ବାଲେଶ୍ୱର: ସୁବର୍ଣ୍ଣରେଖାରେ ବଡ଼ ଧରଣର ବନ୍ୟା। ଫଳରେ ତଳିଆ ଅଞ୍ଚଳରେ ବନ୍ୟା ପରିସ୍ଥିତି ସୃଷ୍ଟି ହୋଇ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡ଼ିଛି। ପାଣି ଘେର ଭିତରେ ୪୦ରୁ ଉର୍ଦ୍ଧ୍ୱ ପଞ୍ଚାୟତର ୨ ଲକ୍ଷରୁ ଅଧିକ ଲୋକ ।  ଚଳିତ ବର୍ଷ ସୁବର୍ଣ୍ଣରେଖା ନଦୀର ଏ ହେଉଛି ଦିତ୍ୱୀୟ ବନ୍ୟା । ଗତକାଲି ପାଖରୁ ନଦୀର ଜଳସ୍ତର ବିପଦ ସଙ୍କେତ ପାର ହେଇଥିଲା । ରାତି ତମାମ ଜଳ ସ୍ତର ବଡୁଥିବା ବେଳେ ସକାଳୁ କମୁଛି ନଦୀର ଜଳସ୍ତର। ରାଜଘାଟ ଠାରେ ବିପଦ ସଙ୍କେତ ୧୦.୩୬ ମିଟର ଥିବା ବେଳେ ସକାଳ ୬ ଟା ସୁଦ୍ଧା ୧୧.୭୯ ମିଟର ଜଳ ପ୍ରବାହିତ ହେଉଛି। ନଦୀର ଜଳସ୍ତର କମୁଥିବା ବେଳେ ଭୋଗରାଇ ବ୍ଳକ ଓ ବାଲିଆପାଳ ବ୍ଲକ୍ ରେ ଏବେବି ଗାଁ ଭିତରକୁ ପାଣି ପ୍ରବେଶ କରୁଛି। ଅନେକ ଗାଁରେ ନଦୀବନ୍ଧ ଭାଙ୍ଗି ଯିବାରୁ ବନ୍ୟା ଜଳ ରାସ୍ତାଘାଟ ଓ ବାସଗୃହରେ ପଶିଯାଇଛି। ଅତ୍ୟାବଶ୍ୟକ ସେବା ବାଧାପ୍ରାପ୍ତ ହୋଇଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।

ଭୋଗରାଇ ବ୍ଳକ୍ ର ୨୦ ରୁ ଅଧିକ ପାଞ୍ଚାୟତ ପାଣି ଘେର ଭିତରେ , ନହରା, ନାଚିନ୍ଦା, ଗବଗାଁ, କୁସୁଡା, ପୁଟିଣା, କଚୁଆଡି , ଦାରୁହା, ଆରୁହା ବର୍ତ୍ତି, ଦହମୁଣ୍ଡା, କୁଳିଦା, ମହାଗବ, ପଞ୍ଚାୟତ ର ସତାଧିକ ଗାଁ ପାଣି ଘେର ଭିତରେ ରହିଛନ୍ତି ।  କାହା ଘର ଭିତରେ ପାଣି ପ୍ରବେଶ କରିଛି ଦାଣ୍ଡ ଦୁଆରେ ପାଣି ଖେଳୁଛି , ୫୭ ନମ୍ବର ରାଜ୍ୟ ରାଜପଥ ଦାରୁହା ନିକଟରେ ବନ୍ୟା ପାଣି ପ୍ରବେଶ କରି ୨ଫୁଟ ପାଣି ରାସ୍ତା ଉପରେ ଚାଲୁଛି। ସେହିପରି ବାଲିଆପାଳ ବ୍ଲକର ୧୦ରୁ ଉର୍ଦ୍ଧ୍ୱ ପଞ୍ଚାୟତ ପ୍ରଭାବିତ ହୋଇଛି,  ବନ୍ୟା ଦ୍ବାରା ବାଲିଆପାଳ ବ୍ଲକର ୪୫ ହଜାରରୁ ଉର୍ଦ୍ଧ୍ୱ ଲୋକ ପ୍ରଭାବିତ ହୋଇଥିବା ବେଳେ ବନ୍ୟାଞ୍ଚଳ ପାଇଁ ୩ଟି ଓଡ୍ରାଫ ଟିମ୍ ସମେତ ୯ଟି ଏସଆରସି ବୋଟ୍ ନିୟୋଜିତ କରାଯାଇ ଉଦ୍ଧାର କାର୍ଯ୍ୟ ଜାରି ରହିଛି, ଜଳେଶ୍ଵର ବ୍ଳକ୍ର ୨ ଟି ପଞ୍ଚାୟତ ବହୁ ଲୋକେ ପାଣି ଘେର ଭିତରେ ମଧ୍ୟ ରହିଛନ୍ତି। ଚଳିତ ବର୍ଷ ସୁବର୍ଣ୍ଣରେଖା ନଦୀର ଦିତ୍ୱୀୟ ବନ୍ୟା ରେ ପାଣି ବନ୍ଦି ଜୀବନ ବିତାଉଛନ୍ତି ଲୋକେ।

ବାଲେଶ୍ୱର: ଲଗାଣ ବର୍ଷା ଯୋଗୁଁ ବାଲେଶ୍ୱର ଜିଲ୍ଲାର ବିଭିନ୍ନ ନଦୀରେ ସୃଷ୍ଟି ହୋଇଥିବା ଭୟଙ୍କର ବନ୍ୟା ପରିସ୍ଥିତିକୁ ଆକଳନ କରିବାରେ ଏବଂ ମୁକାବିଲା କରିବାରେ ରାଜ୍ୟ ସରକାର ସଂପୂର୍ଣ୍ଣ ବିଫଳ ହୋଇଛନ୍ତି। ବନ୍ୟା ଆସିବାର ଦୁଇ ସପ୍ତାହ ପରେ ବି ଏଯାଏ ଜିଲ୍ଲାର ବହୁ ସ୍ଥାନରେ ବନ୍ୟା ବିପନ୍ନଙ୍କ ନିକଟରେ ରିଲିଫ୍‌ ସାମଗ୍ରୀ ମଧ୍ୟ ପହଞ୍ଚି ନାହିଁ। ବନ୍ୟା ପାଣି ପଶି ଘର ଭାଙ୍ଗିଥିବା ଲୋକଙ୍କୁ ପଲିଥିନଟିଏ ମଧ୍ୟ ମିଳିନାହିଁ। କିଛି କିଛି ସ୍ଥାନରେ ଲୋକଙ୍କୁ ଚୁଡ଼ା ଗଣ୍ଡାଏ ଦେଇ ପ୍ରଶାସନ ନିଜ ଦାୟିତ୍ୱ ସାରିଦେଇଛି। ଆଜି ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ବାଲେଶ୍ୱର ଜିଲ୍ଲାର ବନ୍ୟାଞ୍ଚଳ ଗସ୍ତରେ ଆସିଥିବା ରାଜ୍ୟ ବିଜେଡି ଉପସଭାପତି ସଂଜୟ ଦାସବର୍ମା ଏଭଳି ଅଭିଯୋଗ ଆଣିଛନ୍ତି ଏବଂ ଏହି ବିଫଳତା ପାଇଁ ସରକାରୀ ଉଦସୀନତା ଓ ପ୍ରଶାସନିକ ଅପାରଗତାକୁ ଦାୟୀ କରିଛନ୍ତି। 

