ଭ ହେବାକୁ ଥିବା ଇଂଲଣ୍ଡ ବିପକ୍ଷ ଆସେସ ସିରରିଜ୍‌ର ପ୍ରଥମ ଟେଷ୍ଟ ଲାଗି ଦଳରେ ସାମିଲ ହୋଇଛନ୍ତି। ଏହି ଦଳରେ ସାମିଲ ହୋଇଥିବା କେବଳ ଜଣେମାତ୍ର ଖେଳାଳି ୱିକେଟରକ୍ଷକ ଜୋଶ ଇଂଲିଶ ଏବେ ଟି-୨୦ ଦଳରେ ଖେଳୁଛନ୍ତି। ଅନ୍ୟ ପକ୍ଷରେ ଆସନ୍ତାକାଲିଠାରୁ ଦକ୍ଷିଣ ଆଫ୍ରିକା-ଏ’ ସହ ଦ୍ୱିତୀୟ ଅନ୍‌ଅଫିସିଆଲ ଟେଷ୍ଟ ଖେଳିବାକୁ କୁଲଦୀପ ଯାଦବ ଭାରତରେ ପହଞ୍ଚି ପ୍ରସ୍ତୁତ ହୋଇଛନ୍ତି। ଶୁବମନ ଗିଲ୍‌ ଟେଷ୍ଟ ଦଳର ନେତୃତ୍ୱ ନେଉଥିଲାବେଳେ ଏଠାରେ ସଂଘର୍ଷ କରୁଛନ୍ତି। ଦୁଇ ସ୍ପିନର ଅକ୍ଷର ପଟେଲ ଓ ୱାଶିଂଟନ ସୁନ୍ଦର କିମ୍ବା ଫାଷ୍ଟ ବୋଲର ଯଶପ୍ରୀତ୍‌ ବୁମ୍‌ରା ନଭେମ୍ବର ୧୪ରୁ ଆରମ୍ଭ ହେବାକୁ ଥିବା ଦକ୍ଷିଣ ଆଫ୍ରିକା ବିପକ୍ଷ ୨ ମ୍ୟାଚ୍‌ ବିଶିଷ୍ଟ ଟେଷ୍ଟ ସିରିଜ୍‌ରେ ସ୍ଥାନ ପାଇପାରନ୍ତି। କିନ୍ତୁ ବରିଷ୍ଠ ଖେଳାଳିଙ୍କ ଅନୁପସ୍ଥିତିରେ ଭାରତ ଏଠାରେ ଆଉ ଏକ ସିରିଜ୍‌ ଜିତିବାକୁ ସୁଯୋଗ ପାଇଛି। ଅଷ୍ଟ୍ରେଲିଆ ମାଟିରେ ଭାରତ ୨୦୦୮ ପରଠାରୁ ଟି-୨୦ ଫର୍ମାଟରେ ସିରିଜ୍‌ ହାରିନାହିଁ।

