ମହାରାଷ୍ଟ୍ରର ପୂର୍ବତନ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିମାନ ଦୁର୍ଘଟଣା ମାମଲା ଏବେ ଏକ ନୂଆ ମୋଡ଼ ନେଇଛି। ବାରାମତୀରେ ଘଟିଥିବା ଏହି ଭୟଙ୍କର ଦୁର୍ଘଟଣାକୁ କିଛି ଦିନ ବିତିଯାଇଥିଲେ ମଧ୍ୟ ଏହା ପଛର ପ୍ରକୃତ କାରଣ ଏବେ ବି ଅସ୍ପଷ୍ଟ ରହିଛି। ଏହାରି ମଧ୍ୟରେ ଅଜିତ ପାୱାରଙ୍କ ପୁଅ ଜୟ ପାୱାର ଏବଂ ପୁତୁରା ତଥା ବିଧାୟକ ରୋହିତ ପାୱାର ଦୁର୍ଘଟଣାକୁ ନେଇ ଗୁରୁତର ପ୍ରଶ୍ନ ଉଠାଇଛନ୍ତି। ବିଶେଷକରି ବିମାନର 'ବ୍ଲାକ୍ ବକ୍ସ' ନଷ୍ଟ ହେବା ଖବରକୁ ନେଇ ସନ୍ଦେହ ପ୍ରକାଶ ପାଇଛି।

ବ୍ଲାକ୍ ବକ୍ସକୁ ନେଇ ରହସ୍ୟ

ବିମାନ ଦୁର୍ଘଟଣାର ପ୍ରକୃତ କାରଣ ଜାଣିବା ପାଇଁ ବ୍ଲାକ୍ ବକ୍ସ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରମାଣ ହୋଇଥାଏ। ତେବେ ତଦନ୍ତକାରୀ ସଂସ୍ଥା ଅନୁଯାୟୀ, ନିଆଁ ଲାଗିବା କାରଣରୁ ଏହି ବ୍ଲାକ୍ ବକ୍ସଟି କ୍ଷତିଗ୍ରସ୍ତ ହୋଇଛି। କିନ୍ତୁ ଜୟ ପାୱାର ଏହି ଦାବିକୁ ଖଣ୍ଡନ କରିଛନ୍ତି। ସେ କହିଛନ୍ତି ଯେ, ବ୍ଲାକ୍ ବକ୍ସଗୁଡ଼ିକୁ ଏଭଳି ଭାବେ ତିଆରି କରାଯାଇଥାଏ ଯେ ତାହା ଭୟଙ୍କର ଦୁର୍ଘଟଣାରେ ମଧ୍ୟ ସୁରକ୍ଷିତ ରହିପାରିବ। ତେଣୁ ଏହା କିପରି ନଷ୍ଟ ହେଲା, ତାହା ଏକ ବଡ଼ ଷଡଯନ୍ତ୍ରର ଇଙ୍ଗିତ ଦେଉଛି। ଏହା ପଛରେ କିଛି ରହସ୍ୟ ଲୁଚି ରହିଥିବା ସେ ଆଶଙ୍କା ପ୍ରକାଶ କରିଛନ୍ତି।

ସିବିଆଇ (CBI) ତଦନ୍ତ ଦାବି

ଦୁର୍ଘଟଣାର ସତ୍ୟାସତ୍ୟ ପଦାକୁ ଆଣିବା ପାଇଁ ପାୱାର ପରିବାର ପକ୍ଷରୁ ସିବିଆଇ ତଦନ୍ତ ଦାବି ଜୋରଦାର ହୋଇଛି। ବର୍ତ୍ତମାନର ଉପମୁଖ୍ୟମନ୍ତ୍ରୀ ତଥା ଅଜିତଙ୍କ ପତ୍ନୀ ସୁନେତ୍ରା ପାୱାର ଏବଂ ଏନସିପି ନେତାମାନେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କୁ ଭେଟି ଏହି ଘଟଣାର ଉଚ୍ଚସ୍ତରୀୟ ତଦନ୍ତ ଦାବି କରିଛନ୍ତି। ମୁଖ୍ୟମନ୍ତ୍ରୀ ମଧ୍ୟ ଏହି ମାମଲାର ଗମ୍ଭୀରତାକୁ ଦୃଷ୍ଟିରେ ରଖି କେନ୍ଦ୍ର ଗୃହମନ୍ତ୍ରୀଙ୍କୁ ଚିଠି ଲେଖି ସିବିଆଇ ତଦନ୍ତ ପାଇଁ ସୁପାରିଶ କରିବେ ବୋଲି ପ୍ରତିଶ୍ରୁତି ଦେଇଛନ୍ତି।

ଷଡଯନ୍ତ୍ରର ଆଶଙ୍କା

ଅନ୍ୟପକ୍ଷରେ, ରୋହିତ ପାୱାର ଆରମ୍ଭରୁ ଏହାକୁ ଏକ ସାଧାରଣ ଦୁର୍ଘଟଣା ନୁହେଁ ବରଂ ଏକ ସୁଚିନ୍ତିତ 'ଷଡଯନ୍ତ୍ର' ବୋଲି ଅଭିଯୋଗ କରିଆସୁଛନ୍ତି। ବିମାନ ଚଳାଚଳ କରୁଥିବା କମ୍ପାନୀ 'ଭିଏସଆର ଭେଞ୍ଚର୍ସ' (VSR Ventures) ର ଭୂମିକା ଉପରେ ସେ ପ୍ରଶ୍ନ ଉଠାଇଛନ୍ତି ଏବଂ କମ୍ପାନୀ ଉପରେ ପ୍ରତିବନ୍ଧକ ଲଗାଇବାକୁ ଦାବି କରିଛନ୍ତି। ପାଇଲଟଙ୍କ ପରିବର୍ତ୍ତନ ଏବଂ ଯାନ୍ତ୍ରିକ ତ୍ରୁଟିକୁ ନେଇ ମଧ୍ୟ ଅନେକ ଅସମାହିତ ପ୍ରଶ୍ନ ଉଙ୍କି ମାରୁଛି। ପରିବାରର ଏହି ଦାବି ପରେ ମହାରାଷ୍ଟ୍ର ରାଜନୀତିରେ ହଲଚଲ ସୃଷ୍ଟି ହୋଇଛି।

ମହାରାଷ୍ଟ୍ର: ମହାରାଷ୍ଟ୍ର ଉପ-ମୁଖ୍ୟମନ୍ତ୍ରୀ ଭାବେ ଶପଥ ନେଲେ ସୁନେତ୍ରା ପାୱାର । ଦିବଂଗତ ଅଜିତ ପାୱାରଙ୍କ ପତ୍ନୀ ସୁନେତ୍ରା ପାୱାର ମହାରାଷ୍ଟ୍ରର ଉପ-ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ମହାରାଷ୍ଟ୍ରର ପ୍ରଥମ ମହିଳା ଉପମୁଖ୍ୟମନ୍ତ୍ରୀ ଭାବେ ସେ ଶପଥ ନେଇଛନ୍ତି । ସେ ରାଜ୍ୟ ଇତିହାସରେ ଏହି ପଦବୀ ଅଳଙ୍କୃତ କରିଥିବା ପ୍ରଥମ ମହିଳା ହୋଇପାରିଛନ୍ତି। ନିଜ ସ୍ୱାମୀ ତଥା ପୂର୍ବତନ ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିୟୋଗର ମାତ୍ର ତିନି ଦିନ ପରେ ସେ ଏହି ଗୁରୁଦାୟିତ୍ୱ ଗ୍ରହଣ କରିଛନ୍ତି। ସୂଚନାଯୋଗ୍ୟ ଯେ, ଗତ ଜାନୁଆରୀ ୨୮ ତାରିଖରେ ଏକ ବିମାନ ଦୁର୍ଘଟଣାରେ ଅଜିତ ପାୱାରଙ୍କର ଦେହାନ୍ତ ହୋଇଥିଲା।

