ମେଷ: ରବି, ସୋମବାରରେ ଭବିଷ୍ୟତ ପାଇଁ ବଡ଼ ଯୋଜନା ପ୍ରସ୍ତୁତ କରିବେ। ଅଟକି ରହିଥିବା ଧନ ଫେରିପାଇବେ। ମଙ୍ଗଳ,ବୁଧ, ଗୁରୁବାରରେ କର୍ମକ୍ଷେତ୍ରରେ ନିଜର ପ୍ରତିଭାକୁ ବିକଶିତ କରିବେ। ଶୁକ୍ର, ଶନିବାରରେ ଜୀବନରେ ଭିନ୍ନ ମୋଡ଼ ଦେଖାଦେବ। ଛାତ୍ରଛାତ୍ରୀମାନେ ଲେଖାପଢ଼ାରେ ମନୋନିବେଶ କରିବେ।  

ବୃଷ: ରବି, ସୋମବାରରେ ସନ୍ତାନସନ୍ତତିଙ୍କୁ ନେଇ ଚିନ୍ତାରେ ପଡ଼ିପାରନ୍ତି। ଧାର୍ମିକ ମନୋବୃତ୍ତି ରଖି ଗରିବଙ୍କୁ ସାହାଯ୍ୟ କରିବେ। ମଙ୍ଗଳ,ବୁଧ, ଗୁରୁବାରରେ ପରିବାରରେ ଲାଗି ରହିଥିବା ବାଦବିବାଦ ପରିସ୍ଥିତିରେ ସୁଧାର ଆସିବ। ଶୁକ୍ର, ଶନିବାରରେ ଅର୍ଥନୈତିକ କ୍ଷେତ୍ରରେ ଉନ୍ନତି କରିବେ।  

ମିଥୁନ: ରବି, ସୋମବାରରେ ସମୟ ଅତ୍ୟନ୍ତ ଅନୁକୂଳ ରହିବ। ସଙ୍ଗୀତ କଳା ପ୍ରତି ରୁଚି ବଢ଼ିବ। ମଙ୍ଗଳ, ବୁଧ, ଗୁରୁବାରରେ କର୍ମକ୍ଷେତ୍ରରେ ଆପଣଙ୍କ ମତାମତ ରଖିବାର ସୁଯୋଗ ପାଇବେ। ଶୁକ୍ର, ଶନିବାରରେ ଦୀର୍ଘଦିନରୁ ପଡ଼ିରହିଥିବା କାର୍ଯ୍ୟ ପୂରଣ ହେବ।

କର୍କଟ: ରବି, ସୋମବାରରେ ସଂଘର୍ଷ କରି ସଫଳତା ପାଇପାନ୍ତି। ମହତ୍ତ୍ବପୂର୍ଣ୍ଣ କାର୍ଯ୍ୟରେ ଯୋଗ ଦେଇପାରନ୍ତି। ମଙ୍ଗଳ,ବୁଧ, ଗୁରୁବାରରେ ଅଯଥା ଝାମେଲାରୁ ନିଜକୁ ଦୂରେଇ ରଖନ୍ତୁ। ଶୁକ୍ର, ଶନିବାରରେ ଛାତ୍ରଛାତ୍ରୀ କ୍ୟାରିୟରରେ ଉନ୍ନତି କରିବେ। ଆର୍ଥିକ କ୍ଷେତ୍ରରେ ପରିବାର ବର୍ଗଙ୍କ ସହଯୋଗ ପାଇବେ।

ସିଂହ: ରବି, ସୋମବାରରେ କିଛିଟା ଉତ୍ତେଜନା ଭିତରେ କାର୍ଯ୍ୟ ତୁଲାଇବେ। ଦୂରଯାତ୍ରା କରିପାରନ୍ତି। ମଙ୍ଗଳ, ବୁଧ, ଗୁରୁବାରରେ ବିଭିନ୍ନ କ୍ଷେତ୍ରରେ ଅର୍ଥପ୍ରାପ୍ତି ଯୋଗ ରହିଛି। ଶୁକ୍ର,ଶନିବାରରେ ଉଚ୍ଚ ସମ୍ମାନର ଅଧିକାରୀ ହୋଇପାରନ୍ତି। ପଡ଼ୋଶୀଙ୍କ ସହ ସମ୍ପର୍କରେ ନିବିଡ଼ତା ବଢ଼ିବ।

କନ୍ୟା: ରବି, ସୋମବାରରେ ବିଭିନ୍ନ କାର୍ଯ୍ୟରେ ସଫଳତା ପାଇପାରନ୍ତି। ପରିବାରରେ ଲାଗି ରହିଥିବା ସମସ୍ୟାରୁ ମୁକ୍ତି ପାଇବେ। ମଙ୍ଗଳ,ବୁଧ, ଗୁରୁବାରରେ ଦେଶବିଦେଶ ଭ୍ରମଣ ଯୋଗ ରହିଛି। ଶୁକ୍ର, ଶନିବାରରେ ବ୍ୟବସାୟ ପ୍ରସାରିତ ହେବ । ସାମାଜିକ ଦାୟିତ୍ବବୋଧ ବୃଦ୍ଧି ପାଇବାକୁ ଲାଗିବ।   

ତୁଳା: ରବି, ସୋମବାରରେ ନିଜ ବୁଦ୍ଧି ବିବେକ ଅନୁସାରେ କାର୍ଯ୍ୟ କରି ସଫଳତା ପାଇବେ। କର୍ମକ୍ଷେତ୍ରରେ ଦାୟିତ୍ବଭାର ବଢ଼ିବାକୁ ଲାଗିବ। ମଙ୍ଗଳ,ବୁଧ, ଗୁରୁବାରରେ କ୍ୟାରିୟରରେ ଉନ୍ନତି କରିବେ। ଶୁକ୍ର, ଶନିବାରରେ ନିଜ ବାକ୍ୟ ଉପରେ ସଂଯମତା ରକ୍ଷା କରନ୍ତୁ। 

ବିଛା: ରବି, ସୋମବାରରେ   ଦେହ ଓ ମନ ଭଲ ରହିବ। ବେପାରରେ ମନ ମୁତାବକ ଫଳ ପାଇବେ। ମଙ୍ଗଳ,ବୁଧ, ଗୁରୁବାରରେ ଆର୍ଥିକ ସ୍ଥିତିରେ ସ୍ବଚ୍ଛଳତା ଦେଖାଦେବ। ଶୁକ୍ର, ଶନିବାରରେ କୋର୍ଟକଚେରୀ ମାମଲାରେ ସଫଳତା ହାସଲ କରିବେ। ଦାମ୍ପତ୍ୟ ଜୀବନରେ ମଧୁରତା ବଢ଼ିବ।

ଧନୁ: ରବି, ସୋମବାରରେ ପରିସ୍ଥିତି ଅନୁସାରେ ନିଷ୍ପତ୍ତି ନେଇପାରନ୍ତି। ସମସ୍ୟାର ସମାଧାନ ବାଟ ଖୋଜିବେ। ମଙ୍ଗଳ,ବୁଧ, ଗୁରୁବାରରେ ନିଜ ମନ କଥା କହି କଷ୍ଟ ପାଇ ପାରନ୍ତି।  ଶୁକ୍ର, ଶନିବାରରେ ପରିବାରବର୍ଗଙ୍କ ସହଯୋଗ ପାଇବେ। ବ୍ୟବସାୟରେ ଲାଭାନ୍ବିତ ହେବେ।

ମକର: ରବି, ସୋମବାରରେ ହେଉଥିବା କାମ ବିଗିଡ଼ି ଯିବା ଦ୍ବାରା ଚିନ୍ତିତ ରହିପାରନ୍ତି। ଗୁରୁଜନଙ୍କ ପରାମର୍ଶ ଲୋଡ଼ିବେ। ମଙ୍ଗଳ,ବୁଧ, ଗୁରୁବାରରେ ଶୁଭ କାର୍ଯ୍ୟରେ ଯୋଗ ଦେଇ ଉତ୍ସାହିତ ରହିବେ। ଶୁକ୍ର,ଶନିବାରରେ ବ୍ୟବସାୟୀମାନେ ଆଶାଠାରୁ ଅଧିକ ଲାଭ ପାଇବେ। 

କୁମ୍ଭ: ରବି, ସୋମବାରରେ କୌଣସି ନିଷ୍ପତ୍ତି ନେବା ସମୟରେ ଦ୍ବନ୍ଦ୍ବରେ ପଡ଼ି ଯାଇପାରନ୍ତି। ପ୍ରତିଶୋଧ ପରାୟଣ ହୋଇ ଅଶାନ୍ତିରେ ରହିବେ। ମଙ୍ଗଳ,ବୁଧ, ଗୁରୁବାରରେ ନିଜକୁ ପ୍ରମାଣିତ କରିବାକୁ ଯାଇ ଅଧିକ ପରିଶ୍ରମୀ ହେବେ। ଶୁକ୍ର, ଶନିବାରରେ ପରିବାରରେ ତିକ୍ତତା ଉପୁଜିପାରେ।

ମୀନ: ରବି, ସୋମବାରରେ ଶତ୍ରୁର କୂଟଚକ୍ରାନ୍ତର ଶିକାର ହୋଇପାରନ୍ତି। ଗୁରୁତ୍ବପୂର୍ଣ୍ଣ କାର୍ଯ୍ୟରେ ବାଧା ଉପୁଜିପାରେ। ମଙ୍ଗଳ,ବୁଧ, ଗୁରୁବାରରେ ପରିଶ୍ରମର ଫଳପ୍ରାପ୍ତି ହେବ। ଶୁକ୍ର, ଶନିବାରରେ କର୍ମକ୍ଷେତ୍ରରେ ଉନ୍ନତି କରିବେ। ଗୁରୁଜନଙ୍କ ସ୍ବାସ୍ଥ୍ୟ ଅବସ୍ଥାକୁ ନେଇ ଚିନ୍ତିତ ରହିବେ।

‎ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ କବି ମାୟାଧର ମାନସିଂହଙ୍କ ଜନ୍ମପୀଠ ନନ୍ଦଳା ଗ୍ରାମରେ ମାନସିଂହ ସାହିତ୍ୟ ସଂସଦର ୬୭ତମ କବିତା ଆସର ବିଷ୍ଣୁପ୍ରସାଦ ଦଳେଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଅଛି ।  ମୁଖ୍ୟ ଅତିଥି ଭାବେ ଯାଜପୁରରୁ ବିଶିଷ୍ଟ କବି ତଥା କଥାକାର ଡ଼ ପ୍ରଜ୍ଞା ପରମିତା ଦାଶ ଯୋଗଦେଇ କବିତାର ସ୍ୱରୂପ ଓ ମର୍ଯ୍ୟାଦା ସମ୍ପର୍କରେ ଆଲୋଚନା କରିବା ସହ ଅନ୍ୟ ଉପସ୍ଥିତ କବି ମାନଙ୍କୁ ଉତ୍ସାହିତ କରିଥିଲେ । ସଂସଦର ମୁଖ୍ୟ ଉପଦେଷ୍ଟା ଡ଼ ପ୍ରେମାନନ୍ଦ ବେହେରା ପ୍ରାରମ୍ଭିକ ବକ୍ତବ୍ୟ ପ୍ରଦାନ କରିଥିଲେ । ସମ୍ପାଦକ ଶ୍ରୀଯୁକ୍ତ  ଲଳିତ କୁମାର ସ୍ବାଇଁ ଆଭିମୁଖ୍ୟ ଉପସ୍ଥାପନ କରିବା ସହ ଅତିଥି ମାନଙ୍କୁ ସ୍ୱାଗତ କରିଥିଲେ ।

ବ୍ରହ୍ମପୁରରୁ ବନ୍ଦନା ପଣ୍ଡା ପ୍ରାରମ୍ଭିକ ଭଜନ ପାଠ କରିଥିଲେ। ବ୍ରହ୍ମପୁରରୁ  କବି ରଶ୍ମିତା ଦଳାଇଙ୍କ ଚମତ୍କାର ସଂଯୋଜନାରେ ଦେଶ ବିଦେଶରୁ ଅନେକ କବି ଯଥା ଚନ୍ଦ୍ରା ମିଶ୍ର, ଶ୍ୱେତଶ୍ୱିନୀ ଜେନା, ମର୍ମସ୍ପର୍ଶୀ ପ୍ରିୟଦର୍ଶିନୀ, ପ୍ରତିମା ପାତ୍ର, ସମୀର ନାୟକ,ପୂର୍ଣ ଚନ୍ଦ୍ର ଜେନା,ନମିତା ସ୍ଵାଇଁ,ଦେବାଶିଷ ପ୍ରଧାନଙ୍କ ସମେତ ପ୍ରାୟ ୪୦ରୁ ଅଧିକ ସାହିତ୍ୟ ସାଧକ ସାଧିକା ଉପସ୍ଥିତ ରହି ସ୍ଵରଚିତ କବିତା ପାଠ କରିଥିଲେ । ଶେଷରେ ଅନୁଷ୍ଠାନର ସଂଯୋଜକ ବିଦ୍ୟାଧର ଦଳବେହେରା ସମସ୍ତଙ୍କୁ ଧନ୍ୟବାଦ୍ ଅର୍ପଣ କରିବା ସହ ଆସନ୍ତା କବିତା ଆସର ଅଗଷ୍ଟ 10   ତାରିଖରେ  ଅନୁଷ୍ଠିତ ହେବା ପାଇଁ ସମ୍ପାଦକ ଲଳିତ କୁମାର ସ୍ୱାଇଁ ଘୋଷଣା କରିଥିଲେ।

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ବଡ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ଭୁଶୁଡ଼ି ୨ ଶ୍ରମିକ ମୃତ । ବିଜେବି ନଗର ଅଞ୍ଚଳରେ ଘଟିଛି ଏହି ହୃଦୟବିଦାରକ ଅଘଟଣ । ନିର୍ମାଣାଧୀନ ପାଇଖାନା ଟାଙ୍କି ହଠାତ୍ ଭୁଶୁଡ଼ି ପଡ଼ିବାରୁ କାମ କରୁଥିବା ଦୁଇ ଜଣ ଶ୍ରମିକ ଭିତରେ ଚାପି ହୋଇଯାଇଥିଲେ। ଗୁରୁତର ଅବସ୍ଥାରେ ଉଭୟଙ୍କୁ ଉଦ୍ଧାର କରି କ୍ୟାପିଟାଲ ହସ୍ପିଟାଲକୁ ନିଆଯାଇଥିଲା । ମାତ୍ର ଡାକ୍ତର ସେଠାରେ ଉଭୟଙ୍କୁ ମୃତ ଘୋଷଣା କରିଛନ୍ତି। ମୃତ ଶ୍ରମିକମାନଙ୍କର ପରିଚୟ ମିଳି ନ ଥିବା ବେଳେ ପୋଲିସ ଘଟଣାର ତଦନ୍ତ କରୁଛି।

ସୂଚନା ଅନୁସାରେ, ବିଜେବି ନଗର ଅଞ୍ଚଳରେ ଶିଶୁ ମନ୍ଦିର ପଛରେ ଥିବା ଜଣେ ବ୍ୟକ୍ତିଙ୍କ ଘରର ପାଇଖାନା ଟାଙ୍କି ନିର୍ମାଣ କାମ ଚାଲିଥିଲା। ଦୁଇ ଜଣ ଶ୍ରମିକ ଟାଙ୍କି ଭିତରେ କାମ କରୁଥିବା ବେଳେ ହଠାତ୍ ଟାଙ୍କିର କାନ୍ଥ ଓ ଉପର ଅଂଶ ଭୁଶୁଡ଼ି ପଡ଼ିଥିଲା। ଫଳରେ ଉଭୟ ଶ୍ରମିକ ମାଟି ଓ କଂକ୍ରିଟ୍ ତଳେ ଚାପି ହୋଇଯାଇଥିଲେ। ଖବର ପାଇ ଅଗ୍ନିଶମ ବିଭାଗ, ପୁଲିସ ଓ ସ୍ଥାନୀୟ ଲୋକେ ମିଶି ଉଦ୍ଧାର କାର୍ଯ୍ୟ ଚଳାଇଥିଲେ। ପରେ ଦୁଇ ଜଣଙ୍କୁ ଟାଙ୍କି ଭିତରୁ ବାହାର କରାଯାଇ ତୁରନ୍ତ କ୍ୟାପିଟାଲ ହସ୍ପିଟାଲକୁ ପଠାଯାଇଥିଲା। ତେବେ ହସ୍ପିଟାଲରେ ପହଞ୍ଚିବା ପରେ ଡାକ୍ତର ଉଭୟ ଶ୍ରମିକଙ୍କୁ ମୃତ ଘୋଷଣା କରିଥିଲେ। 

ରାଜସ୍ଥାନର ରାଜଧାନୀ ଜୟପୁରରେ ଘଟିଥିବା ଏକ ଲୋମହର୍ଷକ ହତ୍ୟାକାଣ୍ଡ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଜଣେ ଝିଅ ନିଜ ଜନ୍ମକଲା ମା'ଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର ରଚିବା ଏବଂ ସୁପାରି କିଲର ଲଗାଇବା ଘଟଣା ସାମ୍ନାକୁ ଆସିଛି। ପୋଲିସର ସୂଚନାନୁସାରେ, ଏଲଏଲବି (LLB) ଶେଷ ବର୍ଷର ଛାତ୍ରୀ ଥିବା ଆୟୁଷୀ ନିଜ ମା' ନୀରଜ ଶର୍ମାଙ୍କୁ ରାସ୍ତାରୁ ହଟାଇବା ପାଇଁ ୭ ଲକ୍ଷ ଟଙ୍କାର ସୁପାରି ଦେଇଥିଲେ। ଗତ ଜୁଲାଇ ୩ ତାରିଖରେ ଜୟପୁରର ପ୍ରତାପ ନଗର ଅଞ୍ଚଳରେ ଏକ ଦ୍ରୁତଗାମୀ ସ୍କର୍ପିଓ ଗାଡ଼ି ମାଡ଼ିଯିବାରୁ ନୀରଜ ଶର୍ମାଙ୍କର ମୃତ୍ୟୁ ଘଟିଥିଲା। ପ୍ରଥମେ ଏହା ଏକ ଦୁର୍ଘଟଣା ବୋଲି ଲାଗୁଥିବା ବେଳେ ପୋଲିସର ତଦନ୍ତ ପରେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଜଣାପଡିଛି।