ଗିଲ୍‌ଙ୍କ ଉପରେ ନଜର
ଏହି ସିରିଜ୍‌ରେ ଟି-୨୦ ଦଳର ଉପଅଧିନାୟକ ଶୁବମନ ଗିଲ୍‌ ରନ୍‌ ଲାଗି ସଂଘର୍ଷ କରୁଛନ୍ତି। ଏହି ସିରିଜ୍‌ର ପ୍ରଥମ ୩ଟି ମ୍ୟାଚ୍‌ରେ ଇନିଂସ ଓପନ କରି ଯଥାକ୍ରମେ ଅପରାଜିତ ୩୭, ୫ ଓ ୧୫ ରନ୍‌ କରିବାକୁ ସମର୍ଥ ହୋଇଛନ୍ତି। ଏହାକୁ ନେଇ ସମର୍ଥକମାନେ କ୍ଷୁବ୍ଧ ହୋଇଥିଲେ ମଧ୍ୟ ଗିଲ ଦଳରେ ତିଷ୍ଠି ରହିଛନ୍ତି। ଅଷ୍ଟ୍ରେଲିଆ ଭଳି ସେ ଦକ୍ଷିଣ ଆଫ୍ରିକା ବିପକ୍ଷ ଟେଷ୍ଟ ସିରିଜ୍‌ ଲାଗି ଘରୋଇ ମାଟିରେ ପ୍ରସ୍ତୁତି କରିବାର ଆବଶ୍ୟକତା ରହିଥିଲା। କିନ୍ତୁ ତାହା ସେ ନ କରି ଟି-୨୦ ଫର୍ମାଟରେ ସଘର୍ଷ କରୁଥିଲେ ମଧ୍ୟ ଖେଳୁଛନ୍ତି। ଗିଲ୍‌ଙ୍କୁ ଦଳରେ ସାମିଲ କରାଯାଇଥିବାରୁ ସେ ଆଉ ଜଣେ ପ୍ରତିଭାବାନ ଖେଳାଳିଙ୍କ ରାସ୍ତା ବନ୍ଦ କରିଥିଲାବେଳେ ଆଉ ଜଣେ ଖେଳାଳିଙ୍କ କ୍ୟାରିୟର ଶେଷ କରିଦେଇଛନ୍ତି ବୋଲି ସିଧାସଳଖ ଅଭିଯୋଗ ଆଣିଛନ୍ତି ଭାରତର କିଂବଦନ୍ତୀ କ୍ରିକେଟର କେ. ଶ୍ରୀକାନ୍ତ। ଦଳରେ ଗିଲ ସାମିଲ ହୋଇଥିବାରୁ ଓପନର ଯଶସ୍ୱୀ ଜୟସ୍ୱାଲଙ୍କୁ ଦଳରେ ନିଆଯାଉନାହିଁ। ସେହିପରି ଗିଲ ଇନିଂସ ଓପନ କରିବା ଫଳରେ ସଞ୍ଜୁ ସାମସନଙ୍କ କ୍ୟାରିୟର ମଧ୍ୟ ଏକପ୍ରକାର ଶେଷ ହୋଇଯାଇଛି। ଏଭଳି ସ୍ଥିତିରେ ତାଙ୍କ ଉପରେ ନଜର ରହିବା ସ୍ୱାଭାବିକ୍‌। ଏହା ମଧ୍ୟରେ ଅଲରାଉଣ୍ଡର ନୀତୀଶ କୁମାର ରେଡ୍ଡୀ ଫିଟ୍‌ ହୋଇଯାଇଛନ୍ତି। ବୋଲିଂ କୋଚ୍‌ ମୋର୍ଣ୍ଣ ମୋର୍କେଲଙ୍କ କହିବା ଅନୁଯାୟୀ ବ୍ୟାଟିଂ, ଫିଲ୍ଡିଂ ଓ ବୋଲିଂ କରିବାରେ ରେଡ୍ଡୀ କୌଣସି ଅସୁବିଧାର ସମ୍ମୁଖୀନ ହୋଇନାହାନ୍ତି। କିନ୍ତୁ ସେ କେତେ ପରିମାଣରେ ମ୍ୟାଚ୍‌ ଫିଟ୍‌ ଅଛନ୍ତି ତାହାକୁ ଜାଣିବା ପରେ ଦଳରେ ସାମିଲ କରାଯିବ କି ନାହିଁ ସ୍ଥିର ହେବ। ତୃତୀୟ ଟି-୨୦ରେ ଭାରତ ଅଭିଷେକ ଶର୍ମାଙ୍କୁ ଶୀଘ୍ର ହରାଇଥିଲେ ମଧ୍ୟ ଅନ୍ୟମାନଙ୍କ ମିଳିତ ସଫଳତା ଯୋଗୁ ଭାରତ ମ୍ୟାଚ୍‌ ଜିତିଥିଲା। ବିଶେଷ କରି ପ୍ରଥମ ମ୍ୟାଚ୍‌ ଖେଳି ୱାଶିଂଟନ ସୁନ୍ଦର ବଡ଼ ବଡ଼ ସଟ୍‌ ଖେଳି ସର୍ବାଧିକ ସ୍କୋର କରିଥିଲାବେଳେ ସାମସନ୍‌ଙ୍କ ସ୍ଥାନରେ ଖେଳିଥିବା ଜିତେଶ ଶର୍ମାଙ୍କ ଆତ୍ମବିଶ୍ୱାସଭରା ବ୍ୟାଟିଂ ତାଙ୍କୁ ଦଳରେ ରଖିବାକୁ ବାଧ୍ୟ କରିଛି। ବୋଲିଂରେ ଦଳର ସେପରି କିଛି ପରିବର୍ତ୍ତନ ହେବ ବୋଲି ଆଶା କରାଯାଉନାହିଁ। ଅଲରାଉଣ୍ଡର ଶିବମ ଦୁବେଙ୍କ ସ୍ଥାନରେ ଫିଟ୍‌ ହୋଇଥିଲେ ନୀତୀଶଙ୍କୁ ସାମିଲ କରାଯିବାର ସମ୍ଭାବନା ରହିଛି।

ଅନ୍ୟପକ୍ଷରେ ଅଷ୍ଟ୍ରେଲିଆ ଦଳରୁ ହାଜ୍‌ଲେଉଡ୍‌, ହେଡ୍‌ ଓ ସିନ ଆବଟଙ୍କୁ ପ୍ରତ୍ୟାହାର କରିନିଆଯାଇଛି। ଏମାନଙ୍କ ସ୍ଥାନରେ ବେନ୍‌ ଡ୍ୱାରଶୁଇସ୍‌ ଓ ଗ୍ଲେନ୍‌ ମ୍ୟାକ୍ସୱେଲଙ୍କୁ ସାମିଲ କରାଯାଇଛି। ଉଭୟ ମ୍ୟାଚ୍‌ ଫିଟ୍‌ ନାହାନ୍ତି। ଏଣୁ ସେମାନଙ୍କୁ ଦଳରେ ସାମିଲ କରାଯିବ କି ନାହିଁ ତାହା ଶେଷ ମୁହୂର୍ତ୍ତରେ ସ୍ଥିର ହେବ। ତୃତୀୟ ମୁକାବିଲାରେ ଟିମ୍‌ ଡେଭିଡ୍‌ଙ୍କ ବିଗ୍‌ ହିଟିଂ ଓ ମାର୍କସ ଷ୍ଟୋଇନିସ୍‌ଙ୍କ ଚମକ୍ରାର ଇନିଂସ ଅଷ୍ଟ୍ରେଲିଆକୁ ଫାଇଦାରେ ରଖିବ। ହେଡ୍‌ଙ୍କ ଅନୁପସ୍ଥିତିରେ ମାଥ୍ୟୁ ସର୍ଟ ଇନିଂସ ଓପନ କରିବେ। ଉପରୋକ୍ତ ଦୁଇ ଖେଳାଳିଙ୍କୁ ନେଇ ଦଳ ପରିବର୍ତ୍ତନ ହୋଇପାରେ।