ମୁମ୍ବାଇର ଲୋକ ଭବନରେ ଆୟୋଜିତ ଏକ ଗମ୍ଭୀର କାର୍ଯ୍ୟକ୍ରମରେ ରାଜ୍ୟପାଳ ଆଚାର୍ଯ୍ୟ ଦେବବ୍ରତ ସୁନେତ୍ରା ପାୱାରଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଏହି ସମାରୋହରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍  ଏବଂ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଉପସ୍ଥିତ ରହିଥିଲେ। ଏନସିପିର ସହଯୋଗୀ ଦଳର ଏହି ଶୀର୍ଷ ନେତାମାନେ ସୁନେତ୍ରାଙ୍କୁ ଶୁଭେଚ୍ଛା ଜଣାଇବା ସହ ସମର୍ଥନ ପ୍ରକାଶ କରିଥିଲେ।

୬୨ ବର୍ଷୀୟା ସୁନେତ୍ରା ପାୱାର ୨୦୨୪ ଲୋକସଭା ନିର୍ବାଚନ ପର୍ଯ୍ୟନ୍ତ ରାଜନୀତିରେ ସକ୍ରିୟ ଥିଲେ ମଧ୍ୟ ପ୍ରତ୍ୟକ୍ଷ ଭାବେ ସାମ୍ନାକୁ ଆସିନଥିଲେ। ୨୦୨୪ରେ ସେ ବାରାମତୀ ଆସନରୁ ନିଜର ନଣନ୍ଦ ତଥା ଏନସିପି (ଏସପି) ସାଂସଦ ସୁପ୍ରିୟା ସୁଲେଙ୍କ ବିପକ୍ଷରେ ପ୍ରାର୍ଥୀ ହୋଇଥିଲେ, କିନ୍ତୁ ପରାଜିତ ହୋଇଥିଲେ। ପରେ ତାଙ୍କୁ ରାଜ୍ୟସଭାକୁ ମନୋନୀତ କରାଯାଇଥିଲା। 

ଶପଥ ଗ୍ରହଣ ପୂର୍ବରୁ ଏନସିପିର ବରିଷ୍ଠ ନେତାମାନେ ଯଥା ପ୍ରଫୁଲ୍ଲ ପଟେଲ, ସୁନୀଲ ତଟକରେ ଏବଂ ଛଗନ ଭୁଜବଳ ମୁଖ୍ୟମନ୍ତ୍ରୀଙ୍କ ବାସଭବନ 'ବର୍ଷା'ରେ ପହଞ୍ଚିଥିଲେ। ସେଠାରେ ସେମାନେ ସୁନେତ୍ରା ପାୱାରଙ୍କୁ ବିଧାୟକ ଦଳର ନେତା ଭାବେ ନିର୍ବାଚିତ କରାଯାଇଥିବା ନେଇ ଏକ ଚିଠି ମୁଖ୍ୟମନ୍ତ୍ରୀଙ୍କୁ ହସ୍ତାନ୍ତର କରିଥିଲେ। ମୁଖ୍ୟମନ୍ତ୍ରୀ ଫଡନାଭିସ୍ ଏହି ସୁପାରିଶ ପତ୍ରକୁ ରାଜ୍ୟପାଳଙ୍କ ନିକଟକୁ ପଠାଇବା ପରେ ଶପଥ ଗ୍ରହଣ ପାଇଁ ବାଟ ଫିଟିଥିଲା।

ମହାରାଷ୍ଟ୍ର: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଅକାଳ ବିୟୋଗ ରାଜ୍ୟ ରାଜନୀତି ତଥା ନ୍ୟାସନାଲିଷ୍ଟ କଂଗ୍ରେସ ପାର୍ଟି (NCP) ପାଇଁ ଏକ ଅପୂରଣୀୟ କ୍ଷତି। ୨୦୨୩ ମସିହାରେ ଦଳ ବିଭାଜନ ପରେ, ଅଜିତ ପାୱାର ଏବଂ ଶରଦ ପାୱାରଙ୍କ ଗୋଷ୍ଠୀ ପୁନର୍ବାର ଏକାଠି ହେବା ପାଇଁ ଲଗାତାର ଆଲୋଚନା ଚଳାଇଥିଲେ। କିନ୍ତୁ ଅଜିତଙ୍କ ହଠାତ୍ ଦେହାନ୍ତ ଏହି ମିଶ୍ରଣ ପ୍ରକ୍ରିୟା ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।

ରିପୋର୍ଟ ଅନୁଯାୟୀ, ଉଭୟ ଗୋଷ୍ଠୀ ମଧ୍ୟରେ ମିଶ୍ରଣ ଆଲୋଚନା ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଥିଲା। ଜିଲ୍ଲା ପରିଷଦ ନିର୍ବାଚନ ଫଳାଫଳ ପରେ, ଆସନ୍ତା ଫେବୃଆରୀ ୮ ତାରିଖରେ ଉଭୟ ନେତା ଏନେଇ ଆନୁଷ୍ଠାନିକ ଘୋଷଣା କରିବାର ସମ୍ଭାବନା ଥିଲା। ଏହି ମିଶ୍ରଣକୁ ସଫଳ କରିବା ପାଇଁ ଅଜିତ ପାୱାର ଏକ ଗୁରୁତ୍ୱପୂର୍ଣ୍ଣ ମଧ୍ୟସ୍ଥ ଭୂମିକା ଗ୍ରହଣ କରିଥିଲେ।

ଏହି ମିଶ୍ରଣ ମାଧ୍ୟମରେ ଶରଦ ପାୱାରଙ୍କ ନେତୃତ୍ୱାଧୀନ ଏନସିପି ଗୋଷ୍ଠୀ ମହାରାଷ୍ଟ୍ର ସରକାରରେ ସାମିଲ ହେବାର ବାଟ ଫିଟିଥାନ୍ତା। ବର୍ତ୍ତମାନ ଅଜିତଙ୍କ ଗୋଷ୍ଠୀ ଶାସକ 'ମହାୟୁତି' ମେଣ୍ଟରେ ଥିବାବେଳେ ଶରଦଙ୍କ ଗୋଷ୍ଠୀ 'ମହା ବିକାଶ ଅଘାଡି' ସହ ରହିଛନ୍ତି। ଏନସିପି (SP)ର ବରିଷ୍ଠ ନେତା ଜୟନ୍ତ ପାଟିଲ ଏବଂ ଶଶିକାନ୍ତ ସିନ୍ଦେ ସ୍ୱୀକାର କରିଛନ୍ତି ଯେ, କ୍ୟାବିନେଟ୍ ଅଦଳବଦଳ ଏବଂ ନୂତନ ସଦସ୍ୟଙ୍କ ଅନ୍ତର୍ଭୁକ୍ତିକରଣ ନେଇ ଅନୌପଚାରିକ ଆଲୋଚନା ମଧ୍ୟ ହୋଇସାରିଥିଲା।

ଅଜିତ ପାୱାରଙ୍କ ଅବର୍ତ୍ତମାନରେ ତାଙ୍କ ପତ୍ନୀ ତଥା ରାଜ୍ୟସଭା ସାଂସଦ ସୁନେତ୍ରା ପାୱାରଙ୍କୁ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ପଦ ମିଳିପାରେ ବୋଲି ଚର୍ଚ୍ଚା ଜୋର ଧରିଛି। ଅନ୍ୟପକ୍ଷରେ, ଦଳର ପରିଚାଳନା ପାଇଁ ବରିଷ୍ଠ ନେତା ପ୍ରଫୁଲ୍ଲ ପଟେଲଙ୍କୁ ଅନ୍ତରୀଣ ଅଧ୍ୟକ୍ଷ ଭାବରେ ଦାୟିତ୍ୱ ଦିଆଯାଇପାରେ।

