ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ୍ (HAL) ପକ୍ଷରୁ ୨୦୨୫-୨୬ ଆର୍ଥିକ ବର୍ଷ ଶେଷ ସୁଦ୍ଧା ୧୮ଟି ତେଜସ୍ ମାର୍କ-୧ଏ (Tejas Mk1A) ବିମାନ ପ୍ରସ୍ତୁତ କରାଯାଇଛି। ଏହି ବିମାନଗୁଡ଼ିକ ଏବେ ଭାରତୀୟ ବାୟୁସେନା (IAF) ର ପରୀକ୍ଷଣ ପାଇଁ ଅପେକ୍ଷା କରିଛନ୍ତି। ଆସନ୍ତା ଏପ୍ରିଲ୍ ମାସରେ ବାୟୁସେନା ଏହାର ପ୍ରଥମ ପାଞ୍ଚଟି ତେଜସ୍ ମାର୍କ-୧ଏ ବିମାନର ପୂର୍ଣ୍ଣାଙ୍ଗ ଯାଞ୍ଚ କରିବ।

ଟ୍ରାୟଲ୍ ଏବଂ ଯାଞ୍ଚ ପ୍ରକ୍ରିୟା

ବାୟୁସେନା ସୂତ୍ରରୁ ପ୍ରକାଶ ଯେ, ବିମାନଗୁଡ଼ିକର ଲଢ଼ୁଆ କ୍ଷମତାର ସମ୍ପୂର୍ଣ୍ଣ ଯାଞ୍ଚ କରାଯିବା ପରେ ହିଁ ସେଗୁଡ଼ିକୁ ଆନୁଷ୍ଠାନିକ ଭାବେ ସାମିଲ କରାଯିବ। ଏହି ପରୀକ୍ଷଣରେ ମୁଖ୍ୟତଃ ମିସାଇଲ୍ ଫାୟାରିଂ, ରାଡାର୍-ଇଡବ୍ଲ୍ୟୁ (Radar-EW) ଇଣ୍ଟିଗ୍ରେସନ୍ ଏବଂ ଅସ୍ତ୍ରଶସ୍ତ୍ର ପ୍ରଣାଳୀର ପୁଙ୍ଖାନୁପୁଙ୍ଖ ଯାଞ୍ଚ କରାଯିବ। ବିମାନଗୁଡ଼ିକ ବାୟୁସେନାର ସମସ୍ତ ମାନଦଣ୍ଡ ପୂରଣ କରୁଛି କି ନାହିଁ, ତାହା ନିଶ୍ଚିତ କରିବା ପାଇଁ ଏହି ଟ୍ରାୟଲ୍ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି।

ସାଲିସ୍ ବିହୀନ ଲଢ଼ୁଆ କ୍ଷମତା

ଭାରତୀୟ ବାୟୁସେନା ସ୍ପଷ୍ଟ କରିଦେଇଛି ଯେ, ତେଜସ୍ ମାର୍କ-୧ଏ ବିମାନକୁ ବାୟୁସେନାରେ ସାମିଲ କରିବା ପୂର୍ବରୁ ତିନୋଟି ପ୍ରମୁଖ ଲଢ଼ୁଆ କ୍ଷମତା ଉପରେ କୌଣସି ପ୍ରକାରର ଆପୋଷ ବୁଝାମଣା କରାଯିବ ନାହିଁ। ବାୟୁସେନା ଏହାର ପ୍ରସ୍ତୁତି ତଥା ଶକ୍ତିକୁ କୌଣସି ପରିସ୍ଥିତିରେ ବି ଦୁର୍ବଳ ହେବାକୁ ଦେବ ନାହିଁ। ତେଣୁ, ଏହି ଆଧୁନିକ ଯୁଦ୍ଧବିମାନଗୁଡ଼ିକର ଯାଞ୍ଚ ପ୍ରକ୍ରିୟା ସଫଳ ହେବା ପରେ ଏଗୁଡ଼ିକ ଦେଶର ସୁରକ୍ଷା ବ୍ୟବସ୍ଥାକୁ ଆହୁରି ସୁଦୃଢ଼ କରିବେ ବୋଲି ଆଶା କରାଯାଉଛି।

ନୂଆଦିଲ୍ଲୀ: ବାୟୁସେନାର ସୁଖୋଇ-୩୦ ବିମାନ କ୍ରାସ୍ । ଆସାମର କାର୍ବି ଆଙ୍ଗଲଙ୍ଗ ଜିଲ୍ଲାରେ ଭାରତୀୟ ବାୟୁସେନାର ଏକ Su-30MKI ଯୁଦ୍ଧ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଭାଗ୍ୟଜନକ ଘଟଣାରେ ବିମାନରେ ଥିବା ଦୁଇ ଜଣ ପାଇଲଟ୍ ପ୍ରାଣ ହରାଇଛନ୍ତି। ମୃତ ପାଇଲଟ ଦୁଇଜଣ ହେଲେ ସ୍କ୍ୱାଡ୍ରନ୍ ଲିଡର୍ ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୁର୍ବେଶ ଦୁରଗକର। ଶୁକ୍ରବାର ଦିନ ଭାରତୀୟ ବାୟୁସେନା (IAF) ପକ୍ଷରୁ ଏହି ସୂଚନା ସ୍ପଷ୍ଟ କରାଯାଇଛି।

