ନୂଆଦିଲ୍ଲୀ: ବଲିଭିଆରେ ବଡ ଧରଣର ବିମାନ କ୍ରାସ । ବ୍ୟାଙ୍କ ନୋଟ ନେଇ ଯାଉଥିବା ବିମାନ ମଝି ଆକାଶରେ ଜଳି ଉଠିଲା। ଦୁର୍ଘଟଣାରେ ୧୫ ମୃତ ହୋଇଥିବା ବେଳେ ୩୦ ଜଣ ଆହତ ହୋଇଛନ୍ତି।  ବୋଲିଭିଆର ଏଲ୍ ଅଲ୍ଟୋ ଅନ୍ତର୍ଜାତୀୟ ବିମାନବନ୍ଦର ନିକଟରେ ଶୁକ୍ରବାର ଏହି ବିମାନ ଦୁର୍ଘଟଣା ଘଟିଛି। ବୋଲିଭିଆ ବାୟୁସେନାର ଏକ C-130 ହର୍କ୍ୟୁଲସ ବିମାନ ଭାରସାମ୍ୟ ହରାଇ ଏକ ଜନବହୁଳ ରାଜପଥ ଉପରେ ଦୁର୍ଘଟଣାଗ୍ରସ୍ତ ହୋଇଛି। ଏହି ଘଟଣାରେ ଅତିକମରେ ୧୫ ଜଣଙ୍କର ମୃତ୍ୟୁ ଘଟିଥିବା ବେଳେ ୩୦ରୁ ଅଧିକ ଲୋକ ଆହତ ହୋଇଛନ୍ତି। ସ୍ଥାନୀୟ ଗଣମାଧ୍ୟମ ରିପୋର୍ଟ ଅନୁଯାୟୀ, ଦୁର୍ଘଟଣା ପରେ ବିମାନରେ ଥିବା ୬ ଜଣ କ୍ରୁ ସଦସ୍ୟଙ୍କ ମଧ୍ୟରୁ ଦୁଇ ଜଣ ନିଖୋଜ ଅଛନ୍ତି।

ଏହି ସାମରିକ ବିମାନଟି ବୋଲିଭିଆର ସେଣ୍ଟ୍ରାଲ ବ୍ୟାଙ୍କରୁ ନୂତନ ନୋଟ୍ କିମ୍ବା କାଗଜ ମୁଦ୍ରା ପରିବହନ କରୁଥିଲା। ଦୁର୍ଘଟଣା ପରେ ବିମାନରୁ ଲକ୍ଷ ଲକ୍ଷ ଟଙ୍କାର ନୋଟ୍ ରାଜପଥରେ ବିଛାଡି ହୋଇ ପଡିଥିଲା। ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି ଯେ, ଲୋକମାନେ ନିଜ ଜୀବନକୁ ଖାତିର ନକରି ରାସ୍ତାରେ ପଡିଥିବା ଟଙ୍କା ଗୋଟାଇବା ପାଇଁ ଭିଡ ଜମାଇଥିଲେ। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ଏବଂ ଜରୁରୀକାଳୀନ ସେବା ଟିମ୍‌କୁ ଘଟଣାସ୍ଥଳରେ ମୁତୟନ କରାଯାଇଛି।

ରିପୋର୍ଟ ଅନୁଯାୟୀ, ବିମାନଟି ସାଣ୍ଟା କ୍ରୁଜ୍ ସହରରୁ କାର୍ଗୋ ନେଇ ଏଲ୍ ଅଲ୍ଟୋ ବିମାନବନ୍ଦରରେ ଅବତରଣ କରୁଥିଲା। କିନ୍ତୁ ଖରାପ ପାଗ ଯୋଗୁଁ ବିମାନଟି ରନ୍‌ୱେ ଅତିକ୍ରମ କରିପାରିନଥିଲା ଏବଂ ନିକଟସ୍ଥ କୋଷ୍ଟାନେରା ଆଭେନ୍ୟୁ (Costanera Avenue) ଉପରେ ମାଡି ଯାଇଥିଲା। ଏହି ସମୟରେ ରାସ୍ତାରେ ଯାଉଥିବା ଅନେକ ଯାନବାହନ ବିମାନ ଧକ୍କାରେ ଚୁରମାର ହୋଇଯାଇଥିଲା।