ମହାରାଷ୍ଟ୍ର: ମହାରାଷ୍ଟ୍ରର ବାରାମତୀ ନିକଟରେ ଘଟିଥିବା ଭୟାବହ ବିମାନ ଦୁର୍ଘଟଣାର ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରାଯାଇଛି। ଜାନୁଆରୀ ୨୮ତାରିଖରେ ଘଟିଥିବା ଏହି ଦୁଃଖଦ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ଅନ୍ୟ ୪ ଜଣଙ୍କର ପ୍ରାଣହାନୀ ଘଟିଥିଲା। ବେସାମରିକ ବିମାନ ଚଳାଚଳ ମନ୍ତ୍ରାଳୟ ଗୁରୁବାର ସ୍ପଷ୍ଟ କରିଛି ଯେ ଦୁର୍ଘଟଣାଗ୍ରସ୍ତ ବିମାନର ‘ବ୍ଲାକ୍ ବକ୍ସ’କୁ ସଫଳତାର ସହ ଉଦ୍ଧାର କରାଯାଇଛି, ଯାହା ଦୁର୍ଘଟଣାର କାରଣ ଜାଣିବାରେ ମୁଖ୍ୟ ଭୂମିକା ଗ୍ରହଣ କରିବ।

ମନ୍ତ୍ରାଳୟର ସୂଚନା ଅନୁଯାୟୀ, ଦୁର୍ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ଏୟାରକ୍ରାଫ୍ଟ ଆକ୍ସିଡେଣ୍ଟ ଇନଭେଷ୍ଟିଗେସନ୍ ବ୍ୟୁରୋ (AAIB) ର ତିନିଜଣିଆ ଟିମ୍ ଏବଂ ଡିଜିସିଏ (DGCA) ର ଅନ୍ୟ ଏକ ଟିମ୍ ଜାନୁଆରୀ ୨୮ ତାରିଖରେ ହିଁ ଘଟଣାସ୍ଥଳରେ ପହଞ୍ଚିଥିଲେ। AAIB ର ମହାନିର୍ଦ୍ଦେଶକ ମଧ୍ୟ ସେହିଦିନ ଘଟଣାସ୍ଥଳ ପରିଦର୍ଶନ କରିଥିଲେ। ଉଦ୍ଧାର ହୋଇଥିବା ବ୍ଲାକ୍ ବକ୍ସରୁ ବିମାନର ଉଡାଣ ସମ୍ବନ୍ଧୀୟ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବ ବୋଲି ଆଶା କରାଯାଉଛି।

ଉଲ୍ଲେଖଯୋଗ୍ୟ ଯେ, ବୋମ୍ବାଡିୟର୍ ଲିୟରଜେଟ୍ ୪୫ (Bombardier Learjet 45) ନାମକ ଏହି ବିମାନଟି ବାରାମତୀ ଏୟାରଷ୍ଟ୍ରିପରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ମନ୍ତ୍ରାଳୟ ସୋସିଆଲ ମିଡିଆରେ ସୂଚନା ଦେଇ କହିଛି ଯେ, “AAIB ନିୟମାବଳୀ, ୨୦୨୫ର ନିୟମ ୫ ଏବଂ ୧୧ ଅନୁଯାୟୀ ତଦନ୍ତ ଆରମ୍ଭ କରାଯାଇଛି। ଏକ ନିର୍ଦ୍ଦିଷ୍ଟ ସମୟସୀମା ମଧ୍ୟରେ ସ୍ୱଚ୍ଛ ଏବଂ ନିରପେକ୍ଷ ତଦନ୍ତ ଶେଷ କରିବା ଆମର ପ୍ରାଥମିକତା।”

ମହାରାଷ୍ଟ୍ର: ପଞ୍ଚଭୂତରେ ବିଲୀନ ହେଲେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର। ରାଷ୍ଟ୍ରୀୟ ମର୍ଯ୍ୟାଦାର ସହ ଅଜିତ ପାୱାରଙ୍କ ଶେଷକୃତ୍ୟ ସମ୍ପନ୍ନ ହୋଇଛି । ଦିନ ୧୧ଟା ସମୟରେ ଅଜିତ ପାୱାରଙ୍କ ରାଜନୈତିକ ଗଡ଼ ବାରାମତିର ବିଦ୍ୟା ପ୍ରତିଷ୍ଠାନ ଶ୍ମଶାନରେ ତାଙ୍କ ଅନ୍ତିମ ସଂସ୍କାର କରାଯାଇଛି । ଦୁଇ ପୁଅ ପାର୍ଥ, ଜୟ ଦେଇଛନ୍ତି ମୁଖାଗ୍ନି । ଶେଷକୃତ୍ୟ ସମୟରେ ବାରାମତି ପାଲଟିଥିଲା ଜନସମୁଦ୍ର । ଅଜିତ ଦାଦାଙ୍କୁ ହରାଇ ଝୁରୁଛନ୍ତି ସମର୍ଥକ । ୬୬ ବର୍ଷ ବୟସରେ ତାଙ୍କ ଅକାଳ ବିୟୋଗକୁ ସହଜରେ ଗ୍ରହଣ କରିପାରୁନାହାନ୍ତି ତାଙ୍କ ଶୁଭେଚ୍ଛୁ ଓ ପ୍ରଶଂସକ । କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ବିଜେପି ସଭାପତି ନୀତିନ ନବୀନ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନଭିସ୍ ଏବଂ ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସମେତ ଅନେକ ବରିଷ୍ଠ ନେତା ଅନ୍ତିମ ସଂସ୍କାର ପାଇଁ ପହଞ୍ଚିଥିଲେ ।

ସୂଚନାଯୋଗ୍ୟ, ଗତକାଲି ଜାନୁଆରୀ ୨୮ ତାରିଖରେ ମହାରାଷ୍ଟ୍ରର ବାରାମତିରେ ଏକ ବିମାନ ଦୁର୍ଘଟଣାରେ ଉପମୁଖ୍ୟମନ୍ତ୍ରୀ ଅଜିତ୍ ପାୱାରଙ୍କ ହଠାତ୍ ମୃତ୍ୟୁ ହୋଇଥିଲା । ବିମାନଟି ଅବତରଣ କରିବାକୁ ଚେଷ୍ଟା କରୁଥିବା ସମୟରେ ଏହି ଦୁର୍ଘଟଣା ଘଟିଥିଲା, ଯେଉଁଥିରେ ଅଜିତ ପାୱାର, ପାଇଲଟ୍ କ୍ୟାପ୍ଟେନ୍ ସୁମିତ କପୁର, ସହ-ପାଇଲଟ୍ ଶାମ୍ଭବୀ ପାଠକ, ବିମାନ ପରିଚାରିକା ପିଙ୍କି ମାଲି ଏବଂ ବ୍ୟକ୍ତିଗତ ସୁରକ୍ଷା ଅଧିକାରୀ ବିଦୀପ ଯାଦବଙ୍କ ମୃତ୍ୟୁ ହୋଇଥିଲା । ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଅଧୀନରେ କାର୍ଯ୍ୟ କରୁଥିବା AAIB ଦୁର୍ଘଟଣାର ତଦନ୍ତ କରୁଛି । 

