ତେଲକୋଇ/କେନ୍ଦୁଝର: କେନ୍ଦୁଝର ଜିଲ୍ଲାର ତେଲକୋଇ ବ୍ଲକରେ ଲଘୁଚାପ ଜନିତ ପ୍ରବଳ ବର୍ଷା ପ୍ରଭାବରେ ଦୁଇଗୋଟି ଗୁରୁତ୍ୱପୂର୍ଣ ରାସ୍ତାର ପୋଲ ଧୋଇଯିବାରୁ ୫ ଗୋଟି ପଞ୍ଚାୟତ ର ପ୍ରାୟ ୨୫ ହଜାର ଲୋକ ବ୍ଲକ ମୁଖ୍ୟାଳୟରୁ ଗମନା ଗମନରେ ଏକ ପ୍ରକାରର ବିଛିନ୍ନ ହୋଇଛନ୍ତି । ଜରୁରୀକାଳିନ ସେବା ପାଇବାରେ ଲୋକେ ଅସୁବିଧାର ସମ୍ମୁଖୀନ ହୋଇଛନ୍ତି । 

ଶନିବାର ଦିନ ଏବଂ ରାତ୍ରି ସମୟରେ ତେଲକୋଇ ବ୍ଲକର ବିଭିନ୍ନ ଅଞ୍ଚଳରେ ଲଘୁଚାପ ବର୍ଷା ହୋଇଥିଲା ଫଳରେ ବିଭିନ୍ନ ନଇ ନାଳରେ ବନ୍ୟାଜଳ କୁଳ ଲଙ୍ଘିବା ଅବସ୍ଥା ହେବାରୁ ତେଲକୋଇ ଜଗମୋହନପୁର ରାସ୍ତାର ହନୁମନ୍ତିଆ ନାଳର ଗମନା ଗମନ ନାଳ ପୋଲ ଧୋଇ ଯାଇଛି । ଏଠାରେ ଅନେକ ଦିନ ହେବ ନୂତନ ପୋଲକାମ ଅଧୁରା ଥିବାରୁ ଘୋଷଡା ପୋଲରେ ଲୋକେ ଯିବା ଆସିବା କରୁଥିଲେ । ସେହି ପୋଲଟି ଧୋଇଯିବାରୁ ଦବଲାପାଳ, ଛାମୁଣ୍ଡା, ଜଗମୋହନପୁର, ବିଂଝବାହାଳି ପ୍ରଭୃତି ୪ ଗୋଟି ପଞ୍ଚାୟତର ପାଖାପାଖି ୨୦ ହଜାର ଲୋକ ବ୍ଲକ ମୁଖ୍ୟାଳୟ ସହିତ ବିଛିନ୍ନ ଅବସ୍ଥାରେ ଅଛନ୍ତି । ସେହିପରି ତେଲକୋଇ କରଦାଙ୍ଗି ରାସ୍ତାର ଶ୍ରୀଧରପୁର ନିକଟ ପଞ୍ଚମୁଣ୍ଡିଆ ନାଳ ପୋଲ ନିକଟ ରାସ୍ତା ଧୋଇଯିବାରୁ କରଦାଙ୍ଗି ପଞ୍ଚାୟତ ବ୍ଲକ ମୁଖ୍ୟଳୟ ରୁ ବିଛିନ୍ନ ରହିଛି । ପ୍ରଶାସନ ପକ୍ଷରୁ ଗମନାଗମନକୁ ସୁଗମ ନିମନ୍ତେ ପ୍ରୟାସ ଚାଲିଛି । 

ଚମ୍ପୁଆ: ଚମ୍ପୁଆ ପୋଲିସକୁ ବଡ଼ ସଫଳତା । ଏନ୍‌କାଉଣ୍ଟରରେ କୁଖ୍ୟାତ ଆନ୍ତଃରାଜ୍ୟ ଚୋର ମହମ୍ମଦ ନାଫିସ ଆହତ  । କେନ୍ଦୁଝର ଓ ମୟୂରଭଞ୍ଜ ଜିଲ୍ଲାର ୩୦ରୁ ଅଧିକ ଚୋରି ମାମଲାରେ ସମ୍ପୃକ୍ତ ଥିବା କୁଖ୍ୟାତ ଆନ୍ତଃରାଜ୍ୟ ଚୋର ମହମ୍ମଦ ନାଫିସକୁ ଏନ୍‌କାଉଣ୍ଟର ପରେ ଚମ୍ପୁଆ ପୋଲିସ ଗିରଫ କରିଛି।

ପୋଲିସ ସୂଚନା ଅନୁଯାୟୀ, ଚମ୍ପୁଆ ନିକଟ ପତଳା ଜଙ୍ଗଲରେ ଚୋରି ସାମଗ୍ରୀ ଲୁଚାଇ ରଖିଥିଲା ନାଫିସ । ଚୋରୀ ସାମଗ୍ରୀ ଦେଖାଇବାକୁ ଜଙ୍ଗଲ ନେବା ବେଳେ ଅଭିଯୁକ୍ତ ପୋଲିସ ଟିମ୍ ଉପରେ ୨ ରାଉଣ୍ଡ ଗୁଳି ଚଳାଇଥିଲା  ନାଫିସ । ଆତ୍ମରକ୍ଷା ପାଇଁ ପୋଲିସ ତା' ଉପରକୁ ପାଲଟା ଗୁଳି ଚଳାଇଥିଲା। ଏଥିରେ ଅଭିଯୁକ୍ତର ଡାହାଣ ଆଣ୍ଠୁରେ ଗୁଳି ବାଜିଥିଲା। ପରେ ତାକୁ ଗିରଫ କରାଯିବା ସହ ତାଠାରୁ ଏକ ଦେଶୀ ନିର୍ମିତ ବନ୍ଧୁକ ଜବତ କରାଯାଇଛି।

