ଭୁବନେଶ୍ୱର: ବାରଙ୍ଗ ଥାନାରେ ଯୁବକଙ୍କୁ ଥାର୍ଡ ଡିଗ୍ରୀ ଘଟଣାକୁ ନେଇ ପ୍ରବଳ ଉତ୍ତେଜନା । ବାରଙ୍ଗ ଥାନା ଆଗରେ ଉତ୍ତ୍ୟକ୍ତ ଗ୍ରାମବାସୀଙ୍କ ବିରୋଧ ପ୍ରଦର୍ଶନ । ମାଡ଼ ମରାଯାଇଥିବା ରାକେଶଙ୍କ ବାବଦରେ ତଥ୍ୟ ନ ମିଳିବାରୁ ଉତ୍ତେଜନା । ପୋଲିସର ଅମାନୁଷିକ କାର୍ଯ୍ୟକୁ ବିରୋଧ କରି କଟକ-ଭୁବନେଶ୍ୱର ରାସ୍ତା ଅବରୋଧ କରିଛନ୍ତି ଚଣ୍ଡୀପ୍ରସାଦ ଗ୍ରାମବାସୀ । ମାଡ଼ ମରାଯାଇଥିବା ରାକେଶଙ୍କ ବାବଦରେ ପୋଲିସ ତଥ୍ୟ ଦେଉନଥିବା ଅଭିଯୋଗ । କେଉଁଠି ଓ କିଭଳି ସ୍ଥିତିରେ ଅଛନ୍ତି ପୋଲିସ ଜଣାଉନଥିବାରୁ ତାତିଲେ ଗ୍ରାମବାସୀ । ରାସ୍ତା ଅବରୋଧ ଯୋଗୁଁ ଅଟକିଛି ଗାଡ଼ି ମୋଟର । ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିବାରୁ ଘଟଣାସ୍ଥଳରେ କଟକ ଡିସିପିଙ୍କ ସମେତ ଏସିପି ବିଭିନ୍ନ ଥାନାରେ ଅଧିକାରୀ ଓ ଫୋର୍ସ ମୁତୟନ ହୋଇଛନ୍ତି । ରାସ୍ତା ଅବରୋଧ ହଟାଇବାକୁ ପୋଲିସ ବୁଝାସୁଝା କରୁଛି । 

ଲିଙ୍ଗିପୁର: ଭୁବନେଶ୍ୱର ଉପକଣ୍ଠ ପୁଣ୍ୟତୋୟା ଦୟାନଦୀରେ ଦେଖିବାକୁ ମିଳିଥିଲା ଭଗବାନ ବୁଦ୍ଧଙ୍କ ବିରାଟକାୟ ବାଲୁକାକଳା। ଓଡ଼ିଶା ଇତିହାସର ମୁକସାକ୍ଷୀ ରକ୍ତରନଦୀ ଦୟାନଦୀରେ ଶାନ୍ତିର ପ୍ରତୀକ ଭଗବାନ ଗୌତମ ବୁଦ୍ଧଙ୍କ ବାଲୁକାକଳା ବେଶ ମନଲୋଭା ହୋଇଛି। ରୋଟାରି କ୍ଲବ୍‌‌-୩୨୬୨ ତରଫରୁ ପ୍ରସ୍ତୁତ ହୋଇଥିବା ୧୩୭ ଫୁଟ ଲମ୍ବର ବୁଦ୍ଧଙ୍କ ଶୟନରତ ଏହି ବାଲୁକାକଳା ପ୍ରସ୍ତୁତି କରିଥିଲେ ବିଶିଷ୍ଟ ବାଲୁକାଶିଳ୍ପୀ ଡ଼. ସୁବଳ ମହାରଣା। ଏଥିରେ ତାଙ୍କୁ ୨୦ ଜଣ ଶିଳ୍ପୀ ସାହାଯ୍ୟ କରିଥିଲେ, ଯେଉଁଥିରେ ୬ ଜଣ ଝିଅ ଥିଲେ। ଏହି କଳାକୁ ପ୍ରସ୍ତୁତ କରିବା ନିମନ୍ତେ ୩୭ ଘଣ୍ଟା ଲାଗିଥିଲା। ସେ ଆଜି