ଜଳେଶ୍ୱର: ପ୍ରତ୍ୟେକ ବାପାମାଆଙ୍କ ଇଚ୍ଛା ମୋ ପୁଅ ପାଠ ପଢି ଭଲ ମଣିଷ ହେବ ଏବଂ ଭଲ ଚାକିରୀ ଟିଏ କରିବ। କିନ୍ତୁ ତାହା ଆଜି ସ୍ୱପ୍ନରେ ରହିଗଲା। ଦୁଇ ଭାଇଙ୍କ ପାଇଁ ପ୍ରାୟ କାଳ ଥିଲା ଶୁକ୍ରବାର। କରମଣ୍ଡଳକୁ ମଧ୍ୟ କାଳ ଥିଲା ଶୁକ୍ରବାର। ୧୪ ବର୍ଷ ତଳର କାଳ ଶୁକ୍ରବାର ପରି ପୁଣି ଭୟଙ୍କର ଦୁର୍ଘଟଣା ଘଟିଛି କରମଣ୍ଡଳ ସହ। ସୂଚନାରୁ ପ୍ରକାଶ ଯେ ବାଲେଶ୍ଵର ଜିଲ୍ଲା ବାହାନଗା ଟ୍ରେନ ଦୁର୍ଘଟଣାରେ ଜଳେଶ୍ଵରର ଶାଳିକୋଠା ବାଗେଶ୍ଵରୀ ସଂସ୍କୃତ ମହାବିଦ୍ୟାଳୟରେ ପାଠ ପଢୁଥିବା ଦୁଇ ଭାଇ କରମଣ୍ଡଳ ଏକ୍ସପ୍ରେସରେ କେନ୍ଦ୍ରାପଡ଼ା ଯାଉଥିବା ବେଳେ ବାହାନଗା ନିକଟରେ ଟ୍ରେନ ଦୁର୍ଘଟଣାରେ ସାନ ଭାଇ ଆଗରେ ବଡ଼ ଭାଇର ମୃତ୍ୟୁ ହୋଇଛି। ଆଉ ଏହି ଦୁର୍ଘଟଣାରେ ସାନ ଭାଇବି ଗୁରୁତର ହୋଇଛି।

ସୂଚନାଯୋଗ୍ୟ ଯେ ରାସଗୋବିନ୍ଦପୁର ଥାନା ମଙ୍ଗଳପୁର ଗାଁର ମୃତ୍ୟୁଞ୍ଜୟ ଦାସଙ୍କ ପୁଅ ଅନୁରାଗ ଓ ଦିବ୍ୟେନ୍ଦୁ ଉଭୟ ଆରୁହା ପଂଚାୟତ ଶାଳିକୋଠା ବାଗେଶ୍ଵରୀ ସଂସ୍କୃତ କଲେଜରେ ପାଠ ପଢନ୍ତି। ଉଭୟ ମଧ୍ୟ ହଷ୍ଟେଲରେ ରହନ୍ତି। ତେବେ ସାନ ଭାଇ ଦିବ୍ୟେନ୍ଦୁର ଆଜି କେନ୍ଦ୍ରାପଡ଼ାରେ ସିଟି ପ୍ରବେଶିକା ପରୀକ୍ଷା ଥିଲା। ବଡ଼ଭାଇ ଅନୁରାଗ ଦିବ୍ୟେନ୍ଦୁକୁ ନିଜ ସାଥିରେ ନେଇ କେନ୍ଦ୍ରାପଡ଼ା ଯାଉଥିଲେ। ସେଥିପାଇଁ ସେମାନେ ଗତକାଲି ସନ୍ଧ୍ୟାରେ ବାଲେଶ୍ଵର ଷ୍ଟେସନରୁ କରମଣ୍ଡଳ ଟ୍ରେନରେ ଚଢ଼ିଥିଲେ। ତେବେ ବାହାନଗା ନିକଟରେ ଏହି ଟ୍ରେନ ଦୁର୍ଘଟଣାଗ୍ରସ୍ତ ହେବାରୁ ଜେନେରାଲ କମ୍ପାଟମ୍ୟାଣ୍ଟରେ ଯାତ୍ରା କରୁଥିବା ଅନୁରାଗର ମୃତ୍ୟୁ ହୋଇଛି। ସେହିପରି ଦିବ୍ୟୁନ୍ଦୁ ମଧ୍ୟ ଗୁରୁତର ହୋଇ କଟକ ବଡ଼ ମେଡିକାଲରେ ଚିକିତ୍ସାଧୀନ ଅଛନ୍ତି। ଅନୁରାଗଙ୍କ ମୃତ୍ୟୁରେ ବାଗେଶ୍ବରୀ ସଂସ୍କୃତ କଲେଜର ଅଧ୍ୟକ୍ଷ ଡ.ବିବେକାନନ୍ଦ ସାହୁ ଗଭୀର ଶୋକବ୍ୟକ୍ତ କରିଛନ୍ତି।

