ସାଧାରଣ ଜନତାଙ୍କ ପାଇଁ ପୁଣି ଏକ ଖରାପ ଖବର । ଲଗାତାର ଭାବେ ବୃଦ୍ଧି ପାଉଥିବା ଅତ୍ୟାବଶ୍ୟକ ସାମଗ୍ରୀର ଦରବୃଦ୍ଧି ମଧ୍ୟରେ ଏବେ ଇନ୍ଧନ ଦର ସାଧାରଣ ଲୋକଙ୍କ ଉପରେ ଏକ ବଡ଼ ପ୍ରହାର କରିଛି । କେବଳ ୪ ଦିନ ମଧ୍ୟରେ ଦେଶରେ ଦ୍ୱିତୀୟ ଥର ପାଇଁ ପେଟ୍ରୋଲ ଏବଂ ଡିଜେଲ ଦର ବୃଦ୍ଧି ପାଇଛି, ଯାହା ଗ୍ରାହକଙ୍କୁ ଚିନ୍ତାରେ ପକାଇଛି ।

କେତେ ବଢ଼ିଲା ତେଲ ଦର?

ଆଜି ଦେଶର ବିଭିନ୍ନ ପ୍ରମୁଖ ସହରରେ ପେଟ୍ରୋଲ ଏବଂ ଡିଜେଲ ମୂଲ୍ୟରେ ଉଲ୍ଲେଖନୀୟ ବୃଦ୍ଧି ଦେଖିବାକୁ ମିଳିଛି । ରିପୋର୍ଟ ଅନୁଯାୟୀ, ପେଟ୍ରୋଲ ଲିଟର ପିଛା ୮୨ ରୁ ୯୬ ପଇସା ମହଙ୍ଗା ହୋଇଥିବାବେଳେ, ଡିଜେଲ ଦର ଲିଟର ପିଛା ୮୬ ରୁ ୯୪ ପଇସା ପର୍ଯ୍ୟନ୍ତ ବୃଦ୍ଧି ପାଇଛି ।

ଅନ୍ତର୍ଜାତୀୟ ବିବାଦର ସିଧାସଳଖ ପ୍ରଭାବ

ବିଶ୍ୱ ବଜାରରେ ଦେଖାଦେଇଥିବା ଅସ୍ଥିରତା ହିଁ ଏହି ଦରବୃଦ୍ଧିର ମୁଖ୍ୟ କାରଣ ପାଲଟିଛି । ମୁଖ୍ୟତଃ ଇରାନ ସହ ଲାଗିରହିଥିବା ଯୁଦ୍ଧ ପରିସ୍ଥିତି ଏବଂ ଆମେରିକା-ଇସ୍ରାଏଲ ବିବାଦ ଯୋଗୁଁ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ଉପରେ ବ୍ୟାପକ ପ୍ରଭାବ ପଡ଼ିଛି । ଏହାର ସିଧାସଳଖ ପ୍ରଭାବ ଏବେ ଭାରତର ସାଧାରଣ ନାଗରିକଙ୍କ ପକେଟ ଉପରେ ପଡ଼ୁଛି ।

ସିଏନଜି (CNG) ମଧ୍ୟ ବାଦ୍ ପଡ଼ିନାହିଁ

ପେଟ୍ରୋଲ ଏବଂ ଡିଜେଲ ପରେ ଏବେ ସିଏନଜି (CNG) ମଧ୍ୟ ମହଙ୍ଗା ହୋଇଛି । ସିଏନଜି କିଲୋ ପିଛା ଏକାଥରକେ ୨ ଟଙ୍କା ବଢ଼ିଯାଇଛି । ଏହି ତେଲ ସଂକଟ ଓ ଦରବୃଦ୍ଧି ଯୋଗୁଁ ଗ୍ରାହକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପେଟ୍ରୋଲ ପମ୍ପଗୁଡ଼ିକରେ ଲୋକଙ୍କ ଲମ୍ବା ଧାଡ଼ି ଦେଖିବାକୁ ମିଳିଥିବା ବେଳେ ଏହି ମହଙ୍ଗା ମାଡ଼ ଯାନବାହାନ ଚାଳକ ଏବଂ ପରିବହନ ବ୍ୟବସ୍ଥାକୁ ବିଶେଷ ଭାବରେ ପ୍ରଭାବିତ କରିଛି ।

