ଆର୍ଥିକ ବର୍ଷ ୨୦୨୫-୨୬ (FY26) ଶେଷ ହେବାକୁ ଯାଉଛି। କ୍ୟାଲେଣ୍ଡର ଅନୁଯାୟୀ ମାର୍ଚ୍ଚ ୩୦ (ସୋମବାର) ହେଉଛି ଏହି ଆର୍ଥିକ ବର୍ଷର ଶେଷ କାର୍ଯ୍ୟ ଦିବସ କିମ୍ବା ବ୍ୟବସାୟିକ ଦିନ। କାରଣ ମାର୍ଚ୍ଚ ୩୧ (ମଙ୍ଗଳବାର) ଦିନ ସେୟାର ବଜାର ବନ୍ଦ ରହିବ ଏବଂ ଅନେକ ରାଜ୍ୟରେ ବ୍ୟାଙ୍କଗୁଡ଼ିକ ମଧ୍ୟ ଛୁଟି ରହିବ। ତେଣୁ ଆର୍ଥିକ ଦୃଷ୍ଟିକୋଣରୁ ସୋମବାରକୁ ହିଁ ଶେଷ କାର୍ଯ୍ୟ ଦିବସ ଭାବେ ଗ୍ରହଣ କରାଯାଇଛି।

କାହିଁକି ବନ୍ଦ ରହିବ ସେୟାର ବଜାର?

ମାର୍ଚ୍ଚ ୩୧ ତାରିଖରେ ମହାବୀର ଜୟନ୍ତୀ ଥିବାରୁ ବମ୍ବେ ଷ୍ଟକ୍ ଏକ୍ସଚେଞ୍ଜ (BSE) ଏବଂ ନ୍ୟାସନାଲ ଷ୍ଟକ୍ ଏକ୍ସଚେଞ୍ଜ (NSE) ବନ୍ଦ ରହିବ। ଏହି ଦିନ ସେୟାର ବଜାରରେ କୌଣସି କାରବାର ହେବ ନାହିଁ। ଏଥିସହ ଦେଶର ବୃହତ୍ତମ କମୋଡିଟି ଏକ୍ସଚେଞ୍ଜ ମଲ୍ଟି କମୋଡିଟି ଏକ୍ସଚେଞ୍ଜ (MCX) ମଧ୍ୟ ସକାଳ ସେସନରେ (ସକାଳ ୯ଟାରୁ ସନ୍ଧ୍ୟା ୫ଟା) ବନ୍ଦ ରହିବ ଏବଂ କେବଳ ସନ୍ଧ୍ୟା ସେସନରେ ଖୋଲା ରହିବ। ଏହା ପରେ ଏପ୍ରିଲ ୩ ତାରିଖରେ ଗୁଡ୍ ଫ୍ରାଇଡେ (Good Friday) ଅବସରରେ ମଧ୍ୟ ସେୟାର ବଜାର ବନ୍ଦ ରହିବାକୁ ଯାଉଛି। ତେଣୁ ନିବେଶକମାନଙ୍କୁ ସୋମବାର ଦିନ ହିଁ ନିଜର ଆର୍ଥିକ କାରବାର ସାରିବାକୁ ପରାମର୍ଶ ଦିଆଯାଇଛି।

ବ୍ୟାଙ୍କ ଛୁଟି ଏବଂ ଆର୍ଥିକ କାରବାର

ସାଧାରଣତଃ ମାର୍ଚ୍ଚ ୩୧ ତାରିଖ ହେଉଛି ବ୍ୟାଙ୍କଗୁଡ଼ିକର ବାର୍ଷିକ ହିସାବ ବନ୍ଦ ବା ଆନୁଆଲ୍ କ୍ଲୋଜିଂ (Annual Closing) ଦିନ। ଏହାବ୍ୟତୀତ ଚଳିତ ବର୍ଷ ମାର୍ଚ୍ଚ ୩୧ରେ ମହାବୀର ଜୟନ୍ତୀ ପଡ଼ୁଥିବାରୁ ଦେଶର ବିଭିନ୍ନ ରାଜ୍ୟରେ ବ୍ୟାଙ୍କଗୁଡ଼ିକ ସାଧାରଣ ଗ୍ରାହକଙ୍କ ପାଇଁ ବନ୍ଦ ରହିବ। ଅବଶ୍ୟ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (RBI) ପକ୍ଷରୁ ସରକାରୀ କାରବାର କରୁଥିବା ଏଜେନ୍ସି ବ୍ୟାଙ୍କଗୁଡ଼ିକୁ ଖୋଲା ରଖିବାକୁ ନିର୍ଦ୍ଦେଶ ଦିଆଯାଇଛି, ତଥାପି ସାଧାରଣ ଗ୍ରାହକମାନେ ଶାଖାଗୁଡ଼ିକରେ ନିଜର ଦୈନନ୍ଦିନ କାରବାର କରିବାରେ ଅସୁବିଧାର ସମ୍ମୁଖୀନ ହୋଇପାରନ୍ତି। ତେବେ ଗ୍ରାହକଙ୍କ ସୁବିଧା ପାଇଁ ଅନ୍‌ଲାଇନ୍ ବ୍ୟାଙ୍କିଙ୍ଗ୍, ୟୁପିଆଇ (UPI) ଏବଂ ଏଟିଏମ୍ (ATM) ସେବା ପୂର୍ବଭଳି ସ୍ୱାଭାବିକ ରହିବ।