ତେଲକୋଇ: କେନ୍ଦୁଝର ଜିଲ୍ଲା ତେଲକୋଇ ଥାନା ସାତହଳିଆ ନିକଟ ଜଙ୍ଗଲରେ ଜଣେ ଅଚିହ୍ନା ବ୍ୟକ୍ତିଙ୍କର ମୃତଦେହ ଠାବ ହୋଇଛି । କେହି ତାଙ୍କୁ ହତ୍ୟା କରିବା ପରେ ଏଠାରେ ପକାଇ ଦେଇଥିବା ଲୋକେ ସନ୍ଦେହ କରୁଛନ୍ତି  । ତାଳପଦା ପଞ୍ଚାୟତର ପଙ୍ଗା ଆଡ଼କୁ ଯିବା ରାସ୍ତାର ସାତହଳିଆ ନିକଟରେ ଥିବା ଜଙ୍ଗଲରେ ମୃତଦେହଟି ମୁହଁ ମାଡି ତଳେ ପଡ଼ିଥିବା ଅବସ୍ଥାରେ ଜଙ୍ଗଲକୁ ଯାଉଥିବା ଲୋକେ ଦେଖିଥିଲେ । ଖବର ଲେଖା ହେବା ବେଳକୁ ତେଲକୋଇ ପୋଲିସ ସେଠାରେ ପହଁଚି ନଥିବା ସୂଚନା ମିଳିଛି । ତେବେ କିଭଳି ଏବଂ କେଉଁ ପରିସ୍ଥିତିରେ ମୃତଦେହ ସେଠାକୁ ଗଲା ପୋଲିସ ପହଞ୍ଚି ତଦନ୍ତ କରିବା ପରେ ଜଣାପଡିବ ।

କେନ୍ଦୁଝର: ତାମିଲନାଡୁ ଆମୋନିଆ ଗ୍ୟାସ୍ ଲିକ୍ ଘଟଣାରେ ଆଉ ଜଣେ ଓଡ଼ିଆ ମୃତ୍ୟୁବରଣ କରିଛନ୍ତି । ଚିକିତ୍ସାଧୀନ ଅବସ୍ଥାରେ ଆଖି ବୁଜିଲେ ଆଉ ଜଣେ ଓଡ଼ିଆ ଯୁବତୀ । ମୃତ ଯୁବତୀ ଜଣକ କେନ୍ଦୁଝର ଜିଲ୍ଲା ତେଲକୋଇ ବ୍ଲକ ପିଟାନାଳୀ ଗ୍ରାମର ସୁମିତ୍ରା ଜୁଆଙ୍ଗ ହୋଇଥିବା ସୂଚନା । ସୁମିତ୍ରା ଜୁଆଙ୍ଗଙ୍କ ମୃତ୍ୟୁ ପରେ ଏହି ଘଟଣାରେ ଓଡ଼ିଆ ଶ୍ରମିକଙ୍କ ମୃତ୍ୟୁସଂଖ୍ୟା ୧୧କୁ ବୃଦ୍ଧି ପାଇଛି। ୧୧ ମୃତକଙ୍କ ମଧ୍ୟରୁ ୫ ଜଣଙ୍କ ମୃତଦେହକୁ ସେମାନଙ୍କୁ ଗାଁକୁ ଅଣାଯାଇ ଶେଷକୃତ୍ୟ ସଂପନ୍ନ କରାଯାଇଛି। ସମସ୍ତ ମୃତକ କେନ୍ଦୁଝର ଜିଲ୍ଲାର ଆଦିମ ଜୁଆଙ୍ଗ ଜନଜାତିର ହୋଇଥିବାରୁ ସ୍ଥାନୀୟ ଜୁଆଙ୍ଗ ଗାଁଗୁଡ଼ିକରେ ଶୋକାକୂଳ ପରିବେଶ ସୃଷ୍ଟି ହୋଇଛି। 

ସୂଚନାଯୋଗ୍ୟ, ଗତ ୨୧ତାରିଖ ଦିନ ତାମିଲନାଡୁର ତିରୁଭଲ୍ଲୁର ଜିଲ୍ଲା ପେରିୟପାଲୟମ ନିକଟରେ ଥିବା ଏକ ସାମୁଦ୍ରିକ ଖାଦ୍ୟ ପ୍ରକ୍ରିୟାକରଣ ଓ ରପ୍ତାନି କାରଖାନାରେ ଆମୋନିଆ ଗ୍ୟାସ୍ ଲିକ୍ ହୋଇ ଏକାଧିକ କର୍ମଚାରୀ ମୃତ୍ୟୁବରଣ କରିଥିବାବେଳେ ଅନେକ ଗୁରୁତର ହୋଇ ମେଡିକାଲରେ ଚିକିତ୍ସିତ ହେଉଛନ୍ତି ।  