ଶ୍ରୀ ଦାସବର୍ମାଙ୍କ ନେତୃତ୍ୱରେ ବିଜେଡିର ଏକ ପ୍ରତିନିଧି ଦଳ ଭୋଗରାଇ ବ୍ଲକରୁ ବନ୍ୟାଞ୍ଚଳ ପରିଦର୍ଶନ ଆରମ୍ଭ କରିଥିଲେ। ଡଙ୍ଗାରେ ବିଭିନ୍ନ ପଞ୍ଚାୟତ ବୁଲି ଲୋକଙ୍କ ଦୁଃଖ ଦୁର୍ଦ୍ଦଶାକୁ ପ୍ରତ୍ୟକ୍ଷ ଭାବେ ଅନୁଭବ କରିଥିଲେ। ପରେ ବାଲିଆପାଳ ଓ ବସ୍ତା ବ୍ଲକ୍‌ ର ବିଭିନ୍ନ ବନ୍ୟା ପ୍ରଭାବିତ ଅଞ୍ଚଳ ବୁଲି ବିପନ୍ନ ଲୋକଙ୍କ ଦୁର୍ଦ୍ଦଶା ଓ ସମସ୍ୟା ସଂପର୍କରେ ଅବଗତ ହୋଇଥିଲେ। ସନ୍ଧ୍ୟାରେ ବାଲେଶ୍ୱର ଷ୍ଟେସନ କ୍ଲବରେ ଆୟୋଜିତ ଏକ ସାମ୍ୱାଦିକ ସମ୍ମିଳନୀରେ ସରକାରଙ୍କୁ ଟାର୍ଗେଟ କରି ଶ୍ରୀ ଦାସବର୍ମା କହିଥିଲେ ଯେ ବାଲେଶ୍ୱରବାସୀଙ୍କ ପାଇଁ ବନ୍ୟା ନୂଆ ନୁହେଁ। କିନ୍ତୁ ଏ ସରକାର ପ୍ରବଳ ବର୍ଷା ଏବଂ ତଦଜନିତ ବନ୍ୟାକୁ ଠିକ୍‌ ଭାବେ ଆକଳନ କରିପାରିଲେ ନାହିଁ କି ବନ୍ୟାକୁ ପରିଚାଳନା କରିପାରିଲେ ନାହିଁ। ବର୍ଷା ପାଣିରେ ବାଲେଶ୍ୱର ସହରରେ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହେଲାବେଳେ ଜଳ ନିଷ୍କାସନ ପାଇଁ ଉପଯୁକ୍ତ ପଦକ୍ଷେପ ମଧ୍ୟ ନେଇ ପାରିଲେ ନାହିଁ। ପରବର୍ତ୍ତୀ ସମୟରେ ବୁଢ଼ାବଳଙ୍ଗ, ସୋନ, ଗଙ୍ଗାହାର, କାଂଶବାଂଶ, ଜଳକା ଓ ସୁବର୍ଣ୍ଣରେଖାରେ ଆସିଥିବା ବନ୍ୟାକୁ ମୁକାବିଲା କରିବାରେ ବିଫଳ ହେଲେ। 

ଶ୍ରୀ ଦାସବର୍ମା ଆହୁରି କହିଲେ ଯେ ଚଳିତ ବର୍ଷାର ବନ୍ୟା ଯୋଗୁଁ ବାଲେଶ୍ୱର ଜିଲ୍ଲାର ଶହ ଶହ ଗାଁ ଏବେ ବି ପାଣି ଘେରରେ ଥିବା ବେଳେ ୫ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି। କିନ୍ତୁ ସରକାରଙ୍କ ନିଦ ଭାଙ୍ଗୁ ନାହିଁ। ଏଯାଏ ଲୋକଙ୍କୁ ଚାଉଳ ଗଣ୍ଡେ ଦିଆଯାଇନି। ବନ୍ୟା ସମୟରେ ପ୍ରଭାବିତ ଲୋକଙ୍କ ପାଖରେ ରିଲିଫ ଓ ପଲିଥିନ ଆଦି ନ ପହଞ୍ଚିବା  ସରକାରଙ୍କ ଚରମ ବିଫଳତାକୁ ପଦାରେ ପକାଇ ଦେଇଛି। ତେଣୁ ସରକାର ତୁରନ୍ତ ବନ୍ୟା ପ୍ରଭାବିତ ଅଞ୍ଚଳରେ ପହଞ୍ଚି ଶୁଖିଲା ଖାଦ୍ୟ, ଗୋଖାଦ୍ୟ ଓ ରନ୍ଧା ଖାଦ୍ୟ ଯୋଗାଇ ଦିଅନ୍ତୁ। ବନ୍ୟା ଯୋଗୁଁ ଦୁଇ ଦୁଇ ଥର ଚାଷ ସଂପୂର୍ଣ୍ଣ ଭାବେ ଉଜୁଡ଼ି ଯାଇଥିବାରୁ ତୁରନ୍ତ କ୍ଷୟକ୍ଷତି ଆକଳନ କରି ଚାଷୀଙ୍କୁ ରିଲିଫ କୋର୍ଡ ଅନୁସାରେ କ୍ଷତିପୂରଣ ପ୍ରଦାନ ସହ କୃଷିଋଣ ଛାଡ଼ କରିବାକୁ ସେ ଦାବି କରିଥିଲେ। ଏହା ବ୍ୟତୀତ ବନ୍ୟା ଅଞ୍ଚଳରେ ବୁଡ଼ି ରହିଥିବା ଉଠାଜଳସେଚନ ପଏଣ୍ଟ, ବିଦ୍ୟୁତ ଭିତ୍ତିଭୂମିର ପୁନରୁଦ୍ଧାର କରିବା ସହ କ୍ଷତିଗ୍ରସ୍ତ ହୋଇଥିବା ରାସ୍ତାଘାଟ, ସ୍କୁଲ ଓ ଅଙ୍ଗନବାଡ଼ି କେନ୍ଦ୍ରଗୁଡ଼ିକୁ ଯୁଦ୍ଧକାଳୀନ ଭିତ୍ତିରେ ମରାମତି କରିବାକୁ ସେ ଦୃଢ ଦାବି କରିଥିଲେ। ଶେଷରେ ସେ ବାଲେଶ୍ୱର ଜିଲ୍ଲାରେ ବନ୍ୟାର ସ୍ଥାୟୀ ପ୍ରତିକାର ପାଇଁ ଉଚ୍ଚସ୍ତରୀୟ ବୈଠକ ମାଧ୍ୟମରେ ଆଲୋଚନା କରି ପଦକ୍ଷେପ ନେବାକୁ ରାଜ୍ୟ ସରକାରଙ୍କୁ ପରାମର୍ଶ ଦେଇଥିଲେ। 

ବନ୍ୟାଞ୍ଚଳ ଗସ୍ତ ସମୟରେ ଅନ୍ୟମାନଙ୍କ ମଧ୍ୟରେ ଜିଲ୍ଲା ବିଜେଡି ସଭାପତି ଜ୍ୟୋତି ପ୍ରକାଶ ପାଣିଗ୍ରାହୀ, ପୂର୍ବତନ ମନ୍ତ୍ରୀ ରଘୁନାଥ ମହାନ୍ତି, ଜଳେଶ୍ୱର ବିଧାୟକ ଅଶ୍ୱିନୀ ପାତ୍ର, ଭୋଗରାଇ ବିଧାୟକ ଗୌତମବୁଦ୍ଧ ଦାସ, ସୋର ବିଧାୟକ ମାଧବ ଧଡ଼ା, ବରିଷ୍ଠ ବିଜେଡି ନେତ୍ରୀ ଲେଖାଶ୍ରୀ ସାମନ୍ତ ସିଂହାର, ଜିଲ୍ଲା ପରିଷଦ ସଭାପତି ନାରାୟଣ ପ୍ରଧାନ, ଭୋଗରାଇ ବିଜେଡି ସଭାପତି ଗଣପତି ଗିରି, ବସ୍ତା ବିଜେଡି ସଭାପତି ମହାଦେବ ଦାସ, ବାଲିଆପାଳ ବିଜେଡି ସଭାପତି ଭଗବାନ ଗିରି ପ୍ରମୁଖ ଉପସ୍ଥିତ ଥିବାବେଳେ ସାମ୍ୱାଦିକ ସମ୍ମିଳନୀରେ ବାଲେଶ୍ୱର ପୂର୍ବତନ ବିଧାୟକ ଜୀବନ ପ୍ରଦୀପ ଦାଶ, ନୀଳଗିରିର ପୂର୍ବତନ ବିଧାୟକ ସୁକାନ୍ତ ନାୟକ, ବାଲେଶ୍ୱର ସଦରର ପୂର୍ବତନ ବିଧାୟକ ସ୍ୱରୂପ ଦାସ, ରେମୁଣାର ପୂର୍ବତନ ବିଧାୟକ ସୁଧାଂଶୁ ଶେଖର ପରିଡ଼ା, ପୂର୍ବତନ ଜିଲ୍ଲା ପରିଷଦ ସଭାପତି ଗିରିଶ ଚନ୍ଦ୍ର ଦାଶ, ରାଜ୍ୟ ଯୁବ ବିଜେଡିର କାର୍ଯ୍ୟକାରୀ ସଭାପତି ଶୁଭେନ୍ଦୁ ଦାସ ମଙ୍ଗରାଜ ପ୍ରମୁଖ ଉପସ୍ଥିତ ଥିଲେ। 

