ଭୁବନେଶ୍ୱର : ରାଜ୍ୟରେ ଆଇନଶୃଙ୍ଖଳା ପରିସ୍ଥିତିକୁ ରାଜ୍ୟ ସରକାର ସର୍ବାଧିକ ଗୁରୁତ୍ୱ ଦେଉଥିବା ବେଳେ ଏହାର ସୁଫଳ ତୃଣମୂଳସ୍ତରରେ ଏ ଅନୁଭୂତ ହେଉଛି। ବିଶେଷକରି ରାଜ୍ୟଗୁଡ଼ିକରେ ଅଧିକରୁ ଅଧିକ ଥାନା ପ୍ରତିଷ୍ଠା ସହ ସେଠାରେ ପର୍ଯ୍ୟାପ୍ତ ପୁଲିସ ଅଧିକାରୀ, କର୍ମଚାରୀ ନିୟୋଜନ ତଥା ଭିତ୍ତିଭୂମି ସୁଦୃଢ଼ିକରଣକୁ ପ୍ରାଥମିକତା ପ୍ରଦାନ କରାଯାଉଛି। ଏହିକ୍ରମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡ଼ିଓ କନ୍‌‌ଫରେନ୍‌‌ସିଂ ଜରିଆରେ ଆଜି ରାଜ୍ୟରେ ଆଉ ୨୯ ଥାନା ଉଦଘାଟନ କରିବେ ବୋଲି ସୂଚନା ମିଳିଛି।

୨୯ ଥାନା ମଧ୍ୟରେ ୨୫ଟି (ଆଉଟ ପୋଷ୍ଟ)ଫାଣ୍ଡିରୁ ଥାନାକୁ ରୂପାନ୍ତରିତ ହୋଇଥିବା ବେଳେ ୩ଟି ବିଟ୍‌‌ ହାଉସରୁ ଥାନାକୁ ରୂପାନ୍ତରିତ ହୋଇଛି। ମୟୂରଭଞ୍ଜର ଭଞ୍ଜପୁରଠାରେ ଆଉ ଗୋଟିଏ ନୂଆ ଥାନା ପ୍ରତିଷ୍ଠା କରାଯାଇଛି। ତାଲିକାରେ ଜଗତସିଂହପୁରର କୃଷ୍ଣପ୍ରସାଦ ଥାନା, ରାୟଗଡ଼ାର ରମଣଗୁଡ଼ା ଥାନା, ଯାଜପୁରର ଅଳକୁଣ୍ଡ ଥାନା ଓ ବ୍ରହ୍ମବରଦା ଥାନା, ଖୋର୍ଦ୍ଧାର ନାଚୁଣୀ ଥାନା, ସୁବର୍ଣ୍ଣପୁରର ଲଚ୍ଛିପୁର ଥାନା, ପୁରୀର ଚାରିଛକ ଥାନା, ଅନୁଗୁଳର ଗୋପାଳପ୍ରସାଦ ଥାନା, ଢେଙ୍କାନାଳର ମହାବୀର ରୋଡ ଥାନା, ଝାରସୁଗୁଡ଼ାର ତାଳପଟିଆ ଫାଣ୍ଡିରୁ ଏୟାରପୋର୍ଟ ଥାନା ରହିଛି।

