ଭୁବନେଶ୍ୱର: ଭୁବନେଶ୍ୱରର ଶାସ୍ତ୍ରୀ ନଗର ଛକ ନିକଟରେ ସୋମବାର ବିଳମ୍ବିତ ରାତିରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ଜଣଙ୍କର ମୃତ୍ୟୁ ଘଟିଛି । ମଦ୍ୟପାନ କରି ଏକ ଏସୟୁଭି (SUV) କାର୍ ଚଳାଉଥିବା ଜଣେ ଆଇନ ଛାତ୍ର ଏକ ମୋଟରସାଇକେଲକୁ ସାମ୍ନାରୁ ଧକ୍କା ଦେବା ଫଳରେ ଜଣେ ୩୪ ବର୍ଷୀୟ ଯୁବକଙ୍କର ପ୍ରାଣହାନି ଘଟିଛି। ଏହି ଘଟଣାରେ ପୋଲିସ ଅଭିଯୁକ୍ତକୁ ଗିରଫ କରିଛି। ରାସ୍‌ ଡ୍ରାଇଭିଂ ଓ ଡ୍ରଙ୍କନ ଡ୍ରାଇଭ୍‌ ମାମଲାରେ ଡ୍ରାଇଭରକୁ ଗିରଫ କରିଛି ପୋଲିସ । କିଲର୍ କାର୍ ଡ୍ରାଇଭର ଜଣକ ହେଲେ ସୌମ୍ୟ ରଞ୍ଜନ ରଥ । ପୋଲିସ ସୂଚନା ଅନୁଯାୟୀ, ବେପରୁଆ ତଥା ନିଶାସକ୍ତ ଅବସ୍ଥାରେ ଗାଡ଼ି ଚଳାଇବା ଅଭିଯୋଗରେ ତାଙ୍କ ବିରୋଧରେ ମାମଲା ରୁଜୁ କରାଯାଇଛି। ମୃତକଙ୍କ ନାମ ଦେବୀ ପ୍ରସାଦ ରାଉତରାୟ ବୋଲି ଜଣାପଡ଼ିଛି। 

ସୋମବାର ରାତି ପ୍ରାୟ ୧୦.୩୦ ସମୟରେ ଏହି ଦୁର୍ଘଟଣା ଘଟିଥିଲା। ଦ୍ରୁତ ଗତିରେ ଆସୁଥିବା ଏକ ଏସୟୁଭି କାର୍ ଶାସ୍ତ୍ରୀ ନଗର ଛକ ନିକଟରେ ଦେବୀ ପ୍ରସାଦଙ୍କ ମୋଟରସାଇକେଲକୁ ଧକ୍କା ଦେଇଥିଲା। ଧକ୍କା ଏତେ ଜୋରରେ ହୋଇଥିଲା ଯେ, ବାଇକ୍‌ଟି ସମ୍ପୂର୍ଣ୍ଣ ରୂପେ ଭାଙ୍ଗି ଚୁରମାର୍ ହୋଇଯାଇଥିଲା। ଏହି ଘଟଣା ସମ୍ପର୍କରେ ଜୋନ୍-୧ ଏସିପି ରମେଶ ଚନ୍ଦ୍ର ବିଶୋୟୀ କହିଛନ୍ତି ଯେ ଦୁର୍ଘଟଣା ସମୟରେ ରଥ ନିଶାସକ୍ତ ଅବସ୍ଥାରେ ଏକ ବିଳାସପୂର୍ଣ୍ଣ ଏସୟୁଭି ଚଳାଉଥିଲେ। ଶବ୍ଦ ଶୁଣି ସ୍ଥାନୀୟ ଲୋକେ ଘଟଣାସ୍ଥଳକୁ ଦୌଡ଼ି ଆସିଥିଲେ ଏବଂ ଗୁରୁତର ଆହତ ଅବସ୍ଥାରେ ଦେବୀ ପ୍ରସାଦଙ୍କୁ ତୁରନ୍ତ କ୍ୟାପିଟାଲ୍ ହସ୍ପିଟାଲ୍ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। 

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଗୋଷ୍ଠୀ ସଂଘର୍ଷ। ପଥରଗାଡ଼ିଆ ଗାଁର ଦୁଇ ସାହି ମଧ୍ୟରେ ଗୋଷ୍ଠୀ ସଂଘର୍ଷ। ପୂର୍ବ ଶତ୍ରୁତାରୁ ଜେନା ସାହି ଓ ବେହେରା ସାହି ମଧ୍ୟରେ ସଂଘର୍ଷରେ ୬ ଜଣ ଗୁରୁତର ଆହତ ହୋଇଛନ୍ତି । ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ଗାଁରେ ଉତ୍ତେଜନା ଥମି ନଥିବାରୁ ବ୍ୟାପକ ପୋଲିସ ମୁତୟନ ହୋଇଛନ୍ତି । 

