ନେପାଳ ରେ ପ୍ରକୃତିର କରାଳ ରୂପ ଦେଖିବାକୁ ମିଳିଛି। ଭୟଙ୍କର ବନ୍ୟା ଯୋଗୁଁ ନେପାଳର ନୁୱାକୋଟ ଜିଲ୍ଲା ଅନ୍ତର୍ଗତ ଦେବୀଘାଟ ଅଞ୍ଚଳ ସମ୍ପୂର୍ଣ୍ଣ ଭାବେ ଧ୍ୱଂସସ୍ତୂପରେ ପରିଣତ ହୋଇଛି। ପ୍ରାପ୍ତ ସୂଚନା ଅନୁଯାୟୀ, ଲଗାଣ ବର୍ଷା ଏବଂ ପାହାଡ଼ିଆ ଢାଲୁରୁ ଆସିଥିବା ପ୍ରବଳ ବନ୍ୟା ଜଳରେ ଶହ ଶହ ଘର ଭାଙ୍ଗିଯାଇଛି। ଲୋକେ ନିଜର ସବୁକିଛି ହରାଇ ଏବେ କାଦୁଅ ଏବଂ ଭଗ୍ନାବଶେଷ ତଳେ ନିଜର ପ୍ରିୟଜନ ଓ ଆସବାବପତ୍ର ଖୋଜୁଛନ୍ତି।

ନଦୀ କୂଳରେ ଥିବା ବସତି ଗୁରୁତର ପ୍ରଭାବିତ

ସ୍ଥାନୀୟ ପ୍ରଶାସନ ଓ ଗଣମାଧ୍ୟମ ରିପୋର୍ଟ ଅନୁସାରେ, ତ୍ରିଶୂଳୀ ନଦୀ ଏବଂ ଭୋଟେକୋଶୀ ନଦୀର ଜଳସ୍ତର ହଠାତ୍ ବୃଦ୍ଧି ପାଇବା ଫଳରେ ଏହି ଅଭାବନୀୟ ପରିସ୍ଥିତି ସୃଷ୍ଟି ହୋଇଛି। ଗୋଟିଏ ସମୟରେ ଯେଉଁ ନଦୀ କୂଳରେ ଲୋକେ ବସବାସ କରୁଥିଲେ ଏବଂ ପିଲାମାନେ ଖେଳୁଥିଲେ, ଆଜି ତାହା କେବଳ କାଦୁଅ ଏବଂ ପଥରର ପାହାଡ଼ ପାଲଟିଛି। ରିପୋର୍ଟ ମୁତାବକ, ବନ୍ୟା ଏତେ ଭୟଙ୍କର ଥିଲା ଯେ ମାତ୍ର କିଛି ମିନିଟ୍ ମଧ୍ୟରେ ଦେବୀଘାଟ ବଜାର ଓ ଆଖପାଖ ବସ୍ତି ସମ୍ପୂର୍ଣ୍ଣ ରୂପେ ବୁଡ଼ିଯାଇଥିଲା ଏବଂ ପ୍ରାୟ ୨୦ ଫୁଟ୍ ଉଚ୍ଚର କାଦୁଅ ଘରଗୁଡ଼ିକୁ ପୋତି ଦେଇଛି।

ଉଦ୍ଧାର କାର୍ଯ୍ୟ ଏବଂ ମୃତାହତଙ୍କ ସଂଖ୍ୟା

ଏହି ଭୟାବହ ପ୍ରାକୃତିକ ବିପର୍ଯ୍ୟୟରେ ବ୍ୟାପକ ଧନଜୀବନ ନଷ୍ଟ ହୋଇଛି। ନେପାଳ ସେନା ଏବଂ ବିଭିନ୍ନ ଉଦ୍ଧାରକାରୀ ଦଳ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଦେଶବ୍ୟାପୀ ହଜାର ହଜାର ଲୋକ ନିଖୋଜ ଥିବା ବେଳେ ବହୁ ଲୋକଙ୍କ ପ୍ରାଣହାନି ଘଟିଥିବା ଆଶଙ୍କା କରାଯାଉଛି। କେବଳ ଦେବୀଘାଟ ଅଞ୍ଚଳରେ ହିଁ ଶହ ଶହ ସଂଖ୍ୟାରେ ପରିବାର ଖୋଲା ଆକାଶ ତଳେ ଆଶ୍ରୟ ନେବାକୁ ବାଧ୍ୟ ହୋଇଛନ୍ତି। ପରିସ୍ଥିତି ଏତେ ସଙ୍ଗିନ ଯେ, ଲୋକମାନଙ୍କୁ ଥଇଥାନ କରିବା ଏବଂ ମାଟି ତଳୁ ଶବ ଉଦ୍ଧାର କରିବା ପାଇଁ ପ୍ରଶାସନକୁ ନାହିଁ ନଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି।

ନୂଆଦିଲ୍ଲୀ: ନେପାଳରେ ଆସିଥିବା ଭୟଙ୍କର ବନ୍ୟା ପରିସ୍ଥିତିକୁ ନେଇ ବିଶ୍ୱର ବିଭିନ୍ନ ଦେଶର ନେତାମାନେ ଗଭୀର ଶୋକ ପ୍ରକାଶ କରିବା ସହ ସହାୟତାର ପ୍ରତିଶ୍ରୁତି ଦେଇଛନ୍ତି। ଏହି ପ୍ରାକୃତିକ ବିପର୍ଯ୍ୟୟରେ ୧୬୦ରୁ ଅଧିକ ଲୋକଙ୍କର ମୃତ୍ୟୁ ଘଟିଥିବା ବେଳେ ବିଦେଶୀ ନାଗରିକଙ୍କ ସମେତ ଶତାଧିକ ଲୋକ ନିଖୋଜ ଅଛନ୍ତି।

ରିପୋର୍ଟ ଅନୁଯାୟୀ, ଏହି ବିପର୍ଯ୍ୟୟ ପରେ ୩୯୧ ଜଣ ବିଦେଶୀ ପର୍ଯ୍ୟଟକ ଏବଂ ୯୩ ଜଣ ନେପାଳୀ ପର୍ଯ୍ୟଟକ ନିଖୋଜ ଅଛନ୍ତି ଏବଂ ସେମାନଙ୍କ ସହ କୌଣସି ଯୋଗାଯୋଗ ହୋଇପାରୁନାହିଁ। ବିଭିନ୍ନ ରାଷ୍ଟ୍ର ଏବେ ନିଜ ନାଗରିକମାନଙ୍କୁ ଉଦ୍ଧାର କରିବା ପାଇଁ ଉଦ୍ୟମ ଜାରି ରଖିଛନ୍ତି।

ବନ୍ୟା ପ୍ରଭାବିତ ଲୋକଙ୍କ ପ୍ରତି ଗଭୀର ସମବେଦନା ଜଣାଇ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ୍ କହିଛନ୍ତି ଯେ ଅଧିକାରୀମାନେ ଅଷ୍ଟ୍ରେଲିଆ ନାଗରିକଙ୍କ ସୁରକ୍ଷା ନିଶ୍ଚିତ କରିବା ପାଇଁ ଜରୁରୀକାଳୀନ ଭିତ୍ତିରେ କାର୍ଯ୍ୟ କରୁଛନ୍ତି। ଏହି ବିପର୍ଯ୍ୟୟରେ ଅତିକମରେ ୩୪ ଜଣ ଅଷ୍ଟ୍ରେଲୀୟ ନିଖୋଜ ଥିବା ସୂଚନା ମିଳିଛି। 

ସେହିପରି ୨୪ ଜଣ କାନାଡା ନାଗରିକ ନିଖୋଜ ଥିବା ବେଳେ, କାନାଡାର ପ୍ରଧାନମନ୍ତ୍ରୀ ମାର୍କ କାର୍ନି ଆଶ୍ୱାସନା ଦେଇଛନ୍ତି ଯେ ତାଙ୍କ ସରକାର ସ୍ଥିତି ଉପରେ ତୀକ୍ଷ୍ଣ ନଜର ରଖିଛନ୍ତି। ସେ କାନାଡା ନାଗରିକମାନଙ୍କୁ ଆରଓସିଏ (ROCA) ସିଷ୍ଟମରେ ତୁରନ୍ତ ପଞ୍ଜୀକୃତ କରିବାକୁ ଅନୁରୋଧ କରିଛନ୍ତି। ଏହା ସହ ଉଦ୍ଧାର କାର୍ଯ୍ୟରେ ଯେକୌଣସି ପ୍ରକାର ସହାୟତା ପାଇଁ କାନାଡା ପ୍ରସ୍ତୁତ ବୋଲି ସେ ଏକ୍ସ (X) ମାଧ୍ୟମରେ ସୂଚନା ଦେଇଛନ୍ତି।