ଆନନ୍ଦପୁର: ରୋଗୀଶଯ୍ୟାରେ ମଣିଷ ବଦଳରେ ଶୋଇଛି କୁକୁର । କେନ୍ଦୁଝର ଜିଲ୍ଲା ଆନନ୍ଦପୁର ଉପଖଣ୍ଡର ସାଇଁକୁଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ରୋଗୀଶଯ୍ୟାରେ କୁକୁର ଶୋଇବା ଦୃଶ୍ୟ ସରକାରୀ ସ୍ୱାସ୍ଥ୍ୟସେବାର ପରିଚାଳନା ଉପରେ ସିଧାସଳଖ ପ୍ରଶ୍ନ ଉଠାଇଛି। ଯେଉଁ ହସ୍ପିଟାଲ ବେଡ୍‌ରେ ରୋଗୀମାନେ ଚିକିତ୍ସା ପାଇବା କଥା, ସେହି ବେଡ୍‌ରେ ଆରାମରେ ଶୋଇଛନ୍ତି ବୁଲା କୁକୁର। ଏହି ଦୃଶ୍ୟ ଦେଖି ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସ୍ୱାସ୍ଥ୍ୟାବସ୍ଥା କେତେ ଦୁର୍ବଳ ତାହା ସହଜରେ ଅନୁମାନ କରାଯାଇପାରେ। ଏହା କେବଳ ଏକ ଅବହେଳାର ଘଟଣା ନୁହେଁ, ବରଂ ରୋଗୀଙ୍କ ସ୍ୱାସ୍ଥ୍ୟ ଓ ସ୍ୱଚ୍ଛତା ପ୍ରତି ହେଉଥିବା ଗୁରୁତର ଅବମାନନା ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ହସ୍ପିଟାଲ ଭିତରକୁ କୁକୁର ପ୍ରବେଶ କଲା କିପରି ? ସୁରକ୍ଷା କର୍ମୀ କ’ଣ କରୁଥିଲେ? ହସ୍ପିଟାଲରେ ନିୟୋଜିତ କର୍ମଚାରୀ ଏବଂ ସୁରକ୍ଷାକର୍ମୀମାନେ କେଉଁଠି ଥିଲେ? 

ସାଇଁକୁଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ଏହା ପ୍ରଥମ ବିବାଦ ନୁହେଁ। ପୂର୍ବରୁ ମଧ୍ୟ ହସ୍ପିଟାଲରେ ବିଭିନ୍ନ ଅବ୍ୟବସ୍ଥା ଓ ଅନିୟମିତତାକୁ ନେଇ ଅଭିଯୋଗ ଉଠିଥିଲା। ଏପରିକି କିଛି ଦିନ ପୂର୍ବରୁ ଡାକ୍ତର ଏବଂ ଡ୍ରେସର ମଦ୍ୟପାନ କରି କାର୍ଯ୍ୟ କରୁଥିବା ନେଇ ମଧ୍ୟ ଅଭିଯୋଗ ଚର୍ଚ୍ଚାକୁ ଆସିଥିଲା। ପ୍ରଶ୍ନ ଉଠୁଛି, ସାଇଁକୁଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଏଭଳି ଅବ୍ୟବସ୍ଥା ପାଇଁ ଦାୟୀ କିଏ? ମେଡିକାଲ୍‌ ଅଫିସର ଏବଂ ଉଚ୍ଚ ଅଧିକାରୀମାନେ କାହିଁକି ଏହା ଉପରେ ଦୃଷ୍ଟି ଦେଉନାହାନ୍ତି? ଏହାକୁ ନେଇ ଏବେ ସମଗ୍ର ଅଞ୍ଚଳରେ ଚର୍ଚ୍ଚା ଜୋର ଧରିଛି। 

କେନ୍ଦୁଝର: କେନ୍ଦୁଝର ଜିଲ୍ଲା ନରଣପୁରରେ କାଳବୈଶାଖୀ ତାଣ୍ଡବ । ପ୍ରଚଣ୍ଡ ପବନରେ ଭୁଶୁଡ଼ିଗଲା ଟେଣ୍ଟ । ଟେଣ୍ଟ ତଳେ ଚାପି ହୋଇ ଚାଲିଗଲା ୩ଜଣଙ୍କ ଜୀବନ । ଅନ୍ୟ ଜଣେ ଗୁରୁତର ଆହତ ହୋଇଥିବା ସୂଚନା । ସୂଚନାଯୋଗ୍ୟ, ଆଜି ଅପରାହ୍ଣ ସମୟରେ ହଠାତ୍‌ ପ୍ରବଳ ଘୁର୍ଣ୍ଣିଝଡ଼, ପବନ ଏବଂ ବର୍ଷା ଜନଜୀବନକୁ ଅସ୍ତବ୍ୟସ୍ତ କରିଦେଇଥିବା ଜଣାଯାଇଛି । ବିଭିନ୍ନ ଅଞ୍ଚଳରେ ଗଛ ଭାଙ୍ଗି ପଡ଼ିବା ସହ ବ୍ୟାପକ କ୍ଷୟକ୍ଷତି ଘଟିଛି । 