ବାଲେଶ୍ୱର: ବାଲେଶ୍ୱର ଜିଲ୍ଲା ସୋର ବ୍ଲକ ଅଞ୍ଚଳରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ବୁଧବାର ଦିନ ପ୍ରବଳ ବନ୍ୟା ସ୍ରୋତରେ ଜଣେ ଉଠା ଦୋକାନୀ ବା ବ୍ୟବସାୟୀ ଭାସିଯାଉଥିବା ବେଳେ ସ୍ଥାନୀୟ ଯୁବକମାନେ ତାଙ୍କୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି।

ସୂଚନା ଅନୁଯାୟୀ, ଏହି ଘଟଣାଟି ସୋର ବ୍ଲକ ଅନ୍ତର୍ଗତ ତାଳନଗର ପଞ୍ଚାୟତର ପଦନପଡ଼ା ଗାଁରେ ଘଟିଛି। ବନ୍ୟା ଜଳର ପ୍ରବଳ ସ୍ରୋତରେ ଉକ୍ତ ବ୍ୟବସାୟୀ ଜଣକ ହଠାତ୍ ଭାସି ଯାଇଥିଲେ। ପ୍ରାୟ ୨୫ ମିଟର ପର୍ଯ୍ୟନ୍ତ ଭାସିଯିବା ପରେ ସେ ଏକ ଗଛର ଡାଳକୁ ଧରି ନିଜ ଜୀବନ ବଞ୍ଚାଇବାକୁ ସକ୍ଷମ ହୋଇଥିଲେ। ତେବେ ତାଙ୍କ ସହ ଥିବା ଯାନବାହାନ ଏବଂ ସମସ୍ତ ବିକ୍ରି ସାମଗ୍ରୀ ବନ୍ୟା ଜଳରେ ଭାସି ଯାଇଥିଲା।

ବ୍ୟବସାୟୀ ଜଣକ ଗଛ ଡାଳରେ ଆଶ୍ରୟ ନେଇଥିବା ଦେଖି ପଦନପଡ଼ା ଗାଁର କିଛି ଯୁବକ ତୁରନ୍ତ ସେଠାରେ ପହଞ୍ଚିଥିଲେ। ସେମାନେ ନିଜ ଜୀବନକୁ ବାଜି ଲଗାଇ ତାଙ୍କୁ ପାଣିରୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ବ୍ୟବସାୟୀ ଜଣକ ସୁରକ୍ଷିତ ଥିଲେ ମଧ୍ୟ ବନ୍ୟା ପାଣିରେ ତାଙ୍କର ଅଧିକାଂଶ ସାମଗ୍ରୀ ନଷ୍ଟ ହୋଇଯାଇଥିବା ଜଣାପଡିଛି।

ବାଲେଶ୍ୱର: ବାଲେଶ୍ୱରରେ ପୁଣି ଥରେ ବନ୍ୟା ଆଶଙ୍କା ଦେଖାଦେଇଛି। ସୁବର୍ଣ୍ଣରେଖା ନଦୀର ଜଳସ୍ତର ପୁଣି ଥରେ ବିପଦ ସଙ୍କେତ ଟପିଯାଇଛି। ଫଳରେ ଜିଲ୍ଲାରେ ଦ୍ୱିତୀୟ ଥର ପାଇଁ ଏକ ବଡ଼ ବନ୍ୟା ଆସିବାର ଆଶଙ୍କା ସୃଷ୍ଟି ହୋଇଛି। ମିଳିଥିବା ସୂଚନା ଅନୁଯାୟୀ, ସକାଳ ୯ଟା ସୁଦ୍ଧା ରାଜଘାଟ ଠାରେ ସୁବର୍ଣ୍ଣରେଖାର ଜଳସ୍ତର ୧୦.୪୦ ମିଟର ଥିଲା। ଏଠାରେ ନଦୀର ବିପଦ ସଙ୍କେତ ହେଉଛି ୧୦.୩୬ ମିଟର। ଅର୍ଥାତ୍ ନଦୀର ଜଳସ୍ତର ବିପଦ ସଙ୍କେତ ଠାରୁ ଉପରେ ପ୍ରବାହିତ ହେଉଛି। ଉପରମୁଣ୍ଡରେ ପ୍ରବଳ ବର୍ଷା କାରଣରୁ ନଦୀର ଜଳସ୍ତର ଲଗାତାର ଭାବେ ବୃଦ୍ଧି ପାଉଛି। ଏହାବ୍ୟତୀତ, ରାତି ପ୍ରାୟ ୩ଟା ସମୟରେ ଗାଲୁଡିହ ବ୍ୟାରେଜ୍ ରୁ ପ୍ରାୟ ୬,୫୦୦ କ୍ୟୁସେକ ବନ୍ୟା ଜଳ ଛଡ଼ାଯିବା ଫଳରେ ତଳମୁଣ୍ଡରେ ଜଳସ୍ତର ଦ୍ରୁତ ଗତିରେ ବୃଦ୍ଧି ପାଇଛି।

ଇତିମଧ୍ୟରେ ବାଲିଆପାଳ ଏବଂ ଭୋଗରାଇ ବ୍ଲକର ତଳିଆ ଅଞ୍ଚଳରେ ବନ୍ୟା ଜଳ ପ୍ରବେଶ କରିସାରିଲାଣି। ଜଳସ୍ତର ଏଭଳି ବୃଦ୍ଧି ପାଇଲେ ଉକ୍ତ ଦୁଇ ବ୍ଲକର ପ୍ରାୟ ୧୦ଟି ପଞ୍ଚାୟତ ବନ୍ୟା ଦ୍ୱାରା ପ୍ରଭାବିତ ହେବାର ଆଶଙ୍କା ଥିବା ନେଇ ଜିଲ୍ଲା ପ୍ରଶାସନ ପକ୍ଷରୁ ଉଦବେଗ ପ୍ରକାଶ କରାଯାଇଛି।

ଅନ୍ୟପକ୍ଷରେ, କେନ୍ଦ୍ରୀୟ ଜଳ ଆୟୋଗର ରିପୋର୍ଟ ଅନୁଯାୟୀ ମୟୂରଭଞ୍ଜ ଜିଲ୍ଲାର ଜାମଶୋଳାଘାଟ ଠାରେ ଗୁରୁତର ବନ୍ୟା ପରିସ୍ଥିତି ସୃଷ୍ଟି ହୋଇଛି। ସକାଳ ୯ଟା ସୁଦ୍ଧା ଏଠାରେ ନଦୀର ଜଳସ୍ତର ୫୨.୧୮ ମିଟର ରେ ପହଞ୍ଚିଛି। ଏହି ସ୍ଥାନରେ ନଦୀର ବିପଦ ସଙ୍କେତ ହେଉଛି ୪୯.୧୬ ମିଟର। ଅର୍ଥାତ୍ ଜଳସ୍ତର ବିପଦ ସଙ୍କେତ ଠାରୁ ୩.୦୨ ମିଟର ଉପରେ ପ୍ରବାହିତ ହେଉଛି ଏବଂ ଏହା ଆହୁରି ବୃଦ୍ଧି ପାଉଥିବା ଦେଖିବାକୁ ମିଳିଛି। ସମ୍ଭାବ୍ୟ ବନ୍ୟା ପରିସ୍ଥିତି ଉପରେ ଜିଲ୍ଲା ପ୍ରଶାସନ ତୀକ୍ଷ୍ଣ ନଜର ରଖିଛି। ଏହା ସହିତ ତଳିଆ ଅଞ୍ଚଳରେ ରହୁଥିବା ଲୋକଙ୍କୁ ସତର୍କ ରହିବାକୁ ପ୍ରଶାସନ ପକ୍ଷରୁ ପରାମର୍ଶ ଦିଆଯାଇଛି।