ମୁମ୍ବଇ: ମହାରାଷ୍ଟ୍ର ଉପ- ମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିମାନ ଦୁର୍ଘଟଣାଗସ୍ତ ହେବା ନେଇ ବିଭିନ୍ନ ଆକଳନ କରାଯାଉଛି। ତେବେ ବିଶ୍ୱସ୍ତ ସୂତ୍ରରୁ ଜଣାଯାଇଛି ଯେ, କୁହୁଡ଼ି ଓ ଦୃଶ୍ୟମାନତା ହ୍ରାସ କାରଣରୁ ଏହି ଅଘଟଣ ଘଟିଛି। ପାୱାରଙ୍କୁ ନେଇ ଯାଉଥିବା ବିମାନଟି ତଳକୁ ଖସିବା ସମୟରେ ବା ଅବତରଣ କରିବାକୁ ଚେଷ୍ଟା କରୁଥିବା ବେଳେ ବାରାମତୀ ବିମାନବନ୍ଦରରେ ଘନ କୁହୁଡ଼ି ଓ ଦୃଶ୍ୟମାନ ଦୂରତା ବହୁତ କମ୍‌‌ ଥିଲା। ଭିଆରଏସ୍‌‌ ଭେନଚର୍ସ ଦ୍ୱାରା ପରିଚାଳିତ ବମ୍ବାର୍ଡିୟର ଲୟାରଜେଟ୍‌‌-୪୫ ବିମାନବନ୍ଦର ପରିସର ଭିତରେ ହିଁ ଦୁର୍ଘଟଣାଗସ୍ତ ହୋଇଥିଲା। ଏଥିରେ ବିମାନରେ ବସିଥିବା ସବୁ ୫ ଜଣଙ୍କର ମୃତ୍ୟୁ ହୋଇଥିଲା। ପ୍ରଚଣ୍ଡ ଧକ୍କା ଓ ନିଆଁ କାରଣରୁ ସମ୍ପୂର୍ଣ୍ଣ ଜେଟ୍‌‌ଟି ନଷ୍ଟ ହୋଇଯାଇଥିଲା। ଅବତରଣ କରିବା ପୂର୍ବରୁ ବିମାନ ଆକାଶରେ ଘୂରି ବୁଲିଥିଲା। ବିମାନ ମୁମ୍ବଇର ଛତ୍ରପତି ଶିବାଜୀ ଇଣ୍ଟରନ୍ୟାସନାଲ ବିମାନବନ୍ଦରରୁ ସକଳା ୮.୧୦ରୁ ବାହରିଥିଲା ଓ ୮.୪୫ରେ ରାଡାରରୁ ଅଦୃଶ୍ୟ ହୋଇଯାଇଥିଲା। ମୁମ୍ବଇରୁ ବାରାମତୀର ଦୂରତା ୨୫୦ କିମି ଥିଲା ଓ ମାତ୍ର ଏକ ଘଣ୍ଟା ମଧ୍ୟରେ ବିମାନ ଯାତ୍ରା ଥିଲା। 

ଧ୍ବଂସାବଶେଷରୁ ମୃତଦେହଗୁଡିକୁ ଚିହ୍ନଟ କରିବା କଷ୍ଟକର ହୋଇ ପଡ଼ିଥିଲା। ଘଣ୍ଟା ଓ ପୋଷାକ ଦ୍ୱାରା ପାୱାରଙ୍କ ମୃତଦେହକୁ ଚିହ୍ନଟ କରାଯାଇଥିଲା। ଅନ୍ୟମାନଙ୍କ ମୃତଦେହ ମଧ୍ୟ ସେମାନେ ପିନ୍ଧିଥିବା ଘଣ୍ଟା ଓ ପୋଷାକ ଦ୍ୱାରା ଚିହ୍ନଟ କରାଯାଇଛି। ପାୱାର ତାଙ୍କ ବ୍ୟକ୍ତିଗତ ସୁରକ୍ଷା ଅଧିକାରୀ, ଜଣେ ପରିଚାରକ ଓ ଦୁଇ ପାଇଲଟଙ୍କ ସହ ଯାତ୍ରା କରୁଥିଲେ। ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଏହି ବିମାନ ଦୁର୍ଘଟଣା ତଦନ୍ତ ଆରମ୍ଭ କରିଛି। ବିମାନର ଡାଟା ରେକର୍ଡର ଓ କକ୍‌‌ପିଟ୍‌‌ ଭଏସ ରେକର୍ଡର ବିମାନ ଉଡ଼ାଣର ଶେଷ ମୁହୂର୍ତ୍ତ ବିଷୟରେ ଗୁରୁତ୍ୱପୂର୍ଣ୍ଣ ସୂଚନା ଦେଇପାରିବ। ଏହି ଦୁର୍ଘଟଣା ଓ ଅସମୟରେ ପାୱାରଙ୍କ ମୃତ୍ୟୁ ଭାରତୀୟ ରାଜନୀତିକୁ ଚକିତ କରିବା ସହ ଦୋହଲାଇ ଦେଇଛି। ୬୬ ବର୍ଷୀୟ ପାୱାର ମହାରାଷ୍ଟ୍ରର ସବୁଠାରୁ ପ୍ରତିଭା ତଥା କ୍ଷମତା ସମ୍ପର୍ଣ୍ଣ ନେତାମାନଙ୍କ ମଧ୍ୟରୁ ଜଣେ ଥିଲେ। ସେ ଉପ-ମୁଖ୍ୟମନ୍ତ୍ରୀ ଭାବେ ତାଙ୍କ ଷଷ୍ଠ କାର୍ଯ୍ୟକାଳ ସମ୍ପାଦନ କରୁଥିଲେ।

ତେବେ ଏହି ଦୁର୍ଘଟଣାକୁ ନେଇ ଅନେକ ପ୍ରଶ୍ନ ଉଠିଲାଣି । ଖରାପ ପାଗରେ ବିମାନ ସେବା ପାଇଁ ବାରାମତୀ ବିମାନବନ୍ଦର ଉପଯୁକ୍ତ କି?  ଯଦି କୁହୁଡ଼ି ଯୋଗୁଁ ବିମାନ ଅନେକ ଥର ଉଦ୍ୟମ କରିବା ସତ୍ତ୍ବେ ଅବତରଣ କରିପାରୁ ନଥିଲା, ତାହାହେଲେ ଏଭଳି ସ୍ଥିତିରେ ଫେରିଯିବା ବଦଳରେ ବିମାନକୁ ଅବତରଣ ପାଇଁ କାହିଁକି ଅନୁମତି ମିଳିଲା? ଏ ନେଇ ବିମାନ ତଦନ୍ତ ବ୍ୟୁରୋ (ଏଏଆଇବି) ଦୁର୍ଘଟଣାର ତଦନ୍ତ ଆରମ୍ଭ କରିଛି।

ଭୁବନେଶ୍ବର: ଅଜିତ ପାୱାରଙ୍କ ବିୟୋଗରେ ନବୀନଙ୍କ ଶୋକ । ବିମାନ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ଏହି ଘଟଣାରେ ସେ ସ୍ତବ୍ଧ ବୋଲି କହିଛନ୍ତି । ନବୀନ ତାଙ୍କ ଏକ୍ସ ହ୍ୟାଣ୍ଡେଲରେ ଲେଖିଛନ୍ତି, ବାରାମତୀ ନିକଟରେ ହୋଇଥିବା ବିମାନ ଦୁର୍ଘଟଣାରେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାର ଏବଂ ସହଯାତ୍ରୀଙ୍କ ମୃତ୍ୟୁ ହୋଇଛି । ଏହି ବିଷୟରେ ଜାଣି ମୁଁ ଗଭୀର ଭାବେ ମର୍ମାହତ ଏବଂ ଦୁଃଖିତ। ଏହାସହିତ ମୃତକଙ୍କ ପରିବାରକୁ ସମବେଦନା ଜ୍ଞାପନ ଜଣାଇଛନ୍ତି ନବୀନ । 