ସେହିପରି କେନ୍ଦ୍ରାପଡ଼ାର ଚଉଦକୁଲାଟ ଓ କୁଦନାଗିରି ଥାନା, ଦେବଗଡ଼ର ଲାଇମୁରା ଥାନା, ନବରଙ୍ଗପୁରର ମଇଦାଲପୁର ଥାନା, କଟକର ମାଣିଆବନ୍ଧ ଥାନା, ଜୁଡୁମ ଥାନା ଓ ଭଦ୍ରେଶ୍ୱର ଥାନା, ବଲାଙ୍ଗୀରର ଅଗଲପୁର ଥାନା, ବାଲେଶ୍ୱରର ଗୋପାଳପୁର ଥାନା, କଳାହାଣ୍ଡିର କଲମପୁର ଥାନା, ଗଞ୍ଜାମର ବେଗୁନିଆପଡ଼ା ଥାନା ଓ କୋଟିନଡ଼ା ଥାନା, ବ୍ରହ୍ମପୁରର ନିମଖଣ୍ଡି ଥାନା. ଭୁବନେଶ୍ୱର ୟୁପିଡିର ସାଲିଆସାହି ଫାଣ୍ଡିରୁ ମୈତ୍ରୀବିହାର ଥାନା ଏବଂ ବୌଦ୍ଧର ଘଣ୍ଟପଡ଼ା ଥାନା ରହିଛି। ଉପରୋକ୍ତ ସମସ୍ତ ଥାନା ଫାଣ୍ଡି(ଆଉଟ ପୋଷ୍ଟ)ରୁ ଥାନାକୁ ପରିବର୍ତ୍ତିତ ହୋଇଛି। ଏହାସହ ଅନୁଗୋଳର ବଗେଡ଼ିଆ ବିଟ ହାଉସ(ବିଏଚ୍‌‌) ଥାନାକୁ ରୂପାନ୍ତରିତ ହୋଇଥିବା ବେଳେ କୋରାପୁଟର ସୁଙ୍କି ବିଟ୍‌‌ ହାଉସ ଏବଂ ସମ୍ବଲପୁରର ବରେଇପାଲି ବିଟ୍‌‌ ହାଉସ ଥାନାକୁ ରୂପାନ୍ତରିତ ହୋଇଛି।

ଏଠାରେ ଉଲ୍ଲେଖଯୋଗ୍ୟ ଯେ ରାଜ୍ୟର ସୁଦୃଢ଼ ଆଇନ ଶୃଙ୍ଖଳା ପରିସ୍ଥିତି ପାଇଁ ଲଗାତାର ଭାବେ ପୁଞ୍ଜିପତି ଓଡ଼ିଶା ପ୍ରତି ଆକର୍ଷିତ ହେଉଥିବା ବେଳେ ଉଭୟ ଦେଶୀ ଏବଂ ବିଦେଶୀ ପର୍ଯ୍ୟଟକଙ୍କ ଓଡ଼ିଶା ଆଗମନ ମଧ୍ୟ ବିଗତ ବର୍ଷ ତୁଳନାରେ ଢେର ଅଧିକ ବୃଦ୍ଧି ପାଇଛି। ସେହିପରି ମାଓ କାର୍ଯ୍ୟକଳାପ ଏବଂ ଗତିବିଧି ପ୍ରାୟତଃ ନିୟନ୍ତ୍ରଣକୁ ଆସିଥିବା ବେଳେ ଉପାନ୍ତ ଅଞ୍ଚଳରେ ଏବେ ବିକାଶମୂଳକ କାର୍ଯ୍ୟକ୍ରମ ଆହୁରି ସହଜ ହୋଇପାରିଛି। ଯାହାଫଳରେ ଓଡ଼ିଶାର ସମୃଦ୍ଧିର ଧାରା ପୂର୍ବାପେକ୍ଷା ଅଧିକ ଗତିଶୀଳ ହୋଇଥିବା ନେଇ ବିଶେଷଜ୍ଞ ମହଲରେ ମତପ୍ରକାଶ ପାଇଆସିଛି।

ଭୁବନେଶ୍ବର : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ ଏସ୍‌ ଜଗନମୋହନ ରେଡ୍ଡିଙ୍କ ମଧ୍ୟରେ ଆଜି ସନ୍ଧ୍ୟାରେ ଲୋକସେବା ଭବନରେ ବୈଠକ ହୋଇଛି। ଏହି ବୈଠକରେ ଓଡ଼ିଶା ଓ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଦୁଇ ରାଜ୍ୟ ମଧ୍ୟରେ ଲାଗିରହିଥିବା ବିବାଦକୁ ନେଇ ଆଲୋଚନା ହୋଇଥିବା ଜଣାପଡିଛି। ମୁଖ୍ୟତଃ ବୈଠକରେ  ୬ଟି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିଛନ୍ତି ଦୁଇ ମୁଖ୍ୟମନ୍ତ୍ରୀ । ଲୋକସେବା ଭବନରେ ଆଲୋଚନା ପରେ ମିଳିତ ପ୍ରେସ୍ ବିବୃତ୍ତି ଜାରି କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ୱାଇ.ଏସ୍ ଜଗନମୋହନ ରେଡ୍ଡୀ ।