୧୪ କୋଟିର ସମ୍ପତ୍ତି ଓ ସରକାରୀ ଚାକିରି ପାଇଁ ହତ୍ୟା

ଏହି ଜଘନ୍ୟ ହତ୍ୟାକାଣ୍ଡ ପଛର ମୁଖ୍ୟ କାରଣ ହେଉଛି ପରିବାରର ବିପୁଳ ସମ୍ପତ୍ତି ଏବଂ ଏକ ସରକାରୀ ଚାକିରି। ଆୟୁଷୀଙ୍କ ପିତା ବିଜୟ ବଶିଷ୍ଠ ରାଜସ୍ଥାନ ହାଇକୋର୍ଟରେ କୋର୍ଟ ମାଷ୍ଟର ଭାବେ କାର୍ଯ୍ୟରତ ଥିଲେ। ଏପ୍ରିଲ ୨୦୨୫ରେ ତାଙ୍କର ମୃତ୍ୟୁ ପରେ ପରିବାର ନିକଟରେ ପ୍ରାୟ ୧୪ କୋଟି ଟଙ୍କାର ସମ୍ପତ୍ତି (ଚାଷ ଜମି ଏବଂ ପ୍ଲଟ୍) ରହିଥିଲା। ପରିଜନଙ୍କ ଅଭିଯୋଗ ଅନୁଯାୟୀ, ବାପାଙ୍କ ମୃତ୍ୟୁ ପରେ ଆୟୁଷୀ ଅନୁକମ୍ପାମୂଳକ ନିଯୁକ୍ତି ପାଇବା ସହ ସମସ୍ତ ସମ୍ପତ୍ତି ନିଜ ନାମରେ କରିବାକୁ ଚାହୁଁଥିଲେ। ତେବେ ପୋଲିସ ପଚରାଉଚରା ବେଳେ ଆୟୁଷୀ କହିଛନ୍ତି ଯେ ତାଙ୍କ ମା' ତାଙ୍କର ଜଣେ ସ୍ୱତନ୍ତ୍ର କ୍ଷମତାସମ୍ପନ୍ନ (Special child) ଭାଇକୁ ଅଧିକ ଭଲ ପାଉଥିଲେ। ସେ ନିଜକୁ ପରିବାରରେ ଏକାକୀ ଅନୁଭବ କରୁଥିଲେ, ଯେଉଁଥିପାଇଁ ମା'ଙ୍କ ସହ ତାଙ୍କର ସମ୍ପର୍କ ଖରାପ ଥିଲା ଏବଂ ବାରମ୍ବାର ଝଗଡ଼ା ହେଉଥିଲା।

ମାମୁଁଙ୍କ ସାଂଘାତିକ ଅଭିଯୋଗ, ହ୍ୱାଟ୍ସଆପ୍ ଷ୍ଟାଟସରେ ଥିଲା ଇସାରା

ମା'ଙ୍କ ହତ୍ୟା ଘଟଣାର ତଦନ୍ତ ଚାଲିଥିବା ବେଳେ ଆୟୁଷୀଙ୍କ ମାମୁଁ ରାକେଶ ଶର୍ମା ପୋଲିସ ନିକଟରେ ଏକ ସାଂଘାତିକ ଅଭିଯୋଗ ଆଣିଛନ୍ତି, ଯାହା ମାମଲାକୁ ଏକ ନୂଆ ମୋଡ଼ ଦେଇଛି। ତାଙ୍କ କହିବା ଅନୁଯାୟୀ, ପରିବାରରେ ଏହା ପ୍ରଥମ ସନ୍ଦେହଜନକ ମୃତ୍ୟୁ ନୁହେଁ। ଏହାପୂର୍ବରୁ ଏପ୍ରିଲ ୨୦୨୫ରେ ଆୟୁଷୀଙ୍କ ପିତା ବିଜୟଙ୍କ ମୃତ୍ୟୁ ମଧ୍ୟ ସ୍ୱାଭାବିକ ନଥିଲା ଏବଂ ସେହି ଘଟଣାର ପୁନର୍ବିଚାର ହେବା ଆବଶ୍ୟକ। ବ୍ରେନ୍ ଟ୍ୟୁମରରୁ ସୁସ୍ଥ ହେଉଥିବା ବେଳେ ହଠାତ୍ ତାଙ୍କର ମୃତ୍ୟୁ ଘଟିଥିଲା।

ଏହା ବ୍ୟତୀତ, ରାକେଶ ଶର୍ମା ଅଭିଯୋଗ କରିଛନ୍ତି ଯେ ଆୟୁଷୀ ନିଜ ମା'ଙ୍କୁ ଧମକ ଦେଇଥିଲେ। ମୃତ୍ୟୁର କିଛି ଦିନ ପୂର୍ବରୁ ନୀରଜ ଶର୍ମା ନିଜ ହ୍ୱାଟ୍ସଆପ୍ ଷ୍ଟାଟସରେ ଲେଖିଥିଲେ, "ବସ୍ ଆଉ ଦୁଇ ଦିନର ଜୀବନ ବାକି ଅଛି"। ବର୍ତ୍ତମାନ ପୋଲିସ ୧୪ କୋଟିର ସମ୍ପତ୍ତି, ସରକାରୀ ଚାକିରି ଏବଂ ପରିବାରରେ ହୋଇଥିବା ଦୁଇଟି ମୃତ୍ୟୁ ମଧ୍ୟରେ ଥିବା ସମ୍ପର୍କକୁ ନେଇ ଅଧିକ ଖୋଳତାଡ଼ କରୁଛି।

ମୁମ୍ବାଇ ପୋଲିସ ଶୁକ୍ରବାର ଦିନ ଟେଲିଭିଜନ ଅଭିନେତା ରୋହିତ ଚନ୍ଦେଲଙ୍କୁ ଗିରଫ କରିଛି। ଜଣେ ୧୬ ବର୍ଷୀୟା ନାବାଳିକାଙ୍କୁ ପିଛା କରିବା, ହଇରାଣ କରିବା ଏବଂ ଆକ୍ରମଣ କରିବା ଅଭିଯୋଗରେ ତାଙ୍କୁ ଘାଟକୋପର ପୋଲିସ ଗିରଫ କରିଛି। ପୋଲିସ ତାଙ୍କ ବିରୋଧରେ ପୋକ୍ସୋ ଆକ୍ଟ (POCSO Act) ଏବଂ ଭାରତୀୟ ନ୍ୟାୟ ସଂହିତା (BNS) ଅଧୀନରେ ମାମଲା ରୁଜୁ କରିଛି।

ଅଭିଯୋଗର କାରଣ ଏବଂ ଘଟଣାକ୍ରମ

ପୋଲିସ ନିକଟରେ କରାଯାଇଥିବା ଅଭିଯୋଗ ଅନୁଯାୟୀ, ଅଭିନେତା ଜଣକ ଡିସେମ୍ବର ୨୦୨୫ ରୁ ୭ ଜୁଲାଇ ୨୦୨୬ ପର୍ଯ୍ୟନ୍ତ ନାବାଳିକାଙ୍କୁ ନିଜର ଏବଂ ଅନ୍ୟାନ୍ୟ ମୋବାଇଲ ନମ୍ବରରୁ ବାରମ୍ବାର ଫୋନ୍ କରି ହଇରାଣ କରୁଥିଲେ। ଗତ ଜୁଲାଇ ୫ ତାରିଖରେ ରୋହିତ ପୀଡ଼ିତାଙ୍କୁ ତାଙ୍କ ଆବାସିକ କୋଠା ନିକଟରେ ଅଟକାଇବା ସହ ତାଙ୍କ ପିଛା କରିଥିଲେ। ସେଠାରେ ତାଙ୍କ ସହ ଯୁକ୍ତିତର୍କ କରିବା ସହିତ ଗାଳିଗୁଲଜ କରିଥିଲେ ଏବଂ ହାତରେ ପିଟି ଆକ୍ରମଣ କରିଥିବା ଅଭିଯୋଗ ହୋଇଛି।

ପୋଲିସ କାର୍ଯ୍ୟାନୁଷ୍ଠାନ ଓ ଦଫା

ଘଟଣାର ତଦନ୍ତ କରି ପୋଲିସ ରୋହିତଙ୍କୁ ତାଙ୍କ ଦହିସର ସ୍ଥିତ ବାସଭବନରୁ ଗିରଫ କରିଥିଲା। ପୋଲିସ ତାଙ୍କ ବିରୋଧରେ ପୋକ୍ସୋ ଆଇନର ଧାରା ୧୨ (ଶିଶୁଙ୍କୁ ଯୌନ ନିର୍ଯାତନା) ଏବଂ ବିଏନଏସର ଧାରା ୭୮ (ପିଛା କରିବା), ଧାରା ୧୧୫(୨) (ଆଘାତ ଦେବା) ଏବଂ ଧାରା ୩୫୨ (ଅପରାଧିକ ଧମକ) ଆଧାରରେ ମାମଲା ରୁଜୁ କରିଛି। ତାଙ୍କୁ ଏକ ସ୍ୱତନ୍ତ୍ର ପୋକ୍ସୋ ଅଦାଲତରେ ହାଜର କରାଯିବା ପରେ କୋର୍ଟ ତାଙ୍କୁ ପୋଲିସ ହେପାଜତକୁ ପଠାଇ ଦେଇଛନ୍ତି। ପୋଲିସ ଅଧିକାରୀଙ୍କ କହିବା ଅନୁଯାୟୀ, ଅଭିଯୁକ୍ତ ଏବଂ ପୀଡ଼ିତା ପୂର୍ବରୁ ପରସ୍ପରକୁ ଜାଣିଥିଲେ।

ରୋହିତ ଚନ୍ଦେଲଙ୍କ କ୍ୟାରିୟର

ରୋହିତ ଚନ୍ଦେଲ ୨୦୧୪ ମସିହାରୁ ନିଜର ଟେଲିଭିଜନ କ୍ୟାରିୟର ଆରମ୍ଭ କରିଥିଲେ। ସେ ମୁଖ୍ୟତଃ 'ପାଣ୍ଡ୍ୟା ଷ୍ଟୋର' (Pandya Store), 'ସୈରାବ' (Sairaab) ଏବଂ 'କାଶୀବାଈ ବାଜିରାଓ ବଲ୍ଲାଲ' (Kashibai Bajirao Ballal) ଭଳି ଲୋକପ୍ରିୟ ଧାରାବାହିକରେ ଅଭିନୟ କରି ଦର୍ଶକଙ୍କ ନିକଟରେ ପରିଚିତ ହୋଇଥିଲେ। ବର୍ତ୍ତମାନ ଏହି ଗିରଫଦାରୀ ତାଙ୍କ କ୍ୟାରିୟର ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।

ନୂଆଦିଲ୍ଲୀ: ଭାରତର ଜାତୀୟ ୨୦୦ ମିଟର ରେକର୍ଡ ଅଧିକାରୀ ତଥା ପ୍ରମୁଖ ସ୍ପ୍ରିଣ୍ଟର ଅନିମେଶ କୁଜୁର ନିଜର ଚମତ୍କାର ଫର୍ମ ଜାରି ରଖିଛନ୍ତି। ଶନିବାର ଅନୁଷ୍ଠିତ ପୁମା ଫାଷ୍ଟ ଆର୍ମସ ଫାଷ୍ଟ ଲେଗ୍ସ ୨୦୨୬ ଟୁର୍ଣ୍ଣାମେଣ୍ଟର ପୁରୁଷ ୧୦୦ ମିଟର ଫାଇନାଲରେ ସେ ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ ସହ ମାତ୍ର ୧୦.୧୪ ସେକେଣ୍ଡ ସମୟ ନେଇ ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ଏହା ବିଦେଶ ମାଟିରେ କୌଣସି ଭାରତୀୟଙ୍କ ଦ୍ୱାରା ୧୦୦ ମିଟର ରେସରେ ସବୁଠାରୁ ଦ୍ରୁତଗତିର ପ୍ରଦର୍ଶନ ହୋଇଥିବା ବେଳେ ସାମଗ୍ରିକ ଭାବେ ଭାରତର ଦ୍ୱିତୀୟ ସର୍ବଶ୍ରେଷ୍ଠ ପ୍ରଦର୍ଶନ ଅଟେ।

ଏହା ପୂର୍ବରୁ ଭାରତ ପାଇଁ ଗୁରିନ୍ଦରବୀର ସିଂହ ୧୦୦ ମିଟରକୁ ୧୦.୦୯ ସେକେଣ୍ଡରେ ଅତିକ୍ରମ କରି ଶୀର୍ଷରେ ରହିଛନ୍ତି। ଏହି ଟୁର୍ଣ୍ଣାମେଣ୍ଟର ହିଟ୍ ପର୍ଯ୍ୟାୟରେ ଅନିମେଶ ୧୦.୧୯ ସେକେଣ୍ଡ ସମୟ ନେଇଥିଲେ। ତେବେ ଫାଇନାଲରେ ସେ ନିଜର ପୂର୍ବ ରେକର୍ଡ (୧୦.୧୫ ସେକେଣ୍ଡ)ରେ ସୁଧାର ଆଣି ଇତିହାସ ରଚିଛନ୍ତି। ଭାରତର ସର୍ବକାଳୀନ ଶ୍ରେଷ୍ଠ ୫ଟି ଦ୍ରୁତ ୧୦୦ ମିଟର ସମୟ ମଧ୍ୟରୁ ୩ଟି ରେକର୍ଡ ଏବେ ଏହି ଓଡ଼ିଆ ଆଥଲେଟଙ୍କ ନାମରେ ରହିଛି, ଯଥା: ୧୦.୧୪ ସେକେଣ୍ଡ, ୧୦.୧୫ ସେକେଣ୍ଡ ଏବଂ ୧୦.୧୮ ସେକେଣ୍ଡ।

ଅନିମେଶ କୁଜୁର ବର୍ତ୍ତମାନ ପୁରୁଷ ୨୦୦ ମିଟର ଇଭେଣ୍ଟରେ ୨୦.୩୨ ସେକେଣ୍ଡ ସହିତ ଜାତୀୟ ରେକର୍ଡର ଅଧିକାରୀ ଅଟନ୍ତି। ଗତ ଜୁନ୍ ମାସରେ ଅନୁଷ୍ଠିତ ଆନ୍ତଃରାଜ୍ୟ ଜାତୀୟ ଆଥଲେଟିକ୍ସ ଚାମ୍ପିଅନସିପ୍ରେ ସେ ୨୦୦ ମିଟରକୁ ୨୦.୭୪ ସେକେଣ୍ଡରେ ଶେଷ କରି ଏସୀୟ କ୍ରୀଡ଼ା ପାଇଁ ଯୋଗ୍ୟତା ହାସଲ କରିସାରିଛନ୍ତି। ଯଦିଓ ଏହି ସମୟ ଭାରତୀୟ ଆଥଲେଟିକ୍ସ ଫେଡେରେସନର ଯୋଗ୍ୟତା ମାନକ (୨୦.୮୮ ସେକେଣ୍ଡ) ଠାରୁ ବହୁତ ଭଲ ଥିଲା, ତଥାପି ଅନିମେଶ ନିଜ ଟାଇମିଂକୁ ନେଇ ସମ୍ପୂର୍ଣ୍ଣ ସନ୍ତୁଷ୍ଟ ନଥିଲେ। ସେ କହିଥିଲେ ଯେ, ଆମର ମୂଳ ଲକ୍ଷ୍ୟ କେବଳ ଯୋଗ୍ୟତା ହାସଲ କରିବା ଥିଲା ଏବଂ ଏବେ ମୁଁ ଏସୀୟ କ୍ରୀଡ଼ା ପୂର୍ବରୁ ନିଜ ଟାଇମିଂରେ ସୁଧାର ଆଣିବା ଉପରେ ଧ୍ୟାନ ଦେବି।

ଦକ୍ଷିଣ ଭିଏତନାମର ଫୁ କୁଓକ ଦ୍ୱୀପ (Phu Quoc Island) ନିକଟରେ ଏକ ବଡ଼ ଧରଣର ଦୁର୍ଘଟଣା ଘଟିଛି। ଶନିବାର ଦିନ ୩୨ ଜଣ ଭାରତୀୟ ପର୍ଯ୍ୟଟକଙ୍କୁ ନେଇ ଯାଉଥିବା ଏକ ସ୍ପିଡ୍ ବୋଟ୍ ସମୁଦ୍ର ମଝିରେ ଓଲଟି ପଡ଼ିବାରୁ ୧୫ ଜଣ ଭାରତୀୟଙ୍କର ପ୍ରାଣହାନି ଘଟିଥିବା ବେଳେ ୨୧ ଜଣଙ୍କୁ ଜୀବିତ ଉଦ୍ଧାର କରାଯାଇଛି।

କିପରି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ଏହି ସ୍ପିଡ୍ ବୋଟରେ ୩୨ ଜଣ ଭାରତୀୟ ପର୍ଯ୍ୟଟକ ଏବଂ ୪ ଜଣ କର୍ମଚାରୀଙ୍କୁ ମିଶାଇ ସମୁଦାୟ ୩୬ ଜଣ ଯାତ୍ରୀ ସ୍ୱାର ଥିଲେ। ଫୁ କୁଓକ ଦ୍ୱୀପ ନିକଟସ୍ଥ ହୋନ୍ ମେ ରୁଟ୍ ନଗୋଇ ଠାରୁ ପ୍ରାୟ ୪୦୦ ମିଟର ଦୂରରେ ସମୁଦ୍ରର ପ୍ରବଳ ଲହଡ଼ି କାରଣରୁ ବୋଟଟି ଭାରସାମ୍ୟ ହରାଇ ଓଲଟି ପଡ଼ିଥିଲା। ଘଟଣାସ୍ଥଳରେ ଥିବା ଅନ୍ୟ ଡଙ୍ଗାଗୁଡ଼ିକ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ଏବଂ ପରେ ନୌସେନା, ତଟରକ୍ଷୀ ବାହିନୀ ଓ ସୀମା ସୁରକ୍ଷା ବଳ ଘଟଣାସ୍ଥଳରେ ପହଞ୍ଚିଥିଲେ।

ଜୋରଦାର ଉଦ୍ଧାର କାର୍ଯ୍ୟ

ସମୁଦ୍ରରେ ଉଚ୍ଚ ଲହଡ଼ି ଥିବାରୁ ଏବଂ ଅନେକ ଯାତ୍ରୀ ବୋଟ୍ ଭିତରେ ଫସି ରହିଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଥିଲା। ତଥାପି ସ୍ଥାନୀୟ ପ୍ରଶାସନର କଠିନ ପରିଶ୍ରମ ଫଳରେ ୨୧ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ଡାକ୍ତରଖାନାରେ ଭର୍ତ୍ତି କରାଯାଇଛି। ସମସ୍ତ ମୃତଦେହକୁ ସମୁଦ୍ରରୁ ଉଦ୍ଧାର କରାଯାଇଥିବା ସ୍ଥାନୀୟ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି।

ଭାରତୀୟ ଦୂତାବାସର ପଦକ୍ଷେପ ଓ ହେଲ୍ପଲାଇନ୍

ଏହି ଦୁଃଖଦ ଘଟଣା ପରେ ଭିଏତନାମରେ ଥିବା ଭାରତୀୟ ଦୂତାବାସ ତୁରନ୍ତ ପଦକ୍ଷେପ ଗ୍ରହଣ କରିଛି। ପ୍ରଭାବିତ ପରିବାରକୁ ସାହାଯ୍ୟ କରିବା ପାଇଁ ହୋ ଚି ମିନ୍ ସିଟି ଏବଂ ହାନୋଇ ଠାରେ ସ୍ୱତନ୍ତ୍ର କଣ୍ଟ୍ରୋଲ୍ ରୁମ୍ ଖୋଲାଯାଇଛି। ଜରୁରୀକାଳୀନ ପରିସ୍ଥିତିରେ ଯୋଗାଯୋଗ ପାଇଁ ଦୂତାବାସ ପକ୍ଷରୁ +84 36 281 7930, +84 91 552 37 14, ଏବଂ +84 91 308 9165 ହେଲ୍ପଲାଇନ୍ ନମ୍ବର ଜାରି କରାଯାଇଛି। ସ୍ଥାନୀୟ ପ୍ରଶାସନ ସହିତ ମିଶି ଦୂତାବାସ ପକ୍ଷରୁ ସମସ୍ତ ପ୍ରକାରର ସହାୟତା ଯୋଗାଇ ଦିଆଯାଉଛି।

In a tragic incident, a boat carrying several Indian tourists has capsized near Phu Quoc Island in Vietnam a few hours ago.