ଯେଉଁମାନେ ଆର୍ଥିକ ବର୍ଷ ଶେଷ ହେବା ପୂର୍ବରୁ ଆୟକର ସମ୍ବନ୍ଧୀୟ କାମ, ଟିକସ ସଞ୍ଚୟକାରୀ ଯୋଜନାରେ ନିବେଶ କିମ୍ବା ବ୍ୟାଙ୍କ ଶାଖାରେ କୌଣସି ଜରୁରୀ କାମ କରିବାକୁ ଚାହୁଁଛନ୍ତି, ସେମାନଙ୍କ ପାଇଁ ମାର୍ଚ୍ଚ ୩୦ (ସୋମବାର) ଶେଷ ସୁଯୋଗ ବୋଲି ବିବେଚନା କରାଯାଉଛି।

ସମ୍ବଲପୁର: ଆଜି ଦିନ ୧୦ଟାରୁ ଆସନ୍ତା ୪୮ ଘଣ୍ଟା ଲାଗି ସମ୍ବଲପୁର ଜିଲ୍ଲାରେ ଇଣ୍ଟରନେଟ ସେବା ବନ୍ଦ ରହିବ। ଏନେଇ ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି। ଏଥିସହ ସମସ୍ତ ସୋସିଆଲ ମିଡିଆ ବ୍ୟବହାର ଉପରେ କଟକଣା ଲାଗାଯାଇଛି। ବୁଧବାର ସମ୍ବଲପୁରର ଧନୁପାଲି ଛକରେ ହନୁମାନ ଜୟନ୍ତୀ ଉପଲକ୍ଷେ ବାଇକ ରାଲିରେ ପଥର ମାଡ଼ ହୋଇଛି। ଅନ୍ୟଏକ ଗୋଷ୍ଠୀର ପଥର ମାଡ଼ରେ ୧୦ରୁ ଊର୍ଦ୍ଧ୍ୱ ପୋଲିସ କର୍ମଚାରୀ ଆହତ ହୋଇଛନ୍ତି। ଏହି ଘଟଣାପରେ ଶାନ୍ତି ଶୃଙ୍ଖଳାକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ହୋଇଥିବା ଜଣାପଡିଛି।

ସୂଚନାଯୋଗ୍ୟ, ଗତକାଲି ହନୁମାନ ଜୟନ୍ତୀ ପାଇଁ ସମ୍ବଲପୁର ଧନୁପାଲି ଛକରୁ ବାଇକ ରାଲି ଯିବା ବେଳେ ପଥର ମାଡ଼ ହୋଇଥିଲା। ସନ୍ଧ୍ୟା ସମୟରେ ରାଲିରେ ଥିବା ଲୋକ ଓ ପୁଲିସ ଉପରକୁ ପଥର ମାଡ଼ ହୋଇଥିଲା। ରାଲି ପାଇଁ ମୁତୟନ ଥିବା ୨ ଜଣ ଥାନା ଅଧିକାରୀଙ୍କ ସମେତ ପ୍ରାୟ ୧୦ ଜଣ ପୁଲିସ କର୍ମଚାରୀ ଆହତ ହୋଇଛନ୍ତି। ଏହି ଘଟଣାକୁ ନେଇ ଉତ୍ତେଜିତ ଲୋକେ ଦୋକାନ ଜାଳିବା ସହ କାର୍ ଏବଂ ବାଇକ ଭାଙ୍ଗି ଦେଇଥିଲେ। ପ୍ରଶାସନ ପକ୍ଷରୁ ୧୪୪ ଧାରା ଜାରି ହୋଇଥିଲା। ଏହି ମାମଲାରେ ୨୫ଜଣଙ୍କୁ ଗିରଫ କରାଯାଇଥିବା ବେଳେ ଆଉ କିଛି ଲୋକଙ୍କୁ ଅଟକ ରଖାଯାଇଥିବା ଜଣାଯାଇଛି।