ଭାରତୀୟ ବାୟୁସେନା ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ଜରିଆରେ ନିଜର ଶୋକ ବ୍ୟକ୍ତ କରିଛି। ବାୟୁସେନା ପକ୍ଷରୁ କୁହାଯାଇଛି ଯେ, "Su-30 ଦୁର୍ଘଟଣାରେ ସ୍କ୍ୱାଡ୍ରନ୍ ଲିଡର୍ ଅନୁଜ ଏବଂ ଫ୍ଲାଇଟ୍ ଲେଫ୍ଟନାଣ୍ଟ ପୁର୍ବେଶ ଦୁରଗକରଙ୍କ ବିୟୋଗରେ ଆମେ ମର୍ମାହତ। ଏହି ଦୁଃଖଦ ସମୟରେ ବାୟୁସେନାର ସମସ୍ତ କର୍ମଚାରୀ ଶୋକସନ୍ତପ୍ତ ପରିବାରବର୍ଗଙ୍କ ସହ ଦୃଢ଼ ଭାବରେ ଛିଡ଼ା ହୋଇଛନ୍ତି।"

ପ୍ରାପ୍ତ ସୂଚନା ଅନୁଯାୟୀ, ଗୁରୁବାର ଦିନ ଏହି ଯୁଦ୍ଧ ବିମାନଟି ଏକ ନିୟମିତ ତାଲିମ ମିଶନରେ ଥିଲା। ଉଡ଼ାଣ ସମୟରେ ହଠାତ୍ ରାଡାର୍ ସହ ଏହାର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ବିମାନଟି ଯୋରହାଟ ଠାରୁ ପ୍ରାୟ ୬୦ କିଲୋମିଟର ଦୂର କାର୍ବି ଆଙ୍ଗଲଙ୍ଗ ଅଞ୍ଚଳରେ ଦୁର୍ଘଟଣାଗ୍ରସ୍ତ ହୋଇଥିଲା। ଘଟଣା ପରେ ତୁରନ୍ତ ବାୟୁସେନା ଏବଂ ସ୍ଥାନୀୟ ପ୍ରଶାସନ ପକ୍ଷରୁ ସର୍ଚ୍ଚ ଅପରେସନ୍ ଆରମ୍ଭ କରାଯାଇଥିଲା।

Sukhoi-30MKI ଭାରତୀୟ ବାୟୁସେନାର ଏକ ପ୍ରମୁଖ ଲଢୁଆ ବିମାନ। ଏହା ଦେଶର ବାୟୁ ସୁରକ୍ଷା ବ୍ୟବସ୍ଥାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ତେବେ ପୂର୍ବରୁ ମଧ୍ୟ ଆସାମର ତେଜପୁର ନିକଟରେ ସୁଖୋଇ ବିମାନ ଦୁର୍ଘଟଣାଗ୍ରସ୍ତ ହେବାର ନଜିର ରହିଛି। ୨୦୧୯ ଏବଂ ୨୦୧୫ ମସିହାରେ ଅନୁରୂପ ଘଟଣା ଘଟିଥିଲେ ମଧ୍ୟ ସେତେବେଳେ ପାଇଲଟମାନେ ସୁରକ୍ଷିତ ଭାବେ ବାହାରି ପାରିଥିଲେ, କିନ୍ତୁ ଏଥର ଦୁଇ ଜଣ ବୀର ଅଧିକାରୀଙ୍କୁ ବାୟୁସେନା ହରାଇଛି।

ନୂଆଦିଲ୍ଲୀ: ଭାରତ ନିଜର ବାୟୁ ପ୍ରତିରକ୍ଷା ବ୍ୟବସ୍ଥାକୁ ଅଧିକ ଶକ୍ତିଶାଳୀ କରିବା ଦିଗରେ ଏକ ବଡ଼ ପଦକ୍ଷେପ ନେଇଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରତିରକ୍ଷା ଅଧିଗ୍ରହଣ ପରିଷଦ (DAC) ରୁଷିଆରୁ ୨୮୮ଟି S-400 ମିସାଇଲ୍ କିଣିବା ପାଇଁ ୧୦,୦୦୦ କୋଟି ଟଙ୍କାର ଏକ ଚୁକ୍ତିନାମାକୁ ମଞ୍ଜୁରୀ ଦେଇଛି। ଆଞ୍ଚଳିକ ସ୍ତରରେ ବୃଦ୍ଧି ପାଉଥିବା ବିପଦକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି, ଯାହା ଭାରତର ସୀମା ସୁରକ୍ଷାକୁ ଏକ ନୂତନ ଦିଗ ଦେବ।

