ଗୁଜୁରାଟ ପୋଲିସର ସିଆଇଡି (CID) କ୍ରାଇମ ବ୍ରାଞ୍ଚ ଏକ ବଡ଼ ଅନ୍ତର୍ଜାତୀୟ ମାନବ ଚାଲାଣ ଏବଂ ସାଇବର ଠକେଇ ର୍ୟାକେଟର ପର୍ଦ୍ଦାଫାଶ କରିଛି। ବିଦେଶରେ ଉଚ୍ଚ ବେତନର ଚାକିରି ଲୋଭ ଦେଖାଇ ଭାରତୀୟ ଯୁବକମାନଙ୍କୁ ‘ସାଇବର ଦାସତ୍ୱ’ (Cyber Slavery) ପାଇଁ ବିକ୍ରି କରୁଥିବା ଅଭିଯୋଗରେ ପୋଲିସ ଦୁଇଜଣ ଏଜେଣ୍ଟଙ୍କୁ ଗିରଫ କରିଛି। ଏହି ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ପାଲଟିଛି।

କିଏ ଏହି ଦୁଇ ଅଭିଯୁକ୍ତ?

ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ କୌଶିକ ପେଥାନୀ (ଅମରେଲି) ଏବଂ ଧ୍ରୁବ ଡୋବାରିୟା (ସୁରତ)। ପୋଲିସ ସୂଚନା ଅନୁଯାୟୀ, କୌଶିକ ପେଥାନୀ ସାଇବର ଅପରାଧ ଜଗତରେ ‘ଅଲି ବାବା’ ନାମରେ ପରିଚିତ ଥିଲା। ଏମାନେ ମୁଖ୍ୟତଃ ଗୁଜୁରାଟ ଏବଂ ଭାରତର ଅନ୍ୟାନ୍ୟ ରାଜ୍ୟରୁ ବେକାର ଯୁବକମାନଙ୍କୁ ଟାର୍ଗେଟ କରୁଥିଲେ।

କିପରି ଚାଲୁଥିଲା ଠକେଇର ଜାଲ?

ଏହି ଦଲାଲମାନେ ସୋସିଆଲ ମିଡିଆ (ଯେପରିକି ହ୍ୱାଟ୍ସଆପ୍ ଏବଂ ଟେଲିଗ୍ରାମ) ଜରିଆରେ ଯୁବକମାନଙ୍କ ସହ ଯୋଗାଯୋଗ କରୁଥିଲେ। ସେମାନଙ୍କୁ କାମ୍ବୋଡିଆ, ମ୍ୟାନ୍ମାର ଏବଂ ଲାଓସ୍ ଭଳି ଦେଶରେ ‘ଡାଟା ଏଣ୍ଟ୍ରି’ କିମ୍ବା ଆଇଟି କମ୍ପାନୀରେ ଚାକିରି ଦେବା ନାଁରେ ପ୍ରଲୋଭିତ କରାଯାଉଥିଲା। ବିଶ୍ୱାସ ଜନ୍ମାଇବା ପାଇଁ ସେମାନେ ନକଲି ଇଣ୍ଟରଭ୍ୟୁ ଏବଂ ଟାଇପିଂ ଟେଷ୍ଟ ମଧ୍ୟ କରାଉଥିଲେ। ପ୍ରତ୍ୟେକ ଯୁବକଙ୍କଠାରୁ ବିଦେଶ ପଠାଇବା ପାଇଁ ୭୦ ହଜାରରୁ ୧.୫ ଲକ୍ଷ ଟଙ୍କା ପର୍ଯ୍ୟନ୍ତ ଆଦାୟ କରାଯାଉଥିଲା।

ବିଦେଶ ମାଟିରେ ନର୍କ ଯନ୍ତ୍ରଣା

ଥରେ ଯୁବକମାନେ ବିଦେଶରେ ପହଞ୍ଚିବା ପରେ ସେମାନଙ୍କ ପାସପୋର୍ଟ ଏବଂ ମୋବାଇଲ୍ ଛଡ଼ାଇ ନିଆଯାଉଥିଲା। ସେମାନଙ୍କୁ ଏକ ବନ୍ଦ କୋଠରୀରେ ରଖି ଚୀନ ସାଇବର ମାଫିଆଙ୍କ ନିର୍ଦ୍ଦେଶରେ ସାଇବର ଠକେଇ କରିବାକୁ ବାଧ୍ୟ କରାଯାଉଥିଲା। ଯଦି କେହି ଏହି ଅପରାଧ କରିବାକୁ ମନା କରୁଥିଲେ, ତେବେ ସେମାନଙ୍କୁ ଶାରୀରିକ ଏବଂ ମାନସିକ ନିର୍ଯାତନା ଦିଆଯାଉଥିଲା। ଏହି ଯୁବକମାନଙ୍କୁ ବ୍ୟବହାର କରି ଭାରତୀୟ ନାଗରିକଙ୍କ ସହ କ୍ରିପ୍ଟୋକରେନ୍ସି ଠକେଇ ଏବଂ ଡିଜିଟାଲ ଆରେଷ୍ଟ ଭଳି ଅପରାଧ କରାଯାଉଥିଲା।