ବାଲେଶ୍ୱର: ଲଗାଣ ବର୍ଷା ହେଲା କାଳ, କାନ୍ଥ ଭୁଶୁଡ଼ି ଚାଲିଗଲା ଆଈ ଓ ନାତିଙ୍କ ଜୀବନ । ବାଲେଶ୍ୱର ଜିଲ୍ଲା ଅନ୍ତର୍ଗତ ବନ୍ୟା ପ୍ରଭାବିତ ଜଳେଶ୍ୱର ଅଞ୍ଚଳରେ ଘଟିଛି ଏପରି ଏକ ହୃଦୟ ବିଦାରକ ଘଟଣା। କପାସୁଡ଼ା ଗ୍ରାମରେ ଶୋଇଥିବା ଅବସ୍ଥାରେ ଏକ ପଡ଼ୋଶୀ ଘରର କାନ୍ଥ ଭୁଶୁଡ଼ି ପଡ଼ିବାରୁ ଆଈ ଓ ନାତିଙ୍କର ଶୋଚନୀୟ ମୃତ୍ୟୁ ଘଟିଛି। ଏହି ଅଘଟଣରେ ନାତୁଣୀ ଗୁରୁତର ଆହତ ହୋଇଥିବା ବେଳେ ପରିବାରର ଅନ୍ୟ ୩ ଜଣ ସଦସ୍ୟ ମଧ୍ୟ ଆହତ ହୋଇଛନ୍ତି।

ମିଳିଥିବା ସୂଚନା ଅନୁଯାୟୀ, ରବିବାର ରାତି ପ୍ରାୟ ୯:୩୦ ସମୟରେ ଏହି ଦୁର୍ଘଟଣା ଘଟିଥିଲା। ସ୍ୱର୍ଗତ ନରେନ୍ଦ୍ର ଜେନାଙ୍କ ପତ୍ନୀ ରାଧିକା ଜେନା (୬୫), ତାଙ୍କ ନାତି ଜ୍ୟୋତି ପ୍ରକାଶ ସ୍ୱାଇଁ (୧୮) ଏବଂ ନାତୁଣୀ ସ୍ମୃତି ରେଖା ସ୍ୱାଇଁ (୧୮) ଘରର ଦ୍ୱାର ନିକଟରେ ଶୋଇଥିଲେ। ହଠାତ୍ ପଡ଼ୋଶୀ ବଂଶୀଧର ଜେନା ଏବଂ ଗଙ୍ଗାଧର ଜେନାଙ୍କ ଘରର କାନ୍ଥ ରାଧିକାଙ୍କ ଆଜବେଷ୍ଟସ୍ ଛାତ ଉପରେ ଖସି ପଡ଼ିଥିଲା। ଫଳରେ ଘଟଣାସ୍ଥଳରେ ହିଁ ରାଧିକା ଏବଂ ଜ୍ୟୋତି ପ୍ରକାଶଙ୍କର ପ୍ରାଣବାୟୁ ଉଡ଼ିଯାଇଥିଲା।

ଏହି ଘଟଣା ପରିବାର ଉପରେ ଦୁଃଖର ପାହାଡ଼ ଖସାଇ ଦେଇଛି। ବିଶେଷ କରି ମୃତ ଜ୍ୟୋତି ପ୍ରକାଶ ଏବଂ ଗୁରୁତର ଆହତ ସ୍ମୃତି ରେଖା ଥିଲେ ଜାଆଁଳା ଭାଇଭଉଣୀ। ଘଟଣା ସମୟରେ ଘର ଭିତରେ ରାଧିକାଙ୍କ ପୁଅ ଉତ୍ତମ (୩୧), ବୋହୂ ଦେବୀରାଣୀ (୨୫) ଏବଂ ଦୁଇ ନାତୁଣୀ ଅନନ୍ୟା (୫) ଓ ଆରାଧ୍ୟା (୨ ମାସ) ମଧ୍ୟ ଶୋଇଥିଲେ। କାନ୍ଥ ଭୁଶୁଡ଼ିବା କାରଣରୁ ଉତ୍ତମ ଏବଂ ଦୁଇ ମାସର ଶିଶୁ କନ୍ୟା ଆରାଧ୍ୟା ମଧ୍ୟ ଆହତ ହୋଇଛନ୍ତି। ଘରର ସମସ୍ତ ଆସବାବପତ୍ର ମାଟି ଅତଡ଼ା ତଳେ ଚାପି ହୋଇ ନଷ୍ଟ ହୋଇଯାଇଛି।

ଖବର ପାଇ ଜଳେଶ୍ୱର ବିଡିଓ ଗୌରାଙ୍ଗ ଚରଣ ଘୋଷଙ୍କ ସମେତ ଅନ୍ୟ ପ୍ରଶାସନିକ ଅଧିକାରୀ ଏବଂ ରାଜନୈତିକ ନେତାମାନେ ଜିକେ ଭଟ୍ଟର ଡାକ୍ତରଖାନାରେ ପହଞ୍ଚି ଆହତମାନଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଥିଲେ। ଗୁରୁତର ଆହତ ନାତୁଣୀଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଉନ୍ନତ ଚିକିତ୍ସା ପାଇଁ ଅନ୍ୟତ୍ର ସ୍ଥାନାନ୍ତର କରାଯାଇଛି।

ବାଲେଶ୍ୱର: ଛାତ୍ରଙ୍କୁ କୁକୁର କାମୁଡ଼ିବା ନେଇ ସ୍କୁଲ୍‌ରେ ପଡିଲା ତାଲା । ଏନେଇ ସ୍କୁଲ୍‌ ଗେଟ୍‌ରେ ତାଲା ପକାଇଲେ ଗ୍ରାମବାସୀ । ବାଲେଶ୍ୱର ଜିଲ୍ଲାର ଖଣ୍ଟାପଡ଼ା ଥାନା ଅନ୍ତର୍ଗତ ରସଲପୁର ଗ୍ରାମରେ ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଏଠାରେ ଥିବା ସତ୍ୟନାରାୟଣ ସରକାରୀ ନୋଡାଲ ହାଇସ୍କୁଲର ଜଣେ ଛାତ୍ରଙ୍କୁ ବୁଲା କୁକୁର ଆକ୍ରମଣ କରିବା ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇପଡିଛି। ଏହାର ପ୍ରତିବାଦରେ ବୁଧବାର ଦିନ ସ୍ଥାନୀୟ ଲୋକେ ଏବଂ ସ୍କୁଲ ପରିଚାଳନା କମିଟି (ଏସଏମସି) ସଦସ୍ୟମାନେ ସ୍କୁଲ ଗେଟରେ ତାଲା ପକାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ସ୍କୁଲ ପରିସରରେ ଛାତ୍ରଛାତ୍ରୀଙ୍କ ସୁରକ୍ଷା ପାଇଁ ତୁରନ୍ତ ପଦକ୍ଷେପ ନେବାକୁ ସେମାନେ ଦାବି କରିଛନ୍ତି।

ମିଳିଥିବା ସୂଚନା ଅନୁଯାୟୀ, ଗତ ମଙ୍ଗଳବାର ଦିନ ଜଣେ ଛାତ୍ର ସ୍କୁଲ ଶୌଚାଳୟକୁ ଯାଉଥିବା ସମୟରେ ହଠାତ୍ ଏକ ବୁଲା କୁକୁର ତାଙ୍କ ଉପରକୁ ଆକ୍ରମଣ କରିଥିଲା। କୁକୁରଟି ଛାତ୍ରଙ୍କର ଡାହାଣ ହାତ ବୁଢ଼ା ଆଙ୍ଗୁଠିକୁ ଗୁରୁତର ଭାବେ କାମୁଡ଼ି ଦେବା ସହ ଶରୀରର ଅନ୍ୟ ଅଙ୍ଗକୁ ମଧ୍ୟ କ୍ଷତାକ୍ତ କରିଥିଲା। ଛାତ୍ରଙ୍କ ଚିତ୍କାର ଶୁଣି ଅନ୍ୟ ପିଲାମାନେ ଘଟଣାସ୍ଥଳକୁ ଦୌଡ଼ି ଆସି କୁକୁରକୁ ଘଉଡ଼ାଇଥିଲେ। ଏହାପରେ ଆହତ ଛାତ୍ରଙ୍କୁ ଚିକିତ୍ସା ପାଇଁ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟ (DHH) ରେ ଭର୍ତ୍ତି କରାଯାଇଥିଲା। ତେବେ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡିବାରୁ ଡାକ୍ତର ତାଙ୍କୁ ଉନ୍ନତ ଚିକିତ୍ସା ପାଇଁ କଟକ ବଡ଼ ମେଡିକାଲ (ଏସସିବି) କୁ ସ୍ଥାନାନ୍ତର କରିଛନ୍ତି।

