ନୂଆଦିଲ୍ଲୀ: ତାମିଲନାଡ଼ୁର ପୂର୍ବତନ ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟାଲିନ୍‌ ଗିରଫ । ଷ୍ଟାଲିନ୍‌ଙ୍କୁ ତାଙ୍କ ବାସଭବନରୁ ଗିରଫ କଲା ପୋଲିସ । ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ଏବଂ ଅଭିନେତ୍ରୀ ତ୍ରିଷାଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେବା ଅଭିଯୋଗରେ ତାମିଲନାଡୁ ବିଧାନସଭାର ବିରୋଧୀ ଦଳ ନେତା ତଥା ଡିଏମକେ (DMK) ଯୁବ ମୋର୍ଚ୍ଚା ସମ୍ପାଦକ ଉଦୟନିଧି ଷ୍ଟାଲିନଙ୍କୁ ପୋଲିସ ପଚରାଉଚରା ପାଇଁ ଉଠାଇ ନେଇଛି। ମଙ୍ଗଳବାର ଦିନ ଚେନ୍ନାଇ ସ୍ଥିତ ନୀଲାଙ୍କରାଇ ବାସଭବନରୁ ତାଙ୍କୁ ପୋଲିସ ହେପାଜତକୁ ନେଇଥିବା ବେଳେ କେଉଁ ସ୍ଥାନକୁ ନିଆଯାଇଛି ସେ ସମ୍ପର୍କରେ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ।

ସୋମବାର ଦିନ ତାଞ୍ଜାଭୁରଠାରେ ଅନୁଷ୍ଠିତ ଏକ ପ୍ରତିବାଦ ସଭାରେ ଉଦୟନିଧିଙ୍କ ମନ୍ତବ୍ୟକୁ ନେଇ ତାମିଲାଗା ଭେଟ୍ରି କାଜାଗମ୍ (TVK) ମହିଳା ଶାଖା ପକ୍ଷରୁ ଅଭିଯୋଗ କରାଯାଇଥିଲା। ଏହି ଅଭିଯୋଗ ଆଧାରରେ ତାଞ୍ଜାଭୁର ପୋଲିସ ସୂଚନା ପ୍ରଯୁକ୍ତିବିଦ୍ୟା ଆଇନ (IT Act) ସମେତ ୬ଟି ଦଫାରେ ତାଙ୍କ ବିରୋଧରେ ମାମଲା ରୁଜୁ କରିଛି। ମାମଲା ରୁଜୁ ହେବା ପରେ ତୁରନ୍ତ ଗିରଫଦାରୀରୁ ବର୍ତ୍ତିବା ପାଇଁ ଡିଏମକେ ପକ୍ଷରୁ ମାଡ୍ରାସ ହାଇକୋର୍ଟରେ ଆବେଦନ କରାଯାଇଛି।

ଡେପୁଟି ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ (DSP) ଆଲାଗେସନ୍‌ଙ୍କ ନେତୃତ୍ୱରେ ଏକ ଟିମ୍ ଏବଂ ଚେନ୍ନାଇ ପୋଲିସ କମିଶନର ଏ. ଅମଲରାଜ ଉଦୟନିଧିଙ୍କ ବାସଭବନରେ ପହଞ୍ଚିଥିଲେ। ଖବର ପାଇ ବରିଷ୍ଠ ଡିଏମକେ ନେତା କେ.ଏନ୍. ନେହେରୁ ଏବଂ ମା. ସୁବ୍ରମଣ୍ୟମଙ୍କ ସମେତ ଦଳର ଆଇନଜୀବୀମାନେ ସେଠାରେ ପହଞ୍ଚି ପୋଲିସ ଅଧିକାରୀଙ୍କ ସହ ଆଲୋଚନା କରିଥିଲେ। ପୋଲିସ କାର୍ଯ୍ୟାନୁଷ୍ଠାନକୁ ବିରୋଧ କରି ଉଦୟନିଧିଙ୍କ ଘର ବାହାରେ ବହୁ ସଂଖ୍ୟାରେ ଡିଏମକେ କର୍ମୀ ଏକତ୍ରିତ ହୋଇ ସ୍ଲୋଗାନ ଦେଇଥିଲେ। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଉକ୍ତ ଅଞ୍ଚଳରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି।

ସୋମବାର ତାଞ୍ଜାଭୁରରେ ଡିଏମକେ ପକ୍ଷରୁ କାବେରୀ ଜଳ ବିବାଦ, ମେକେଦାଟୁ ଜଳଭଣ୍ଡାର ଏବଂ କୃଷି ଋଣ ଛାଡ଼ ଦାବିରେ ଟିଭିକେ (TVK) ସରକାରଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏହି ସମାବେଶରେ ଉଦ୍‌ବୋଧନ ଦେବା ବେଳେ ଭିଡ଼ ମଧ୍ୟରୁ ଜଣେ ମହିଳା ଅଭିନେତ୍ରୀଙ୍କ ନାମ ଧରି ସ୍ଲୋଗାନ ଦିଆଯିବା ପରେ ଉଦୟନିଧି ମୁଖ୍ୟମନ୍ତ୍ରୀ ବିଜୟ ଏବଂ ଅଭିନେତ୍ରୀ ତ୍ରିଷାଙ୍କୁ ଟାର୍ଗେଟ କରି ଆପତ୍ତିଜନକ ମନ୍ତବ୍ୟ ଦେଇଥିବା ଅଭିଯୋଗ ହୋଇଛି।

ଏହି ମନ୍ତବ୍ୟକୁ ଟିଭିକେ ପକ୍ଷରୁ ତୀବ୍ର ନିନ୍ଦା କରାଯିବା ସହ ଏହା ଅତ୍ୟନ୍ତ ଅପମାନଜନକ ବୋଲି କୁହାଯାଇଛି। ଟିଭିକେର ଜାତୀୟ ମୁଖପାତ୍ର ପାଝା ସେଲଭାକୁମାର ଏ ନେଇ ଜାତୀୟ ମହିଳା ଆୟୋଗ (NCW)ଙ୍କ ନିକଟରେ ଅଭିଯୋଗ କରିଛନ୍ତି। ଉଦୟନିଧିଙ୍କ ଭାଷଣ ମହିଳାଙ୍କ ପ୍ରତି ଅପମାନଜନକ ଏବଂ ଯୌନ ଉଦ୍ଦେଶ୍ୟମୂଳକ ଥିବା ଦର୍ଶାଇ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ତାଙ୍କୁ ସର୍ବସାଧାରଣରେ ନିଃସର୍ତ୍ତ କ୍ଷମା ପ୍ରାର୍ଥନା କରିବାକୁ ଦାବି କରାଯାଇଛି।

ନୂଆଦିଲ୍ଲୀ: ବିହାର ରାଜନୀତିରେ ବଡ଼ ହଲଚଲ । ବାଙ୍କିପୁର ବିଧାନସଭା ଉପନିର୍ବାଚନରେ ଜନ ସୁରାଜ ପାର୍ଟିର ପ୍ରତିଷ୍ଠାତା ପ୍ରଶାନ୍ତ କିଶୋର ଐତିହାସିକ ବିଜୟ ହାସଲ କରିଛନ୍ତି। ଏହି ବିଜୟ ପରେ ବିଭିନ୍ନ ରାଜନୈତିକ ଦଳର ନେତାମାନେ ନିଜର ପ୍ରତିକ୍ରିୟା ବ୍ୟକ୍ତ କରିଛନ୍ତି। ବିହାର ମନ୍ତ୍ରୀ ରାମକୃପାଳ ଯାଦବ ଏହି ନିର୍ବାଚନ ଫଳାଫଳକୁ ଏକ 'ମାଷ୍ଟରଷ୍ଟ୍ରୋକ୍' ବୋଲି ବର୍ଣ୍ଣନା କରିଛନ୍ତି।

ରାମକୃପାଳ ଯାଦବ କିଶୋରଙ୍କ ନିର୍ବାଚନ ପ୍ରଚାର ରଣନୀତିକୁ ପ୍ରଶଂସା କରିବା ସହ ନିଜର ପ୍ରତିଶ୍ରୁତି ପୂରଣ କରିବାକୁ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ, "ପ୍ରଶାନ୍ତ କିଶୋର ପ୍ରକୃତରେ ଏକ ମାଷ୍ଟରଷ୍ଟ୍ରୋକ୍ ଖେଳିଛନ୍ତି ଏବଂ ବାଙ୍କିପୁରବାସୀଙ୍କ ମନରେ ବଡ଼ ଆଶା ସୃଷ୍ଟି କରିଛନ୍ତି।" ତେବେ ସେ କିଶୋରଙ୍କ ବୟାନ ବଦଳୁଥିବା ନେଇ ସମାଲୋଚନା କରି କହିଛନ୍ତି ଯେ ପ୍ରଥମେ ସେ ବାଙ୍କିପୁରକୁ ବେଙ୍ଗାଲୁରୁ ଭଳି ବିକାଶ କରିବେ ବୋଲି କହିଥିବାବେଳେ ଏବେ ସେଥିରୁ ଓହରି ଯାଉଛନ୍ତି।