ପରିସ୍ଥିତିକୁ "ହୃଦୟବିଦାରକ" ବୋଲି ବର୍ଣ୍ଣନା କରି ନ୍ୟୁଜିଲ୍ୟାଣ୍ଡର ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସନ୍ କହିଛନ୍ତି ଯେ ତାଙ୍କ ସରକାର ନେପାଳ କର୍ତ୍ତୃପକ୍ଷଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି। ଏହି ବନ୍ୟାରେ ୫ ଜଣ ନ୍ୟୁଜିଲ୍ୟାଣ୍ଡ ନାଗରିକ ନିଖୋଜ ଥିବା ଜଣାପଡିଛି। ସେ ନାଗରିକମାନଙ୍କୁ ଜରୁରୀକାଳୀନ ସ୍ଥିତିରେ କନସୁଲାର୍ ହେଲ୍ପଲାଇନ ସହ ଯୋଗାଯୋଗ କରିବାକୁ ପରାମର୍ଶ ଦେଇଛନ୍ତି।

ଅନ୍ୟପକ୍ଷରେ, ବନ୍ୟା ପରେ ୧୯ ଜଣ ମାଲେସିୟା ନାଗରିକ ନିଖୋଜ ଥିବା ଖବର ମିଳିଛି। ମାଲେସିୟାର ପ୍ରଧାନମନ୍ତ୍ରୀ ଅନୱାର ଇବ୍ରାହିମ୍ ଗଭୀର ସମବେଦନା ଜଣାଇବା ସହ ନେପାଳରେ ଥିବା ମାଲେସିୟା ଦୂତାବାସ ପ୍ରଭାବିତ ନାଗରିକଙ୍କୁ ସାହାଯ୍ୟ କରିବା ପାଇଁ ସ୍ଥାନୀୟ ପ୍ରଶାସନ ସହ ଘନିଷ୍ଠ ଭାବରେ କାର୍ଯ୍ୟ କରୁଛି ବୋଲି ପ୍ରକାଶ କରିଛନ୍ତି। ସେ ନିଜ ମିଶନକୁ ସମସ୍ତ ଆବଶ୍ୟକୀୟ ସମ୍ବଳ ଯୋଗାଇଦେବାକୁ ନିର୍ଦ୍ଦେଶ ଦେଇଛନ୍ତି।

ନେପାଳର ରସୁୱା ଜିଲ୍ଲାରେ ଭୟଙ୍କର ବନ୍ୟା ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି। ତିବ୍ଦତ ପଟୁ ହଠାତ୍ ଆସିଥିବା ଏହି ବନ୍ୟା ଜଳ ସୀମାନ୍ତ ଅଞ୍ଚଳରେ ତାଣ୍ଡବ ରଚିଛି। ବୁଧବାର ସକାଳେ ଘଟିଥିବା ଏହି ପ୍ରାକୃତିକ ବିପର୍ଯ୍ୟୟରେ ଲୋକଙ୍କ ଜୀବନ ଓ ସମ୍ପତ୍ତିର ଘୋର କ୍ଷତି ହୋଇଛି। ସୋସିଆଲ ମିଡିଆରେ ଭାଇରାଲ ହେଉଥିବା ଅନେକ ଭୟଙ୍କର ଭିଡିଓରେ ଦେଖିବାକୁ ମିଳିଛି ଯେ ବନ୍ୟା ପାଣି କିପରି ସବୁକିଛି ଧୋଇ ନେଉଛି।

ଟିମୁରେ ଏବଂ ସ୍ୟାପ୍ରୁ ବେସିରେ ବ୍ୟାପକ କ୍ଷୟକ୍ଷତି

ବିଶେଷ କରି ଟିମୁରେ ବଜାର ଏବଂ ସ୍ୟାପ୍ରୁ ବେସି ଅଞ୍ଚଳ ଏହି ବନ୍ୟା ଦ୍ୱାରା ସବୁଠାରୁ ଅଧିକ ପ୍ରଭାବିତ ହୋଇଛି। ଭୋଟେ କୋଶୀ ନଦୀରେ ଜଳସ୍ତର ହଠାତ୍ ବୃଦ୍ଧି ପାଇବା ଫଳରେ ନେପାଳ ଏବଂ ଚୀନକୁ ସଂଯୋଗ କରୁଥିବା ମୈତ୍ରୀ ସେତୁ ସମ୍ପୂର୍ଣ୍ଣ ଭାବେ ଧୋଇଯାଇଛି। ଏହା ସହିତ କଷ୍ଟମ ୟାର୍ଡରେ ଥିବା ଅନେକ କାର୍ଗୋ କଣ୍ଟେନର ଏବଂ ଇଲେକ୍ଟ୍ରିକ୍ ଯାନ ମଧ୍ୟ ବନ୍ୟା ପାଣିରେ ଭାସି ଯାଇଛି। ସ୍ଥାନୀୟ ପ୍ରଶାସନର ସୂଚନା ଅନୁଯାୟୀ, ଜଳବିଦ୍ୟୁତ୍ ପ୍ରକଳ୍ପ ଏବଂ ରାସ୍ତାଘାଟ ମଧ୍ୟ ବ୍ୟାପକ ଭାବେ ନଷ୍ଟ ହୋଇଛି।

ଉଦ୍ଧାର କାର୍ଯ୍ୟ ଏବଂ ହାଇ ଆଲର୍ଟ

ସଦ୍ୟତମ ରିପୋର୍ଟ ଅନୁଯାୟୀ, ଏହି ଘଟଣାରେ ଅତିକମରେ ୮ ଜଣଙ୍କର ମୃତ୍ୟୁ ହୋଇଥିବା ବେଳେ ବହୁ ଲୋକ ନିଖୋଜ ଅଛନ୍ତି। ନେପାଳର ପ୍ରଧାନମନ୍ତ୍ରୀ ବାଲେନ୍ଦ୍ର ଶାହ ତୁରନ୍ତ ଉଦ୍ଧାର ଏବଂ ରିଲିଫ କାର୍ଯ୍ୟ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ସେନା ଏବଂ ପୋଲିସ ବାହିନୀ ସହ ହେଲିକପ୍ଟର ଯୋଗେ ଉଦ୍ଧାର କାର୍ଯ୍ୟ ଜାରି ରହିଛି, କିନ୍ତୁ ପ୍ରବଳ ସ୍ରୋତ ଏବଂ ଉଚ୍ଚ ଜଳସ୍ତର କାରଣରୁ ହେଲିକପ୍ଟର ଅବତରଣରେ ସମସ୍ୟା ଦେଖାଦେଉଛି।

ନଦୀ କୂଳିଆ ଲୋକଙ୍କୁ ସତର୍କ ସୂଚନା

ପ୍ରଶାସନ ପକ୍ଷରୁ ତ୍ରିଶୂଳୀ ଏବଂ ଭୋଟେ କୋଶୀ ନଦୀ କୂଳରେ ରହୁଥିବା ଲୋକଙ୍କୁ ସୁରକ୍ଷିତ ସ୍ଥାନକୁ ଯିବା ପାଇଁ ହାଇ ଆଲର୍ଟ ଜାରି କରାଯାଇଛି। ପୃଥ୍ୱୀ ରାଜପଥ ସମେତ ଅନ୍ୟ ପ୍ରମୁଖ ରାସ୍ତାଗୁଡ଼ିକରେ ଯାତାୟାତ ବାଧାପ୍ରାପ୍ତ ହୋଇଛି। ପରିସ୍ଥିତି ଉପରେ ସରକାର ତୀକ୍ଷ୍ଣ ନଜର ରଖିଛନ୍ତି ଏବଂ ରିଲିଫ୍ କାର୍ଯ୍ୟକୁ ତ୍ୱରାନ୍ୱିତ କରାଯାଉଛି।