ସୂଚନା ଅନୁସାରେ, ଗତବର୍ଷ ଗଣେଷ ପୂଜାରେ ବେହେରା ସାହି ଓ ଜେନା ସାହି ଭିତରେ ବିବାଦ ହୋଇଥିଲା । ସେବେଠାରୁ ୨ ସାହି ଭିତରେ ଶତ୍ରୁତା ଲାଗି ରହିଥିଲା । ସୋମବାର ଅପରାହ୍ଣରେ କ୍ରିକେଟ୍ ଖେଳ ବେଳେ କମେଣ୍ଟ ମରାକୁ କେନ୍ଦ୍ର କରି ପପୁନା ଓ ଜଗଦୀଶ ଭିତରେ ଝଗଡ଼ା ଲାଗିଥିଲା । ଦୁଇ ସାହିର ଏହି ଦୁଇଜଣଙ୍କ ଭିତରେ ଗଣ୍ଡଗୋଳ ପୂର୍ବ ଶତ୍ରୁତାକୁ ନେଇ ଭୀଷଣ ରୂପ ନେଇଥିଲା। ରାତି ୯ଟାରେ ୨ ସାହିର ଦୁହେଁ ପରସ୍ପରକୁ କଟୁରିରେ ଆକ୍ରମଣ କରିଥିଲେ । ପରେ ଦୁଇ ଗୋଷ୍ଠୀ ପରସ୍ପର ଉପରକୁ ଟେକା ପଥର ଫିଙ୍ଗିଥିଲେ । ଉଭୟ ଗୋଷ୍ଠୀ ମଧ୍ୟରେ ମାରପିଟ୍‌ ଚାଲିଲା । ସ୍ଥିତି ଅଣାୟତ ହେବାରୁ ପୋଲିସକୁ ଖବର ଦିଆଯାଇଥିଲା । ପୋଲିସ ଟିମ୍ ପହଞ୍ଚିବା ପରେ ୨ ଗୋଷ୍ଠୀ ଛତ୍ରଭଙ୍ଗ ଦେଇଥିଲେ । ୨ ସାହିରେ ପୋଲିସ ପକ୍ଷରୁ ୪ ପ୍ଲାଟୁନ୍ ଫୋର୍ସ ମୁତୟନ କରାଯାଇଛି । 

ଭୁବନେଶ୍ୱର: ପୁଣି ଅଶାନ୍ତ ହେଲା ଭୁବନେଶ୍ୱରର ରାଜଧାନୀ କଲେଜ୍ । ଦୁଇ ଛାତ୍ର ଗୋଷ୍ଠୀଙ୍କ ମଧ୍ୟରେ ଉତ୍ତେଜନା ଓ ମାରପିଟ । ମାରପିଟ ଯୋଗୁଁ ଉଭୟ ଗୋଷ୍ଠୀର ଏକାଧିକ ଛାତ୍ର ଆହତ ହୋଇଥିବା ସୂଚନା । ଆହତମାନଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ହେଲ୍ପଡେସ୍କ କ୍ୟାମ୍ପରେ ନିଆଁ ଲଗାଇବାକୁ ନେଇ ହୋଇଥିଲା ଉତ୍ତେଜନା । ଗଣ୍ଡଗୋଳରେ ସଂପୃକ୍ତ ଜଣେ ଛାତ୍ରଙ୍କୁ ପୁଲିସ କଲେଜ କ୍ୟାମ୍ପସରୁ ଉଠାଇ ନେଇଛି । ଗଣ୍ଡଗୋଳ ପରେ କଲେଜ କ୍ୟାମ୍ପସରେ ପୁଲିସ ମୁତୟନ କରାଯାଇଛି ।

ଭୁବନେଶ୍ୱର: ଆମରଣ ଅନଶନରେ ବସିଲେ ତିଖିରୀ ସରପଞ୍ଚ ଚାମେଲୀ ଓଝା । ମହାକାଳପଡ଼ା BDO ଓ IICଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଦାବିରେ ଭୁବନେଶ୍ୱର ଲୋୟର ପିଏମଜିରେ ଆମରଣ ଅନଶନରେ ବସିଛନ୍ତି ଚାମେଲୀ ଓଝା । ତାଙ୍କ ପ୍ରତି ହୋଇଥିବା ଅନ୍ୟାୟ ଓ ଅତ୍ୟାଚାରର ବିଚାର ଦାବି କରି ଅନଶନ ଆରମ୍ଭ କରିଛନ୍ତି ଚାମେଲୀ । ମହାକାଳପଡ଼ା ବିଡିଓ ରବି ନାରାୟଣ ଆଚାର୍ଯ୍ୟଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଏବଂ ମହାକାଳପଡ଼ା ଆଇଆଇସି ମାନସ ମଲ୍ଲିକଙ୍କ ବିରୋଧରେ ତୁରନ୍ତ ଆଇନଗତ କାର୍ଯ୍ୟାନୁଷ୍ଠାନ ସହ ନ୍ୟାୟ ପ୍ରଦାନ କରିବାକୁ ଦାବି କରିଛନ୍ତି । ଦାବି ପୂରଣ ନହେବା ପର୍ଯ୍ୟନ୍ତ ଆମରଣ ଅନଶନ ଜାରି ରହିବ ବୋଲି କହିଛନ୍ତି ଚାମେଲି ।

ସୂଚନାଯୋଗ୍ୟ, ଚାମେଲି ଓଝା ସରପଞ୍ଚ ଉନ୍ନୟନ କାର୍ଯ୍ୟ ବିଷୟରେ ବିଡିଓଙ୍କ ସହିତ ଆଲୋଚନା କରିବାକୁ ଆସିଥିବାବେଳେ ମହାକାଳପଡ଼ା ବ୍ଲକ କାର୍ଯ୍ୟାଳୟରେ କିଛି ଲୋକ ଚାମେଲିଙ୍କ ମୋବାଇଲ ଛଡ଼ାଇବା ସହିତ ଗାଳିଗୁଲଜ କରିଥିଲେ  । ବିଡିଓ ଅଫିସ୍‌ରେ ତାଙ୍କ ଉପରେ  ଆକ୍ରମଣ ହୋଇଥିବା ମଧ୍ୟ ସେ ଅଭିଯୋଗ କରିଥିଲେ । 