ଏହି ଘଟଣା ପରେ ସ୍ଥାନୀୟ ବାସିନ୍ଦା ଏବଂ ଏସଏମସି ସଦସ୍ୟଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ସ୍କୁଲ ପରିସରରେ ବୁଲା କୁକୁରଙ୍କ ଉପସ୍ଥିତି ଛାତ୍ରଛାତ୍ରୀଙ୍କ ପ୍ରତି ଏକ ବଡ଼ ବିପଦ ବୋଲି ସେମାନେ ଅଭିଯୋଗ କରିଛନ୍ତି। ଏହାର ପ୍ରତିବାଦରେ ବିକ୍ଷୋଭକାରୀମାନେ ସ୍କୁଲ ଗେଟରେ ତାଲା ପକାଇ ଆନ୍ଦୋଳନ କରିଛନ୍ତି। ବୁଲା କୁକୁରମାନେ ଯେପରି ସ୍କୁଲ ପରିସରକୁ ପ୍ରବେଶ ନକରନ୍ତି, ସେଥିପାଇଁ ତୁରନ୍ତ ଦୃଢ଼ ପଦକ୍ଷେପ ଗ୍ରହଣ କରିବାକୁ ସେମାନେ ପ୍ରଶାସନ ନିକଟରେ ଦାବି ଜଣାଇଛନ୍ତି। ଖବର ଲେଖାଯିବା ସୁଦ୍ଧା ସେଠାରେ ଆନ୍ଦୋଳନ ଜାରି ରହିଥିବା ସୂଚନା ମିଳିଛି।

ବାଲେଶ୍ୱର: ଭିଜିଲାନ୍ସ ଜାଲରେ ଆରଆଇ। ବାଲେଶ୍ୱର ଜିଲ୍ଲା ଖଇରା ତହସିଲ ଅନ୍ତର୍ଗତ ତୁଡିଗଡିଆ ଆରଆଇ ଶରତ କୁମାର ସେଠୀ ଏକ ଜମି ନାମଜରୀ କେଶରେ ୫ ହଜାର ଟଙ୍କା କାମ କରିବା ପାଇଁ ଲାଞ୍ଚ ନେଉଥିବା ବେଳେ ମାଡ଼ିବସିଲା ଭିଜିଲାନ୍ସ ବିଭାଗ । 

ମିଳିଥିବା ସୂଚନା ଅନୁଯାୟୀ, ଅଭିଯୋଗକାରୀ ନିଜ ଜେଜେବାପାଙ୍କ ନାମରେ ଥିବା ପୈତୃକ ଜମିର ମ୍ୟୁଟେସନ୍ କରାଇବା ସହ ଏକ ରେକର୍ଡ ଅଫ୍ ରାଇଟସ୍ ବା ପଟ୍ଟା (ROR) ବାହାର କରିବା ପାଇଁ ଆବେଦନ କରିଥିଲେ। ତେବେ ଆରଆଇ ଶରତ କୁମାର ସେଠୀ ଏହି ପ୍ରକ୍ରିୟାରେ ବିଳମ୍ବ କରିଥିଲେ ଏବଂ ଅନୁକୂଳ ଫିଲ୍ଡ ଇନ୍‌କ୍ୱାରୀ ରିପୋର୍ଟ ପ୍ରଦାନ କରିବା ସହ ପଟ୍ଟା କରାଇଦେବା ପାଇଁ ୫,୦୦୦ ଟଙ୍କା ଦାବି କରିଥିଲେ। ଅଭିଯୋଗକାରୀ ଲାଞ୍ଚ ଦେବାକୁ ଚାହୁଁନଥିବାରୁ ଏନେଇ ଓଡ଼ିଶା ଭିଜିଲାନ୍ସର ଦ୍ୱାରସ୍ଥ ହୋଇଥିଲେ।

ଅଭିଯୋଗ ପାଇବା ପରେ ଭିଜିଲାନ୍ସ ବିଭାଗ ପକ୍ଷରୁ ଏକ ଯୋଜନା ପ୍ରସ୍ତୁତ କରାଯାଇଥିଲା। ବୁଧବାର ଦିନ ଆରଆଇ ନିଜ କାର୍ଯ୍ୟାଳୟରେ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଅଧିକାରୀମାନେ ଚଢ଼ାଉ କରିଥିଲେ। ଅଭିଯୁକ୍ତଙ୍କ ପାଖରୁ ସମସ୍ତ ୫,୦୦୦ ଟଙ୍କା ଜବତ କରାଯାଇଛି। ଆୟ ବହିର୍ଭୂତ ସମ୍ପତ୍ତି (DA) ଠୁଳ ଅଭିଯୋଗରେ ଶରତ କୁମାର ସେଠୀଙ୍କ ସହ ଜଡ଼ିତ ଦୁଇଟି ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢ଼ାଉ ଜାରି ରହିଛି।

ବାଲେଶ୍ୱର: ମତ୍ସ୍ୟଜୀବୀଙ୍କ ଜାଲରେ ପଡିଲା ଟନ୍ ଟନ୍ ଇଲିଶି ମାଛ । ବାଲେଶ୍ୱର ସୀମାନ୍ତ ଦୀଘା ମୁହାଣରେ ମତ୍ସ୍ୟଜୀବୀଙ୍କ ଜାଲରେ କୁଇଣ୍ଟାଲ କୁଇଣ୍ଟାଲ ଇଲିଶି ମାଛ ଧରାପଡିବା ପରେ ମତ୍ସ୍ୟଜୀବୀଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି। ଏହି ବିପୁଳ ପରିମାଣର ତାଜା ମାଛ ଦେଖିବା ପାଇଁ ମୁହାଣ ନିକଟରେ ପର୍ଯ୍ୟଟକଙ୍କ ପ୍ରବଳ ଭିଡ଼ ମଧ୍ୟ ଜମିବାରେ ଲାଗିଛି।

ଚଳିତ ଋତୁର ପ୍ରଥମ ଦିନରେ ହିଁ ମତ୍ସ୍ୟଜୀବୀମାନେ ବହୁ ପରିମାଣର ଇଲିଶି ଧରିବାରେ ସଫଳ ହୋଇଛନ୍ତି। ବର୍ତ୍ତମାନ ବଜାରରେ ଏହି ମାଛର ଆକାର ଏବଂ ଗୁଣବତ୍ତା ଉପରେ ଭିତ୍ତି କରି କିଲୋଗ୍ରାମ ପ୍ରତି ୬୦୦ ରୁ ୧,୩୦୦ ଟଙ୍କା ଦରରେ ବିକ୍ରି ହେଉଥିବା ରିପୋର୍ଟରୁ ଜଣାପଡିଛି।

ଉପରମୁଣ୍ଡରେ ପ୍ରବଳ ବର୍ଷା କାରଣରୁ ହଠାତ୍ ଏତେ ପରିମାଣର ଇଲିଶି ମାଛ ଆସିଥିବା ମତ୍ସ୍ୟଜୀବୀମାନେ ପ୍ରକାଶ କରିଛନ୍ତି। ସାଧାରଣତଃ ମୌସୁମୀ ସମୟରେ ମଧୁର ଜଳ ପ୍ରବାହ ବୃଦ୍ଧି ପାଇଲେ ଇଲିଶି ମାଛ ଉପକୂଳ ଆଡ଼କୁ ଏବଂ ମଧୁର ଜଳାଶୟ ଆଡ଼କୁ ସ୍ଥାନାନ୍ତର ହୋଇଥାନ୍ତି।

ଉପରମୁଣ୍ଡରେ ଲଘୁଚାପ ଜନିତ ବର୍ଷା ଜାରି ରହିଥିବାରୁ ଆଗାମୀ ଦିନରେ ଆହୁରି ଅଧିକ ଇଲିଶି ମାଛ ମିଳିବା ନେଇ ମତ୍ସ୍ୟଜୀବୀମାନେ ଆଶାବାଦୀ ଅଛନ୍ତି। ଦୀଘା ମାଛ ଅବତରଣ କେନ୍ଦ୍ର ହେଉଛି ମାଛ ବ୍ୟବସାୟର ଏକ ପ୍ରମୁଖ କେନ୍ଦ୍ର। ଏଠାରୁ ଦେଶର ବିଭିନ୍ନ ବଜାରକୁ ଇଲିଶି ଯୋଗାଇ ଦିଆଯିବା ସହ ବିଦେଶକୁ ମଧ୍ୟ ରପ୍ତାନି କରାଯାଇଥାଏ।