Exact details of the incident are being ascertained as search and rescue operations by local authorities are ongoing.

In order to provide information…

— India in Vietnam (@AmbHanoi) July 11, 2026

ନୂଆଦିଲ୍ଲୀ: ଭାରତର ସାମୁଦ୍ରିକ ଶକ୍ତିରେ ଏକ ବଡ଼ ଧରଣର ବୃଦ୍ଧି ଘଟିଛି। ଭାରତୀୟ ନୌସେନାରେ ସାମିଲ ହେଲା INS ମହେନ୍ଦ୍ରଗିରି । ଆଜି ବିଶାଖାପାଟଣା ନାଭାଲ୍ ଡକ୍‌ୟାର୍ଡ ଠାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଷ୍ଟିଲ୍‌ଥ୍ ଫ୍ରିଗେଟ୍ ଆଇଏନଏସ ମହେନ୍ଦ୍ରଗିରି (INS Mahendragiri) କୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି।

ଆତ୍ମନିର୍ଭର ଭାରତ ଅଭିଯାନ ଅଧୀନରେ ନିର୍ମିତ ଆଇଏନଏସ ମହେନ୍ଦ୍ରଗିରି ହେଉଛି ପ୍ରୋଜେକ୍ଟ ୧୭ଏ (Project 17A) ଅଧୀନରେ ଥିବା ଷଷ୍ଠ ସ୍ୱଦେଶୀ ଷ୍ଟିଲ୍‌ଥ୍ ଫ୍ରିଗେଟ୍ ଏବଂ ମାଜାଗନ୍ ଡକ୍ ସିପବିଲ୍ଡର୍ସ ଲିମିଟେଡ୍ (MDL) ଦ୍ୱାରା ନିର୍ମିତ ଚତୁର୍ଥ ଯୁଦ୍ଧପୋତ। ଏଥିରେ ୭୫ ପ୍ରତିଶତରୁ ଅଧିକ ସ୍ୱଦେଶୀ ଉପକରଣ ବ୍ୟବହାର କରାଯାଇଛି, ଯାହା ଭାରତର ବୃଦ୍ଧି ପାଉଥିବା ପ୍ରତିରକ୍ଷା ଉତ୍ପାଦନ କ୍ଷମତାକୁ ପ୍ରଦର୍ଶିତ କରୁଛି। ଏହି ଅବସରରେ ପ୍ରତିରକ୍ଷା ମନ୍ତ୍ରୀ ଶ୍ରୀ ସିଂହ ଆନ୍ଧ୍ରପ୍ରଦେଶକୁ "ଭାରତର ପ୍ରତିରକ୍ଷା ଏବଂ ଏରୋସ୍ପେସ୍ ଉତ୍ପାଦନର ଏକ ନୂତନ ପାୱାରହାଉସ୍" ବୋଲି ବର୍ଣ୍ଣନା କରିଛନ୍ତି। ଏହାବ୍ୟତୀତ ସେ ନୌସେନା କର୍ମଚାରୀ ଓ ଜାହାଜ ନିର୍ମାଣକାରୀଙ୍କୁ ସେମାନଙ୍କର ଅବଦାନ ପାଇଁ ଅଭିନନ୍ଦନ ଜଣାଇଥିଲେ।

ଏହି ଅତ୍ୟାଧୁନିକ ଯୁଦ୍ଧପୋତ ଏକାସାଙ୍ଗରେ ଆକାଶ, ସମୁଦ୍ର ଏବଂ ପାଣି ଭିତରୁ ଆସୁଥିବା ବିପଦର ମୁକାବିଲା କରିବାକୁ ସକ୍ଷମ। ଏହାକୁ ଭୂପୃଷ୍ଠରୁ ଭୂପୃଷ୍ଠକୁ ଲକ୍ଷ୍ୟ ଭେଦ କରିପାରୁଥିବା ଶକ୍ତିଶାଳୀ ବ୍ରହ୍ମୋସ (BrahMos) କ୍ଷେପଣାସ୍ତ୍ର ଦ୍ୱାରା ମଧ୍ୟ ସଜ୍ଜିତ କରାଯାଇପାରିବ। ଶ୍ରୀ ସିଂହ ଜାହାଜର କ୍ରେଷ୍ଟ ବା ପ୍ରତୀକ ଉପରେ ଆଲୋକପାତ କରିଥିଲେ, ଯେଉଁଥିରେ ମହେନ୍ଦ୍ରଗିରି ପର୍ବତ ଉପରେ ଏକ ଛଞ୍ଚାଣ (Goshawk) ବସିଥିବାର ଚିତ୍ର ରହିଛି। ଏହା ତୀକ୍ଷ୍ଣ ଦୃଷ୍ଟି, ଧୈର୍ଯ୍ୟ ଏବଂ ନିର୍ଣ୍ଣାୟକ କାର୍ଯ୍ୟାନୁଷ୍ଠାନର ପ୍ରତୀକ ଅଟେ, ଯାହାକି ଆଧୁନିକ ନୌସେନା କାର୍ଯ୍ୟକଳାପ ପାଇଁ ଅତ୍ୟନ୍ତ ଜରୁରୀ। ଏହି ଯୁଦ୍ଧପୋତଟି ଏବେ ନୌସେନାର ଇଷ୍ଟର୍ଣ୍ଣ ଫ୍ଲିଟ୍ (Eastern Fleet) ରେ ସାମିଲ ହୋଇଛି।

ନୌସେନା ମୁଖ୍ୟ ଆଡମିରାଲ କ୍ରିଷ୍ଣା ସ୍ୱାମୀନାଥନ ସୂଚନା ଦେଇଛନ୍ତି ଯେ, ପ୍ରୋଜେକ୍ଟ ୧୭ଏ ଅଧୀନରେ ନିର୍ମିତ ହେବାକୁ ଥିବା ସାତୋଟି ଯୁଦ୍ଧପୋତ ମଧ୍ୟରୁ ଆଇଏନଏସ ମହେନ୍ଦ୍ରଗିରି ହେଉଛି ଷଷ୍ଠ ଯୁଦ୍ଧପୋତ। ଏହା ଓଡ଼ିଶାର ଐତିହାସିକ ମହେନ୍ଦ୍ରଗିରି ପର୍ବତ ନାମରେ ନାମିତ ହୋଇଛି। ଏହା ୧୯୭୨ ରୁ ୨୦୧୩ ମସିହା ପର୍ଯ୍ୟନ୍ତ ଦେଶର ସେବା କରିଥିବା ନୀଳଗିରି-କ୍ଲାସ୍ ଫ୍ରିଗେଟ୍ (Nilgiri-class) ର ଐତିହ୍ୟକୁ ବଜାୟ ରଖିଛି ବୋଲି ସେ ପ୍ରକାଶ କରିଛନ୍ତି।

ଭୁବନେଶ୍ୱର: ରାଜ୍ୟରେ କେଜିରୁ ପିଜି ନାମଲେଖା ପ୍ରକ୍ରିୟାକୁ ନେଇ ଲାଗି ରହିଥିବା ଦ୍ୱନ୍ଦ୍ୱ ଖୁବଶୀଘ୍ର ଦୂର ହେବ। ଏ ନେଇ ଉଚ୍ଚଶିକ୍ଷା ବିଭାଗ ପକ୍ଷରୁ ଏକ ସ୍ୱତନ୍ତ୍ର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର ବା ଏସଓପି (SOP) ଜାରି କରାଯିବ ବୋଲି ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ ସୂଚନା ଦେଇଛନ୍ତି।

ଗଣମାଧ୍ୟମକୁ ସୂଚନା ଦେଇ ମନ୍ତ୍ରୀ ସୂର୍ଯ୍ୟବଂଶୀ ସୂରଜ କହିଛନ୍ତି ଯେ ଏହି ଏସଓପି ଆସିବା ପରେ ନାମଲେଖା ସମ୍ବନ୍ଧୀୟ ସମସ୍ତ ପ୍ରଶ୍ନର ଉତ୍ତର ମିଳିଯିବ ଏବଂ ପ୍ରକ୍ରିୟା ସରଳ ହେବ। ରାଜ୍ୟ ସରକାର ଅନୁଦାନପ୍ରାପ୍ତ ଶିକ୍ଷାନୁଷ୍ଠାନଗୁଡ଼ିକରେ ଛାତ୍ରଛାତ୍ରୀଙ୍କ ସମସ୍ତ ନାମଲେଖା ଫି' ସମ୍ପୂର୍ଣ୍ଣ ଭାବେ ବହନ କରିବେ। ନିକଟରେ ହୋଇଥିବା କ୍ୟାବିନେଟ ନିଷ୍ପତ୍ତି ଅନୁଯାୟୀ, ସରକାର ୬୬୨ ଏବଂ ୪୮୮ ବର୍ଗର କଲେଜଗୁଡ଼ିକୁ ଆର୍ଥିକ ସହାୟତା ଯୋଗାଇଦେବେ। ପୂର୍ବରୁ ଛାତ୍ରଛାତ୍ରୀମାନେ ଦେଉଥିବା ଫି' ବାବଦ ଅର୍ଥ ଏଣିକି ସରକାର ପ୍ରଦାନ କରିବେ।

ଏହି ସରକାରୀ ପାଣ୍ଠି ଦ୍ୱାରା କଲେଜ ପରିଚାଳନା, ଶିକ୍ଷକ ଓ କର୍ମଚାରୀଙ୍କ ଦରମା, ଉପକରଣ କ୍ରୟ ସମେତ ବିଦ୍ୟୁତ, ଫୋନ ଏବଂ ଇଣ୍ଟରନେଟ୍ ବିଲ୍ ଭଳି ଦୈନନ୍ଦିନ ଖର୍ଚ୍ଚ ତୁଲାଇବାରେ ସହାୟକ ହେବ। ମନ୍ତ୍ରୀ ଆହୁରି ମଧ୍ୟ ଘୋଷଣା କରିଛନ୍ତି ଯେ ଛାତ୍ରଛାତ୍ରୀଙ୍କ ପାଇଁ ରି-ଆଡମିସନ ଫି' ମଧ୍ୟ ଛାଡ଼ କରାଯିବ। ତେବେ ଏହି ଯୋଜନା ସେଲ୍ଫ-ଫାଇନାନ୍ସିଂ କୋର୍ସ କିମ୍ବା ଘରୋଇ କଲେଜଗୁଡ଼ିକ ପାଇଁ ଲାଗୁ ହେବ ନାହିଁ ବୋଲି ସ୍ପଷ୍ଟ କରାଯାଇଛି।

ରାଜ୍ୟ କ୍ୟାବିନେଟ୍ କେଜିରୁ ପିଜି ପର୍ଯ୍ୟନ୍ତ ମାଗଣା ଶିକ୍ଷାକୁ ଅନୁମୋଦନ କରିବା ପରେ ଅନୁଦାନପ୍ରାପ୍ତ କଲେଜଗୁଡ଼ିକରେ ଆର୍ଥିକ ସଙ୍କଟ ନେଇ ଆଶଙ୍କା ପ୍ରକାଶ ପାଇଥିଲା। କାରଣ ଏହି କଲେଜଗୁଡ଼ିକ ନିଜର ଦୈନନ୍ଦିନ ଖର୍ଚ୍ଚ ପାଇଁ ମୁଖ୍ୟତଃ ଛାତ୍ରଛାତ୍ରୀଙ୍କ ଫି' ଉପରେ ନିର୍ଭର କରିଥାନ୍ତି। ବର୍ତ୍ତମାନ ସରକାର ସିଧାସଳଖ ପାଣ୍ଠି ଯୋଗାଇଦେବାକୁ ନିଷ୍ପତ୍ତି ନେଇଥିବାରୁ, କଲେଜ ପରିଚାଳନାରେ କୌଣସି ଅସୁବିଧା ହେବ ନାହିଁ ଏବଂ ଛାତ୍ରଛାତ୍ରୀମାନେ ପ୍ରକୃତରେ ମାଗଣା ତଥା ସୁବିଧାରେ ଉଚ୍ଚଶିକ୍ଷା ଲାଭ କରିପାରିବେ। ଖୁବଶୀଘ୍ର ଆସିବାକୁ ଥିବା ବିସ୍ତୃତ ଏସଓପି (SOP) ମାଧ୍ୟମରେ କଲେଜଗୁଡ଼ିକୁ କେବେ, କେତେ ଏବଂ କିପରି ପାଣ୍ଠି ପ୍ରଦାନ କରାଯିବ ସେ ନେଇ ସ୍ପଷ୍ଟ ଚିତ୍ର ମିଳିପାରିବ।

ପୁରୀ: ଆସନ୍ତା ରଥଯାତ୍ରା ୨୦୨୬ ପାଇଁ ପୁରୀରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଓଡ଼ିଶା ପୋଲିସ ମହାନିର୍ଦ୍ଦେଶକ (DGP) ଏହି ପ୍ରସଙ୍ଗରେ ସୂଚନା ଦେଇଛନ୍ତି ଯେ ରାଜ୍ୟ ପୋଲିସ ସହିତ ୧୫ କମ୍ପାନୀ କେନ୍ଦ୍ରୀୟ ସଶସ୍ତ୍ର ପୋଲିସ ବଳ (CAPF) ମୁତୟନ ହେବେ। ଶ୍ରଦ୍ଧାଳୁମାନଙ୍କ ସୁରକ୍ଷା ଏବଂ ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ କଡ଼ା ପଦକ୍ଷେପ ନିଆଯାଇଛି।

ମହାପ୍ରଭୁଙ୍କ ବିଶ୍ୱପ୍ରସିଦ୍ଧ ଘୋଷଯାତ୍ରା ସମୟରେ ଭିଡ଼ ନିୟନ୍ତ୍ରଣ ଓ ସୁରକ୍ଷା ପାଇଁ ସିଆରପିଏଫ୍ (CRPF), ବିଏସଏଫ୍ (BSF) ଏବଂ ଆରଏଏଫ୍ (RAF) ୟୁନିଟ୍ ସାମିଲ ହେବେ। ଏହି କେନ୍ଦ୍ରୀୟ ଫୋର୍ସଗୁଡ଼ିକ ରାଜ୍ୟ ପୋଲିସ ସହିତ ମିଶି ସୁରକ୍ଷାର ବିଭିନ୍ନ ସ୍ତରକୁ ମଜବୁତ କରିବେ, ଯାହାଦ୍ୱାରା ଉତ୍ସବ ସମୟରେ କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବ ନାହିଁ।

ପୁରୀ ଏକ ଉପକୂଳବର୍ତ୍ତୀ ସହର ହୋଇଥିବାରୁ ସମୁଦ୍ରକୂଳ ସୁରକ୍ଷା ପ୍ରତି ସ୍ୱତନ୍ତ୍ର ଦୃଷ୍ଟି ଦିଆଯାଇଛି। ଭାରତୀୟ ନୌସେନା, କୋଷ୍ଟଗାର୍ଡ ଏବଂ ମେରାଇନ୍ ପୋଲିସ ମିଳିତ ଭାବେ ଉପକୂଳ ସୁରକ୍ଷା ଦାୟିତ୍ୱ ତୁଲାଇବେ। ସମୁଦ୍ର ପଥରେ ଯେପରି କୌଣସି ପ୍ରକାର ଅବାଞ୍ଛିତ ଅନୁପ୍ରବେଶ ବା ବିପଦ ନଆସେ, ସେଥିପାଇଁ କଡ଼ା ପହରା ଦିଆଯିବ।

ରାଜ୍ୟ ଡିଜିପି ସ୍ପଷ୍ଟ କରିଛନ୍ତି ଯେ ପ୍ରତ୍ୟେକ ଅଧିକାରୀଙ୍କ ଦାୟିତ୍ୱ ନିର୍ଦ୍ଧାରଣ କରାସରିଛି। ଲକ୍ଷ ଲକ୍ଷ ସଂଖ୍ୟାରେ ଶ୍ରଦ୍ଧାଳୁମାନଙ୍କ ଆଗମନକୁ ଦୃଷ୍ଟିରେ ରଖି ପ୍ରଶାସନ ସମ୍ପୂର୍ଣ୍ଣ ସଜାଗ ରହିଛି। ଆଇନଶୃଙ୍ଖଳା ବଜାୟ ରଖିବା ସହ ଶ୍ରୀଜୀଉଙ୍କ ଏହି ମହାପର୍ବକୁ ଶାନ୍ତିପୂର୍ଣ୍ଣ ଏବଂ ଶୃଙ୍ଖଳିତ ଭାବେ ସମ୍ପନ୍ନ କରିବା ପାଇଁ ପୋଲିସ ପ୍ରଶାସନ ଦୃଢ଼ ପରିକର ଅଟେ।

ବାରିପଦା: ମୟୂରଭଞ୍ଜ ଜିଲ୍ଲା ସାମ୍ବାଦିକତାର 'ଭୀଷ୍ମ ପିତାମହ' ଭାବେ ପରିଚିତ ସ୍ୱର୍ଗତଃ ଅମରେନ୍ଦ୍ରଲାଲ ବୋଷଙ୍କ ଅମ୍ଳାନ ସ୍ମୃତିରେ ଶନିବାର ଏକ ବାର୍ଷିକ ସ୍ୱେଚ୍ଛାକୃତ ରକ୍ତଦାନ ଶିବିର ସଫଳତାର ସହ ଆୟୋଜିତ ହୋଇଯାଇଛି । ସ୍ଥାନୀୟ ବାରିପଦା ଷ୍ଟାଡିୟମ ସମ୍ମିଳନୀ କକ୍ଷଠାରେ "ଜିଲ୍ଲା ସାମ୍ବାଦିକ ପରିବାର, ମୟୂରଭଞ୍ଜ" ପକ୍ଷରୁ ଆୟୋଜିତ ଏହି ଶିବିରକୁ ମୟୂରଭଞ୍ଜ ଜିଲ୍ଲାପାଳ ହେମକାନ୍ତ ସୟ ଆନୁଷ୍ଠାନିକ ଭାବେ ଉଦଘାଟନ କରିବା ସହ ଏଭଳି ସାମାଜିକ ତଥା ମହତ ପ୍ରୟାସର ଉଚ୍ଚ ପ୍ରଶଂସା କରିଥିଲେ ।