ଅନ୍ୟପକ୍ଷରେ ସମାଜବାଦୀ ପାର୍ଟି ସାଂସଦ ଅବଧେଶ ପ୍ରସାଦ ଏହି ଫଳାଫଳକୁ ବିଜେପି ପତନର ସଙ୍କେତ ବୋଲି କହିଛନ୍ତି। ଅଯୋଧ୍ୟା ନିର୍ବାଚନ ଫଳାଫଳରୁ ବିଜେପିର ପତନ ଆରମ୍ଭ ହୋଇଛି ଏବଂ ୨୦୨୭ ମସିହାରେ ଉତ୍ତରପ୍ରଦେଶରେ ଅଖିଳେଶ ଯାଦବଙ୍କ ନେତୃତ୍ୱରେ ସରକାର ଗଠନ ହେବ ବୋଲି ସେ ଦାବି କରିଛନ୍ତି। ସେହିପରି ଜେଡିୟୁ (JD(U)) ରାଷ୍ଟ୍ରୀୟ ସାଧାରଣ ସମ୍ପାଦକ ଶ୍ୟାମ ରଜକ ପରାଜୟର ଏକ ବିସ୍ତୃତ ସମୀକ୍ଷା କରିବା ଉପରେ ଗୁରୁତ୍ୱାରୋପ କରିଛନ୍ତି। ତୃଣମୂଳ ସ୍ତରରେ କର୍ମୀଙ୍କ ସହ ଆଲୋଚନା କରି ତ୍ରୁଟି ସୁଧାରିବାକୁ ସେ ମତ ଦେଇଛନ୍ତି।

ବାଙ୍କିପୁର ଉପନିର୍ବାଚନର ୩୧ ରାଉଣ୍ଡ ଗଣତି ପରେ ପ୍ରଶାନ୍ତ କିଶୋର ୬୩,୨୦୩ ଖଣ୍ଡ ଭୋଟ୍ ପାଇଥିଲେ। ସେ ବିଜେପି ପ୍ରାର୍ଥୀ ନୀରଜ କୁମାର ସିହ୍ନାଙ୍କୁ ୧୮,୯୫୩ ଭୋଟ୍ ବ୍ୟବଧାନରେ ପରାସ୍ତ କରିଛନ୍ତି। ନୀରଜଙ୍କୁ ମୋଟ ୪୪,୨୫୦ ଭୋଟ୍ ମିଳିଥିବା ବେଳେ ଆରଜେଡି ପ୍ରାର୍ଥୀ ରେଖା ଗୁପ୍ତା ୧୪,୦୮୫ ଭୋଟ୍ ସହ ତୃତୀୟ ସ୍ଥାନରେ ରହିଛନ୍ତି। ଏହି ବିଜୟ ବିହାର ରାଜନୀତିରେ ଜନ ସୁରାଜ ପାର୍ଟିର ସ୍ଥିତିକୁ ମଜବୁତ କରିବା ସହ ପ୍ରଶାନ୍ତ କିଶୋରଙ୍କ ରାଜନୈତିକ ଅଭିଳାଷକୁ ଏକ ବଡ଼ ସଫଳତା ପ୍ରଦାନ କରିଛି।

ରାଜ୍ୟ ରାଜନୀତିରେ ଏକ ଅପୂରଣୀୟ କ୍ଷତି ଘଟିଛି। ବିଜୁ ଜନତା ଦଳ (ବିଜେଡି)ର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ସୁଶାନ୍ତ ସିଂହଙ୍କର ଆଜି ୫୩ ବର୍ଷ ବୟସରେ ପରଲୋକ ଘଟିଛି। ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କ ଦେହାନ୍ତ ଖବର ପ୍ରକାଶ ପାଇବା ପରେ ସମଗ୍ର ରାଜ୍ୟ ତଥା ବିଶେଷକରି ପଶ୍ଚିମ ଓଡ଼ିଶାରେ ଶୋକର ଛାୟା ଖେଳିଯାଇଛି। ବିଜେଡି ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛନ୍ତି।

ଶୋକ ପ୍ରକାଶ କଲେ ନବୀନ ପଟ୍ଟନାୟକ ଓ ମୁଖ୍ୟମନ୍ତ୍ରୀ ମାଝୀ

ଦଳର ଜଣେ ଦକ୍ଷ ସଂଗଠକ ତଥା ଟାଣୁଆ ନେତାଙ୍କୁ ହରାଇ ବିଜେଡି ସଭାପତି ନବୀନ ପଟ୍ଟନାୟକ ଗଭୀର ଦୁଃଖ ପ୍ରକାଶ କରିଛନ୍ତି। ନିଜ ଶୋକବାର୍ତ୍ତାରେ ସେ କହିଛନ୍ତି ଯେ, ସୁଶାନ୍ତ ସିଂହ ଜଣେ ଲୋକପ୍ରିୟ ଜନନେତା ଥିଲେ ଏବଂ ଦଳକୁ ସୁଦୃଢ଼ କରିବାରେ ତଥା ଲୋକଙ୍କ ସେବାରେ ତାଙ୍କର ଅବଦାନ ସର୍ବଦା ସ୍ମରଣୀୟ ହୋଇ ରହିବ। ତାଙ୍କର ବିୟୋଗ ଦଳ ପାଇଁ ଏକ ବିରାଟ କ୍ଷତି ବୋଲି ସେ ଦର୍ଶାଇଛନ୍ତି ଏବଂ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି। ସେହିପରି ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ପୂର୍ବତନ ମନ୍ତ୍ରୀଙ୍କ ଦେହାନ୍ତରେ ଗଭୀର ଶୋକବ୍ୟକ୍ତ କରିବା ସହ ଅମର ଆତ୍ମାର ସଦଗତି ପାଇଁ ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ପ୍ରାର୍ଥନା କରିଛନ୍ତି। ଏହା ସହିତ ଉଭୟ ଶାସକ ଓ ବିରୋଧୀ ଦଳର ବହୁ ମନ୍ତ୍ରୀ ଓ ବିଧାୟକ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।

ପୂର୍ବତନ ମନ୍ତ୍ରୀ ତଥା ବିଜୁ ଜନତା ଦଳର ବରିଷ୍ଠ ସଦସ୍ୟ ସୁଶାନ୍ତ ସିଂହଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ତାଙ୍କ ବିୟୋଗରେ ଦଳ ଜଣେ ଦକ୍ଷ ସଙ୍ଗଠକ ତଥା ଲୋକପ୍ରିୟ ନେତାଙ୍କୁ ହରାଇଲା। ବିଜୁ ଜନତା ଦଳକୁ ମଜଭୁତ କରିବା ସହ ଲୋକଙ୍କ ସେବାରେ ତାଙ୍କର କାର୍ଯ୍ୟ ସର୍ବଦା ସ୍ମରଣୀୟ ରହିବ। ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଏପରି…

— Naveen Patnaik (@Naveen_Odisha) July 27, 2026

ବରିଷ୍ଠ ରାଜନେତା ତଥା ଓଡ଼ିଶା ସରକାରରେ ପୂର୍ବତନ ମନ୍ତ୍ରୀ ସୁଶାନ୍ତ ସିଂଙ୍କ ଦେହାନ୍ତ ବିଷୟରେ ଜାଣି ମୁଁ ଅତ୍ୟନ୍ତ ଦୁଃଖିତ।

ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ଅମର ଆତ୍ମାର ସଦଗତି ନିମନ୍ତେ ପ୍ରାର୍ଥନା କରିବା ସହ ପରିବାରବର୍ଗଙ୍କୁ ସମବେଦନା ଜଣାଉଛି । ଓଁ ଶାନ୍ତି।🙏 pic.twitter.com/PDjAVLbPDK

— Mohan Charan Majhi (@MohanMOdisha) July 27, 2026

ରାଜନୈତିକ ଜୀବନ ଓ ସଫଳତା

ପଶ୍ଚିମ ଓଡ଼ିଶାର ଜଣେ ପ୍ରଭାବଶାଳୀ ନେତା ଭାବେ ପରିଚିତ ଥିଲେ ସୁଶାନ୍ତ ସିଂହ। ସେ ବରଗଡ଼ ଜିଲ୍ଲା ଭଟଲି ନିର୍ବାଚନମଣ୍ଡଳୀରୁ ବିଜେଡି ଟିକେଟରେ ୨୦୦୯, ୨୦୧୪ ଏବଂ ୨୦୧୯ରେ କ୍ରମାଗତ ତିନିଥର ବିଧାୟକ ଭାବେ ନିର୍ବାଚିତ ହୋଇଥିଲେ। ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ସରକାରରେ ସେ ଶ୍ରମ ଓ କର୍ମଚାରୀ ରାଜ୍ୟ ବୀମା (ଇଏସଆଇ) ବିଭାଗର ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଏବଂ ପରେ ଗ୍ରାମ୍ୟ ଉନ୍ନୟନ ବିଭାଗର ମନ୍ତ୍ରୀ ଭାବେ ସୁଚାରୁରୂପେ ନିଜର ଦାୟିତ୍ୱ ତୁଲାଇଥିଲେ। ତେବେ ୨୦୨୪ ସାଧାରଣ ନିର୍ବାଚନରେ ସେ ବିଜେପି ପ୍ରାର୍ଥୀ ଇରାସିସ ଆଚାର୍ଯ୍ୟଙ୍କ ଠାରୁ ପରାସ୍ତ ହୋଇଥିଲେ।