ବାଲେଶ୍ୱର: ପ୍ରବଳ ବର୍ଷା ଯୋଗୁଁ ବାଲେଶ୍ୱର ଜିଲ୍ଲାରେ ବନ୍ୟା ପରିସ୍ଥିତି ଜଟିଳ ହେବାରେ ଲାଗିଛି। ଜିଲ୍ଲାର ଭୋଗରାଇ, ବସ୍ତା, ବାଲିଆପାଳ, ଜଳେଶ୍ୱର, ବାଲେଶ୍ୱର, ରେମୁଣା, ନୀଳଗିରି, ସୋର, ବାହାନଗା, ସିମୁଳିଆ, ଖାଇରା ଏବଂ ଉପଡ଼ା ଆଦି ପ୍ରାୟ ସମସ୍ତ ବ୍ଲକର ୧୫୧ଟି ଗ୍ରାମ ପଞ୍ଚାୟତ ଓ ୪୧୨ଟି ଗ୍ରାମ ବନ୍ୟା ଜଳ ଦ୍ୱାରା ପ୍ରଭାବିତ ହୋଇଛି। ଏହାସହ ୫ଟି ପୌରାଞ୍ଚଳର ୧୩୫ଟି ୱାର୍ଡ ମଧ୍ୟ ଜଳବନ୍ଦୀ ହୋଇପଡ଼ିଛି। ସରକାରୀ ଆକଳନ ଅନୁଯାୟୀ, ଜିଲ୍ଲାର ମୋଟ ୧,୪୨,୩୮୦ ଜଣ ଜନସାଧାରଣ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି।

ଜଳକା ଓ ବୁଢ଼ାବଳଙ୍ଗରେ ଜଳସ୍ତର ବୃଦ୍ଧି:
ଲଗାଣ ବର୍ଷା ଯୋଗୁଁ ଜିଲ୍ଲାର ମୁଖ୍ୟ ନଦୀ ଜଳକା ଏବଂ ବୁଢ଼ାବଳଙ୍ଗର ଜଳସ୍ତର ବିପଦ ସଙ୍କେତ ଡେଇଁ ବୃଦ୍ଧି ପାଉଛି। ଜଳକା ନଦୀର ବିପଦ ସଙ୍କେତ ୬.୫୦ ମିଟର ଥିବା ବେଳେ ଅପରାହ୍ନ ୨ ଟା ସୁଦ୍ଧା ଏହାର ଜଳସ୍ତର ୬.୮୪ ମିଟରରେ ବୃଦ୍ଧି ହୋଇ ସ୍ଥିର ରହିଛି। ସେହିପରି ବୁଢ଼ାବଳଙ୍ଗ ନଦୀର ବିପଦ ସଙ୍କେତ ୮.୧୩ ମିଟର ଥିବା ଦିନ ୨ଟା ସୁଦ୍ଧା ଏହା ୮.୬୦ ମିଟରରେ ପହଞ୍ଚି ବିପଦ ସଙ୍କେତ ଉପରେ ପ୍ରବାହିତ ହେଉଛି।

ସ୍ଥାନାନ୍ତର ଓ ରିଲିଫ୍ ବ୍ୟବସ୍ଥା:
ବନ୍ୟା ବିପନ୍ନଙ୍କୁ ସୁରକ୍ଷିତ ସ୍ଥାନକୁ ନେବା ପାଇଁ ବ୍ୟାପକ ସ୍ଥାନାନ୍ତର ପ୍ରକ୍ରିୟା ଜାରି ରହିଛି। ବର୍ତ୍ତମାନ ସୁଦ୍ଧା ମୋଟ ୨୬,୪୫୫ ଜଣଙ୍କୁ ସୁରକ୍ଷିତ ସ୍ଥାନକୁ ଅଣାଯାଇଥିବା ବେଳେ ଆଜି ସୁଦ୍ଧା ୧୩,୭୮୩ ଜଣ (୬,୧୬୪ ଜଣ ପୁରୁଷ, ୬,୩୩୮ ଜଣ ମହିଳା ଓ ୧,୨୮୧ ଜଣ ଶିଶୁ) ବିଭିନ୍ନ ଆଶ୍ରୟସ୍ଥଳୀରେ ରହିଛନ୍ତି। ପ୍ରଶାସନ ପକ୍ଷରୁ ୧୩୮ଟି ମାଗଣା ରନ୍ଧା ଖାଦ୍ୟ କେନ୍ଦ୍ର/ରିଲିଫ୍ କେନ୍ଦ୍ର ଖୋଲାଯାଇଛି, ଯେଉଁଥିରେ ଆଜି ୧୦,୧୦୭ ଜଣ ହିତାଧିକାରୀଙ୍କୁ ଖାଦ୍ୟ ଯୋଗାଇ ଦିଆଯାଇଛି। ଏତଦ୍‌ବ୍ୟତୀତ ତୁରନ୍ତ ରିଲିଫ୍ ଭାବେ ୩୩.୫ କ୍ୱିଣ୍ଟାଲ ଚାଉଳ, ୪୫.୧ କ୍ୱିଣ୍ଟାଲ ଚୁଡ଼ା, ୯.୧୦ କ୍ୱିଣ୍ଟାଲ ମୁଢ଼ି, ୪.୫ କ୍ୱିଣ୍ଟାଲ ଗୁଡ଼/ଚିନି, ୧୪୩ଟି ପଲିଥିନ୍ ରୋଲ୍, ବିସ୍କୁଟ୍ ଓ ପାନୀୟ ଜଳ ବୋତଲ ବଣ୍ଟନ କରାଯାଇଛି।

ଘରଦ୍ୱାର ଓ ଗୋସମ୍ପଦ କ୍ଷତି:
ବନ୍ୟା ଯୋଗୁଁ ପ୍ରାୟ ୬୫୪ଟି ଘର କ୍ଷତିଗ୍ରସ୍ତ ହୋଇଛି। ଏଥିମଧ୍ୟରୁ ୮୪ଟି ପକ୍କା ଘର ସମ୍ପୂର୍ଣ୍ଣ ଭାଙ୍ଗିଯାଇଥିବା ବେଳେ ୧୧୦ଟି ପକ୍କା ଘର ଗୁରୁତର, ୩୪୪ଟି କଚ୍ଛା ଘର ଆଂଶିକ ଏବଂ ୮୭ଟି ଗୋଶାଳା କ୍ଷତିଗ୍ରସ୍ତ ହୋଇଛି। ଗୋସମ୍ପଦ ମଧ୍ୟରେ ୨୦ଟି ପ୍ରାଣୀ ପ୍ରଭାବିତ ହୋଇଥିବା ବେଳେ ୯ଟି ପଶୁ (୧ଟି ବଡ଼ ଓ ୮ଟି ଛୋଟ)ଙ୍କର ମୃତ୍ୟୁ ଘଟିଛି। ପ୍ରାଣୀସମ୍ପଦ ସୁରକ୍ଷା ପାଇଁ ୨ଟି ଭ୍ରାମ୍ୟମାଣ ପଶୁଚିକିତ୍ସା ଦଳ ନିୟୋଜିତ ହେବା ସହ ୧୦ ଟନ୍ ଗୋ-ଖାଦ୍ୟ ବଣ୍ଟନ କରାଯାଇଛି। ତେବେ ସୌଭାଗ୍ୟବଶାତଃ କୌଣସି ମାନବୀୟ ଜୀବନହାନି ଘଟିନାହିଁ।

ଉଦ୍ଧାର, ଚିକିତ୍ସା ଓ ଯୋଗାଯୋଗ:
ଉଦ୍ଧାର କାର୍ଯ୍ୟ ପାଇଁ ମୋଟ ୨୧ଟି ଟିମ୍— ୯ଟି ଓଡ୍ରାଫ୍, ୧୨ଟି ଅଗ୍ନିଶମ ବାହିନୀ ଓ ୨ଟି ଏନଡିଆରଏଫ ଟିମ୍ ମୋତୟନ ଅଛନ୍ତି। ସ୍ୱାସ୍ଥ୍ୟସେବା ଯୋଗାଇଦେବାକୁ ୫ଟି ମେଡିକାଲ ଟିମ୍ ନିୟୋଜିତ କରାଯାଇଛି। ରାସ୍ତାଘାଟ ବୁଡ଼ିଯିବା ଯୋଗୁଁ ୩୦ଟି ରାସ୍ତା ବାଧାପ୍ରାପ୍ତ ହୋଇଛି ଏବଂ ୧୫ଟି ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ିଛି। ବାଟରେ ପଡ଼ିଥିବା ୧୫ଟି ଉପୁଡ଼ା ଗଛ ଓ ଜଳବନ୍ଦୀ ରାସ୍ତା ସଫା କରି ଯାତାୟାତ ସ୍ୱାଭାବିକ କରିବା ପାଇଁ ୪ଟି ଜେସିବି ମେସିନ୍ ନିୟୋଜିତ କରାଯାଇ ସମ୍ପ୍ରତି ୧୦ଟି ରାସ୍ତା ଚଳାଚଳ ଉପଯୋଗୀ କରାଯାଇଛି। ପ୍ରଶାସନ ପକ୍ଷରୁ ସ୍ଥିତି ଉପରେ ତୀକ୍ଷ୍ଣ ନଜର ରଖାଯାଇଛି।