ପଶ୍ଚିମ ଆଫ୍ରିକୀୟ ଦେଶ ଗିନିର ରାଜଧାନୀ କୋନାକ୍ରି (Conakry) ଠାରେ ଏକ ବଡ଼ ଧରଣର ଅଘଟଣ ଘଟିଛି। ମୁଷଳଧାରାରେ ବର୍ଷା ହେବା ଯୋଗୁଁ ଏକ ବିଶାଳ ଆବର୍ଜନା ପାହାଡ଼ ଧସି ପଡ଼ିବାରୁ ଏହା ତଳେ ଚାପି ହୋଇ ଅତିକମରେ ୩୦ ଜଣଙ୍କର ମୃତ୍ୟୁ ଘଟିଛି। ଏହି ଘଟଣାରେ ଅନ୍ୟ ୨୨ ଜଣ ଗୁରୁତର ଆହତ ହୋଇଛନ୍ତି। ରବିବାର ଭୋର ସମୟରେ କୋନାକ୍ରିର ଦାର-ଏସ-ସଲାମ (Dar-es-Salam) ଅଞ୍ଚଳରେ ଥିବା ଏକ ବିଶାଳ ଡମ୍ପିଂ ୟାର୍ଡ ବା ଅଳିଆ ଗଦାରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି।

ପ୍ରବଳ ବର୍ଷା ପାଲଟିଲା କାଳ

ସ୍ଥାନୀୟ ପ୍ରଶାସନର ସୂଚନା ଅନୁଯାୟୀ, ଶନିବାର ରାତିରୁ ରବିବାର ଭୋର ପ୍ରାୟ ୨ଟା ପର୍ଯ୍ୟନ୍ତ ଲଗାଣ ବର୍ଷା ହୋଇଥିଲା। ଏହି ପ୍ରବଳ ବର୍ଷା କାରଣରୁ ବହୁ ବର୍ଷ ଧରି ଜମା ହୋଇ ରହିଥିବା ବିଶାଳ ଆବର୍ଜନା ପାହାଡ଼ଟି ହଠାତ୍ ଖସି ପଡ଼ିଥିଲା। ଫଳରେ ଏହି ଡମ୍ପିଂ ୟାର୍ଡ ନିକଟରେ ଥିବା ଅସ୍ଥାୟୀ ଟେଣ୍ଟ, ଟିଣ ଛପର ଘର ଏବଂ ଝୁମ୍ପୁଡ଼ି ଗୁଡ଼ିକ ଏହି ଆବର୍ଜନା ଏବଂ ମାଟି ତଳେ ସମ୍ପୂର୍ଣ୍ଣ ରୂପେ ପୋତି ହୋଇଯାଇଥିଲା। ଘଟଣା ସମୟରେ ଅନେକ ଲୋକ ନିଦରେ ଶୋଇଥିବା ବେଳେ ଏହି ଅପ୍ରତ୍ୟାଶିତ ବିପର୍ଯ୍ୟୟର ଶିକାର ହୋଇଥିଲେ।

ଉଦ୍ଧାର କାର୍ଯ୍ୟ ଜାରି

ବର୍ତ୍ତମାନ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜୋରସୋରରେ ଚାଲିଛି। ସେନା, ବିପର୍ଯ୍ୟୟ ପରିଚାଳନା ବିଭାଗ ଏବଂ ସ୍ଥାନୀୟ ପ୍ରଶାସନ ପକ୍ଷରୁ ଏକ୍ସାଭେଟର (Excavator) ମେସିନ ଲଗାଇ ଆବର୍ଜନା ହଟାଇବା ସହ ନିଖୋଜ ଲୋକଙ୍କୁ ଖୋଜିବା ପ୍ରକ୍ରିୟା ଜାରି ରହିଛି। ଆହତମାନଙ୍କ ମଧ୍ୟରୁ ୬ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବାରୁ ମୃତ୍ୟୁସଂଖ୍ୟା ଆହୁରି ବୃଦ୍ଧି ପାଇବା ଆଶଙ୍କା କରାଯାଉଛି। ଗିନିର ପ୍ରଧାନମନ୍ତ୍ରୀ ମାମାଡୋ ଉରୀ ବାହ (Mamadou Oury Bah) ଘଟଣାସ୍ଥଳ ପରିଦର୍ଶନ କରିବା ସହ ଉଦ୍ଧାର କାର୍ଯ୍ୟର ତଦାରଖ କରିଛନ୍ତି।

ବିପଦ ସଙ୍କେତ ସତ୍ତ୍ୱେ ଅଘଟଣ

ବର୍ଷା ଦିନେ ଏହି ଆବର୍ଜନା ପାହାଡ଼ ବିପଜ୍ଜନକ ହୋଇପାରେ ବୋଲି ପ୍ରଶାସନ ପୂର୍ବରୁ ଆଶଙ୍କା କରିଥିଲା। ତେଣୁ ଏହି ବିଶାଳ ଡମ୍ପିଂ ୟାର୍ଡକୁ ବନ୍ଦ କରିବା ପାଇଁ ସରକାର ନିଷ୍ପତ୍ତି ନେଇଥିଲେ ଏବଂ ଏହି ଅଞ୍ଚଳରେ ରହୁଥିବା ଲୋକଙ୍କୁ ସ୍ଥାନାନ୍ତର ପାଇଁ ନୋଟିସ୍ ମଧ୍ୟ ଦିଆଯାଇଥିଲା। ତେବେ ଅନେକ ଲୋକ ଏହି ଚେତାବନୀ ସତ୍ତ୍ୱେ ସେଠାରେ ରହିଥିଲେ, ଯାହା ଫଳରେ ଏତେ ବଡ଼ ଧରଣର ଜୀବନହାନି ଘଟିଥିବା କୁହାଯାଇଛି।

ଭୁବନେଶ୍ୱର: ଓଡ଼ିଶାରେ ବନ୍ୟା ପରିସ୍ଥିତି ଧୀରେ ଧୀରେ ଭୟାବହ ରୂପ ନେଉଛି। ସ୍ୱତନ୍ତ୍ର ରିଲିଫ୍ କମିଶନର (ଏସଆରସି) ରାଜେଶ ପ୍ରଭାକର ପାଟିଲଙ୍କ ସୂଚନା ଅନୁଯାୟୀ, ରାଜ୍ୟର ୬ଟି ଜିଲ୍ଲାରେ ବନ୍ୟା ଯୋଗୁଁ ୪ ଜଣଙ୍କ ମୃତ୍ୟୁ ଘଟିଥିବା ବେଳେ ୨.୦୩ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି।

ସକାଳ ୯ଟାରେ ପ୍ରକାଶିତ ବନ୍ୟା ସ୍ଥିତି ରିପୋର୍ଟ ଅନୁଯାୟୀ, ରାଜ୍ୟର ୪୪ଟି ବ୍ଲକର ୨୩୩ଟି ଗ୍ରାମପଞ୍ଚାୟତର  ୭୪୮ଟି ଗାଁ ସମେତ ୬ଟି ପୌରାଞ୍ଚଳର ମୋଟ ୨,୦୩,୨୦୮ ଜଣ ଲୋକ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି। ଜିଲ୍ଲା ପ୍ରଶାସନ ପକ୍ଷରୁ ଏପର୍ଯ୍ୟନ୍ତ ୨୭,୯୬୭ ଜଣଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିବା ବେଳେ ଏବେ ବି ୨୨୬ଟି ଗାଁ ଜଳବନ୍ଦୀ ଅବସ୍ଥାରେ ରହିଛି। ବନ୍ୟାରେ ୯ଟି ଗୃହପାଳିତ ପଶୁଙ୍କ ପ୍ରାଣହାନି ଘଟିଛି। ରାଜ୍ୟବ୍ୟାପୀ ମୋଟ ୭,୯୦୧ ହେକ୍ଟର ଚାଷଜମିରେ ଫସଲ ନଷ୍ଟ ହୋଇଥିବା ବେଳେ ୭୬୧ଟି ଘର ଭାଙ୍ଗିଯାଇଛି।