ପୋଲିସର କାର୍ଯ୍ୟାନୁଷ୍ଠାନ

ଗୁଜୁରାଟ ସାଇବର ସେଣ୍ଟର ଅଫ୍ ଏକ୍ସିଲେନ୍ସର ଏସପି ବିବେକ ଭେଡା କହିଛନ୍ତି ଯେ, ଗୁଇନ୍ଦା ସୂଚନା ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି ର୍ୟାକେଟର ଚେର ଆହୁରି ଗଭୀରକୁ ଯାଇଥିବା ଆଶଙ୍କା କରାଯାଉଛି ଏବଂ ଅନ୍ୟ ଅଭିଯୁକ୍ତମାନଙ୍କୁ ଧରିବା ପାଇଁ ତଦନ୍ତ ଜାରି ରହିଛି। ପୋଲିସ ଜନସାଧାରଣଙ୍କୁ ସତର୍କ କରାଇ କହିଛି ଯେ, ବିଦେଶରେ ଚାକିରି ନାଁରେ ଆସୁଥିବା ଏଭଳି ପ୍ରଲୋଭନରୁ ଦୂରେଇ ରୁହନ୍ତୁ।

ନୂଆଦିଲ୍ଲୀ: ବାଂଲାଦେଶ ଓ ମିଆଁମାର ଉପକୂଳରେ ଅତ୍ୟନ୍ତ ଭୀଷଣ ସାମୁଦ୍ରିକ ଝଡ ମୋକାର ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଛି । ମୋକାର ପ୍ରଭାବରେ ବାଂଲାଦେଶ ଓ ମିଆଁମାର ସୀମାରେ ପ୍ରବଳ ବର୍ଷା ସାଙ୍ଗକୁ ଘଣ୍ଟା ପ୍ରତି ୧୯୦ରୁ ୨୦୦ କିମି ବେଗରେ ପବନ ବହିବାରେ ଲାଗିଛି। ବେଳେବେଳେ ପବନର ବେଗ ୨୨୦ ମଧ୍ୟ ଛୁଇଁଥିବା ଢାକା ଟ୍ରିବ୍ୟୁନରେ ରିପୋର୍ଟ ପ୍ରକାଶ ପାଇଛି। ବାଂଲାଦେଶର କକ୍ସବଜାର, ଚଟ୍ଟଗ୍ରାମ ଓ ପାୟରା ବନ୍ଦରରେ ଆଲର୍ଟ ଜାରି କରାଯାଇଛି। ଗତ ଦୁଇ ଦଶନ୍ଧି ଭିତରେ ମୋକା ସବୁଠୁ ଶକ୍ତିଶାଳୀ ବାତ୍ୟା ଭାବେ ବାଂଲାଦେଶ ଉପକୂଳରେ ଲ୍ୟାଣ୍ଡଫଲ୍ କରିଛି। ବାତ୍ୟାକୁ ଦୃଷ୍ଟିରେ ରଖି ବିମାନ ବାତିଲ କରାଯାଇଥିବା ବେଳେ ଉପକୂଳରେ ରହୁଥିବା ଲୋକଙ୍କୁ ସ୍ଥାନାନ୍ତର କରାଯାଇଛି। ସମୁଦ୍ର ଭିତରେ ବଳ ଗୋଟାଇ ଅତ୍ୟନ୍ତ ଭୀଷଣ ସାମୁଦ୍ରିକ ଝଡ ବର୍ଷା ଓ ଭୟଙ୍କର ପବନକୁ ସାଙ୍ଗରେ ଧରି ଉପକୂଳ ଆଡକୁ ବଢୁଛି ।