ବାରାମତିରେ ବିମାନ ଦୁର୍ଘଟଣାରେ ଅଜିତ ପାୱାରଙ୍କ ଦେହାନ୍ତ ଘଟିଛି । ବାରାମତିରେ ଅବତରଣ ବେଳେ ଦୁଇ ଖଣ୍ଡ ହୋଇ ଜଳିଗଲା ବିମାନ । ଦୁର୍ଘଟଣାରେ ମୋଟ ୫ ଜଣଙ୍କ ଦେହାନ୍ତ ହେଇଥିବା ବେଳେ ଅଜିତ ପାୱାର, ଜଣେ ପିଏସଓ, ଜଣେ ଆଟେଣ୍ଡାଣ୍ଟ ମୃତ ଏବଂ ଜଣେ ପାଇଲଟ ଓ ଜଣେ ବିମାନ କର୍ମଚାରୀ ମଧ୍ୟ ମୃତ୍ୟୁବରଣ କରିଛନ୍ତି ।

ମହାରାଷ୍ଟ୍ରର ବଡ଼ ନେତା ଶରଦ ପାୱାରଙ୍କ ପୁତୁରା ହେଉଛନ୍ତି ଅଜିତ । କାକାଙ୍କ ବିରୋଧରେ ବିଦ୍ରୋହ କରିଥିଲେ ଅଜିତ । ଏନସିପିକୁ ଭାଙ୍ଗି ବିଜେପି ସହିତ ମେଣ୍ଟ କରିଥିଲେ । ବିଜେପି ସହିତ ମିଶି ମହାରାଷ୍ଟ୍ରରେ ସରକାର ଗଠନ କରିବା ସହ ନିଜେ ଡେପୁଟି ସିଏମ ଥିଲେ ଅଜିତ ପାୱାର । 

ମହାରାଷ୍ଟ୍ରର ବାରାମତୀରେ ବୁଧବାର ସକାଳେ ଘଟିଥିବା ଏକ ଦୁଃଖଦ ବିମାନ ଦୁର୍ଘଟଣାରେ ଏନସିପି ନେତା ତଥା ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ସମେତ ୫ ଜଣଙ୍କର ମୃତ୍ୟୁ ଘଟିଛି। ବିମାନ ଦୁର୍ଘଟଣା ସର୍ବଦା ହୃଦୟବିଦାରକ ହୋଇଥାଏ, କାରଣ ଏଥିରେ ଯାତ୍ରୀମାନଙ୍କ ବଞ୍ଚିବା ସମ୍ଭାବନା ଖୁବ୍ କମ୍ ଥାଏ। ତେବେ ଇତିହାସ ସାକ୍ଷୀ ଅଛି ଯେ, ପ୍ରତ୍ୟେକ ବଡ଼ ଦୁର୍ଘଟଣା ପରେ ବିମାନ ଚଳାଚଳ ବା ଏଭିଏସନ୍ ଇଣ୍ଡଷ୍ଟ୍ରିରେ ସୁରକ୍ଷା ନିୟମ ଓ ଜ୍ଞାନକୌଶଳରେ ବ୍ୟାପକ ପରିବର୍ତ୍ତନ କରାଯାଇଛି। ଆସନ୍ତୁ ଜାଣିବା ସେହି ୧୩ଟି ପ୍ରମୁଖ ବିମାନ ଦୁର୍ଘଟଣା ବିଷୟରେ, ଯାହା ବିମାନ ଯାତ୍ରାର ନିୟମକୁ ସବୁଦିନ ପାଇଁ ବଦଳାଇ ଦେଇଥିଲା।

୧. ଗ୍ରାଣ୍ଡ କ୍ୟାନିୟନ୍ ଧକ୍କା (୧୯୫୬)

୩୦ ଜୁନ୍ ୧୯୫୬ରେ ଗ୍ରାଣ୍ଡ କ୍ୟାନିୟନ୍ ଉପରେ ଦୁଇଟି ବିମାନ ପରସ୍ପର ସହ ଧକ୍କା ହୋଇଥିଲେ। ସେତେବେଳେ ରାଡାର୍ ବ୍ୟବସ୍ଥା ଏତେ ଉନ୍ନତ ନଥିଲା। ଏହି ଘଟଣା ପରେ ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଗଠନ କରାଗଲା ଏବଂ ବିମାନରେ ଧକ୍କା ରୋକିବା ପାଇଁ ଆଧୁନିକ TCAS ସିଷ୍ଟମ ଲଗାଗଲା।

୨. ୟୁନାଇଟେଡ୍ ଏୟାରଲାଇନ୍ସ ଫ୍ଲାଇଟ୍ ୧୭୩ (୧୯୭୮)

ପାଇଲଟ୍ ଏକ ଛୋଟ ଯାନ୍ତ୍ରିକ ତ୍ରୁଟି ସୁଧାରିବାରେ ବ୍ୟସ୍ତ ରହିବାରୁ ବିମାନର ଇନ୍ଧନ ଶେଷ ହୋଇଯାଇଥିଲା। ଏହି ଦୁର୍ଘଟଣା ପରେ କକ୍‌ପିଟ୍ ରିସୋର୍ସ ମ୍ୟାନେଜମେଣ୍ଟ (CRM) ଆରମ୍ଭ ହେଲା, ଯାହା ପାଇଲଟମାନଙ୍କୁ କ୍ରୁ ସଦସ୍ୟଙ୍କ ପରାମର୍ଶ ଶୁଣିବା ଏବଂ ଟିମ୍ ଭାବେ କାମ କରିବା ଶିଖାଇଲା।

୩. ଏୟାର କାନାଡା ଫ୍ଲାଇଟ୍ ୭୯୭ (୧୯୮୩)

୩୩ ହଜାର ଫୁଟ ଉଚ୍ଚରେ ଟ୍ୱାଏଲେଟରେ ନିଆଁ ଲାଗିବା ଫଳରେ ଧୂଆଁ ଯୋଗୁଁ ଯାତ୍ରୀମାନେ ବାହାରି ପାରିନଥିଲେ। ଏହାପରେ ବିମାନର ଟ୍ୱାଏଲେଟରେ ସ୍ମୋକ ଡିଟେକ୍ଟର ଏବଂ ଅଟୋମେଟିକ୍ ନିଆଁ ଲିଭା ଯନ୍ତ୍ର ବାଧ୍ୟତାମୂଳକ କରାଗଲା। ଚଟାଣରେ ରେଡିୟମ୍ ଲାଇଟ୍ ଲଗାଗଲା ଯାହା ଧୂଆଁରେ ମଧ୍ୟ ରାସ୍ତା ଦେଖାଇବାରେ ସାହାଯ୍ୟ କରେ।

୪. ଡେଲ୍ଟା ଏୟାରଲାଇନ୍ସ ଫ୍ଲାଇଟ୍ ୧୯୧ (୧୯୮୫)

ଅବତରଣ ସମୟରେ ପବନର ପ୍ରବଳ ଚାପ ଯୋଗୁଁ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହାପରେ ବିମାନଗୁଡିକରେ ଉନ୍ନତମାନର ରାଡାର୍ ଲଗାଗଲା, ଯାହା ପାଇଲଟଙ୍କୁ ପବନର ଗତିବିଧି ସମ୍ପର୍କରେ ଆଗୁଆ ସୂଚନା ଦେଇଥାଏ।

୫. ୟୁନାଇଟେଡ୍ ଏୟାରଲାଇନ୍ସ ଫ୍ଲାଇଟ୍ ୨୩୨ (୧୯୮୯)

