ବ୍ୟସ୍ତବହୁଳ ଜୀବନଶୈଳୀ ଭିତରେ ନିଜ ପାଇଁ ସମୟ ବାହାର କରିବା ଅନେକ ସମୟରେ କଷ୍ଟକର ହୋଇପଡେ। ବିଶେଷକରି ହାତ ଏବଂ ଗୋଡର ଯତ୍ନ ନେବା ପାଇଁ ବାରମ୍ବାର ପାର୍ଲର ଯିବା ସମସ୍ତଙ୍କ ପକ୍ଷେ ସମ୍ଭବ ହୁଏ ନାହିଁ। ଏଥିସହ ପାର୍ଲରର ଖର୍ଚ୍ଚ ମଧ୍ୟ ଅଧିକ ହୋଇଥାଏ। କିନ୍ତୁ ଆପଣ ଚାହିଁଲେ ଘରେ ଥିବା କିଛି ସାଧାରଣ ସାମଗ୍ରୀ ବ୍ୟବହାର କରି ପାର୍ଲର ଭଳି ମେନିକ୍ୟୋର ଏବଂ ପେଡିକ୍ୟୋର କରିପାରିବେ। ଆସନ୍ତୁ ଜାଣିବା ଏହାର ସହଜ ଉପାୟ।

ଆବଶ୍ୟକୀୟ ସାମଗ୍ରୀ

ଘରୋଇ ଉପାୟରେ ମେନିକ୍ୟୋର ଓ ପେଡିକ୍ୟୋର ପାଇଁ ଆପଣଙ୍କୁ ରୋଷେଇ ଘରେ ଥିବା କିଛି ସାମଗ୍ରୀର ଆବଶ୍ୟକତା ପଡିବ। ଏଥିପାଇଁ ଆଲୋଭେରା ଜେଲ୍, ସାମ୍ପୁ, ଚାଉଳ ଗୁଣ୍ଡ, କଫି ପାଉଡର ଏବଂ ବେସନ ପ୍ରସ୍ତୁତ ରଖନ୍ତୁ। ଏହି ସବୁ ପ୍ରାକୃତିକ ଜିନିଷ ଆପଣଙ୍କ ତ୍ୱଚାକୁ କୌଣସି କ୍ଷତି ନ ପହଞ୍ଚାଇ ଉଜ୍ଜ୍ୱଳ କରିବାରେ ସାହାଯ୍ୟ କରିବ।

କିପରି କରିବେ ବ୍ୟବହାର?

୧. ହାତ ଓ ଗୋଡ଼ ସଫା କରନ୍ତୁ:

ପ୍ରଥମେ ଏକ ପାତ୍ରରେ ଉଷୁମ ପାଣି ନିଅନ୍ତୁ। ସେଥିରେ ଅଳ୍ପ ସାମ୍ପୁ କିମ୍ବା ଲୁଣ ମିଶାନ୍ତୁ। ଏହି ପାଣିରେ ନିଜ ହାତ ଏବଂ ଗୋଡକୁ ପ୍ରାୟ ୫ ରୁ ୭ ମିନିଟ୍ ପର୍ଯ୍ୟନ୍ତ ବୁଡାଇ ରଖନ୍ତୁ। ଏହା ଦ୍ୱାରା ତ୍ୱଚା ନରମ ହୋଇଯାଏ ଏବଂ ମଇଳା ସହଜରେ ବାହାରି ଆସେ।

୨. ପେଷ୍ଟ ପ୍ରସ୍ତୁତ କରନ୍ତୁ:

ଏକ ପାତ୍ରରେ ୧ ଚାମଚ ଆଲୋଭେରା ଜେଲ୍, ୧ ଚାମଚ ସାମ୍ପୁ, ୧ ଚାମଚ ଚାଉଳ ଗୁଣ୍ଡ, ୧ ଚାମଚ କଫି ପାଉଡର ଏବଂ ୧ ଚାମଚ ବେସନ ଭଲ ଭାବରେ ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ।

୩. ସ୍କ୍ରବିଂ କରନ୍ତୁ:

ପ୍ରସ୍ତୁତ ପେଷ୍ଟକୁ ନିଜ ହାତ ଏବଂ ଗୋଡରେ ଲଗାନ୍ତୁ। ପ୍ରାୟ ୫ ମିନିଟ୍ ପର୍ଯ୍ୟନ୍ତ ହାଲୁକା ହାତରେ ମସାଜ୍ କରନ୍ତୁ। ବିଶେଷକରି ଗୋଇଠି, ଆଙ୍ଗୁଠି ସନ୍ଧି ଏବଂ ନଖ ଚାରିପାଖକୁ ଭଲ ଭାବରେ ଘଷନ୍ତୁ। ଏହା ମୃତ କୋଷିକା ବା ଡେଡ୍ ସ୍କିନ୍ ବାହାର କରିବାରେ ସାହାଯ୍ୟ କରେ।

୪. ଧୋଇ ମଶ୍ଚରାଇଜର୍ ଲଗାନ୍ତୁ:

ସ୍କ୍ରବିଂ ସରିବା ପରେ ସଫା ପାଣିରେ ହାତ ଓ ଗୋଡ଼ ଧୋଇ ଦିଅନ୍ତୁ। ତଉଲିଆରେ ପୋଛିବା ପରେ ଏକ ଭଲ ମଶ୍ଚରାଇଜର୍ କିମ୍ବା ବଡି ଲୋସନ୍ ଲଗାନ୍ତୁ। ଏହି ଉପାୟ ଆପଣଙ୍କ ହାତ ଓ ଗୋଡକୁ ପାର୍ଲର ଭଳି ଚମକ ପ୍ରଦାନ କରିବ।