ଭୁବନେଶ୍ୱର: ବୁଧବାର ରାଜ୍ୟ କ୍ୟାବିନେଟ ପ୍ରଚଳିତ ଥିବା ଓଡ଼ିଶା ତାପଜ ବିଦ୍ୟୁତ୍‌ ନୀତିର ଉପଧାରା ୩ରେ ଦୁଇଟି ସଂଶୋଧନ ପ୍ରସ୍ତାବକୁ ଅନୁମୋଦନ କରିଛନ୍ତି। ପ୍ରଥମଟି ହେଉଛି ପ୍ରଚଳିତ ନୀତିର ଧାରା ୩ ଅଧୀନରେ ଥିବା ଭବିଷ୍ୟତ ସ୍ୱାଧୀନ ଶକ୍ତି ଉତ୍ପାଦନକାରୀ (ଇଣ୍ଡିପେଣ୍ଡେଣ୍ଟ ପାୱାର ପ୍ରଡ୍ୟୁସର ବା ଆଇପିପି) ସହ ପ୍ରସ୍ତାବିତ ଏମ୍‌ଓୟୁ ଶୀର୍ଷକକୁ ସଂଶୋଧନ କରି ‘ପ୍ରସ୍ତାବିତ’ ଶବ୍ଦକୁ ବିଲୋପ କରାଯାଇଛି। ଏହା ପରିବର୍ତ୍ତେ ‘ଭବିଷ୍ୟତ ଆଇପିପି ସହ ଏମ୍‌ଓୟୁ’ ହେବ। ଦ୍ୱିତୀୟରେ ପ୍ରଚଳିତ ନୀତିର ଉପଧାରା ୩(ସସସ)କୁ ସଂଶୋଧନ କରି ଲେଖାଯାଇଛି ଯେ ବର୍ତ୍ତମାନ ଥିବା ଆଇପିପିଠାରୁ ତାପଜ ଶକ୍ତି କେନ୍ଦ୍ରର ୧୪ପ୍ରତିଶତ/୧୨ ପ୍ରତିଶତ ବିଦ୍ୟୁତ୍‌କୁ କେବଳ ପରିବର୍ତ୍ତନଶୀଳ ମୂଲ୍ୟରେ କ୍ରୟ କରିବାର ଅଧିକାର ବଦଳରେ, ତାପଜ ଶକ୍ତି କେନ୍ଦ୍ରରୁ ବାହାରୁଥିବା ବିଦ୍ୟୁତ୍‌ର ମାତ୍ର ୫ ପ୍ରତିଶତକୁ ପରିବର୍ତ୍ତନଶୀଳ ମୂଲ୍ୟରେ କ୍ରୟ କରିବା ପାଇଁ ରାଜ୍ୟ ସରକାରଙ୍କ ଦ୍ୱାରା ଅଧିକୃତ ଏକ ନାମିତ ସଂସ୍ଥା (ଗ୍ରୀଡ୍‌କୋ)କୁ ଅଧିକାର ପ୍ରଦାନ କରାଯିବ। ତେବେ ରାଜ୍ୟ କ୍ୟାବିନେଟର ଉପରୋକ୍ତ ନିଷ୍ପତ୍ତିକୁ ରାଜ୍ୟ ସ୍ୱାର୍ଥ ବିରୋଧୀ ବୋଲି ଶକ୍ତି ସମୀକ୍ଷକ ମହଲରେ ମତପ୍ରକାଶ ପାଇଛି। 