ଇଞ୍ଜିନର ଏକ ପଙ୍ଖା ଫାଟିଯିବାରୁ ବିମାନର ନିୟନ୍ତ୍ରଣ ହଜିଯାଇଥିଲା। ଏହି ଘଟଣା ପରେ ଇଞ୍ଜିନ୍ ଯାଞ୍ଚ ପ୍ରକ୍ରିୟା କଡ଼ାକଡ଼ି କରାଗଲା ଏବଂ ଗୋଟିଏ ସିଷ୍ଟମ ଫେଲ୍ ମାରିଲେ ମଧ୍ୟ ବିମାନକୁ ନିୟନ୍ତ୍ରଣ କରିବା ପାଇଁ ବ୍ୟାକଅପ୍ ସୁରକ୍ଷା ବ୍ୟବସ୍ଥା ଯୋଡ଼ାଗଲା।

୬. ଆଲୋହା ଏୟାରଲାଇନ୍ସ ଫ୍ଲାଇଟ୍ ୨୪୩ (୧୯୮୮)

ଧାତୁ ଦୁର୍ବଳ ହୋଇଯିବାରୁ ଉଡ଼ନ୍ତା ଅବସ୍ଥାରେ ଏକ ପୁରୁଣା ବିମାନର ଛାତ ଉଡ଼ିଯାଇଥିଲା। ଏହାପରେ 'ବୃଦ୍ଧ ବିମାନ କାର୍ଯ୍ୟକ୍ରମ' ଆରମ୍ଭ ହେଲା, ଯେଉଁଥିରେ ପୁରୁଣା ବିମାନଗୁଡ଼ିକୁ ଅତି ସୂକ୍ଷ୍ମ ଭାବରେ ଯାଞ୍ଚ କରାଯାଏ।

୭. ୟୁଏସ୍ ଏୟାରୱେଜ୍ ଫ୍ଲାଇଟ୍ ୪୨୭ (୧୯୯୪)

ରଡର୍ (Rudder) ଜାମ୍ ହେବା କାରଣରୁ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା। ଏହା ପରେ ବୋଇଂ କମ୍ପାନୀ ହଜାର ହଜାର ବିମାନର ରଡର୍ ସିଷ୍ଟମ ବଦଳାଇ ନୂତନ ଯନ୍ତ୍ରାଂଶ ଲଗାଇଥିଲା।

୮. ଭାଲ୍ୟୁଜେଟ୍ ଫ୍ଲାଇଟ୍ ୫୯୨ (୧୯୯୬)

କାର୍ଗୋରେ ରଖାଯାଇଥିବା କେମିକାଲରୁ ନିଆଁ ଲାଗି ବିମାନଟି ଖସି ପଡ଼ିଥିଲା। ଏହାପରେ ବିମାନର କାର୍ଗୋ ବିଭାଗରେ ସ୍ମୋକ୍ ଡିଟେକ୍ଟର ଲଗାଇବା ଏବଂ ବିପଜ୍ଜନକ ସାମଗ୍ରୀ ପରିବହନ ନିୟମକୁ କଡ଼ାକଡ଼ି କରାଗଲା।

୯. ଟିଡବ୍ଲୁଏ ଫ୍ଲାଇଟ୍ ୮୦୦ (୧୯୯୬)

ଇନ୍ଧନ ଟାଙ୍କିରେ ବିସ୍ଫୋରଣ ଘଟିବାରୁ ଏହି ଦୁର୍ଘଟଣା ଘଟିଥିଲା। ଏହାକୁ ରୋକିବା ପାଇଁ ଇନ୍ଧନ ଟାଙ୍କିରେ ନାଇଟ୍ରୋଜେନ୍ ଗ୍ୟାସ୍ ଭରିବାର ବ୍ୟବସ୍ଥା କରାଗଲା, ଯାହା ନିଆଁ ଲାଗିବାକୁ ଦିଏନାହିଁ।

୧୦. ସ୍ୱିସ୍ ଏୟାର ଫ୍ଲାଇଟ୍ ୧୧୧ (୧୯୯୮)

ବିମାନର ମନୋରଞ୍ଜନ ସିଷ୍ଟମରେ ସର୍ଟ ସର୍କିଟ୍ ହେବାରୁ ନିଆଁ ଲାଗିଥିଲା। ଏହି ଘଟଣା ପରେ ତାର (wiring) ଉପରେ ଅଗ୍ନିରୋଧୀ କଭର୍ ଲଗାଇବା ବାଧ୍ୟତାମୂଳକ କରାଗଲା।

୧୧. ଏୟାର ଫ୍ରାନ୍ସ ୪୪୭ (୨୦୦୯)

ଗତି ମାପକ ଯନ୍ତ୍ର ଜାମ୍ ହେବାରୁ ପାଇଲଟ୍ ବିମାନକୁ ନିୟନ୍ତ୍ରଣ କରିପାରିନଥିଲେ। ଏଥିରୁ ଶିକ୍ଷା ନେଇ ପାଇଲଟମାନଙ୍କୁ ଅଟୋ-ପାଇଲଟ୍ ଉପରେ ନିର୍ଭର ନକରି ମାନୁଆଲ୍ ବିମାନ ଉଡ଼ାଇବା ପାଇଁ କଡ଼ା ତାଲିମ ଦିଆଗଲା।

୧୨. ମାଲେସିଆ ଏୟାରଲାଇନ୍ସ ୩୭୦ (୨୦୧୪)

ଏହି ବିମାନ ରହସ୍ୟମୟ ଭାବେ ନିଖୋଜ ହୋଇଯାଇଥିଲା। ଏହାପରେ ସମୁଦ୍ର ଉପରେ ଥିବାବେଳେ ମଧ୍ୟ ବିମାନର ସଠିକ୍ ଲୋକେସନ୍ ଜାଣିବା ପାଇଁ ରିଅଲ୍-ଟାଇମ୍ ଟ୍ରାକିଂ ବାଧ୍ୟତାମୂଳକ କରାଯାଇଛି।

୧୩. ଲାୟନ୍ ଏୟାର ଓ ଇଥିଓପିଆନ୍ ଏୟାରଲାଇନ୍ସ (୨୦୧୮)

ସଫ୍ଟୱେୟାର ତ୍ରୁଟି (MCAS) ଯୋଗୁଁ ବୋଇଂ ୭୩୭ ମ୍ୟାକ୍ସର ଦୁଇଟି ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହାପରେ ସଫ୍ଟୱେୟାର ବଦଳାଗଲା ଏବଂ ପାଇଲଟମାନଙ୍କ ପାଇଁ ଏହି ସିଷ୍ଟମ ଉପରେ ସ୍ୱତନ୍ତ୍ର ତାଲିମ ଅନିବାର୍ଯ୍ୟ କରାଗଲା।

ମହାରାଷ୍ଟ୍ର ରାଜନୀତିରେ ଏକ ଅପୂରଣୀୟ କ୍ଷତି ଘଟିଛି। ଅଜିତ ପାୱାର ମହାରାଷ୍ଟ୍ରର ସବୁଠାରୁ ପ୍ରଭାବଶାଳୀ ରାଜନୈତିକ ପରିବାରରୁ ଆସିଥିଲେ। ସେ ଏନସିପି ମୁଖ୍ୟ ଶରଦ ପାୱାରଙ୍କ ପୁତୁରା ଥିଲେ। ତାଙ୍କ ପତ୍ନୀଙ୍କ ନାମ ସୁନେତ୍ରା ପାୱାର, ଯିଏକି ପୂର୍ବତନ ମନ୍ତ୍ରୀ ପଦ୍ମସିଂହ ବାଜିରାଓ ପାଟିଲଙ୍କ ଭଉଣୀ ଅଟନ୍ତି। ଅଜିତଙ୍କର ଦୁଇ ପୁଅ ଅଛନ୍ତି - ପାର୍ଥ ପାୱାର ଏବଂ ଜୟ ପାୱାର। ବଡ଼ ପୁଅ ପାର୍ଥ ରାଜନୀତିରେ ସକ୍ରିୟ ଥିବାବେଳେ ସାନ ପୁଅ ଜୟ ରାଜନୀତିଠାରୁ ଦୂରରେ ଅଛନ୍ତି।