ଉଦ୍ଧାରକାରୀ ଦଳ ବର୍ତ୍ତମାନ ଆହତମାନଙ୍କୁ ଚିକିତ୍ସା ପାଇଁ ହସ୍ପିଟାଲ ପଠାଉଛନ୍ତି ଏବଂ ଘଟଣାସ୍ଥଳରୁ ବିଛାଡି ହୋଇଥିବା ମୁଦ୍ରା ସଂଗ୍ରହ କରୁଛନ୍ତି। ଦୁର୍ଘଟଣା ପରେ ବିଶ୍ୱର ଅନ୍ୟତମ ଉଚ୍ଚତମ ବିମାନବନ୍ଦର 'ଏଲ୍ ଅଲ୍ଟୋ'କୁ ସାମୟିକ ଭାବେ ବନ୍ଦ ରଖାଯାଇଛି ଏବଂ ତଦନ୍ତ ଆରମ୍ଭ କରାଯାଇଛି।

ନୂଆଦିଲ୍ଲୀ: ଷ୍ଟାର ଚିହ୍ନ ଥିବା ନୋଟକୁ ନେଇ ଦ୍ବନ୍ଦ୍ବ ଉପୁଜିବା ପରେ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ ( ଆରବିଆଇ ) ପକ୍ଷରୁ ସ୍ପଷ୍ଟୀକରଣ ରଖାଯାଇଛି। ଷ୍ଟାର୍ ଚିହ୍ନ ରହିଥିବା ନୋଟ ସମ୍ପୂର୍ଣ୍ଣ  ଅସଲି ଓ ଏହା ବୈଧ ବୋଲି ଆର୍‌ବିଆଇ କହିଛି।

ସ୍ପଷ୍ଟୀକରଣରେ ଆର୍‌ବିଆଇ କହିଛି ଯେ, ପ୍ରିଫିକ୍ସ ଓ ସିରିଏଲ୍‌ ନମ୍ବରର ମଝିରେ ଷ୍ଟାର ଚିହ୍ନ ଯୋଡା ଯାଇଥାଏ। କୌଣସି ନୋଟ୍ ବଦଳ କଲେ କିମ୍ବା ନୋଟ୍‌ ଓଦା ହୋଇ ଖରାପ ହୋଇଗଲେ ସେହି ନୋଟର ନମ୍ବରରେ ପ୍ରିଫିକ୍ସ ସହ ଷ୍ଟାର ସିମ୍ବଲ ଯୋଡ଼ାଯାଇ ଏହାକୁ ପୁନଃ ଛପାଯାଇଥାଏ। ତେଣୁ ଯଦି ଆପଣଙ୍କ ପାଖରେ ଏଭଳି ଷ୍ଟାର୍ ସିମ୍ବଲ ଥିବା ନୋଟ୍ ରହିଛି ତେବେ ସେ ନୋଟ୍ ପୂର୍ବରୁ ବଦଳାଯାଇଥିବ କିମ୍ବା ଓଦା ହୋଇ ଖରାପ ହୋଇଯିବା ପରେ ଆର୍‌ବିଆଇ ଏହାକୁ ପୁନଃ ଛାପିଥିବ। ତେବେ ଏହା ସମ୍ପୂର୍ଣ୍ଣ ବୈଧ। ଷ୍ଟାର ଚିହ୍ନ ନଥିବା ନୋଟ୍ ଭଳି ଏହି ନୋଟ୍ ବି ପ୍ରଚଳିତ ହେଉଛି ବୋଲି ଆର୍‌ବିଆଇ ପକ୍ଷରୁ କୁହାଯାଇଛି।