"ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଆଉ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି।" କଂଗ୍ରେସ ନେତା ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ମେଲୋଡି' ଟଫି ପ୍ରସଙ୍ଗରେ କଡ଼ା ସମାଲୋଚନା କରିଛନ୍ତି। ଦେଶର ଅର୍ଥନୈତିକ ସମସ୍ୟା ଓ ସାଧାରଣ ଜନତାଙ୍କ ଅସୁବିଧାକୁ ଦର୍ଶାଇ ସେ ଏହି ଟାର୍ଗେଟ କରିଛନ୍ତି। ନିକଟରେ ପ୍ରଧାନମନ୍ତ୍ରୀଙ୍କ ଇଟାଲୀ ଗସ୍ତ ସମୟରେ ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେବାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା।

ନେତୃତ୍ୱ ନୁହେଁ, ଏହା ନୌଟଙ୍କି

ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟ କରି ରାହୁଲ ଗାନ୍ଧୀ ଲେଖିଛନ୍ତି ଯେ, "ଆର୍ଥିକ ଝଡ଼ ମୁଣ୍ଡ ଉପରେ ଅଛି, ଏବଂ ଆମ ପ୍ରଧାନମନ୍ତ୍ରୀ ଇଟାଲୀରେ ଟଫି ବାଣ୍ଟୁଛନ୍ତି! କୃଷକ, ଯୁବକ, ମହିଳା, ଶ୍ରମିକ ଏବଂ ଛୋଟ ବ୍ୟବସାୟୀ ସମସ୍ତେ କାନ୍ଦୁଛନ୍ତି - କିନ୍ତୁ ପ୍ରଧାନମନ୍ତ୍ରୀ ହସି ହସି ରିଲ୍ ବନାଉଛନ୍ତି, ଏବଂ ବିଜେପି ନେତାମାନେ ତାଳି ମାରୁଛନ୍ତି"। ସେ ପ୍ରଧାନମନ୍ତ୍ରୀଙ୍କ ଏହି କାର୍ଯ୍ୟକଳାପକୁ "ନେତୃତ୍ୱ ନୁହେଁ, ନୌଟଙ୍କି" ବୋଲି ଆଖ୍ୟା ଦେଇଛନ୍ତି।

କ'ଣ ଥିଲା ପୂରା ଘଟଣା?

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ଇଟାଲୀ ଗସ୍ତ ବେଳେ ଇଟାଲୀୟ ସମକକ୍ଷ ଜର୍ଜିଆ ମେଲୋନୀଙ୍କୁ ଏକ 'ମେଲୋଡି' ଟଫି ପ୍ୟାକେଟ୍ ଉପହାର ଦେଇଥିଲେ। ଏହାକୁ ନେଇ ମେଲୋନୀ ସୋସିଆଲ ମିଡିଆରେ ଏକ ଭିଡିଓ ସେୟାର କରିଥିଲେ, ଯେଉଁଥିରେ ସେ କହୁଥିବାର ଶୁଣିବାକୁ ମିଳିଥିଲା, "ପ୍ରଧାନମନ୍ତ୍ରୀ ମୋଦୀ ଆମ ପାଇଁ ଏକ ଉପହାର ଆଣିଛନ୍ତି। ଏହା ହେଉଛି ମେଲୋଡି"। ଏହି ଘଟଣା ପରେ ଇଣ୍ଟରନେଟରେ ପୁଣି ଥରେ '#Melodi' ଟ୍ରେଣ୍ଡ୍ ଭାଇରାଲ ହେବାରେ ଲାଗିଥିଲା। ତେବେ ଏହି ହାଲୁକା ମୁହୂର୍ତ୍ତକୁ ନେଇ ଏବେ ଦେଶରେ ରାଜନୈତିକ ବୟାନବାଜି ତୀବ୍ର ହୋଇଛି。

ଭାରତୀୟ ରାଜନୀତିରେ ଏବେ ଏକ ନୂଆ ଏବଂ ନିଆରା ଧରଣର ଲଢ଼େଇ ଆରମ୍ଭ ହୋଇଛି। ସୋସିଆଲ୍ ମିଡିଆରେ ଦୁଇଟି ନୂଆ ରାଜନୈତିକ ଦଳ, କକରୋଚ୍ ଜନତା ପାର୍ଟି (CJP) ଏବଂ ନ୍ୟାସନାଲ୍ ପାରାସାଇଟିକ୍ ଫ୍ରଣ୍ଟ (NPF) ବର୍ତ୍ତମାନ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ଏଗୁଡ଼ିକ ପ୍ରକୃତ ରାଜନୈତିକ ଦଳ ନୁହେଁ, ବରଂ ଇଣ୍ଟରନେଟ୍ ବ୍ୟବହାରକାରୀ ଏବଂ ଯୁବପିଢ଼ିଙ୍କ ଦ୍ୱାରା ଆରମ୍ଭ କରାଯାଇଥିବା ଏକ ଡିଜିଟାଲ୍ ବ୍ୟଙ୍ଗ ଆନ୍ଦୋଳନ।

କେଉଁଠୁ ଆସିଲା ଏହି ବିଚିତ୍ର ନାମ?

ସୁପ୍ରିମ୍ କୋର୍ଟର ପ୍ରଧାନ ବିଚାରପତି (CJI) ସୂର୍ଯ୍ୟ କାନ୍ତଙ୍କ ଏକ ବିବାଦୀୟ ମନ୍ତବ୍ୟ ପରେ ଏହି ଦୁଇ ଦଳର ଜନ୍ମ ହୋଇଛି। ଏକ ମାମଲାର ଶୁଣାଣି ସମୟରେ ବେକାର ଯୁବକମାନଙ୍କୁ କଟାକ୍ଷ କରି ସେ ସେମାନଙ୍କୁ "ଅସରପା" (Cockroach) ଏବଂ "ପରଜୀବୀ" (Parasite) ବୋଲି କହିଥିଲେ। ଏହି ମନ୍ତବ୍ୟକୁ ନେଇ ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା। ତେବେ ରାଗିବା ପରିବର୍ତ୍ତେ ଇଣ୍ଟରନେଟ୍ ବ୍ୟବହାରକାରୀମାନେ ଏହାକୁ ଏକ ଅଭିନବ ଉପାୟରେ ବିରୋଧ କରିବାକୁ ନିଷ୍ପତ୍ତି ନେଇଥିଲେ।

କକରୋଚ୍ ଜନତା ପାର୍ଟିର ଉତ୍ଥାନ

ବୋଷ୍ଟନ୍ ବିଶ୍ୱବିଦ୍ୟାଳୟର ଛାତ୍ର ତଥା ୩୦ ବର୍ଷୀୟ ଅଭିଜିତ୍ ଦିପକେ ମେ ୧୬ ତାରିଖରେ କକରୋଚ୍ ଜନତା ପାର୍ଟି ଗଠନ କରିଥିଲେ। ଏହି ଦଳ ନିଜକୁ "ଅଳସୁଆ ଏବଂ ବେକାରମାନଙ୍କ ସ୍ୱର" ବୋଲି ଦାବି କରୁଛି। ଏହାର ୱେବସାଇଟ୍ ଅନୁଯାୟୀ, ଦଳର ମୁଖ୍ୟାଳୟ ସେଠାରେ ଅଛି, "ଯେଉଁଠି ୱାଇ-ଫାଇ (Wi-Fi) କାମ କରୁଛି"। ଏହି ପାର୍ଟି ମାତ୍ର କିଛି ଦିନ ମଧ୍ୟରେ ଲକ୍ଷ ଲକ୍ଷ ଅନୁଗାମୀ ଯୋଡ଼ିବାରେ ସଫଳ ହୋଇଛି।

ଏହାର ଘୋଷଣାପତ୍ରରେ କିଛି ରୋଚକ ଦାବି ରହିଛି, ଯେପରିକି- ଅବସର ପରେ କୌଣସି ପ୍ରଧାନ ବିଚାରପତିଙ୍କୁ ରାଜ୍ୟସଭା ଆସନ ଦିଆଯିବ ନାହିଁ, ମହିଳାମାନଙ୍କ ପାଇଁ ସଂସଦ ଏବଂ କ୍ୟାବିନେଟରେ ୫୦% ସଂରକ୍ଷଣ, ଏବଂ ଦଳ ବଦଳୁଥିବା ନେତାଙ୍କୁ ୨୦ ବର୍ଷ ପାଇଁ ନିର୍ବାଚନ ଲଢ଼ିବାରୁ ବଞ୍ଚିତ କରିବା ଇତ୍ୟାଦି।