ଅଜିତ ପାୱାରଙ୍କ ବାପା ଅନନ୍ତରାଓ ପାୱାର ବଲିଉଡର ପ୍ରସିଦ୍ଧ ନିର୍ଦ୍ଦେଶକ ଭି. ଶାନ୍ତାରାମଙ୍କ ସହ ‘ରାଜକମଲ ଷ୍ଟୁଡିଓ’ରେ କାମ କରୁଥିଲେ। ତେବେ ଅଜିତ ପାୱାର ଚଳଚ୍ଚିତ୍ର ଜଗତ ପରିବର୍ତ୍ତେ ରାଜନୀତିକୁ ନିଜର କର୍ମକ୍ଷେତ୍ର ଭାବେ ବାଛିଥିଲେ ଏବଂ ନିଜ କାକା ଶରଦ ପାୱାରଙ୍କଠାରୁ ରାଜନୀତିର ଗୁରୁମନ୍ତ୍ର ଶିଖିଥିଲେ।

ଅଜିତଙ୍କ ବଡ଼ ଭାଇ ଶ୍ରୀନିବାସ ପାୱାର ଜଣେ ପ୍ରତିଷ୍ଠିତ ବ୍ୟବସାୟୀ, ଯାହାଙ୍କର ବ୍ୟବସାୟ କୃଷିଠାରୁ ଆରମ୍ଭ କରି ଅଟୋମୋବାଇଲ କ୍ଷେତ୍ର ପର୍ଯ୍ୟନ୍ତ ବ୍ୟାପିଛି। ତାଙ୍କ ଭଉଣୀ ବିଜୟା ପାଟିଲ ଗଣମାଧ୍ୟମ ଜଗତ ସହ ଜଡିତ। ସାଂସଦ ତଥା ଏନସିପି ନେତ୍ରୀ ସୁପ୍ରିୟା ସୁଲେ ହେଉଛନ୍ତି ଅଜିତ ପାୱାରଙ୍କ ସମ୍ପର୍କୀୟ ଭଉଣୀ। ରାଜନୈତିକ ମତଭେଦ ସତ୍ତ୍ୱେ ସୁପ୍ରିୟା ସର୍ବଦା ଅଜିତଙ୍କୁ ନିଜର ବଡ଼ ଭାଇ ଭାବେ ସମ୍ମାନ ଦେଇ ଆସୁଥିଲେ।

ମହାରାଷ୍ଟ୍ର ରାଜନୀତି ପାଇଁ ବୁଧବାର ଏକ ଅତ୍ୟନ୍ତ ଦୁଃଖଦ ଦିନ ପାଲଟିଛି। ଏକ ହୃଦୟବିଦାରକ ବିମାନ ଦୁର୍ଘଟଣାରେ ରାଜ୍ୟର ଉପମୁଖ୍ୟମନ୍ତ୍ରୀ ତଥା ଏନସିପି (NCP) ମୁଖ୍ୟ ଅଜିତ ପାୱାରଙ୍କର ପରଲୋକ ଘଟିଛି। ବାରାମତି ବିମାନବନ୍ଦର ନିକଟରେ ତାଙ୍କର ବ୍ୟକ୍ତିଗତ ଚାଟାର୍ଡ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ଅଜିତ ପାୱାରଙ୍କ ସମେତ ବିମାନରେ ଥିବା ସମସ୍ତ ୫ ଜଣଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଅଭିଜ୍ଞ ପାଇଲଟ୍ ଏବଂ ଫ୍ଲାଇଟ୍ ଆଟେଣ୍ଡାଣ୍ଟ ମଧ୍ୟ ସାମିଲ ଅଛନ୍ତି।

ସୂଚନା ଅନୁଯାୟୀ, ଦୁର୍ଘଟଣାଟି ସକାଳ ପ୍ରାୟ ୮:୪୫ ରୁ ୯:୧୫ ମଧ୍ୟରେ ଘଟିଥିଲା। ଅଜିତ ପାୱାର ଜିଲ୍ଲା ପରିଷଦ ନିର୍ବାଚନ ପାଇଁ ମୁମ୍ବାଇରୁ ବାରାମତି ଯାଉଥିଲେ। ବାରାମତି ରନୱେରେ ଅବତରଣ କରିବାକୁ ଚେଷ୍ଟା କରୁଥିବାବେଳେ ବିମାନରେ ଯାନ୍ତ୍ରିକ ତ୍ରୁଟି ଦେଖାଦେଇଥିଲା। ଫଳରେ ବିମାନଟି ରନୱେ ବଦଳରେ ନିକଟସ୍ଥ ଏକ କ୍ଷେତରେ ଖସି ପଡ଼ିଥିଲା ଏବଂ ଭୂମି ସହ ମାଡ଼ ହେବା ମାତ୍ରେ ଏଥିରେ ନିଆଁ ଲାଗିଯାଇଥିଲା। ଏହି ଘଟଣାରେ ଅଜିତ ପାୱାରଙ୍କ ବ୍ୟତୀତ ଯାତ୍ରୀ ବିଦୀପ ଯାଦବଙ୍କର ମଧ୍ୟ ମୃତ୍ୟୁ ଘଟିଛି।

ଦୁର୍ଘଟଣାଗ୍ରସ୍ତ 'ଲେୟାରଜେଟ୍ ୪୫' ବିମାନର ନିୟନ୍ତ୍ରଣ ଅଭିଜ୍ଞ କ୍ୟାପଟେନ ସୁମିତ କପୁର ଏବଂ ଫର୍ଷ୍ଟ ଅଫିସର ଶାମ୍ଭବୀ ପାଠକଙ୍କ ହାତରେ ଥିଲା। ଏହା ସହ ପିଙ୍କି ମାଲି ଫ୍ଲାଇଟ୍ ଆଟେଣ୍ଡାଣ୍ଟ ଭାବରେ କାର୍ଯ୍ୟରତ ଥିଲେ। ଶାମ୍ଭବୀ ୨୦୨୨ ମସିହାରୁ ଏହି କମ୍ପାନୀ ସହିତ ଜଡିତ ଥିଲେ ଏବଂ ସେ ମୁମ୍ବାଇ ବିଶ୍ୱବିଦ୍ୟାଳୟରୁ ଏଭିଏସନ୍ ପାଠ ପଢିବା ପରେ ନ୍ୟୁଜିଲ୍ୟାଣ୍ଡରେ ପାଇଲଟ୍ ଟ୍ରେନିଂ ନେଇଥିଲେ।

ନାଗରିକ ବିମାନ ଚଳାଚଳ ନିର୍ଦ୍ଦେଶାଳୟ (DGCA) ଏହି ଘଟଣାରେ ମୃତ୍ୟୁକୁ ନିଶ୍ଚିତ କରିବା ସହ ତଦନ୍ତ ନିର୍ଦ୍ଦେଶ ଦେଇଛି। ଦୁର୍ଘଟଣାଗ୍ରସ୍ତ ବିମାନଟି ଦିଲ୍ଲୀର ଘରୋଇ ଏଭିଏସନ୍ କମ୍ପାନୀ 'VSR ଭେଞ୍ଚର୍ସ'ର ଥିଲା, ଯାହାର ପଞ୍ଜୀକରଣ ନମ୍ବର VT-SSK ରହିଥିଲା। ଉଲ୍ଲେଖନୀୟ ଯେ, ଏହି କମ୍ପାନୀର ଅନ୍ୟ ଏକ ବିମାନ ୨୦୨୩ ସେପ୍ଟେମ୍ବରରେ ମଧ୍ୟ ମୁମ୍ବାଇ ବିମାନବନ୍ଦରରେ ଦୁର୍ଘଟଣାଗ୍ରସ୍ତ ହୋଇଥିଲା।