ବାଲେଶ୍ୱର: ବାଲେଶ୍ୱରରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ସ୍ତ୍ରୀଙ୍କ ଜନ୍ମଦିନ ପାଳନ କରିବାର କିଛି ଘଣ୍ଟା ପରେ ଜଣେ ୩୮ ବର୍ଷୀୟ ଇଞ୍ଜିନିୟରଙ୍କ ସନ୍ଦେହଜନକ ମୃତ୍ୟୁ ଘଟିଛି। ପ୍ରାଥମିକ ଭାବେ ଏହାକୁ ଆତ୍ମହତ୍ୟା ବୋଲି କୁହାଯାଉଥିଲେ ମଧ୍ୟ, ପରିବାର ଲୋକେ ଏହାକୁ ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଅଭିଯୋଗ କରିଛନ୍ତି। ପରକୀୟା ପ୍ରୀତି କାରଣରୁ ତାଙ୍କୁ ହତ୍ୟା କରାଯାଇ ଆତ୍ମହତ୍ୟାର ରୂପ ଦିଆଯାଇଥିବା ପରିବାର ଲୋକେ ଦାବି କରିଛନ୍ତି।

ମୃତକ ଜଣକ ହେଲେ ଜଗତସିଂହପୁର ଜିଲ୍ଲା ଆଣଳା ଗ୍ରାମର ରଶ୍ମିରଞ୍ଜନ ସେଠୀ (୩୮)। ସେ କଟକ ଡିଭିଜନ୍ ଅଧୀନରେ ପୂର୍ତ୍ତ ବିଭାଗରେ (ଆର୍ ଆଣ୍ଡ ବି) ଇଞ୍ଜିନିୟର ଭାବେ କାର୍ଯ୍ୟରତ ଥିଲେ ଏବଂ ଭୁବନେଶ୍ୱରରେ ରହୁଥିଲେ। ତାଙ୍କ ପତ୍ନୀ ରଶ୍ମିରେଖା ଭୂୟାଁ (୩୦) ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟରେ ଜାତୀୟ ସ୍ୱାସ୍ଥ୍ୟ ମିଶନ (ଏନଏଚଏମ) ଅଧୀନରେ କାମ କରନ୍ତି। ପରିବାରର କହିବା ଅନୁଯାୟୀ, ଗତ ବୁଧବାର ଦିନ ସ୍ତ୍ରୀଙ୍କ ଜନ୍ମଦିନ ପାଳନ କରିବା ପାଇଁ ରଶ୍ମିରଞ୍ଜନ ବାଲେଶ୍ୱର ଯାଇଥିଲେ। ଗୁରୁବାର ବିଳମ୍ବିତ ରାତି ପର୍ଯ୍ୟନ୍ତ ସହଦେବଖୁଣ୍ଟା ଥାନା ଅନ୍ତର୍ଗତ ଆଜିମାବାଦ ନିକଟସ୍ଥ ବିଜୁ ପଟ୍ଟନାୟକ କଲୋନୀରେ ଉଭୟେ ଜନ୍ମଦିନ ପାଳନ କରିଥିଲେ। ତେବେ ରାତିରେ ରଶ୍ମିରଞ୍ଜନ ଆତ୍ମହତ୍ୟା କରିଥିବା ନେଇ ରଶ୍ମିରେଖାଙ୍କ ଭାଇ କିଶନ ଭୂୟାଁ ପରିବାର ଲୋକଙ୍କୁ ଖବର ଦେଇଥିଲେ।

ମୃତକଙ୍କ ପରିବାର ସଦସ୍ୟ ଅଭିଯୋଗ କରିଛନ୍ତି ଯେ, କରଞ୍ଜିଆରେ ପୋଷ୍ଟିଂ ଥିବା ସମୟରେ ରଶ୍ମିରେଖାଙ୍କର ସହକର୍ମୀ ଦେବାଶିଷ ସ୍ୱାଇଁଙ୍କ ସହ ପରକୀୟା ସମ୍ପର୍କ ଗଢ଼ି ଉଠିଥିଲା। ଏହାକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବାରମ୍ବାର ବିବାଦ ଦେଖାଦେଉଥିଲା ଏବଂ ରଶ୍ମିରଞ୍ଜନଙ୍କୁ ଚୁପ୍ ରହିବାକୁ ଧମକ ମଧ୍ୟ ଦିଆଯାଉଥିଲା। ପ୍ରାୟ ୬ ମାସ ତଳେ ରଶ୍ମିରେଖା ଏବଂ ଉକ୍ତ ସହକର୍ମୀ ରଶ୍ମିରଞ୍ଜନଙ୍କୁ ନ ଜଣାଇ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟକୁ ବଦଳି ହୋଇ ଆସିଥିଲେ। ପରିବାରର ଅଭିଯୋଗ ମୁତାବକ, ଏହି ଘଟଣାରେ ପତ୍ନୀ ରଶ୍ମିରେଖା, ସହକର୍ମୀ ଦେବାଶିଷ ଏବଂ ଦେବାଶିଷଙ୍କ ପେଟ୍ରୋଲ୍ ପମ୍ପରେ କାମ କରୁଥିବା ଅନ୍ୟ ଜଣେ ବ୍ୟକ୍ତି ସମ୍ପୃକ୍ତ ଅଛନ୍ତି। ମୃତଦେହକୁ ଡାକ୍ତରଖାନାରେ ଛାଡ଼ି ସେମାନେ ଫେରାର୍ ହୋଇଯାଇଥିବା ଅଭିଯୋଗ ହୋଇଛି।

ସହଦେବଖୁଣ୍ଟା ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଥାନା ଅଧିକାରୀ ଆଲୋକ କୁମାର ବେହେରାଙ୍କ ସୂଚନା ଅନୁଯାୟୀ, ଡାକ୍ତରଖାନାରୁ ମୃତଦେହ ଜବତ କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି। ମୃତକଙ୍କ କାକା ଲକ୍ଷ୍ମୀଧର ସେଠୀଙ୍କ ଲିଖିତ ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରିଛି ଏବଂ ଘଟଣାରେ ୨ ରୁ ଅଧିକ ଲୋକଙ୍କୁ ପଚରାଉଚରା କରୁଛି। ୨୦୨୩ ମସିହାରେ ରଶ୍ମିରଞ୍ଜନ ଏବଂ ରଶ୍ମିରେଖାଙ୍କ ମଧ୍ୟରେ ପ୍ରେମ ବିବାହ ହୋଇଥିଲା। ବର୍ତ୍ତମାନ ଅଭିଯୁକ୍ତଙ୍କ ମୋବାଇଲ୍ ଫୋନ୍ ସୁଇଚ୍ ଅଫ୍ ରହିଛି ଏବଂ ପୋଲିସ ସେମାନଙ୍କୁ ଖୋଜୁଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ ପକ୍ଷରୁ କୁହାଯାଇଛି।

ବାଲେଶ୍ୱର: ବିଦ୍ୟୁତ୍ ତାର ସଂସ୍ପର୍ଶରେ ଆସି ଚାଲିଗଲା ଦୁଇ ଜଣକ ଜୀବନ । ବାଲେଶ୍ୱର ଜିଲ୍ଲା ସିମୁଳିଆ ଥାନା ଅନ୍ତର୍ଗତ ମହିଷାପଣ୍ଡା ଗାଁରେ ଘଟିଛି ଏପରି ଅଘଟଣ । ବିଦ୍ୟୁତ୍ ତାର ସଂସ୍ପର୍ଶରେ ଆସି ଜଣେ ଚାଷୀ ଏବଂ ଜଣେ ବୃଦ୍ଧାଙ୍କର ଶୋଚନୀୟ ମୃତ୍ୟୁ ଘଟିଛି। ମୃତକ ଦ୍ୱୟ ହେଲେ ସ୍ଥାନୀୟ ଚାଷୀ ବାବୁଲି ଦାସ ଏବଂ ନିକଟସ୍ଥ ଗ୍ରାମର ବୃଦ୍ଧା ପାର୍ବତୀ ମୁଣ୍ଡା।