ଏହି ଚୁକ୍ତି ଅନୁଯାୟୀ, ଭାରତ 'ଫାଷ୍ଟ ଟ୍ରାକ୍ ପ୍ରୋସିଜିଓର୍' (FTP) ମାଧ୍ୟମରେ ୧୨୦ଟି ସ୍ୱଳ୍ପ ଦୂରଗାମୀ (Short-range) ଏବଂ ୧୬୮ଟି ଦୀର୍ଘ ଦୂରଗାମୀ (Long-range) ମିସାଇଲ୍ ହାସଲ କରିବ। ଏହା ସହିତ ଦୁଇଟି ଅତିରିକ୍ତ S-400 ସିଷ୍ଟମ୍ ମଧ୍ୟ କିଣାଯିବାର ଯୋଜନା ରହିଛି। ସୀମାରେ ଶତ୍ରୁପକ୍ଷର ବିମାନ ଓ ମିସାଇଲ୍‌ଗୁଡ଼ିକୁ ମୁକାବିଲା କରିବା ପାଇଁ ଏହି ଅତ୍ୟାଧୁନିକ ପ୍ରଣାଳୀ ଭାରତୀୟ ବାୟୁସେନାକୁ ଅଧିକ କ୍ଷମତାଶାଳୀ କରିବ।

ଗତ ମେ ୨୦୨୫ରେ ହୋଇଥିବା ‘ଅପରେସନ୍ ସିନ୍ଦୂର’ ସମୟରେ S-400 ସିଷ୍ଟମ୍ ଏହାର କାର୍ଯ୍ୟକାରିତା ପ୍ରମାଣିତ କରିସାରିଛି। ରିପୋର୍ଟ ଅନୁଯାୟୀ, ଏହି ଅପରେସନ୍‌ରେ ଭାରତୀୟ ବାୟୁସେନା ପାକିସ୍ତାନର ୫-୬ଟି ଯୁଦ୍ଧ ବିମାନ ଏବଂ ଗୋଟିଏ ଗୁପ୍ତଚର ବିମାନକୁ ଭୂପାତିତ କରିଥିଲା। ବିଶେଷ କରି ପଞ୍ଜାବ (ପାକିସ୍ତାନ) ଉପରେ ଉଡ଼ୁଥିବା ଏକ ବଡ଼ ବିମାନକୁ ଭାରତ ୩୧୪ କିଲୋମିଟର ଦୂରରୁ S-400 ମିସାଇଲ୍ ମାଡ଼ କରି ଖସାଇ ଦେଇଥିଲା, ଯାହା ସାମରିକ ଇତିହାସରେ ଏକ ରେକର୍ଡ ବୋଲି ବାୟୁସେନା ମୁଖ୍ୟ ମାର୍ଶଲ ଅମର ପ୍ରୀତ ସିଂହ ଉଲ୍ଲେଖ କରିଥିଲେ।

S-400ର ଭୟରେ ପାକିସ୍ତାନ ବାୟୁସେନା ନିଜର ଅପରେସନାଲ ବିମାନଗୁଡ଼ିକୁ ଆଫଗାନିସ୍ତାନ ଓ ଇରାନ ସୀମାବର୍ତ୍ତୀ ଅଞ୍ଚଳକୁ ସ୍ଥାନାନ୍ତର କରିବାକୁ ବାଧ୍ୟ ହୋଇଥିଲା। ଭାରତର ଆଦମପୁର ଏବଂ ଭୁଜ୍ ସେକ୍ଟରରେ ମୁତୟନ ଥିବା ଏହି ଏୟାର ଡିଫେନ୍ସ ସିଷ୍ଟମ୍ ଯୋଗୁଁ ଲାହୋର, ରାୱଲପିଣ୍ଡି ଏବଂ ସିଆଲକୋଟ ଭଳି ଅଞ୍ଚଳରେ ପାକିସ୍ତାନୀ ବାୟୁସେନା ନିଷ୍କ୍ରିୟ ରହିଥିଲା।