ମହାରାଷ୍ଟ୍ର: ମହାରାଷ୍ଟ୍ର ରାଜନୀତିରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି। ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ତଥା ଏନସିପି (NCP) ମୁଖ୍ୟ ଅଜିତ ପାୱାରଙ୍କର ଆଜି ଏକ ଭୟାବହ ବିମାନ ଦୁର୍ଘଟଣାରେ ମୃତ୍ୟୁ ଘଟିଛି। ବାରାମତୀରେ ଘଟିଥିବା ଏହି ଦୁର୍ଘଟଣାରେ ଅଜିତ ପାୱାରଙ୍କ ସମେତ ବିମାନରେ ଥିବା ୫ ଜଣଙ୍କର ମଧ୍ୟ ପ୍ରାଣହାନି ଘଟିଛି।

ମିଳିଥିବା ସୂଚନା ଅନୁଯାୟୀ, ଅଜିତ ପାୱାରଙ୍କୁ ନେଇ ମୁମ୍ବାଇରୁ ବାରାମତୀ ଯାଉଥିବା ଏକ ଚାର୍ଟର ବିମାନ ସକାଳ ୮.୪୫ ସମୟରେ ଦୁର୍ଘଟଣାଗ୍ରସ୍ତ ହୋଇଥିଲା। ବାରାମତୀ ଏୟାରପୋର୍ଟର ୧୧ ନମ୍ବର ରନୱେରେ ଜରୁରୀକାଳୀନ ଅବତରଣ (Emergency Landing) ଉଦ୍ୟମ କରୁଥିବା ସମୟରେ ଏହି ଅଘଟଣ ଘଟିଥିଲା। ଦୁର୍ଘଟଣା ଏତେ ଭୟଙ୍କର ଥିଲା ଯେ ବିମାନଟି ଖଣ୍ଡଖଣ୍ଡ ହୋଇଯିବା ସହ ସେଥିରେ ନିଆଁ ଲାଗିଯାଇଥିଲା। ଏଥିରେ ଥିବା ଦୁଇ ପାଇଲଟ, ଜଣେ ପିଏସଓ ଏବଂ ଜଣେ ଆଟେଣ୍ଡାଣ୍ଟଙ୍କର ମଧ୍ୟ ଘଟଣାସ୍ଥଳରେ ମୃତ୍ୟୁ ହୋଇଛି।

ସର୍ବାଧିକ ୬ ଥର ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଦାୟିତ୍ୱ ତୁଲାଇଥିବା ଏହି ବରିଷ୍ଠ ରାଜନେତା ଜିଲ୍ଲା ପରିଷଦ ନିର୍ବାଚନ ପାଇଁ ପ୍ରଚାର କରିବାକୁ ବାରାମତୀ ଯାଉଥିଲେ। ସେଠାରେ ୪ଟି ସାଧାରଣ ସଭାରେ ଯୋଗ ଦେବାର କାର୍ଯ୍ୟକ୍ରମ ଥିଲା। କିନ୍ତୁ ଗନ୍ତବ୍ୟ ସ୍ଥଳରେ ପହଞ୍ଚିବା ପୂର୍ବରୁ Bombardier Learjet 45 ଚାର୍ଟର ବିମାନଟି କ୍ରାଶ ହୋଇଯାଇଥିଲା। ଡିଜିସିଏ (DGCA) ସୂଚନା ମୁତାବକ, ବିମାନଟି ଦିଲ୍ଲୀ ଭିତ୍ତିକ ଚାର୍ଟର କମ୍ପାନୀ ଭିଏସ୍‌ଆର ଦ୍ୱାରା ପରିଚାଳିତ ହେଉଥିଲା।

ଅଜିତ ପାୱାର ୧୯୯୧ରୁ ବାରାମତୀରୁ ବିଧାୟକ ଭାବେ ନିର୍ବାଚିତ ହୋଇ ଆସୁଥିଲେ। ସେ ତାଙ୍କ କାକା ଶରଦ ପାୱାରଙ୍କ ଛତ୍ରଛାୟାରେ ରାଜନୀତି ଆରମ୍ଭ କରିଥିଲେ ମଧ୍ୟ ୨୦୨୩ରେ ଅଲଗା ହୋଇ ବିଜେପି ସହ ହାତ ମିଳାଇଥିଲେ। ଦୁର୍ଘଟଣା ପୂର୍ବରୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ସେ ପଞ୍ଜାବ କେଶରୀ ଲାଲା ଲଜପତ ରାୟଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇ ଶେଷ ପୋଷ୍ଟ କରିଥିଲେ, ଯାହା ଏବେ ଭାଇରାଲ ହେବାରେ ଲାଗିଛି।

ମହାରାଷ୍ଟ୍ରର ରାଜନୀତିରେ ଏକ ବଡ଼ ଅଘଟଣ ଘଟିଛି। ବୁଧବାର ସକାଳେ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ତଥା ଏନସିପି (NCP) ମୁଖ୍ୟ ଅଜିତ ପାୱାରଙ୍କ ବିମାନ ବାରାମତୀରେ ଦୁର୍ଘଟଣାଗ୍ରସ୍ତ ହୋଇଛି। ପ୍ରାଥମିକ ରିପୋର୍ଟ ଅନୁଯାୟୀ, ଏହି ଦୁର୍ଘଟଣାରେ ଅଜିତ ପାୱାର ଗୁରୁତର ଆହତ ହୋଇଛନ୍ତି ଏବଂ ତାଙ୍କୁ ଚିକିତ୍ସା ପାଇଁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଛି।

ସୂଚନା ମୁତାବକ, ବାରାମତୀ ଏୟାରଷ୍ଟ୍ରିପରେ ବିମାନଟି ଲ୍ୟାଣ୍ଡିଂ କରୁଥିବା ସମୟରେ ଏହି ଦୁର୍ଘଟଣା ଘଟିଥିଲା। ଦୁର୍ଘଟଣା ଖବର ମିଳିବା ମାତ୍ରେ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଛି। ଆମ୍ବୁଲାନ୍ସ ଏବଂ ଜରୁରୀକାଳୀନ ଟିମ୍ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ସହାୟତା ଯୋଗାଇ ଦେଉଛନ୍ତି। ପ୍ରଶାସନ ଓ ସୁରକ୍ଷା ଏଜେନ୍ସି ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି।

ଅଜିତ ପାୱାର ଆଜି ବାରାମତୀରେ ଏକାଧିକ ଜନସାଧାରଣ କାର୍ଯ୍ୟକ୍ରମରେ ଯୋଗଦେବା ପାଇଁ ଯାଉଥିଲେ। ସୂତ୍ରରୁ ମିଳିଥିବା ଖବର ଅନୁଯାୟୀ, ବିମାନରେ ଥିବା ଅନ୍ୟ କିଛି ବ୍ୟକ୍ତି ମଧ୍ୟ ଆହତ ହୋଇଛନ୍ତି। ତେବେ ଉପମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟାବସ୍ଥା ନେଇ ପ୍ରଶାସନ ପକ୍ଷରୁ ବର୍ତ୍ତମାନ ସୁଦ୍ଧା କୌଣସି ଆନୁଷ୍ଠାନିକ ବୟାନ ଜାରି କରାଯାଇ ନାହିଁ।