ପର୍ଯ୍ୟନ୍ତ ରାଜ୍ୟ ଓ ଦେଶବିଦେଶରେ ୩୦୦ରୁ ଊର୍ଦ୍ଧ୍ବ୍ୱ ବାଲୁକାକଳା ତିଆରି କରିଥିବା ବେଳେ ଆଜିର କଳାକୃତିକୁ ମିଶାଇ ୧୫ ଗୋଟି ବିଶ୍ୱରେକର୍ଡ କରିଥିବା ଡ଼. ମହାରଣା କହିଛନ୍ତି। ଦୟାନଦୀର ବାଲିରେ ଏଭଳି ବାଲୁକାକଳା ଦେଖଣାହାରୀଙ୍କୁ ବେଶ ବିମୋହିତ କରିଥିଲା।

ଭୁବନେଶ୍ୱର: ଏୟାରଫିଲ୍ଡ ଥାନା ଆଜାଦ ନଗରରେ ବୋମା ବିସ୍ଫୋରଣ ମାମଲାରେ ଏୟାରଫିଲ୍ଡ ଥାନାରେ  NIA ଟିମ୍। ଜବତ ହେଇଥିବ ସ୍କୁଟିକୁ ଯାଞ୍ଚ କରୁଛି NIA ଟିମ୍।  ସ୍କୁଟିରେ କିଛି ବୋମା ତିଆରି ପାଇଁ ସାମଗ୍ରୀ ଆସିଥିଲା କି, କିଛି ନମୁନା ଅଛି କି ସେ ସବୁକୁ ନେଇ ତଦନ୍ତ ଚାଲିଛି।  NIA ଟିମ୍  ସାଇଣ୍ଟଫିକ ଟିମର ତନାଘନା । ସେହନେବାଜ ସହ ସମ୍ପର୍କ ଥିବା ଦୁଇ ଯୁବକକୁ ପଚରାଉଚରା ପରେ ମିଳିଛି ତଥ୍ୟ । ଯେଉଁମାନେ କି ବିସ୍ଫୋରଣ ଦିନ ସେମାନଙ୍କୁ ହସ୍ପିଟାଲ ନେଇ ଯାଇଥିଲେ । ସେମାନଙ୍କୁ ପଚରାଉଚରା ପରେ ସୁରକ ପାଇଛି NIA । 

ସୂଚନାଯୋଗ୍ୟ, ଏୟାରଫିଲ୍ଡ ଥାନା ଆଜାଦ ନଗରରେ ଜାନୁଆରୀ ୨୭ରେ ଭଡ଼ା ଘରେ ବୋମା ବିସ୍ଫୋରଣ ହେଇଥିଲା । ବୋମା ବିସ୍ଫୋରଣରେ ମୁଖ୍ୟ ଅଭିଯୁକ୍ତ ସେହେନବାଜ ମଲ୍ଲିକ ସହ  ତା' ମା ମୃତ୍ୟୁଁ ବରଣ କରିଥିଲେ । ସାଙ୍ଗ ଅମିୟ ମଲ୍ଲିକ ଓ ସେହେନବାଜଙ୍କ ବାନ୍ଧବି ଘରୋଇ ହସ୍ପିଟାଲ ରେ ଚିକିତ୍ସିତ ହେଉଠିଲେ । ପ୍ରଥମେ ଏୟାରଫିଲ୍ଡ ଥାନା ପୋଲିସ ତଦନ୍ତ କରୁଥିବା ବେଳେ ପରେ NIA ନିଜ ହାତକୁ ମାମଲା ନେଇଥିଲା।