ଦୀର୍ଘ ଦିନର ଅସୁସ୍ଥତା ପରେ ଦେହାନ୍ତ

ମିଳିଥିବା ସୂଚନା ଅନୁଯାୟୀ, ଗତ କିଛି ମାସ ଧରି ସୁଶାନ୍ତ ସିଂହ ଗୁରୁତର ଅସୁସ୍ଥ ଥିଲେ। ୨୦୨୫ ମସିହା ଆରମ୍ଭରୁ ତାଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ି ଯିବାରୁ ତାଙ୍କୁ ଭୁବନେଶ୍ୱରର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ଦୀର୍ଘ ଦିନ ଧରି ତାଙ୍କର ଚିକିତ୍ସା ଜାରି ରହିଥିଲା। ମାତ୍ର ସୋମବାର ଦିନ ସମସ୍ତ ଚେଷ୍ଟା ସତ୍ତ୍ୱେ ତାଙ୍କର ଦେହାନ୍ତ ହୋଇଯାଇଛି। ତାଙ୍କର ଅକାଳ ବିୟୋଗରେ ସ୍ଥାନୀୟ ଅଞ୍ଚଳ ତଥା ରାଜ୍ୟର ରାଜନୈତିକ ମହଲରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି।

ଓଡ଼ିଶାର ବରିଷ୍ଠ ରାଜନୀତିଜ୍ଞ ତଥା ପୂର୍ବତନ ମନ୍ତ୍ରୀ ସୁଶାନ୍ତ ସିଂହଙ୍କର ଆଜି ପରଲୋକ ହୋଇଛି । ଭୁବନେଶ୍ୱରସ୍ଥିତ ଆପୋଲୋ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ଦେହାନ୍ତ ହୋଇଥିବା ସୂଚନା ମିଳିଛି । ସେ ଦୀର୍ଘ ଦିନ ଧରି ଗୁରୁତର ଅସୁସ୍ଥତାରେ ପୀଡ଼ିତ ଥିଲେ । କିଛିଦିନ ପୂର୍ବରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା, କିନ୍ତୁ ଡାକ୍ତରଙ୍କ ସମସ୍ତ ପ୍ରୟାସ ସତ୍ତ୍ୱେ ତାଙ୍କୁ ବଞ୍ଚାଇବା ସମ୍ଭବ ହୋଇପାରିନଥିଲା । ମୃତ୍ୟୁ ବେଳକୁ ତାଙ୍କୁ ମାତ୍ର ୫୩ ବର୍ଷ ବୟସ ହୋଇଥିଲା ।

ରାଜନୈତିକ ଜୀବନ ଓ ସଫଳତା

ସୁଶାନ୍ତ ସିଂହ ପଶ୍ଚିମ ଓଡ଼ିଶାର ଜଣେ ଟାଣୁଆ ନେତା ଭାବେ ପରିଚିତ ଥିଲେ । ସେ ବିଜୁ ଜନତା ଦଳ ଟିକେଟରେ ଭଟଲି ବିଧାନସଭା ନିର୍ବାଚନ ମଣ୍ଡଳୀରୁ କ୍ରମାଗତ ଭାବେ ତିନିଥର ତଥା ୨୦୦୯, ୨୦୧୪ ଏବଂ ୨୦୧୯ ମସିହାରେ ବିଧାୟକ ଭାବେ ନିର୍ବାଚିତ ହୋଇଥିଲେ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱାଧୀନ ସରକାରରେ ସେ ଶ୍ରମ ଓ ଗ୍ରାମ୍ୟ ଉନ୍ନୟନ ବିଭାଗର ମନ୍ତ୍ରୀ ଭାବେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥିଲେ । ତେବେ ଗତ ୨୦୨୪ ବିଧାନସଭା ନିର୍ବାଚନରେ ବିଜେପି ପ୍ରାର୍ଥୀ ଇରାଶିଷ ଆଚାର୍ଯ୍ୟଙ୍କ ଠାରୁ ସେ ପରାଜୟର ସମ୍ମୁଖୀନ ହୋଇଥିଲେ ।

ମୁଖ୍ୟମନ୍ତ୍ରୀ ଓ ନେତାଙ୍କ ଶୋକ

ତାଙ୍କ ଦେହାନ୍ତ ଖବର ଆସିବା ପରେ ରାଜ୍ୟ ରାଜନୈତିକ ମହଲରେ ଶୋକର ଛାୟା ଖେଳିଯାଇଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗଭୀର ଶୋକ ପ୍ରକାଶ କରିବା ସହ ଅମର ଆତ୍ମାର ସଦଗତି କାମନା କରିଛନ୍ତି । ସେହିପରି ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ଶୋକବାର୍ତ୍ତା ଜଣାଇ କହିଛନ୍ତି ଯେ, ସୁଶାନ୍ତ ସିଂହଙ୍କ ବିୟୋଗରେ ଦଳ ଜଣେ ଦକ୍ଷ ସଙ୍ଗଠକ ଏବଂ ଲୋକପ୍ରିୟ ନେତାଙ୍କୁ ହରାଇଲା ।

ମହାରାଷ୍ଟ୍ର: ମହାରାଷ୍ଟ୍ର ରାଜନୀତିରେ ପୁଣି ଏକ ବଡ଼ ଧରଣର ଉଲଟପାଲଟ ଦେଖିବାକୁ ମିଳିଛି। ଆଗାମୀ ନିର୍ବାଚନ ପୂର୍ବରୁ ବିରୋଧୀ ଦଳକୁ ଏକ ଶକ୍ତ ଝଟକା ଦେଇ, ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (ୟୁବିଟି)ର ୬ ଜଣ ସାଂସଦ ସୋମବାର ଦିନ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ଶିବସେନାରେ ସାମିଲ ହୋଇଛନ୍ତି। ଅନେକ ଦିନ ଧରି ଲାଗି ରହିଥିବା କଳ୍ପନାଜଳ୍ପନାର ଅନ୍ତ ଘଟାଇ ଏହି ସାଂସଦମାନେ ଦଳ ପରିବର୍ତ୍ତନ କରିଛନ୍ତି, ଯାହା ସିନ୍ଦେଙ୍କ ପ୍ରଭାବକୁ ଆହୁରି ମଜବୁତ କରିଛି।

ଗତ ଜୁନ ୧୭ ତାରିଖରେ ଦିଲ୍ଲୀରେ ଅନୁଷ୍ଠିତ ଶିବସେନା (ୟୁବିଟି) ସଂସଦୀୟ ଦଳର ବୈଠକରେ ଯୋଗ ଦେଇନଥିବା ଏହି ୬ ସାଂସଦ ହେଲେ ସଞ୍ଜୟ ଦୀନା ପାଟିଲ, ସଞ୍ଜୟ ଦେଶମୁଖ, ସଞ୍ଜୟ ଯାଦବ, ଭାଉସାହେବ ୱାକଚୌରେ, ନାଗେଶ ପାଟିଲ-ଅଷ୍ଟିକର ଏବଂ ଓମପ୍ରକାଶ ରାଜେ ନିମ୍ବାଲକର। ଶିବସେନା (ୟୁବିଟି)ର ମୋଟ ୯ ଜଣ ଲୋକସଭା ସାଂସଦ ଥିବା ବେଳେ, ଦଳ ବଦଳାଇବା ପାଇଁ ଆବଶ୍ୟକ ଦୁଇ-ତୃତୀୟାଂଶ ସଂଖ୍ୟା (୬ ଜଣ) ପୂରଣ କରିବାରେ ବିଦ୍ରୋହୀ ଗୋଷ୍ଠୀ ସଫଳ ହୋଇଛନ୍ତି।