ତେବେ ପ୍ରବଳ ପବନ ହେବ ଯୋଗୁଁ କେନ୍ଦୁଝର ଟାଉନ ଥାନା ଅଧୀନ ନରଣପୁର ଅଞ୍ଚଳରେ କୌଣସି ଭୋଜି ପାଇଁ ପ୍ରସ୍ତୁତ ହୋଇଥିବା ଟେଣ୍ଟ ଭୁଶୁଡ଼ି ପଡ଼ିଥିଲା । ଏଥିରେ ୩ଜଣଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ଜଣେ ଗୁରୁତର ଭାବେ ଆହତ ହୋଇଛନ୍ତି । ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।

କେନ୍ଦୁଝର: କଳା ପଲସର ଆସି ବନ୍ଧୁକ ମୁନରେ ଟଙ୍କା ଲୁଟ କଲେ ଦୁର୍ବୁତ୍ତ । ଦିନ ଦ୍ଵିପ୍ରହରେ ପିଇଓଙ୍କୁ ବନ୍ଧୁକ ଦେଖାଇ ଲୁଟି ନେଲେ ୮ ଲକ୍ଷ ୧୮ ହଜାର ଟଙ୍କା ।  କେନ୍ଦୁଝର ଜିଲ୍ଲା ସଦର ଥାନା ଅନ୍ତର୍ଗତ ମୁକୁନା ନିକୁଟରୁ ଆଜି ଦିବା ଆଲୋକରେ ପିଇଓଙ୍କୁ ବନ୍ଧୁକ ଦେଖାଇ  ଟଙ୍କା ଲୁଟି ନେଇଛନ୍ତି ଦୃର୍ବୁତ୍ତ  । ମିଳିଥିବା ସୂଚନା ଅନୁଯାୟୀ ବାଉରୀପଦା ପଞ୍ଚାୟତ ପିଇଓ ପଞ୍ଚୟତରେ ଭତା ଟଙ୍କା ବାଣ୍ଟିବା ପାଇଁ ବ୍ୟାଙ୍କରୁ ଟଙ୍କା ନେଇ ଆସୁଥିଲେ । ଆଉ ମାତ୍ର ୫ ଶହ ମିଟର ଯାଇଥିଲେ ପଞ୍ଚାୟତ କାର୍ଯ୍ୟଳୟ ପଡିଥାନ୍ତା, ମାତ୍ର ତା ପୂର୍ବରୁ କଳା ପଲସର ଆସି ବନ୍ଧୁକ ମୁନରେ ଟଙ୍କା ଝାମ୍ପିନେଲେ ଲୁଟେରା । ସ୍ଥାନୀୟ ପ୍ରତ୍ୟକ୍ଷଦର୍ଶୀଙ୍କ କହିବା ମୁତାବକ ଏକ କଳା ପଲସରରେ ତିନି ଜଣ ମୁଖା ପିନ୍ଧା ଲୋକ ଥିଲେ। ଟଙ୍କା ଲୁଟିବା ପରେ ବେଲଦା ରାସ୍ତା ଦେଇ ଚମ୍ପଟ ମାରିଛନ୍ତି। ଖବର ପାଇ ସଦର ପୋଲିସ ଘଟଣା ସ୍ଥଳରେ ପହଁଚି ଛାନଭିନ୍ ଜାରୀ ରଖିଛି।

କେନ୍ଦୁଝର: ପୋଲିସ ଟାର୍ଗେଟରେ ବାଲି ମାଫିଆ । କେନ୍ଦୁଝର ଆନନ୍ଦପୁର ଉପଖଣ୍ଡର ବିଭିନ୍ନ ସ୍ଥାନରେ କେନ୍ଦୁଝର ପୁଲିସର ସ୍ୱତନ୍ତ୍ର ସ୍କ୍ବାର୍ଡ ପକ୍ଷରୁ ବଡ଼ ଧରଣର ଚଢ଼ାଉ କରାଯାଇଛି । କେନ୍ଦୁଝର ଏସପିଙ୍କ ନିର୍ଦ୍ଦେଶରେ ହୋଇଛି ଏହି ଚଢ଼ାଉ । ଆନନ୍ଦପୁର, ଘଷିପୁରା, ହାଟଡିହି ଏବଂ ଘଟଗାଁ ଅଞ୍ଚଳର ପ୍ରାୟ ୧୨ଟି ସ୍ଥାନରେ ପୋଲିସର ସ୍ୱତନ୍ତ୍ର ଟିମ ବାଲି ମାଫିଆଙ୍କ ଆଡ୍ଡା ଓ ବାସଭବନ ଉପରେ ଚଢ଼ାଉ କରିଛି । ଚଢ଼ାଉ ବେଳେ ବାଲି ମାଫିଆଙ୍କ ଘରୁ ୨୫ ଲକ୍ଷରୁ ଅଧିକ ନଗଦ ଟଙ୍କା ଜବତ କରାଯାଇଛି । ଏହାସହ ବାଲି ଚୋରା ଚାଲାଣରେ ବ୍ୟବହୃତ ହେଉଥିବା ୩୦ରୁ ଅଧିକ ଗାଡ଼ିକୁ ସିଜ୍ କରିଛି ପୋଲିସ । ଏହି ଚଢାଉରେ ପୋଲିସକୁ ବହୁ ସଂଖ୍ୟାରେ ବ୍ୟାଙ୍କ ପାସ୍ ବୁକ୍, ବୀମା କାଗଜପତ୍ର ଏବଂ ବାଲି ପରିବହନ ପାଇଁ ପ୍ରସ୍ତୁତ କରାଯାଇଥିବା ଏକାଧିକ ଜାଲ୍ ଦସ୍ତାବିଜକୁ ମଧ୍ୟ ହେପାଜତକୁ ନେଇଛି ।