ବନ୍ୟା ଦ୍ୱାରା ବାଲେଶ୍ୱର ଜିଲ୍ଲା ସର୍ବାଧିକ କ୍ଷତିଗ୍ରସ୍ତ ହୋଇଛି। ଏଠାରେ ୧୨ଟି ବ୍ଲକର ୩୭୮ଟି ଗାଁରେ ମୋଟ ୧,୦୯,୪୨୯ ଜଣ ପ୍ରଭାବିତ ହୋଇଛନ୍ତି। ଜିଲ୍ଲାରୁ ୧୯,୦୮୦ ଜଣଙ୍କୁ ଉଦ୍ଧାର କରାଯାଇଥିବା ବେଳେ ୬୫୪ଟି ଘର କ୍ଷତିଗ୍ରସ୍ତ ହୋଇଛି। ପ୍ରଶାସନ ପକ୍ଷରୁ ୧୨୫ଟି ରିଲିଫ୍ କ୍ୟାମ୍ପ ଖୋଲାଯାଇ ୧୬,୯୮୭ ଜଣଙ୍କୁ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ସେହିପରି ଭଦ୍ରକ ଜିଲ୍ଲାରେ ୫ଟି ବ୍ଲକର ୨୨୦ଟି ଗାଁରେ ପ୍ରାୟ ୮୦,୦୦୦ ଲୋକ ପ୍ରଭାବିତ ହୋଇଛନ୍ତି। ଏଠାରୁ ୫,୩୩୦ ଜଣଙ୍କୁ ସୁରକ୍ଷିତ ସ୍ଥାନକୁ ଅଣାଯାଇଥିବା ବେଳେ ୪୧ଟି ରିଲିଫ୍ କ୍ୟାମ୍ପ ଚାଲୁ ରହିଛି।

ଢେଙ୍କାନାଳ ଜିଲ୍ଲାରେ ବନ୍ୟା ଯୋଗୁଁ ୪ ଜଣଙ୍କ ଜୀବନ ଯାଇଥିବା ବେଳେ ୧୩ଟି ଘର ନଷ୍ଟ ହୋଇଛି। ଯାଜପୁର ଜିଲ୍ଲାରେ ୭୫ଟି ଗାଁର ୧୧,୧୫୬ ଜଣ ଲୋକ ପ୍ରଭାବିତ ହୋଇଛନ୍ତି। ଏଠାରେ ପ୍ରଶାସନ ପକ୍ଷରୁ ୧,୬୪୦ ଜଣଙ୍କୁ ସ୍ଥାନାନ୍ତର କରାଯାଇଛି ଏବଂ ୪,୦୭୨ ହେକ୍ଟର ଚାଷଜମିରେ ଫସଲ ନଷ୍ଟ ହୋଇଛି। ସେହିପରି ମୟୂରଭଞ୍ଜ ଜିଲ୍ଲାରେ ୨,୪୮୭ ଜଣ ପ୍ରଭାବିତ ହୋଇଥିବା ବେଳେ ୩,୭୪୪ ହେକ୍ଟର ଫସଲ ନଷ୍ଟ ହୋଇଛି। ସମ୍ବଲପୁର ଜିଲ୍ଲାରେ ମାତ୍ର ୮୮ ଜଣ ଲୋକ ପ୍ରଭାବିତ ହୋଇଥିବା ବେଳେ ୭ଟି ଘର କ୍ଷତିଗ୍ରସ୍ତ ହୋଇଥିବା ସରକାରୀ ରିପୋର୍ଟରୁ ଜଣାପଡ଼ିଛି।

ସେପଟେ ଉପରମୁଣ୍ଡରେ ଲଗାଣ ବର୍ଷା ପ୍ରଭାବରେ ହୀରାକୁଦ ଜଳଭଣ୍ଡାରର ଜଳସ୍ତର କ୍ରମାଗତ ଭାବେ ବଢ଼ିବାରେ ଲାଗିଛି। ବର୍ତ୍ତମାନ ଜଳଭଣ୍ଡାରର ଜଳସ୍ତର ୬୧୬.୩୯ ଫୁଟରେ ପହଞ୍ଚିଥିବା ବେଳେ ଆଗାମୀ ସମୟରେ ଏହା ଆହୁରି ବଢ଼ିବାର ସମ୍ଭାବନା ରହିଛି । ଲଗାତାର ବର୍ଷା ଯୋଗୁଁ ମହାନଦୀ ଓ ଏହାର ଉପନଦୀଗୁଡ଼ିକରେ ଜଳପ୍ରବାହ ବୃଦ୍ଧି ପାଇଥିବାରୁ ଡ୍ୟାମକୁ ବିପୁଳ ପରିମାଣର ଜଳ ପ୍ରବେଶ କରୁଛି । ଏହାକୁ ଦୃଷ୍ଟିରେ ରଖି ତଳିଆ ଅଞ୍ଚଳର ଲୋକଙ୍କୁ ସତର୍କ ରହିବା ସହ ପ୍ରଶାସନର ପରାମର୍ଶ ମାନିବାକୁ କୁହାଯାଇଛି ।

ନୂଆଦିଲ୍ଲୀ: ଭେନେଜୁଏଲାରେ ଲଗାତାର ଦୁଇଟି ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଏହି ପ୍ରାକୃତିକ ବିପର୍ଯ୍ୟୟରେ ବ୍ୟାପକ କ୍ଷୟକ୍ଷତି ଘଟିଥିବା ବେଳେ ବହୁ କୋଠା ଭୁଶୁଡ଼ି ପଡ଼ିଛି। ଯୁକ୍ତରାଷ୍ଟ୍ର ଆମେରିକାର ଭୂବିଜ୍ଞାନ ସର୍ବେକ୍ଷଣ ସଂସ୍ଥା (USGS) ଅନୁଯାୟୀ, ପ୍ରଥମ ଭୂମିକମ୍ପଟି ୭.୨ ତୀବ୍ରତା ରହିଥିଲା ଏବଂ ଏହା ରାଜଧାନୀ କାରାକାସ୍ ଠାରୁ ୨୮୪ କିଲୋମିଟର ପଶ୍ଚିମରେ ଥିବା ସାନ୍ ଫେଲିପେ ନିକଟରେ ଅନୁଭୂତ ହୋଇଥିଲା। ଏହାର ଠିକ୍ ପରେ ପରେ ୭.୫ ତୀବ୍ରତାର ଅନ୍ୟ ଏକ ଭୂମିକମ୍ପ ରାଜଧାନୀରୁ ୨୯୩ କିଲୋମିଟର ଦୂର ୟୁମାରେ ଅଞ୍ଚଳରେ ଅନୁଭୂତ ହୋଇଥିଲା। USGS ଆକଳନ ଅନୁଯାୟୀ ଏହି ବିପର୍ଯ୍ୟୟରେ ମୃତ୍ୟୁସଂଖ୍ୟା ୧୦,୦୦୦ ରୁ ୧,୦୦,୦୦୦ ମଧ୍ୟରେ ରହିପାରେ।

ଏହି ଘଟଣାରେ ଗଭୀର ଶୋକ ପ୍ରକାଶ କରିଛନ୍ତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ସେ ସୋସିଆଲ୍ ମିଡିଆ ପ୍ଲାଟଫର୍ମ 'X' ରେ ଲେଖିଛନ୍ତି ଯେ, ଏହି କଷ୍ଟକର ସମୟରେ ଭାରତବାସୀ ଭେନେଜୁଏଲାର ଲୋକଙ୍କ ସହ ଛିଡ଼ା ହୋଇଛନ୍ତି। ପ୍ରାଣ ହରାଇଥିବା ଲୋକଙ୍କ ପରିବାର ପ୍ରତି ସମବେଦନା ଜଣାଇବା ସହ ଭାରତ ସମସ୍ତ ପ୍ରକାର ସମ୍ଭାବ୍ୟ ସହାୟତା ଯୋଗାଇଦେବାକୁ ପ୍ରସ୍ତୁତ ଥିବା ପିଏମ୍ ମୋଦୀ ପ୍ରତିଶ୍ରୁତି ଦେଇଛନ୍ତି।

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ତୁରନ୍ତ ସହାୟତା ଯୋଗାଇଦେବାକୁ ଘୋଷଣା କରିଛନ୍ତି। ଟ୍ରୁଥ୍ ସୋସିଆଲ୍ (Truth Social)ରେ ଏକ ପୋଷ୍ଟ କରି ସେ କହିଛନ୍ତି ଯେ ଆମେରିକୀୟ ସରକାରୀ ସଂସ୍ଥାଗୁଡ଼ିକୁ ତୁରନ୍ତ ଉଦ୍ଧାର କାର୍ଯ୍ୟରେ ସାହାଯ୍ୟ କରିବା ପାଇଁ ନିର୍ଦ୍ଦେଶ ଦିଆଯାଇଛି। ଅନ୍ୟପକ୍ଷରେ, ଭେନେଜୁଏଲାର କାର୍ଯ୍ୟକାରୀ ରାଷ୍ଟ୍ରପତି ଡେଲସି ରୋଡ୍ରିଗେଜ୍ (Delcy Rodriguez) ଦେଶରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି ଏବଂ ମୃତକଙ୍କ ପରିବାରକୁ ସମବେଦନା ଜଣାଇଛନ୍ତି। ଉଦ୍ଧାରକାରୀ ଦଳ ଭଗ୍ନାବଶେଷ ତଳେ ଚାପି ହୋଇ ରହିଥିବା ଲୋକଙ୍କୁ ଉଦ୍ଧାର କରିବା ପାଇଁ ଅଭିଯାନ ଜାରି ରଖିଛନ୍ତି।