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ବଡ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ଭୁଶୁଡ଼ି ୨ ଶ୍ରମିକ ମୃତ । ବିଜେବି ନଗର ଅଞ୍ଚଳରେ ଘଟିଛି ଏହି ହୃଦୟବିଦାରକ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ହଠାତ୍ ଭୁଶୁଡ଼ି ପଡ଼ିବାରୁ କାମ କରୁଥିବା ଦୁଇ ଜଣ ଶ୍ରମିକ ଭିତରେ ଚାପି ହୋଇଯାଇଥିଲେ। ଗୁରୁତର ଅବସ୍ଥାରେ ଉଭୟଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା । ମାତ୍ର ଡାକ୍ତର ସେଠାରେ ଉଭୟଙ୍କୁ ମୃତ ଘୋଷଣା କରିଛନ୍ତି। ମୃତ ଶ୍ରମିକମାନଙ୍କର ପରିଚୟ ମିଳି ନ ଥିବା ବେଳେ ପୋଲିସ ଘଟଣାର ତଦନ୍ତ କରୁଛି।

ସୂଚନା ଅନୁସାରେ, ବିଜେବି ନଗର ଅଞ୍ଚଳରେ ଶିଶୁ ମନ୍ଦିର ପଛରେ ଥିବା ଜଣେ ବ୍ୟକ୍ତିଙ୍କ ଘରର ପାଇଖାନା ଟାଙ୍କି ନିର୍ମାଣ କାମ ଚାଲିଥିଲା। ଦୁଇ ଜଣ ଶ୍ରମିକ ଟାଙ୍କି ଭିତରେ କାମ କରୁଥିବା ବେଳେ ହଠାତ୍ ଟାଙ୍କିର କାନ୍ଥ ଓ ଉପର ଅଂଶ ଭୁଶୁଡ଼ି ପଡ଼ିଥିଲା। ଫଳରେ ଉଭୟ ଶ୍ରମିକ ମାଟି ଓ କଂକ୍ରିଟ୍ ତଳେ ଚାପି ହୋଇଯାଇଥିଲେ। ଖବର ପାଇ ଅଗ୍ନିଶମ ବିଭାଗ, ପୁଲିସ ଓ ସ୍ଥାନୀୟ ଲୋକେ ମିଶି ଉଦ୍ଧାର କାର୍ଯ୍ୟ ଚଳାଇଥିଲେ। ପରେ ଦୁଇ ଜଣଙ୍କୁ ଟାଙ୍କି ଭିତରୁ ବାହାର କରାଯାଇ ତୁରନ୍ତ କ୍ୟାପିଟାଲ ହସ୍ପିଟାଲକୁ ପଠାଯାଇଥିଲା। ତେବେ ହସ୍ପିଟାଲରେ ପହଞ୍ଚିବା ପରେ ଡାକ୍ତର ଉଭୟ ଶ୍ରମିକଙ୍କୁ ମୃତ ଘୋଷଣା କରିଥିଲେ। 

ଭୁବନେଶ୍ୱର: ଓଡ଼ିଶା ସରକାରଙ୍କ ପକ୍ଷରୁ ଆସନ୍ତା ଜୁଲାଇ ୧୩ ତାରିଖ (ସୋମବାର) ଦିନ ହେବାକୁ ଥିବା ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମକୁ ବନ୍ଦ ରଖାଯାଇଛି। ମୁଖ୍ୟମନ୍ତ୍ରୀଙ୍କ ଅନ୍ୟ ଜରୁରୀ ସରକାରୀ ବ୍ୟସ୍ତତା କାରଣରୁ ଏହି ନିଷ୍ପତ୍ତି ନିଆଯାଇଥିବା ସୂଚନା ମିଳିଛି। ଏ ନେଇ ରାଜ୍ୟ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ଶୁକ୍ରବାର ଦିନ ଏକ ସରକାରୀ ପ୍ରେସ୍ ବିଜ୍ଞପ୍ତି ଜାରି କରାଯାଇଛି। 

ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଜୁଲାଇ ୧୩ରେ ଶୁଣାଣି ହେବ ନାହିଁ ବୋଲି ସ୍ପଷ୍ଟ କରାଯାଇଛି। ବିଭାଗ ପକ୍ଷରୁ କୁହାଯାଇଛି ଯେ, ପରବର୍ତ୍ତୀ ଜନଶୁଣାଣି କାର୍ଯ୍ୟକ୍ରମର ନୂତନ ତାରିଖ ସମ୍ପର୍କରେ ଖବରକାଗଜ ଏବଂ ଅନ୍ୟାନ୍ୟ ଗଣମାଧ୍ୟମ ଜରିଆରେ ପୃଥକ ଭାବେ ଘୋଷଣା କରାଯିବ।

ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମ ସାଧାରଣ ଜନତାଙ୍କ ପାଇଁ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମଞ୍ଚ ଅଟେ। ଏହି କାର୍ଯ୍ୟକ୍ରମ ମାଧ୍ୟମରେ ଲୋକମାନେ ସିଧାସଳଖ ନିଜର ଅଭିଯୋଗ ଜଣାଇବା ସହ ରାଜ୍ୟ ସରକାରଙ୍କଠାରୁ ଏହାର ତ୍ୱରିତ ସମାଧାନ ଆଶା କରିଥାନ୍ତି। ତେଣୁ, ପରବର୍ତ୍ତୀ ଶୁଣାଣି ତାରିଖ ଘୋଷଣା ନହେବା ପର୍ଯ୍ୟନ୍ତ ଅପେକ୍ଷା କରିବାକୁ ପ୍ରଶାସନ ପକ୍ଷରୁ ରାଜ୍ୟବାସୀଙ୍କୁ ପରାମର୍ଶ ଦିଆଯାଇଛି।

ଭାରତର ଉପରାଷ୍ଟ୍ରପତି ସି. ପି. ରାଧାକୃଷ୍ଣନ ଆସନ୍ତାକାଲି ଅର୍ଥାତ ଜୁଲାଇ ୯ ତାରିଖରେ ଓଡ଼ିଶା ଗସ୍ତରେ ଆସୁଛନ୍ତି। ଉପରାଷ୍ଟ୍ରପତିଙ୍କ ଏହି ଗସ୍ତକୁ ଦୃଷ୍ଟିରେ ରଖି ରାଜଧାନୀ ଭୁବନେଶ୍ୱରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ଭିଆଇପି କନଭୟର ସୁଗମ ଯାତାୟାତ ପାଇଁ କମିଶନରେଟ୍ ପୋଲିସ ପକ୍ଷରୁ ସହରର ବିଭିନ୍ନ ପ୍ରମୁଖ ରାସ୍ତାରେ ଟ୍ରାଫିକ୍ କଟକଣା ଜାରି କରାଯାଇଛି। ଏହି କଟକଣା ମୁଖ୍ୟତଃ ଏୟାରପୋର୍ଟ ଛକ ଠାରୁ ଆରମ୍ଭ କରି ଓୟୁଏଟି (OUAT) ଛକ ଏବଂ ଖୋର୍ଦ୍ଧା ସ୍ଥିତ ନାଇଜର (NISER) ପର୍ଯ୍ୟନ୍ତ ଲାଗୁ ହେବ।

କେଉଁ ସମୟରେ କେଉଁ ରାସ୍ତା ରହିବ ବନ୍ଦ?

କମିଶନରେଟ୍ ପୋଲିସ ପକ୍ଷରୁ ଜାରି କରାଯାଇଥିବା ଆଡଭାଇଜରି ଅନୁଯାୟୀ, ଗୁରୁବାର ଦିନ ଭିନ୍ନ ଭିନ୍ନ ପର୍ଯ୍ୟାୟରେ ଟ୍ରାଫିକ୍ ନିୟନ୍ତ୍ରଣ କରାଯିବ:

* ସକାଳ ୧୦:୨୫ ରୁ ୧୦:୪୫ ମିନିଟ୍: ଏହି ସମୟ ମଧ୍ୟରେ ଏୟାରପୋର୍ଟ ଛକ, ହସ୍ପିଟାଲ ଛକ, ଏଜି ଛକ, ଲୋକଭବନ ଛକ, ଗୋପବନ୍ଧୁ ଛକ ଏବଂ ଓୟୁଏଟି ଛକ ରାସ୍ତାରେ ସାଧାରଣ ଯାନବାହନ ଚଳାଚଳ ବନ୍ଦ ରହିବ।

* ଦିନ ୧୨:୨୫ ରୁ ୧୨:୪୦ ମିନିଟ୍: ଏହି ସମୟରେ ଓୟୁଏଟି ଛକରୁ ଲୋକଭବନ ଛକ ଏବଂ ଗୋପବନ୍ଧୁ ଛକ ଦେଇ ଯାଉଥିବା ରାସ୍ତାରେ କଟକଣା ଲାଗୁ ହେବ।

* ଅପରାହ୍ଣ ୧:୪୦ ରୁ ୨:୩୦ ମିନିଟ୍: ଏହି ଅବଧିରେ ଲୋକଭବନ ଛକ, ପାୱାର ହାଉସ୍ ଛକ, ୧୨୦ ବାଟାଲିୟନ ଛକ, ଶାସ୍ତ୍ରୀ ନଗର ଛକ, ବେହେରା ସାହି ଛକ, ଜୟଦେବ ବିହାର, ଏନଏଚ୍-୧୬ ଖୋର୍ଦ୍ଧା ବାଇପାସ୍ ରାସ୍ତା, କାର୍ମେଲ ସ୍କୁଲ ଛକ, ଖୋଳଦ୍ୱାର ଛକ, ପଦନପୁର ଛକ ଏବଂ ନାଇଜର (NISER) ରାସ୍ତାରେ ଟ୍ରାଫିକ ବନ୍ଦ ରହିବ।

* ଅପରାହ୍ଣ ୩:୫୫ ରୁ ୫:୨୫ ମିନିଟ୍: ଉପରାଷ୍ଟ୍ରପତିଙ୍କ ପ୍ରତ୍ୟାବର୍ତ୍ତନ ସମୟରେ ନାଇଜରରୁ ଏୟାରପୋର୍ଟ ଛକ ପର୍ଯ୍ୟନ୍ତ ଉପରୋକ୍ତ ସମସ୍ତ ରାସ୍ତାରେ ସମାନ କଟକଣା ବଳବତ୍ତର ରହିବ।