୧୨ରୁ ଉର୍ଦ୍ଧ୍ୱ ବ୍ୟକ୍ତିଙ୍କୁ ଅଟକ ରଖି ପୋଲିସ ପଚରାଉଚରା ଚଳାଇଛି। ଜିଲ୍ଲା ଏସପିଙ୍କ ନିର୍ଦ୍ଦେଶରେ ଅତିରିକ୍ତ ଏସପି ସ୍ନେହାଶିଷ ସାହୁ, ଆନନ୍ଦପୁର ଏସଡିପିଓ କମଳ ଲୋଚନ ପଣ୍ଡାଙ୍କ ନେତୃତ୍ବରେ ଏହି ଚଢ଼ାଉ କରାଯାଇଛି। 

କେନ୍ଦୁଝର: ବର ଘରକୁ କନିଆଁ ଆଣିଲା ବରଯାତ୍ରୀ । ପୁଅ ହେଲା ଶ୍ୱଶୁର ଘରକୁ ବିଦା । ବର ନୁହେଁ, ବର ଘରକୁ ରୋଷଣୀରେ ବରଯାତ୍ରୀ ନେଇ ଆସିଲା କନିଆଁ। ଖାଲି ସେତିକି ନୁହେଁ, ପୁଅକୁ ଖଟ-ପଲଙ୍କ ଓ ରୋଷେଇ ସାମଗ୍ରୀ ଯୌତୁକ ଦେଇ ଶାଶୁଘରକୁ ବିଦା କଲେ ବାପା-ମାଆ। କେନ୍ଦୁଝର ଜିଲ୍ଲା ତେଲକୋଇରୁ ଆସିଛି ଏମିତି ଏକ ନିଆରା ବାହାଘରର ଚିତ୍ର। 

ସୂଚନା ଅନୁସାରେ, ବାଂଶପାଳ ବ୍ଲକ୍‌ର ରୟା ଦେହୁରୀଙ୍କ କନ୍ୟା ଲକ୍ଷ୍ମୀଙ୍କ ବିବାହ ତେଲକୋଇ ବ୍ଲକ୍‌ ଛାମୁଣ୍ଡା ଗ୍ରାମର ପଞ୍ଚୁ ପଧାନଙ୍କ ପୁଅ ବସନ୍ତଙ୍କ ସହ ନିର୍ଦ୍ଧାରିତ ହୋଇଥିଲା । ରୟା ଦେହୁରୀଙ୍କ ପୁଅ ନଥିବାରୁ ବିବାହ ପରେ ବସନ୍ତ ଘର ଜ୍ୱାଇଁ ଭାବେ ରହିବେ ବୋଲି ଦୁଇ ପରିବାର ମଧ୍ୟରେ ପୂର୍ବରୁ ସହମତି ହୋଇଥିଲା । ଏହାପରେ ନିର୍ବନ୍ଧ କାର୍ଯ୍ୟ ମଧ୍ୟ ସରିଥିଲା । ତେବେ ବିବାହ ପରେ ପୁଅକୁ କନ୍ୟା ଘରେ ଛାଡି ଆସିବାକୁ ବରଙ୍କ ପିତା ରାଜି ହୋଇନଥିଲେ । ଏହାପରେ ଉଭୟ ପକ୍ଷର ସହମତିରେ ନୂଆ ନିଷ୍ପତ୍ତି ନିଆଯାଇଥିଲା । ନିଷ୍ପତ୍ତି ଅନୁଯାୟୀ, କନ୍ୟା ନିଜେ ବର ଘରକୁ ଯାଇ ବିବାହ କରିବେ ଏବଂ ବିବାହ ପରେ ଦମ୍ପତି କନ୍ୟା ଘରକୁ ଫେରିବେ ।

ଏହି ନିଆରା ବାହାଘରରେ କନ୍ୟା ବାଜା-ବଜାଇ ରୋଶଣୀ କରି ବର ଘରକୁ ପହଞ୍ଚିଥିଲେ । ସବୁଠାରୁ ଆକର୍ଷଣୀୟ ଦୃଶ୍ୟ ଥିଲା ବରଙ୍କୁ ଯୌତୁକ ଦେଇ ବିଦା କରାଯିବା । ଯେପରି କନ୍ୟାଙ୍କୁ ବିଦା କରାଯାଏ, ସେହିପରି ପଲଙ୍କଠାରୁ ଆରମ୍ଭ କରି ରୋଷେଇ ସାମଗ୍ରୀ ପର୍ଯ୍ୟନ୍ତ ସବୁକିଛି ପୁଅକୁ ଦିଆଯାଇ ଶ୍ୱଶୁର ଘରକୁ ବିଦା କରାଯାଇଥିଲା ।