ନୂଆଦିଲ୍ଲୀ: ଭେନେଜୁଏଲାରେ ଲଗାତାର ଦୁଇଟି ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଛି। ଏହି ପ୍ରାକୃତିକ ବିପର୍ଯ୍ୟୟରେ ବର୍ତ୍ତମାନ ସୁଦ୍ଧା ଅତିକମରେ ୩୨ ଜଣଙ୍କର ମୃତ୍ୟୁ ହୋଇଥିବା ବେଳେ ୭୦୦ରୁ ଅଧିକ ଲୋକ ଆହତ ହୋଇଛନ୍ତି। ରାଜଧାନୀ କାରାକାସ୍‌ ସମେତ ବିଭିନ୍ନ ସ୍ଥାନରେ କୋଠାଗୁଡ଼ିକ ଭୁଶୁଡ଼ି ପଡ଼ିଥିବା ଦେଖିବାକୁ ମିଳିଛି।

ଆମେରିକାର ଭୂତତ୍ତ୍ୱ ସର୍ବେକ୍ଷଣ ସଂସ୍ଥା (USGS) ର ରିପୋର୍ଟ ଅନୁଯାୟୀ, ପ୍ରଥମେ ଗ୍ରୀନୱିଚ୍ ମାନକ ସମୟ (GMT) ୨୨:୦୪ ରେ ୭.୧ ତୀବ୍ରତାର ଭୂକମ୍ପ ଆସିଥିଲା। ଏହାର ମାତ୍ର ଗୋଟିଏ ମିନିଟ୍ ପରେ ୭.୫ ତୀବ୍ରତାର ଆଉ ଏକ ଶକ୍ତିଶାଳୀ ଝଟକା ଅନୁଭୂତ ହୋଇଥିଲା। ଉଭୟ ଭୂକମ୍ପର କେନ୍ଦ୍ରସ୍ଥଳ ରାଜଧାନୀ କାରାକାସ୍ ଠାରୁ ପ୍ରାୟ ୧୬୦ କିଲୋମିଟର ପଶ୍ଚିମରେ ଥିବା ମୋରନ୍ ସହର ନିକଟରେ ଥିଲା। ଭୂପୃଷ୍ଠରୁ ମାତ୍ର ୧୦ କିଲୋମିଟର ଗଭୀରତାରେ ଏହି ଭୂକମ୍ପ ସୃଷ୍ଟି ହୋଇଥିବାରୁ ଏହାର ପ୍ରଭାବ ଅଧିକ ବିନାଶକାରୀ ହୋଇଛି।

ଦେଶର କାର୍ଯ୍ୟକାରୀ ରାଷ୍ଟ୍ରପତି ଡେଲସି ରୋଡ୍ରିଗୁଏଜ୍ ସୂଚନା ଦେଇ କହିଛନ୍ତି ଯେ, ଉତ୍ତର ଭେନେଜୁଏଲାର ଉପକୂଳବର୍ତ୍ତୀ ରାଜ୍ୟ ଲା ଗୁଆଇରା ସବୁଠାରୁ ଅଧିକ ପ୍ରଭାବିତ ହୋଇଛି। ସେ ଏହି ଅଞ୍ଚଳକୁ ଏକ ‘ବିପର୍ଯ୍ୟୟ ଅଞ୍ଚଳ’ ଭାବେ ଘୋଷଣା କରିଛନ୍ତି, ଯେଉଁଠାରେ ଦର୍ଜନ ଦର୍ଜନ କୋଠା ସମ୍ପୂର୍ଣ୍ଣ ରୂପେ ମାଟିରେ ମିଶିଯାଇଛି। ଯୋଗାଯୋଗ ବ୍ୟବସ୍ଥା ବିଚ୍ଛିନ୍ନ ହୋଇଥିବାରୁ ଏହି ଅଞ୍ଚଳର ମୃତାହତଙ୍କ ସଂଖ୍ୟା ଏପର୍ଯ୍ୟନ୍ତ ପ୍ରାଥମିକ ରିପୋର୍ଟରେ ସାମିଲ କରାଯାଇ ନାହିଁ।

ଏଥିସହ ଦେଶର ଆଭ୍ୟନ୍ତରୀଣ ତଥା ନ୍ୟାୟ ମନ୍ତ୍ରୀ ଡିଓସଡାଡୋ କାବେଲୋ ଆଗାମୀ କିଛି ଘଣ୍ଟା ପର୍ଯ୍ୟନ୍ତ କୋଠା ଭିତରେ ନରହି ଖୋଲା ସ୍ଥାନରେ ରହିବାକୁ ଜନସାଧାରଣଙ୍କୁ ନିବେଦନ କରିଛନ୍ତି। ଏହି ଭୂକମ୍ପର ପ୍ରଭାବ ପଡ଼ୋଶୀ ଦେଶ କଲମ୍ବିଆରେ ମଧ୍ୟ ଅନୁଭୂତ ହୋଇଥିବା ଜଣାପଡ଼ିଛି।

ନୂଆଦିଲ୍ଲୀ: ଜାପାନର ଉତ୍ତର-ପୂର୍ବ ଉପକୂଳରେ ସୋମବାର ଏକ ବଡ଼ ଧରଣର ଭୂମିକମ୍ପ ଅନୁଭୂତ ହୋଇଛି। ରିକ୍ଟର ସ୍କେଲରେ ଏହି ଭୂମିକମ୍ପର ତୀବ୍ରତା ଆରମ୍ଭରୁ ୭.୪ ବୋଲି କୁହାଯାଉଥିଲେ ମଧ୍ୟ ପରେ ଏହାକୁ ୭.୫ ବୋଲି ସଂଶୋଧନ କରାଯାଇଛି। ଏହି ଭୟଙ୍କର କମ୍ପନ ପରେ ଜାପାନ ପାଣିପାଗ ବିଭାଗ (JMA) ପକ୍ଷରୁ ସୁନାମି ସତର୍କ ସୂଚନା ଜାରି କରାଯାଇଛି।

ପାଣିପାଗ ଏଜେନ୍ସିର ରିପୋର୍ଟ ଅନୁଯାୟୀ, ରଏଟର୍ସ ଦ୍ୱାରା ଦିଆଯାଇଥିବା ସୂଚନା ମୁତାବକ ଇୱାତେ ପ୍ରଦେଶର କୁଜି ବନ୍ଦରରେ ପ୍ରାୟ ୮୦ ସେଣ୍ଟିମିଟର (୨.୬ ଫୁଟ) ଉଚ୍ଚର ସୁନାମି ଲହଡ଼ି ଦେଖିବାକୁ ମିଳିଛି। ସେହିପରି ଅନ୍ୟ ଏକ ବନ୍ଦରରେ ୪୦ ସେଣ୍ଟିମିଟର (୧.୩ ଫୁଟ) ଉଚ୍ଚର ଲହଡ଼ି ରେକର୍ଡ କରାଯାଇଛି। ଏହାଛଡ଼ା ଉପକୂଳବର୍ତ୍ତୀ ଅଞ୍ଚଳରେ ୩ ମିଟର (୧୦ ଫୁଟ) ପର୍ଯ୍ୟନ୍ତ ଉଚ୍ଚ ଲହଡ଼ି ଆସିବାର ଆଶଙ୍କା ରହିଥିବା ବିଭାଗ ପକ୍ଷରୁ କଡ଼ା ଚେତାବନୀ ଦିଆଯାଇଛି। 