ଏହି ୬ ସାଂସଦଙ୍କୁ ନିଜ ଦଳରେ ସ୍ୱାଗତ କରିବା ଅବସରରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି ଏକନାଥ ସିନ୍ଦେ କହିଛନ୍ତି ଯେ, ଏହି ସାଂସଦମାନେ ପ୍ରତିଷ୍ଠାତା ବାଲାସାହେବ ଠାକରେଙ୍କ ଆଦର୍ଶରେ ଅନୁପ୍ରାଣିତ ହୋଇ ପ୍ରକୃତ ଶିବସେନାରେ ସାମିଲ ହୋଇଛନ୍ତି। ସେ କହିଛନ୍ତି, "ଆଜି ମୋ ସାମ୍ନାରେ ଗୋଟିଏ ନୁହେଁ, ବରଂ ୬ଟି ବାଘ ଉପସ୍ଥିତ ଅଛନ୍ତି। ଏଥର ଆମେ ଛକ୍କା ମାରିଛୁ।" ୨୦୨୨ ମସିହାର ବିଦ୍ରୋହକୁ ମନେ ପକାଇ ସେ ଏହି ଘଟଣାକୁ ଦ୍ୱିତୀୟ ବିଦ୍ରୋହ ବୋଲି ଅଭିହିତ କରିଛନ୍ତି। ନୂତନ ଭାବେ ସାମିଲ ହୋଇଥିବା ସାଂସଦମାନଙ୍କ ନିର୍ବାଚନମଣ୍ଡଳୀର ବିକାଶମୂଳକ ଆବଶ୍ୟକତା ପୂରଣ କରାଯିବ ବୋଲି ସିନ୍ଦେ ପ୍ରତିଶ୍ରୁତି ଦେଇଛନ୍ତି।

ଲୋକସଭାର ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ୫୬ତମ ଜନ୍ମଦିନ ଅବସରରେ ଏକ ନିଆରା ଚିତ୍ର ସାମ୍ନାକୁ ଆସିଛି। ଜୁନ୍ ୧୯ ତାରିଖରେ ବାରାଣସୀର ଗଙ୍ଗା ଘାଟରେ ଯୁବ କଂଗ୍ରେସ କର୍ମୀମାନେ ଏହି ଜନ୍ମଦିନକୁ ଖାସ୍ ଅନ୍ଦାଜରେ ପାଳନ କରିଛନ୍ତି। ଏହି ଅବସରରେ ଏକ ପୋଷ୍ଟର ସାମ୍ନାକୁ ଆସିଛି, ଯାହା ଏବେ ରାଜନୈତିକ ମହଲରେ ବେଶ୍ ଚର୍ଚ୍ଚାର ବିଷୟ ପାଲଟିଛି।

ଭଗବାନ ପର୍ଶୁରାମଙ୍କ ଅବତାରରେ ରାହୁଲ ଗାନ୍ଧୀ

ଯୁବ କଂଗ୍ରେସ ଦ୍ୱାରା ଜାରି କରାଯାଇଥିବା ଏହି ପୋଷ୍ଟରରେ ରାହୁଲ ଗାନ୍ଧୀଙ୍କୁ ଭଗବାନ ପର୍ଶୁରାମଙ୍କ ଅବତାରରେ ଦର୍ଶାଯାଇଛି। ପୋଷ୍ଟରରେ ତାଙ୍କର ଗୋଟିଏ ହାତରେ ଭଗବାନ ପର୍ଶୁରାମଙ୍କ ଅସ୍ତ୍ର ଫାର୍ସା ଥିବା ବେଳେ ଅନ୍ୟ ହାତରେ ଭାରତର ସମ୍ବିଧାନର ଏକ କପି ରହିଥିବା ଦେଖିବାକୁ ମିଳିଛି। ନିକଟରେ ଶେଷ ହୋଇଥିବା ନିର୍ବାଚନରେ 'ସମ୍ବିଧାନ ବଞ୍ଚାଅ' ପ୍ରସଙ୍ଗକୁ କଂଗ୍ରେସ ନିଜର ପ୍ରମୁଖ ମୁଦ୍ଦା କରିଥିବା ବେଳେ, ଏବେ ପର୍ଶୁରାମଙ୍କ ଫାର୍ସା ସହ ସମ୍ବିଧାନକୁ ଯୋଡ଼ି ଏକ ନୂଆ ବାର୍ତ୍ତା ଦେବାକୁ ଦଳ ପ୍ରୟାସ କରିଛି।

ପୋଷ୍ଟର ପଛରେ ରହିଛି ବଡ଼ ରାଜନୈତିକ ସନ୍ଦେଶ

ରାଜନୈତିକ ସମୀକ୍ଷକଙ୍କ ମତରେ ଏହି ପୋଷ୍ଟର ପଛରେ ଏକ ବଡ଼ ଏବଂ ସ୍ପଷ୍ଟ ରାଜନୈତିକ ବାର୍ତ୍ତା ରହିଛି। ଆଗାମୀ ବିଧାନସଭା ନିର୍ବାଚନ ଏବଂ ବିଶେଷକରି ଉତ୍ତରପ୍ରଦେଶ ରାଜନୀତିକୁ ଦୃଷ୍ଟିରେ ରଖି କଂଗ୍ରେସ ନିଜର ସାମାଜିକ ସମୀକରଣକୁ ସୁଦୃଢ଼ କରିବାକୁ ଚାହୁଁଛି। ସମ୍ବିଧାନ ପ୍ରସଙ୍ଗ ଜରିଆରେ ଦଳ ନିଜ ସହିତ ଦଳିତ ଓ ପଛୁଆ ବର୍ଗଙ୍କୁ ଯୋଡ଼ିବାରେ ସଫଳ ହୋଇଛି। ଏବେ ଭଗବାନ ପର୍ଶୁରାମଙ୍କ ଅବତାର ଜରିଆରେ ଦଳ ବ୍ରାହ୍ମଣ ଏବଂ ସବର୍ଣ୍ଣ ଭୋଟରଙ୍କୁ ନିଜ ଆଡ଼କୁ ଆକୃଷ୍ଟ କରିବାର ମାଷ୍ଟରଷ୍ଟ୍ରୋକ୍ ଖେଳିଛି।

ମହାରାଷ୍ଟ୍ର ରାଜନୀତିରେ ପୁଣିଥରେ ଏକ ବଡ଼ ଧରଣର ଭୂକମ୍ପ ଆସିବାର ସମ୍ଭାବନା ଦେଖାଦେଇଛି। 'ଅପରେସନ୍ ଟାଇଗର୍' କୁ ନେଇ ଚର୍ଚ୍ଚା ଜୋର ଧରିଥିବା ବେଳେ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (ୟୁବିଟି)ରେ ବିଦ୍ରୋହର ଆଶଙ୍କା ସୃଷ୍ଟି ହୋଇଛି। ଦଳର କିଛି ସାଂସଦ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସମ୍ପର୍କରେ ଥିବା ନେଇ ଖବର ପ୍ରକାଶ ପାଇବା ପରେ ଦଳ ଭିତରେ ହଟଚମଟ ସୃଷ୍ଟି ହୋଇଛି। ଏହି ପରିସ୍ଥିତିକୁ ନିୟନ୍ତ୍ରଣ କରିବା ଏବଂ ଦଳକୁ 'ଡ୍ୟାମେଜ୍ କଣ୍ଟ୍ରୋଲ୍' କରିବା ପାଇଁ ଶିବସେନା (ୟୁବିଟି) ନେତା ସଞ୍ଜୟ ରାଉତ ତୁରନ୍ତ ଦିଲ୍ଲୀ ଗସ୍ତ କରି ସେଠାରେ ଡେରା ପକାଇଛନ୍ତି।

ସାଂସଦଙ୍କ ଅନୁପସ୍ଥିତି ଓ ନୂଆ ଗୋଷ୍ଠୀ ଗଠନର ଚର୍ଚ୍ଚା

ଗତ ରବିବାର ଦିନ ମାତୋଶ୍ରୀଠାରେ ଉଦ୍ଧବ ଠାକରେ ଦଳୀୟ ସାଂସଦମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଡାକିଥିଲେ। କିନ୍ତୁ ଆଶ୍ଚର୍ଯ୍ୟଜନକ ଭାବେ ଦଳର ୯ ଜଣ ସାଂସଦଙ୍କ ମଧ୍ୟରୁ କେବଳ ୪ ଜଣ ବୈଠକରେ ଶାରୀରିକ ଭାବେ ଉପସ୍ଥିତ ଥିଲେ। ଅବଶିଷ୍ଟ ୫ ଜଣ ସାଂସଦ ଅନଲାଇନ୍ ମାଧ୍ୟମରେ ଯୋଡ଼ି ହୋଇଥିବା ଦଳ ପକ୍ଷରୁ କୁହାଯାଇଥିଲେ ମଧ୍ୟ ଏହାକୁ ନେଇ ଅନେକ ରାଜନୈତିକ କଳ୍ପନାଜଳ୍ପନା ଆରମ୍ଭ ହୋଇଛି। ସୂତ୍ର ଅନୁଯାୟୀ, କିଛି ଅସନ୍ତୁଷ୍ଟ ସାଂସଦ ନିଜର ଏକ ସ୍ୱତନ୍ତ୍ର ସଂସଦୀୟ ଗୋଷ୍ଠୀ ଗଠନ କରିବାକୁ ବିଚାର କରୁଛନ୍ତି ଏବଂ ସେମାନେ ନିକଟରେ ଶିନ୍ଦେ ଗୋଷ୍ଠୀର କେନ୍ଦ୍ରମନ୍ତ୍ରୀ ପ୍ରତାପରାଓ ଯାଦବଙ୍କୁ ମଧ୍ୟ ଭେଟିଛନ୍ତି।