ପୋଲିସର ନିବେଦନ ଏବଂ ଜରୁରୀକାଳୀନ ସେବା

ସହରରେ ଟ୍ରାଫିକ ସମସ୍ୟାକୁ ଏଡାଇବା ପାଇଁ ରାଜଧାନୀବାସୀ ଏହି ସମୟରେ ବୈକଳ୍ପିକ ରାସ୍ତା ବ୍ୟବହାର କରିବାକୁ କମିଶନରେଟ୍ ପୋଲିସ ପକ୍ଷରୁ ପରାମର୍ଶ ଦିଆଯାଇଛି। ଯାତ୍ରୀମାନେ ନିଜର ଯାତ୍ରା ପୂର୍ବରୁ ଯୋଜନା କରିବା ସହ ଟ୍ରାଫିକ ପୋଲିସକୁ ସହଯୋଗ କରିବାକୁ ନିବେଦନ କରାଯାଇଛି। ତେବେ ଏହି ସମୟରେ ଆମ୍ବୁଲାନ୍ସ ଏବଂ ଅଗ୍ନିଶମ ଗାଡ଼ି ଭଳି ଜରୁରୀକାଳୀନ ଯାନବାହନ ପାଇଁ କୌଣସି କଟକଣା ରହିବ ନାହିଁ ଏବଂ ସେଗୁଡ଼ିକ ଅବାଧରେ ଯାତାୟାତ କରିପାରିବେ ବୋଲି ପୋଲିସ ସ୍ପଷ୍ଟ କରିଛି।

ଉପରାଷ୍ଟ୍ରପତିଙ୍କ କାର୍ଯ୍ୟକ୍ରମ

ସୂଚନାଯୋଗ୍ୟ ଯେ, ଉପରାଷ୍ଟ୍ରପତି ତାଙ୍କର ଏହି ଗସ୍ତ କାଳରେ ଖୋର୍ଦ୍ଧା ସ୍ଥିତ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ସାଇନ୍ସ ଏଜୁକେସନ୍ ଆଣ୍ଡ ରିସର୍ଚ୍ଚ (ନାଇଜର)ର ୧୫ତମ ସମାବର୍ତ୍ତନ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେବେ। ଏହା ସହିତ ସେ ଭାରତୀୟ ପତାକାବାହୀ ଜାହାଜ ମାନଙ୍କ ପାଇଁ ହାଇ-ସି ଫିସିଂ ସମ୍ପର୍କିତ 'ଲେଟର୍ ଅଫ୍ ଅଥରାଇଜେସନ୍'ର ଜାତୀୟ ଶୁଭାରମ୍ଭ କାର୍ଯ୍ୟକ୍ରମରେ ମଧ୍ୟ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି।

ଭୁବନେଶ୍ୱର: ଆଜାଦ ନଗର ବିସ୍ଫୋରଣ ମାମଲାରେ ୟୁପିରୁ ଆଉ ଜଣେ ଅଭିଯୁକ୍ତଙ୍କୁ ଗିରଫ କଲା NIA ।  ଭୁବନେଶ୍ୱରର ସୁନ୍ଦରପଦା ଅନ୍ତର୍ଗତ ଆଜାଦ ନଗରରେ ପ୍ରାୟ ୭ ମାସ ତଳେ ଘଟିଥିବା ଭୟାବହ ବିସ୍ଫୋରଣ ମାମଲାରେ ଜାତୀୟ ତଦନ୍ତକାରୀ ସଂସ୍ଥା (ଏନଆଇଏ) ଆଉ ଜଣେ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତ ଜଣକ ହେଲେ ରୋହନ ରଞ୍ଜନ ରାଉତରାୟ ଏବଂ ତାଙ୍କୁ ଉତ୍ତରପ୍ରଦେଶରୁ ଗିରଫ କରାଯାଇଛି।

NIA ପକ୍ଷରୁ ମିଳିଥିବା ସୂଚନା ଅନୁଯାୟୀ, ଗିରଫ ରୋହନଙ୍କ ଘର ଭୁବନେଶ୍ୱରର ପଟିଆ ଅଞ୍ଚଳରେ ଏବଂ ସେ ଏହି ବିସ୍ଫୋରଣ ଘଟଣାରେ ସମ୍ପୃକ୍ତ ଥିବା ସନ୍ଦେହ କରାଯାଉଛି। ସୂଚନାଯୋଗ୍ୟ ଯେ, ଗତ ଜାନୁଆରୀ ୨୭ ତାରିଖରେ ଆଜାଦ ନଗର ସ୍ଥିତ ଏକ ଘରେ ଦେଶୀୟ ଜ୍ଞାନକୌଶଳରେ ତିଆରି ବୋମା ବା ଆଇଇଡି (IED) ପ୍ରସ୍ତୁତ କରାଯାଉଥିବା ସମୟରେ ଏହି ଭୟଙ୍କର ବିସ୍ଫୋରଣ ଘଟିଥିଲା।