ଘଟଗାଁ: ମୃତ ଭଉଣୀର ଜମା ଟଙ୍କା ପାଇବା ପାଇଁ କଙ୍କାଳକୁ ମଶାଣିରୁ ଖୋଳି ଆଣି ବ୍ୟାଙ୍କ ସମ୍ମୁଖରେ ରଖିବା ଘଟଣାରେ ବିଜେଡିର ଫ୍ୟାକ୍ଟ ଫାଇଣ୍ଡିଂ ଟିମ୍ ଘଟଣାସ୍ଥଳରେ ପହଞ୍ଚି ଜିତୁ ମୁଣ୍ଡାଙ୍କୁ ଭେଟିଛି । ବିଜେଡି ବିଧାୟକ ବଦ୍ରି ପାତ୍ରଙ୍କ ନେତୃତ୍ଵରେ ପୂର୍ବତନ ପାଟଣା ବିଧାୟକ ଜଗନ୍ନାଥ ନାଏକ, ଜିଲ୍ଲା ପରିଷଦ ଅଧ୍ୟକ୍ଷା ସାଗରିକା ସାହୁ, ପୂର୍ବତନ ଆଦିବାସୀ ଉନ୍ନୟନ ଅଧ୍ୟକ୍ଷ ରାମରାୟ ମୁନ୍ଦିୟାଙ୍କ ସହ ଅନ୍ୟମାନେ ପହଞ୍ଚି ଜିତୁଙ୍କ ସହ ଘଟଣା ସମ୍ପର୍କରେ ଆଲୋଚନା କରିଛନ୍ତି।

ଏହି ଘଟଣାରେ ପ୍ରଶାସନର ବଧିର ବ୍ୟବସ୍ଥାକୁ ଦାୟୀ କରିଛି ବିଜେଡି। ବିଜେଡି ଅଭିଯୋଗ ଆଣିଛି ଯେ, ଘଟଣା ଘଟିବାର ଗୋଟିଏ ଦିନ ପରେ ଟଙ୍କା ମିଳିବା ସହ ମୃତ୍ୟୁ ପ୍ରମାଣପତ୍ର ଓ ଲିଗାଲ ହେୟାର ବାହାରିଲା। ହେଲେ ଆଗରୁ କାହିଁକି ବାହାରିଲାନି ବୋଲି ବିଜେଡି ଅଭିଯୋଗ ଆଣିଛି। ତହସିଲ କତ୍ତୃପକ୍ଷ ଓ ପ୍ରଶାସନିକ ବ୍ୟବସ୍ଥାକୁ ଦାୟୀ କରିଛି ବିଜେଡି । ଏଥିସହ ବିଧାୟକ ବଦ୍ରି ନରାୟଣ ପାତ୍ର ଘଟଣାର ଜୁଡିସିଆଲ ତଦନ୍ତ ଦାବି କରିଛନ୍ତି। ବ୍ୟାଙ୍କରୁ ପୁଲିସ ପୁଣି ଜିତୁଙ୍କୁ ଶବକୁ କାନ୍ଧେଇ କାନ୍ଧେଇ ଚଲାଇ ଚଲାଇ ଆଣିବା ନେଇ ମଧ୍ୟ ବଦ୍ରି ପୁଲିସ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏହାସହ ଘଷିପୁରା ବିଧାୟକ ବଦ୍ରି ନାରାୟଣ ପାତ୍ର ଓ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ ଜିତୁ ମୁଣ୍ଡାଙ୍କୁ ୨୦ ହଜାର ଟଙ୍କା ଆର୍ଥିକ ସହାୟତା ରାଶି ପ୍ରଦାନ କରିଛନ୍ତି । 

କେନ୍ଦୁଝର: ଜମା ଟଙ୍କା ପାଇଁ ମାଟି ଖୋଳି ଭଉଣୀ କଙ୍କାଳ ଭାଇ ବ୍ୟାଙ୍କ୍‌କୁ ନେବା ଘଟଣାରେ ତଦନ୍ତ କରୁଛି RDC । ପ୍ରାଥମିକ ଅନୁସନ୍ଧାନରେ ବ୍ୟାଙ୍କ କର୍ତ୍ତୃପକ୍ଷଙ୍କୁ ଦାୟୀ କଲେ RDC । ଜିତୁ ମୁଣ୍ଡାଙ୍କ ଘରେ ଉତ୍ତରାଞ୍ଚଳ ଆରଡିସି ସଂଗ୍ରାମ କେଶରୀ ମହାପାତ୍ର ପହଞ୍ଚି  ତଦନ୍ତ କରିଛନ୍ତି ।  ଆରଡିସିଙ୍କ ସହିତ କେନ୍ଦୁଝର ଜିଲ୍ଲାପାଳ ବିଶାଲ ସିଂହ, ଉପ-ଜିଲ୍ଲାପାଳ ଉମାଶଙ୍କର ଦଳେଇ ଏବଂ ସ୍ୱତନ୍ତ୍ର ଭୁ-ଅର୍ଜନ ଅଧିକାରୀ ରବୀନ୍ଦ୍ର ପ୍ରଧାନ ଘଟଣା ସମ୍ପର୍କରେ ଜିତୁ ମୁଣ୍ଡାଙ୍କ ସହ ଆଲୋଚନା କରିଛନ୍ତି । 