ଏହି କାର୍ଯ୍ୟକ୍ରମରେ ମୟୂରଭଞ୍ଜ ଏସପି ବରୁଣ ଗୁଣ୍ଟୁପାଲ୍ଲୀ ସମ୍ମାନିତ ଅତିଥି ଭାବେ ଯୋଗଦେଇ ନିଜେ ସ୍ୱେଚ୍ଛାକୃତ ଭାବେ ରକ୍ତଦାନ କରି ଦିବଂଗତ ଶ୍ରୀ ବୋଷଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳୀ ଜ୍ଞାପନ କରିବା ସହ ଅନ୍ୟମାନଙ୍କ ପାଇଁ ଏକ ବଡ଼ ପ୍ରେରଣା ସାଜିଥିଲେ । ଜିଲ୍ଲା ସୂଚନା ଓ ଲୋକ ସମ୍ପର୍କ ଅଧିକାରୀ (DIPRO) ଶିଶିର ମୁନ୍ଦୟାଙ୍କ ଉପସ୍ଥିତିରେ ଆୟୋଜିତ ଏହି ଶିବିର ଅବସରରେ ବରିଷ୍ଠ ସାମ୍ବାଦିକ କଲ୍ୟାଣ କୁମାର ସିହ୍ନାଙ୍କୁ ସାମ୍ବାଦିକତା କ୍ଷେତ୍ରରେ ତାଙ୍କର ଉଲ୍ଲେଖନୀୟ ଅବଦାନ ପାଇଁ ସମ୍ବର୍ଦ୍ଧିତ କରାଯାଇଥିଲା ।

ଶିବିରରେ ବାରିପଦା ନଗରପାଳ କୃଷ୍ଣାନନ୍ଦ ମହାନ୍ତି, ଏମସିସି ବ୍ୟାଙ୍କ ସଭାପତି ସୁବ୍ରମଣ୍ୟମ ମହାନ୍ତି, ବିଶିଷ୍ଟ ସମାଜସେବୀ କଳିଙ୍ଗ କେଶରୀ ଜେନା, ବରିଷ୍ଠ ସାମ୍ବାଦିକ ରାମଚନ୍ଦ୍ର ଦାସ, ସୁକାନ୍ତ କୁମାର ଜିଉ ଓ ସମାଜସେବୀ ଅମର ସେଠୀ ପ୍ରମୁଖ ଉପସ୍ଥିତ ରହି ରକ୍ତଦାତାମାନଙ୍କୁ ଉତ୍ସାହିତ କରିଥିଲେ । ସ୍ୱର୍ଗତ ଅମରେନ୍ଦ୍ର ଲାଲଙ୍କ ଦୀର୍ଘ ୬୦ ବର୍ଷର ନିଷ୍ଠାପର ସାମ୍ବାଦିକତା ପ୍ରତି ସମ୍ମାନ ଜଣାଇ ଜିଲ୍ଲାର କୋଣ-ଅନୁକୋଣରୁ ବହୁ ସଂଖ୍ୟାରେ ସାମ୍ବାଦିକ ଓ ସ୍ୱେଚ୍ଛାକୃତ ରକ୍ତଦାତା ଶିବିରରେ ସାମିଲ ହୋଇ ରକ୍ତଦାନ କରିଥିଲେ ।

ଶିବିରରୁ ମୋଟ ୫୪ ୟୁନିଟ୍ ରକ୍ତ ସଂଗୃହୀତ ହୋଇଥିବା ବେଳେ ସମସ୍ତ ରକ୍ତଦାତାଙ୍କୁ ସାମ୍ବାଦିକ ପରିବାର ପକ୍ଷରୁ ପ୍ରମାଣପତ୍ର, ରକ୍ତଦାତା କାର୍ଡ ଏବଂ ଉତ୍ତରୀୟ ପ୍ରଦାନ ପୂର୍ବକ ଉଚ୍ଛ୍ୱସିତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଅନ୍ୟମାନଙ୍କ ମଧ୍ୟରେ ସୁଜିତ ମହାନ୍ତି, ଦେବାଶିଷ ପାତ୍ର, ଦେବାଶିଷ ମହାନ୍ତି, ଜିତେନ୍ଦ୍ର ମହାନ୍ତି, ଅନନ୍ତ ଦାସ, ପ୍ରଭାତ ମହାନ୍ତି, ସୌମ୍ୟରଞ୍ଜନ ମିଶ୍ର, ରାଜା ଖାନ୍, ବିପ୍ଳବ ଭଞ୍ଜନ ବୁଗୁଡେଇ ଓ ସୁନୀଲ ନାୟକ ପ୍ରମୁଖ ଉପସ୍ଥିତ ରହି ଏହି ମହତ କାର୍ଯ୍ୟକୁ ପ୍ରଶଂସା କରିଥିଲେ ।

ଜିଲ୍ଲା ରକ୍ତ ଭଣ୍ଡାରର ବରିଷ୍ଠ ଡାକ୍ତର ସୌମ୍ୟରଞ୍ଜନ ନାୟକ ଓ ତାଙ୍କ ବୈଷୟିକ ଟିମ୍ ରକ୍ତ ସଂଗ୍ରହ କରିବାରେ ପ୍ରମୁଖ ସହଯୋଗ କରିଥିବା ବେଳେ ସାମ୍ବାଦିକ ସୋମନାଥ ସିଂ, ନିରୋଜ ଲୋଚନ ପୁଥାଳ ଓ ଅସୀମ ଚକ୍ରବର୍ତ୍ତୀ ଶିବିର ପରିଚାଳନାରେ ସକ୍ରିୟ ସହଯୋଗ କରିଥିଲେ । ଆଗାମୀ ଦିନରେ ଏହିପରି ସାମାଜିକ କାର୍ଯ୍ୟଧାରା ଜାରି ରଖିବା ସହ ଆସନ୍ତା ୨୦୨୭ ଜାନୁଆରୀ ୧୭ ତାରିଖରେ ଜିଲ୍ଲାର ଅନ୍ୟତମ ବରିଷ୍ଠ ସାମ୍ବାଦିକ ସ୍ୱର୍ଗତ ମଳୟ ମହାନ୍ତଙ୍କ ସ୍ମୃତିରେ ମଧ୍ୟ ଏକ ବିଶାଳ ରକ୍ତଦାନ ଶିବିର ଅନୁଷ୍ଠିତ ହେବ ବୋଲି ସାମ୍ବାଦିକ ପରିବାର ପକ୍ଷରୁ ସର୍ବସମ୍ମତ ନିଷ୍ପତ୍ତି ନିଆଯାଇଛି ।

ଭୁବନେଶ୍ୱର: ପାଠ୍ୟ ପୁସ୍ତକ ତ୍ରୁଟି ଘଟଣାରେ ଅପରାଧିକ ତଦନ୍ତ ପାଇଁ କ୍ରାଇମବ୍ରାଞ୍ଚକୁ ନିର୍ଦ୍ଦେଶ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟର ବିଦ୍ୟାଳୟ ପାଠ୍ୟପୁସ୍ତକରେ ହୋଇଥିବା ବ୍ୟାପକ ତ୍ରୁଟି ଘଟଣାରେ ଏକ ଅପରାଧିକ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକରେ ଦେଖାଦେଇଥିବା ତ୍ରୁଟି ବିବାଦକୁ ନେଇ ରାଜ୍ୟ ସରକାର ଏହି ବଡ଼ ପଦକ୍ଷେପ ଗ୍ରହଣ କରିଛନ୍ତି।

ଉନ୍ନୟନ କମିଶନରଙ୍କ ଅଧ୍ୟକ୍ଷତାରେ ଗଠିତ ଏକ କମିଟିର ଅନୁସନ୍ଧାନ ରିପୋର୍ଟ ଆଧାରରେ ମୁଖ୍ୟମନ୍ତ୍ରୀ ଏହି ନିଷ୍ପତ୍ତି ନେଇଛନ୍ତି। ସମ୍ପୂର୍ଣ୍ଣ ପ୍ରକ୍ରିୟାର ତଦନ୍ତ ପାଇଁ କ୍ରାଇମବ୍ରାଞ୍ଚ ଏସପିଙ୍କ ନିକଟରେ ଏକ ଏଫଆଇଆର (FIR) ରୁଜୁ କରିବାକୁ ସେ ଏସସିଇଆରଟି (SCERT) ନିର୍ଦ୍ଦେଶକଙ୍କୁ ନିର୍ଦ୍ଦେଶ ଦେଇଛନ୍ତି। ପୂର୍ବରୁ କମିଟି ରିପୋର୍ଟ ଆସିବା ପରେ ତତ୍କାଳୀନ ଏସସିଇଆରଟି ନିର୍ଦ୍ଦେଶକ ଏବଂ ୩ ଜଣ ସହକାରୀ ନିର୍ଦ୍ଦେଶକଙ୍କୁ ନିଲମ୍ବିତ କରାଯିବା ସହ ଅନ୍ୟ ୬ ଜଣଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ନିର୍ଦ୍ଦେଶ ଦିଆଯାଇଥିଲା।

ମୁଖ୍ୟମନ୍ତ୍ରୀ କହିଛନ୍ତି ଯେ ପାଠ୍ୟପୁସ୍ତକ ପ୍ରସ୍ତୁତିରେ ହୋଇଥିବା ତ୍ରୁଟି ଅତ୍ୟନ୍ତ ଗୁରୁତର ଥିଲା ଏବଂ ଏଥିପାଇଁ ଅପରାଧିକ ଉତ୍ତରଦାୟିତ୍ୱ ସ୍ଥିର କରାଯିବା ଆବଶ୍ୟକ। ଏହି ତଦନ୍ତର ମୂଳ ଲକ୍ଷ୍ୟ ହେଉଛି ଦୋଷୀମାନଙ୍କୁ ଚିହ୍ନଟ କରିବା ଏବଂ ତୁରନ୍ତ ସୁଧାରମୂଳକ ପଦକ୍ଷେପ ଗ୍ରହଣ କରିବା।

ବାଲେଶ୍ୱର: ସମୁଦ୍ରରେ ପ୍ରାୟ ଏକ ସପ୍ତାହ ଧରି ନିଖୋଜ ଥିବା ୧୬ ଜଣ ମତ୍ସ୍ୟଜୀବୀ ଠାବ ହୋଇଛନ୍ତି। ପଶ୍ଚିମବଙ୍ଗ କାକଦ୍ୱୀପର ୨ କିମି ଦୂରରେ ଠାବ ହେଲେ ମତ୍ସ୍ୟଜୀବୀ । ସମସ୍ତେ ସୁରକ୍ଷିତ ଥିବା ସୂଚନା ମିଳିଛି । ଏହି ମତ୍ସ୍ୟଜୀବୀମାନଙ୍କ ମଧ୍ୟରେ ଓଡ଼ିଶାର ବାଲେଶ୍ୱର ଜିଲ୍ଲାର ୩ ଭାଇ ମଧ୍ୟ ସାମିଲ ଅଛନ୍ତି। ସମସ୍ତ ମତ୍ସ୍ୟଜୀବୀଙ୍କୁ ପଶ୍ଚିମବଙ୍ଗର କାକଦ୍ୱୀପ ନିକଟରୁ ଠାବ କରାଯାଇଛି।

ମିଳିଥିବା ସୂଚନା ଅନୁଯାୟୀ, ଗତ ଜୁଲାଇ ୨ ତାରିଖରେ ଏହି ମତ୍ସ୍ୟଜୀବୀମାନେ ‘ମାଆ କାଳୀ’ ନାମକ ଏକ ଟ୍ରଲରରେ ଗଭୀର ସମୁଦ୍ରକୁ ଇଲିସି ମାଛ ଧରିବା ପାଇଁ ଯାଇଥିଲେ। ସେମାନେ ଶଙ୍କରପୁର ବେଳାଭୂମିରୁ ଯାତ୍ରା ଆରମ୍ଭ କରିଥିଲେ। ତେବେ କୂଳ ଛାଡ଼ିବା ପରେ ପରିବାର ଲୋକଙ୍କ ସହ ସେମାନଙ୍କର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା।

ଠାବ ହୋଇଥିବା ୧୬ ଜଣ ମତ୍ସ୍ୟଜୀବୀଙ୍କ ମଧ୍ୟରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଉଲୁଡ଼ା ଗ୍ରାମର ୩ ଜଣ ଅଛନ୍ତି। ସେମାନେ ହେଲେ ରବୀନ୍ଦ୍ର ମାଝୀ, ଜୟରାମ ମାଝୀ ଏବଂ ଜଗନ୍ନାଥ ମାଝୀ। ବାକି ମତ୍ସ୍ୟଜୀବୀମାନେ ପଶ୍ଚିମବଙ୍ଗର ବୋଲି ଜଣାପଡ଼ିଛି। ସମୁଦ୍ରକୁ ଯିବା ପରେ ଏହି ତିନି ଓଡ଼ିଆ ଭାଇ ନିଜ ପରିବାର ସହ ଥରେ କଥା ହୋଇଥିଲେ। ଗତ ରବିବାର ଦିନ ଟ୍ରଲର ମାଲିକ ମଧ୍ୟ ସେମାନଙ୍କ ସହ ଯୋଗାଯୋଗ କରିଥିଲେ। କିନ୍ତୁ ଏହା ପରେ ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଯିବାରୁ ପରିବାର ମଧ୍ୟରେ ତୀବ୍ର ଆଶଙ୍କା ଦେଖାଦେଇଥିଲା।

ଶଙ୍କରପୁର ଟ୍ରଲର ଆସୋସିଏସନ ପକ୍ଷରୁ ମିଳିଥିବା ସୂଚନା ମୁତାବକ, ନିଖୋଜ ଟ୍ରଲରଟି ପଶ୍ଚିମବଙ୍ଗର କାକଦ୍ୱୀପ ଠାରୁ ପ୍ରାୟ ୨ କିଲୋମିଟର ଦୂରରେ ଠାବ ହୋଇଛି। ମତ୍ସ୍ୟଜୀବୀମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ଆସୋସିଏସନ ପକ୍ଷରୁ ଅନ୍ୟ ଏକ ଟ୍ରଲର ପଠାଯାଇଛି। ସମସ୍ତେ ସୁରକ୍ଷିତ ଥିବା ଖବର ପାଇବା ପରେ ନିଖୋଜ ମତ୍ସ୍ୟଜୀବୀଙ୍କ ପରିବାରରେ, ବିଶେଷ କରି ବାଲେଶ୍ୱରର ଭୋଗରାଇ ଅଞ୍ଚଳରେ ଆଶ୍ୱସ୍ତିର ଲହରୀ ଖେଳିଯାଇଛି।

ତେଲେଙ୍ଗାନା: ତେଲେଙ୍ଗାନାର ରଙ୍ଗାରେଡ୍ଡୀ ଜିଲ୍ଲାରେ ଏକ ହୃଦୟବିଦାରକ ଗଣହତ୍ୟା ଘଟଣା ସାମ୍ନାକୁ ଆସିଛି। ଜଣେ ୩୫ ବର୍ଷୀୟ ବ୍ୟକ୍ତି ନିଜ ପତ୍ନୀ ଏବଂ ଦୁଇ ନାବାଳକ ପୁଅଙ୍କୁ ହତ୍ୟା କରିବା ପରେ ତାଙ୍କ ନାମରେ ଯୌନ ନିର୍ଯାତନା ଅଭିଯୋଗ ଆଣିଥିବା ଜଣେ ନାବାଳିକା ଓ ତାଙ୍କ ପରିବାରର ଅନ୍ୟ ଦୁଇ ସଦସ୍ୟଙ୍କୁ ମଧ୍ୟ ଅତି ନିର୍ମମ ଭାବେ ହତ୍ୟା କରିଛନ୍ତି।

ପୋଲିସ ସୂତ୍ରରୁ ପ୍ରକାଶ ଯେ, ଅଭିଯୁକ୍ତ ରାଜକୁମାର ଶୁକ୍ରବାର ରାତିରେ ଏହି ହତ୍ୟାକାଣ୍ଡ ଘଟାଇଛନ୍ତି। ସେ ପ୍ରଥମେ ଶାବାଦ ସ୍ଥିତ ନିଜ ବାସଭବନରେ ନିଜ ପତ୍ନୀ ପାର୍ବତୀ ସରିତା ଏବଂ ତାଙ୍କର ୪ ବର୍ଷ ଓ ୧ ବର୍ଷର ଦୁଇ ପୁଅଙ୍କୁ ହତ୍ୟା କରିଥିଲେ। ପତ୍ନୀଙ୍କ ମୃତଦେହ ଥିବା ରୁମରୁ ସଂଘର୍ଷର ଚିହ୍ନ ମିଳିଥିବା ବେଳେ ଦୁଇ ଶିଶୁଙ୍କୁ ନିଦ୍ରିତ ଅବସ୍ଥାରେ ହତ୍ୟା କରାଯାଇଥିବା ସନ୍ଦେହ କରାଯାଉଛି। ସମ୍ପର୍କୀୟଙ୍କ ଅନୁଯାୟୀ ଘରର କବାଟ ଭିତରପଟୁ ବନ୍ଦ ଥିଲା ଏବଂ ପଙ୍ଖା, ଏସି ଓ କୁଲର୍ ଚାଲୁ ରହିଥିଲା। ରାଜକୁମାର ଏବଂ ପାର୍ବତୀ ୨୦୧୮ ମସିହାରେ ପ୍ରେମ ବିବାହ କରିଥିଲେ।