ଭାରତ - ଅଭିଷେକ ଶର୍ମା, ଶୁବମନ ଗିଲ୍‌, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ଅକ୍ଷର ପଟେଲ, ୱାଶିଂଟନ ସୁନ୍ଦର, ଜିତେଶ ଶର୍ମା (ୱିକେଟରକ୍ଷକ), ଶିବମ ଦୁବେ, ଅର୍ଶଦୀପ ସିଂହ, ଯଶପ୍ରୀତ୍‌ ବୁମ୍‌ରା ଓ ବରୁଣ ଚକ୍ରବର୍ତ୍ତୀ।
ଅନ୍ୟ ଖେଳାଳି- ନୀତୀଶ କୁମାର ରେଡ୍ଡୀ, ସଞ୍ଜୁ ସାମସନ, ରିଙ୍କୁ ସିଂ, ହର୍ଷିତ ରାଣା।

ପ୍ରସାରଣ : ଷ୍ଟାରସ୍ପୋର୍ଟ୍ସ ନେଟ୍‌ୱର୍କ, ଆରମ୍ଭ: ଅପରାହ୍ଣ ୧ଟା ୪୫

ଅଷ୍ଟ୍ରେଲିଆ - ମାଥ୍ୟୁ ସର୍ଟ, ମିଚେଲ ମାର୍ଶ (ଅଧିନାୟକ), ଜୋଶ ଇଂଲିଶ (ୱିକେଟ ରକ୍ଷକ), ଟିମ୍‌ ଡେଭିଡ୍‌, ମିଚେଲ ଓଏନ, ମାର୍କସ ଷ୍ଟୋଇନିସ, ଗ୍ଲେନ୍‌ ମ୍ୟାକ୍ସୱେଲ, ଜାଭିୟର ବାର୍ଟଲେଟ, ବେନ୍‌ ଡ୍ୱାରଶୁଇସ୍‌, ନାଥାନ ଏଲିସ, ମାଥ୍ୟୁ କୁନେମାନ୍‌।
ଅନ୍ୟ ଖେଳାଳି- ମାହଲି ବିୟର୍ଡମ୍ୟାନ୍‌, ତନ୍‌ବୀର ସାଙ୍ଗା, ଜୋଶ ଫିଲିପ୍‌।

ପୁଣେ: ଭାରତ ଓ ଇଂଲଣ୍ଡ ମଧ୍ୟରେ ଚାଲିଥିବା ଟି-୨୦ ସିରିଜ୍‌ ଏକ ଉତ୍ସାହଜନକ ମୋଡରେ ପହଞ୍ଚିଛି। ଭାରତୀୟ ସ୍ପିନରଙ୍କ କବ୍‌ଜାକୁ ମୁକୁଳି ତୃତୀୟ ଟି-୨୦ରେ ବିଜୟୀ ହୋଇଥିବା ଇଂଲଣ୍ଡ ଏବେ ସିରିଜ୍‌ ଜିତିବା ଆଶାରେ ରହିଛି। ଯାହା ଫଳରେ ଟି-୨୦ରେ ବିଶ୍ୱର ଦୁଇ ଶ୍ରେଷ୍ଠ ଦଳ ମଧ୍ୟରେ ଆସନ୍ତାକାଲି ହେବାକୁ ଥିବା ଚତୁର୍ଥ ମୁକାବିଲା ଯେ ରୋମାଞ୍ଚକ ଓ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ ହେବ ଏଥିରେ କୌଣସି ସନ୍ଦେହ ନାହିଁ। ଦୁଇ ଦେଶ ମଧ୍ୟରେ ଚାଲିଥିବା ୫ ମ୍ୟାଚ୍‌ ବିଶିଷ୍ଟ ସିରିଜ୍‌ର କୋଲକାତା ଓ ଚେନ୍ନାଇରେ ଖେଳାଯାଇଥିବା ପ୍ରଥମ ଦୁଇଟି ମ୍ୟାଚ୍‌ରେ ଭାରତ ବିଜୟୀ ହୋଇଛି। କିନ୍ତୁ ରାଜକୋଟରେ ଖେଳାଯାଇଥିବା ତୃତୀୟ ଟି-୨୦କୁ ଇଂଲଣ୍ଡ ୨୬ ରନ୍‌ ବ୍ୟବଧାନରେ ଜିତିନେଇଛି। ମହାରାଷ୍ଟ୍ର କ୍ରିକେଟ ସଂଘ ଷ୍ଟାଡିୟମ୍‌ରେ ଆସନ୍ତାକାଲି ବା ଶୁକ୍ରବାର ଖେଳାଯିବାକୁ ଥିବା ମ୍ୟାଚ୍‌ ଜିତି ଭାରତ ସିରିଜ୍‌ କବ୍‌ଜା ଲକ୍ଷ୍ୟରେ ରହିଛି। କିନ୍ତୁ ଘରୋଇ ଦଳ ଲାଗି ଏହା ଯେ ସହଜ ହେବ ନାହିଁ ତାହା ରାଜକୋଟ ଲଢେ଼ଇରୁ ସ୍ପଷ୍ଟ ହୋଇଛି।