Pleasure meeting with Andhra Pradesh Chief Minister Shri @ysjagan ji. Had a very cordial and fruitful discussion on number of issues of mutual interest, particularly on water resources, common boundary, energy and left-wing extremism. pic.twitter.com/8ipM4BY0s4

— Naveen Patnaik (@Naveen_Odisha) November 9, 2021

ନବୀନ ଓ ଜଗନଙ୍କ ବୈଠକରେ ଦୁଇ ରାଜ୍ୟ ମଧ୍ୟରେ ଥିବା ସୀମା ବିବାଦ, ଜଳ ସମ୍ପଦ ବିବାଦ, ଶକ୍ତି ଓ ନକ୍ସଲ ପ୍ରସଙ୍ଗରେ ଆଲୋଚନା ହୋଇଛି । କିଭଳି ଦୁଇ ରାଜ୍ୟ ମଧ୍ୟରେ ଥିବା ବିବାଦର ସମାଧାନ କରାଯିବ ସେନେଇ ଆଲୋଚନା କରିଛନ୍ତି ଦୁଇ ରାଜ୍ୟର ମୁଖ୍ୟମନ୍ତ୍ରୀ। ଏହି ବୈଠକରେ ଯେଉଁ ୬ ଟି ଗୁରୁତ୍ବପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହୋଇଛି ସେଗୁଡିକ ହେଉଛି…..

1. କୋଟିଆ ସୀମା ବିବାଦ
2. ନେରାଡ଼ି ବ୍ୟାରେଜ୍
3. ଝଞ୍ଜାବତୀ ଡ୍ୟାମ୍
4. ପୋଲାଭରମ
5. ବାହୁଡ଼ା ନଦୀରୁ ଜଳ ଛାଡ଼ିବା
6. ବାଲିମେଳା ଓ ଅପର ସିଲେରୁରେ ବିଦ୍ୟୁତ୍ ପ୍ରକଳ୍ପ

ବୈଠକରେ କୋଟିଆ ବିବାଦର ସମାଧାନ ପାଇଁ ୨ ରାଜ୍ୟ କାମ କରିବାକୁ ସହମତି ଦେଇଥିଲେ। ମିଳିତ ଭାବେ ସମସ୍ୟାର ସମାଧାନ କରିବେ ବୋଲି ରାଜି ହୋଇଥିଲେ। ସେହିପରି ପୋଲାଭରମ୍‌ ବିବାଦର ସମାଧାନ ନେଇ ଆଲୋଚନା ହୋଇଛି। ଜଳ ବିବାଦ, ଶକ୍ତି ଓ ନକ୍ସଲ ସମସ୍ୟା ନେଇ ମଧ୍ୟ ଆଲୋଚନା ହୋଇଥିଲା। ବୈଠକରେ ହୋଇଥିବା ନିଷ୍ପତ୍ତି ଅନୁସାରେ ୨ ରାଜ୍ୟର ମୁଖ୍ୟ ସଚିବଙ୍କୁ ନେଇ ସ୍ବତନ୍ତ୍ର ବ୍ୟବସ୍ଥା ହେବ। ଦୁଇ ରାଜ୍ୟ ମଧ୍ୟରେ ଥିବା ବିଭିନ୍ନ ସମସ୍ୟାର ସମାଧାନ ଆପୋଷ ଆଲୋଚନା ଜରିଆରେ କରିବାକୁ ଦୁଇ ମୁଖ୍ୟମନ୍ତ୍ରୀ ରାଜି ହୋଇଛନ୍ତି । ଏଥିପାଇଁ ଉଚ୍ଚସ୍ତରୀୟ କମିଟି ଗଠନ କରିବାକୁ ନିଷ୍ପତ୍ତି ହୋଇଛି । ଏଥିରେ ଉଭୟ ରାଜ୍ୟର ବରିଷ୍ଠ ଅଧିକାରୀ ସାମିଲ ହେବେ । କୋଟିଆ ଗ୍ରାମପୁଞ୍ଜ, ନେରେଡି ବ୍ୟାରେଜ, ଝଞ୍ଜାବତୀ ଜଳଭଣ୍ଡାର, ପୋଲାଭରମ ଓ ବାହୁଦା ନଦୀରୁ ଜଳ ଛାଡିବା ଭଳି ସମସ୍ୟାର ସମାଧାନ କରିବା ପାଇଁ ଦୁଇ ରାଜ୍ୟ ରାଜି ହୋଇଛନ୍ତି ।