ନିଜ ପରିବାରକୁ ଶେଷ କରିବା ପରେ ରାଜକୁମାର ଚଳିତ ବର୍ଷ ମେ' ମାସରେ ତାଙ୍କ ବିରୋଧରେ ପୋକ୍ସୋ (POCSO) ଆଇନ ଅଧୀନରେ ମାମଲା ରୁଜୁ କରିଥିବା ୧୭ ବର୍ଷୀୟା ନାବାଳିକାଙ୍କ ଘରେ ପହଞ୍ଚିଥିଲେ। ସେ ନାବାଳିକାଙ୍କ ୪୫ ବର୍ଷୀୟା ମା’ ଏବଂ ୬୫ ବର୍ଷୀୟା ଆଈଙ୍କୁ ଘରେ ହତ୍ୟା କରିଥିଲେ। ଏହାପରେ ନାବାଳିକାଙ୍କୁ ବଳପୂର୍ବକ ନିଜ କାରରେ ଏକ ନିଛାଟିଆ ସ୍ଥାନକୁ ନେଇ ସେଠାରେ ହତ୍ୟା କରିଥିଲେ। ତେବେ ଘଟଣା ସମୟରେ ଉପସ୍ଥିତ ଥିବା ନାବାଳିକାଙ୍କ ୨୦ ବର୍ଷୀୟା ଦିବ୍ୟାଙ୍ଗ ଭଉଣୀଙ୍କୁ ସେ କୌଣସି କ୍ଷତି ପହଞ୍ଚାଇ ନଥିଲେ।

ଗତ ମେ' ମାସରେ ଉକ୍ତ ନାବାଳିକାଙ୍କୁ ପିଛା କରିବା ଓ ଯୌନ ନିର୍ଯାତନା ଦେବା ଅଭିଯୋଗରେ ରାଜକୁମାରଙ୍କୁ ଗିରଫ କରାଯାଇଥିଲା। କିନ୍ତୁ ବିଚାର ବିଭାଗୀୟ ଦଣ୍ଡର ଅବଧି ୭ ବର୍ଷରୁ କମ୍ ଥିବାରୁ ସେ ପରେ ଅଗ୍ରୀମ ଜାମିନ ପାଇବାରେ ସକ୍ଷମ ହୋଇଥିଲେ। ପରିବାର ଲୋକଙ୍କ କହିବା ଅନୁଯାୟୀ, ରାଜକୁମାର ମାନସିକ ସମସ୍ୟା ଦେଇ ଗତି କରୁଥିଲେ ଏବଂ ଜୁଆ ଖେଳ କାରଣରୁ ତାଙ୍କ ଉପରେ ବିପୁଳ ଋଣ ଭାର ଥିଲା। ହତ୍ୟାକାଣ୍ଡ ପରେ ସେ ନିଜ ବାପାଙ୍କୁ ଫୋନ୍ କରି ଦୋଷ ସ୍ୱୀକାର କରିବା ସହ ନିଜେ ମଧ୍ୟ ଆତ୍ମହତ୍ୟା କରିବାକୁ କହି ମୋବାଇଲ୍ ବନ୍ଦ କରିଦେଇଛନ୍ତି। ଫେରାର୍ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ପକ୍ଷରୁ ଏକାଧିକ ଟିମ୍ ଗଠନ କରାଯାଇ ତଦନ୍ତ ଜାରି ରହିଛି। ସାଇଣ୍ଟିଫିକ୍ ଟିମ୍ ସମସ୍ତ ଘଟଣାସ୍ଥଳରୁ ପ୍ରମାଣ ସଂଗ୍ରହ କରୁଛନ୍ତି।

ନୂଆଦିଲ୍ଲୀ: ସୁପ୍ରିମକୋର୍ଟରେ ଶୁକ୍ରବାର ଅଭାବନୀୟ ଘଟଣା ଦେଖିବାକୁ ମିଳିଛି। ଏକ ମାମଲାର ଶୁଣାଣି ବେଳେ ଆବେଦନକାରୀ ଜଣକ ବିଚାରପତିଙ୍କ ଉପରକୁ ଦଲିଲ ଫିଙ୍ଗିବା ସହ ଅଶାଳୀନ ଭାଷାରେ ଗାଳିଗୁଲଜ କରିଥିବା ଜଣାପଡ଼ିଛି। ଘଟଣା ଅନୁଯାୟୀ, ଜଷ୍ଟିସ କେ.ଭି. ବିଶ୍ୱନାଥନ୍‌‌ ଏବଂ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠରେ ଆଲାହାବାଦ ହାଇକୋର୍ଟଙ୍କ ଏକ ନିଷ୍ପତ୍ତି ବିରୋଧରେ ଦାୟର ହୋଇଥିବା ଆବେଦନର ଶୁଣାଣି ହେଉଥିଲା। ଏହି ସମୟରେ କୋର୍ଟରେ ଆବେଦନକାରୀ ଜଣକ ଅତ୍ୟନ୍ତ ଅସଭ୍ୟ ଭାବେ ନିଜର ପକ୍ଷ ରଖିଥିଲେ। ସେ ବିଚାରପତିଙ୍କୁ, ‘ହେ ନ୍ୟାୟିକ ସେବକ, ମୁଁ ତୁମକୁ ଆଦେଶ ଦେଉଛି ଯେ ଲକ୍ଷ୍ନୌର ଏସିପିଙ୍କ ବିରୋଧରେ ଏକ ଏଫ୍‌‌ଆଇଆର୍‌‌ ରୁଜୁ କରିବା ପାଇଁ ନିର୍ଦ୍ଦେଶ ଦିଅ’ ବୋଲି କହିଥିଲେ। ଏଭଳି ଆଚରଣରେ ଆଶ୍ଚର୍ଯ୍ୟ ପ୍ରକଟ କରି ଜଷ୍ଟିସ ବିଶ୍ୱନାଥନ୍‌‌ ପ୍ରଶ୍ନ କରିଥିଲେ, ‘ଆପଣ କଣ ଆମକୁ ଆଦେଶ ଦେଉଛନ୍ତି’ । 

ଏହାପରେ ପରିସ୍ଥିତି ଅଧିକ ଜଟିଳ ହୋଇଥିଲା। ଆବେଦନକାରୀ ଜଣକ ନିଜ ହାତରେ ଥିବା କେସ୍‌‌ ସମ୍ବନ୍ଧୀୟ କାଗଜପତ୍ରଗୁଡ଼ିକୁ ଶୂନ୍ୟରେ ଫିଙ୍ଗିବା ସହ ମୁଖ୍ୟ ବିଚାରପତିଙ୍କ ବିରୋଧରେ ଅତ୍ୟନ୍ତ ଅପଶବ୍ଦ ବ୍ୟବହାର କରିଥିଲେ। ଉଲ୍ଲେଖଯୋଗ୍ୟ, ମୁଖ୍ୟ ବିଚାରପତି ସୂର୍ଯ୍ୟକାନ୍ତ ସେହି ସମୟରେ ଖଣ୍ଡପୀଠରେ ଉପସ୍ଥିତ ନଥିଲେ। କିନ୍ତୁ ଏହି ହଟ୍ଟଗୋଳ ପରେ ସୁରକ୍ଷାକର୍ମୀମାନେ ତୁରନ୍ତ ଆବେଦନକାରୀଙ୍କୁ କୋର୍ଟରୁମରୁ ବାହାର କରିଦେଇଥିଲେ। ସମ୍ପୃକ୍ତ ଆବେଦନକାରୀଙ୍କ ପରିଚୟ ଏବଂ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ବିଷୟରେ ବର୍ତ୍ତମାନ ପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ। 

ସୂଚନାଯୋଗ୍ୟ ଯେ, କୋର୍ଟ ରୁମ୍ ଭିତରେ ଆବେଦନକାରୀ ରାଗିଯିବାର ଏହା ପ୍ରଥମ ଘଟଣା ନୁହେଁ। ପୂର୍ବରୁ ଅକ୍ଟୋବର ୨୦୨୫ ରେ ମଧ୍ୟ ଜଣେ ଆଇନଜୀବୀ ତତ୍କାଳୀନ ପ୍ରଧାନ ବିଚାରପତି ଜଷ୍ଟିସ୍ ବି.ଆର୍. ଗଭାଇଙ୍କ ଖଣ୍ଡପୀଠ ଉପରକୁ ଜୋତା ଫିଙ୍ଗିବାକୁ ଉଦ୍ୟମ କରିଥିଲେ, ଯାହା ପରେ ବାର୍ କାଉନସିଲ୍ ଓ ସୁପ୍ରିମକୋର୍ଟ ବାର୍ ଆସୋସିଏସନ୍ ପକ୍ଷରୁ ତାଙ୍କ ବିରୋଧରେ କଡ଼ା ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା।

ବାଲେଶ୍ୱର: ବାଲେଶ୍ୱରସ୍ଥିତ ଫକୀର ମୋହନ ବିଶ୍ୱବିଦ୍ୟାଳୟ ପକ୍ଷରୁ ବହୁ ପ୍ରତୀକ୍ଷିତ ୭ମ ସେମିଷ୍ଟାର ବିଏସସି ନର୍ସିଂ (B.Sc. Nursing) ପରୀକ୍ଷା ତାରିଖ ଶେଷରେ ଘୋଷଣା କରାଯାଇଛି। ନର୍ସିଂ ଛାତ୍ରଛାତ୍ରୀଙ୍କ ଦୀର୍ଘ ଦିନର ଧାରଣା ଓ ଦାବି ପରେ ବିଶ୍ୱବିଦ୍ୟାଳୟର ପରୀକ୍ଷା ନିୟନ୍ତ୍ରକଙ୍କ କାର୍ଯ୍ୟାଳୟ ପକ୍ଷରୁ ୨୦୨୧-୨୨ ଏବଂ ୨୦୨୨-୨୩ ବ୍ୟାଚ୍‌ର ନିୟମିତ ପରୀକ୍ଷା ପାଇଁ ଏହି ବିଜ୍ଞପ୍ତି ପ୍ରକାଶ ପାଇଛି।

ସୂଚନାଯୋଗ୍ୟ ଯେ, ୪ ବର୍ଷର ନର୍ସିଂ ପାଠ୍ୟକ୍ରମ ୬ ବର୍ଷରୁ ଅଧିକ ସମୟ ଧରି ଚାଲିଥିଲେ ସୁଦ୍ଧା ସପ୍ତମ ଏବଂ ଅଷ୍ଟମ ସେମିଷ୍ଟାର ପରୀକ୍ଷା ବାକି ପଡ଼ିଥିଲା। ଏହାକୁ ନେଇ ଛାତ୍ରଛାତ୍ରୀମାନେ ଘୋର ଅସନ୍ତୋଷ ବ୍ୟକ୍ତ କରିବା ସହ ବିଶ୍ୱବିଦ୍ୟାଳୟ କ୍ୟାମ୍ପସ ବାହାରେ ଧାରଣା ଦେଇଥିଲେ। ତେବେ ବର୍ତ୍ତମାନ ପରୀକ୍ଷା ତାରିଖ ଘୋଷଣା ହେବା ପରେ ଶହ ଶହ ନର୍ସିଂ ଛାତ୍ରଛାତ୍ରୀଙ୍କ ମଧ୍ୟରେ ଆଶ୍ୱସ୍ତି ଦେଖାଦେଇଛି।

ନୂତନ ବିଜ୍ଞପ୍ତି ଅନୁଯାୟୀ, ଥିଓରୀ (Theory) ପରୀକ୍ଷା ଆସନ୍ତା ଜୁଲାଇ ୧୪ ଏବଂ ଜୁଲାଇ ୧୫, ୨୦୨୬ ରେ ଅନୁଷ୍ଠିତ ହେବ। ସେହିପରି ପ୍ରାକ୍ଟିକାଲ୍ ପରୀକ୍ଷା ଜୁଲାଇ ୧୭ ଏବଂ ୧୮, ୨୦୨୬ ରେ କରାଯିବ। ଥିଓରୀ ବିଷୟଗୁଡ଼ିକରେ କମ୍ୟୁନିଟି ହେଲ୍ଥ ନର୍ସିଂ ଏବଂ ମିଡୱାଇଫେରୀ ବା ଅବଷ୍ଟେଟ୍ରିକ୍ସ ଆଣ୍ଡ ଗାଇନେକୋଲୋଜି (OBG) ନର୍ସିଂ ସାମିଲ ରହିଛି। ସମସ୍ତ ଥିଓରୀ ପରୀକ୍ଷା ଅପରାହ୍ନ ୨ଟା ରୁ ୫ଟା ପର୍ଯ୍ୟନ୍ତ ନିର୍ଦ୍ଧାରିତ କେନ୍ଦ୍ରଗୁଡ଼ିକରେ ଅନୁଷ୍ଠିତ ହେବ।

ଭୁବନେଶ୍ୱର: ଭୁବନେଶ୍ୱର ଡିସିପି ଜଗମୋହନ ମୀନାଙ୍କ ଇସ୍ତଫାର କିଛି ଦିନ ପରେ ପୁଣି ଜଣେ ଯୁବ ଆଇପିଏସ୍ ଅଧିକାରୀ ସରକାରୀ ଚାକିରି ଛାଡିବାକୁ ନିଷ୍ପତ୍ତି ନେଇଛନ୍ତି। ୨୦୨୫ ବ୍ୟାଚର ୩୩ ବର୍ଷୀୟ ଆଇପିଏସ୍ ପ୍ରୋବେସନର ସି.ଏ. ରାମଦାସ ଓଡ଼ିଶା ସରକାରଙ୍କ ନିକଟରେ ନିଜର ଇସ୍ତଫା ପତ୍ର ପ୍ରଦାନ କରିଛନ୍ତି।

ଗତ ବର୍ଷ ସିଭିଲ୍ ସର୍ଭିସେସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିବା ଏହି ଯୁବ ଅଧିକାରୀ ମୂଳତଃ ମହାରାଷ୍ଟ୍ରର ବାସିନ୍ଦା ଅଟନ୍ତି ଏବଂ ନିକଟରେ ତାଙ୍କୁ ଓଡ଼ିଶା କ୍ୟାଡର୍ ଆବଣ୍ଟନ କରାଯାଇଥିଲା। ସୂତ୍ରରୁ ପ୍ରକାଶ ଯେ, ସି.ଏ. ରାମଦାସ ବର୍ତ୍ତମାନ ହାଇଦ୍ରାବାଦ ସ୍ଥିତ ସର୍ଦ୍ଦାର ବଲ୍ଲଭଭାଇ ପଟେଲ ରାଷ୍ଟ୍ରୀୟ ପୋଲିସ ଏକାଡେମୀ (ଏସଭିପିଏନପିଏ) ଠାରେ ନିଜର ତାଲିମ ଗ୍ରହଣ କରୁଛନ୍ତି। ସେ ତାଙ୍କ ତାଲିମର ପ୍ରଥମ ପର୍ଯ୍ୟାୟରେ ଅଛନ୍ତି ଏବଂ ଏପର୍ଯ୍ୟନ୍ତ ଓଡ଼ିଶାରେ କୌଣସି ଦାୟିତ୍ୱ ଗ୍ରହଣ କରିନାହାଁନ୍ତି।

ରାଜ୍ୟରେ ଏଭଳି ଲଗାତାର ଦୁଇ ଜଣ ଯୁବ ଆଇପିଏସ୍ ଅଧିକାରୀଙ୍କ ଇସ୍ତଫା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ନିକଟରେ ଭୁବନେଶ୍ୱରର ପୂର୍ବତନ ଡିସିପି ଜଗମୋହନ ମୀନା ମଧ୍ୟ ନିଜ ପଦରୁ ଇସ୍ତଫା ଦେଇଥିଲେ। ଖୁବ୍ କମ୍ ଦିନ ବ୍ୟବଧାନରେ ଏହିପରି ଦୁଇଟି ଘଟଣା ପ୍ରଶାସନିକ ସ୍ତରରେ ନାନା ପ୍ରଶ୍ନବାଚୀ ସୃଷ୍ଟି କରିଛି।

ଖୋର୍ଦ୍ଧା: ଲାଞ୍ଚ ନେବାବେଳେ ଭିଜିଲାନ୍ସକୁ ଦେଖି ଫେରାର ହୋଇଗଲେ ନାଚୁଣୀ ଥାନା ASI ଅକ୍ଷୟ କୁମାର ସେଠୀ । ଖୋର୍ଦ୍ଧା ଜିଲ୍ଲା ନାଚୁଣୀ ଥାନାରେ କାର୍ଯ୍ୟରତ ଆସିଷ୍ଟାଣ୍ଟ ସବ୍-ଇନ୍ସପେକ୍ଟର (ଏଏସଆଇ) ଅକ୍ଷୟ କୁମାର ସେଠୀ ଏକ ଜମି ବିବାଦ ମାମଲାର ରଫାଦଫା କରିବା ପାଇଁ ୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଟିମ୍‌କୁ ଦେଖି ଫେରାର ହୋଇଯାଇଛନ୍ତି। ଭିଜିଲାନ୍ସ ପକ୍ଷରୁ ତାଙ୍କ ନାମରେ ଏକ ଦୁର୍ନୀତି ମାମଲା ରୁଜୁ କରାଯାଇଛି।

ମିଳିଥିବା ସୂଚନା ଅନୁସାରେ, ଗତ ଜୁଲାଇ ୫ ତାରିଖରେ ଜଣେ ବ୍ୟକ୍ତି ଏକ ଜମି ବିବାଦକୁ ନେଇ ନାଚୁଣୀ ଥାନାରେ ଅଭିଯୋଗ କରିଥିଲେ, ଯାହାର ଏକ ପାଲଟା ଅଭିଯୋଗ ମଧ୍ୟ ଦ୍ୱିତୀୟ ପକ୍ଷରୁ କରାଯାଇଥିଲା। ଏହି ଉଭୟ ମାମଲାର ତଦନ୍ତ ଦାୟିତ୍ୱ ଏଏସଆଇ ଅକ୍ଷୟ କୁମାର ସେଠୀଙ୍କୁ ଦିଆଯାଇଥିଲା। ପରେ ଉଭୟ ପକ୍ଷ ମଧ୍ୟରେ ଆପୋଷ ବୁଝାମଣା ହୋଇଥିଲା। ତଥାପି, ମାମଲାକୁ ଥାନା ସ୍ତରରେ ବନ୍ଦ କରିବା ପାଇଁ ଏଏସଆଇ ଉଭୟ ପକ୍ଷଙ୍କଠାରୁ ୧୦,୦୦୦ ଟଙ୍କା (ପ୍ରତ୍ୟେକଙ୍କଠାରୁ ୫,୦୦୦ ଟଙ୍କା) ଦାବି କରିଥିଲେ। ଅଭିଯୋଗକାରୀଙ୍କୁ ନିଜ କର୍ମକ୍ଷେତ୍ର (ଓଡ଼ିଶା ବାହାରକୁ) ଫେରିବାକୁ ଥିବାରୁ, ସେ ମାମଲାର ଶୀଘ୍ର ସମାଧାନ ପାଇଁ ଅନୁରୋଧ କରିଥିଲେ। ଏଥିପାଇଁ ଜୁଲାଇ ୧୦ ତାରିଖରେ ଏକ ସତ୍ୟପାଠ ସହ ୫,୦୦୦ ଟଙ୍କା ଦେବାକୁ ଏଏସଆଇ ନିର୍ଦ୍ଦେଶ ଦେଇଥିଲେ।