ଇଂଲଣ୍ଡ ବିପକ୍ଷରେ ଭାରତର ସ୍ପିନରମାନେ ଯେପରି ପ୍ରଭାବଶାଳୀ ସାବ୍ୟସ୍ତ ହୋଇଛନ୍ତି, ସେହିପରି ପେସ୍‌ ବୋଲର କିମ୍ବା ବ୍ୟାଟର ପ୍ରଭାବ ପକାଇବାରେ ସମର୍ଥ ହୋଇ ନାହାନ୍ତି। ବିଶେଷକରି ଓପନର ସଞ୍ଜୁ ସାମସନ, ଅଧିନାୟକ ସୂର୍ଯ୍ୟକୁମାର ଯାଦବ ଓ ନଂ-୭ରେ ଖେଳିଥିବା ବ୍ୟାଟର ଆଦୌ ଫର୍ମରେ ନାହାନ୍ତି। ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା, ଅକ୍ଷର ପଟେଲ କିମ୍ବା ୱାଶିଂଟନ ସୁନ୍ଦର ସେମାନଙ୍କ ଅଲରାଉଣ୍ଡ ପ୍ରଦର୍ଶନ କରିବାରେ ସମର୍ଥ ହୋଇପାରି ନାହାନ୍ତି। ଯାହା ଫଳରେ ପ୍ରଥମ ୨ଟି ମ୍ୟାଚ୍‌ ଜିତିଥିଲେ ମଧ୍ୟ ଭାରତ ଏହି ସିରିଜ୍‌ରେ ଦମ୍‌ଦାର ଖେଳ ଦେଖାଇବାରେ ସମର୍ଥ ହୋଇପାରି ନାହିଁ। ବିଶେଷ କରି ଫାଷ୍ଟ ବୋଲରଙ୍କୁ ଖେଳିବାରେ ସାମସନଙ୍କ ଦୁର୍ବଳତା ପଦାରେ ପଡ଼ିଯାଇଛି। ନିକଟରେ ସେ ୩ଟି ଶତକ ହାସଲ କରିଥିଲେ ମଧ୍ୟ ଘଣ୍ଟାପ୍ରତି ୧୪୫ରୁ ୧୫୫ କିଲୋମିଟର ବେଗରେ ବୋଲିଂ କରୁଥିବା ଇଂଲଣ୍ଡର ଜୋଫ୍ରା ଆର୍ଚର କିମ୍ବା ମାର୍କ ଉଡ୍‌ଙ୍କୁ ଉଚିତ ମୁକାବିଲା କରିପାରୁ ନାହାନ୍ତି ସାମସନ। ଏହି ଟେକ୍ନିକାଲ ଅସୁବିଧା ଦୂର ନ ହେଲେ ୨୬, ୫ ଓ ୩ ରନ୍‌ କରିଥିବା ସାମସନ ଅନ୍ୟ ଦୁଇଟି ମ୍ୟାଚ୍‌ରେ ଯେ ଫ୍ଲପ୍‌ ହେବେ ଏଥିରେ ସନ୍ଦେହ ନାହିଁ। ସେହିପରି ଅଧିନାୟକ ସୂର୍ଯ୍ୟକୁମାର ଯାଦବ କୋଲକାତାରେ ୦, ଚେନ୍ନଇରେ ୧୨ ଓ ରାଜକୋଟରେ ୧୪ ରନ୍‌ କରିଛନ୍ତି। ଏ ସମସ୍ତ ପିଚ୍‌ରେ କିଛି ବିପଦ ନ ଥିଲେ ମଧ୍ୟ ସାମସନଙ୍କ ପରି ଇଂଲଣ୍ଡ ବିପକ୍ଷରେ ସୂର୍ଯ୍ୟକୁମାର ଖେଳିପାରୁ ନାହାନ୍ତି। ଫର୍ମ ନ ଥିବା ଆଉ ଜଣେ ଖେଳାଳି ହେଲେ ରିଙ୍କୁ ସିଂ। କୋଲକାତାରେ ତାଙ୍କୁ ବ୍ୟାଟିଂ କରିବାର ସୁଯୋଗ ମିଳି ନ ଥିଲେ ମଧ୍ୟ ପିଠିରେ ଆଘାତ ଲାଗିବାରୁ ପରବର୍ତ୍ତୀ ୨ଟି ମ୍ୟାଚ୍‌ରେ ନ ଖେଳି ବିଶ୍ରାମ ନେଇଥିଲେ। ଚତୁର୍ଥ ମ୍ୟାଚ୍‌ରେ ତାଙ୍କର ପ୍ରତ୍ୟାବର୍ତ୍ତନ ହେବ ବୋଲି ଆଶା କରାଯାଉଛି। କିନ୍ତୁ ଫିଟନେସ୍‌ ସହ ଫର୍ମରେ ନ ଥିବାରୁ ରିଙ୍କୁଙ୍କ ସ୍ଥାନରେ ରମଣଦୀପ ସିଂଙ୍କୁ ଖେଳିବାର ସୁଯୋଗ ମିଳିପାରେ। ସ୍ପିନ୍‌ ବୋଲିଂରେ ଭାରତ ବେଶ ପ୍ରଭାବ ପକାଇଛି। କିନ୍ତୁ ପେସ୍‌ରଙ୍କ ପ୍ରଭାବ ନାହିଁ। ଏଣୁ ଅର୍ଶଦୀପଙ୍କୁ ଏହି ମ୍ୟାଚ୍‌ରେ ଖେଳିବାର ସୁଯୋଗ ମିଳିପାରେ। ସେ ମହମ୍ମଦ୍‌ ସାମିଙ୍କ ସହ ବୋଲିଂ କଲେ ଭାରତକୁ ଉପଯୁକ୍ତ ଫଳ ମିଳିବ ବୋଲି ଆଶା କରାଯାଉଛି। ରାଜକୋଟରେ ଲଢ଼ୁଆ ଖେଳିଥିବା ହାର୍ଦ୍ଦିକ ପାଣ୍ଡ୍ୟାଙ୍କଠାରୁ ଅଧିକ ଆକ୍ରମଣାତ୍ମକ ଖେଳ ଆଶା କରାଯାଉଛି। ଇଂଲଣ୍ଡ ଦଳ ନିକଟରେ ଥିବା ଦୁର୍ବଳତାକୁ ସୁଧାରିବାରେ ସମର୍ଥ ହୋଇଛି। ଏଣୁ ଦଳ ତାହାର ଶକ୍ତି ଉପରେ ଭରସା କରି ଭାରତରେ ଟି-୨୦ ସିରିଜ୍‌ କବ୍‌ଜା କଲେ ଆଶ୍ଚର୍ଯ୍ୟ ହେବାର କିଛି ନାହିଁ।