ମିଳିଥିବା ସୂଚନା ଅନୁଯାୟୀ, ଚାଷୀ ବାବୁଲି ଦାସ ନିଜ ଧାନ କ୍ଷେତକୁ ବୁଲା ଗୋରୁଙ୍କ ଦାଉରୁ ରକ୍ଷା କରିବା ପାଇଁ ଏକ ଲୁହା ତାରର ବାଡ଼ ବୁଲାଇଥିଲେ। ସୁରକ୍ଷା ଦୃଷ୍ଟିରୁ ସେ ଏହି ତାରରେ ବିଦ୍ୟୁତ୍ ସଂଯୋଗ ମଧ୍ୟ କରିଥିଲେ। ତେବେ ଆଜି ସକାଳେ ବିଦ୍ୟୁତ୍ ସଂଯୋଗ ବିଚ୍ଛିନ୍ନ ନକରି ସେ ଭୁଲବଶତଃ କ୍ଷେତକୁ ପଶିଯାଇଥିଲେ। ଫଳରେ ସେ ଜୀବନ୍ତ ବିଦ୍ୟୁତ୍ ତାର ସଂସ୍ପର୍ଶରେ ଆସି ଛଟପଟ ହେବାକୁ ଲାଗିଥିଲେ। ତାଙ୍କୁ ଏପରି ଅବସ୍ଥାରେ ଦେଖି ପାଖରେ ରହୁଥିବା ପାର୍ବତୀ ମୁଣ୍ଡା ତାଙ୍କୁ ରକ୍ଷା କରିବାକୁ ଦୌଡ଼ି ଆସିଥିଲେ। କିନ୍ତୁ ଦୁର୍ଭାଗ୍ୟବଶତଃ ସେ ମଧ୍ୟ ବିଦ୍ୟୁତ୍ ତାର ସଂସ୍ପର୍ଶରେ ଆସିଯାଇଥିଲେ। ଘଟଣାସ୍ଥଳରେ ହିଁ ଉଭୟଙ୍କର ପ୍ରାଣହାନି ଘଟିଥିଲା।

ଏହି ଘଟଣା ଦେଖି ସ୍ଥାନୀୟ ଲୋକେ ତୁରନ୍ତ ବିଦ୍ୟୁତ୍ ସଂଯୋଗ କାଟିବା ସହ ଅଗ୍ନିଶମ ବାହିନୀ ଏବଂ ୧୦୮ ଆମ୍ବୁଲାନ୍ସକୁ ଖବର ଦେଇଥିଲେ। ଖବର ପାଇ ଅଗ୍ନିଶମ ବାହିନୀର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ କ୍ଷେତରୁ ଉଦ୍ଧାର କରିଥିଲେ। ପରେ ଶବ ବ୍ୟବଚ୍ଛେଦ ପାଇଁ ମୃତଦେହଗୁଡ଼ିକୁ ସିମୁଳିଆ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଯାଇଛି। ଏହି ହୃଦୟବିଦାରକ ଘଟଣା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି।

ବାଲେଶ୍ୱର: ସମୁଦ୍ରରେ ପ୍ରାୟ ଏକ ସପ୍ତାହ ଧରି ନିଖୋଜ ଥିବା ୧୬ ଜଣ ମତ୍ସ୍ୟଜୀବୀ ଠାବ ହୋଇଛନ୍ତି। ପଶ୍ଚିମବଙ୍ଗ କାକଦ୍ୱୀପର ୨ କିମି ଦୂରରେ ଠାବ ହେଲେ ମତ୍ସ୍ୟଜୀବୀ । ସମସ୍ତେ ସୁରକ୍ଷିତ ଥିବା ସୂଚନା ମିଳିଛି । ଏହି ମତ୍ସ୍ୟଜୀବୀମାନଙ୍କ ମଧ୍ୟରେ ଓଡ଼ିଶାର ବାଲେଶ୍ୱର ଜିଲ୍ଲାର ୩ ଭାଇ ମଧ୍ୟ ସାମିଲ ଅଛନ୍ତି। ସମସ୍ତ ମତ୍ସ୍ୟଜୀବୀଙ୍କୁ ପଶ୍ଚିମବଙ୍ଗର କାକଦ୍ୱୀପ ନିକଟରୁ ଠାବ କରାଯାଇଛି।

ମିଳିଥିବା ସୂଚନା ଅନୁଯାୟୀ, ଗତ ଜୁଲାଇ ୨ ତାରିଖରେ ଏହି ମତ୍ସ୍ୟଜୀବୀମାନେ ‘ମାଆ କାଳୀ’ ନାମକ ଏକ ଟ୍ରଲରରେ ଗଭୀର ସମୁଦ୍ରକୁ ଇଲିସି ମାଛ ଧରିବା ପାଇଁ ଯାଇଥିଲେ। ସେମାନେ ଶଙ୍କରପୁର ବେଳାଭୂମିରୁ ଯାତ୍ରା ଆରମ୍ଭ କରିଥିଲେ। ତେବେ କୂଳ ଛାଡ଼ିବା ପରେ ପରିବାର ଲୋକଙ୍କ ସହ ସେମାନଙ୍କର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା।

ଠାବ ହୋଇଥିବା ୧୬ ଜଣ ମତ୍ସ୍ୟଜୀବୀଙ୍କ ମଧ୍ୟରେ ବାଲେଶ୍ୱର ଜିଲ୍ଲା ଭୋଗରାଇ ବ୍ଲକ ଉଲୁଡ଼ା ଗ୍ରାମର ୩ ଜଣ ଅଛନ୍ତି। ସେମାନେ ହେଲେ ରବୀନ୍ଦ୍ର ମାଝୀ, ଜୟରାମ ମାଝୀ ଏବଂ ଜଗନ୍ନାଥ ମାଝୀ। ବାକି ମତ୍ସ୍ୟଜୀବୀମାନେ ପଶ୍ଚିମବଙ୍ଗର ବୋଲି ଜଣାପଡ଼ିଛି। ସମୁଦ୍ରକୁ ଯିବା ପରେ ଏହି ତିନି ଓଡ଼ିଆ ଭାଇ ନିଜ ପରିବାର ସହ ଥରେ କଥା ହୋଇଥିଲେ। ଗତ ରବିବାର ଦିନ ଟ୍ରଲର ମାଲିକ ମଧ୍ୟ ସେମାନଙ୍କ ସହ ଯୋଗାଯୋଗ କରିଥିଲେ। କିନ୍ତୁ ଏହା ପରେ ସମସ୍ତ ଯୋଗାଯୋଗ ବିଚ୍ଛିନ୍ନ ହୋଇଯିବାରୁ ପରିବାର ମଧ୍ୟରେ ତୀବ୍ର ଆଶଙ୍କା ଦେଖାଦେଇଥିଲା।

ଶଙ୍କରପୁର ଟ୍ରଲର ଆସୋସିଏସନ ପକ୍ଷରୁ ମିଳିଥିବା ସୂଚନା ମୁତାବକ, ନିଖୋଜ ଟ୍ରଲରଟି ପଶ୍ଚିମବଙ୍ଗର କାକଦ୍ୱୀପ ଠାରୁ ପ୍ରାୟ ୨ କିଲୋମିଟର ଦୂରରେ ଠାବ ହୋଇଛି। ମତ୍ସ୍ୟଜୀବୀମାନଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ଆସୋସିଏସନ ପକ୍ଷରୁ ଅନ୍ୟ ଏକ ଟ୍ରଲର ପଠାଯାଇଛି। ସମସ୍ତେ ସୁରକ୍ଷିତ ଥିବା ଖବର ପାଇବା ପରେ ନିଖୋଜ ମତ୍ସ୍ୟଜୀବୀଙ୍କ ପରିବାରରେ, ବିଶେଷ କରି ବାଲେଶ୍ୱରର ଭୋଗରାଇ ଅଞ୍ଚଳରେ ଆଶ୍ୱସ୍ତିର ଲହରୀ ଖେଳିଯାଇଛି।