ମେଦିନୀପୁର : ବାଲେଶ୍ୱରରେ ଘଟିଥିବା ଭୟଙ୍କର ରେଳ ଦୁର୍ଘଟଣା କୁ ନେଇ ଆଉ ଏକ ଦୁଃଖଦ ଖବର ସାମ୍ନାକୁ ଆସୁଛି। ପଶ୍ଚିମବଙ୍ଗର ମେଦିନୀପୁରରେ ଶନିବାର ଟ୍ରେନ୍ ଦୁର୍ଘଟଣାରେ ଆହତ ହୋଇଥିବା ଯାତ୍ରୀଙ୍କୁ ନେଇ ଯାଉଥିବା ଏକ ବସ୍ ଦୁର୍ଘଟଣାଗ୍ରସ୍ତ ହୋଇଛି। ଏହି ବସ ଦୁର୍ଘଟଣାରେ କେହି ମୃତାହତ ହୋଇନଥିଲେ ମଧ୍ୟ ଜାତୀୟ ରାଜପଥରେ ଜାମ୍ ଲାଗି ରହିଥିଲା। ସୂଚନା ଅନୁଯାୟୀ, ବାଲେଶ୍ୱରରେ ରେଳ ଦୁର୍ଘଟଣାରେ ସାମାନ୍ୟ ଆହତ ହୋଇଥିବା କିଛି ଯାତ୍ରୀଙ୍କୁ ଚିକିତ୍ସା ପାଇଁ ପଶ୍ଚିମବଙ୍ଗର ବିଭିନ୍ନ ଜିଲ୍ଲାକୁ ପଠାଯାଉଛି। ଏହି ସମୟରେ ବାଟରେ ମେଦିନୀପୁର ନିକଟରେ ଏକ ପିକ୍ ଅପ୍ ଭ୍ୟାନ୍ ସହ ବସର ମୁହାଁମୁହିଁ ଧକ୍କା ହୋଇଥିଲା। ଦୁର୍ଘଟଣାରେ ବସରେ ଥିବା ଅନେକ ଲୋକ ସାମାନ୍ୟ ଆହତ ହୋଇଥିବା ଆଶଙ୍କା କରାଯାଉଛି। କିନ୍ତୁ ଏହି ଯାତ୍ରୀମାନେ ପୂର୍ବରୁ ହିଁ ଆହତ ହୋଇଥିବାରୁ ପୁଣି ଥରେ ଆହତ ହେବା ପରେ ଚିନ୍ତିତ ହୋଇପଡ଼ିଛନ୍ତି।

ବାଲେଶ୍ବର: ଶୁକ୍ରବାର ସନ୍ଧ୍ୟାରେ ହୋଇଥିବା ଟ୍ରେନ୍ ଦୁର୍ଘଟଣାରେ ଆହତ ହୋଇଥିବା ଯାତ୍ରୀଙ୍କୁ ଭେଟିବା ପାଇଁ ତାମିଲନାଡୁର ୩ ଜଣ ମନ୍ତ୍ରୀ ଓଡ଼ିଶା ଆଜି ଓଡ଼ିଶା ଆସୁଛନ୍ତି। ଗଣମାଧ୍ୟମ ସୂଚନା ଅନୁସାରେ, ତାମିଲନାଡୁର ଯୁବ ସଶକ୍ତୀକରଣ ଏବଂ କ୍ରୀଡ଼ା ଉନ୍ନତିକରଣ ମନ୍ତ୍ରୀ ଉଦୟନିଧି ଷ୍ଟାଲିନ୍, ପରିବହନ ମନ୍ତ୍ରୀ ଏସ୍.ଏସ୍. ଶିବଶଙ୍କର ଏବଂ ବିଦ୍ୟାଳୟ ଶିକ୍ଷା ମନ୍ତ୍ରୀ ଅନବିଲ୍ ପୋୟାମୋଝି ଶନିବାର କରମଣ୍ଡଳ ଏକ୍ସପ୍ରେସ୍ ଏବଂ ହାୱଡ଼ା ସୁପରଫାଷ୍ଟ ଏକ୍ସପ୍ରେସ୍ ଦୁର୍ଘଟଣାରେ ଆହତମାନଙ୍କୁ ଭେଟିବେ।

ଅନ୍ୟପଟେ ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ ଏହି ଦୁଘଟଣାରେ ଓଡ଼ିଶାକୁ ଯଥାସମ୍ଭବ ସହୟତା ପ୍ରଦାନ କରିବେ ବୋଲି ଶନିବାର ଗଣମାଧ୍ୟମକୁ ସୂଚନା ଦେଇଛନ୍ତି। ଷ୍ଟାଲିନ୍ ଏ ସମ୍ପର୍କରେ କହିଛନ୍ତି, ‘ଏହି ଦୁର୍ଘଟଣା ସାରା ଦେଶକୁ ସ୍ତମ୍ଭିଭୂତ କରିଦେଇଛି। ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ମୁଁ ଫୋନ୍ ମାଧ୍ୟମରେ କଥା ହୋଇଛି। ତାମିଲନାଡୁ ସରକାର ସବୁପ୍ରକାର ସହାୟତା ଯୋଗାଇଦେବ । ଯାତ୍ରୀଙ୍କ ସମ୍ପର୍କୀୟଙ୍କୁ ସହାୟତା ଯୋଗାଇଦେବାକୁ ରାଜ୍ୟର ଜରୁରୀକାଳୀନ କଣ୍ଟ୍ରୋଲ୍ ରୁମ୍ ଶୁକ୍ରବାର ରାତିଠାରୁ କାର୍ଯ୍ୟ କରୁଛି’ ବୋଲି ଷ୍ଟାଲିନ୍ କହିଛନ୍ତି। ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ୱାଇ ଏସ୍ ଜଗନମୋହନ ରେଡ୍ଡି ମଧ୍ୟ ଏ ନେଇ ଶୋକ ପ୍ରକାଶ କରିଛନ୍ତି। ଆନ୍ଧ୍ରର ଏକ ଉଚ୍ଚସ୍ତରୀୟ ପ୍ରଶାସନିକ ଅଧିକାରୀ ଦଳ ଦୁର୍ଘଟଣାସ୍ଥଳ ପରିଦର୍ଶନରେ ଆସିବେ।