ଅଭିଯୋଗକାରୀ ଲାଞ୍ଚ ଦେବାକୁ ଚାହୁଁନଥିବାରୁ ସେ ଓଡ଼ିଶା ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଭିତ୍ତି କରି ଭିଜିଲାନ୍ସ ପକ୍ଷରୁ ଏକ ଟ୍ରାପ୍ ବା ଜାଲ ବିଛାଯାଇଥିଲା। ଜୁଲାଇ ୧୦ ତାରିଖ ରାତିରେ ଏକ ନିଛାଟିଆ ସ୍ଥାନରେ ଏଏସଆଇ ଜଣକ ଯେତେବେଳେ ଲାଞ୍ଚ ଅର୍ଥ ଗ୍ରହଣ କରୁଥିଲେ, ସେତେବେଳେ ଭିଜିଲାନ୍ସ ଟିମ୍ ଦୂରରୁ ନଜର ରଖିଥିଲେ। ତେବେ ଭିଜିଲାନ୍ସ ଅଧିକାରୀମାନଙ୍କୁ ନିଜ ଆଡ଼କୁ ଆସୁଥିବା ଦେଖି ଅକ୍ଷୟ କୁମାର ସେଠୀ ଲାଞ୍ଚ ବାବଦ ୫,୦୦୦ ଟଙ୍କା ଧରି ନିଜ ବାଇକ୍‌ରେ ଘଟଣାସ୍ଥଳରୁ ଚମ୍ପଟ ମାରିଥିଲେ।

ଏହି ଘଟଣା ପରେ ନାଚୁଣୀ ଥାନା ଅଧିକାରୀଙ୍କ ଉପସ୍ଥିତିରେ ଅଭିଯୁକ୍ତ ଏଏସଆଇଙ୍କ ସହ ଜଡ଼ିତ ବିଭିନ୍ନ ସ୍ଥାନରେ ଭିଜିଲାନ୍ସ ପକ୍ଷରୁ ଏକାସାଙ୍ଗରେ ଚଢ଼ାଉ କରାଯାଇଛି। ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ଭୁବନେଶ୍ୱର ଭିଜିଲାନ୍ସ ଥାନାରେ ଏକ ମାମଲା ରୁଜୁ କରାଯାଇଛି। ଫେରାର ଏଏସଆଇଙ୍କୁ ଠାବ କରିବା ଏବଂ ଗିରଫ କରିବା ପାଇଁ ଉଦ୍ୟମ ଜାରି ରହିଥିବା ବେଳେ ଘଟଣାର ଅଧିକ ତଦନ୍ତ ଚାଲିଛି ବୋଲି ଭିଜିଲାନ୍ସ ଅଧିକାରୀମାନେ ସୂଚନା ଦେଇଛନ୍ତି।

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ଜଟଣୀ ଥାନା ଅନ୍ତର୍ଗତ ଖୁଦୁପୁର ଛକ ନିକଟରେ ଯୁବକଙ୍କୁ ନିର୍ମମ ହତ୍ୟା । ଜଣେ ଯୁବକଙ୍କୁ ଅତି ନିର୍ମମ ଭାବେ ଛୁରି ଭୁସି ହତ୍ୟା କରି ରକ୍ତ ଜୁଡୁବୁଡୁ ଅବସ୍ଥାରେ ମୃତଦେହକୁ ରାସ୍ତାରେ ଫୋପାଡ଼ି ଦେଲେ ଦୁର୍ବୃତ୍ତ। ମୃତକ ଜଣକ ହେଲେ ଖୁଦୁପୁର ଗାଁର ମାର୍କଣ୍ଡ ବଳିୟାରସିଂହ ଓରଫ ଜଗା।

ପ୍ରାଥମିକ ସୂଚନା ଅନୁଯାୟୀ, ଗତକାଲି ରାତିରେ ମାର୍କଣ୍ଡ ଛକରେ ଠିଆ ହୋଇଥିବା ବେଳେ ହଠାତ୍ ଜଣେ ଅଜ୍ଞାତ ଦୁର୍ବୃତ୍ତ ତାଙ୍କ ଉପରେ ଆକ୍ରମଣ କରିଥିଲା। ଦୁର୍ବୃତ୍ତ ଜଣକ ତାଙ୍କ ପେଟ ଓ ଛାତିକୁ ବାରମ୍ବାର ଛୁରିରେ ଆକ୍ରମଣ କରିଥିଲା। ଏହି ମର୍ମନ୍ତୁଦ ଆକ୍ରମଣ ଫଳରେ ସେ ଗୁରୁତର ଆହତ ହୋଇଥିଲେ ଏବଂ ତାଙ୍କର ମୃତ୍ୟୁ ଘଟିଥିଲା। ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିଲା।

ଖବର ପାଇ ଜଟଣୀ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୋଲିସ ଏହି ଘଟଣାରେ ଜଣେ ସନ୍ଦିଗ୍ଧଙ୍କୁ ଅଟକ ରଖି ପଚରାଉଚରା କରୁଛି। ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା ପୋଲିସ ପ୍ରାଥମିକ ସ୍ତରରେ ସନ୍ଦେହ କରୁଛି।

ପୁରୀ: ଅଣସରରେ ଘରେ ଚାଲିଛି ଦାରୁବିଗ୍ରହଙ୍କ ଗୁପ୍ତ ସେବା। ଦଇତାପତିମାନେ ଠାକୁରଙ୍କ ସେବା କରୁଛନ୍ତି। ଆଜି (ଶନିବାର) ଏକାଦଶୀରେ ମହାପ୍ରଭୁ ଲାଗି ହେବେ ଦଶମୂଳ। ଜ୍ୱରରେ ପୀଡ଼ିତ ଦାରୁବିଗ୍ରହମାନେ ଏହି ଦଶମୂଳ ମୋଦକ ଲାଗି ହେଲେ ସୁସ୍ଥ ହୋଇଥାନ୍ତି। ତେଣୁ ଶ୍ରୀମନ୍ଦିରର ବୈଦ୍ୟ ସେବକମାନେ ମହାପ୍ରଭୁଙ୍କ ପାଇଁ ଦଶମୂଳ ମୋଦକ ପ୍ରସ୍ତୁତ କରି ଶୁକ୍ରବାର ମନ୍ଦିର ଗାରଦରେ ଦାଖଲ କରିଛନ୍ତି।

ଆୟୁର୍ବେଦିକ ପଦ୍ଧତି ଓ ଶାସ୍ତ୍ର ଅନୁସାରେ ମହାପ୍ରଭୁଙ୍କ ନିମନ୍ତେ ଦଶମୂଳ ମୋଦକ ପ୍ରସ୍ତୁତ ହୋଇଥାଏ। ବୈଦ୍ୟ ସେବକଙ୍କ ସୂଚନା ମୁତାବକ, ଦଶମୂଳ ହେଉଛି ମହାପ୍ରଭୁଙ୍କ ଔଷଧ। ଏକମାସ ପୂର୍ବରୁ ଏହାକୁ ସଂଗ୍ରହ କରିବାକୁ ପଡିଥାଏ। ସ୍ନାନ ପୂର୍ଣ୍ଣିମା ପରେ ଦଶମୂଳ ଯଥା ଗମ୍ଭାରୀ, ଫଣଫଣା, ଶାଳପନ୍ନି, କୃଷ୍ଣପନ୍ନି, ଅଗବଥୁ, ଲବିଂ କୋଳି, ବେଲ, ଅଙ୍କରାନ୍ତି, ଗୋଖରା ଏବଂ ନବାଙ୍କୁରୀକୁ ଶୁଖାଯାଇଥାଏ। ଭଲ ଭାବେ ଶୁଖିଗଲା ପରେ ଏହାକୁ ହେମଦସ୍ତାରେ କୁଟି ଗୁଣ୍ଡ କରାଯାଏ। ଏହି ଗୁଣ୍ଡକୁ ଗାମୁଛାରେ ଛଣାଯାଏ। ନୂଆ କାଠ ଚୁଲିରେ କଡେଇ ବସାଯାଇ ଖୁଆ, ସର୍କରା, ସର, ମହୁ, ଘିଅ ଓ ଅଳ୍ପ ଭାଙ୍ଗ ଇତ୍ୟାଦି ପକାଯାଇ ଦଶମୂଳକୁ ପାଗ କରାଯାଏ। ପାଗ ପରେ ତାହାକୁ କଳଳୀପତ୍ର ଉପରେ ରଖି ଥଣ୍ଡା କରାଯାଏ। ଥଣ୍ଡା ହେଲା ପରେ ଗୋଲାକାର ମୋଦକ ପ୍ରସ୍ତୁତ ହୁଏ। ତିନୋଟି କୁଡ଼ୁଆରେ ଦଶମୂଳ ମୋଦକକୁ ରଖି ଏହା ଉପରେ କର୍ପୁର ପକାଇ ତାଳପତ୍ର ଭୋଗେଇରେ ପ୍ୟାକିଂ କରାଯାଏ। ଦଶମୀ ତିଥିରେ ଶ୍ରୀମନ୍ଦିର ଗାରଦରେ ଏହାକୁ ଦାଖଲ କରାଯାଇଥାଏ। ଏହିସବୁ କାମ ଶୁଦ୍ଧପୁତ ଭାବେ ଏବଂ ମହାପ୍ରଭୁଙ୍କ ପ୍ରତି ନିଷ୍ଠା ରଖି କରାଯାଏ।

ଦଇତାପତି ସେବକଙ୍କ ମତରେ, ମହାପ୍ରଭୁ ମାନବୀୟ ଲୀଳା କରିଥାନ୍ତି। ପ୍ରତିବର୍ଷ ଦେବସ୍ନାନ ପୂର୍ଣ୍ଣିମାରେ ସ୍ନାନମଣ୍ଡପରେ ୧୦୮ ଗଡ଼ୁ ଜଳରେ ସ୍ନାନ କରି ଜ୍ୱରରେ ପୀଡତ ହୁଅନ୍ତି। ଏହା ପରଠାରୁ ଆଷାଢ କୃଷ୍ଣ ଦଶମୀ ଯାଏ ମହାପ୍ରଭୁ ଧଳା ବସ୍ତ୍ର ପରିଧାନ କରିଥାନ୍ତି। ଠାକୁରଙ୍କୁ ଧଳା ପୁଷ୍ପ ଲାଗି ହୋଇଥାଏ। ଆଷାଢ କୃଷ୍ଣ ଏକାଦଶୀରେ ମହାପ୍ରଭୁ ବାରଲାଗି ପାଟ ପରିଧାନ କରିବେ। ଶ୍ରୀବିଗ୍ରହଙ୍କୁ ତୁଳସୀ ଲାଗି ହେବ। ଏହାପରେ ଜ୍ୱରରୁ ଉପଶମ ପାଇଁ ଦାରୁବିଗ୍ରହଙ୍କୁ ଦଶମୂଳ ଲାଗି କରାଯିବ।

ମେଷ: ଆଜି ଦିନଟି ମିଶ୍ରିତ ଫଳ ପ୍ରଦାନ କରିବ। କ୍ୟାରିୟରକୁ ନେଇ ଆଗକୁ ବଢ଼ିବେ। ବୈବାହିକ ଜୀବନ ସୁଖମୟ ହେବ। ଆର୍ଥିକ ଦୃଷ୍ଟିରୁ ଦିନଟି ଭଲରେ କଟିବ। ଅଚାନକ ଖୁସି ଖବର ମିଳିପାରେ। 

ବୃଷ: ସମାଜରେ ମାନସମ୍ମାନ ବୃଦ୍ଧି ପାଇବ। ଦୀର୍ଘ ଦିନର ଆଶା ପୂରଣ ହେବ। ସକାରାତ୍ମକ ଚିନ୍ତାଧାରା ସହିତ ଆଗକୁ ବଢ଼ିବେ। ପରିବାରର ଦାୟିତ୍ବ ସୁଚାରୁରୂପେ ତୁଲାଇବେ। 

ମିଥୁନ: କାର୍ଯ୍ୟକ୍ଷେତ୍ରରେ ଅଧିକ କାମ କରିବାକୁ ପଡ଼ିପାରେ। ଦୂରସ୍ଥାନକୁ ଯାତ୍ରା କରିପାରନ୍ତି। ବ୍ୟବସାୟରେ ଲାଭ ମିଳିବ। ଚିନ୍ତାଗ୍ରସ୍ତ ରହିବେ। ଦାମ୍ପତ୍ୟ ଜୀବନ ସୁଖମୟ ହେବ।

କର୍କଟ: ନୂଆ ଲୋକଙ୍କ ସଂସ୍ପର୍ଶରେ ଆସିପାରନ୍ତି। ଅଫିସ୍‌ରେ ପଦୋନ୍ନତି ସମ୍ଭାବନା ଅଛି। ପ୍ରତିଯୋଗିତାମୂଳକ ପରୀକ୍ଷା ପ୍ରସ୍ତୁତି ଲାଗି ବିଦ୍ୟାର୍ଥୀଙ୍କୁ ଅଧିକ ପରିଶ୍ରମ କରିବାକୁ ପଡ଼ିପାରେ। 

ସିଂହ: କାର୍ଯ୍ୟରେ ସଫଳତା ମିଳିପାରେ। ଦିନଟି ବ୍ୟସ୍ତତା ଭିତରେ କଟିବ। ସାମାଜିକ କାର୍ଯ୍ୟରେ ସହଯୋଗ କରିବେ। ମନୋରଞ୍ଜନରେ ସମୟ ଅତିବାହିତ କରିବେ। କଳା ଓ ସାହିତ୍ୟ ପ୍ରତି ରୁଚି ବଢ଼ିବ।  

କନ୍ୟା: ସହକର୍ମୀଙ୍କ ସହ ଉତ୍ତମ ବୁଝାମଣା ରହିବ। ଖର୍ଚ୍ଚ ବୃଦ୍ଧି ପାଇବ। ପରିବାର ସଦସ୍ୟଙ୍କ ସହ ଧାର୍ମିକ ସ୍ଥାନକୁ ଯାତ୍ରା କରିବେ। କଳା ଓ ସାହିତ୍ୟ ପ୍ରତି ରୁଚି ବଢ଼ିବ। ଉଧାର ଦେଇଥିବା ଟଙ୍କା ଫେରିପାଇବେ। 

ତୁଳା: ଅଫିସ୍‌ରେ ବରିଷ୍ଠ ଅଧିକାରୀଙ୍କଠାରୁ ପ୍ରଶଂସା ପାଇବେ। ଆଇଟି କର୍ମଚାରୀଙ୍କ ପାଇଁ ଦିନଟି ଭଲ। ବ୍ୟବସାୟକୁ ନେଇ ଦୂରସ୍ଥାନକୁ ଯାତ୍ରା କରିପାରନ୍ତି। ଧନ ଲାଭର ଯୋଗ ଅଛି।

ବିଛା: ଅଧିକ ଖର୍ଚ୍ଚାନ୍ତ ହେବାକୁ ପଡ଼ିପାରେ। ଧାର୍ମିକ ସ୍ଥାନକୁ ଯାତ୍ରା କରିବେ। କୋର୍ଟ କଚେରୀ ମାମଲାର ଶୁଣାଣି ହେବ। ପିଲାମାନେ ଖେଳ କୁଦରେ ସମୟ ଅତିବାହିତ କରିବେ।  

ଧନୁ: ଆତ୍ମବିଶ୍ବାସ ବୃଦ୍ଧି ପାଇବ। ବ୍ୟବହାରରେ ସଂଯମତା ରକ୍ଷା କରିବେ। ଅବିବାହିତଙ୍କ ପାଇଁ ବିବାହ ପ୍ରସ୍ତାବ ଆସିପାରେ। ଗୁରୁଜନଙ୍କ ଆଶୀର୍ବାଦ ନେଇ ନୂତନ ବ୍ୟବସାୟ ଆରମ୍ଭ କରିପାରନ୍ତି। 

ମକର: ବ୍ୟବସାୟକୁ ଆଗକୁ ନେବା ଲାଗି ନୂଆ ଯୋଜନା କରିବେ। କୋର୍ଟ କଚେରୀ ମାମଲାର ଶୁଣାଣି ହେବ। ଯୋଜନା ଅନୁଯାୟୀ କାମ କରିବେ। ଆୟ ଓ ବ୍ୟୟ ସମାନ ରହିବ। ଚକ୍ଷୁ ସମସ୍ୟା ଭୋଗିପାରନ୍ତି। 

କୁମ୍ଭ: ଦିନଟି ମିଶ୍ରିତ ଫଳ ପ୍ରଦାନ କରିବ। ଅଯଥା କାମକୁ ନେଇ ଚିନ୍ତାରେ ରହିବେ। ସନ୍ତାନଙ୍କ ଭବିଷ୍ୟତ ପାଇଁ  ନୂଆ ଯୋଜନା ପ୍ରସ୍ତୁତ କରିପାରନ୍ତି। ବିବାହ ପ୍ରସ୍ତାବ ଆସିପାରେ। 

ମୀନ: ଚାକିରିରେ ନୂଆ ସୁଯୋଗ ଜୁଟିବ। ଲୋକ ସମ୍ପର୍କ ବୃଦ୍ଧି ପାଇବ। ଭାଇମାନଙ୍କ ସହିତ ସମ୍ପର୍କ ମଧୁର ହେବ। ଦୂରସ୍ଥାନକୁ ଯାତ୍ରା କରିପାରନ୍ତି। ଖର୍ଚ୍ଚ ବଢ଼ିପାରେ। ସ୍ବାସ୍ଥ୍ୟ ପ୍ରତି ଯତ୍ନବାନ ହେବେ। 