'ନମ୍ବର ଗେମ୍' ଏବଂ ଶପଥ ପାଠ

ଏହି ସମଗ୍ର ବିବାଦ ମଧ୍ୟରେ ଏବେ ଏକ ନୂଆ 'ନମ୍ବର ଗେମ୍' ଦେଖିବାକୁ ମିଳିଛି। ପୂର୍ବରୁ ସାଂସଦମାନଙ୍କୁ ୧୫ କୋଟି ଟଙ୍କାର ଅଫର୍ ଦିଆଯାଉଥିବା ନେଇ ଅଭିଯୋଗ ହୋଇଥିଲା। ତେବେ ଦଳରେ ବିଭାଜନ ଖବରକୁ ସଞ୍ଜୟ ରାଉତ ସମ୍ପୂର୍ଣ୍ଣ ଖଣ୍ଡନ କରିଛନ୍ତି। ସେ କହିଛନ୍ତି ଯେ ସମସ୍ତ ସାଂସଦ ଉଦ୍ଧବ ଠାକରେଙ୍କ ସହ ଅଛନ୍ତି। ନିକଟରେ ଅନୁଷ୍ଠିତ ବୈଠକରେ ସାଂସଦମାନେ ଦଳ ନଛାଡ଼ିବା ନେଇ ବିଭିନ୍ନ ପ୍ରକାରର ଶପଥ ନେଇଥିବା ସେ ପ୍ରକାଶ କରିଛନ୍ତି। କେହି ତୁଳଜା ଭବାନୀଙ୍କ ନାମରେ ତ କେହି ସାଇବାବା ଏବଂ ନିଜ ପିଲାମାନଙ୍କ ନାମରେ ଶପଥ ନେଇଥିବା ସେ ଗଣମାଧ୍ୟମକୁ ସୂଚନା ଦେଇଛନ୍ତି।

ବିଜେପି ଉପରେ ବର୍ଷିଲେ ସଞ୍ଜୟ ରାଉତ

ବିଦ୍ରୋହୀ ଗୋଷ୍ଠୀକୁ ନେଇ ଚାଲିଥିବା ରାଜନୈତିକ ଷଡ଼ଯନ୍ତ୍ର ପଛରେ ବିଜେପିର ହାତ ଥିବା ନେଇ ସଞ୍ଜୟ ରାଉତ ସିଧାସଳଖ ଆକ୍ରମଣ କରିଛନ୍ତି। ଏହାସହ "ଯାହାର ଯିବାର ଅଛି, ସେ ଯାଇପାରେ" ବୋଲି ଉଦ୍ଧବ ଠାକରେ ବୈଠକରେ କହିଥିବା ଖବରକୁ ସେ ଗୁଜବ ବୋଲି ଦର୍ଶାଇଛନ୍ତି ଏବଂ ଏହା ୪ ବର୍ଷ ତଳର କଥା ବୋଲି ସ୍ପଷ୍ଟ କରିଛନ୍ତି। ଦଳର ପ୍ରତିଷ୍ଠା ଦିବସ ପୂର୍ବରୁ ବିରୋଧୀମାନେ ଜାଣିଶୁଣି ଏଭଳି ଅପପ୍ରଚାର କରୁଛନ୍ତି ବୋଲି ସେ ଦାବି କରିଛନ୍ତି। ତେବେ ଲୋକସଭା ନିର୍ବାଚନ ପରେ ମହାରାଷ୍ଟ୍ରରେ ପୁଣି ଥରେ ସାଂସଦମାନଙ୍କର ଏହି ସମ୍ଭାବ୍ୟ 'ଦଳବଦଳ' ରାଜନୈତିକ ମାହୋଲକୁ ସରଗରମ କରିଛି।

ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (ଟିଏମସି) ମଧ୍ୟରେ ଥିବା ଆଭ୍ୟନ୍ତରୀଣ କନ୍ଦଳ ଏବେ ଦାଣ୍ଡରେ ପଡ଼ି ହାଟରେ ଗଡ଼ୁଛି। ଦଳର ବରିଷ୍ଠ ନେତା ତଥା ସାଂସଦ କଲ୍ୟାଣ ବାନାର୍ଜୀ ଏବେ ସିଧାସଳଖ ଦଳର ସାଧାରଣ ସମ୍ପାଦକ ତଥା ମୁଖ୍ୟମନ୍ତ୍ରୀଙ୍କ ପୁତୁରା ଅଭିଷେକ ବାନାର୍ଜୀଙ୍କ ବିରୋଧରେ ଖୋଲା ବିଦ୍ରୋହ ଘୋଷଣା କରିଛନ୍ତି। କେବଳ ସେତିକି ନୁହେଁ, ସେ ଦଳର ସୁପ୍ରିମୋ ମମତା ବାନାର୍ଜୀଙ୍କୁ ଏକ ବଡ଼ ଅଲ୍ଟିମେଟମ୍ ମଧ୍ୟ ଦେଇଛନ୍ତି, ଯାହା ବେଙ୍ଗଲ ରାଜନୀତିରେ ଆଲୋଡ଼ନ ସୃଷ୍ଟି କରିଛି।

ଅଭିଷେକଙ୍କ ଉପରେ ବର୍ଷିଲେ କଲ୍ୟାଣ

ଏକ ଆଇନଗତ ମାମଲାରୁ ନିଜକୁ ଓକିଲ ଭାବେ ହଟାଇ ଦିଆଯିବା ପରେ କଲ୍ୟାଣ ବାନାର୍ଜୀ ଏହାକୁ ନିଜର ସାର୍ବଜନୀନ ଅପମାନ ବୋଲି କହିଛନ୍ତି। ସେ ଅଭିଷେକଙ୍କୁ କଡ଼ା ସମାଲୋଚନା କରି କହିଛନ୍ତି ଯେ, ଅଭିଷେକ ହେଉଛନ୍ତି ଜଣେ 'ଏସି ରୁମ୍'ରେ ରହୁଥିବା ପିଲା। ତାଙ୍କର ଅତ୍ୟଧିକ ଅହଂକାର ଯୋଗୁଁ ଆଜି ଦଳର ଏଭଳି ଦୟନୀୟ ଅବସ୍ଥା ହୋଇଛି। କଲ୍ୟାଣ ଅଭିଯୋଗ କରିଛନ୍ତି ଯେ ଅଭିଷେକ ସମସ୍ତଙ୍କୁ ନିଜର ଦରମାପ୍ରାପ୍ତ କର୍ମଚାରୀ ଭାବୁଛନ୍ତି ଏବଂ ବରିଷ୍ଠ ନେତାମାନଙ୍କୁ ସମ୍ମାନ ଦେବା ଜାଣିନାହାଁନ୍ତି।

ମମତାଙ୍କୁ ସିଧାସଳଖ ଅଲ୍ଟିମେଟମ୍

ଏହି ବିବାଦ ଏବେ ଏତେ ତୀବ୍ର ହୋଇଛି ଯେ କଲ୍ୟାଣ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଏକ ସିଧାସଳଖ ସର୍ତ୍ତ ଦେଇଛନ୍ତି। ସେ ସ୍ପଷ୍ଟ କରିଛନ୍ତି ଯେ, ଏବେ ଦିଦିଙ୍କୁ ଗୋଟିଏ ନିଷ୍ପତ୍ତି ନେବାକୁ ପଡ଼ିବ ଯେ ଦଳରେ କିଏ ରହିବ - ଅଭିଷେକ ନା ସେ ନିଜେ। ଯଦି ଦଳରେ ଅଭିଷେକ ରହନ୍ତି, ତେବେ ସେ ତୃଣମୂଳ କଂଗ୍ରେସ ଛାଡ଼ିଦେବେ ବୋଲି ଖୋଲାଖୋଲି ଚେତାବନୀ ଦେଇଛନ୍ତି।