ଏହି ଘଟଣାରେ ମୁଖ୍ୟ ଅଭିଯୁକ୍ତ ଶେହନବାଜ ମଲ୍ଲିକ ଉରଫ ମାଫି ଏବଂ ତାଙ୍କ ମାଆଙ୍କର ମୃତ୍ୟୁ ଘଟିଥିଲା। ବିସ୍ଫୋରଣରେ ଗୁରୁତର ହେବା ପରେ ଚିକିତ୍ସାଧୀନ ଅବସ୍ଥାରେ ତାଙ୍କ ମାଆଙ୍କର ପ୍ରାଣହାନି ଘଟିଥିଲା। ଏହି ଘଟଣାର ଗାମ୍ଭୀର୍ଯ୍ୟକୁ ଦୃଷ୍ଟିରେ ରଖି ତଦନ୍ତ ଭାର ଗ୍ରହଣ କରିବା ପରେ ଏନଆଇଏ ଘଟଣାସ୍ଥଳରେ ଟିକନିଖି ଯାଞ୍ଚ କରିଥିଲା।

ତଦନ୍ତ ବେଳେ ଏଜେନ୍ସି ବିପୁଳ ପରିମାଣର ଆରଡିଏକ୍ସ ଜବତ କରିଥିଲା। ଏତେ ପରିମାଣର ବିସ୍ଫୋରକ କାହିଁକି ଏବଂ କେଉଁ ଉଦ୍ଦେଶ୍ୟରେ ବ୍ୟବହାର ହେବାର ଥିଲା, ତାହାକୁ ନେଇ ସୁରକ୍ଷା ଏଜେନ୍ସିର ଉଦବେଗ ବଢ଼ିଥିଲା।

ବର୍ତ୍ତମାନ ତଦନ୍ତକାରୀ ଦଳ ଜବତ ହୋଇଥିବା ବିସ୍ଫୋରକ ସାମଗ୍ରୀର ଉତ୍ସ, ଏହାକୁ ଯୋଗାଇଥିବା ନେଟୱର୍କ ଏବଂ ଏହା ପଛର ପ୍ରକୃତ ଉଦ୍ଦେଶ୍ୟ ସମ୍ପର୍କରେ ଖୋଳତାଡ଼ ଜାରି ରଖିଛନ୍ତି। ଏହି ଘଟଣାର କୌଣସି ବଡ଼ ଅପରାଧିକ କିମ୍ବା ଆତଙ୍କବାଦୀ ଷଡ଼ଯନ୍ତ୍ର ସହିତ ଲିଙ୍କ ରହିଛି କି ନାହିଁ, ସେ ନେଇ ପ୍ରମାଣ ଯୋଗାଡ଼ କରିବାକୁ ଏନଆଇଏ ଏକାଧିକ ବ୍ୟକ୍ତିଙ୍କୁ ଜେରା ମଧ୍ୟ କରିଛି। ବର୍ତ୍ତମାନ ସୁନ୍ଦରପଦା ବିସ୍ଫୋରଣ ମାମଲାର ପୁଙ୍ଖାନୁପୁଙ୍ଖ ତଦନ୍ତ ଜାରି ରହିଛି ଏବଂ ତଦନ୍ତକାରୀ ସଂସ୍ଥା ଏହି ଘଟଣାର ଚେର ଖୋଜିବା ପାଇଁ ବିଭିନ୍ନ ଦିଗରେ ତନାଘନା ଚଳାଇଛି।

ଭୁବନେଶ୍ୱର: ଓଡ଼ିଶାରେ ଜମି କିଣାବିକା ପ୍ରକ୍ରିୟାକୁ ଅଧିକ ସ୍ୱଚ୍ଛ ଏବଂ ଦୁର୍ନୀତିମୁକ୍ତ କରିବା ପାଇଁ ରାଜ୍ୟ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ରାଜ୍ୟ ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ଘୋଷଣା କରିଛନ୍ତି ଯେ, ଏଣିକି ରାଜ୍ୟରେ ଜମି କାରବାର ସମ୍ପୂର୍ଣ୍ଣ ଭାବେ କ୍ୟାସଲେସ୍‌ ହେବ। 

ମନ୍ତ୍ରୀଙ୍କ ସୂଚନା ଅନୁଯାୟୀ, ଜମି କିଣାବିକା ସମୟରେ ଗୋଟିଏ ବି ଟଙ୍କା ନଗଦ ଆକାରରେ ଦେଣନେଣ ହେବ ନାହିଁ। ପୂର୍ବରୁ ୧୫,୦୦୦ ଟଙ୍କା ପର୍ଯ୍ୟନ୍ତ ନଗଦ କାରବାର ପାଇଁ ଅନୁମତି ଥିଲା। କିନ୍ତୁ ବର୍ତ୍ତମାନ ଏହି ନିୟମକୁ ବଦଳାଇ ଦିଆଯାଇଛି। ପଞ୍ଜୀକରଣ କାର୍ଯ୍ୟାଳୟରୁ ମଧ୍ୟସ୍ଥୀମାନଙ୍କୁ ହଟାଇବା ଏବଂ ପ୍ରକ୍ରିୟାକୁ ସହଜ କରିବା ଉଦ୍ଦେଶ୍ୟରେ ଏହି ନିଷ୍ପତ୍ତି ନିଆଯାଇଛି ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ଏହାଦ୍ୱାରା ନାଗରିକମାନଙ୍କୁ ବାରମ୍ବାର ପଞ୍ଜୀକରଣ କାର୍ଯ୍ୟାଳୟକୁ ଦୌଡ଼ିବାକୁ ପଡ଼ିବ ନାହିଁ। ପଞ୍ଜୀକରଣ ପରେ ସମସ୍ତ ଦସ୍ତାବିଜ୍ ଅନ୍‌ଲାଇନ୍‌ରେ ଉପଲବ୍ଧ ହେବ। ଏହି ନୂତନ ବ୍ୟବସ୍ଥାକୁ ଲାଗୁ କରିବା ପାଇଁ ଖୁବଶୀଘ୍ର ରାଜସ୍ୱ ବିଭାଗ ପକ୍ଷରୁ ଏକ ମାର୍ଗଦର୍ଶିକା (SOP) ଜାରି କରାଯିବ।