ଭୁବନେଶ୍ୱର: ଦୁର୍ଘଟଣା ନୁହେଁ ହତ୍ୟା । ପୋଲିସ ଖୋଲିଲା କାଜୁ ବଣ ଭିତରେ ହତ୍ୟାର ଗୁମର କଥା । ମୁହଁରେ ଲାଗିଥିବା ବାଲି ଦେଲା ହତ୍ୟାର ସୁରାକ । ଗତକାଲି ରାଜଧାନୀ ଉପକଣ୍ଠ ଇନ୍ଫୋଭ୍ୟାଲିରେ ରାସ୍ତା କଡରୁ ଯୁବକଙ୍କ ସନ୍ଦେହଜନକ ମୃତଦେହ ମିଳିବା ଘଟଣା । ମୃତ ଯୁବକ ହେଲେ ଛତିଶଗଡ ବିଳାଶପୁର ଗୋବର୍ଧନ ଯାଦବ ।  ସେ ସୁନ୍ଦରପଦା ଅଂଚଳରେ ଥିବା ଏକ କନଷ୍ଟ୍ରକସନ କମ୍ପାନୀରେ କେୟାର ଟେକର କାମ କରନ୍ତି । ଗତକାଲି ଇନ୍ଫୋଭ୍ୟାଲି ଅଞ୍ଚଳରେ ଥିବା ପଥର ଖଣିରୁ ସନ୍ଦେହଜନକ ଅବସ୍ଥାରେ  ମୃତଦେହ ଉଦ୍ଧାର ହୋଇଥିଲା । ତଦନ୍ତ ବେଳେ ପୋଲିସ ଜାଣିବାକୁ ପାଇଛି ଏହା ଦୁର୍ଘଟଣା ନୁହେଁ ହତ୍ୟା । ଗୋବର୍ଧନ କାମ କରୁଥିବା କନଷ୍ଟ୍ରକସନ କମ୍ପାନୀରେ ଶୋଇଥିବା ବେଳେ ଏକ ବାଲି ବୁଝେଇ ଟ୍ରକ ତାଙ୍କୁ ଚାପି ଦେଇଥିଲା । ପ୍ରମାଣ ନଷ୍ଟ ପାଇଁ ମୃତଦେହକୁ ସୁନ୍ଦରପଡାରୁ ନେଇ ଇନ୍ଫୋଭ୍ୟାଲିରେ ଫିଙ୍ଗି ଦେଇଥିଲା ଡ୍ରାଇଭର । ଅଭିଯୁକ୍ତ ଡ୍ରାଇଭର ହେଉଛି ନୟାଗଡ ଫତେଗଡ଼ର ରାମଚନ୍ଦ୍ର ଲେଙ୍କା।  ଏହି ଘଟଣାରେ ଆଉ କିଛି ଲୋକଙ୍କ ସମ୍ପୃକ୍ତି ରହିଛି । ସେମାନଙ୍କୁ ଧରିବାକୁ ଚେଷ୍ଟା ଚାଲିଛି ବୋଲି ସୂଚନା ଦେଇଛି କମିସନରେଟ ପୋଲିସ ।

ଭୁବନେଶ୍ୱର: ରାଜଧାନୀରେ ଏନକାଉଣ୍ଟର । କୁଖ୍ୟାତ ଡ୍ରଗ୍ସ ମାଫିଆକୁ ଏନକାଉଣ୍ଟର । ଗଞ୍ଜାମ ଜଗନ୍ନାଥ ପ୍ରସାଦର ପପୁନ ମାଝୀକୁ ଏନକାଉଣ୍ଟର। ହାର୍ଡକୋର ନିଶା ମାଫିଆଙ୍କୁ ଏନକାଉଣ୍ଟର କରି ଘାଇଲା କଲା ସ୍ପେଶାଲ କ୍ରାଇମ ୟୁନିଟ। ଇନ୍ଫୋଭ୍ୟାଲି ଥାନା ଅରିସଲ ନିକଟରେ ପପୁନ ଏକ ନିଶା ସାମଗ୍ରୀ ବିକ୍ରି ନେଇ ଖବର ପାଇବା ପରେ ଚଢ଼ାଉ କରିଥିଲା ସ୍ପେଶାଲ କ୍ରାଇମ ୟୁନିଟ। ପୋଲିସକୁ ଦେଖି ଖସିଯିବାକୁ ଉଦ୍ୟମ କରୁଥିଲା ଅଭିଯୁକ୍ତ ଜଣଙ୍କ । ଏପରିକି ପୋଲିସ ଉପରକୁ ଗୁଳିମାଡ଼ କରିଥିଲା। ପୋଲିସ ଆତ୍ମରକ୍ଷା ପାଇଁ ପାଲଟା ଗୁଳିଚାଳନା ବେଳେ ଆହତ ହୋଇଥିଲେ ପପୁନ । ତାକୁ ପ୍ରାଥମିକ ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲ ଓ ପରେ କଟକ ବଡ଼ ମେଡ଼ିକାଲ ସ୍ଥାନାନ୍ତର କରାଯାଇଛି । ଅପରାଧୀଙ୍କୁ ଦମନ ପାଇଁ ସାରା ଓଡ଼ିଶାରେ ଜାରି ରହିଛି ଏନକାଉଣ୍ଟର ଫଣ୍ଡା।