ସ୍ଥାନୀୟ ସମୟ ଅନୁଯାୟୀ ଅପରାହ୍ନ ୪:୫୩ ମିନିଟ୍ରେ ଏହି ଭୂମିକମ୍ପ ସଂଘଟିତ ହୋଇଥିଲା। ଏହାର କେନ୍ଦ୍ରସ୍ଥଳ ଉତ୍ତର ଇୱାତେ ପ୍ରଦେଶ ନିକଟ ପ୍ରଶାନ୍ତ ମହାସାଗରର ମାତ୍ର ୧୦ କିଲୋମିଟର ଗଭୀରରେ ରହିଥିଲା। ଏହି ଶକ୍ତିଶାଳୀ କମ୍ପନର ପ୍ରଭାବ ଏତେ ଅଧିକ ଥିଲା ଯେ, କେନ୍ଦ୍ରସ୍ଥଳଠାରୁ ଶହ ଶହ କିଲୋମିଟର ଦୂରରେ ଥିବା ରାଜଧାନୀ ଟୋକିଓରେ ମଧ୍ୟ ବଡ଼ ବଡ଼ ଅଟ୍ଟାଳିକାଗୁଡ଼ିକ ଦୋହଲି ଯାଇଥିଲା। ଭୂମିକମ୍ପ କାରଣରୁ ଟୋକିଓ-ଆଓମୋରୀ ବୁଲେଟ୍ ଟ୍ରେନ୍ ଚଳାଚଳକୁ ସମ୍ପୂର୍ଣ୍ଣ ରୂପେ ବାତିଲ କରାଯାଇଛି ବୋଲି କ୍ୟୋଡୋ (Kyodo) ରିପୋର୍ଟରେ ପ୍ରକାଶ ପାଇଛି।

ଇୱାତେ, ଆଓମୋରୀ ଏବଂ ହୋକାଇଡୋର କିଛି ଅଂଶ ପାଇଁ ସୁନାମି ଆଲର୍ଟ ଜାରି ରହିଥିବାବେଳେ କେନ୍ଦ୍ରସ୍ଥଳର ଦକ୍ଷିଣରେ ଥିବା ମିୟାଗି ଏବଂ ଫୁକୁସିମାର ଉପକୂଳବର୍ତ୍ତୀ ଅଞ୍ଚଳ ପାଇଁ ଲୋୟର-ଲେଭେଲ ଆଡଭାଇଜରୀ ଦିଆଯାଇଛି। ସ୍ଥାନୀୟ ପ୍ରଶାସନ ଲୋକଙ୍କୁ ତୁରନ୍ତ ଉପକୂଳ ଏବଂ ନଦୀକୂଳ ଅଞ୍ଚଳ ଛାଡ଼ି ସୁରକ୍ଷିତ ତଥା ଉଚ୍ଚ ସ୍ଥାନକୁ ଚାଲିଯିବାକୁ ନିର୍ଦ୍ଦେଶ ଦେଇଛି। ପାଣିପାଗ ବିଭାଗ ଚେତାବନୀ ଦେଇ କହିଛି, "ସୁନାମି ଲହଡ଼ି ବାରମ୍ବାର ଆସିବାର ସମ୍ଭାବନା ରହିଛି, ତେଣୁ ସତର୍କତା ପ୍ରତ୍ୟାହାର ନହେବା ପର୍ଯ୍ୟନ୍ତ କେହି ବି ସୁରକ୍ଷିତ ସ୍ଥାନ ନଛାଡ଼ନ୍ତୁ।"

ମାନିଲା, ଫିଲିପାଇନ୍ସ: କେନ୍ଦ୍ରୀୟ ଫିଲିପାଇନ୍ସରେ ସୋମବାର ବିଳମ୍ବିତ ରାତିରେ ଅନୁଭୂତ ହୋଇଥିବା ଏକ ଶକ୍ତିଶାଳୀ ୬.୯ ତୀବ୍ରତାର ଭୂକମ୍ପ ଯୋଗୁଁ ବ୍ୟାପକ କ୍ଷୟକ୍ଷତି ହେବା ସହ ବର୍ତ୍ତମାନ ସୁଦ୍ଧା ୬୯ ଜଣଙ୍କ ମୃତ୍ୟୁ ହୋଇଥିବା ସୂଚନା ମିଳିଛି। ଏହି ଭୟଙ୍କର ପ୍ରାକୃତିକ ବିପର୍ଯ୍ୟୟରେ ୧୫୦ରୁ ଅଧିକ ଲୋକ ଆହତ ହୋଇଛନ୍ତି। ବହୁ ଲୋକ ଭୁଶୁଡ଼ି ପଡ଼ିଥିବା କୋଠା ଏବଂ ମାଟି ଅତଡ଼ା ତଳେ ଚାପି ହୋଇ ରହିଥିବା ଆଶଙ୍କା ଥିବାରୁ ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ଅଧିକାରୀମାନେ ସତର୍କ କରାଇଛନ୍ତି।

ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ବେକ୍ଷଣ (USGS) ଅନୁଯାୟୀ, ଭୂକମ୍ପର କେନ୍ଦ୍ରସ୍ଥଳ (Epicentre) ଉପକୂଳବର୍ତ୍ତୀ ସହର ବୋଗୋର ଉତ୍ତର-ପୂର୍ବରେ ପ୍ରାୟ ୧୭ କିଲୋମିଟର ଦୂରରେ ଥିଲା। ବୋଗୋ ଏକ ଜନବହୁଳ ସହର, ଯେଉଁଠାରେ ପ୍ରାୟ ୯୦ ହଜାର ଲୋକ ବସବାସ କରନ୍ତି।

• ବୋଗୋ ସହର: ଏହି ଭୂକମ୍ପରେ ବୋଗୋ ସହର ସର୍ବାଧିକ କ୍ଷତିଗ୍ରସ୍ତ ହୋଇଛି, ଯେଉଁଠାରେ ଅତି କମରେ ୧୪ ଜଣଙ୍କ ମୃତ୍ୟୁ ହୋଇଥିବା ଜଣାପଡ଼ିଛି।

• ଭୂସ୍ଖଳନ: ପାହାଡ଼ ଧସିଯିବାରୁ ତଳେ ଥିବା ଅନେକ ଗ୍ରାମ ମାଟି ଅତଡ଼ାରେ ଚାପି ହୋଇଯାଇଛି। ବିଶେଷ କରି ଏକ ପାହାଡିଆ ଗାଁରେ ଏକ ଝୁମ୍ପୁଡ଼ି ଘର ସମ୍ପୂର୍ଣ୍ଣ ପୋତି ହୋଇଯାଇଛି, ତେଣୁ ସେଠାରେ ଅନେକ ଲୋକ ଫସି ରହିଥିବା ଅନୁମାନ କରାଯାଉଛି।

• ସାନ୍ ରେମିଗିଓ: ଏହି ଟାଉନରେ ମଧ୍ୟ ବ୍ୟାପକ କ୍ଷୟକ୍ଷତି ଘଟିଛି ଏବଂ ସେଠାରେ ଛଅ ଜଣଙ୍କ ମୃତ୍ୟୁ ହୋଇଥିବା ସୁନିଶ୍ଚିତ କରାଯାଇଛି। ମୃତକଙ୍କ ମଧ୍ୟରେ ତିନି ଜଣ ତଟରକ୍ଷୀ ବାହିନୀ କର୍ମଚାରୀ, ଜଣେ ଅଗ୍ନିଶମ କର୍ମଚାରୀ ଏବଂ ଜଣେ ଶିଶୁ ଅଛନ୍ତି।

ଏହି ବିପର୍ଯ୍ୟୟ ପରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର ଏବଂ ରିଲିଫ୍ ଅପରେସନ ଚାଲିଛି। କିନ୍ତୁ ଭଙ୍ଗା ଅଟ୍ଟାଳିକା ଏବଂ ଭୂସ୍ଖଳନ ଯୋଗୁଁ ରାସ୍ତା ଅବରୋଧ ହୋଇଥିବାରୁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହେଉଛି।

ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ତୀବ୍ର ଭୂମିକମ୍ପ ଯୋଗୁଁ କାନ୍ଥ, ଘର ଏବଂ ରାସ୍ତାମାନଙ୍କରେ ବଡ଼ ବଡ଼ ଫାଟ ସୃଷ୍ଟି ହୋଇଛି। ଅଧିକାରୀମାନେ ଆହତମାନଙ୍କୁ ତୁରନ୍ତ ଚିକିତ୍ସା ଯୋଗାଇ ଦେବା ପାଇଁ ପଦକ୍ଷେପ ନେଉଛନ୍ତି ଏବଂ ଫସି ରହିଥିବା ଲୋକଙ୍କୁ ସୁରକ୍ଷିତ ଭାବେ ବାହାର କରିବା ପାଇଁ ସବୁ ପ୍ରକାର ପ୍ରୟାସ ଜାରି ରଖିଛନ୍ତି।