କେବଳ ବିଦେଶୀ ଅସ୍ତ୍ରଶସ୍ତ୍ର ନୁହେଁ, ଭାରତ ନିଜର ସ୍ୱଦେଶୀ 'ସୁଦର୍ଶନ ଚକ୍ର' (IADWS) ବାୟୁ ପ୍ରତିରକ୍ଷା ନେଟୱାର୍କକୁ ମଧ୍ୟ ବିକଶିତ କରୁଛି। ୨୦୩୫ ସୁଦ୍ଧା ବାୟୁ ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରଶୀଳ ହେବାକୁ ଲକ୍ଷ୍ୟ ରଖାଯାଇଛି। ଏହା ବ୍ୟତୀତ ଭାରତ ୧୧୪ଟି ରାଫାଲ୍ (Rafale) ଯୁଦ୍ଧ ବିମାନ, ସ୍କାଲ୍ପ କ୍ରୁଜ୍ ମିସାଇଲ୍ ଏବଂ ଆମେରିକାରୁ P-8I ସର୍ଭେଲାନ୍ସ ବିମାନ କିଣିବା ପ୍ରକ୍ରିୟା ଜାରି ରଖିଛି।

ଉତ୍ତରପ୍ରଦେଶ: ଉତ୍ତରପ୍ରଦେଶର ପ୍ରୟାଗରାଜ ଠାରେ ବୁଧବାର ବାୟୁସେନାର ଏକ ପ୍ରଶିକ୍ଷଣ ବିମାନ ଦୁର୍ଘଟଣାଗ୍ରସ୍ତ ହୋଇଛି । ଭାରତୀୟ ବାୟୁସେନାର (IAF) ଏକ ଟ୍ରେନିଂ ବିମାନ ନିୟମିତ ପ୍ରଶିକ୍ଷଣ ଉଡ଼ାଣ ସମୟରେ ନିୟନ୍ତ୍ରଣ ହରାଇ ଏକ ପୋଖରୀରେ ଖସିପଡିଥିଲା। ତେବେ ଆଶ୍ୱସ୍ତିର ବିଷୟ ହେଉଛି ଯେ, ଏହି ଦୁର୍ଘଟଣାରେ ବିମାନରେ ଥିବା ଉଭୟ ପାଇଲଟଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।

ବିମାନଟି ପ୍ରୟାଗରାଜ ବିମାନବନ୍ଦର ନିକଟସ୍ଥ ଏକ ଗାଁର ପୋଖରୀରେ ଦୁର୍ଘଟଣାଗ୍ରସ୍ତ ହୋଇଛି । ପ୍ରାଥମିକ ସୂଚନା ଅନୁଯାୟୀ, ଦୁର୍ଘଟଣାଗ୍ରସ୍ତ ବିମାନଟି ଏକ ମାଇକ୍ରୋଲାଇଟ୍ ବିମାନ ଥିଲା। ଉଡ଼ାଣ ସମୟରେ କୌଣସି ଯାନ୍ତ୍ରିକ ତ୍ରୁଟି କାରଣରୁ ଏହା ତଳକୁ ଖସି ପଡ଼ିଥିଲା। ଘଟଣାସ୍ଥଳରେ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା ଏବଂ ପାଇଲଟମାନଙ୍କୁ ସୁରକ୍ଷିତ ଭାବେ ବାହାରକୁ ଅଣାଯାଇଥିଲା। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଛୋଟ ପ୍ରୋପେଲର୍ ବିମାନଟି ହଠାତ୍ ନିୟନ୍ତ୍ରଣ ହରାଇଥିବା ପରି ମନେହେଉଥିଲା ଏବଂ ପରେ ପାଣି ଭିତରକୁ ଖସିପଡିଥିଲା। ଦୁର୍ଘଟଣା ପରେ ଘଟଣାସ୍ଥଳରୁ କଳା ଧୂଆଁ ବାହାରୁଥିବା ଦେଖିବାକୁ ମିଳିଥିଲା। ସ୍ଥାନୀୟ ଲୋକେ ତୁରନ୍ତ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ପରେ NDRF ର ବୁଡ଼ାଳି ଏବଂ ଅଗ୍ନିଶମ ବାହିନୀ ପହଞ୍ଚି ସ୍ଥିତି ନିୟନ୍ତ୍ରଣ କରିଥିଲେ।

ଘଟଣାସ୍ଥଳରୁ ମିଳିଥିବା ଚିତ୍ରରେ ବିମାନର ଧ୍ୱଂସାବଶେଷ ପାଣିରେ ଏବଂ ଆଖପାଖରେ ପଡ଼ିଥିବା ଦେଖିବାକୁ ମିଳିଛି। ବର୍ତ୍ତମାନ ସୁଦ୍ଧା ବିମାନଟିକୁ ପାଣିରୁ ବାହାର କରାଯାଇନାହିଁ ଏବଂ ଅପରେସନ୍ ଜାରି ରହିଛି। ବାୟୁସେନା ଅଧିକାରୀମାନେ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି।