ଶକ୍ତି ସମୀକ୍ଷକମାନେ ଯୁକ୍ତି ଦର୍ଶାଇଛନ୍ତି ଯେ ଓଡ଼ିଶା ଏବେ ଜିନ୍ଦଲ ଇଣ୍ଡିଆ ପାୱାର ଲିମିଟେଡ୍‌ , ଜିନ୍ଦଲ ଷ୍ଟିଲ୍‌ ୱର୍କ୍ସ ଲିମିଟେଡ, ନବ ଭାରତ ଲିମିଟେଡ୍‌ ଓ ମା’ ଦୁର୍ଗା ଥର୍ମାଲ ପାୱାର୍‌ ଲିମିଟେଡଡ୍‌ ଭଳି ୪ଟି ଆଇପିପିଠାରୁ ତାପଜ ନୀତି ଅନୁସାରେ ଗ୍ରୀଡ୍‌କୋ ବିଦ୍ୟୁତ୍‌ କ୍ରୟ କରୁଛି। ଗ୍ରୀଡ୍‌କୋ ୧୨ ପ୍ରତିଶତ ହିସାବରେ ସେମାନଙ୍କଠାରୁ କେବଳ ପରିବର୍ତ୍ତନଶୀଳ ମୂଲ୍ୟରେ (ଅର୍ଥାତ ଅଧା ମୂଲ୍ୟରେ) ୧୬୬୭ ନିୟୁତ ୟୁନିଟ୍‌ ବିଜୁଳି କ୍ରୟ କରୁଛି। ନୀତିରେ ସଂଶୋଧନ ହେବା ଦ୍ୱାରା ଗ୍ରୀଡ୍‌କୋ ୧୨ ପ୍ରତିଶତ ବଦଳରେ ମାତ୍ର ୫ ପ୍ରତିଶତ ବିଦ୍ୟୁତ୍‌ ପାଇବ। ଅର୍ଥାତ ଓଡ଼ିଶା ପାଉଥିବା ବାର୍ଷିକ ପ୍ରାୟ ୧୦୦୦ ନିୟୁତ ୟୁନିଟରୁ ଅଧିକ ଶସ୍ତା ବିଦ୍ୟୁତ୍‌ ହରାଇବ। ସେଥିପାଇଁ ଓଡ଼ିଶାର ଏକ କୋଟି ଉପଭୋକ୍ତା ବାର୍ଷିକ ଅତିରିକ୍ତ ବୋଝ ୨୦୦ କୋଟି ଟଙ୍କା ବହନ କରିବେ। ରାଜ୍ୟ ସରକାରଙ୍କ ନିଷ୍ପତ୍ତି ପାଇଁ ପ୍ରତେକ ବିଦ୍ୟୁତ୍‌ ଉପଭୋକ୍ତା ବର୍ଷକୁ ଅତିରିକ୍ତ ୨୦୦ ଟଙ୍କା ବିଦ୍ୟୁତ୍‌ ବିଲ୍‌ ପରିଶୋଧ କରିବେ ବୋଲି ଶକ୍ତି ସମୀକ୍ଷକମାନେ ମତ ଦେଇଛନ୍ତି।