ଭୁବନେଶ୍ୱର: ଚୌଦ୍ୱାର ମୁନିସିପାଲିଟିର ଅଧ୍ୟକ୍ଷା ମାନସୀ ସାମଲ ଓ ବିଜେଡିର କାଉନସିଲରମାନେ ଆଜି ନବୀନ ନିବାସରେ ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ଭେଟିଛନ୍ତି। ଏହି ସାକ୍ଷାତ ସମୟରେ ଏକଜୁଟ ହୋଇ ଲୋକଙ୍କ ସେବା ଜାରି ରଖିବାକୁ ବିରୋଧୀ ଦଳ ନେତା ଶ୍ରୀ ପଟ୍ଟନାୟକ ପରାମର୍ଶ ଦେଇଛନ୍ତି। ମହାନ ଜନନାୟକ ସ୍ୱର୍ଗତ ବିଜୁ ପଟ୍ଟନାୟକଙ୍କର ସ୍ମୃତି ଚାରଣ କରି ଶ୍ରୀ ପଟ୍ଟନାୟକ କହିଛନ୍ତି ଯେ ଚୌଦ୍ୱାର ସହ ବିଜୁ ବାବୁଙ୍କର ଆବେଗିକ ସମ୍ପର୍କ ରହିଥିଲା ଓ ଚୌଦ୍ୱାର ବିକାଶରେ ବିଜୁ ବାବୁଙ୍କର ବିଶେଷ ଅବଦାନ ଥିଲା। ତେଣୁ ଚୌଦ୍ୱାରର ସ୍ୱାଭିମାନ ଓ ବିକାଶ ପାଇଁ ଉଦ୍ୟମ ଜାରି ରଖିବାକୁ ଶ୍ରୀ ପଟ୍ଟନାୟକ ପରାମର୍ଶ ଦେଇଥିଲେ। ଆଲୋଚନାରେ ଯୋଗ ଦେଇଥିବା କାଉନସିଲରମାନେ ଚୌଦ୍ୱାରର ବିକାଶ କାମରେ ଆସୁଥିବା ବାଧା ସମ୍ପର୍କରେ ଶ୍ରୀ ପଟ୍ଟନାୟକଙ୍କ ଦୃଷ୍ଟି ଆକର୍ଷଣ କରିଥିଲେ। ଏହି ଆଲୋଚନା ସମୟରେ ବିଜୁ ଜନତା ଦଳର ବରିଷ୍ଠ ଉପ-ସଭାପତି ତଥା ପୂର୍ବତନ ମନ୍ତ୍ରୀ ଦେବୀ ପ୍ରସାଦ ମିଶ୍ର, ସାଂସଦ ସଂତୃପ୍ତ ମିଶ୍ର ଓ ପୂର୍ବତନ ମନ୍ତ୍ରୀ ପ୍ରତାପ ଜେନା ଉପସ୍ଥିତ ଥିଲେ।

ମୟୂରଭଞ୍ଜ: ଭିଜିଲାନ୍ସ ଜାଲରେ ମୟୂରଭଞ୍ଜ ଜିଲ୍ଲା ବଡସାହି ବ୍ଲକ୍ କନିଷ୍ଠ ଯନ୍ତ୍ରୀ ସୁଶିଲ କୁମାର ସିଂହ । ୩୨ ହଜାର ଟଙ୍କା ଲାଞ୍ଚ ନେବା ବେଳେ ଧରିଲା ଭିଜିଲାନ୍ସ ଟିମ୍ । ୫ ଲକ୍ଷ ଟଙ୍କାର ବିଲ୍‌ ପାସ୍‌ ପାଇଁ ଜଣେ ଠିକାଦାରଙ୍କଠାରୁ ଲାଞ୍ଚ ନେଉଥିଲେ ସୁଶିଲ । ଯନ୍ତ୍ରୀଙ୍କୁ ଅଟକ ରଖି ଭିଜିଲାନ୍ସ ବିଭାଗ ପକ୍ଷରୁ ବ୍ଲକ କାର୍ଯ୍ୟାଳୟରେ ତଦନ୍ତ ଜାରି ରଖିଛନ୍ତି ।

ଭୁବନେଶ୍ୱର: ଶିକ୍ଷାବର୍ଷ ୨୦୨୬-୨୭ ପାଇଁ ଓଡ଼ିଶା ସରକାରଙ୍କ ଉଚ୍ଚଶିକ୍ଷା ବିଭାଗ ପକ୍ଷରୁ ଚାରି ବର୍ଷିଆ ଇଣ୍ଟିଗ୍ରେଟେଡ୍ ଟିଚର୍ ଏଜୁକେସନ୍ ପ୍ରୋଗ୍ରାମ୍ (ITEP) ନାମଲେଖା ନିମନ୍ତେ ପ୍ରଥମ ପର୍ଯ୍ୟାୟ ମେଧା ତାଲିକା ଶୁକ୍ରବାର ଦିନ ପ୍ରକାଶ ପାଇଛି। ଏହି ପ୍ରକ୍ରିୟା ଷ୍ଟୁଡେଣ୍ଟ୍ ଏକାଡେମିକ୍ ମ୍ୟାନେଜମେଣ୍ଟ୍ ସିଷ୍ଟମ୍ (SAMS) ଜରିଆରେ ପରିଚାଳିତ ହେଉଛି।

ଚଳିତ ଶିକ୍ଷାବର୍ଷରୁ ପ୍ରଥମ ଥର ପାଇଁ SAMS ଅଧୀନରେ ଆରମ୍ଭ ହୋଇଥିବା ଏହି ପାଠ୍ୟକ୍ରମରେ ଛାତ୍ରଛାତ୍ରୀମାନେ ସ୍ନାତକ ଡିଗ୍ରୀ ସହିତ ବି.ଏଡ୍. (B.Ed.) ଯୋଗ୍ୟତା ୪ ବର୍ଷ ମଧ୍ୟରେ ହାସଲ କରିପାରିବେ। ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ଦ୍ୱାରା ପରିଚାଳିତ ନ୍ୟାସନାଲ୍ କମନ୍ ଏଣ୍ଟ୍ରାନ୍ସ ଟେଷ୍ଟ (NCET-2026) ଦେଇଥିବା ପ୍ରାର୍ଥୀମାନେ ଏଥିପାଇଁ ଯୋଗ୍ୟ ବିବେଚିତ ହୋଇଛନ୍ତି।

ବିଭାଗୀୟ ସୂଚନା ଅନୁଯାୟୀ, ଅଂଶଗ୍ରହଣ କରିଥିବା ଶିକ୍ଷାନୁଷ୍ଠାନଗୁଡ଼ିକରେ ମୋଟ ୧,୫୦୦ ସିଟ୍ ଅନୁମୋଦିତ ହୋଇଛି। ଏହି ପାଠ୍ୟକ୍ରମ ପାଇଁ ୧୦,୬୪୭ ଆବେଦନକାରୀ ଦରଖାସ୍ତ ଦେଇଥିବାବେଳେ ସେମାନଙ୍କ ମଧ୍ୟରୁ ପ୍ରଥମ ପର୍ଯ୍ୟାୟରେ ୧,୪୬୩ ଜଣଙ୍କୁ ମନୋନୀତ କରାଯାଇଛି। ସେମାନଙ୍କ ମଧ୍ୟରେ ୫୬୨ ଜଣ ଛାତ୍ର ଏବଂ ୯୦୧ ଜଣ ଛାତ୍ରୀ ରହିଛନ୍ତି। 

ନବରଙ୍ଗପୁର: ନବରଙ୍ଗପୁର ଜିଲ୍ଲାରୁ ଏକ ଅତ୍ୟନ୍ତ ହୃଦୟ ବିଦାରକ ତଥା ଲଜ୍ଜାଜନକ ଘଟଣା ସାମ୍ନାକୁ ଆସିଛି। ଉମରକୋଟ ବ୍ଲକରେ ଶବ ସତ୍କାର ପାଇଁ ସ୍ଥାନ ନମିଳିବାରୁ ଏବଂ ଅର୍ଥ ଅଭାବରୁ ଗୋଟିଏ ପରିବାର ନିଜ ନାବାଳିକା ଝିଅର ମୃତଦେହକୁ ଏକ ବାଇକରେ ବୋହି ନେବାକୁ ବାଧ୍ୟ ହୋଇଛନ୍ତି।

ସୂଚନା ଅନୁଯାୟୀ, ଆମାଗୁଡ଼ା ଗାଁର ନାବାଳିକା ଇନ୍ଦ୍ରାଣୀ କୁମାର ଚିକିତ୍ସା ପାଇଁ ସାନଭରଣ୍ଡି ଗ୍ରାମରେ ଥିବା ନିଜ ସମ୍ପର୍କୀୟଙ୍କ ଘରକୁ ଯାଇଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ପରିବାର ଲୋକେ ଯେତେବେଳେ ସ୍ଥାନୀୟ ଶ୍ମଶାନରେ ତାଙ୍କର ଶେଷକୃତ୍ୟ ସମ୍ପନ୍ନ କରିବାକୁ ଚାହିଁଥିଲେ, ସେତେବେଳେ ଗାଁ ଲୋକେ ଏଥିପାଇଁ ବାରଣ କରିବା ସହ ୭,୦୦୦ ଟଙ୍କା ଦାବି କରିଥିଲେ। ଟଙ୍କା ଦେବାରେ ଅସମର୍ଥ ହେବାରୁ ଗରିବ ପରିବାର ଶେଷରେ ମୃତଦେହକୁ ନିଜ ଗାଁକୁ ଫେରାଇ ନେବାକୁ ନିଷ୍ପତ୍ତି ନେଇଥିଲେ।

ଅର୍ଥ ଅଭାବରୁ ଶବବାହକ ଗାଡ଼ି ଭଡ଼ାରେ ଆଣିବା ସମ୍ଭବ ନହେବାରୁ, ପରିବାରର ସଦସ୍ୟମାନେ ନାବାଳିକାର ମୃତଦେହକୁ ଏକ ମୋଟରସାଇକେଲରେ ବସାଇ ଆମାଗୁଡ଼ା ଗାଁକୁ ନେଇଥିଲେ। ଏହି ହୃଦୟବିଦାରକ ଦୃଶ୍ୟ ସ୍ଥାନୀୟ ଲୋକଙ୍କୁ ସ୍ତବ୍ଧ କରିଦେଇଛି । ଏହି ଅମାନବୀୟ ଘଟଣାର ପୁଙ୍ଖାନୁପୁଙ୍ଖ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ବାସିନ୍ଦା ପ୍ରଶାସନ ନିକଟରେ ଦାବି କରିଛନ୍ତି। 

ଭୁବନେଶ୍ୱର: ଓଡ଼ିଶା ସରକାରଙ୍କ ପକ୍ଷରୁ ଆସନ୍ତା ଜୁଲାଇ ୧୩ ତାରିଖ (ସୋମବାର) ଦିନ ହେବାକୁ ଥିବା ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମକୁ ବନ୍ଦ ରଖାଯାଇଛି। ମୁଖ୍ୟମନ୍ତ୍ରୀଙ୍କ ଅନ୍ୟ ଜରୁରୀ ସରକାରୀ ବ୍ୟସ୍ତତା କାରଣରୁ ଏହି ନିଷ୍ପତ୍ତି ନିଆଯାଇଥିବା ସୂଚନା ମିଳିଛି। ଏ ନେଇ ରାଜ୍ୟ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗ ପକ୍ଷରୁ ଶୁକ୍ରବାର ଦିନ ଏକ ସରକାରୀ ପ୍ରେସ୍ ବିଜ୍ଞପ୍ତି ଜାରି କରାଯାଇଛି। 

ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଜୁଲାଇ ୧୩ରେ ଶୁଣାଣି ହେବ ନାହିଁ ବୋଲି ସ୍ପଷ୍ଟ କରାଯାଇଛି। ବିଭାଗ ପକ୍ଷରୁ କୁହାଯାଇଛି ଯେ, ପରବର୍ତ୍ତୀ ଜନଶୁଣାଣି କାର୍ଯ୍ୟକ୍ରମର ନୂତନ ତାରିଖ ସମ୍ପର୍କରେ ଖବରକାଗଜ ଏବଂ ଅନ୍ୟାନ୍ୟ ଗଣମାଧ୍ୟମ ଜରିଆରେ ପୃଥକ ଭାବେ ଘୋଷଣା କରାଯିବ।

ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀଙ୍କ ଜନଶୁଣାଣି କାର୍ଯ୍ୟକ୍ରମ ସାଧାରଣ ଜନତାଙ୍କ ପାଇଁ ଏକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମଞ୍ଚ ଅଟେ। ଏହି କାର୍ଯ୍ୟକ୍ରମ ମାଧ୍ୟମରେ ଲୋକମାନେ ସିଧାସଳଖ ନିଜର ଅଭିଯୋଗ ଜଣାଇବା ସହ ରାଜ୍ୟ ସରକାରଙ୍କଠାରୁ ଏହାର ତ୍ୱରିତ ସମାଧାନ ଆଶା କରିଥାନ୍ତି। ତେଣୁ, ପରବର୍ତ୍ତୀ ଶୁଣାଣି ତାରିଖ ଘୋଷଣା ନହେବା ପର୍ଯ୍ୟନ୍ତ ଅପେକ୍ଷା କରିବାକୁ ପ୍ରଶାସନ ପକ୍ଷରୁ ରାଜ୍ୟବାସୀଙ୍କୁ ପରାମର୍ଶ ଦିଆଯାଇଛି।

ଭୁବନେଶ୍ୱର: ଆସନ୍ତା ରାକ୍ଷୀ ପୂର୍ଣ୍ଣିମା ଅବସରରେ ରାଜ୍ୟର ମହିଳାମାନଙ୍କୁ ସୁଭଦ୍ରା ଯୋଜନାର ପଞ୍ଚମ କିସ୍ତି ପ୍ରଦାନ କରାଯିବ। ଏହି କିସ୍ତି ପାଇଁ ୧.୦୧ କୋଟିରୁ ଅଧିକ ହିତାଧିକାରୀ ମହିଳାଙ୍କୁ ଚିହ୍ନଟ କରାଯାଇଥିବା ବେଳେ ଏନେଇ ଓଡ଼ିଶା ସରକାରଙ୍କ ପକ୍ଷରୁ ପ୍ରସ୍ତୁତି ଜୋରଦାର କରାଯାଇଛି। ଲୋକସେବା ଭବନଠାରେ ଆୟୋଜିତ ଏକ ଉଚ୍ଚସ୍ତରୀୟ ବୈଠକରେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ଆଗାମୀ କିସ୍ତି ପ୍ରଦାନର ପ୍ରସ୍ତୁତି ସମ୍ପର୍କରେ ସମୀକ୍ଷା କରିଛନ୍ତି। କ୍ଷେତ୍ରୀୟ ତଦନ୍ତ ପାଇଁ ପଡ଼ି ରହିଥିବା ସମସ୍ତ ଆବେଦନଗୁଡ଼ିକର ଯାଞ୍ଚ ପ୍ରକ୍ରିୟାକୁ ଆସନ୍ତା ଜୁଲାଇ ୨୫, ୨୦୨୬ ସୁଦ୍ଧା ଶେଷ କରିବାକୁ ସେ ଜିଲ୍ଲା କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି। ଯୋଗ୍ୟ ହିତାଧିକାରୀମାନେ ଯେପରି ସହାୟତା ପାଇବାରେ ବିଳମ୍ବର ସମ୍ମୁଖୀନ ନହୁଅନ୍ତି, ସେଥିପାଇଁ ପଡ଼ି ରହିଥିବା ମାମଲାଗୁଡ଼ିକର ଦୈନିକ ସମୀକ୍ଷା କରିବାକୁ ଅଧିକାରୀମାନଙ୍କୁ କୁହାଯାଇଛି।

ସମୀକ୍ଷା ବୈଠକରେ ଉପସ୍ଥାପିତ ତଥ୍ୟ ଅନୁଯାୟୀ, ବର୍ତ୍ତମାନ ସୁଦ୍ଧା ସୁଭଦ୍ରା ଯୋଜନା ଅଧୀନରେ ସର୍ବମୋଟ ୧,୧୫,୭୫,୬୩୩ ଆବେଦନ ପଞ୍ଜୀକୃତ ହୋଇଛି। ଏଥିମଧ୍ୟରୁ ୨୦୨୬-୨୭ ଆର୍ଥିକ ବର୍ଷରେ ୩,୧୭,୯୬୬ ନୂତନ ଆବେଦନ ଗ୍ରହଣ କରାଯାଇଛି। ପ୍ରାଥମିକ ଯାଞ୍ଚ ପରେ ପଞ୍ଚମ କିସ୍ତି ପାଇଁ ୧,୦୨,୦୪,୩୯୬ ଜଣ ମହିଳାଙ୍କୁ ସମ୍ଭାବ୍ୟ ହିତାଧିକାରୀ ଭାବେ ବିବେଚନା କରାଯାଇଛି । 

ପାଣ୍ଠି ସ୍ଥାନାନ୍ତର ପୂର୍ବରୁ ଆବଶ୍ୟକୀୟ ପ୍ରମୁଖ ପ୍ରକ୍ରିୟା ଯଥା- ଡିବିଟି (DBT) ସକ୍ରିୟକରଣ, ବାୟୋମେଟ୍ରିକ୍ ଇ-କେୱାଇସି (e-KYC), କ୍ଷେତ୍ର ଯାଞ୍ଚ, ଏନପିସିଆଇ (NPCI) ମ୍ୟାପିଂ, ପେମେଣ୍ଟ ଫାଇଲ୍ ପ୍ରସ୍ତୁତି ଏବଂ ବ୍ୟାଙ୍କଗୁଡ଼ିକ ସହ ସମନ୍ୱୟ ଆଦିର ସ୍ଥିତି ଉପରେ ଏହି ବୈଠକରେ ସମୀକ୍ଷା କରାଯାଇଥିଲା। ପଞ୍ଚମ କିସ୍ତିର ଠିକ୍ ସମୟରେ ତଥା ତ୍ରୁଟିମୁକ୍ତ ବଣ୍ଟନ ପାଇଁ ଜିଲ୍ଲା ପ୍ରଶାସନ, ସମ୍ପୃକ୍ତ ବିଭାଗ, ବୈଷୟିକ ଏଜେନ୍ସି ଏବଂ ବ୍ୟାଙ୍କିଙ୍ଗ ପ୍ରତିଷ୍ଠାନ ମଧ୍ୟରେ ଉତ୍ତମ ସମନ୍ୱୟ ରକ୍ଷା କରିବାକୁ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ନିର୍ଦ୍ଦେଶ ଦେଇଛନ୍ତି।

ପବିତ୍ର ଅମରନାଥ ଯାତ୍ରା ଆରମ୍ଭ ହେବାର ମାତ୍ର କିଛି ଦିନ ମଧ୍ୟରେ ପବିତ୍ର ବରଫ ଶିବଲିଙ୍ଗ ବା 'ବାବା ବର୍ଫାନୀ'ଙ୍କ ଆକାର ପ୍ରାୟ ୯୦ ପ୍ରତିଶତ ତରଳିଯାଇଥିବା ଦେଖିବାକୁ ମିଳିଛି। ଶତାବ୍ଦୀ ଶତାବ୍ଦୀ ଧରି ପୂଜା ପାଇ ଆସୁଥିବା ଏହି ପବିତ୍ର ବରଫ ଶିବଲିଙ୍ଗର ଏଭଳି ଦ୍ରୁତ ଗତିରେ ତରଳିବା ଘଟଣା ଭକ୍ତ ଓ ପରିବେଶବିତ୍‌ମାନଙ୍କ ପାଇଁ ଚିନ୍ତାର କାରଣ ପାଲଟିଛି।

ଜଳବାୟୁ ପରିବର୍ତ୍ତନ ଏବଂ ଲୋକଙ୍କ ଭିଡ଼

ବିଶେଷଜ୍ଞମାନଙ୍କ ମତରେ ଏହି ଦ୍ରୁତ ପରିବର୍ତ୍ତନ ପାଇଁ ମୁଖ୍ୟତଃ ଜଳବାୟୁ ପରିବର୍ତ୍ତନ ହିଁ ଦାୟୀ। ପିଡିପି ନେତ୍ରୀ ଇଲ୍ତିଜା ମୁଫ୍‌ତୀ ଏହି ଘଟଣାକୁ ନେଇ ଗଭୀର ଉଦ୍‌ବେଗ ପ୍ରକାଶ କରିଛନ୍ତି। ବିଶେଷ କରି ରେକର୍ଡ ସଂଖ୍ୟକ ତୀର୍ଥଯାତ୍ରୀଙ୍କ ଭିଡ଼ ଏବଂ ବଢ଼ୁଥିବା ତାପମାତ୍ରା ବରଫ ଶିବଲିଙ୍ଗର ଆକାର ହ୍ରାସ ପାଇବାର ମୁଖ୍ୟ କାରଣ ହୋଇପାରେ ବୋଲି ଆଶଙ୍କା କରାଯାଉଛି।

କଡ଼ା ସୁରକ୍ଷା ମଧ୍ୟରେ ଚାଲିଛି ଯାତ୍ରା

ଚଳିତ ବର୍ଷ ଜୁଲାଇ ୩ ତାରିଖରୁ କଡ଼ା ସୁରକ୍ଷା ବଳୟ ମଧ୍ୟରେ ଅମରନାଥ ଯାତ୍ରା ଆରମ୍ଭ ହୋଇଛି। ଗତ ଏପ୍ରିଲ୍ ୨୦୨୫ ମସିହାରେ ହୋଇଥିବା ଭୟାବହ ପହଲଗାମ୍ ଆତଙ୍କବାଦୀ ଆକ୍ରମଣରେ ୨୬ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିଲା। ଏହି ଘଟଣାକୁ ଦୃଷ୍ଟିରେ ରଖି ଚଳିତ ବର୍ଷ ଅମରନାଥ ଯାତ୍ରୀମାନଙ୍କ ପାଇଁ ଅଦ୍ୱିତୀୟ ତଥା ଅତ୍ୟନ୍ତ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ତେବେ ଶିବଲିଙ୍ଗ ତରଳିଯାଉଥିଲେ ମଧ୍ୟ ଶ୍ରଦ୍ଧାଳୁମାନଙ୍କ ଉତ୍ସାହ ଏବଂ ଭକ୍ତିରେ କୌଣସି କମି ଦେଖିବାକୁ ମିଳିନାହିଁ।

ଭୁବନେଶ୍ୱର: ଲାଞ୍ଜିଗଡ଼ର ଡିଏଭି ଇଣ୍ଟରନ୍ୟାସନାଲ ସ୍କୁଲରେ ଏକ ଅତ୍ୟାଧୁନିକ କମ୍ପ୍ୟୁଟର ଲ୍ୟାବର ଉଦଘାଟନ ସହିତ ଓଡ଼ିଶାର କଳାହାଣ୍ଡି ଜିଲ୍ଲାରେ ଡିଜିଟାଲ ଶିକ୍ଷଣ ଭିତ୍ତିଭୂମିକୁ ସୁଦୃଢ଼ କରିଛି ବେଦାନ୍ତ ଆଲୁମିନିୟମ। ୮୦ ଟି ନୂତନ ଡେସ୍କଟପ୍ କମ୍ପ୍ୟୁଟର ସହିତ ସଜ୍ଜିତ, ଉନ୍ନତ ଲ୍ୟାବ ୧୪୦୦ ରୁ ଅଧିକ ଛାତ୍ରଛାତ୍ରୀ ଏବଂ ୬୦ଜଣ ଶିକ୍ଷକଙ୍କୁ ଉପକୃତ କରିବ । ଏହା ଡିଜିଟାଲ ଶିକ୍ଷଣ ବ୍ୟବସ୍ଥାକୁ ଆଗକୁ ନେବା ସହିତ ଏକ କ୍ରମବର୍ଦ୍ଧିଷ୍ଣୁ ନବସୃଜନ ପରିଚାଳିତ ବିଶ୍ୱରେ ଆବଶ୍ୟକ ଗୁରୁତ୍ୱପୂର୍ଣ୍ଣ ଡିଜିଟାଲ୍ ଦକ୍ଷତା ସହିତ ଛାତ୍ରଛାତ୍ରୀଙ୍କୁ ସହାୟତା କରିବ।

ଯେହେତୁ ଡିଜିଟାଲ୍ ସାକ୍ଷରତା ଏକାଡେମିକ୍ ସଫଳତା ଏବଂ ଭବିଷ୍ୟତର ନିଯୁକ୍ତି ପାଇଁ ଅଧିକ ଆବଶ୍ୟକ ହେଉଛି, ଶିଳ୍ପ କ୍ଷେତ୍ରରେ ଏଭଳି ଆଧୁନିକ ଶିକ୍ଷା ଭିତ୍ତିଭୂମିର ଉପଲବ୍ଧତା ଗୁରୁତ୍ୱପୂର୍ଣ୍ଣ ହୋଇପଡିଛି । ବିଦ୍ୟାଳୟର ଡିଜିଟାଲ୍ ଇକୋସିଷ୍ଟମକୁ ସୁଦୃଢ଼ କରିବା ପାଇଁ ବେଦାନ୍ତ ଆଲୁମିନିୟମ୍ ୮୦ଟି ଲେନୋଭୋ ଆଇଡିଆ ସେଣ୍ଟର୍ ଏ.ଆଇ.ଓ. 3 ଅଲ୍-ଇନ୍-ୱାନ୍ ଡେସ୍କଟପ୍ ସହିତ କମ୍ପ୍ୟୁଟର ଲ୍ୟାବକୁ ଉନ୍ନତ କରିଛି। ଏହି ସୁବିଧା କମ୍ପ୍ୟୁଟର ଶିକ୍ଷା, କୋଡିଂ, ଡିଜିଟାଲ ଗବେଷଣା ଏବଂ ପ୍ରଯୁକ୍ତିବିଦ୍ୟା-ଆଧାରିତ ଶିକ୍ଷାକୁ ସମର୍ଥନ କରିବ, ଯେତେବେଳେ କି ଛାତ୍ରଛାତ୍ରୀଙ୍କୁ ଆଧୁନିକ ଉପକରଣ ଏବଂ ପ୍ଲାଟଫର୍ମ ସହିତ ଅଭିଜ୍ଞତା ପ୍ରଦାନ କରିବ।

ଏହି ଅବସରରେ ଭିଏଏମଏଲ, ଲାଞ୍ଜିଗଡ଼ର ଆଲୁମିନା ବ୍ୟବସାୟ ସିଇଓ ପ୍ରଣବ କୁମାର ଭଟ୍ଟାଚାର୍ଯ୍ୟ କହିଛନ୍ତି, "ଭବିଷ୍ୟତ ପାଇଁ ଯୁବ ମସ୍ତିଷ୍କକୁ ପ୍ରସ୍ତୁତ କରିବା ସହିତ ଗୁଣାତ୍ମକ ଶିକ୍ଷା ଏବଂ ଡିଜିଟାଲ ସମ୍ବଳର ଉପଲବ୍ଧତା ଜରୁରୀ। ଉନ୍ନତ କମ୍ପ୍ୟୁଟର ଲ୍ୟାବ ବିଶ୍ୱସ୍ତରୀୟ ଡିଜିଟାଲ ଭିତ୍ତିଭୂମି, ଅର୍ଥପୂର୍ଣ୍ଣ ଶିକ୍ଷଣ ସୁଯୋଗ ଏବଂ ଉନ୍ନତ ବୈଷୟିକ ଦକ୍ଷତା ହାସଲ ପାଇଁ ଆମର ପ୍ରତିବଦ୍ଧତାକୁ ପ୍ରତିଫଳିତ କରୁଛି ।’’ 

ଲାଞ୍ଜିଗଡ଼ର ଡିଏଭି ଇଣ୍ଟରନ୍ୟାସନାଲ ସ୍କୁଲର ପ୍ରଧାନଶିକ୍ଷକ ସର୍ବେଶ୍ୱର ଭୁଜବଳ ନିଜର ମତ ରଖି କହିଛନ୍ତି, "ଏହି ପଦକ୍ଷେପ ଏବଂ ଆମ ଅଞ୍ଚଳରେ ଶିକ୍ଷାକୁ ସୁଦୃଢ଼ କରିବା ପାଇଁ ଏହାର ନିରନ୍ତର ପ୍ରତିବଦ୍ଧତା ଲାଗି ଆମେ ବେଦାନ୍ତ ଆଲୁମିନିୟମ ପ୍ରତି କୃତଜ୍ଞ। ଡିଜିଟାଲ୍ ଟେକ୍ନୋଲୋଜି ଏବଂ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ଯୁଗରେ, ଆମର ଛାତ୍ରମାନଙ୍କ ପାଇଁ ଆଧୁନିକ ଉପକରଣ ଏବଂ ଶିକ୍ଷଣ ପ୍ଲାଟଫର୍ମ ଶୀଘ୍ର ସଫଳତା ହାସଲ କରିବା ନିହାତି ଆବଶ୍ୟକ । ଉନ୍ନତ କମ୍ପ୍ୟୁଟର ଲ୍ୟାବ ଡିଜିଟାଲ ଶିକ୍ଷଣ ସୁଯୋଗକୁ ବୃଦ୍ଧି କରିବ ଏବଂ ଛାତ୍ରମାନଙ୍କୁ ଆତ୍ମବିଶ୍ୱାସର ସହ ଅନଲାଇନ୍ ପ୍ରତିଯୋଗିତାମୂଳକ ପରୀକ୍ଷା ପରିଚାଳନା କରିବାରେ ସକ୍ଷମ କରିବ ।

ଲାଞ୍ଜିଗଡ଼ର ଡିଏଭି ଇଣ୍ଟରନ୍ୟାସନାଲ ସ୍କୁଲର ଏକାଦଶ ଶ୍ରେଣୀର ଛାତ୍ରୀ ଶ୍ରୀୟଶୀ ସାହୁ ନିଜର ଉତ୍ସାହ ସେୟାର କରି କହିଛନ୍ତି, "ଅତ୍ୟାଧୁନିକ କମ୍ପ୍ୟୁଟର ବ୍ୟବହାର କରିବା ଦ୍ୱାରା ଶିକ୍ଷା ଅଧିକ ଆକର୍ଷଣୀୟ ଏବଂ ବ୍ୟବହାରିକ ହୋଇଥାଏ। ଏହା ମୋତେ କୋଡିଂ ଶିଖିବାକୁ ଏବଂ ଭବିଷ୍ୟତର ସୁଯୋଗ ପାଇଁ ପ୍ରସ୍ତୁତ ହେବାକୁ ପ୍ରେରଣା ଦେବ ।

ଶିକ୍ଷା, ଦକ୍ଷତା ବିକାଶ ଏବଂ ଗୋଷ୍ଠୀ ସଶକ୍ତିକରଣ ଉପରେ ଧ୍ୟାନ କେନ୍ଦ୍ରିତ କରୁଥିବା ପଦକ୍ଷେପ ମାଧ୍ୟମରେ, ବେଦାନ୍ତ ଆଲୁମିନିୟମ ଭବିଷ୍ୟତ ପିଢ଼ି ପାଇଁ ଏକ ଶକ୍ତିଶାଳୀ ମୂଳଦୁଆ ନିର୍ମାଣରେ ନିବେଶ ଜାରି ରଖିଛି, ଯାହା ଯୁବ ଶିକ୍ଷାର୍ଥୀମାନଙ୍କୁ ଅଭିବୃଦ୍ଧି, ନବସୃଜନ ଏବଂ ଦୀର୍ଘକାଳୀନ ସଫଳତାକୁ ପ୍ରୋତ୍ସାହିତ କରୁଥିବା ସୁଯୋଗ ହାସଲ କରିବାରେ ସକ୍ଷମ କରିଥାଏ।

ଉତ୍ତରପ୍ରଦେଶର ଫିରୋଜାବାଦରେ ଘଟିଥିବା ଏକ ହୃଦୟ ବିଦାରକ ଶିଶୁ ହତ୍ୟା ମାମଲାରେ ଅଦାଲତ ଏକ ବଡ଼ ରାୟ ଶୁଣାଇଛନ୍ତି। ଦେଢ଼ ବର୍ଷର ନିଷ୍ପାପ ଶିଶୁ ଆରବକୁ ତଳେ କଚାଡ଼ି ନିର୍ମମ ଭାବେ ହତ୍ୟା କରିଥିବା ଅଭିଯୁକ୍ତ ବିରାଜ ଓରଫ ଜିତେନ୍ଦ୍ର ପାଠକକୁ କୋର୍ଟ ଫାଶୀ ଦଣ୍ଡାଦେଶ ଦେଇଛନ୍ତି। ଏହି ମାମଲାକୁ ବିରଳରୁ ଅତି ବିରଳ (ରେୟାରେଷ୍ଟ ଅଫ୍ ରେୟାର) ଶ୍ରେଣୀର ଅପରାଧ ଭାବେ ଗ୍ରହଣ କରି ଶୁକ୍ରବାର ଦିନ ଜିଲ୍ଲା ଓ ଦୌରା ଜଜ୍ ଡା. ବବ୍ୱୁ ସାରଙ୍ଗ ଏହି ରାୟ ଶୁଣାଇଛନ୍ତି। ଘଟଣାର ମାତ୍ର ୪୧ ଦିନ ମଧ୍ୟରେ ଏହି ଐତିହାସିକ ରାୟ ଆସିଛି।

କ'ଣ ଥିଲା ପୂରା ଘଟଣା?

ଗତ ମେ' ୩୦ ତାରିଖ ଦିନ ଫିରୋଜାବାଦର ଶିକୋହାବାଦ ସ୍ଥିତ ଯାଦବ କଲୋନୀରେ ଏହି ବର୍ବରକାଣ୍ଡ ଘଟିଥିଲା। ପୋଲିସ ସୂଚନା ଅନୁଯାୟୀ, ଆରବର ମା' ରତି ଦେବୀଙ୍କ ସ୍ୱାମୀଙ୍କ ସହ ବିବାଦ ଚାଲିଥିବାରୁ ସେ ନିଜ ବାପଘରେ ରହୁଥିଲେ। ଅଭିଯୁକ୍ତ ଜିତେନ୍ଦ୍ର ପାଠକ, ରତିଙ୍କୁ ଏକତରଫା ପ୍ରେମ କରୁଥିଲା ଏବଂ ବିବାହ ପାଇଁ ଚାପ ପକାଉଥିଲା। ତେବେ ରତି ନିଜ ଛୋଟ ପିଲାର ଦ୍ୱାହି ଦେଇ ଏହି ପ୍ରସ୍ତାବକୁ ବାରମ୍ବାର ପ୍ରତ୍ୟାଖ୍ୟାନ କରିଥିଲେ। ଏଥିରେ ଉତ୍କ୍ଷିପ୍ତ ହୋଇ ଜିତେନ୍ଦ୍ର ଶିଶୁଟିକୁ ରାସ୍ତାରୁ ହଟାଇବା ପାଇଁ ଷଡ଼ଯନ୍ତ୍ର ରଚିଥିଲା।

ଘଟଣା ଦିନ ଅଭିଯୁକ୍ତ ଜିତେନ୍ଦ୍ର ଟଫି ଦେବାର ବାହାନା କରି ମାସୁମ ଆରବକୁ ନିଜ ସହ ନେଇଯାଇଥିଲା। ଏକ ନିଛାଟିଆ ସ୍ଥାନରେ ସେ ଶିଶୁଟିକୁ ମାତ୍ର ୨୭ ସେକେଣ୍ଡ ଭିତରେ ୮ ଥର ତଳେ କଚାଡ଼ି ନିର୍ମମ ଭାବେ ହତ୍ୟା କରିଥିଲା। ଏହି ସମ୍ପୂର୍ଣ୍ଣ ଘଟଣା ସିସିଟିଭି (CCTV) କ୍ୟାମେରାରେ କଏଦ ହୋଇଥିଲା, ଯାହା ପରବର୍ତ୍ତୀ ସମୟରେ ଏକ ପ୍ରମୁଖ ପ୍ରମାଣ ପାଲଟିଥିଲା।

ପୋଲିସ ଏନକାଉଣ୍ଟର ଏବଂ ଗିରଫଦାରୀ

ହତ୍ୟାକାଣ୍ଡ ପରେ ଅଭିଯୁକ୍ତ ଫେରାର ହୋଇଯାଇଥିଲା, କିନ୍ତୁ ପୋଲିସ ସେହି ରାତିରେ ହିଁ ତାକୁ ଠାବ କରିଥିଲା। ପୋଲିସଠାରୁ ଖସିଯିବାକୁ ଉଦ୍ୟମ କରି ସେ ଗୁଳି ଚଳାଇଥିଲା। ଜବାବରେ ପୋଲିସର ଗୁଳିମାଡ଼ରେ ଅଭିଯୁକ୍ତ ଜିତେନ୍ଦ୍ରର ଦୁଇ ଗୋଡ଼ରେ ଗୁଳି ବାଜିଥିଲା ଏବଂ ତାକୁ ଗିରଫ କରାଯାଇଥିଲା। ସମସ୍ତ ବୈଷୟିକ ପ୍ରମାଣ ଏବଂ ସିସିଟିଭି ଫୁଟେଜ୍ ଆଧାରରେ ପୋଲିସ ଦୃଢ଼ ଚାର୍ଜସିଟ୍ ଦାଖଲ କରିଥିଲା।

ନ୍ୟାୟ ମିଳିଲା: ପରିବାରରେ ଆଶ୍ୱସ୍ତି

ରାୟ ଶୁଣାଣି ସମୟରେ ଅଦାଲତ ପରିସରରେ ମୃତ ଆରବର ଆଈ ପିଙ୍କି ଦେବୀ ଉପସ୍ଥିତ ଥିଲେ। କୋର୍ଟଙ୍କ ଫାଶୀ ଦଣ୍ଡାଦେଶ ଶୁଣିବା ପରେ ସେ ସନ୍ତୋଷ ବ୍ୟକ୍ତ କରିବା ସହ "ଆମକୁ ନ୍ୟାୟ ମିଳିଲା" ବୋଲି କହିଥିଲେ। ରାୟ ଶୁଣିବା ବେଳେ ଅଭିଯୁକ୍ତ ଜିତେନ୍ଦ୍ର କାନ୍ଦି ପକାଇଥିଲା। କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ତାକୁ ପୁଣିଥରେ ଜେଲ୍‌କୁ ପଠାଇ ଦିଆଯାଇଛି। ସାଧାରଣ ଜନତା ମଧ୍ୟ ଏହି ତ୍ୱରିତ ନ୍ୟାୟିକ ପ୍ରକ୍ରିୟାକୁ ପ୍ରଶଂସା କରୁଛନ୍ତି।