କେଉଁ ପରିସ୍ଥିତିରେ ଭଉଣୀଙ୍କ ମୃତଦେହ ଖୋଳିବାକୁ ପଡ଼ିଲା ? ବ୍ୟାଙ୍କ କର୍ମଚାରୀ କ’ଣ ଡକ୍ୟୁମେଣ୍ଟ ମାଗିଥିଲେ? ଏସମ୍ପର୍କରେ ଅଧିକ ପଚାରି ବୁଝିଥିଲା ଟିମ୍ । ତେବେ ପ୍ରାଥମିକ ତଦନ୍ତ ପରେ ଗଣମାଧ୍ୟାମକୁ ପ୍ରତିକ୍ରିୟା ଦେଲେ ଆରଡିସି । ପ୍ରାଥମିକସ୍ତରରେ ବ୍ୟାଙ୍କ କର୍ତ୍ତୃପକ୍ଷଙ୍କ ଅବହେଳା ରହିଛି ବୋଲି କହିଛନ୍ତି ଆରଡିସି । ସିସିଟିଭିରୁ ବ୍ୟାଙ୍କ କର୍ତ୍ତୃପକ୍ଷ ତାଙ୍କୁ ଫେରାଇଥିବା ଜଣାପଡ଼ିଛି । ସିସିଟିଭି ଅଡିଓ ଭର୍ସନ ନ ଥିବାରୁ କ'ଣ କଥାବାର୍ତ୍ତା ହୋଇଛି ଜଣାପଡ଼ୁନି । ଏହା ମଧ୍ୟ କହିଛନ୍ତି ଯେ ଜିତୁ ମୁଣ୍ଡା ୧୧ଟା ୨୬ରେ ବ୍ୟାଙ୍କ ଆସିଲେ, ୧୧ଟା ୫୮ରେ ବ୍ୟାଙ୍କ ଛାଡ଼ିଲେ । ସେହି ସମୟ ଭିତରେ ୪ ଥର ସେ ବ୍ୟାଙ୍କ ଭିତରେ କର୍ମଚାରୀଙ୍କୁ ଭେଟିଛନ୍ତି । ଶେଷରେ ବ୍ୟାଙ୍କ ମ୍ୟାନେଜର ତାଙ୍କୁ ଫେରାଇଛନ୍ତି । ଏହାପରେ ସେ କ୍ଷୁବ୍ଧ ହୋଇ ଯାଇ କଙ୍କାଳ ଆଣି ଆସିଛନ୍ତି ବୋଲି ଆରଡିସି କହିଛନ୍ତି ।

ତେବେ କଲରା ଏବଂ ଜିତୁଙ୍କୁ କାହିଁକି ଦିଆଯାଇନଥିଲା ଏଟିଏମ, ପୂର୍ବରୁ ସେମାନେ ବ୍ୟାଙ୍କରେ ଅନେକ ବାର କାରବାର କରିଛନ୍ତି । ବ୍ୟାଙ୍କ କର୍ତ୍ତୃପକ୍ଷ ଏବଂ ପୋଲିସ କାର୍ଯ୍ୟକୁ ନେଇ ଅସନ୍ତୋଷ ବ୍ୟକ୍ତ କଲେ ଆରଡିସି । ସବୁ ଜାଣିଲା ପରେ ଶବକୁ ପୋଲିସ ଗାଡ଼ିରେ ନ ନେବା ମଧ୍ୟ ଭୁଲ ବୋଲି କହିଛନ୍ତି ଆରଡିସି । ଏହି ଘଟଣା ଅତ୍ୟନ୍ତ ସମ୍ବେଦନଶୀଳ ଘଟଣା । ଏହା ଉପରେ କାର୍ଯ୍ୟାନୁଷ୍ଠାନ ଖୁବଶୀଘ୍ର ଗ୍ରହଣ କରାଯିବା ନେଇ ସୂଚନା ଦେଇଛନ୍ତି । 

ତୁରୁମୁଙ୍ଗା: କେତେ କାକୁତିମିନତି ହେଲେ, ପାରୁପର୍ଯ୍ୟନ୍ତ ବୁଝାଇଲେ। କିନ୍ତୁ, ବ୍ୟାଙ୍କ କର୍ତ୍ତୃପକ୍ଷ କିଛି ଶୁଣିଲେନି; ବ୍ୟାଙ୍କ ନିୟମ ଓ ଗାଇଡ୍‌ଲାଇନର ପାଠ ପଢ଼ାଇଲେ। ଭଉଣୀ ବ୍ୟାଙ୍କକୁ ନ ଆସିଲେ, ତାଙ୍କ ଖାତା‌ରେ ଜମା ଥିବା ଟଙ୍କା ଦେଇହେବନି ବୋଲି ରୋକଠୋକ୍‌ ଶୁଣାଇଦେଲେ। ତେଣୁ, ଅନ୍ୟ ଉପାୟ ନ ପାଇ ମାଟି ଖୋଳି ଭଉଣୀର ଗଳିତ ଶବକୁ ବାହାର କରି ସିଧାସିଧା ବ୍ୟାଙ୍କକୁ ଧାଇଁଲେ। ବ୍ୟାଙ୍କ ବାରଣ୍ଡା‌ରେ ଗଳିତ ଶବକୁ ରଖି ମୋ ଭଉଣୀ ଖାତାର ଟଙ୍କା ଦିଅ ବୋଲି କର୍ତ୍ତୃପକ୍ଷଙ୍କୁ ଗୁହାରି କଲେ। କେନ୍ଦୁଝର ଜିଲ୍ଲା ପାଟଣା ବ୍ଲକ୍‌ ମଲ୍ଲୀପଶି ଅଞ୍ଚଳରେ ଆଜି ଏପରି ଏକ ଘଟଣା ରାଜ୍ୟବ୍ୟାପୀ ତୀବ୍ର ଆଲୋଡ଼ନ ସୃଷ୍ଟି କରିଛି। 