ଭାରତୀୟ ଦଳ: ସୂର୍ଯ୍ୟକୁମାର ଯାଦବ (ଅଧିନାୟକ), ଅକ୍ଷର ପଟେଲ (ଉପ-ଅଧିନାୟକ), ଅଭିଷେକ ଶର୍ମା, ସଞ୍ଜୁ ସାମସନ, ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା, ରିଙ୍କୁ ସିଂ, ନୀତୀଶ କୁମାର ରେଡ୍ଡୀ, ହର୍ଷିତ ରାଣା, ଅର୍ଶଦୀପ ସିଂହ, ମହମ୍ମଦ ସାମି, ବରୁଣ ଚକ୍ରବର୍ତ୍ତୀ, ରବି ବିଷ୍ଣୋଇ, ୱାଶିଂଟନ ସୁନ୍ଦର ଓ ଧ୍ରୁବ ଜୁରେଲ।

ଇଂଲଣ୍ଡ ଦଳ: ଜୋଶ ବଟଲର (ଅଧିନାୟକ), ହ୍ୟାରୀ ବ୍ରୁକ୍‌ (ଉପ- ଅଧିନାୟକ), ଫିଲ ସଲ୍ଟ, ଜ୍ୟାକବ ବେଥେଲ, ଲିଆମ ଲିଭିଂଷ୍ଟୋନ, ଜୋଫ୍ରା ଆର୍ଚର, ଗସ ଅଟକିନସନ, ବେନ ଡକେଟ, ଜେମି ଓଭରଟନ, ଆଦିଲ ରସିଦ ଓ ମାର୍କ ଉଡ୍‌।

ଖେଳ ଆରମ୍ଭ- ରାତି ୭ଟା

ପ୍ରସାରଣ-ଷ୍ଟାର ସ୍ପୋର୍ଟ୍ସ, ହଟ୍‌ ଷ୍ଟାର

ହରାରେ: ଶୁବମାନ ଗିଲ୍‌ଙ୍କ ନେତୃତ୍ୱରେ ଭାରତ ଶୁକ୍ରବାର ଚତୁର୍ଥ ଟି-୨୦ ମ୍ୟାଚ୍‌ରେ ଘରୋଇ ଜିମ୍ବାୱେକୁ ଭେଟିବ। ସ୍ଥାନୀୟ ହରାରେ ସ୍ପୋର୍ଟ୍ସ କ୍ଲବ ଗ୍ରାଉଣ୍ଡରେ ଖେଳାଯିବାକୁ ଥିବା ଏହି ମ୍ୟାଚ୍‌ ଜିତି ଭାରତ ସିରିଜ ହାତେଇବା ଲକ୍ଷ୍ୟରେ ରହିଛି। ପ୍ରଥମ ମ୍ୟାଚ୍‌ରେ ୧୩ ରନରେ ପରାସ୍ତ ହୋଇଥିବା ଭାରତ ଦ୍ୱିତୀୟ ମ୍ୟାଚ୍‌ରେ ୧୦୦ ଓ ତୃତୀୟରେ ୨୩ ରନରେ ବିଜୟୀ ହୋଇ ୫ ମ୍ୟାଚ୍‌ ବିଶିଷ୍ଟ ଏହି ସିରିଜରେ ୨-୧ରେ ଅଗ୍ରଣୀ ହାସଲ କରିଛି। ଯୁବ ଖେଳାଳିଙ୍କୁ ନେଇ ଗଠିତ ଭାରତୀୟ ଦଳ ପାଇଁ ଏହି ସିରିଜରେ ବିଶେଷ ଗୁରୁତ୍ୱ ବହନ କରୁଛି। ଟି-୨୦ ବିଶ୍ୱକପ୍‌ ବିଜୟ ପରେ ଅଭିଜ୍ଞ ତଥା ତାରକା ଖେଳାଳିମାନେ ଏହି ସିରିଜ ନଖେଳି ବିଶ୍ରାମ ନେଇଛନ୍ତି। ଏପର୍ଯ୍ୟନ୍ତ ସିରିଜରେ ଯୁବ ଓପନର ଅଭିଷେକ ଶର୍ମା ଓ ସ୍ପିନ ଅଲରାଉଣ୍ଡର ୱାସିଂଟନ ସୁନ୍ଦର ପ୍ରଭାବୀ ପ୍ରଦର୍ଶନ କରିଛନ୍ତି। ଟି-୨୦ରୁ ରବୀନ୍ଦ୍ର ଜାଡେଜା ଅବସର ନେବା ପରେ ତାଙ୍କ ସ୍ଥାନ ନେବାକୁ ସୁନ୍ଦର ପ୍ରୟାସ କରିବେ। ଦ୍ୱିତୀୟ ମ୍ୟାଚ୍‌ରେ ଅଭିଷେକ ୪୭ ବଲରୁ ଶତକ ହାସଲ କରିଥିଲେ। ଶିବମ ଦୁବେ, ସଞ୍ଜୁ ସାମସନ ଓ ୟଶସ୍ୱୀ ଜୟସ୍ୱାଲ ଦଳରେ ସାମିଲ ହେବା ପରେ ଭାରତୀୟ ଦଳ ଅଧିକ ଶକ୍ତିଶାଳୀ ଓ ସନ୍ତୁଳିତ ମନେ ହେଉଛି।