ବଢ଼ୁଛି ଅସନ୍ତୋଷ, ଦଳରେ ଫାଟ

୨୦୨୬ ବିଧାନସଭା ନିର୍ବାଚନରେ ଟିଏମସିର ନୈରାଶ୍ୟଜନକ ପ୍ରଦର୍ଶନ ପରେ ଦଳ ଭିତରେ ଥିବା ଅସନ୍ତୋଷର ନିଆଁ ଏବେ ବିସ୍ଫୋରକ ରୂପ ନେଉଛି। କେବଳ କଲ୍ୟାଣ ନୁହଁନ୍ତି, ଲୋକସଭାରେ ଟିଏମସିର ସବୁଠାରୁ ବରିଷ୍ଠ ସାଂସଦ ସୌଗତ ରାୟ ମଧ୍ୟ ଦଳର ବର୍ତ୍ତମାନର ସ୍ଥିତିକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି ଯେ ଏବେ ମମତାଙ୍କ ସହ କଥା ହେବା ତ ଦୂରର କଥା, ତାଙ୍କୁ ଭେଟିବା ମଧ୍ୟ କଷ୍ଟକର ହୋଇପଡ଼ିଛି। ଏପରି ସ୍ଥିତିରେ ଦଳ କିପରି ଚାଲିବ ସେ ନେଇ ସେ ପ୍ରଶ୍ନ ଉଠାଇଛନ୍ତି। ସେହିପରି ଦଳର ଅନ୍ୟ କିଛି ନେତା ମଧ୍ୟ ଅଭିଷେକଙ୍କ ମନମୁଖୀ ଶାସନକୁ ଟାର୍ଗେଟ କରି କହିଛନ୍ତି ଯେ ଜଣେ ବ୍ୟକ୍ତି ନିଜର ସ୍ବାର୍ଥ ପାଇଁ ସମ୍ପୂର୍ଣ୍ଣ ଦଳକୁ ଧ୍ୱଂସ କରିଦେଇଛନ୍ତି।

ପଶ୍ଚିମବଙ୍ଗର କ୍ଷମତାସୀନ ଦଳ ତୃଣମୂଳ କଂଗ୍ରେସ (TMC) ବର୍ତ୍ତମାନ ଏକ ବଡ଼ ଧରଣର ଆଭ୍ୟନ୍ତରୀଣ ସଙ୍କଟ ଦେଇ ଗତି କରୁଛି। ଦଳର ବହୁ ବରିଷ୍ଠ ନେତା ଏବେ ବିଦ୍ରୋହ ଘୋଷଣା କରିଛନ୍ତି। ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ବିଦ୍ରୋହୀ ନେତାମାନଙ୍କର ମୁଖ୍ୟ ସମସ୍ୟା ଦଳର ସୁପ୍ରିମୋ ମମତା ବାନାର୍ଜୀ ନୁହଁନ୍ତି, ବରଂ ତାଙ୍କ ପୁତୁରା ତଥା ଦଳର ସାଧାରଣ ସମ୍ପାଦକ ଅଭିଷେକ ବାନାର୍ଜୀ ପାଲଟିଛନ୍ତି। ନେତାମାନେ ଗୋଟିଏ ପରେ ଗୋଟିଏ ଦଳଠାରୁ ଦୂରେଇ ଯାଉଥିବା ବେଳେ ଲଗାତାର ତିନିଥର କ୍ଷମତାରେ ଥିବା ଟିଏମସି ପାଇଁ ଏହା ସବୁଠାରୁ ବଡ଼ ପରିଚୟ ସଙ୍କଟ ସୃଷ୍ଟି କରିଛି।

ଅହଂକାର ଏବଂ ପରିବାରବାଦର ଅଭିଯୋଗ

ବିଦ୍ରୋହୀ ନେତାମାନେ ଖୋଲାଖୋଲି ଭାବେ ଅଭିଷେକ ବାନାର୍ଜୀଙ୍କ ଉପରେ ଦଳର ବର୍ତ୍ତମାନର ଦୟନୀୟ ସ୍ଥିତି ପାଇଁ ଦୋଷ ଲଦିଛନ୍ତି। ସେମାନଙ୍କ ଅଭିଯୋଗ ଅନୁଯାୟୀ, ଅଭିଷେକଙ୍କ 'ଅହଂକାର', 'ପରିବାରବାଦ' ଏବଂ 'ଦୁର୍ନୀତି' ଯୋଗୁଁ ଦଳର ଭାବମୂର୍ତ୍ତି କ୍ଷୁର୍ଣ୍ଣ ହେଉଛି। କେବଳ ସେତିକି ନୁହେଁ, ବରିଷ୍ଠ ନେତାମାନଙ୍କୁ ଅଣଦେଖା କରିବା ସହ ଆଇ-ପ୍ୟାକ୍ (I-PAC) ଭଳି ପେସାଦାର ସଂସ୍ଥା ମାଧ୍ୟମରେ ସେ ଦଳକୁ ନିଜର ବ୍ୟକ୍ତିଗତ ଜାଗିର ଭଳି ଚଳାଉଥିବା ଅଭିଯୋଗ ହୋଇଛି।

କଲ୍ୟାଣ ବାନାର୍ଜୀଙ୍କ ଚେତାବନୀ ଏବଂ ବିଦ୍ରୋହୀ ନେତା

ଏହି ବିଦ୍ରୋହର ନେତୃତ୍ୱ ନେଉଥିବା ବରିଷ୍ଠ ନେତା ତଥା ସାଂସଦ କଲ୍ୟାଣ ବାନାର୍ଜୀ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଏକ ସିଧାସଳଖ ଚେତାବନୀ ଦେଇଛନ୍ତି। ସେ ଅଲ୍ଟିମେଟମ୍ ଦେଇ କହିଛନ୍ତି, "ମୋତେ ବାଛନ୍ତୁ କିମ୍ବା ଅଭିଷେକଙ୍କୁ ବାଛନ୍ତୁ"। ଟିଏମସିରେ ବଢୁଥିବା ଏହି ଫାଟରେ କେବଳ କଲ୍ୟାଣ ନୁହଁନ୍ତି, ବରଂ ସାୟନୀ ଘୋଷ, ଦେବ ଏବଂ ୟୁସୁଫ୍ ପଠାନଙ୍କ ଭଳି ତାରକା ଏବଂ ନେତାମାନଙ୍କ ନାମ ମଧ୍ୟ ସାମ୍ନାକୁ ଆସିଛି, ଯେଉଁମାନେ ବର୍ତ୍ତମାନ ଅସନ୍ତୁଷ୍ଟ ଥିବା ଜଣାପଡିଛି।

ବଢୁଛି ଜନ ଅସନ୍ତୋଷ

କେବଳ ଦଳ ଭିତରେ ନୁହେଁ, ବାହାରେ ମଧ୍ୟ ଅଭିଷେକ ବାନାର୍ଜୀଙ୍କ ବିରୋଧରେ ଅସନ୍ତୋଷ ତୀବ୍ର ହେବାରେ ଲାଗିଛି। ନିକଟରେ ସୋନାରପୁରଠାରେ ତାଙ୍କ ଉପରକୁ ଢେଲା, ଜୋତା ଏବଂ ଅଣ୍ଡା ମାଡ଼ କରାଯାଇଥିବା ଦେଖିବାକୁ ମିଳିଥିଲା, ଯେଉଁ କାରଣରୁ ତାଙ୍କୁ ହେଲମେଟ୍ ପିନ୍ଧିବାକୁ ପଡ଼ିଥିଲା। ୧୫ ବର୍ଷ ଧରି ବଙ୍ଗଳାରେ ଶାସନ କରୁଥିବା ଟିଏମସି ନେତାମାନଙ୍କ ପ୍ରତି ସାଧାରଣ ଲୋକଙ୍କ କ୍ଷୋଭ ଏବେ ଦଳ ପାଇଁ ଏକ ବଡ଼ ଚିନ୍ତାର କାରଣ ପାଲଟିଛି। ଯଦି ଏହି ବିଦ୍ରୋହ ନଥମେ, ତେବେ ଟିଏମସି (TMC) ମହାରାଷ୍ଟ୍ର ଭଳି ଏକ ବଡ଼ ବିଭାଜନର ଶିକାର ହୋଇପାରେ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।

ପଶ୍ଚିମବଙ୍ଗର କ୍ଷମତାସୀନ ତୃଣମୂଳ କଂଗ୍ରେସ (TMC) ମଧ୍ୟରେ ଲାଗି ରହିଥିବା ଆଭ୍ୟନ୍ତରୀଣ ସଙ୍କଟ ଏବେ ଏକ ନୂଆ ମୋଡ଼ ନେଇଛି। ଦଳର ବରିଷ୍ଠ ନେତା ତଥା ସାଂସଦ କଲ୍ୟାଣ ବାନାର୍ଜୀ ଦଳର ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ କାର୍ଯ୍ୟଶୈଳୀକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଏଥିସହ ସେ ଦଳର ସୁପ୍ରିମୋ ମମତା ବାନାର୍ଜୀଙ୍କୁ ଏକ ପ୍ରକାରର ଅଲ୍ଟିମେଟମ୍ (ଚେତାବନୀ) ଦେଇଛନ୍ତି। ବିପୁଳ ସଂଖ୍ୟାରେ ସାଂସଦ ଏବଂ ବିଧାୟକମାନେ ଦଳ ଛାଡ଼ୁଥିବା ବେଳେ କଲ୍ୟାଣଙ୍କ ଏହି ବିବୃତ୍ତି ଦଳର ଅଡ଼ୁଆକୁ ଆହୁରି ବଢ଼ାଇ ଦେଇଛି।