ନ୍ୟାସନାଲ୍ ପାରାସାଇଟିକ୍ ଫ୍ରଣ୍ଟର ପ୍ରବେଶ

ସିଜେପି (CJP) ର ଲୋକପ୍ରିୟତା ପରେ, ଏହାର ବିରୋଧୀ ଦଳ ଭାବରେ ନ୍ୟାସନାଲ୍ ପାରାସାଇଟିକ୍ ଫ୍ରଣ୍ଟ (NPF) ମଇଦାନକୁ ଓହ୍ଲାଇଛି। ଏହି ଦଳ ମଧ୍ୟ ଏକ ବ୍ୟଙ୍ଗାତ୍ମକ ଦୃଷ୍ଟିକୋଣ ନେଇ ଆଗକୁ ବଢ଼ିଛି। ସେମାନଙ୍କର ସ୍ଲୋଗାନ ହେଉଛି- "ଚିପକେଙ୍ଗେ ନେହିଁ, ବଦଲେଙ୍ଗେ ୟେହି" (ଲାଗି ରହିବୁ ନାହିଁ, ଏଇଠି ହିଁ ବଦଳାଇବୁ)।

ଏହି ଦଳ ଦାବି କରୁଛି ଯେ ସେମାନେ ଏକ ଅପରାଧମୁକ୍ତ ସଂସଦ, ଶିକ୍ଷିତ ଜନପ୍ରତିନିଧି ଏବଂ ଏପରି ରାସ୍ତା ଚାହୁଁଛନ୍ତି ଯାହା ବର୍ଷା ହେଲେ ନଦୀରେ ପରିଣତ ହେବ ନାହିଁ। ଏହି ଫ୍ରଣ୍ଟ ନିଜକୁ ଏକ ତୃଟିପୂର୍ଣ୍ଣ ବ୍ୟବସ୍ଥାରେ ବଞ୍ଚି ରହିଥିବା ନାଗରିକଙ୍କ ସମୂହ ବୋଲି ବର୍ଣ୍ଣନା କରୁଛି।

ବ୍ୟଙ୍ଗ ମାଧ୍ୟମରେ ପ୍ରକୃତ କ୍ରୋଧ

ପ୍ରତ୍ୟକ୍ଷ ଭାବରେ ଏହି ଦୁଇ ଦଳ କେବଳ ଇଣ୍ଟରନେଟ୍ ଥଟ୍ଟା ପରି ମନେ ହେଉଥିଲେ ମଧ୍ୟ, ଏହା ପଛରେ ଯୁବପିଢ଼ିଙ୍କ ପ୍ରକୃତ ଅସନ୍ତୋଷ ଲୁଚି ରହିଛି। ଦେଶରେ ବଢ଼ୁଥିବା ବେକାରୀ ସମସ୍ୟା, ରାଜନୈତିକ ଦୁର୍ନୀତି ଏବଂ ସାଧାରଣ ଲୋକଙ୍କ ସମସ୍ୟା ପ୍ରତି ସରକାରୀ ବ୍ୟବସ୍ଥାର ଉଦାସୀନତାକୁ ଯୁବପିଢ଼ି ମିମ୍ (Meme) ଏବଂ ବ୍ୟଙ୍ଗ ମାଧ୍ୟମରେ ସାମ୍ନାକୁ ଆଣିବାକୁ ପ୍ରୟାସ କରୁଛନ୍ତି।

ନିକଟରେ ଆମ୍ ଆଦମୀ ପାର୍ଟି (AAP) ଛାଡି ଭାରତୀୟ ଜନତା ପାର୍ଟି (BJP) ରେ ଯୋଗ ଦେଇଥିବା ରାଜ୍ୟସଭା ସାଂସଦ ରାଘବ ଚଢ଼ା ନିଜର ପୂର୍ବତନ ଦଳ ବିରୋଧରେ ଏକ ବଡ଼ ଅଭିଯୋଗ ଆଣିଛନ୍ତି। ପଞ୍ଜାବର ଆପ୍ ସରକାରଙ୍କ ଆକ୍ରୋଶମୂଳକ ରାଜନୀତିର ସେ "ପରବର୍ତ୍ତୀ ଟାର୍ଗେଟ" ହେବାକୁ ଯାଉଛନ୍ତି ବୋଲି ସେ ଦାବି କରିଛନ୍ତି।

ରାଷ୍ଟ୍ରପତିଙ୍କୁ ଭେଟିଲେ ରାଘବ ଚଢ଼ା ଓ ଅନ୍ୟ ସାଂସଦ

ମଙ୍ଗଳବାର ଦିନ ରାଘବ ଚଢ଼ା ଅନ୍ୟ ଦୁଇ ରାଜ୍ୟସଭା ସାଂସଦ ସନ୍ଦୀପ ପାଠକ ଏବଂ ଅଶୋକ ମିତ୍ତଲଙ୍କ ସହ ମିଶି ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିଛନ୍ତି। ଏହି ସାକ୍ଷାତକାର ସମୟରେ ସେମାନେ ପଞ୍ଜାବରେ ଶାସନାଧୀନ ଥିବା ଆପ୍ ସରକାରଙ୍କ କାର୍ଯ୍ୟକଳାପ ଉପରେ ନିଜର ଉଦବେଗ ପ୍ରକାଶ କରିଥିଲେ। ଗଣମାଧ୍ୟମକୁ ପ୍ରତିକ୍ରିୟା ଦେଇ ଚଢ଼ା କହିଛନ୍ତି ଯେ, "ଆମେ ରାଷ୍ଟ୍ରପତିଙ୍କୁ ଅବଗତ କରାଇଛୁ ଯେ ଯେଉଁ ସାଂସଦମାନେ ଆପ୍ ଛାଡି ବିଜେପିରେ ଯୋଗ ଦେଇଛନ୍ତି, ସେମାନଙ୍କ ବିରୋଧରେ ପଞ୍ଜାବ ସରକାର କିପରି ବିପଜ୍ଜନକ ପ୍ରତିଶୋଧମୂଳକ ରାଜନୀତି ପାଇଁ ରାଜ୍ୟ ଯନ୍ତ୍ରପାତିର ଅପବ୍ୟବହାର କରୁଛନ୍ତି।"

ପ୍ରତିଶୋଧମୂଳକ ରାଜନୀତିର ଅଭିଯୋଗ

ସୂଚନାଯୋଗ୍ୟ ଯେ, ନିକଟରେ ରାଘବ ଚଢ଼ାଙ୍କ ସମେତ ୭ ଜଣ ରାଜ୍ୟସଭା ସାଂସଦ ଆପ୍ ଛାଡ଼ି ବିଜେପିରେ ସାମିଲ ହୋଇଥିଲେ। ଏହି ଘଟଣାର କିଛି ଦିନ ପରେ ପଞ୍ଜାବ ପ୍ରଦୂଷଣ ନିୟନ୍ତ୍ରଣ ବୋର୍ଡ (PPCB) ପକ୍ଷରୁ ସାଂସଦ ରାଜିନ୍ଦର ଗୁପ୍ତାଙ୍କ ସହ ଜଡିତ ଥିବା ଧୌଲା ସ୍ଥିତ ଏକ ଟେକ୍ସଟାଇଲ୍ କାରଖାନା ଉପରେ ଚଢ଼ାଉ କରାଯାଇଥିଲା। ଏଥିସହ ରାଜ୍ୟରେ ଅନ୍ୟ ଜଣେ ସାଂସଦ ସନ୍ଦୀପ ଗୁପ୍ତାଙ୍କ ନାମରେ ଦୁଇଟି ଏଫଆଇଆର (FIR) ରୁଜୁ ହୋଇଥିବା ଖବର ମଧ୍ୟ ସାମ୍ନାକୁ ଆସିଥିଲା। ଏହିସବୁ ଘଟଣାକୁ ଦୃଷ୍ଟିରେ ରଖି ତାଙ୍କ ବିରୋଧରେ ମଧ୍ୟ ସରକାରୀ କଳର ଦୁରୁପଯୋଗ କରାଯାଇପାରେ ଏବଂ ତାଙ୍କୁ ଟାର୍ଗେଟ କରାଯାଇପାରେ ବୋଲି ଶ୍ରୀ ଚଢ଼ା ଆଶଙ୍କା ବ୍ୟକ୍ତ କରିଛନ୍ତି।

ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ମଙ୍ଗଳବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ 'ଆତଙ୍କବାଦୀ' କହି ଏକ ନୂଆ ବିବାଦ ସୃଷ୍ଟି କରିଛନ୍ତି। ଚେନ୍ନାଇରେ ଏକ ସାମ୍ବାଦିକ ସମ୍ମିଳନୀରେ ଏଆଇଏଡିଏମକେ (AIADMK) ଏବଂ ବିଜେପି (BJP) ମେଣ୍ଟକୁ ସମାଲୋଚନା କରିବା ସମୟରେ ସେ ଏହି ମନ୍ତବ୍ୟ ଦେଇଛନ୍ତି।