ଏହି ଅବସରରେ ଶ୍ରୀ ପୂଜାରୀ ଭୁବନେଶ୍ୱରରେ ଏକ ନୂତନ ରାଜସ୍ୱ ଭବନ ନିର୍ମାଣ ଯୋଜନା ସମ୍ପର୍କରେ ମଧ୍ୟ ସୂଚନା ଦେଇଛନ୍ତି। ୬୦୦ କୋଟି ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ଏହି ୧୦ ମହଲା କୋଠାରେ ଅନେକ ଗୁରୁତ୍ୱପୂର୍ଣ୍ଣ ବିଭାଗର କାର୍ଯ୍ୟାଳୟ ରହିବ। ବିଶେଷକରି ସ୍ୱତନ୍ତ୍ର ରିଲିଫ୍ କମିଶନର (SRC), ଜାତୀୟ ବିପର୍ଯ୍ୟୟ ମୁକାବିଲା ବାହିନୀ (NDRF), ଅଗ୍ନିଶମ ସେବା, ଏବଂ ଓଡ଼ିଶା ବିପର୍ଯ୍ୟୟ ତ୍ୱରିତ କାର୍ଯ୍ୟାନୁଷ୍ଠାନ ବାହିନୀ (ODRAF) ସମେତ ଅନ୍ୟାନ୍ୟ ପ୍ରମୁଖ ବିଭାଗ ଏହି ଗୋଟିଏ କୋଠାରୁ ପରିଚାଳିତ ହେବ।

ଭୁବନେଶ୍ୱର: ପୁଣି ଅଶାନ୍ତ ରାଜଧାନୀ ଭୁବନେଶ୍ୱର । ରାତି ଅଧରେ ଲକ୍ଷ୍ମୀସାଗର ଅଞ୍ଚଳରେ ବୁଲିଲା ଖଣ୍ଡା । ଦୁର୍ବୃତ୍ତଙ୍କ ଖଣ୍ଡା ଆକ୍ରମଣରେ ଲହୁଲୁହାଣ ହେଲେ ଦୋକାନୀ ଓ ମହିଳା । ବିଳମ୍ବିତ ରାତିରେ ଲକ୍ଷ୍ମୀସାଗର ରାସ୍ତାରେ ଖଣ୍ଡା ଓ ତେଲେଙ୍ଗା କଟୁରୀ ଧରି ଆତଙ୍କ ସୃଷ୍ଟି କରିଛନ୍ତି ଦୁର୍ବୃତ୍ତ । ଦୋକାନ ବନ୍ଦ କରି ଘରକୁ ଫେରୁଥିବା ଜଣେ ଦୋକାନୀଙ୍କୁ ମାରଣାନ୍ତକ ଆକ୍ରମଣ କରାଯାଇଛି । ଏହି ଘଟଣାରେ ଜଣେ ମହିଳା ମଧ୍ୟ ଖଣ୍ଡା ଆକ୍ରମଣରେ ଆହତ ହୋଇଛନ୍ତି । 

ଆକ୍ରମଣ ସମୟରେ ଜଣେ ମହିଳା ମଧ୍ୟ ଖଣ୍ଡା ଚୋଟରେ ଆହତ ହୋଇଥିବା ଜଣାପଡ଼ିଛି । ଉଭୟ ଆହତଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରାଯାଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଲକ୍ଷ୍ମୀସାଗର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ତେବେ ଏହି ଆକ୍ରମଣ କରିବାର କାରଣ କ'ଣ, ତାହା ଏପର୍ଯ୍ୟନ୍ତ ଜଣା ପଡ଼ିନାହିଁ ।

ଭୁବନେଶ୍ୱର: ଭୁବନେଶ୍ବର ଡିସିପି ଜଗମୋହନ ମୀନାଙ୍କ ଇସ୍ତଫା । ବ୍ୟକ୍ତିଗତ କାରଣରୁ ଇସ୍ତଫା ଦେଇଥିବା ସୂଚନା । ଭୁବନେଶ୍ୱର ଡେପୁଟି କମିଶନର ଅଫ୍ ପୋଲିସ (ଡିସିପି) ଜଗମୋହନ ମୀନା ରାଜ୍ୟ ସରକାରଙ୍କୁ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି। ସେ ନିଜ ଇସ୍ତଫା ପଛରେ ବ୍ୟକ୍ତିଗତ କାରଣ ଥିବା ଦର୍ଶାଇଛନ୍ତି। ଓଡ଼ିଶା କ୍ୟାଡରର ୨୦୧୩ ବ୍ୟାଚ୍ ଆଇପିଏସ୍ ଅଧିକାରୀ ହେଉଛନ୍ତି ଜଗମୋହନ ମୀନା। 