ଅଭିଷେକ ବାନାର୍ଜୀଙ୍କୁ ଖୋଲାଖୋଲି ସମାଲୋଚନା

ଦୀର୍ଘ ଦିନ ଧରି ମମତା ବାନାର୍ଜୀଙ୍କର ଜଣେ ବିଶ୍ୱସ୍ତ ସହଯୋଗୀ ଭାବରେ ପରିଚିତ କଲ୍ୟାଣ ବାନାର୍ଜୀ କହିଛନ୍ତି ଯେ ସେ ମମତାଙ୍କୁ ସମ୍ପୂର୍ଣ୍ଣ ସମର୍ଥନ କରନ୍ତି, କିନ୍ତୁ ତାଙ୍କ ପୁତୁରା ତଥା ଦଳର ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କୁ ନେଇ ତାଙ୍କର ମତ ଭିନ୍ନ। "ମୁଁ ଏବେ ବି ଦିଦିଙ୍କ ସହିତ ଅଛି, କିନ୍ତୁ ଅଭିଷେକ ବାନାର୍ଜୀଙ୍କ ଅହଂକାରକୁ ମୁଁ ଆଦୌ ସହିବି ନାହିଁ," ବୋଲି ସେ ସ୍ପଷ୍ଟ ଭାବରେ କହିଛନ୍ତି। ଏହା ସହିତ ସେ ବାନାର୍ଜୀ ପରିବାର ସହ ଜଡିତ ସମସ୍ତ ଆଇନଗତ ମାମଲାରୁ ନିଜକୁ ଦୂରେଇ ନେଇଥିବା ମଧ୍ୟ ସୂଚନା ଦେଇଛନ୍ତି।

ମମତାଙ୍କ ଉପରେ ନିଷ୍ପତ୍ତି ଛାଡିଲେ କଲ୍ୟାଣ

ଦଳ ମଧ୍ୟରେ ବିଭାଜନର ଆଶଙ୍କାକୁ ଅଧିକ ଘନୀଭୂତ କରି କଲ୍ୟାଣ ବାନାର୍ଜୀ ମମତାଙ୍କ ଉପରେ ଚୂଡ଼ାନ୍ତ ନିଷ୍ପତ୍ତି ଛାଡିଛନ୍ତି। ସେ କହିଛନ୍ତି, "ଦିଦି କ'ଣ କରିବାକୁ ଚାହୁଁଛନ୍ତି ତାହା ତାଙ୍କୁ ହିଁ ସ୍ଥିର କରିବାକୁ ଦିଆଯାଉ। ବର୍ତ୍ତମାନ ପର୍ଯ୍ୟନ୍ତ ମୁଁ ତାଙ୍କ ସହ ଅଛି। କିନ୍ତୁ ଯଦି ଦିଦି ଅଭିଷେକଙ୍କ ସହିତ ଯିବାକୁ ନିଷ୍ପତ୍ତି ନିଅନ୍ତି, ତେବେ ମୁଁ ମୋର ପରବର୍ତ୍ତୀ ରାସ୍ତା ନିଜେ ସ୍ଥିର କରିବି"। କଲ୍ୟାଣଙ୍କ ଏହି କଡ଼ା ଚେତାବନୀ ପରେ ଦଳ ଦୁଇ ଫାଳ ହେବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।

ଦଳ ଭିତରେ ବଢୁଛି ବିଦ୍ରୋହ

ସୂଚନାଯୋଗ୍ୟ ଯେ, ନିକଟରେ ଟିଏମସିର ୮୦ ଜଣ ବିଧାୟକଙ୍କ ମଧ୍ୟରୁ ପ୍ରାୟ ୫୮ ଜଣ ବିଧାୟକ ବିଦ୍ରୋହୀ ଗୋଷ୍ଠୀରେ ସାମିଲ ହୋଇଥିବା ନେଇ ରିପୋର୍ଟ ପ୍ରକାଶ ପାଇଥିଲା। ଏହି ବିଦ୍ରୋହୀ ଗୋଷ୍ଠୀ ମଧ୍ୟ ଅଭିଷେକ ବାନାର୍ଜୀଙ୍କଠାରୁ ନିଜକୁ ଦୂରେଇ ରଖି ମମତାଙ୍କୁ କେବଳ ପରାମର୍ଶଦାତା ଭାବେ କାମ କରିବାକୁ ଅନୁରୋଧ କରିଥିଲେ। ଦଳର ଏଭଳି ଏକ ସଙ୍କଟଜନକ ସ୍ଥିତିରେ କଲ୍ୟାଣ ବାନାର୍ଜୀଙ୍କ ପରି ଜଣେ ପ୍ରଭାବଶାଳୀ ନେତାଙ୍କ ବିଦ୍ରୋହ ଟିଏମସିର ଭବିଷ୍ୟତ ପ୍ରତି ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।

ପଶ୍ଚିମବଙ୍ଗ: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ (ଟିଏମସି)ରେ ଇସ୍ତଫା ପର୍ବ ଅବ୍ୟାହତ ରହିଛି। ବରିଷ୍ଠ ନେତ୍ରୀ ସୁସ୍ମିତା ଦେବଙ୍କ ଇସ୍ତଫାର ମାତ୍ର ୨୪ ଘଣ୍ଟା ମଧ୍ୟରେ ଅନ୍ୟ ଜଣେ ଟପ୍ ନେତା ତଥା ରାଜ୍ୟସଭା ସାଂସଦ ପ୍ରକାଶ ଚିକ ବରାଇକ ଦଳରୁ ଇସ୍ତଫା ଦେଇଛନ୍ତି। ଗୋଟିଏ ସପ୍ତାହ ମଧ୍ୟରେ ଇସ୍ତଫା ଦେବାରେ ସେ ହେଉଛନ୍ତି ତୃତୀୟ ଟିଏମସି ସାଂସଦ।

ଉତ୍ତର ବଙ୍ଗ ବିଶ୍ୱବିଦ୍ୟାଳୟରୁ ବାଣିଜ୍ୟରେ ସ୍ନାତକ ଡିଗ୍ରୀ ହାସଲ କରିଥିବା ପ୍ରକାଶ ଚିକ ବରାଇକ ରାଜନୀତିରେ ପ୍ରବେଶ କରିବା ପୂର୍ବରୁ ଜଣେ ଚା' ବଗିଚା କର୍ମଚାରୀ ଭାବରେ କାର୍ଯ୍ୟ କରୁଥିଲେ। ଗ୍ରାମପଞ୍ଚାୟତ ସ୍ତରରୁ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିବା ପ୍ରକାଶ ମାତ୍ର ୫ ବର୍ଷ ମଧ୍ୟରେ ରାଜ୍ୟସଭା ସାଂସଦ ହେବାର ଗୌରବ ହାସଲ କରିଥିଲେ। ତାଙ୍କୁ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କ ଅତ୍ୟନ୍ତ ଅନୁଗତ ବୋଲି ବିବେଚନା କରାଯାଏ।

ବୁଧବାର ଦିନ ଟିଏମସି ନେତ୍ରୀ ସୁସ୍ମିତା ଦେବ ମଧ୍ୟ ଦଳ ଏବଂ ନିଜ ରାଜ୍ୟସଭା ଆସନରୁ ଇସ୍ତଫା ଦେଇଥିଲେ। ବ୍ୟକ୍ତିଗତ ଏବଂ ରାଜନୈତିକ କାରଣରୁ ସେ ଏହି ନିଷ୍ପତ୍ତି ନେଇଥିବା ସ୍ପଷ୍ଟ କରିବା ସହ ନିଜ ରାଜ୍ୟ ଆସାମରେ ରାଜନୈତିକ କାର୍ଯ୍ୟ ଜାରି ରଖିବେ ବୋଲି ପ୍ରକାଶ କରିଛନ୍ତି। ତାଙ୍କ ପୂର୍ବରୁ ବରିଷ୍ଠ ନେତା ତଥା ପ୍ରତିଷ୍ଠାତା ସଦସ୍ୟ ସୁଖେନ୍ଦୁ ଶେଖର ରାୟ ଏବଂ ପୂର୍ବତନ ସାଂସଦ ଶାନ୍ତନୁ ସେନ ମଧ୍ୟ ଦଳ ଛାଡିଥିଲେ। ସେହିପରି ମହିଳା କଂଗ୍ରେସ ମୁଖ୍ୟ ପଦରୁ ବରିଷ୍ଠ ନେତ୍ରୀ କାକୋଳି ଘୋଷ ଦସ୍ତିଦାର ମଧ୍ୟ ଇସ୍ତଫା ଦେଇଛନ୍ତି।