ଏଆଇଏଡିଏମକେ କିପରି ପ୍ରଧାନମନ୍ତ୍ରୀଙ୍କ ସହ ହାତ ମିଳାଇଲା ତାହାକୁ ନେଇ ଖଡ଼ଗେ ପ୍ରଶ୍ନ କରିଛନ୍ତି। ସେ କହିଛନ୍ତି, "ଅନ୍ନାଦୁରାଇଙ୍କ ଫଟୋ ଲଗାଉଥିବା ଏଆଇଏଡିଏମକେ ନେତାମାନେ ମୋଦୀଙ୍କ ସହ କିପରି ମିଶିପାରିବେ? ସେ ଜଣେ ଆତଙ୍କବାଦୀ। ତାଙ୍କ ଦଳ ସମାନତା ଏବଂ ନ୍ୟାୟରେ ବିଶ୍ୱାସ କରେ ନାହିଁ। ଏହି ଲୋକମାନେ ତାଙ୍କ ସହ ମିଶୁଛନ୍ତି; ଏହାର ଅର୍ଥ ସେମାନେ ଗଣତନ୍ତ୍ରକୁ ଦୁର୍ବଳ କରୁଛନ୍ତି।" ଆଜି ଏଆଇଏଡିଏମକେ ନିଜର ପରିଚୟ ହରାଇ ବିଜେପିର ଏକ ନୀରବ ଦାସ ପାଲଟିଛି ଏବଂ ତାମିଲନାଡ଼ୁର ସ୍ୱାର୍ଥ ରକ୍ଷା କରିବା ପାଇଁ ଏମକେ ଷ୍ଟାଲିନଙ୍କ ଭଳି ଲଢୁଆ ନେତାଙ୍କ ଆବଶ୍ୟକତା ରହିଛି ବୋଲି ସେ ଦୋହରାଇଥିଲେ।

ନିଜର ବିବାଦୀୟ ମନ୍ତବ୍ୟ ଉପରେ ବିବାଦ ବଢ଼ିବା ପରେ ଖଡ଼ଗେ ସ୍ପଷ୍ଟୀକରଣ ଦେଇ କହିଥିଲେ ଯେ ସେ ମୋଦୀଙ୍କୁ ଆତଙ୍କବାଦୀ କହିନାହାଁନ୍ତି, ବରଂ ସେ ସବୁବେଳେ ଲୋକ ଓ ରାଜନୈତିକ ଦଳଗୁଡ଼ିକୁ 'ଭୟଭୀତ' ବା ଟେରରାଇଜ୍ କରୁଛନ୍ତି। ସେ କହିଛନ୍ତି, "ମୋର କହିବାର ଅର୍ଥ ହେଉଛି ମୋଦୀ ସର୍ବଦା ଧମକ ଦେଉଛନ୍ତି। ଇଡି (ED), ଆଇକର ବିଭାଗ (I-T) ଏବଂ ସିବିଆଇ (CBI) ଭଳି ସଂସ୍ଥା ତାଙ୍କ ହାତରେ ଅଛି ଏବଂ ସେ ପରିସୀମନ (Delimitation) କୁ ମଧ୍ୟ ନିଜ ହାତକୁ ନେବାକୁ ଚାହୁଁଛନ୍ତି।"

ସମ୍ବିଧାନ (୧୩୧ ତମ ସଂଶୋଧନ) ବିଲ୍, ୨୦୨୬ ସଂସଦରେ ପାରିତ ନହେବା ପରେ ପ୍ରଧାନମନ୍ତ୍ରୀ ଜାତିକୁ ସମ୍ବୋଧିତ କରି ନିର୍ବାଚନ ଆଚରଣ ବିଧି (MCC) ଉଲ୍ଲଂଘନ କରିଥିବା ଖଡ଼ଗେ ଅଭିଯୋଗ କରିଛନ୍ତି। ଏହା ସହିତ ନିର୍ବାଚନ କମିଶନ ବିଜେପିର ଏକ ଶାଖା ଭଳି କାମ କରୁଛନ୍ତି ବୋଲି ସେ କହିଛନ୍ତି। ମହିଳା ସଂରକ୍ଷଣ ବିଲ୍ ସମ୍ପର୍କରେ ସ୍ପଷ୍ଟ କରି ସେ କହିଛନ୍ତି ଯେ କଂଗ୍ରେସ ୨୦୨୩ ମସିହାରେ ଏହି ବିଲ୍‌କୁ ପୂର୍ଣ୍ଣ ସମର୍ଥନ ଦେଇଥିଲା, କିନ୍ତୁ ବିଦ୍ୟମାନ ୫୪୩ ଆସନ ସହିତ ଏହାକୁ ତୁରନ୍ତ ଲାଗୁ କରିବାକୁ ସେମାନେ ଦାବି କରିଥିଲେ। ମାତ୍ର ମୋଦୀ ଏବେ ଏକ ଭିନ୍ନ ତଥ୍ୟ ଉପସ୍ଥାପନ କରୁଛନ୍ତି ବୋଲି ଖଡ଼ଗେ କହିଛନ୍ତି।

ଏହି ପ୍ରସଙ୍ଗରେ ବିଜେପିର ରାଷ୍ଟ୍ରୀୟ ମୁଖପାତ୍ର ଶହଜାଦ୍ ପୁନାୱାଲା କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସ (X) ରେ ପୋଷ୍ଟ କରି ସେ କହିଛନ୍ତି ଯେ କଂଗ୍ରେସ ଏପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କୁ ୧୭୫ ଥର ଅପମାନିତ କରିସାରିଲାଣି। ଆତଙ୍କବାଦୀ ଏବଂ ନକ୍ସଲଙ୍କୁ ନିର୍ଦ୍ଦୋଷ କହୁଥିବା କଂଗ୍ରେସ ପାଇଁ ଜଣେ 'ଚା'ବାଲା ଓବିସି (OBC)' ପ୍ରଧାନମନ୍ତ୍ରୀ ଆତଙ୍କବାଦୀ ଏବଂ ସନାତନ ଧର୍ମ ଏକ ରୋଗ ବୋଲି ସେ କଟାକ୍ଷ କରିଛନ୍ତି।

ନୂଆଦିଲ୍ଲୀ: ଭାରତର ତିନୋଟି ପ୍ରମୁଖ ଅଞ୍ଚଳ- ଆସାମ, କେରଳ ଏବଂ କେନ୍ଦ୍ରଶାସିତ ଅଞ୍ଚଳ ପୁଡୁଚେରୀରେ ପରବର୍ତ୍ତୀ ସରକାର ବାଛିବା ପାଇଁ ମତଦାନ ପ୍ରକ୍ରିୟା ଆରମ୍ଭ ହୋଇଛି। କାଳ ୭ଟାରୁ ଭୋଟିଂ ଆରମ୍ଭ ହୋଇଥିବା ବେଳେ ନିର୍ବାଚନ  ସୁରୁଖୁରୁରେ ପରିଚାଳନା କରିବା ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା, ୱେବକାଷ୍ଟିଂ ଏବଂ ସ୍ୱତନ୍ତ୍ର ଭୋଟର ସୁବିଧା କରାଯାଇଛି। ଲୋକେ ପୁଲିଂ ବୁଥରେ ପହଞ୍ଚି ଭୋଟ୍ ଦେବା ଜାରି ରଖିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦଳ ପାଇଁ ଏହା ଏକ ବଡ଼ ପରୀକ୍ଷା ବୋଲି ବିବେଚନା କରାଯାଉଛି। 

ଆସାମ: ଆସାମରେ ଗତ ଏକ ଦଶନ୍ଧି ଧରି ବିଜେପି କ୍ଷମତାରେ ରହିଛି ଏବଂ ପୁଣିଥରେ ସତ୍ତା ବଜାୟ ରଖିବାକୁ ଚେଷ୍ଟା କରୁଛି। ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଅନୁପ୍ରବେଶ ଏବଂ ଜନସାଂଖ୍ୟିକ ପରିବର୍ତ୍ତନକୁ ମୁଖ୍ୟ ପ୍ରସଙ୍ଗ କରିଥିବା ବେଳେ କଂଗ୍ରେସ ନେତୃତ୍ୱାଧୀନ ବିରୋଧୀ ମେଣ୍ଟ ଶାସନ ଏବଂ ଅର୍ଥନୈତିକ ପ୍ରସଙ୍ଗ ଉପରେ ଗୁରୁତ୍ୱ ଦେଉଛି।

କେରଳ ଏବଂ ପୁଡୁଚେରୀ: କେରଳରେ ସାଧାରଣତଃ କମ୍ୟୁନିଷ୍ଟ ପାର୍ଟି ଅଫ୍ ଇଣ୍ଡିଆ (ମାର୍କ୍ସବାଦୀ) ଏବଂ କଂଗ୍ରେସ ମଧ୍ୟରେ କ୍ଷମତା ପରିବର୍ତ୍ତନ ହୋଇଥାଏ। ବାମପନ୍ଥୀ ମେଣ୍ଟ ଗତ ୧୦ ବର୍ଷ ଧରି ଏଠାରେ କ୍ଷମତାରେ ଅଛି। ସେହିପରି ୩୦ ଆସନ ବିଶିଷ୍ଟ ପୁଡୁଚେରୀରେ ବିଜେପି ନେତୃତ୍ୱାଧୀନ ଏନଡିଏ ମେଣ୍ଟ ବର୍ତ୍ତମାନ କ୍ଷମତାରେ ରହିଛି।

ଚଳିତ ମାସ ଶେଷ ଆଡ଼କୁ ଅନ୍ୟ ଦୁଇଟି ରାଜ୍ୟ- ପଶ୍ଚିମବଙ୍ଗ ଏବଂ ତାମିଲନାଡୁରେ ମତଦାନ ଅନୁଷ୍ଠିତ ହେବ। ଆସନ୍ତା ମେ ୪ ତାରିଖରେ ସମସ୍ତ ୫ଟି ଯାକ ଅଞ୍ଚଳର ଭୋଟ ଗଣତି କରାଯିବ। ଭାରତର ନିର୍ବାଚନ ଆୟୋଗଙ୍କ ତଥ୍ୟ ଅନୁଯାୟୀ, ଏହି ୫ଟି ରାଜ୍ୟରେ ମୋଟ ୧୭୪ ନିୟୁତ ଭୋଟର ଅଛନ୍ତି, ଯାହାକି ଦେଶର ସମୁଦାୟ ଭୋଟରଙ୍କ ପ୍ରାୟ ୧୮ ପ୍ରତିଶତ। ବିଜେପି ବର୍ତ୍ତମାନ ଆସାମରେ କ୍ଷମତାରେ ଥିବା ବେଳେ ପୁଡୁଚେରୀରେ ଶାସକ ମେଣ୍ଟର ଅଂଶବିଶେଷ ରହିଛି। ତେବେ ପଶ୍ଚିମବଙ୍ଗ, କେରଳ ଏବଂ ତାମିଲନାଡୁରେ ଦଳ କେବେବି ସରକାର ଗଠନ କରିପାରି ନାହିଁ। ନିଜର ପାରମ୍ପରିକ ଗଡ଼ ବାହାରେ ଦକ୍ଷିଣ ଏବଂ ପୂର୍ବ ଭାରତରେ ପତିଆରା ବିସ୍ତାର କରିବାକୁ ବିଜେପି ଲକ୍ଷ୍ୟ ରଖିଛି। ଅନ୍ୟପକ୍ଷରେ, ବିଜେପିର ଆଧିପତ୍ୟକୁ କଡ଼ା ଚ୍ୟାଲେଞ୍ଜ ଦେବା ପାଇଁ ବିରୋଧୀ ଦଳ, ବିଶେଷକରି କଂଗ୍ରେସ ନିମନ୍ତେ ଏହି ନିର୍ବାଚନ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ।

୫ଟି ଅଞ୍ଚଳର ମୋଟ ୮୨୪ଟି ବିଧାନସଭା ଆସନ ପାଇଁ ମତଦାନ ହେଉଛି। ତେବେ ନିର୍ବାଚନ ପୂର୍ବରୁ ସ୍ୱତନ୍ତ୍ର ଭୋଟର ତାଲିକା ସଂଶୋଧନ (SIR) କାର୍ଯ୍ୟକ୍ରମକୁ ନେଇ ବଡ଼ ବିବାଦ ଦେଖାଦେଇଛି। ବିଜେପିକୁ ଫାଇଦା ପହଞ୍ଚାଇବା ପାଇଁ ଏହି ପ୍ରକ୍ରିୟା ଜରିଆରେ ବିଶେଷ କରି ସଂଖ୍ୟାଲଘୁ (ମୁସଲମାନ) ସମ୍ପ୍ରଦାୟର ଲକ୍ଷ ଲକ୍ଷ ଭୋଟରଙ୍କ ନାମ ତାଲିକାରୁ ବାଦ୍ ଦିଆଯାଇଥିବା ନେଇ ବିରୋଧୀ ଅଭିଯୋଗ ଆଣିଛନ୍ତି। ଯଦିଓ ନିର୍ବାଚନ ଆୟୋଗ ଏବଂ ବିଜେପି ଏହି ଅଭିଯୋଗକୁ ସମ୍ପୂର୍ଣ୍ଣ ରୂପେ ଖଣ୍ଡନ କରିଛନ୍ତି।

ନୂଆଦିଲ୍ଲୀ: ରାଘବ ଚଢାଙ୍କ ବିରୋଧରେ 'ଆପ୍'ର ବଡ କାର୍ଯ୍ୟାନୁଷ୍ଠାନ । ରାଜ୍ୟସଭା ଉପ ନେତା ପଦରୁ ହଟିଲେ ରାଘବ ଚଢ଼ା ।  ଆମ୍ ଆଦମୀ ପାର୍ଟି (AAP) ନିଜର ବରିଷ୍ଠ ନେତା ତଥା ସାଂସଦ ରାଘବ ଚଢ଼ାଙ୍କୁ ସଂସଦର ଉଚ୍ଚ ସଦନ ଅର୍ଥାତ୍ ରାଜ୍ୟସଭାର ଉପନେତା ପଦରୁ ହଟାଇ ଦେଇଛି। ତାଙ୍କ ସ୍ଥାନରେ ପଞ୍ଜାବ ସାଂସଦ ଅଶୋକ ମିତ୍ତଲଙ୍କୁ ନୂଆ ରାଜ୍ୟସଭା ଉପନେତା ଭାବେ ନିଯୁକ୍ତ କରାଯାଇଛି। ୨୦୨୩ ମସିହାରୁ ଏହି ଦାୟିତ୍ୱ ତୁଲାଉଥିବା ରାଘବଙ୍କ ପାଇଁ ଏହା ଏକ ବଡ଼ ଝଟକା ବୋଲି କୁହାଯାଉଛି।

ପାର୍ଟି ପକ୍ଷରୁ ରାଜ୍ୟସଭା ସଚିବାଳୟକୁ ନେତୃତ୍ୱ ପରିବର୍ତ୍ତନ ନେଇ ସୂଚନା ଦିଆଯାଇଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଯେ, ସଂସଦରେ ପାର୍ଟିର କହିବା ସମୟ ରାଘବଙ୍କୁ ନଦେବାକୁ ଏହି ଚିଠିରେ ନିର୍ଦ୍ଦେଶ ଦିଆଯାଇଛି। ନିକଟରେ ତାଙ୍କର କିଛି ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ 'ରଣନୀତିକ ନୀରବତା' ଏହାର ପ୍ରମୁଖ କାରଣ ବୋଲି ଚର୍ଚ୍ଚା ହେଉଛି। ଫେବୃଆରୀ ୨୦୨୬ରେ ଦିଲ୍ଲୀ ଅବକାରୀ ନୀତି ମାମଲାରେ ଅରବିନ୍ଦ କେଜ୍ରିୱାଲ ଏବଂ ମନୀଷ ସିସୋଦିଆ ଦୋଷମୁକ୍ତ ହେବା ପରେ ମଧ୍ୟ ସେ ସୋସିଆଲ ମିଡିଆରେ ସମ୍ପୂର୍ଣ୍ଣ ଚୁପ୍ ରହିଥିଲେ। ଏହାବ୍ୟତୀତ ନିକଟରେ ଦିଲ୍ଲୀର ଯନ୍ତରମନ୍ତର ଠାରେ ଆୟୋଜିତ ଜନସଭା ଏବଂ ପାର୍ଟି ମୁଖ୍ୟାଳୟରେ ହୋଇଥିବା ପ୍ରେସ୍‌ମିଟ୍‌ରେ ମଧ୍ୟ ସେ ଅନୁପସ୍ଥିତ ଥିଲେ।

ନୂତନ ଉପନେତା ଭାବେ ଦାୟିତ୍ୱ ଗ୍ରହଣ କରିବା ପରେ ଅଶୋକ ମିତ୍ତଲ ଏହି ବିବାଦକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ଏହା ଏକ ନିୟମିତ ପ୍ରକ୍ରିୟା ଏବଂ ପାର୍ଟି ସମସ୍ତଙ୍କୁ ସୁଯୋଗ ଦେବାରେ ବିଶ୍ୱାସ କରେ। ସଙ୍ଗଠନ ଭିତରେ ସବୁକିଛି ଠିକ୍ ଥିବା ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସ୍ପଷ୍ଟ କରିଛନ୍ତି।