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଚାଞ୍ଚଲ୍ୟ । ପାହାଳ ଭଡ଼ା ଘରୁ ଯୁବତୀଙ୍କ ଝୁଲନ୍ତା ମୃତଦେହ ଉଦ୍ଧାର । ମୃତ ଯୁବତୀଙ୍କ ନାଁ ଗୋଲଡି ଓରଫ ମନୀଷା ବୋଲି ଜଣାପଡ଼ିଛି । ଘଟଣାସ୍ଥଳରେ ପହଞ୍ଚି କବାଟ ଭାଙ୍ଗି ପୁଲିସ ମୃତଦେହକୁ ଉଦ୍ଧାର କରିଛି । ତେବେ ମନୀଷା କ'ଣ ପାଇଁ ଏପରି ଚରମ ନିଷ୍ପତ୍ତି ନେଲେ । ତାଙ୍କ ଆତ୍ମହତ୍ୟା ପଛରେ କ'ଣ ରହସ୍ୟ ଲୁଚି ରହିଛି। ତାକୁ ନେଇ ତଦନ୍ତ ଆରମ୍ଭ କରିଛି ପୁଲିସ। ଭଡ଼ ଘରକୁ ପୁଲିସ ଓ ସାଇଣ୍ଟିଫିକ୍ ଟିମ୍ ତଦନ୍ତ ଆରମ୍ଭ କରିଛି। ମନୀଷାଙ୍କ ମୋବାଇଲ ଜବତ ହୋଇଥିବା ବେଳେ ଆଗକୁ କଲ ରେକର୍ଡ ଯାଞ୍ଚ ହେବ ବୋଲି ପୋଲିସ କହିଛି।

ଗୋଲ୍‌ଡି ଖୁବ ଉଚ୍ଚଶିକ୍ଷିତ ଥିଲେ । ବିଭିନ୍ନ ଘରୋଇ କମ୍ପାନୀରେ ମାନବ ସମ୍ବଳ ବିଭାଗରେ କାମ କରିବାର ଅଭିଜ୍ଞତା ମଧ୍ୟ ରହିଥିଲା । କିଛି ଦିନ ତଳେ ସେ  ଚାକିରି ଛାଡ଼ି ନିଜର ଏକ ନୂଆ ବିଜନେସ୍‌ ଆରମ୍ଭ କରିବାକୁ ଯୋଜନା କରୁଥିଲେ । ତେବେ ମନୀଷାଙ୍କ ମୃତ୍ୟୁ କେମିତି ହେଲା, ସେ ଆତ୍ମହତ୍ୟା କରିଛନ୍ତି ନା ଆଉ କିଛି ଘଟିଛି ତାଙ୍କ ସହ । ପୋଲିସ ତଦନ୍ତ ପରେ ପୁରା ସତ ପଦାକୁ ଆସିବ ବୋଲି ଆଶଙ୍କା କରାଯାଉଛି । 