ମେ' ୪ ତାରିଖ ନିର୍ବାଚନ ଫଳାଫଳ ପରେ ତୃଣମୂଳ କଂଗ୍ରେସ ତାର ସବୁଠାରୁ ବଡ଼ ଆଭ୍ୟନ୍ତରୀଣ ସଙ୍କଟ ଦେଇ ଗତି କରୁଛି। ଦଳର ୮୦ ଜଣ ବିଧାୟକଙ୍କ ମଧ୍ୟରୁ ୫୮ ଜଣ ଦଳୀୟ ନେତୃତ୍ୱଙ୍କ ନିଷ୍ପତ୍ତି ବିରୋଧରେ ବିଦ୍ରୋହ କରିଛନ୍ତି। ବହିଷ୍କୃତ ବିଧାୟକ ଋତବ୍ରତ ବାନାର୍ଜୀଙ୍କ ନେତୃତ୍ୱରେ ଏହି ବିଦ୍ରୋହୀ ଗୋଷ୍ଠୀ ବିଧାନସଭାରେ ପ୍ରମୁଖ ବିରୋଧୀ ଦଳର ମାନ୍ୟତା ହାସଲ କରିଛନ୍ତି। ଏଥିସହ ଫିରହାଦ ହାକିମ (କୋଲକାତା), କୃଷ୍ଣା ଚକ୍ରବର୍ତ୍ତୀ (ବିଧାନନଗର), ରାମ ଚକ୍ରବର୍ତ୍ତୀ (ଚନ୍ଦନନଗର) ଏବଂ କମଳାକାନ୍ତ ଚକ୍ରବର୍ତ୍ତୀ (କାଟୁଆ)ଙ୍କ ଭଳି ଅତି କମରେ ୪ ଜଣ ପ୍ରମୁଖ ମେୟର ନିଜ ପଦରୁ ଇସ୍ତଫା ଦେଇଛନ୍ତି।

ଏହି ବଢୁଥିବା ସଙ୍କଟ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିରୋଧୀ ମେଣ୍ଟର ସମର୍ଥନ ଲୋଡିଛନ୍ତି। ନିକଟରେ ସେ କଂଗ୍ରେସ ନେତ୍ରୀ ସୋନିଆ ଗାନ୍ଧୀଙ୍କୁ ଭେଟି 'ଇଣ୍ଡିଆ' (INDIA) ମେଣ୍ଟର ଭବିଷ୍ୟତ ଏବଂ ସମନ୍ୱୟ ନେଇ ଆଲୋଚନା କରିଛନ୍ତି।

ପଶ୍ଚିମବଙ୍ଗ ରାଜନୀତିରେ ତୃଣମୂଳ କଂଗ୍ରେସ (TMC) ପାଇଁ ସଙ୍କଟ ଘନୀଭୂତ ହେବାରେ ଲାଗିଛି। ଦଳ ଭିତରେ ଚାଲିଥିବା ମହାବିଦ୍ରୋହ ମଧ୍ୟରେ ଏବେ ୧୯ ଜଣ ବିଦ୍ରୋହୀ ସାଂସଦଙ୍କ ଏକ ତାଲିକା ସାମ୍ନାକୁ ଆସିଛି। ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ତାଲିକାରେ ବଲିଉଡ୍ ଅଭିନେତାରୁ ନେତା ପାଲଟିଥିବା ଶତ୍ରୁଘ୍ନ ସିହ୍ନା ଏବଂ ପୂର୍ବତନ କ୍ରିକେଟର ୟୁସୁଫ ପଠାନଙ୍କ ଭଳି ହାଇ-ପ୍ରୋଫାଇଲ୍ ନେତାଙ୍କ ନାମ ମଧ୍ୟ ସାମିଲ ରହିଛି। ଏହି ସାଂସଦମାନେ ଏକ ଅଲଗା ସଂସଦୀୟ ଗୋଷ୍ଠୀ ଗଠନ କରିବା ସପକ୍ଷରେ ସ୍ୱାକ୍ଷର କରିଥିବା ଦାବି କରାଯାଉଛି।

ସଂସଦରେ ସ୍ୱତନ୍ତ୍ର ଗୋଷ୍ଠୀ ଗଠନ ପାଇଁ ପ୍ରସ୍ତୁତି

ସୂଚନା ଅନୁଯାୟୀ, ବରିଷ୍ଠ ନେତ୍ରୀ ତଥା ସାଂସଦ କାକୋଲି ଘୋଷ ଦସ୍ତିଦାରଙ୍କ ନେତୃତ୍ୱରେ ଲୋକସଭାରେ ଟିଏମସିର ଏକ ବଡ଼ ଗୋଷ୍ଠୀ ବିଦ୍ରୋହ କରିଛନ୍ତି। ପ୍ରାୟ ୨୦ ଜଣ ସାଂସଦ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଚିଠି ଲେଖି ଏକ ସ୍ୱତନ୍ତ୍ର ଦଳ ଭାବରେ ସ୍ୱୀକୃତି ପ୍ରଦାନ କରିବାକୁ ଦାବି କରିଛନ୍ତି। ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ ଦଳର ନେତାମାନେ ଗୋଟିଏ ପରେ ଗୋଟିଏ ମମତା ବାନାର୍ଜୀଙ୍କ ହାତ ଛାଡ଼ିବାରେ ଲାଗିଛନ୍ତି, ଯାହା ଫଳରେ ଦଳର ଅସ୍ତିତ୍ୱ ଉପରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି।

ବଡ଼ ନେତାଙ୍କ ବିଦ୍ରୋହ ଓ ପ୍ରତିକ୍ରିୟା

ଏହି ବିଦ୍ରୋହ ସମୟରେ ଶତ୍ରୁଘ୍ନ ସିହ୍ନା ସମ୍ପୂର୍ଣ୍ଣ ନୀରବତା ଅବଲମ୍ବନ କରିବା ଅନେକ ପ୍ରଶ୍ନ ସୃଷ୍ଟି କରିଛି। ଅନ୍ୟପଟେ କିର୍ତ୍ତୀ ଆଜାଦ୍ ଅଭିଯୋଗ କରିଛନ୍ତି ଯେ, କେନ୍ଦ୍ରୀୟ ତଦନ୍ତକାରୀ ସଂସ୍ଥା (ଇଡି ଏବଂ ସିବିଆଇ)ର ଭୟ ଦେଖାଇ ବିଜେପି ୟୁସୁଫ ପଠାନଙ୍କ ଭଳି ସାଂସଦମାନଙ୍କୁ ବ୍ଲାକମେଲ୍ କରୁଛି। ତେବେ ଲୋକସଭା ସହ ରାଜ୍ୟସଭାରେ ମଧ୍ୟ ଦଳକୁ ଝଟକା ଲାଗିଛି। ବରିଷ୍ଠ ନେତ୍ରୀ ସୁସ୍ମିତା ଦେବ ରାଜ୍ୟସଭାରୁ ଇସ୍ତଫା ଦେଇଛନ୍ତି ଏବଂ ସେ ବିଜେପିରେ ସାମିଲ ହେବା ନେଇ ଚର୍ଚ୍ଚା ଜୋର ଧରିଛି।

ମମତାଙ୍କ ପାଇଁ ବଢ଼ୁଛି ଅଡ଼ୁଆ

ଗୋଟିଏ ପଟେ ଦିଲ୍ଲୀରେ ମମତା ବାନାର୍ଜୀ ଏବଂ ଅଭିଷେକ ବାନାର୍ଜୀ ଇଣ୍ଡିଆ (INDIA) ମେଣ୍ଟର ବୈଠକରେ ଯୋଗ ଦେଉଥିବା ବେଳେ, ଅନ୍ୟପଟେ ତାଙ୍କ ଦଳର ୧୪ ଜଣ ସାଂସଦ ପଶ୍ଚିମବଙ୍ଗର ବିଜେପି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କୁ ଭେଟିବା ଦଳ ପାଇଁ ବଡ଼ ବିପଦର ସଙ୍କେତ ଦେଇଛି। ଏହା ପୂର୍ବରୁ ବିଧାନସଭାରେ ଟିଏମସିର ୫୮ ଜଣ ବିଧାୟକ ମଧ୍ୟ ବିଦ୍ରୋହ କରି ରିତବ୍ରତ ବାନାର୍ଜୀଙ୍କୁ ବିରୋଧୀ ଦଳ ନେତା ଭାବେ ସମର୍ଥନ ଜଣାଇଥିଲେ। ୧୯୯୮ ମସିହାରେ କଂଗ୍ରେସରୁ ଅଲଗା ହୋଇ ଗଠନ ହୋଇଥିବା ତୃଣମୂଳ କଂଗ୍ରେସ ଏବେ ୨୮ ବର୍ଷ ପରେ ସବୁଠାରୁ ବଡ଼ ଭାଙ୍ଗନର ସମ୍ମୁଖୀନ ହୋଇଛି।