ଜଗମୋହନ ମୀନା ରାଜ୍ୟ ପୋଲିସ ବିଭାଗରେ ଅନେକ ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ପୂର୍ବରୁ ସେ ଅନୁଗୋଳ ଏବଂ ଗଞ୍ଜାମ ଜିଲ୍ଲାରେ ଆରକ୍ଷୀ ଅଧୀକ୍ଷକ (ଏସପି) ଭାବେ ଦାୟିତ୍ୱ ତୁଲାଇଛନ୍ତି। ଏହା ସହିତ ସେ କଟକ ସହରାଞ୍ଚଳ ପୋଲିସ ଜିଲ୍ଲାରେ ମଧ୍ୟ ଡିସିପି ଭାବେ କାର୍ଯ୍ୟ କରିଥିଲେ। ଗତ ଫେବୃଆରୀ ୨୮, ୨୦୨୫ ତାରିଖରେ ତାଙ୍କୁ ଭୁବନେଶ୍ୱର ଡିସିପି ଭାବେ ଅବସ୍ଥାପିତ କରାଯାଇଥିଲା।

ରାଜ୍ୟ ସରକାର ଏପର୍ଯ୍ୟନ୍ତ ତାଙ୍କ ଇସ୍ତଫା ଆନୁଷ୍ଠାନିକ ଭାବେ ଗ୍ରହଣ କରିନାହାଁନ୍ତି। କିନ୍ତୁ ତାଙ୍କର ଏହି ହଠାତ୍ ନିଷ୍ପତ୍ତି ପୋଲିସ ମହଲରେ ଆଶ୍ଚର୍ଯ୍ୟ ସୃଷ୍ଟି କରିଛି। ନିକଟରେ ବାଲିଅନ୍ତା ଠାରେ ରେଳ କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁଙ୍କୁ ଦିନଦ୍ୱିପହରରେ ହତ୍ୟା କରାଯିବା ଘଟଣାକୁ ନେଇ ଭୁବନେଶ୍ୱର-କଟକ କମିଶନରେଟ୍ ପୋଲିସ ଉପରେ ବ୍ୟାପକ ସମାଲୋଚନା ହେଉଛି। ଏହିଭଳି ଏକ ସମ୍ବେଦନଶୀଳ ସ୍ଥିତି ମଧ୍ୟରେ ତାଙ୍କ ଇସ୍ତଫା ପ୍ରଦାନ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି। ତେବେ ତାଙ୍କ ନିଷ୍ପତ୍ତିର ପ୍ରକୃତ କାରଣ ଏପର୍ଯ୍ୟନ୍ତ ସରକାରୀ ଭାବେ ଜଣାପଡିନାହିଁ। ତେବେ ତାଙ୍କ ନିଷ୍ପତ୍ତିର ପ୍ରକୃତ କାରଣ ଏପର୍ଯ୍ୟନ୍ତ ସରକାରୀ ଭାବେ ଜଣାପଡିନାହିଁ। ରାଜସ୍ଥାନରେ ଥିବା ଜଣେ ଘନିଷ୍ଠ ସମ୍ପର୍କୀୟଙ୍କର ଏକ ଘରୋଇ କମ୍ପାନୀରେ ସେ ଯୋଗଦେବାର ଯୋଜନା କରୁଥିବା ନେଇ ଚର୍ଚ୍ଚା ହେଉଛି।

ଭୁବନେଶ୍ୱର: ବର୍ଷା ଆସୁ ଆସୁ ରାଜଧାନୀ ଭୁବନେଶ୍ୱରରେ ବଡ ଅଘଟଣ । ବାଣୀବିହାର ଡ୍ରେନ୍‌ରେ ଭାସି ଯୁବକ ନିଖୋଜ । ପ୍ରବଳ ବର୍ଷା ଯୋଗୁଁ ଜଣେ ସ୍ଥାନୀୟ ଯୁବକ ନାଳରେ ଭାସି ଯାଇ ନିଖୋଜ ହୋଇଯାଇଥିବା ସୂଚନା ମିଳିଛି । ଘଟଣା ସମ୍ପର୍କରେ ସୂଚନା ପାଇ ସ୍ଥାନୀୟ ଅଗ୍ନିଶମ ବାହିନୀ ଓ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି । ଡ୍ରେନରେ ପାଣିର ସ୍ରୋତ ଅଧିକ ଥିବାରୁ ଉଦ୍ଧାର କାର୍ଯ୍ୟରେ ଅସୁବିଧା ହେଉଥିଲେ ମଧ୍ୟ ନିଖୋଜ ଯୁବକଙ୍କ ସନ୍ଧାନ ପାଇଁ ଅଭିଯାନ ଜୋରଦାର ଭାବେ ଚାଲିଛି। ଦୀର୍ଘ ୨ ଘଣ୍ଟାରୁ ଅଧିକ ସମୟ ଧରି ଖୋଜାଖୋଜି ପରେ ବି ନିଖୋଜ ଯୁବକଙ୍କ ପତ୍ତା ମିଳିନାହିଁ । ଏବେ ବି ଉଦ୍ଧାର କାରୀ ଦଳମାନେ ସର୍ଚ୍ଚ ଅପରେସନ କରୁଛନ୍ତି ।