ସୂଚନାନୁଯାୟୀ, ଡିଆନାଳି ଗ୍ରାମର ବୃଦ୍ଧ ଜିତୁ ମୁଣ୍ଡା ନିଜର ମୃତ ଭଉଣୀ କାଲାରା ମୁଣ୍ଡାଙ୍କ ଆକାଉଣ୍ଟରେ ଥିବା ୧୯ହଜାର ୩୦୦ଟଙ୍କା ଉଠାଇବାକୁ ମଲ୍ଲୀପଶିସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କକୁ ଯାଇଥିଲେ। କିନ୍ତୁ, ବ୍ୟାଙ୍କ କର୍ତ୍ତୃପକ୍ଷ ତାଙ୍କୁ ଟଙ୍କା ଦେବାକୁ ମନା କରିଦେଇଥିଲେ। ଯାହା ନାମରେ ଟଙ୍କା ଅଛି, ସେ ନିଜେ ଉପସ୍ଥିତ ହେବା ଆବଶ୍ୟକ ବୋଲି କହି ଟଙ୍କା ଦେବାକୁ ମନା କରିଦେଇଥିଲେ। କିଛି ଦିନ ତଳୁ ଭଉଣୀ କାଲାରର ମୃତ୍ୟୁ ଘଟିସାରିଛି ବୋଲି ଜିତୁ କହିଥିଲେ ହେଁ ବ୍ୟାଙ୍କ କର୍ତ୍ତୃପକ୍ଷ କିଛି ଶୁଣିନଥିଲେ। ତାଙ୍କୁ ବିଭିନ୍ନ କାଗଜପତ୍ର ମାଗିଥିଲେ। ତାଙ୍କ ଭଉଣୀ ଜୀବିତ ନାହାନ୍ତି ବୋଲି ପ୍ରମାଣ ଦେଖାଇବାକୁ କହିଥିଲେ। ତେଣୁ, ସବୁଆଡ଼ୁ ନିରାଶ ହେବା ପରେ ଜିତୁ ଆଜି ଦିନ ପ୍ରାୟ ୧ଟାରେ ମଶାଣିକୁ ଯାଇଥିଲେ। ସେଠାରେ ମାଟି ଖୋଳି ଭଉଣୀ କାଲାରାଙ୍କ ଗଳିତ ଶବକୁ ଏକ ବସ୍ତା‌ରେ ପୂରାଇ ପ୍ରାୟ ୪କି.ମି ଖରାରେ ଚାଲିଚାଲି ବ୍ୟାଙ୍କ ସମ୍ମୁଖରେ ପହଞ୍ଚିଥିଲେ। ଏହାକୁ ନେଇ ଘଟଣାସ୍ଥଳରେ ଲୋକଙ୍କ ପ୍ରବଳ ଭିଡ଼ ଜମିବା ସହ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା। ଖବର ପାଇ ପୁଲିସ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲେ। ପରେ ବୁଝାସୁଝା ପରେ ମୃତଦେହକୁ ପୁନର୍ବାର ମଶାଣିରେ ପୋତି ଦିଆଯାଇଥିଲା।

ଏ ସଂପର୍କରେ ବ୍ୟାଙ୍କ ମ୍ୟାନେଜର୍‌ ସୁଶାନ୍ତ ସେଠୀଙ୍କ ପ୍ରତିକ୍ରିୟା ନେବାକୁ ଚେଷ୍ଟା କରାଯାଇଥିଲା ବେଳେ ସେ କୌଣସି ପ୍ରତିକ୍ରିୟା ଦେଇ ନ ଥିଲେ। ଜିତୁ ମୁଣ୍ଡାଙ୍କ ଭାଉଜ ଗୁରୁବାରୀ ମୁଣ୍ଡା କହିଛନ୍ତି ଯେ ବଳଦ ବିକ୍ରି ବାବଦ ଟଙ୍କା କାଲାରାଙ୍କ ନାଁରେ ବ୍ୟାଙ୍କରେ ରଖାଯାଇଥିଲା। ସେହି ଟଙ୍କା ଉଠାଇବା ପାଇଁ ଚେଷ୍ଟା କରୁଥିବା ବେଳେ ବ୍ୟାଙ୍କ କର୍ତ୍ତୃପକ୍ଷ ସହଯୋଗ କରିନଥିଲେ। ତେଣୁ, ଜିତୁ ଏଭଳି ଚରମ ପଦକ୍ଷେପ ନେଇଥିଲେ ବୋଲି ସେ କହିଛନ୍ତି।