ଦକ୍ଷିଣ ପୂର୍ବାଞ୍ଚଳରେ ପ୍ରାୟ ୫ ଲକ୍ଷ ଲୋକଙ୍କୁ ସ୍ଥାନାନ୍ତରିତ କରାଯାଉଛି । ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନା ସ୍ଥିତି ସମୀକ୍ଷା କରିବା ସହ ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବା ଲାଗି ନିର୍ଦ୍ଦେଶ ଦେଇଛନ୍ତି । କକ୍ସ ବଜାର ଅଞ୍ଚଳ ସବୁଠାରୁ ଅଧିକ କ୍ଷତିଗ୍ରସ୍ତ ହେବା ଆଶଙ୍କା ଥିବାରୁ ସେଠାରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ କରାଯାଇଠି। ସେଠାରେ ୧୦ ନମ୍ବର ବିପଦ ସଙ୍କେତ ଜାରି କରାଯାଇଛି । କକ୍ସ ବଜାର ଅଞ୍ଚଳରେ ପ୍ରାୟ ୧୦ ଲକ୍ଷ ରୋହିଂଗ୍ୟା ଶରଣାର୍ଥୀ ରହୁଥିବାରୁ ସେଠାରେ ସ୍ଥିତି ଅଧିକ ବିପର୍ଯ୍ୟସ୍ତ ହେବା ଆଶଙ୍କା କରାଯାଉଛି । ୮ ହଜାର ୬୦୦ ରେଡ କ୍ରିସେଣ୍ଟ ସ୍ବେଚ୍ଛାସେବୀ ବିଭିନ୍ନ ସ୍ଥାନରେ ନିୟୋଜିତ ହୋଇଥିବାବେଳେ ଅନ୍ୟାନ୍ୟ ବାହିନୀକୁ ମୁତୟନ କରାଯାଇଛି । ବାତ୍ୟା ଯୋଗୁ ୮ ରୁ ୧୨ ଫୁଟର ଜୁଆର ଆସିବା ଆଶଙ୍କା କରାଯାଉଛି ।

ନୂଆଦିଲ୍ଲୀ: ଭାରତରେ ପେଟ୍ରୋଲର ଉଚ୍ଚ ଦରକୁ ନେଇ ବେଶ ହୋ ହଲ୍ଲା ହେଉଥିବାବେଳେ ପଡୋଶୀ ରାଷ୍ଟ୍ରରୁ ଭାରତକୁ ଶସ୍ତା ପେଟ୍ରୋଲ ଚାଲାଣ ଜୋରସୋର ବଢ଼ିଯାଇଛି। ଏମିତିକି ପଡୋଶୀ ଦେଶ ମିଆଁମାରରୁ ମଣିପୁରକୁ ଆସୁଛି ମାତ୍ର ୭୦ ଟଙ୍କାରେ ପେଟ୍ରୋଲ । ଆହୁରିମଧ୍ୟ ସେଠାରୁ ମଣିପୁରକୁ ମାତ୍ର ୩୫ ,୦୦୦ ଟଙ୍କାରେ ସ୍କୁଟର ଆସୁଛି। ମିଆଁମାର ପାଇଁ ପାସପୋର୍ଟର ଆବଶ୍ୟକତା ନ ଥିବାବେଳେ ଏଭଳି ଶସ୍ତା ଚାଲାଣ ଖାଉଟିଙ୍କୁ ବେଶ ସୁହାଉଛି।

ମିଆଁମାର ସହିତ ୩୯୮ କିଲୋମିଟର ସୀମା ବାଣ୍ଟୁଥିବା ମଣିପୁରର ମୋରେହ ସହର ମିଆଁମାରଠାରୁ ମାତ୍ର ୫୦ ମିଟର ଦୂରରେ ଅବସ୍ଥିତ। ଏଠାରେ ମିଆଁମାରରେ ରହୁଥିବା ଲୋକଙ୍କୁ ଗୋଟିଏ ପଟେ ଏବଂ ଅନ୍ୟ ପଟେ ଭାରତୀୟ ଲୋକଙ୍କୁ ଦେଖିବାକୁ ମିଳେ । କୁକି, ମେଟିୟା, ବିହାରୀ, ତାମିଲ, ମାରୱାଡି ଏବଂ ନେପାଳୀ ମୋରେହରେ ରୁହନ୍ତି । ଏଠାରେ ଭାରତ-ମିଆଁମାର ଫ୍ରେଣ୍ଡସିପ୍ ଗେଟ୍ ନିର୍ମାଣ କରାଯାଇଛି, ଯାହା ମାଧ୍ୟମରେ ମିଆଁମାରର ଲୋକମାନେ କୌଣସି ପାସପୋର୍ଟ କିମ୍ବା ଭିସା ବିନା ଏହି ସହରକୁ ଆସିପାରିବେ ଏବଂ ଏଠାରୁ ଲୋକମାନେ ମିଆଁମାର ଯାଇପାରିବେ ।