ହରିୟାଣା: ଟ୍ରେନିଂ ବେଳେ କ୍ରାସ୍ ହେଲା ବାୟୁସେନାର ଜାଗୁଆର ବିମାନ । ଭାରତୀୟ ବାୟୁସେନାର ଏକ ଜାଗୁଆର ଲଢୁଆ ବିମାନ ଆଜି ହରିୟାଣାର ପଞ୍ଚକୁଲାଠାରେ ଦୁର୍ଘଟଣାଗ୍ରସ୍ତ ହୋଇଛି। ତାଲିମ ଉଡ଼ାଣ ପାଇଁ ବିମାନଟି ଅମ୍ବାଲା ଏୟାରବେସ୍ରୁ ଉଡ଼ାଣ ଭରିଥିଲା। ପାଇଲଟ ବିମାନରୁ ସୁରକ୍ଷିତ ଭାବେ ବାହାରକୁ ବାହାରିବାରେ ସଫଳ ହୋଇଥିଲେ। କ୍ରାସ୍ ପରେ ପାରାଚ୍ୟୁଟରେ ଓହ୍ଲାଇ ପଡିଥିଲେ ପାଇଲଟ୍ । ଭାରତୀୟ ବାୟୁସେନା ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛି।

ସୂଚନା ଅନୁସାରେ, ହରିୟାଣା ପଞ୍ଚକୁଲାର ମୋରନିର ପାହାଡ଼ିଆ ଅଞ୍ଚଳର ବାଲଡୱାଲା ଗାଁ ନିକଟରେ ଏହି ଲଢୁଆ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣା ସମୟରେ ଲଢୁଆ ବିମାନର ପାଇଲଟ ପାରାସୁଟ୍ ସାହାଯ୍ୟରେ ସୁରକ୍ଷିତ ଭାବେ ବାହାରକୁ ବାହାରିଥିଲେ। ଖବର ପାଇ ସ୍ଥାନୀୟ ପୁଲିସ ଘଟଣାସ୍ଥଳରେ ପହଞ୍ଚିଥିଲା। ଏହି ଦୁର୍ଘଟଣାରେ କେହି ମୃତାହତ ହୋଇନାହାନ୍ତି।

ଗାଜଆବାଦ: ବଢିଲା ଭାରତର ଶକ୍ତି । ଆନୁଷ୍ଠାନିକ ଭାବେ ଭାରତୀୟ ବାୟୁସେନାରେ ସାମିଲ ହେଲା ଅତ୍ୟାଧୁନିକ C-295 MW ଟ୍ରାନ୍ସପୋର୍ଟ ଏୟାରକ୍ରାଫ୍ଟ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଉତ୍ତରପ୍ରଦେଶ ହିଣ୍ଡନ ଏୟାରବେସରେ ଏହାକୁ ସାମିଲ କରିଛନ୍ତି । ଏହି ବିମାନ ସ୍ପେନ୍ ଠାରୁ ୬ ହଜାର ୮୫୪ କିଲୋମିଟର ଦୂରତା ଅତିକ୍ରମ କରିବା ପରେ ୨୦ ସେପ୍ଟେମ୍ବରରେ ଭଦୋଦରାରେ ପହଞ୍ଚିଥିଲା । ଆଜି ଏହା ହିଣ୍ଡେନ ଏୟାରବେସରେ ପହଞ୍ଚିିଲା ପରେ ଏହାକୁ ବାୟୁସେନାରେ ସାମିଲ କରାଯାଇଛି ।

ଏହି ବିମାନକୁ ଉଡାଇବା ପାଇଁ ବାୟୁସେନାର ପ୍ରଥମ ବ୍ୟାଚ୍ ବିଦ୍ଧିବଦ୍ଧ ତାଲିମ୍ ନେଇଛନ୍ତି । ସ୍ପେନରୁ ୧୬ଟି ବିମାନ ଅଣାଯାଉଥିବାବେଳେ, ଏହାପରେ ଭାରତରେ ହିଁ ସି-୨୯୫ ବିମାନ ପ୍ରସ୍ତୁତ ହେବ ବୋଲି ପ୍ରତିରକ୍ଷା ମନ୍ତ୍ରୀ ସୂଚନା ଦେଇଛନ୍ତି । ଏହି ବିମାନ ଦ୍ୱାରା ଭାରତୀୟ ବାୟୁସେନାର ଶକ୍ତି ଦ୍ୱିଗୁଣିତ ହୋଇ ଯାଇଛି । ଭାରତ ପାଇଁ ଏହି ବିମାନ ଅତ୍ୟନ୍ତ ଗୁରୁତ୍ବପୂର୍ଣ୍ଣ। କାରଣ ଏହି ଟ୍ରାନ୍ସପୋର୍ଟ ବିମାନ ଦ୍ବାରା ସୈନିକ, ଯୁଦ୍ଧାସ୍ତ୍ର, ଇନ୍ଧନ ଓ ହାର୍ଡୱେର ଗୋଟିଏ ସ୍ଥାନରୁ ଅନ୍ୟ ଏକ ସ୍ଥାନକୁ ପହଞ୍ଚାଇବାକୁ ସହଜ ହେବ।