ତେଣୁ ଏହି ମ୍ୟାଚ୍‌ରେ ଭାରତ ଫେବରାଇଟ ବିବେଚିତ ହେଉଛି। ଏହି ୩ ଖେଳାଳି ପ୍ରଥମ ଦୁଇଟି ମ୍ୟାଚ୍‌ ଖେଳିପାରି ନଥିଲେ। ଅପରପକ୍ଷରେ ଜିମ୍ବାୱେ ଘରୋଇ ପରିବେଶରୁ ଫାଇଦା ଉଠାଇ ସିରିଜକୁ ପ୍ରତ୍ୟାବର୍ତ୍ତନ କରିବାକୁ ପ୍ରୟାସ କରିବ। ଅଧିନାୟକ ସିକନ୍ଦର ରାଜା, ବ୍ଲେସିଂ ମୁଜାରବାନୀ, ଡିଅନ ମେୟର୍ସ ପୁଣି କମାଲ କରିବେ ବୋଲି ଆଶା କରାଯାଉଛି। ପାଗ ସଫା ରହିବ ଓ ଟସ ଜିତିବା ଦଳ ପ୍ରଥମେ ଫିଲ୍ଡିଂ କରିବାକୁ ନିଷ୍ପତ୍ତି ନେବ ବୋଲି ଆଶା କରାଯାଉଛି। ଉଭୟ ଦଳ ଏପର୍ଯ୍ୟନ୍ତ ୧୧ଟି ମ୍ୟାଚ୍‌ ଖେଳିଛନ୍ତି। ଏଥିରେ ଭାରତ ୮ ଓ ଜିମ୍ବାୱେ ୩ଟିରେ ବିଜୟୀ ହୋଇଛି।

ରାୟପୁର: ଅଷ୍ଟ୍ରେଲିଆ ବିପକ୍ଷ ଟି-୨୦ ସିରିଜ୍‌‌ରେ ଭାରତ ୨-୧ରେ ଆଗୁଆ ରହିଛି। ଭାରତର ଯୁବ ଖେଳାଳିମାନେ ପ୍ରଥମ ଦୁଇଟି ମ୍ୟାଚ୍‌‌ରେ ଜିତିଥିଲେ ମଧ୍ୟ ଗୁଆହାଟୀରେ ଖେଳାଯାଇଥିବା ତୃତୀୟ ମ୍ୟାଚ୍‌‌ରେ ଗ୍ଲେନ୍‌‌ ମ୍ୟାକ୍ସୱେଲଙ୍କ ବିସ୍ଫୋରକ ବ୍ୟାଟିଂରେ ହାର ମାନିଥିଲେ। ଏବେ ମ୍ୟାକ୍ସୱେଲଙ୍କ ସମେତ ୪ଜଣ ବରିଷ୍ଠ ତଥା ଦିନିକିଆ ବିଶ୍ୱକପ୍‌‌ ଚାମ୍ପିଅନ ଖେଳାଳି ବିଶ୍ରାମ ନେବା ସକାଶେ ସ୍ୱଦେଶ ଫେରିଯାଇଛନ୍ତି। ସେମାନଙ୍କ ସ୍ଥାନରେ ନୂଆ ଖେଳାଳି ସ୍ଥାନ ପାଇଛନ୍ତି। ଏହି ଖେଳାଳିମାନେ କିପରି ଖେଳିବେ ତାହା ଜଣାନାହିଁ। କିନ୍ତୁ ଘରୋଇ ମାଟିରେ ଭାରତ ଚତୁର୍ଥ ମୁକାବିଲା ସହ ସିରିଜ୍‌‌ କବ୍‌‌ଜା କରିବ ବୋଲି ସୂର୍ଯ୍ୟକୁମାର ଯାଦବଙ୍କ ଭାରତୀୟ ଦଳଠାରୁ ଆଶା କରାଯାଉଛି। ଭାରତୀୟ ଦଳକୁ ନିୟମିତ ଉପଅଧିନାୟକ ଶ୍ରେୟସ ଆୟର ଫେରିଛନ୍ତି। ଏହି ମ୍ୟାଚ୍‌‌ରେ ସେ ଖେଳିଲେ, ତିଳକ ବର୍ମାଙ୍କୁ ବାହାରେ ରହିବାକୁ ହେବ। ସେହିପରି ଦୀପକ ଚହରଙ୍କୁ ସାମିଲ କରାଯାଇଛି ଓ ବିବାହ ପରେ ମୁକେଶ କୁମାର ଦଳକୁ ଫେରିଛନ୍ତି। ଉଭୟ ଖେଳାଳି ଚତୁର୍ଥ ମ୍ୟାଚ୍‌‌ ଖେଳିବା ସମ୍ଭାବନା ରହିଛି। ଅର୍ଶଦୀପ ସିଂ କିମ୍ବା ପ୍ରସିଦ୍ଧ କ୍ରିଷ୍ଣାଙ୍କ ମଧ୍ୟରୁ ଜଣେ କିମ୍ବା ଉଭୟ ବାଦ୍‌‌ ପଡ଼ିବା ପ୍ରାୟ ନିଶ୍ଚିତ। ଅନ୍ୟପକ୍ଷରେ ଅଷ୍ଟ୍ରେଲିଆ ଦଳରେ ୪ଜଣ ନୂଆ ଖେଳାଳି ସାମିଲ ହୋଇଥିଲାବେଳେ ଅଫ୍‌‌ ସ୍ପିନର କ୍ରିସ୍‌‌ ଗ୍ରୀନ୍‌‌ ଏଠାରେ ପଦାର୍ପଣ କରିବେ ବୋଲି ଆଶା ରହିଛି।