ଥଣ୍ଡାକାଶର ସାଧାରଣ ଔଷଧ ଭାବେ କଫ୍‌ ସିରପ୍‌ ବ୍ୟବହାର କରାଯାଏ। କଫ୍ ସିରପ୍‌ରେ ଥିବା ଫୋଲକୋଡିନ୍‌ କାଶ ଦୂର କରେ। କିନ୍ତୁ ଏହାର ପାର୍ଶ୍ବପ୍ରତିକ୍ରିୟା ଘଟି ଆଲର୍ଜି, ରକ୍ତଚାପ, ଅସାମାନ୍ୟ ରକ୍ତ ସଂଚାଳନ, ହୃଦୟର ଅସ୍ବାଭାବିକ ଗତି ଏବଂ ଅମ୍ଲଜାନ ସ୍ତର ହ୍ରାସ ହେବାର ଲକ୍ଷଣ ଦେଖା ଦେବା ପରେ ବିଶ୍ବ ସ୍ବାସ୍ଥ୍ୟ ସଂଗଠନ ପକ୍ଷରୁ କଫ୍ ସିରପରେ ଫୋଲକୋଡିନ୍‌ର ବ୍ୟବହାରକୁ ମନା କରାଯାଇଛି। କଫ୍‌ ସିରପ୍‌ ବଦଳରେ ପ୍ରାକୃତିକ ଉପାୟରେ ମଧ୍ୟ ଥଣ୍ଡାକାଶ ଦୂର କରିହେବ। ଆସନ୍ତୁ ଜାଣିବା।

• ମହୁକୁ ମହୌଷଧି କୁହାଯାଏ। ଏହାର ଔଷଧୀୟ ଗୁଣ ବା ଆଣ୍ଟି-ବ୍ୟାକ୍ଟେରିଆଲ୍‌ ଗୁଣ ବ୍ରୋଙ୍କାଏଲ ନଳୀରେ ଶ୍ବାସ ପ୍ରବାହରେ ସାହାଯ୍ୟ କରେ। ଉଷୁମ ପାଣିରେ କିମ୍ବା ହର୍ବାଲ ଚା’ ସହ ଗୋଟିଏ ଚାମଚ ମହୁ ପିଇବା ଦ୍ବାରା କାଶ ଦୂର ହୋଇଥାଏ।
• ଅଦାରେ ଆଣ୍ଟି-ଇନ୍‌ଫ୍ଲାମେଟୋରି ଏବଂ ଆଣ୍ଟି-ମାଇକ୍ରୋବାଏଲ୍ ଗୁଣ ରହିଛି। ଏହା କାଶ ଦୂର କରିବାରେ ସବୁଠାରୁ ଉତ୍ତମ। ଅଦା ଚା’ କିମ୍ବା ଅଦାକୁ ଗରମ ପାଣିରେ ପକାଇ ପିଇବା ଦ୍ବାରା ଥଣ୍ଡା ଓ କାଶ ଲକ୍ଷଣକୁ କମାଇଥାଏ।
• ଗରମ ପାଣିରେ କିଛି ବୁନ୍ଦା ୟୁକାଲିପଟାସ୍‌ ତୈଳ ଓ ଟି’ ଟ୍ରି ଅଏଲ୍‌ ପକାଇ ୧୦ ମିନିଟ ବାମ୍ଫ ନେଲେ ତତ୍‌କ୍ଷଣାତ ଉପଶମ ମିଳେ।
• ନଖଉଷୁମ ପାଣିରେ ଅଧ ଚାମଚ ଲୁଣ ପକାଇ ଗର୍ଗଲ୍‌ କରିବା ଉଚିତ। ଗୋଟିଏ ଦିନରେ ଅନେକ ଥର ଗର୍ଗଲ୍‌ କରିବା ଦ୍ବାରା କାଶ କମିଥାଏ।
• ନଖଉଷୁମ ପାଣିରେ ଲେମ୍ବୁ ଚିପୁଡ଼ି ପିଇବା ଦ୍ବାରା ଶରୀରକୁ ଭିଟାମିନ-ସି’ ମିଳିଥାଏ, ଯାହା ଦ୍ବାରା ରୋଗପ୍ରତିରୋଧକ ଶକ୍ତି ବୃଦ୍ଧି ହୋଇ କାଶଥଣ୍ଡା ଆଦି ଦୂର ହୁଏ।
• ପ୍ରତିଦିନ ରାତିରେ ଶୋଇବା ପୂର୍ବରୁ ଏକ ଗ୍ଲାସ କ୍ଷୀରରେ ହଳଦୀ ମିଶାଇ ପିଇବା ଦ୍ବାରା କାଶ ଦୂର ହେବା ସହ ସୁନିଦ୍ରା ହୋଇଥାଏ। କାରଣ ହଳଦୀରେ ଥିବା ଆଣ୍ଟି-ଇନ୍‌ଫ୍ଲାମେଟାରୀ ଏବଂ କର୍କୁମିନ ଉପାଦାନ କାଶ ଦୂର କରିବାରେ ସହାୟକ।
• ରସୁଣରେ ଆଣ୍ଚିମାଇକ୍ରୋବାଏଲ ପରିମାଣ ଅଧିକ ଥାଏ। କଂଚା ରସୁଣ ଖାଇବା ଦ୍ବାରା ରୋଗପ୍ରତିରୋଧକ ଶକ୍ତି ବୃଦ୍ଧି ହେବା ସହିତ ଥଣ୍ଡାଜନିତ କାଶ ଦୂର ହୁଏ।