ତେବେ କରୋନା କାରଣରୁ ଏହି ଫାଟକ ପ୍ରାୟ ଦୁଇ ବର୍ଷ ଧରି ବନ୍ଦ ରହିଛି। ଏହି ଫାଟକ ବ୍ୟତୀତ ସହରର ଏକ ନିଜସ୍ବ ସେତୁ ମଧ୍ୟ ରହିଛି, ଯେଉଁଠାକୁ ଉଭୟ ଦେଶର ଲୋକମାନେ ଆସନ୍ତି ଏବଂ ଯାଆନ୍ତି। ସେତୁ ଏବେ ବି ବନ୍ଦ ରହିଛି । ମୋରେହ ସହରର ଲୋକମାନେ ଶସ୍ତା ଜିନିଷ କିଣିବା ପାଇଁ ମିଆଁମାରକୁ ଯାଇଥାନ୍ତି। ମୋରେହ ଟାଉନର ଲୋକମାନେ ମିଆଁମାରକୁ ଶସ୍ତା ସାମଗ୍ରୀ କିଣିବାକୁ ଯାଆନ୍ତି, କାରଣ ୭୦,୦୦୦ ରୁ ୮୦,୦୦୦ ଟଙ୍କାରେ ଭାରତରେ ଆସୁଥିବା ସ୍କୁଟର ମିଆଁମାରରେ ୩୫,୦୦୦ ରୁ ୪୦,୦୦୦ ଟଙ୍କାରେ ଉପଲବ୍ଧ। ସେହିଭଳି ପେଟ୍ରୋଲ ଯାହା ଭାରତରେ ଲିଟର ପିଛା ୧୦୦ରୁ ୧୧୦ ଟଙ୍କା ପର୍ଯ୍ୟନ୍ତ, ମିଆଁମାରରେ ସମାନ ପେଟ୍ରୋଲ ଲିଟର ପିଛା ୭୦ରୁ ୮୦ଟଙ୍କାରେ ଉପଲବ୍ଧ। ସ୍କୁଟର ବ୍ୟତୀତ ସେଠାରେ ଫଳ ଏବଂ ପୋଷାକପତ୍ର ମଧ୍ୟ ଶସ୍ତା ମୂଲ୍ୟରେ ମିଳିଥାଏ ।

ଚେକ୍ ପୋଷ୍ଟରେ ପୋଷ୍ଟ ହୋଇଥିବା ଆସାମ ରାଇଫଲ୍ସ ଅଧିକାରୀ କହିଛନ୍ତି ଯେ, ମିଆଁମାରର ଲୋକମାନେ ମୋରେହକୁ ଆସିଥାନ୍ତି, କିନ୍ତୁ ସେଠାରୁ ଆସୁଥିବା ଗାଡିଗୁଡିକ କଡା ଯାଞ୍ଚ କରାଯାଇଥାଏ ଏବଂ ଡକ୍ୟୁମେଣ୍ଟ ମଧ୍ୟ ଯାଞ୍ଚ କରାଯାଇଥାଏ। ଏଠାରେ ମଧ୍ୟ ଅପରାହ୍ନ ୪ଟା ପରେ ପ୍ରବେଶ ବନ୍ଦ ହୋଇଯାଏ ।

ନ୍ୟାପିତ: ମ୍ୟାଁମାରରେ ସେନାର କ୍ଷମତା ଦଖଲକୁ ବିରୋଧ କରି ଜାରି ରହିଥିବା ବିକ୍ଷୋଭ ପ୍ରଦର୍ଶନରେ ୫୦୦ରୁ ଅଧିକ ଗଣତନ୍ତ୍ର ସପକ୍ଷବାଦୀ ଲୋକଙ୍କ ମୃତ୍ୟୁ ହେଲାଣି ବୋଲି ଏକ ଅନୁଧ୍ୟାନକାରୀ ସଂଗଠନ ପକ୍ଷରୁ କୁହାଯାଇଛି। ଏହାର ରିପୋର୍ଟ ଅନୁଯାୟୀ ସୋମବାର ସୁରକ୍ଷା ବାହିନୀର ଗୁଳିରେ ୧୪ ଜଣ ଲୋକଙ୍କ ମୃତ୍ୟୁ ହୋଇଛି। ଏହା ସହିତ ସାରା ଦେଶରେ ମୃତ୍ୟୁ ସଂଖ୍ୟା ୫୧୦ରେ ପହଞ୍ଚିଛି। ସମାଚାର ଏଜେନ୍ସି ରଏଟର୍ସ ଅନୁଯାୟୀ ଏବେ ଲୋକେ ରାସ୍ତାକୁ କାଦୁଅ ଫିଙ୍ଗି ଆଇନ ଅମାନ୍ୟ ଆନ୍ଦୋଳନ କରୁଛନ୍ତି। ଅପରପକ୍ଷେ ମ୍ୟାଁମାର ସ୍ଥିତି ଅନ୍ତର୍ଜାତୀୟ ସମୁଦାୟକୁ ଚିନ୍ତିତ କରିଛି। ଏହା ପୂର୍ବରୁ ମାର୍ଚ୍ଚ ୨୭ରେ ଗୋଟିଏ ଦିନରେ ୧୧୦ ଲୋକଙ୍କ ମୃତ୍ୟୁ ହୋଇଥିଲା। ୟୁରୋପୀୟ ସଂଘ ଏହାକୁ ‘ଆତଙ୍କର ଦିନ’ ବୋଲି କହିଥିଲା।