ଭୁବନେଶ୍ୱର: ଦେଶରେ ପେଟ୍ରୋଲ ଓ ଡିଜେଲର ଅସ୍ୱାଭାବିକ ଦରବୃଦ୍ଧି ଯୋଗୁଁ ସାଧାରଣ ଜନତାଙ୍କ ଜୀବନ ଦୁର୍ବିସହ ହୋଇପଡ଼ିଥିବା ବେଳେ ଏହାକୁ ନେଇ ବିଜୁ ଜନତା ଦଳ ପକ୍ଷରୁ ସୋମବାର ତୀବ୍ର ପ୍ରତିବାଦ କରାଯାଇଛି । ବିଜୁ ଯୁବ ଜନତା ଦଳ, ବିଜୁ ଛାତ୍ର ଜନତା ଦଳ ଓ ବିଜୁ ମହିଳା ଜନତା ଦଳର ମିଳିତ ଆହ୍ୱାନରେ ଭୁବନେଶ୍ୱର ମାଷ୍ଟର କ୍ୟାଣ୍ଟିନ ଛକରେ ବିକ୍ଷୋଭ ପ୍ରଦର୍ଶନ କରାଯିବା ସହ କୁଶପୁତ୍ତଳିକା ଦାହ କରାଯାଇଥିଲା ।

ଏହି ପ୍ରତିବାଦ କାର୍ଯ୍ୟକ୍ରମରେ ଦଳର ବରିଷ୍ଠ ଉପସଭାପତି ଦେବୀ ପ୍ରସାଦ ମିଶ୍ର, ପୂର୍ବତନ ମନ୍ତ୍ରୀ ସଞ୍ଜୟ କୁମାର ଦାସବର୍ମା, ଭୁବନେଶ୍ୱର ଜିଲ୍ଲା ବିଜେଡି ସଭାପତି ଅଶୋକ ଚନ୍ଦ୍ର ପଣ୍ଡା, ବିଧାୟକ ସୁଶାନ୍ତ କୁମାର ରାଉତ, ବିଧାୟକ ଅନନ୍ତ ନାରାୟଣ ଜେନା, ବିଜୁ ଯୁବ ଜନତା ଦଳର ସଭାପତି ଚିନ୍ମୟ ସାହୁ ଓ ବିଜୁ ମହିଳା ଜନତା ଦଳର ସଭାନେତ୍ରୀ ସ୍ନେହାଙ୍ଗିନୀ ଛୁରିଆ ପ୍ରମୁଖ ଉପସ୍ଥିତ ରହି କେନ୍ଦ୍ର ସରକାରଙ୍କ ଜନବିରୋଧୀ ନୀତିର କଟୁ ସମାଲୋଚନା କରିଥିଲେ। ନେତୃବୃନ୍ଦ କହିଥିଲେ ଯେ ପେଟ୍ରୋଲ ଓ ଡିଜେଲ ଦରବୃଦ୍ଧିର ସିଧାସଳଖ ପ୍ରଭାବ ନିତ୍ୟାବଶ୍ୟକ ସାମଗ୍ରୀର ଦର ଉପରେ ପଡ଼ୁଛି। ଫଳରେ ସାଧାରଣ ଲୋକ, ମଧବିତ୍ତ ପରିବାର, ଚାଷୀ, ଶ୍ରମିକ, ଛୋଟ ବ୍ୟବସାୟୀ ଓ ପରିବହନ କ୍ଷେତ୍ର ସବୁଠାରୁ ଅଧିକ ପ୍ରଭାବିତ ହୋଇଛି । ଦରଦାମ ବୃଦ୍ଧି ରୋକିବାରେ କେନ୍ଦ୍ର ସରକାର ସମ୍ପୂର୍ଣ୍ଣ ବିଫଳ ହୋଇଥିବା ବେଳେ ଜନସାଧାରଣଙ୍କ ଦୁଃଖ କଷ୍ଟ ପ୍ରତି ସରକାରଙ୍କର କୌଣସି ସମ୍ୱେଦନଶୀଳତା ନାହିଁ ବୋଲି ନେତୃବୃନ୍ଦ କ୍ଷୋଭ ପ୍ରକାଶ କରିଥିଲେ।

ନୟାପଲ୍ଲୀ: ପୋଲିସ୍ ଙ୍କୁ ଚକମା ଦେଉଥିଲେ ଚୋର । ଲୁଟି ନେଉଥିଲେ ଖାକି ଵର୍ଦ୍ଦି ବାବୁଙ୍କ ଗାଡି । ନୟାପଲ୍ଲୀ ଥାନା ପୋଲିସ ହାତରେ ବାଇକ ଲୁଟେରା ଗ୍ୟାଙ୍ଗ। ୧୫ଟି ଗାଡି ଜବତ କରିବା ସହ ୩ ଜଣଙ୍କୁ ଗିରଫ କଲା ନୟାପଲ୍ଲୀ ଥାନା ପୋଲିସ । ଦିନରେ ରେକି କରନ୍ତି, ଆଉ ରାତିରେ ମାଷ୍ଟର କି' ସାହାଯ୍ୟରେ ଗାଡି ଲୁଟି ଛୁ' ମାରନ୍ତି। ଚୋରା ଗାଡି ବିକ୍ରି କରି ଅୟସ ଆରାମ କରୁଥିଲେ ଏହି ୩ ଚୋର। ବାହାର ରାଜ୍ୟରେ ଗାଡିକୁ ମଧ୍ୟ ବିକ୍ରି କରୁଥିବା ନେଇ ଖବର ପାଇଛି ନୟାପଲ୍ଲୀ ଥାନା ପୋଲିସ। ଅନ୍ୟପଟେ ଜନଗହଳି ପୂର୍ଣ୍ଣ ସ୍ଥାନରେ ଗାଡି ପାର୍କିଂ ବେଳେ ଡବଲ ଲକ୍ ପକାଇବାକୁ ଅପିଲ କରିଛି କମିଶନରେଟ ପୋଲିସ ।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଅପହରଣ ଉଦ୍ୟମ । ମୁଣ୍ଡ ଜାମିନ ରଖି ଟଙ୍କା ମାଗି ୫ ଅଟକ । ଥାନାରେ ଅଭିଯୋଗ ପରେ ଆକ୍ସନ ନେଲା ପୋଲିସ । ଅପହରଣ ଅଭିଯୋଗରେ ୫ରୁ ଉର୍ଦ୍ଧ ଦୁର୍ବୃତ୍ତଙ୍କୁ ଅଟକ ରଖିଲା ଭରତପୁର ଥାନା । ଭରତପୁର ଥାନା କଳିଙ୍ଗବିହାର ଅଞ୍ଚଳର ପ୍ରିନ୍ସ ନାମକ ଯୁବକକୁ ଅପହରଣ କରି ଟଙ୍କା ମାଗିବା ଘଟଣାରେ ୫ ଜଣଙ୍କୁ ଥାନାରେ ଅଟକ ରଖିଛି ପୋଲିସ । ସମ ହସ୍ପିଟାଲ ନିକଟରୁ  ଯୁବକଙ୍କୁ ଅପହରଣ କରିଥିଲେ ଦୁର୍ବୃତ୍ତ। ଅପହରଣ ପରେ ଯୁବକଙ୍କୁ ଏକ ବନ୍ଦ ଘରେ ରଖି ଟଙ୍କା ଦାବି କରିବା ସହିତ ମାଡ଼ ମାରିଥିବା ଅଭିଯୋଗ।  ବିଶେଷ ସୂତ୍ରରୁ ଖବର ପାଇ ଚଢ଼ାଉ କରି ଯୁବକଙ୍କୁ ଉଦ୍ଧାର କଲା ଭରତପୁର ଥାନା ପୋଲିସ।

ଭୁବନେଶ୍ୱର: ଲଭ, ସେକ୍ସ, ଧୋକା ଅଭିଯୋଗରେ ଓଡିଆ ସିରିଏଲ ଅଭିନେତା ରଶ୍ମୀକାନ୍ତ ଭୂୟାଁ ଗିରଫ ପରେ ମୁହଁ ଖୋଲିଲେ ପୀଡିତା । ଫିଲ୍ମ କରିବା ନାଁରେ ଯୁବତୀଙ୍କ ଠାରୁ ନେଇଥିଲେ ୨୮ ଲକ୍ଷ ଟଙ୍କା । ୨୦୨୦ ମସିହାରୁ ଦୁହେଁ ସମ୍ପର୍କରେ ଥିଲେ। ପୀଡିତାଙ୍କ ଅଭିଯୋଗ ମୁତାବକ ସିଙ୍ଗର୍ ବନାଇବାର ପ୍ରତିଶ୍ରୁତି ଦେଇ ଏକାଧିକ ଥର ଶାରୀରିକ ସମ୍ପର୍କ ରଖିଥିଲେ ଅଭିଯୁକ୍ତ ଜଣଙ୍କ । ପ୍ରତିବାଦ କରିବାରୁ ବିବାହ କରିବାର ପ୍ରତିଶ୍ରୁତି ଦେଇଥିଲେ । କିନ୍ତୁ ପରେ ବିବାହ ନକରି ଆଉ ଧରା ଛୁଆଁ ଦେଇନଥିଲେ । ବିଭିନ୍ନ ବାହାନାରେ ପୀଡିତାଙ୍କ ଠାରୁ ଲକ୍ଷାଧିକ ଟଙ୍କା ନେଇ ମଧ୍ୟ ପରେ ଫେରାଇନଥିଲେ ଅଭିଯୁକ୍ତ ଜଣଙ୍କ । ଏ ନେଇ ମହିଳା ଥାନାରେ ଅଭିଯୋଗ ପରେ BNS 69 ଓ BNS ୩୧୮ ( ୨ ) ରେ ଅଭିଯୁକ୍ତକୁ କୋର୍ଟଚାଲାଣ କରିଛି ମହିଳା ଥାନା ପୋଲିସ।

ଭୁବନେଶ୍ୱର: ଭୁବନେଶ୍ୱର ଖୋଲିବ SEBI( Securities and Exchange bourd of india )ର ନୂଆ ବ୍ରାଞ୍ଚ ଅଫିସ I ଏହା ପୂର୍ବ ଭାରତରେ ସେବିର ପ୍ରଥମ କାର୍ଯ୍ୟାଳୟ ହେବ। ଏନେଇ ଭୁବନେଶ୍ୱରରେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସେବି ଅଧ୍ୟକ୍ଷ ତୁହିନକାନ୍ତ ପାଣ୍ଡେ । ଆସୋସିଏସନ ଅଫ ମ୍ୟୁଚୁଆଲ ଫଣ୍ଡ ଅଫ ଇଣ୍ଡିଆର ଏକ କର୍ମଶାଳାରେ ଯୋଗ ଦେବା ଅବସରରେ ଏହା କହିଛନ୍ତି ସେବି ଅଧ୍ୟକ୍ଷ । 

ଓଡିଶାରେ SIP ର ଚାହିଦା ବଢ଼ିଛି I ୧୦ ବର୍ଷରେ ୧୦ ଗୁଣା ଅଧିକ SIP ଇନଭେଷ୍ଟମେଣ୍ଟ ବୃଦ୍ଧି ପାଇଛି। ହେଲେ ଇନଭେଷ୍ଟମେଣ୍ଟ କ୍ଷେତ୍ରରେ ଏବେ ବି ଓଡିଶା ପଛରେ ରହିଛି। ତେଣୁ ଏହାକୁ ବୃଦ୍ଧି କରିବା ପାଇଁ ସେବୀ ଅଣ୍ଟା ଭିଡ଼ିଛି। ଓଡିଶାରେ municipality bond କୁ ଆରମ୍ଭ କରିବା ପାଇଁ ରାଜ୍ୟ ସରକାରଙ୍କୁ ସେବୀ ପକ୍ଷରୁ ପରାମର୍ଶ ଦିଆଯାଇଛି। ଦେଶରେ ୩୪ଟି ସହରରେ ଏହି bond ଆରମ୍ଭ ହୋଇଛି ଆଗକୁ ଏହାର ଚାହିଦା ବୃଦ୍ଧିପାଇବ । ତେଣୁ ଓଡିଶା ସମିତ ବିଭିନ୍ନ ରାଜ୍ୟ ସରକାରଙ୍କୁ ଏହି bond ଆରମ୍ଭ କରିବା ପାଇଁ ସେବୀ ପକ୍ଷରୁ ପରାମର୍ଶ ଦିଆଯାଇଛି । ଓଡ଼ିଶାରେ ଲୋକଙ୍କ ଆଗ୍ରହ ସୃଷ୍ଟି ହୋଇଥିବାରୁ ନିବେଶକୁ ବୃଦ୍ଧି କରିବା