୨୦୧୨ ମସିହାରେ ଆପ୍‌ ଗଠନ ହେବା ଦିନଠାରୁ ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ (CA) ଭାବେ ରାଘବ ଚଢ଼ା ପାର୍ଟିର ଏକ ଅବିଚ୍ଛେଦ୍ୟ ଅଙ୍ଗ ରହିଆସିଛନ୍ତି। ସେ ଆପ୍‌ର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ସଂସ୍ଥା ରାଜନୈତିକ ବ୍ୟାପାର କମିଟି (PAC)ର ସଦସ୍ୟ, ପୂର୍ବତନ ଜାତୀୟ କୋଷାଧ୍ୟକ୍ଷ ଏବଂ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନଙ୍କ ଉପଦେଷ୍ଟା ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ବିରୋଧୀ ଇଣ୍ଡିଆ (INDIA) ମେଣ୍ଟ ଗଠନ ସମୟରେ ମଧ୍ୟ ସେ ପ୍ରମୁଖ ଭୂମିକା ଗ୍ରହଣ କରିଥିଲେ।

ପୂର୍ବରୁ ୨୦୨୪ ଲୋକସଭା ନିର୍ବାଚନ ଓ କେଜ୍ରିୱାଲଙ୍କ ଗିରଫଦାରୀ ସମୟରେ ଆଖି ଅସ୍ତ୍ରୋପଚାର ପାଇଁ ତାଙ୍କର ବ୍ରିଟେନ ଗସ୍ତ ଦଳ ଭିତରେ ଅନେକ ପ୍ରଶ୍ନବାଚୀ ସୃଷ୍ଟି କରିଥିଲା। ବର୍ତ୍ତମାନ ସେ ପଞ୍ଜାବର ସହ-ପ୍ରଭାରୀ ଭାବେ କାର୍ଯ୍ୟ କରୁଛନ୍ତି। ତେବେ ରାଜ୍ୟସଭା ଉପନେତା ପଦରୁ ବିଦା ହେବା ପରେ ଆପ୍‌ର ଆଭ୍ୟନ୍ତରୀଣ ସଙ୍ଗଠନରେ ରାଘବଙ୍କ ସ୍ଥିତି ଓ ପ୍ରଭାବ କେଉଁ ଆଡ଼କୁ ଯାଉଛି, ତାହା ଉପରେ ସମସ୍ତଙ୍କ ନଜର ରହିଛି।

ଭାରତୀୟ ନିର୍ବାଚନ କମିଶନ (ECI) ବୁଧବାର ଦିନ ରାଜ୍ୟସଭା ନିର୍ବାଚନ ପାଇଁ ବିଗୁଲ ବଜାଇଛନ୍ତି। ଆସନ୍ତା ମାର୍ଚ୍ଚ ୧୬ ତାରିଖରେ ଦେଶର ୧୦ଟି ରାଜ୍ୟର ଖାଲି ପଡ଼ିଥିବା ୩୭ଟି ରାଜ୍ୟସଭା ଆସନ ପାଇଁ ନିର୍ବାଚନ ଅନୁଷ୍ଠିତ ହେବ। ଏନେଇ ନିର୍ବାଚନ କମିଶନଙ୍କ ପକ୍ଷରୁ ବିଧିବଦ୍ଧ ଭାବେ କାର୍ଯ୍ୟସୂଚୀ ଘୋଷଣା କରାଯାଇଛି। ଆସନ୍ତା ଏପ୍ରିଲ ମାସରେ ଏହି ସମସ୍ତ ସଦସ୍ୟଙ୍କ କାର୍ଯ୍ୟକାଳ ଶେଷ ହେବାକୁ ଯାଉଥିବାରୁ ଏହି ନିର୍ବାଚନ ଅନୁଷ୍ଠିତ ହେଉଛି।

ନିର୍ବାଚନ କାର୍ଯ୍ୟସୂଚୀ ଓ ଗୁରୁତ୍ୱପୂର୍ଣ୍ଣ ତାରିଖ

ନିର୍ବାଚନ କମିଶନଙ୍କ ବିଜ୍ଞପ୍ତି ଅନୁଯାୟୀ, ଆସନ୍ତା ଫେବୃଆରୀ ୨୬ ତାରିଖରେ ଏହି ନିର୍ବାଚନ ପାଇଁ ଗେଜେଟ୍ ବିଜ୍ଞପ୍ତି ପ୍ରକାଶ ପାଇବ। ମାର୍ଚ୍ଚ ୧୬ ତାରିଖ ସକାଳ ୯ଟାରୁ ଅପରାହ୍ଣ ୪ଟା ପର୍ଯ୍ୟନ୍ତ ଭୋଟ୍ ଗ୍ରହଣ କରାଯିବ ଏବଂ ସେହିଦିନ ସନ୍ଧ୍ୟା ୫ଟାରେ ଭୋଟ୍ ଗଣତି ହେବ।

* ନାମାଙ୍କନ ଦାଖଲର ଶେଷ ତାରିଖ: ମାର୍ଚ୍ଚ ୫

* ନାମାଙ୍କନ ଯାଞ୍ଚ: ମାର୍ଚ୍ଚ ୬

* ନାମାଙ୍କନ ପ୍ରତ୍ୟାହାର: ମାର୍ଚ୍ଚ ୮

* ମତଦାନ ଓ ଫଳାଫଳ: ମାର୍ଚ୍ଚ ୧୬

ଓଡ଼ିଶାର ୪ ଆସନ ଉପରେ ନଜର

ଏହି ନିର୍ବାଚନ ଓଡ଼ିଶା ରାଜନୀତି ପାଇଁ ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହେବ। ଓଡ଼ିଶାର ୪ଟି ରାଜ୍ୟସଭା ଆସନ ପାଇଁ ମଧ୍ୟ ଏହି ଦିନ ଭୋଟ୍ ଗ୍ରହଣ ହେବାର ସମ୍ଭାବନା ରହିଛି। ଏହି ଆସନଗୁଡ଼ିକରେ କାର୍ଯ୍ୟରତ ସାଂସଦଙ୍କ କାର୍ଯ୍ୟକାଳ ଏପ୍ରିଲରେ ଶେଷ ହେଉଥିବାରୁ ରାଜ୍ୟର ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ମଧ୍ୟରେ ଅଙ୍କକଷା ଆରମ୍ଭ ହୋଇଯାଇଛି। ବିଧାନସଭାରେ ବିଭିନ୍ନ ଦଳର ସଂଖ୍ୟାଗରିଷ୍ଠତା ଆଧାରରେ ପ୍ରାର୍ଥୀ ଚୟନ ପାଇଁ ରଣନୀତି ପ୍ରସ୍ତୁତ ଚାଲିଛି। ଆଗାମୀ ଦିନରେ ନାମାଙ୍କନ ପ୍ରକ୍ରିୟା ଆରମ୍ଭ ହେବା ପରେ ରାଜନୈତିକ ଉଷ୍ମତା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। କେଉଁ ଦଳ କେତେ ଆସନ ହାତେଇବ, ତାହା ମାର୍ଚ୍ଚ ୧୬ରେ ସ୍ପଷ୍ଟ ହେବ।

ନୂଆଦିଲ୍ଲୀ: ମଙ୍ଗଳବାର ଲୋକସଭାରେ ବଜେଟ ଅଧିବେଶନ ଚାଲିଥିବା ବେଳେ ଗୃହର କାର୍ଯ୍ୟଧାରାରେ ବାଧା ସୃଷ୍ଟି କରିବା ଏବଂ ନିୟମ ଉଲ୍ଲଂଘନ ଅଭିଯୋଗରେ ୮ ଜଣ ବିରୋଧୀ ସାଂସଦଙ୍କୁ ଅଧିବେଶନର ବାକି ସମୟ ପାଇଁ ନିଲମ୍ବିତ କରାଯାଇଛି। କଂଗ୍ରେସ ନେତା ରାହୁଲ ଗାନ୍ଧୀ ପୂର୍ବ ଲଦାଖରେ ୨୦୨୦ ଚୀନ୍ ବିବାଦ ପ୍ରସଙ୍ଗ ଉଠାଇବାକୁ ଜିଦ୍ ଧରିବା ପରେ ଗୃହରେ ଅଶାନ୍ତି ଦେଖାଦେଇଥିଲା, ଯାହା ପରେ ଏହି ନିଷ୍ପତ୍ତି ନିଆଯାଇଛି।

ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଆଲୋଚନା ବେଳେ ବିରୋଧୀ ଦଳର ନେତା ରାହୁଲ ଗାନ୍ଧୀ କୈଳାଶ ରେଞ୍ଜ ବିବାଦ ଏବଂ ଚୀନ୍ ସେନାର କାର୍ଯ୍ୟକଳାପ ବିଷୟରେ କହିବାକୁ ଚାହିଁଥିଲେ। ତେବେ ସରକାରୀ ପକ୍ଷ ଏହାକୁ ବିରୋଧ କରି କହିଥିଲେ ଯେ କୌଣସି ଅପ୍ରକାଶିତ ରିପୋର୍ଟ କିମ୍ବା ପୁସ୍ତକ ଉପରେ ଆଧାରିତ ତଥ୍ୟ ଗୃହରେ ରଖାଯାଇପାରିବ ନାହିଁ। ବାଚସ୍ପତିଙ୍କ ବାରମ୍ବାର ଅନୁରୋଧ ସତ୍ତ୍ୱେ ହଟ୍ଟଗୋଳ ଜାରି ରହିଥିଲା। ସ୍ଥିତି ଏତେ ଜଟିଳ ହୋଇଯାଇଥିଲା ଯେ କିଛି ସାଂସଦ ବାଚସ୍ପତିଙ୍କ ଆସନ ଆଡକୁ କାଗଜପତ୍ର ଫିଙ୍ଗିଥିଲେ, ଫଳରେ ଗୃହକୁ ମୁଲତବୀ ରଖିବାକୁ ପଡିଥିଲା।

ଗୃହ ପୁନର୍ବାର ଆରମ୍ଭ ହେବା ପରେ ଅଧ୍ୟକ୍ଷତା କରୁଥିବା ବିଜେପି ସାଂସଦ ଦିଲୀପ ସାଇକିଆ ବିଶୃଙ୍ଖଳିତ ଆଚରଣ ପାଇଁ ୮ ଜଣ ସାଂସଦଙ୍କ ନାମ ଘୋଷଣା କରିଥିଲେ। ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ ସେମାନଙ୍କ ନିଲମ୍ବନ ପାଇଁ ପ୍ରସ୍ତାବ ଆଗତ କରିଥିଲେ, ଯାହା ଗୃହୀତ ହୋଇଥିଲା। ନିଲମ୍ବିତ ସାଂସଦମାନଙ୍କ ମଧ୍ୟରେ କଂଗ୍ରେସର ହିବି ଇଡେନ୍, ଅମରିନ୍ଦର ସିଂ ରାଜା ୱାରିଂ, ମାଣିକମ୍ ଟାଗୋର, ଗୁରଜିତ୍ ସିଂ ଔଜଲା, ପ୍ରଶାନ୍ତ ଯାଦବରାଓ ପଡୋଲେ, ଚାମଲା କିରଣ କୁମାର ରେଡ୍ଡୀ, ଡିନ୍ କୁରିଆକୋସ୍ ଏବଂ ସିପିଆଇ(ଏମ୍) ସାଂସଦ ଏସ୍. ଭେଙ୍କଟେଶନ୍ ସାମିଲ ଅଛନ୍ତି।

ନୂଆଦିଲ୍ଲୀ: ଭାରତୀୟ ଜନତା ପାର୍ଟି (ବିଜେପି)ର ନୂତନ ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିଛନ୍ତି ନୀତିନ ନବୀନ। ନୂଆଦିଲ୍ଲୀ ସ୍ଥିତ ଦଳୀୟ ମୁଖ୍ୟାଳୟରେ ଆୟୋଜିତ ଏକ ଭବ୍ୟ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଅନ୍ୟ ବରିଷ୍ଠ ନେତାଙ୍କ ଉପସ୍ଥିତିରେ ସେ ଏହି ଗୁରୁତ୍ୱପୂର୍ଣ୍ଣ ପଦବୀ ସମ୍ଭାଳିଛନ୍ତି। ଏହି କାର୍ଯ୍ୟକ୍ରମରେ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀ, ରାଷ୍ଟ୍ରୀୟ ପଦାଧିକାରୀ ଏବଂ ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟମାନେ ଉପସ୍ଥିତ ଥିଲେ।

ସୋମବାର ଦିନ ଦଳ ପକ୍ଷରୁ ନୀତିନ ନବୀନଙ୍କୁ ନିର୍ଦ୍ୱନ୍ଦ୍ୱରେ ବିଜୟୀ ଘୋଷଣା କରାଯାଇଥିଲା। ନାମାଙ୍କନ ପତ୍ର ଦାଖଲ ଏବଂ ଯାଞ୍ଚ ପ୍ରକ୍ରିୟା ଶେଷ ହେବା ପରେ ଅନ୍ୟ କୌଣସି ପ୍ରାର୍ଥୀ ନଥିବାରୁ ରିଟର୍ଣ୍ଣିଂ ଅଫିସର କେ. ଲକ୍ଷ୍ମଣ ତାଙ୍କ ନାମ ଘୋଷଣା କରିଥିଲେ। ସେ ବିଜେପିର ୧୨ତମ ରାଷ୍ଟ୍ରୀୟ ଅଧ୍ୟକ୍ଷ ଭାବେ ଦାୟିତ୍ୱ ନେଇଛନ୍ତି। ମାତ୍ର ୪୫ ବର୍ଷ ବୟସରେ ଅଧ୍ୟକ୍ଷ ହୋଇ ସେ ଦଳର ଇତିହାସରେ ସବୁଠାରୁ କନିଷ୍ଠ ରାଷ୍ଟ୍ରୀୟ ଅଧ୍ୟକ୍ଷ ହେବାର ଗୌରବ ଅର୍ଜନ କରିଛନ୍ତି, ଯାହା ପୂର୍ବରୁ ନୀତିନ ଗଡକରୀଙ୍କ ନାମରେ ଥିଲା।

ବିହାରର ବାଙ୍କିପୁର ଆସନରୁ କ୍ରମାଗତ ୫ ଥର ବିଧାୟକ ହୋଇଥିବା ନୀତିନ ନବୀନ ବର୍ତ୍ତମାନ ବିହାର ସରକାରରେ ପୂର୍ତ୍ତ ବିଭାଗର ମନ୍ତ୍ରୀ ଅଛନ୍ତି। ନିଜ ପିତା ତଥା ବରିଷ୍ଠ ନେତା ନବୀନ କିଶୋର ସିହ୍ନାଙ୍କ ଦେହାନ୍ତ ପରେ ୨୦୦୬ ମସିହାରେ ସେ ରାଜନୀତିରେ ପ୍ରବେଶ କରିଥିଲେ। ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ABVP)ରୁ କ୍ୟାରିୟର ଆରମ୍ଭ କରି ସେ ଯୁବ ମୋର୍ଚ୍ଚାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ। ଛତିଶଗଡ଼ ବିଧାନସଭା ନିର୍ବାଚନ (୨୦୨୩) ଏବଂ ଲୋକସଭା ନିର୍ବାଚନ (୨୦୨୪)ରେ ଦଳର ସଫଳତା ପଛରେ ତାଙ୍କର ସାଙ୍ଗଠନିକ ଦକ୍ଷତାକୁ ପ୍ରମୁଖ କାରଣ ବୋଲି ବିବେଚନା କରାଯାଏ।

ନୂଆଦିଲ୍ଲୀ: ହୋ ହଲ୍ଲା ଭିତରେ ଲୋକସଭାରେ VB-G RAM-G ବିଲ୍‌ ପାରିତ । ବିରୋଧୀଙ୍କ ପ୍ରବଳ ହଟ୍ଟଗୋଳ ଭିତରେ ଲୋକସଭାରେ ପାରିତ ହେଲା VB–G RAM-G ବିଲ୍‌ । MGNREGA ବଦଳରେ ସରକାର ଆଣିଥିଲେ VB–G RAM-G ବିଲ୍‌ । ବିରୋଧୀ ସାଂସଦମାନଙ୍କ ନାରାବାଜି ସତ୍ତ୍ୱେ ଧ୍ୱନିମତରେ ଏହି ବିଲ୍ ଗୃହୀତ ହୋଇଛି । କେନ୍ଦ୍ର କୃଷି ମନ୍ତ୍ରୀ ଗୃହରେ ଅଭିଭାଷଣ ରଖିବା ବେଳେ ବିରୋଧୀ ସାଂସଦମାନେ ଗୃହ ମଧ୍ୟ ଭାଗକୁ ଆସି ପ୍ରବଳ ହୋହଲ୍ଲା କରିଥିଲେ। ବିଲର କପି ଚିରି ଫିଙ୍ଗିଥିଲେ। ଏହି ହଟ୍ଟଗୋଳ ପରିସ୍ଥିତି ପରେ ଗୃହର କାର୍ଯ୍ୟବାହୀକୁ ଆସନ୍ତାକାଲି ପର୍ଯ୍ୟନ୍ତ ମୁଲତବୀ ଘୋଷଣା କରାଯାଇଛି। 