ନୂଆଦିଲ୍ଳୀ: ଜଳବାୟୁ ପରିବର୍ତ୍ତନ ଯୋଗୁଁ ଦେଶରେ ପ୍ରକୃତିର ପ୍ରକୋପ ଭୟଙ୍କର ଭାବେ ବୃଦ୍ଧି ପାଇବାରେ ଲାଗିଛି । ଏହାଦ୍ବାରା କେବଳ ମଣିଷ ନୁହେଁ, ପଶୁପକ୍ଷୀ , ଘରବାଡ଼ି ଓ ଚାଷବାସ ମଧ୍ୟ କ୍ଷତିଗ୍ରସ୍ତ ହେଉଛି । ଚଳିତ ବର୍ଷ ୨୦୨୪ରେ ୯ ମାସ ମଧ୍ୟରୁ ୮ ମାସରୁ ଅଧିକ ସମୟ ଧରି ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହୋଇଛି ଭାରତ । କେବେ ପ୍ରବଳ ବର୍ଷା ସାଙ୍ଗକୁ ବନ୍ୟା ତ କେବେ ପ୍ରବଳ ଖରା ସହ ମରୁଡ଼ି ଏବଂ କେବେକେବେ ବାତ୍ୟା ଓ ଭୂସ୍ଖଳନ ଯୋଗୁଁ ଦେଶବାସୀ ଦୁର୍ଦ୍ଦଶାର ସମ୍ମୁଖୀନ ହୋଇଛନ୍ତି । ଏବର୍ଷ ୯୩ ପ୍ରତିଶତ ଦିନ ଏଭଳି ଦୁର୍ଦ୍ଦଶାରେ କଟି ଯାଇଛି । ଯାହାକି ପୂର୍ବବର୍ଷ ତୁଳନାରେ ଅଧିକ ।

ବିଜ୍ଞାନ ଓ ପରିବେଶ କେନ୍ଦ୍ର ପକ୍ଷରୁ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ ଏଭଳି ପ୍ରାକୃତିକ ବିପର୍ଯୟ ଯୋଗୁଁ ଚଳିତ ବର୍ଷ ଗତ ୯ ମାସ ମଧ୍ୟରେ ୩ ହଜାର ୨୩୮ ଜଣଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ଅଢ଼େଇ ଲକ୍ଷ କୋଠାବାଡ଼ି ଧ୍ବଂସ ହୋଇଯାଇଛି । ୩୦ ଲକ୍ଷ ହେକଟର ଚାଷଜମି ମଧ୍ୟ ଏହି ସମୟରେ କ୍ଷତିଗ୍ରସ୍ତ ହୋଇଛି । ରିପୋର୍ଟରେ କୁହାଯାଇଛି ଯେ ଗତ ୨୭୪ ଦିନ ମଧ୍ୟରୁ ୨୫୫ ଦିନରେ ଏଭଳି ପରିସ୍ଥିତି ଦେଖାଦେଇଛି । ପ୍ରବଳ ଖରା, ପ୍ରବଳ ବର୍ଷା, ଶୀତ ଲହରୀ, ବନ୍ୟା, ବାତ୍ୟା, ଭୂସ୍ଖଳନ ଓ ବଜ୍ରପାତ ଏଥର ଅଧିକ କ୍ଷତି ଘଟାଇଛି । ଗତବର୍ଷ ଏହି ସମୟ ମଧ୍ୟରେ ୨୩୫ ଦିନ ଲୋକ ଉପରୋକ୍ତ ସମସ୍ୟାର ସମ୍ମୁଖୀନ ହୋଇଥିଲେ । ସେହିବର୍ଷ ୨ ହଜାର ୯୨୩ ଜଣ ପ୍ରାଣ ହରାଇଥିବା ବେଳେ ପ୍ରାୟ ୨୦ ଲକ୍ଷ ହେକଟର ଚାଷ ଜମି କ୍ଷତିଗ୍ରସ୍ତ ହୋଇଥିଲା ଏବଂ ୮୦ ହଜାର ଘରବାଡ଼ି ଧ୍ବଂସ ପାଇଥିଲା ।

ଚଳିତ ବର୍ଷ ପ୍ରତିକୂଳ ପାଗ ଯୋଗୁଁ ମଧ୍ୟପ୍ରଦେଶ ସର୍ବାଧିକ କ୍ଷତିଗ୍ରସ୍ତ ହୋଇଛି । ରାଜ୍ୟ ୧୭୬ ଦିନ ବିପର୍ଯ୍ୟୟର ସମ୍ମୁଖୀନ ହୋଇଥିବା ବେଳେ ୩୫୩ ଜଣ ପ୍ରାଣ ହରାଇଛନ୍ତି । ତେବେ କେରଳରେ ସର୍ବାଧିକ ୫୫୦ ଜଣ ପ୍ରାଣ ହରାଇଲେଣି । ମହାରାଷ୍ଟ୍ର ଭଳି ରାଜ୍ୟକୁ ଚଳିତ ବର୍ଷ ବର୍ତ୍ତମାନ ସୁଦ୍ଧା ୧୪୨ ଦିନ ବିପର୍ଯ୍ୟୟର ସମ୍ମୁଖୀନ ହେବାକୁ ପଡ଼ିଲାଣି । ସେହିଭଳି ଆନ୍ଧ୍ର ପ୍ରଦେଶରେ ଦେଶରେ ସର୍ବାଧିକ ପ୍ରାୟ ୮୬ ହଜାର ଘର କ୍ଷତିଗ୍ରସ୍ତ ହୋଇଛି ।

ପ୍ରାକୃତିକ ବିପର୍ଯ୍ୟୟର ପ୍ରକୋପ କେନ୍ଦ୍ରୀୟ ଭାରତରେ ଅଧିକ ରହିଛି । ଏହି ଅଞ୍ଚଳ ୨୧୮ ଦିନ ଧରି ବିପର୍ଯ୍ୟୟର ସମ୍ମୁଖୀନ ହୋଇଥିବା ବେଳେ ଏକ ହଜାରରୁ ଅଧିକ ଲୋକ ପ୍ରାଣ ହରାଇଲଣି । ଉତ୍ତର ପୂର୍ବାଞ୍ଚଳ ରାଜ୍ୟଗୁଡ଼ିକ ୨୧୩ ଦିନ ଏଭଳି ବିପଦର ସମ୍ମୁଖୀନ ହୋଇଥିବା ବେଳେ ଏହି ଅଞ୍ଚଳରେ ୭୪୧ ଜଣ ପ୍ରାଣ ହରାଇଲେଣି । ଉତ୍ତର ଭାରତରେ ୭୩୪ ଏବଂ ଦକ୍ଷିଣ ଭାରତରେ ୭୬୨ ଜଣ ପ୍ରାଣ ହରାଇଲେଣି ।

ଜଳବାୟୁ ପରିବର୍ତ୍ତନ ମାନବ ଜାତି ପାଇଁ ଆହୁରି କେତେ କ୍ଷତିକାରକ, ତାହା ଏହି ରିପୋର୍ଟର ଆଉ ଏକ ଅଧ୍ୟୟନରେ ପ୍ରତିବଫଳିତ ହୋଇଛି । କୁହାଯାଇଛି ଯେ ଚଳିତ ବର୍ଷ ଜାନୁଆରୀ ମାସ ଥିଲା ସବୁଠାରୁ ସୁଷ୍କ ମାସ । ୧୯୦୧ ପରେ ଏଭଳି ଚିତ୍ର ଦେଖିବାକୁ ମିଳିନଥିଲା । ଏହାସହିତ ଫେବୃଆରୀ ମାସ ସବୁଠାରୁ ଉତ୍ତପ୍ତ ଥିଲା । ଏହା ଗତ ୧୨୩ ବର୍ଷର ରେକର୍ଡ ଭାଙ୍ଗିଥିଲା । ମଇ ମାସରେ ପ୍ରଚଣ୍ଡ ରୌଦ୍ରତାପ ଅନୁଭୂତ ହୋଇଥିଲା । ଜୁଲାଇ, ଅଗଷ୍ଟ ଓ ସେପ୍ଟେମ୍ବର ୧୯୦୧ ପରେ ସର୍ବାଧିକ ସର୍ବନିମ୍ନ ତାପମାତ୍ରା ଅନୁଭୂତ ହୋଇଥିଲା ।