ସେହିପରି ନକ୍ସଲ ଓ ଗଞ୍ଜେଇ ଚାଷର ମୂଳୋତ୍ପଟାନ ଲାଗି ଦୁଇ ରାଜ୍ୟ ପରସ୍ପରକୁ ସହଯୋଗର ହାତ ବଢ଼ାଇବେ ବୋଲି ନିଷ୍ପତ୍ତି ହୋଇଛି । ଉଭୟ ରାଜ୍ୟ ଯେକୌଣସି ପ୍ରସଙ୍ଗରେ ପୂର୍ଣ୍ଣ ସହଯୋଗ କରିବାକୁ ସହମତ ହୋଇଥିଲେ। ଅତୀତରେ ଯେତେବେଳେ ପ୍ରାକୃତିକ ବିପର୍ଯ୍ୟୟ ଦେଖାଯାଇଛି, ଉଭୟ ରାଜ୍ୟର ପ୍ରଶାସନ ସହଯୋଗର ହାତ ବଢ଼ାଇଛନ୍ତି। ସେହି ସମ୍ପର୍କ ଉଭୟ ରାଜ୍ୟ ମଧ୍ୟରେ ଅତୁଟ ରହିବ।

ଅନ୍ୟପଟେ ଶ୍ରୀକାକୁଲମ ବିଶ୍ୱବିଦ୍ୟାଳୟରେ ଏକ ଓଡିଆ ଚେୟାର ଓ ବ୍ରହ୍ମପୁର ବିଶ୍ୱବିଦ୍ୟାଳୟରେ ତେଲେଗୁ ଚେୟାର ପ୍ରତିଷ୍ଠା ଦିଗରେ ଦୁଇ ରାଜ୍ୟ କାମ କରିବେ ବୋଲି କହିଛନ୍ତି । ଏହାଛଡା ଦୁଇ ରାଜ୍ୟର ସୀମାନ୍ତ ଅଂଚଳରେ ଥିବା ସ୍କୁଲଗୁଡିକରେ ଓଡିଆ ଓ ତେଲେଗୁ ଭାଷା ଶିକ୍ଷକ ନିଯୁକ୍ତି କରାଯିବ । ସୀମାବର୍ତ୍ତୀ ସ୍କୁଲଗୁଡ଼ିକରେ ବହି ଯୋଗାଣ, ଶିକ୍ଷକ ନିଯୁକ୍ତି ଏବଂ ଅନ୍ୟ ବ୍ୟବସ୍ଥା ହେବ । ସଙ୍ଘୀୟ ବ୍ୟବସ୍ଥାରେ ଉଭୟ ରାଜ୍ୟ ପରସ୍ପରକୁ ସାହାଯ୍ୟ ଓ ସହଯୋଗ ବଜାୟ ରଖିବାକୁ ନିଷ୍ପତ୍ତି ହୋଇଛି।