ସମ୍ଭାବ୍ୟ ଖେଳାଳି

ଭାରତ- ଯଶସ୍ୱୀ ଜୟସ୍ୱାଲ, ଋତୁରାଜ ଗାଏକ୍ୱାଡ, ଇଶାନ କିଶାନ, ସୂର୍ଯ୍ୟକୁମାର ଯାଦବ (ଅଧିନାୟକ), ଶ୍ରେୟସ ଆୟର/ ତିଳକ ବର୍ମା, ରିଙ୍କୁ ସିଂ, ଅକ୍ଷର ପଟେଲ, ରବି ବିଷ୍ଣୋଇ, ଅର୍ଶଦୀପ ସିଂ/ଦୀପକ ଚହର, ପ୍ରସିଦ୍ଧ କ୍ରିଷ୍ଣା/ ଆଭେଷ ଖାନ୍‌‌, ମୁକେଶ କୁମାର। – ଶିବମ ଦୁବେ, ଜିତେଶ ଶର୍ମା, ୱାଶିଂଟନ ସୁନ୍ଦର।

ଅଷ୍ଟ୍ରେଲିଆ- ଆରୋନ ହାର୍ଡି, ଟ୍ରାଭିସ୍‌‌ ହେଡ୍‌‌, ମାଥ୍ୟୁ ସର୍ଟ, ବେନ୍‌‌ ମ୍ୟାକଡର୍ମଟ, ଟିମ୍‌‌ ଡେଭିଡ, ମାଥ୍ୟୁ ୱେଡ୍‌‌ (ଅଧିନାୟକ), କ୍ରିସ୍‌‌ ଗ୍ରୀନ୍‌‌, ବେନ୍‌‌ ଡ୍ୱାରଶୁଇସ, ନାଥାନ ଏଲିସ, ଜେସନ ବେହେରନଡର୍ଫ, ତନବୀର ସାଙ୍ଗା। – ଜୋଶ ଫିଲିପ୍‌‌, କେନ ରିଚାର୍ଡସନ।

ଲାଉଡରହିଲ, ଫ୍ଲୋରିଡା: ଭାରତ ଓ ୱେଷ୍ଟଇଣ୍ଡିଜ୍‌‌ ମଧ୍ୟରେ ଚାଲିଥିବା ୫ ମ୍ୟାଚ୍‌‌ ବିଶିଷ୍ଟ ଟି-୨୦ ସିରିଜ୍‌‌ର ପ୍ରଥମ ପର୍ଯ୍ୟାୟ ମୁକାବିଲା ଶେଷ ହୋଇଛି। ୱେଷ୍ଟଇଣ୍ଡିଜ୍‌‌ରେ ଖେଳାଯାଇଥିବା ପ୍ରଥମ ପର୍ଯ୍ୟାୟର ୩ଟି ମ୍ୟାଚ୍‌‌ରେ ଘରୋଇ ଦଳ ପ୍ରଥମ ଦୁଇଟି ମ୍ୟାଚ୍‌‌ ଜିତି ୨-୧ରେ ଆଗୁଆ ରହିଛି। ଏହି ସିରିଜ୍‌‌ର ଦ୍ୱିତୀୟ ପର୍ଯ୍ୟାୟ ମୁକାବିଲାରେ ଶେଷ ଦୁଇଟି ଆମେରିକାର ଫ୍ଲୋରିଡା ସହରରେ ଖେଳାଯିବ। ଏଠାରେ ଘରୋଇ ଦଳ ୨ଟିରୁ ଗୋଟିଏ ମ୍ୟାଚ୍‌‌ ଜିତିଲେ ୨୦୧୬ ପରେ ଯେ କୌଣସି ଫର୍ମାଟରେ କ୍ରମାଗତ ସିରିଜ୍‌‌ ଜିତିବାକୁ ସମର୍ଥ ହେବ। ଅନ୍ୟପକ୍ଷରେ ହାର୍ଦ୍ଦିକ ପାଣ୍ଡ୍ୟାଙ୍କ ଭାରତୀୟ ଦଳ ଏହି ମ୍ୟାଚ୍‌‌ ଜିତି ପ୍ରଥମେ ସିରିଜ୍‌‌କୁ ପ୍ରତ୍ୟାବର୍ତ୍ତନ କରିବ ଓ ପରେ ଅନ୍ୟକଥା ଚିନ୍ତା କରିବ। ଏହି ସଫଳତା ପାଇବାକୁ ହେଲେ ଭ୍ରମଣକାରୀ ଭାରତକୁ କିଛିଟା ଭଲ ଖେଳ ଦେଖାଇବାକୁ ପଡ଼ିବ।