ପାଣିପାଗରେ ଏଭଳି ଅସ୍ବାଭାବିକ ପରିବର୍ତ୍ତନ ନେଇ ପରିବେଶବିତ ମାନେ ଉଦ୍‌ବେଗ ପ୍ରକାଶ କରିଛନ୍ତି । ସେମାନେ କହିଛନ୍ତି ଯେ ଜଳବାୟୁ ପରିର୍ତ୍ତନର ମୁକାବିଲା ଲାଗି ଆମକୁ ଅଧିକ ସକ୍ରିୟ ହେବାକୁ ପଡ଼ିବ । ଏବେଠାରୁ ସତର୍କ ନହେଲେ ଆସନ୍ତା ପିଢ଼ି ପାଇଁ ଭବିଷ୍ୟତ ଅସୁରକ୍ଷିତ ହୋଇପଡ଼ିବ ।

ଭୁବନେଶ୍ୱର: ପ୍ରାକୃତିକ ବିପର୍ଯ୍ୟୟ ଯୋଗୁଁ ଗତ ବର୍ଷ ରାଜ୍ୟରେ ୧୯୪ ଜଣଙ୍କ ମୃତ୍ୟୁ ହୋଇଛି। ବଜ୍ରପାତ, ବନ୍ୟା ଓ ପବନ ସାଙ୍ଗକୁ ଅଂଶୁଘାତରେ ଏତେ ସଂଖ୍ୟକ ଲୋକଙ୍କ ଜୀବନ ଯାଇଛି। ମୋଟ ମୃତ୍ୟୁର ପ୍ରାୟ ୯୦ ପ୍ରତିଶତ କେବଳ ବଜ୍ରପାତ ଯୋଗୁଁ ହୋଇଛି। ୨୦୨୨ରେ ବଜ୍ରପାତରେ ୧୬୮ ଜଣ ଲୋକ ପ୍ରାଣ ହରାଇଛନ୍ତି ବୋଲି ଆଇଏମ୍‌‌ଡି ପକ୍ଷରୁ ପ୍ରକାଶ ପାଇଥିବା “ଓଡ଼ିଶା କ୍ଲାଇମେଟ୍‌‌ ସ୍ଟେଟ୍‌‌ମେଣ୍ଟ-୨୦୨୨”ରେ ଏହି ତଥ୍ୟ ଦିଆଯାଇଛି। ବନ୍ୟା ଓ ପ୍ରବଳ ବର୍ଷା ଯୋଗଁ ୧୨ ଜଣଙ୍କ ମୃତ୍ୟୁ ହୋଇଥିବା ବେଳେ ହିଟ୍‌‌ୱେଭ୍‌‌ରେ ୧୨ ଜଣଙ୍କ ପ୍ରାଣହାନୀ ହେବା ସହ ଅନ୍ୟାନ୍ୟ ଘଟଣାରେ ୨ ଜଣଙ୍କ ଜୀବନ ଯାଇଥିବା ବେଳେ ବଜ୍ରପାତ ଜନିତ ମୃତ୍ୟୁ ଏକ ଆହ୍ବାନ ପାଲଟିଛି। ରାଜ୍ୟ ସରକାର ବିପର୍ଯ୍ୟୟ ପରିଚାଳନା ଓ ଶୂନ୍ୟ ଜୀବନହାନୀକୁ ମୂଳ ମନ୍ତ୍ର କରିଛନ୍ତି। ଅନ୍ୟ ବିପର୍ଯ୍ୟୟଗୁଡ଼ିକରେ ବିଭିନ୍ନ ରାଜ୍ୟ ତୁଳନାରେ ଓଡ଼ିଶାର ସଫଳତା ବହୁ ଆଗରେ ରହିଛି। ମାତ୍ର ବଜ୍ରପାତ ଜନିତ ମୃତ୍ୟୁ ରାଜ୍ୟ ପାଇଁ ବଡ଼ ବିପର୍ଯ୍ୟୟ ସାଜିଛି। କେମିତି ଏହି ମୃତ୍ୟୁ ରୋକିବ ସେନେଇ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କ ନିଦ ହଜିଛି। ୨୦୨୧ରେ ବଜ୍ରପାତଜନିତ ମୃତ୍ୟୁରେ ଓଡ଼ିଶା ଦେଶରେ ଶୀର୍ଷରେ ରହିଥିଲା। ସେହି ବର୍ଷ ରାଜ୍ୟରେ ୨୧୩ ଜଣଙ୍କର ବଜ୍ରପାତରେ ମୃତ୍ୟୁ ହୋଇଥିଲା।

ପ୍ରତି ବର୍ଷ ଓଡ଼ିଶା ବନ୍ୟା ବାତ୍ୟା ସମେତ ପ୍ରବଳ ଗ୍ରୀଷ୍ମ ପ୍ରବାହର ସାମନା କରୁଛି। ଏହି ସବୁ ପ୍ରାକୃତିକ ବିପର୍ଯ୍ୟୟକୁ ରାଜ୍ୟ ସରକାର ମୁକାବିଲା କରିବାରେ ସଫଳ ହୋଇପାରୁଛନ୍ତି। ହେଲେ ପ୍ରତି ଦିନ ରାଜ୍ୟର ବିଭିନ୍ନ ସ୍ଥାନରେ ବଜ୍ରପାତ ଜନିତ ମୃତ୍ୟୁ ହେଉଥିଲେ ମଧ୍ୟ ଏହାକୁ ରୋକି ନ ପାରିବା ବଡ଼ ଚିନ୍ତାର କାରଣ ସାଜିଛି। ୨୦୧୭-୧୮ରେ ରାଜ୍ୟରୁ ସର୍ବାଧିକ ୪୭୨ ଜଣଙ୍କର ବଜ୍ରପାତରେ ମୃତ୍ୟୁ ହୋଇଥିଲା। ଏହା ପରେ ରାଜ୍ୟ ସରକାର ଏହାକୁ ଗୁରୁତ୍ୱର ସହ ନେଇ ବ୍ୟାପକ ସଚେତନତା କାର୍ଯ୍ୟକ୍ରମ ହାତକୁ ନେଇଥିଲେ। ବଜ୍ରପାତ ଜନିତ ସତର୍କ ସୂଚନା ପାଇବା ପାଇଁ ଦାମିନି ଓ ସତର୍କ ଆପ୍‌‌ର ପ୍ରଚଳନ ସହ ମୋବାଇଲ୍‌‌କୁ ସଚେତନତା ମେସେଜ ମଧ୍ୟ ଦିଆଯାଉଛି। ଏହା ସତ୍ତ୍ବେ ଅନେକ ଲୋକ ଏହାକୁ ଗୁରୁତ୍ବ ଦେଉ ନ ଥିବାରୁ ବଜ୍ରପାତଜନିତ ମୃତ୍ୟୁ ଉଦ୍‌ବେଗଜନକ ରହିଛି।

ବାଲେଶ୍ୱରଠାରେ ବଜ୍ରପାତ ଗବେଷଣା କେନ୍ଦ୍ର ପ୍ରତିଷ୍ଠା ପାଇଁ କେନ୍ଦ୍ର ସରକାର ଘୋଷଣା କରିଥିଲେ ମଧ୍ୟ ଏହା କେବଳ ସର୍ଭେରେ ସୀମିତ ରହିଛି। ଏହି କେନ୍ଦ୍ର ସ୍ଥାପନ ହୋଇଥିଲେ ବଜ୍ରପାତ ଉପରେ ଗବେଷଣା ହେବା ସହ ବଜ୍ରପାତ ମୃତ୍ୟୁ ରୋକିବା ଉପରେ କାର୍ଯ୍ୟ କରାଯାଇଥାନ୍ତା। ମାତ୍ର ଭୂବିଜ୍ଞାନ ମନ୍ତ୍ରଣାଳାୟର ନିଷ୍କ୍ରିୟତା ଯୋଗୁଁ ଏହି କାର୍ଯ୍ୟ ବିଳମ୍ବ ହୋଇ ଚାଲିଛି। ସମାନ ଭାବେ ବାଲେଶ୍ୱର ଓ ସମ୍ବଲପୁର ଡପଲାର୍‌‌ ରାଡାର ସ୍ଥାପନରେ ମଧ୍ୟ ତତ୍‌‌ପରତା ଦେଖା ଯାଉନାହିଁ। ରାଜ୍ୟରେ ମୟୂରଭଞ୍ଜ, କେନ୍ଦୁଝର, ବାଲେଶ୍ୱର ଓ ଭଦ୍ରକ ଆଦିରେ ବଜ୍ରପାତ ମୃତ୍ୟୁ ସଂଖ୍ୟା ଅଧିକ ରହିଛି।