ଭୁବନେଶ୍ବର : ଆଜି ଉତ୍କଳ ଦିବସ। ୧୯୩୬ ମସିହା ଏପ୍ରିଲ ୧ ତାରିଖରେ ଭାଷାଭିତ୍ତିରେ ଓଡ଼ିଶା ରାଜ୍ୟ ଗଠନ ହୋଇଥିଲା। ଆଜି ଓଡ଼ିଆ ତଥା ଓଡ଼ିଶାବାସୀଙ୍କ ଲାଗି ଏକ ଗର୍ବ କରିବାର ଦିନ। ଯେଉଁମାନଙ୍କର ଅଦମ୍ୟ ସାଧନା, ପ୍ରଚେଷ୍ଟା ଲାଗି ଓଡ଼ିଶା ଭାଷାଭିତ୍ତିରେ ସ୍ୱତନ୍ତ୍ର ପରିଚୟ ପାଇପାରିଛି ସେମାନଙ୍କୁ ଆଜି ସମସ୍ତେ ମନେପକାଉଛନ୍ତି।  ଏହି ଅବସରରେ ରାଜ୍ୟବାସୀଙ୍କୁ ଆନ୍ତରିକ ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସେ ଟ୍ୱିଟ୍ କରି ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଛନ୍ତି ।

ରାଜ୍ୟବାସୀଙ୍କୁ #ଓଡ଼ିଶାଦିବସ ର ଆନ୍ତରିକ ଶୁଭେଚ୍ଛା। ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ସହ ଆମ ଭାଷା, ସାହିତ୍ୟ ଓ ସଂସ୍କୃତିର ଗୌରବ ବୃଦ୍ଧି କରିଥିବା ମହାପୁରୁଷମାନଙ୍କ ପ୍ରତି ମୋର ସମ୍ମାନ ଜଣାଉଛି। ବିଭିନ୍ନ କ୍ଷେତ୍ରରେ ଓଡ଼ିଶାର ସ୍ୱତନ୍ତ୍ର ପରିଚୟକୁ ବଜାୟ ରଖିବା ସହ ଏହାକୁ ଆହୁରି ପରିବ୍ୟାପ୍ତ କରିବା ପାଇଁ ଆସନ୍ତୁ ସଂକଳ୍ପବଦ୍ଧ ହେବା pic.twitter.com/SUmog0leo7

— Naveen Patnaik (@Naveen_Odisha) April 1, 2021

ମୁଖ୍ୟମନ୍ତ୍ରୀ ଟ୍ୱିଟ୍ କରି କହିଛନ୍ତି ଯେ, ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନ ସହ ଆମ ଭାଷା, ସାହିତ୍ୟ ଓ ସଂସ୍କୃତିର ଗୌରବ ବୃଦ୍ଧି କରିଥିବା ମହାପୁରୁଷମାନଙ୍କୁ ସେ ସମ୍ମାନ ଜଣାଇଛନ୍ତି। ମହାପୁରୁଷମାନେ ଭାଷା, ସାହିତ୍ୟ, ସଂସ୍କୃତିର ଗୌରବ ବୃଦ୍ଧି କରିଛନ୍ତି । ବିଭିନ୍ନ କ୍ଷେତ୍ରରେ ଓଡ଼ିଶାର ସ୍ବତନ୍ତ୍ର ପରିଚୟକୁ ବଜାୟ ରଖିବା ସହ ଏହାକୁ ଆହୁରି ପରିବ୍ୟାପ୍ତ କରିବା ପାଇଁ ସଂକଳ୍ପବଦ୍ଧ ହେବାକୁ ଆହ୍ୱାନ କରିଛନ୍ତି ମୁଖ୍ୟମନ୍ତ୍ରୀ ।

୨୦୩୬ରେ ଆମେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର ୧୦୦ବର୍ଷ ପାଳନ କରିବା। ସେତେବେଳେ ଓଡ଼ିଶାକୁ ସବୁ କ୍ଷେତ୍ରରେ ସାରା ଦେଶ ତଥା ବିଦେଶର ଏକ ବିକଶିତ ଓ ଆଦର୍ଶ ରାଜ୍ୟ ଭାବେ ଗଠନ କରିବା ଆମ ଲକ୍ଷ୍ୟ ହେବା ଉଚିତ। ଏଥିପାଇଁ ଆସନ୍ତୁ ଆମେ ସମସ୍ତେ ସଂକଳ୍ପବଦ୍ଧ ଭାବେ ଏକ ହୋଇ ଆଗକୁ ବଢ଼ିବା। #ଓଡ଼ିଶାଦିବସ #ବନ୍ଦେଉତ୍କଳଜନନୀ

— Naveen Patnaik (@Naveen_Odisha) April 1, 2021