ପ୍ରତିରକ୍ଷା ମନ୍ତ୍ରାଳୟ ସୂଚନା ଅନୁସାରେ, ଏହି ବିମାନ ୫ ରୁ ୧୦ ଟନ୍‌ ବିଶିଷ୍ଟ ପରିବହନ ବିମାନ ଅଟେ, ଯାହାକି ଅନେକ ମିଶନକୁ ସଫଳ କରିପାରିବ। ଏହି ବିମାନ ୧୧ ଘଣ୍ଟା ଧରି ଲଗାତର ଉଡ଼ାଣ ଭରିବା ସହିତ ଖୁବ୍‌ କମ୍‌ ସ୍ଥାନରେ ଅବତରଣ ମଧ୍ୟ କରିପାରିବ। ଏହା ଉଭୟ ଦିନ ଓ ରାତିରେ ଲଗାତର ସମାନ କ୍ଷମତାରେ କାର୍ଯ୍ୟ କରିପାରିବ। ଏହାର ବେଗ ଘଣ୍ଟାପ୍ରତି ୪୮୦ କିମି।

ନୂଆଦିଲ୍ଲୀ: ଭାରତୀୟ ବାୟୁସେନା (IAF) ରେ ଯୋଗ ଦେଇ ଦେଶର ସୁରକ୍ଷା ପାଇଁ କାମ କରିବାକୁ ଚାହୁଁଥିବା ପ୍ରାର୍ଥୀଙ୍କ ପାଇଁ ଖୁସି ଖବର। ଭାତୀୟ ବାୟୁସେନାରେ ଅଗ୍ନିବୀରଙ୍କ ନୂଆ ନିଯୁକ୍ତି ପାଇଁ ବିଜ୍ଞପ୍ତି ଜାରି ହୋଇଛି। ଏ ନେଇ ଆଜି ଅଫିସିଆଲ୍ ୱେବସାଇଟ୍ agnipathvayu.cdac.in ରେ ପ୍ରକାଶ ପାଇଛି। । ୱେବସାଇଟ୍‌କୁ ଯାଇ ୧୭ ଅଗଷ୍ଟରୁ ଆବେଦନ କରିପାରିବେ । ଅନଲାଇନ୍‌ ଲିଖିତ ପରୀକ୍ଷା ୧୩ ଅକ୍ଟୋବର ୨୦୨୩ରୁ ଆରମ୍ଭ ହେବ।

ଯୋଗ୍ୟତା ମାନଦଣ୍ଡ:
ଆବେଦନ କରୁଥିବା ପ୍ରାର୍ଥୀଙ୍କ ପାଇଁ ସର୍ବାଧିକ ବୟସ ସୀମା ୨୧ ବର୍ଷରେ ସ୍ଥିର କରାଯାଇଛି। ଆବେଦକ ଗଣିତ, ଫିଜିକ୍ସ ଓ ଇଂରାଜୀ ବିଷୟ ସହିତ ଦ୍ୱାଦଶ ପରୀକ୍ଷାରେ ଅତି କମରେ ୫୦ ପ୍ରତିଶତ ମାର୍କ ରଖି ପାସ୍‌ ହୋଇଥିବା ଆବଶ୍ୟକ। ସେହିପରି ପ୍ରାର୍ଥୀଙ୍କ ଇଂରାଜୀରେ ୫୦ ପ୍ରତିଶତ ନମ୍ବର ରହିଥିବା ଦରକାର । କିମ୍ବା ୫୦ ପ୍ରତିଶତ ନମ୍ବର ସହ ତିନି ବର୍ଷିୟ ଇଞ୍ଜିନିୟରିଂ ଡିପ୍ଲୋମା ଧାରକ ତଥା ଫିଜିକ୍ସ ଓ ଗଣିତ ପରି ନନଭୋକେସନାଲ ବିଷୟରେ ୫୦ ପ୍ରତିଶତ ନମ୍ବର ସହ ଦୁଇ ବର୍ଷ ପାଠ ପଢ଼ିଥିବା ପ୍ରାର୍ଥୀ ଏହି ପୋଷ୍ଟ ପାଇଁ ଆବେଦନ କରିପାରିବେ ।

ଉଚ୍ଚତା: ଆବେଦନ କରୁଥିବା ପୁରୁଷ ପ୍ରାର୍ଥୀଙ୍କ ଉଚ୍ଚତା ୧୫୨.୫ ସେମି ଓ ମହିଳା ପ୍ରାର୍ଥୀଙ୍କ ଉଚ୍ଚତା ୧୫୨ ସେମି ହୋଇଥିବା ଆବଶ୍ୟକ । ପୁରୁଷ ପ୍ରାର୍ଥୀଙ୍କ ଛାତି ଅତି କମରେ ୭୭ ସେମି ହୋଇଥିବା ସହ ସେମାନେ ୫ ସେମି ପର୍ଯ୍ୟନ୍ତ ଛାତି ଫୁଲାଇ ପାରୁଥିବେ ।