ସହ ଏଥିରେ ହେଉଥିବା ଅନିୟମିତାକୁ ରୋକିବା ପାଇଁ ଖୁବଶୀଘ୍ର ଭୁବନେଶ୍ୱରରେ ସେବୀର ଏକ ବ୍ରାଞ୍ଚ କାର୍ଯ୍ୟଳୟ ଆରମ୍ଭ ହେବାକୁ ଯାଉଛି। ଆଜି ସେ ନେଇ ଏକ MOU ସ୍ବାକ୍ଷର ହେଉଥିବା ବେଳେ କିଛି ମାସ ମଧ୍ୟରେ ତାହା ଆରମ୍ଭ ହେବ ବୋଲି ସେବୀ ଅଧକ୍ଷ ସୂଚନା ଦେଇଛନ୍ତି । 

ଭୁବନେଶ୍ୱର: ପାତ୍ରପଡା ମୋ ବସ ଡିପୋ ଆଗରେ ଉତ୍ତେଜନା l ଶତାଧିକ ଆମ ବସ କର୍ମଚାରୀ ମାନେ ଆନ୍ଦୋଳନରେ ସାମିଲ। ଆନ୍ଦୋଳନ ଯୋଗୁଁ ୪୫ଟି ରୁଟରେ ସମସ୍ତ ୧୧୭ ଆମ ବସ ବନ୍ଦ। ପାତ୍ରପଡାରେ ଥିବା ଡିପୋରେ ସମସ୍ତେ ବସ ବନ୍ଦ କରି କର୍ମଚାରୀମାନେ ଆନ୍ଦୋଳନ କରୁଛନ୍ତି। ସକାଳୁ ଗୋଟେ ବି ବସ ଡିପୋରୁ ବାହାରି ନଥିବାରୁ ଏହି ରୁଟରେ ଯାତ୍ରୀ ମାନେ ନାହିଁ ନଥିବା ଅସୁବିଧା ଭୋଗିଛନ୍ତି । ତିନି ମାସ ଧରି ଦରମା ନ ପାଇବା, ସଠିକ ସମୟରେ ଦରମା ମିଳୁନି, ESI ସମସ୍ୟା, କର୍ମଚାରୀଙ୍କୁ ଏଜେନ୍ସି ବାରମ୍ବାର ଧମକ ଦେବା, ଡ୍ରେସ ନ ମିଳିବା ଆଦି ନେଇ ଆନ୍ଦୋଳନ କରୁଛନ୍ତି ଆମ ବସ କର୍ମଚାରୀ । 

ସେହିପରି FC କିମ୍ବା FNC କେସ୍‌ରେ ଯାତ୍ରୀଙ୍କ ଜରିମାନା କମ୍ ଥିଲେ ମଧ୍ୟ କର୍ମଚାରୀଙ୍କୁ ୫ ହଜାର ଟଙ୍କା ଜରିମାନା ଓ ୫ ଦିନ ଡ୍ୟୁଟି ବନ୍ଦ ଭଳି କଠୋର ପଦକ୍ଷେପ ନେଉଥିବାରୁ ଏହାର ସମାଧାନ ପାଇଁ ମଧ୍ୟ ସେମାନେ ଦାବି ଉଠାଇଛନ୍ତି । ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନ ଜାରି ରହିବ ବୋଲି କର୍ମଚାରୀମାନେ ସ୍ପଷ୍ଟ କରିଛନ୍ତି । ଆନ୍ଦୋଳନ କରୁଥିବା କର୍ମଚାରୀଙ୍କ ସହ ଏଜେନ୍ସିର ଜେନେରାଲ ମ୍ୟାନେଜର ଆସି ଆଲୋଚନା କରୁଛନ୍ତି l ସବୁ ଦାବି ପୂରଣ ହେଲେ କାର୍ଯ୍ୟରେ ଯୋଗ ଦେବେ ବୋଲି ଚେତାବନୀ ଦେଇଛନ୍ତି କର୍ମଚାରୀ ।