ଏହି ନୂତନ ଆଇନ ୨୦ ବର୍ଷ ପୁରୁଣା ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଆଇନ (MGNREGA)ର ସ୍ଥାନ ନେଇଛି । ଏହା ଅଧୀନରେ ଗ୍ରାମାଞ୍ଚଳର ପରିବାରଗୁଡ଼ିକୁ ବର୍ଷକୁ ୧୨୫ ଦିନର ନିଶ୍ଚିତ କର୍ମନିଯୁକ୍ତି ପ୍ରଦାନ କରିବାକୁ ବ୍ୟବସ୍ଥା ରହିଛି। ତେବେ ବିରୋଧୀ ଦଳ ଏହି ବିଲ୍ ଉପରେ ଅଧିକ ତର୍ଜମା ଦାବି କରିଥିଲେ ଏବଂ ଏହାକୁ ଯୁଗ୍ମ ସଂସଦୀୟ କମିଟି (JPC) କିମ୍ବା ଷ୍ଟାଣ୍ଡିଂ କମିଟିକୁ ପଠାଇବାକୁ କହିଥିଲେ, କିନ୍ତୁ ସରକାର ଏହି ଦାବିକୁ ଖାରଜ କରିଦେଇଥିଲେ।

ବିରୋଧୀ ମନରେଗା ନାମ ପରିବର୍ତ୍ତନକୁ ଆଦୌ ଗ୍ରହଣ କରୁ ନାହାନ୍ତି। ଯୋଜନା ସହ ମହାତ୍ମା ଗାନ୍ଧୀଙ୍କ ନାମ ଜଡ଼ିତ ଥିଲା। ହେଲେ ସେମାନେ ଗାନ୍ଧୀଙ୍କ ନାଁ ହଟାଇବାକୁ ଚାହୁଛନ୍ତି। ଏହା ମହାତ୍ମା ଗାନ୍ଧୀଙ୍କ ପ୍ରତି ବଡ଼ ଅପମାନ ବୋଲି ବିରୋଧୀ ଅଭିଯୋଗ କରିଛନ୍ତି। 

ସରକାରଙ୍କ ପକ୍ଷରୁ କେନ୍ଦ୍ରମନ୍ତ୍ରୀ ଶିବରାଜ ସିଂ ଚୌହାନ ବିରୋଧୀ ଦଳ, ବିଶେଷକରି କଂଗ୍ରେସର ସମାଲୋଚନାକୁ କଡ଼ା ଜବାବ ଦେଇଥିଲେ। ହଟ୍ଟଗୋଳ ମଧ୍ୟରେ ସେ କହିଥିଲେ ଯେ, କଂଗ୍ରେସ ଦଳ ବାପୁଙ୍କ ଆଦର୍ଶକୁ ହତ୍ୟା କରିବା ପାଇଁ କାମ କରିଛି, କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବାପୁଙ୍କ ଆଦର୍ଶକୁ ବଞ୍ଚାଇ ରଖିବା ପାଇଁ କାର୍ଯ୍ୟ କରୁଛନ୍ତି।

ମହାତ୍ମା ଗାନ୍ଧୀଙ୍କ ଦର୍ଶନକୁ ଉଲ୍ଲେଖ କରି ଚୌହାନ କହିଥିଲେ ଯେ ମୋଦୀ ସରକାରଙ୍କ ଜନକଲ୍ୟାଣକାରୀ ଯୋଜନାରେ ଗାନ୍ଧୀବାଦୀ ମୂଲ୍ୟବୋଧ ପ୍ରତିଫଳିତ ହେଉଛି। ସେ ଯୁକ୍ତି ବାଢିଥିଲେ ଯେ ପ୍ରଧାନମନ୍ତ୍ରୀ ଆବାସ ଯୋଜନା, ଜଳ ଜୀବନ ମିଶନ, ସ୍ୱଚ୍ଛ ଭାରତ ମିଶନ, ଉଜ୍ଜ୍ୱଳା ଯୋଜନା ଏବଂ ଆୟୁଷ୍ମାନ ଭାରତ ଭଳି ଯୋଜନା ମାଧ୍ୟମରେ ଗରିବଙ୍କ ସେବା କରି ବାପୁଙ୍କ ସ୍ୱପ୍ନକୁ ସାକାର କରାଯାଉଛି।

ନୂଆଦିଲ୍ଲୀ: ବିହାର ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ କଂଗ୍ରେସର ରାଜନୈତିକ ସମୀକରଣ ବଦଳିବା ନେଇ ଚର୍ଚ୍ଚା ହେଉଛି। ଏହାକୁ ଖୋରାକ ଯୋଗାଇଛନ୍ତି ନିର୍ବାଚନ ରଣନୀତିକାର ତଥା ଜନ ସୁରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର। ସେ ଗତ ସପ୍ତାହରେ କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ୧୦-ଜନପଥ ସ୍ଥିତ ବାସଭବନକୁ ଯାଇଥିଲେ। ଏଠାରେ ସୋନିଆଙ୍କ ଝିଅ ତଥା ସାଂସଦ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଉପସ୍ଥିତ ଥିଲେ। ପ୍ରଶାନ୍ତ ଏବଂ ପ୍ରିୟାଙ୍କାଙ୍କ ମଧ୍ୟରେ ଏଠାରେ ପ୍ରାୟ ଦୁଇ ଘଣ୍ଟା ପର୍ଯ୍ୟନ୍ତ ରୁଦ୍ଧ ଦ୍ବାର ବୈଠକ ହୋଇଥିଲା। ତେବେ ଉଭୟଙ୍କ ମଧ୍ୟରେ କି ଆଲୋଚନା ହୋଇଥିଲା ତାହା ଏ ପର୍ଯ୍ୟନ୍ତ ଜଣାପଡ଼ି ନାହିଁ। ମାତ୍ର ଏହି ସାକ୍ଷାତକୁ ନେଇ ରାଜନୈତିକ ମହଲରେ ଚର୍ଚ୍ଚା ସରଗରମ ହୋଇ ଉଠିଛି। 

ଏହି ସାକ୍ଷାତକୁ ନେଇ ଉଭୟେ ପ୍ରିୟଙ୍କା ଏବଂ ପ୍ରଶାନ୍ତ ଚୁପ୍‌ ରହିଛନ୍ତି। କୌଣସି ବୈଠକ ହୋଇ ନଥିବା ପ୍ରଶାନ୍ତ କହିଥିବାବେଳେ ମୁଁ କାହା ସହ ମିଶୁଛି ତାହା ଜାଣିବା ପାଇଁ କେହି ଚାହାନ୍ତି ନାହିଁ ବୋଲି ପ୍ରିୟଙ୍କା କହିଥିଲେ। ମାତ୍ର ସୂତ୍ରରୁ ମିଳିଥିବା ସୂଚନା ଅନୁଯାୟୀ, ବିହାର ଏବଂ ଦେଶରେ ବିରୋଧୀଙ୍କ ରାଜନୀତି ଉପରେ ଉଭୟେ ଚର୍ଚ୍ଚା କରିଥିଲେ। ଅନ୍ୟ ପ୍ରସଙ୍ଗରେ ମଧ୍ୟ ଆଲୋଚନା କରାଯାଉଛି। ଉତ୍ତର ପ୍ରଦେଶ ରାଜନୀତି ମଧ୍ୟ ଏହି ଚର୍ଚ୍ଚାର ଏଜେଣ୍ଡାରେ ଥିଲା ବୋଲି କୁହାଯାଉଛି। ୨୦୨୬ ଏବଂ ୨୦୨୭ରେ ୧୨ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି। ଏହା ପୂର୍ବରୁ କଂଗ୍ରେସକୁ ସବୁ ରାଜ୍ୟରେ ମଝବୁତ କରିବାର ରଣନୀତି ନେଇ ଚର୍ଚ୍ଚା କରିଥିଲେ।  ଜାତୀୟସ୍ତରରେ ପ୍ରଶାନ୍ତଙ୍କ ପ୍ରଦର୍ଶନ ଭଲ ରହିଛି ବୋଲି କଂଗ୍ରେସର ଏକ ଗୋଷ୍ଠୀ ଭାବୁଛନ୍ତି। ସେମାନେ ପ୍ରଶାନ୍ତଙ୍କୁ ରଣନୀତିରେ ସାମିଲ କରିବାକୁ ଚାହୁଁଛନ୍ତି। କଂଗ୍ରେସକୁ ନିଜ ସାମର୍ଥ୍ୟରେ ମଝବୁତ ହେବାକୁ ପଡ଼ିବ। ଏଥିପାଇଁ ବଡ଼ ରାଜ୍ୟ ପାଇଁ ମଝବୁତ ରଣନୀତିକାରର ଆବଶ୍ୟକତା ରହିଛି। ସେହିପରି କଂଗ୍ରେସ ଏଥର ବିଭିନ୍ନ ରାଜ୍ୟରେ ନିଜ ଦମରେ ଲଢ଼ିବା ପାଇଁ ଚାହୁଁଥିବା କୁହାଯାଉଛି। 