ପରୀକ୍ଷା ଦେୟ 
ଆବେଦନକାରୀଙ୍କୁ ଆବେଦନ ଫି ବାବଦକୁ୨୫୦ ଟଙ୍କା ଦେବାକୁ ପଡିବ। ଡେବିଟ୍ କାର୍ଡ / କ୍ରେଡିଟ୍ କାର୍ଡ / ଇଣ୍ଟରନେଟ୍ ବ୍ୟାଙ୍କିଙ୍ଗ୍ ବ୍ୟବହାର କରି ପେମେଣ୍ଟ ଗେଟୱେ ମାଧ୍ୟମରେ ପେମେଣ୍ଟ କରାଇପାରିବେ।

ଚୟନ ପ୍ରକ୍ରିୟା

ଚୟନ ପ୍ରକ୍ରିୟା ୩ ଟି ପର୍ଯ୍ୟାୟକୁ ନେଇ ଗଠିତ ହୋଇଛି। ପ୍ରଥମ ପର୍ଯ୍ୟାୟ ଅନଲାଇନ୍ ପରୀକ୍ଷା, ଦ୍ୱିତୀୟ ପର୍ଯ୍ୟାୟ ଶାରୀରିକ ଫିଟନେସ୍ ପରୀକ୍ଷା (PFT) ଏବଂ ଆଡାପ୍ଟେସନ୍ ଟେଷ୍ଟ 1 ଏବଂ 2 ଏବଂ ପର୍ଯ୍ୟାୟ ୩ ଡାକ୍ତରୀ ପରୀକ୍ଷା । ଶେଷରେ  ନାମିତ ପ୍ରାର୍ଥୀଙ୍କ ତାଲିକା ଫେବୃଆରୀରେ ପ୍ରକାଶ ପାଇବ।

ବାୟୁସେନା ଅଗ୍ନିବୀରର ୪ ବର୍ଷର ଟ୍ରେନିଂ ସମୟରେ ୪୮ ଲକ୍ଷ ଟଙ୍କା ମେଡିକାଲ ଇନସ୍ୟୁରାନ୍ସ ଦିଆଯିବ । ଅଗ୍ନିବୀର ଗ୍ରାଚୁଟି ପାଇବାର ଅଧିକାର ପାଇବେ ନାହିଁ । ଚାକିରି କାଳ ସମୟରେ ଅଗ୍ନିବୀର ଇଣ୍ଡିଆନ୍ ଏୟାରଫୋର୍ସର ହସ୍ପିଟାଲ ଓ ଇଣ୍ଡିଆନ୍‌ ଏୟାରଫୋର୍ସର ସିଏସ୍‌ଡି କ୍ୟାଣ୍ଟିନ୍‌ର ଲାଭ ଉଠାଇ ପାରବେ । ଅଗ୍ନିବୀରଙ୍କୁ ବାର୍ଷିକ ୩୦ ଦିନ ଛୁଟି ମିଳିବ । ଏହା ବ୍ୟତୀତ ଡାକ୍ତରଙ୍କ ପରାମର୍ଶ କ୍ରମେ ସିକ୍‌ ଲିଭ୍‌ ନେଇପାରିବେ ଅଗ୍ନିବୀର ।

ନୂଆଦିଲ୍ଲୀ: ଭାରତୀୟ ବାୟୁସେନା (ଆଇଏଏଫ) ମିଗ୍‌-୨୧ ଲଢୁଆ ବିମାନର ଉଡ଼ାଣରେ କଟକଣା ଲଗାଇ ଦେଇଛି। ଗତ ୮ ତାରିଖରେ ରାଜସ୍ଥାନ ହନୁମାନଗଡ଼ରେ ହୋଇଥିବା ଦୁର୍ଘଟଣା ପରେ ଏହି ନିଷ୍ପତ୍ତି ନିଆଯାଇଛି। ଏହି ଦୁର୍ଘଟଣାରେ ୩ ମହିଳାଙ୍କ ମୃତ୍ୟୁ ହୋଇଥିଲା। ଏହି ଦୁର୍ଘଟଣାର ଯାଞ୍ଚ ସମ୍ପୂର୍ଣ୍ଣ ନ ହେବା ପର୍ଯ୍ୟନ୍ତ ମିଗ୍‌-୨୧ ବିମାନ ଉଡ଼ାଣ କରିବ ନାହିଁ। ଏବେ ବାୟୁସେନାରେ ମିଗ୍‌-୨୧ ବିମାନର ୩ଟି ସ୍କ୍ବାଡ୍ରନ ରହିଛି। ପ୍ରତି ସ୍କ୍ବାଡ୍ରନରେ ୧୬ରୁ ୧୮ ଲଢୁଆ ବିମାନ ରହିଥାଏ। ଏହି ହିସାବରେ ଏବେ ପ୍ରାୟ ୫୦ ବିମାନ ସେବାରେ ଅଛି।