ଏଯାଏ ଖେଳାଯାଇଥିବା ୩ଟି ମ୍ୟାଚ୍‌‌ ମଧ୍ୟରୁ ୱେଷ୍ଟଇଣ୍ଡିଜ୍‌‌ ଜିତିଥିବା ପ୍ରଥମ ଦୁଇଟି ମ୍ୟାଚ୍‌‌ରେ ବୋଲରଙ୍କ ଶୃଙ୍ଖଳା ଓ ନିକୋଲସ୍‌‌ ପୂରନଙ୍କ ଆକ୍ରମଣାତ୍ମକ ଖେଳର ପ୍ରଭାବ ଥିଲା। କିନ୍ତୁ ତୃତୀୟ ମ୍ୟାଚ୍‌‌ରେ ଭାରତୀୟ ତାରକା ସୁର୍ଯ୍ୟକୁମାର ଯାଦବଙ୍କ ଚମକ ଦେଖିବାକୁ ମିଳିଥିଲା। ଚତୁର୍ଥ ମୁକାବିଲାରେ ଜିତିବାକୁ ହେଲେ ଏହି ଖେଳାଳିମାନଙ୍କଠାରୁ ଦଳ ବୀରତ୍ୱପୂର୍ଣ୍ଣ ପ୍ରଦର୍ଶନ ଆଶା ରଖୁଛି। କିନ୍ତୁ ଭାରତୀୟମାନେ ଏଯାଏ ଦଳଗତ ପ୍ରଦର୍ଶନ କରିପାରି ନାହାନ୍ତି। ବ୍ୟାଟିଂରେ ଓପନର ଇଶାନ କିସାନଙ୍କୁ ବଦଳାଇ ଯଶସ୍ୱୀ ଜୟସ୍ୱାଲଙ୍କୁ ସୁଯୋଗ ଦିଆଗଲା। କିନ୍ତୁ ସେ ଫେଲ ମାରିଲେ। ଏହି ବର୍ଷର ପ୍ରଥମାର୍ଦ୍ଧ ପରେ ଶୁବମାନ ଗିଲ ଆଉ ଭଲ ଖେଳିପାରୁ ନାହାନ୍ତି। ଏଭଳି ସ୍ଥିତିରେ ଦଳ କହାକୁ ବଦଳାଇବ, କାହାକୁ ସୁଯୋଗ ଦେବା ତାହା ଏବେଠାରୁ କହିବା କଷ୍ଟକର। କିନ୍ତୁ ଗିଲ୍‌‌ କିମ୍ବା ସଞ୍ଜୁ ସାମସନଙ୍କ ସ୍ଥାନରେ ପୁଣିଥରେ କିସାନଙ୍କୁ ଖେଳାଇବା କଥା ଚିନ୍ତା କରାଯାଉଛି। ପେସ ବୋଲରମାନେ କିଛି ପ୍ରଭାବ ପକାଇପାରି ନାହାନ୍ତି। ଏଣୁ ମୁକେଶ କୁମାର କିମ୍ବା ଅର୍ଶଦୀପ ସିଂଙ୍କ ସ୍ଥାନରେ ଦଳରେ ଥିବା ଉମ୍ରାନ ମଲିକ କିମ୍ବା ଆଭେଷ ଖାନ୍‌‌ଙ୍କୁ ସୁଯୋଗ ମିଳିପାରେ। ଅନ୍ୟପକ୍ଷରେ ୱେଷ୍ଟଇଣ୍ଡିଜ୍‌‌ର ଟପ୍‌‌ ଅର୍ଡର ଏଯାଏ କ୍ଲିକ୍‌‌ କରିନାହିଁ। ଫଳରେ ଦିନିକିଆ ଅଧିନାୟକ ସାଇ ହୋପଙ୍କ ଖେଳିବା ସମ୍ଭାବନା ଅଧିକ। ଫିଟ୍‌‌ ହୋଇଥିଲେ ଜେସନ ହୋଲ୍ଡର ଏହି ମ୍ୟାଚ୍‌‌ ନିଶ୍ଚିତ ଖେଳିବେ।