ମହାତ୍ମା ଗାନ୍ଧୀଙ୍କ ଜନ୍ମ ଶତବାର୍ଷିକୀ ପାଳନ ଅବସରରେ ଭାରତ ସରକାରଙ୍କର ଯୁବ ବ୍ୟାପାର ଓ କ୍ରୀଡ଼ା ମନ୍ତ୍ରଣାଳୟ ଦ୍ୱାରା ୨୪ ସେପ୍ଟେମ୍ବର ୧୯୬୯ ରେ ମହାବିଦ୍ୟାଳୟରେ ଅଧ୍ୟୟନରତ ଛାତ୍ରଛାତ୍ରୀଙ୍କ ନିମନ୍ତେ ‘ରାଷ୍ଟ୍ରୀୟ ସେବା ଯୋଜନା’ ସ୍ଥାପିତ ହୋଇଛିଫ ସାମାଜିକ ସମସ୍ୟା ସମାଧାନ ଦିଗରେ ଜନସାଧାରଣଙ୍କର ଭାଗିଦାରିତା ସୃଷ୍ଟି କରିବା ନିମନ୍ତେ ଆବଶ୍ୟକ ‘ନେତୃତ୍ୱକାରୀ ସାମର୍ଥ୍ୟକୁ’ ବିଦ୍ୟାର୍ଥୀମାନଙ୍କ ମଧ୍ୟରେ ପ୍ରୋତ୍ସାହିତ କରିବା ଏହି ଯୋଜନାର ମୁଖ୍ୟ ଉଦ୍ଦେଶ୍ୟ। ଏକ ବେସରକାରୀ ସଂଗଠନ ଜିଲ୍ଲା ସଦର ମହକୁମାରେ ୫୦ଜଣ ବିଦ୍ୟାର୍ଥୀଙ୍କୁ ନେଇ ୫ଦିନିଆ ଶିବିର ଆୟୋଜନ କରିଥା’ନ୍ତି। ଅନ୍ଧବିଶ୍ୱାସ ମୁକ୍ତ ଓ ବୈଜ୍ଞାନିକ ଚିନ୍ତାଧାରାଯୁକ୍ତ ଜୀବନ ସଫଳତାର ପ୍ରଥମ ପାହାଚ ଏବଂ ସମ୍ବିଧାନର ଧାରା -୫୧(କ) ଅନ୍ତର୍ଗତ ନାଗରିକଙ୍କ ଦାୟିତ୍ୱ ଓ କର୍ତ୍ତବ୍ୟ ସମ୍ପର୍କରେ ବିଦ୍ୟାର୍ଥୀମାନଙ୍କୁ ପ୍ରଶିକ୍ଷଣ ଦେବା କାର୍ଯ୍ୟ ମୁଁ କରୁଥାଏ। ତେଣୁ ଉକ୍ତ ବେସରକାରୀ ସଂଗଠନ ମୋତେ ନିମନ୍ତ୍ରଣ କରିଥା’ନ୍ତି। 

ମହାବିଦ୍ୟାଳୟରେ ‘ରାଷ୍ଟ୍ରୀୟ ସେବା ଯୋଜନା’ ଦାୟିତ୍ୱରେ ଥିବା ଅଧ୍ୟାପକ ବିଦ୍ୟାର୍ଥୀମାନଙ୍କୁ ନେତୃତ୍ୱ ଦେବାକୁ ଆବଶ୍ୟକ ଦୁଇଟି ଯୋଗ୍ୟତା ସମ୍ପର୍କରେ ବୁଝାଉଥା’ନ୍ତି। ପ୍ରଥମ, ଜନତାଙ୍କ ସହ ବ୍ୟକ୍ତିଗତ ପ୍ରତ୍ୟକ୍ଷ ସମ୍ପର୍କ। ଦ୍ୱିତୀୟରେ ଜନସାଧାରଣଙ୍କ ସହ ଭାବର ଆଦାନ ପ୍ରଦାନ ନିମନ୍ତେ ବାକ୍‌-ପଟୁତା। ସିଧାସଳଖ  ସମ୍ପର୍କ ଓ ଭଲ କହିଲା ବାଲା ନହେଲେ ସଫଳ ନେତା ହୋଇ ପାରିବ ନାହିଁ। ଅଧ୍ୟାପକଙ୍କ ପାଠ ପଢ଼ା ସରିବା ପରେ ମୋ ପାଳି ଆସିଲା। ମାତ୍ର ମୁଁ ମୋ ବିଷୟକୁ ନ ଯାଇ ବିଦ୍ୟାର୍ଥୀ ଓ ଅନ୍ୟ ଅଧ୍ୟାପକଙ୍କ ଉପସ୍ଥିତିରେ ମୋର ଗୋଟିଏ ପ୍ରଶ୍ନ ଥିଲା, ଓଡ଼ିଶାରେ ଜନପ୍ରିୟତାର ଶୀର୍ଷରେ ଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନସମ୍ପର୍କ ଓ ବାକ୍‌ପଟୁତା। ବିଦ୍ୟାର୍ଥୀମାନଙ୍କ ଅପେକ୍ଷା ଅଧ୍ୟାପକବନ୍ଧୁମାନେ ସ୍ତବ୍ଧ। ବିରୋଧୀ ରାଜନୈତିକ ଦଳ ଓ ରାଜନୈତିକ ସମୀକ୍ଷକ ନବୀନ ବାବୁଙ୍କ ବିରୁଦ୍ଧରେ ଅପପ୍ରଚାର କରୁଥିଲେ ଯେ ତାଙ୍କର ଜନସାଧାରଣଙ୍କ ସହିତ ଆଦୌ ସମ୍ପର୍କ ନାହିଁ ଏବଂ ନବୀନ ବାବୁ ଭାଷଣ କଥା ଛାଡ଼ନ୍ତୁ ଅନ୍ୟ ପକ୍ଷରେ ବହୁତ କମ୍‌ କଥା କହନ୍ତି। ତେବେ କେଉଁ ଆଧାରରେ ସେ ଓଡ଼ିଶାବାସୀଙ୍କ ହୃଦୟ ଜିଣିଥିଲେ? ଯାହାଙ୍କୁ ଦେଖିବା ପାଇଁ ରାସ୍ତାକଡ଼ରେ ହଜାର ହଜାର ଆବାଳ ବୃଦ୍ଧ ବନିତା ଘଣ୍ଟା ଘଣ୍ଟା ଧରି ଅପେକ୍ଷା କରୁଥିଲେ? 

ଭାରତର ରାଜନୀତିରେ ଏକ ନୂତନ ସିଦ୍ଧାନ୍ତ ସୃଷ୍ଟି କରିଥିଲେ ନବୀନ ବାବୁ। ଜନସାଧାରଣଙ୍କ ସହ ପ୍ରତ୍ୟକ୍ଷ ସମ୍ପର୍କର ସେତୁ ସୃଷ୍ଟି କରିଥିଲେ ‘ଜନ କଲ୍ୟାଣ ଯୋଜନା’ର ସୁଫଳ ଜରିଆରେ ଓଡ଼ିଶାବାସୀଙ୍କ ମୁହଁରେ ହସ ଫୁଟାଇ। ମିଥ୍ୟା ପ୍ରତିଶ୍ରୁତି ଓ ଲମ୍ବା ଭାଷଣ ପରିବର୍ତ୍ତେ ତିନୋଟି ଶବ୍ଦ ମାଧ୍ୟମରେ କୋଟିକୋଟି ଓଡ଼ିଶାବାସୀଙ୍କ ହୃଦୟକୁ ଜିତିଥିଲେ - ‘ଆପଣମାନେ ଖୁସି ତ’ ?

ସାଢେ଼ ଚାରିକୋଟି ଓଡ଼ିଶାବାସୀ କେବଳ ନୁହନ୍ତି ଦେଶବାସୀ ଜାଣିଛନ୍ତି ଯେ ଗତ ବିଧାନସଭା ନିର୍ବାଚନରେ  ଭାରତର ପ୍ରଧାନମନ୍ତ୍ରୀ, ଗଣ୍ଡା ଗଣ୍ଡା କେନ୍ଦ୍ରମନ୍ତ୍ରୀ, ଭାଜପା ଶାସିତ ରାଜ୍ୟର ମୁଖ୍ୟମନ୍ତ୍ରୀ, ଓଡ଼ିଶାବାସୀଙ୍କୁ ମିଥ୍ୟା ପ୍ରତିଶ୍ରୁତି ଦେଇ ଭୋଟ ନେଇଛନ୍ତି। ମାତ୍ର ଏକ ବର୍ଷ ମଧ୍ୟରେ ତାହା ପ୍ରମାଣ ହୋଇସାରିଛି। ଭାରତର ରାଜନୈତିକ ଇତିହାସରେ ନବୀନବାବୁ ନୂଆ ସିଦ୍ଧାନ୍ତର ପ୍ରତୀକ ପାଲଟିଛନ୍ତି। 
ଅଧ୍ୟକ୍ଷ, 

ବିଶ୍ୱାମିତ୍ର ଜନସେବା ଟ୍ରଷ୍ଟ, ଖୋର୍ଦ୍ଧା,
ମୋ: ୯୩୩୭୬୨୧୪୫୫