୨୦୨୫ ସୁଦ୍ଧା ଏହି ବିମାନକୁ ସେବାମୁକ୍ତ କରିବା ପାଇଁ ଲକ୍ଷ୍ୟ ରଖାଯାଇଥିଲା। ବାୟୁସେନା ପାଖରେ ମୋଟ ୩୧ କମ୍ବାଟ ସ୍କ୍ବାଡ୍ରନ ରହିଛି। ମିଗ୍‌-୨୧ ଏକକ ଇଞ୍ଜିନ ଏବଂ ସିଟ୍‌ ବିଶିଷ୍ଟ ଏକ ବହୁମୁଖୀ ଯୁଦ୍ଧ ବିମାନ। ଏହାକୁ ଇଣ୍ଟରସେପ୍ଟର ଏୟାରକ୍ରାଫ୍ଟ ଭାବେ ୧୯୬୩ ବାୟୁସେନାରେ ସାମିଲ କରାଯାଇଥିଲା। କିଛି ବର୍ଷ ପରେ ଏହାର ଆକ୍ରମଣ କ୍ଷମତା ବୃଦ୍ଧି କରାଯାଇଥିଲା। ଏହି ବିମାନ ବାରମ୍ବାର ଦୁର୍ଘଟଣାର ଶିକାର ହେଉଥିଲା। ସେଥିପାଇଁ ଏହାକୁ ଉଡ଼ନ୍ତା କଫିନ କୁହାଯାଉଥିଲା। କେବଳ ଗତ ୧୬ ମାସରେ ମିଗ୍‌-୨୧ ବିମାନ ୭ ଥର ଦୁର୍ଘଟଣାଗ୍ରସ୍ତ ହୋଇଥିଲା। ଏହାର ସୁରକ୍ଷା ରେକର୍ଡ ବହୁତ ଖରାପ। ତେଣୁ ବାୟୁସେନା ଏସ୍‌ୟୁ-୩୦ ଏବଂ ସ୍ବଦେଶୀ ହାଲୁକା ଲଢୁଆ ବିମାନ (ଏଲସିଏ) ଦ୍ବାରା ଏହାକୁ ବଦଳା ଯାଉଛି। ଏଥିରେ ବିଳମ୍ବ ହେବାରୁ ମିଗ୍‌ ଏ ପର୍ଯ୍ୟନ୍ତ କାର୍ଯ୍ୟକ୍ଷମ ରହିଛି।

୧୯୬୩ ପରେ ବାୟୁସେନାକୁ ବିଭିନ୍ନ ଶ୍ରେଣୀରେ ୮୭୨ଟି ମିଗ୍‌ ବିମାନ ମିଳିସାରିଛି। ତେବେ ଏଥିରୁ ୫୦୦ଟି ଦୁର୍ଘଟଣାର ଶିକାର ହୋଇଛି। ଦୁର୍ଘଟଣାରେ ୨୦୦ରୁ ଅଧିକ ପାଇଲଟ ଏବଂ ୫୬ ସାଧାରଣ ଲୋକଙ୍କ ଜୀବନ ଯାଇଛି। ରୁଷ୍‌ ଏବଂ ଚୀନ୍‌ ପରେ ଭାରତ ସର୍ବାଧିକ ମିଗ୍‌-୨୧ ବିମାନ ବ୍ୟବହାର କରୁଛି। ୧୯୬୪ରେ ଏହାକୁ ସୁପରସୋନିକ ଫାଇଟର ଜେଟ୍‌ ଭାବେ ବାୟୁସେନାରେ ସାମିଲ କରାଯାଇଥିଲା। ପ୍ରଥମେ ଏହି ବିମାନ ରୁଷ୍‌ରେ ନିର୍ମାଣ କରାଯାଉଥିଲା। ପରେ ଭାରତକୁ ଏହାର ଜ୍ଞାନକୌଶଳ ମିଳିଥିଲା। ଏହି ବିମାନ ୧୯୭୧ ଭାରତ-ପାକିସ୍ତାନ ଯୁଦ୍ଧ, ୧୯୯୯ କାରଗିଲ ଯୁଦ୍ଧ ସହିତ ବିଭିନ୍ନ ଅଭିଯାନରେ ଗୁରୁତ୍ବପୂର୍ଣ୍ଣ ଯୋଗଦାନ ଦେଇଥିଲା। ରୁଷ୍‌ ୧୯୮୫ରେ ବିମାନର ନିର୍ମାଣ ବନ୍ଦ କରିଦେଇଥିଲା। କିନ୍ତୁ ଭାରତ ଏହାକୁ ଉନ୍ନତ କରି ବ୍ୟବହାର କରୁଥିଲା।