ଏ ନେଇ ଶକ୍ତି ସମୀକ୍ଷକ ଆନନ୍ଦ ମହାପାତ୍ର କହିଛନ୍ତି ଯେ ବିଦ୍ୟୁତ୍‌ ଉତ୍ପାଦନ କମ୍ପାନୀଗୁଡିକ ପାଇଁ ଫିକ୍ସଡ ଚାର୍ଜ (ସ୍ଥିର ମୂଲ୍ୟ) ଓ ଭାରିଏବଲ ଚାର୍ଜ (ପରିବର୍ତ୍ତନଶୀଳ ମୂଲ୍ୟ) ଭଳି ଦ୍ୱିସ୍ତରୀୟ ଟାରିଫ ପ୍ରଚଳନ ଅଛି। ଓଡ଼ିଶା ତାପଜ ବିଦ୍ୟୁତ୍‌ ନୀତି ଅନୁସାରେ ଆଇପିପିମାନଙ୍କୁ ଗ୍ରୀଡ୍‌କୋ କେବଳ ପରିବର୍ତ୍ତନଶୀଳ ମୂଲ୍ୟରେ ବିଦ୍ୟୁତ୍‌ କ୍ରୟ କରେ। ଗ୍ରୀଡ୍‌କୋକୁ କୌଣସି ସ୍ଥିର ମୂଲ୍ୟ ଦେବାକୁ ପଡେ଼ ନାହି। ଉତ୍ପାଦନ ଟାରିଫର ସ୍ଥିରମୂଲ୍ୟ ଓ ପରିବର୍ତ୍ତନଶୀଳ ମୂଲ୍ୟର ଅନୁପାତ ମୋଟାମୋଟି ୫୦:୫୦ ଅଟେ। ଆଇପିପି ତାପଜ ବିଦ୍ୟୁତ୍‌ କେନ୍ଦ୍ର ସାଧାରଣତଃ ଘରୋଇ କମ୍ପାନୀ ପ୍ରତିଷ୍ଠା କରୁଛନ୍ତି। ସେଥିପାଇଁ ରାଜ୍ୟ ସରକାର କୋଇଲା ଖଣି, ପାଣି ଓ ଜଙ୍ଗଲ ଜମି ସୁଲଭ ମୂଲ୍ୟରେ ଯୋଗାଇ ଦେଉଛନ୍ତି। ତାପଜ ବିଦ୍ୟୁତ୍‌ କେନ୍ଦ୍ର ପ୍ରତିଷ୍ଠା ହେବା ଦ୍ୱାରା ଓଡ଼ିଶାରେ ପ୍ରଦୂଷଣ ବୃଦ୍ଧି ପାଇବା ସହ କୋଇଲା ପାଉଁଶ ଏକ ବଡ଼ ସମସ୍ୟା ହୋଇଛି। ତେଣୁ କ୍ୟାବିନେଟ ନିଷ୍ପତ୍ତି ଜନବିରୋଧୀ ହୋଇଛି। ଉପଭୋକ୍ତାଙ୍କୁ ଶୋଷଣ କରି କମ୍ପାନୀକୁ ଲାଭ ଦେବାପାଇଁ ଏପରି ନିଷ୍ପତ୍ତି ହୋଇଛି। ରାଜ୍ୟ ସରକାର ତୁରନ୍ତ କ୍ୟାବିନେଟ ନିଷ୍ପତ୍ତିକୁ ପ୍ରତ୍ୟାହାର କରନ୍ତୁ ବୋଲି ଶ୍ରୀ ମହାପାତ୍ର ଦାବି କରିଛନ୍ତି।

ଗତ ପାଞ୍ଚ ଦିନ ମଧ୍ୟରେ ଦେଶରେ ଲଗାତାର ଦ୍ୱିତୀୟ ଥର ପାଇଁ ତୈଳ ଦର ବୃଦ୍ଧି ହୋଇଛି। ମଙ୍ଗଳବାର, ୧୯ ମେ ୨୦୨୬ ରେ ପେଟ୍ରୋଲ ଏବଂ ଡିଜେଲ ଦର ଲିଟର ପିଛା ୯୦ ପଇସା ବୃଦ୍ଧି କରାଯାଇଛି। ଲଗାତାର ଏହି ଦର ବୃଦ୍ଧି ପରେ ଖାଉଟିମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିବା ବେଳେ ତୈଳ କମ୍ପାନୀଗୁଡ଼ିକ ଏହି ପ୍ରସଙ୍ଗରେ ସ୍ପଷ୍ଟୀକରଣ ଦେଇଛନ୍ତି। ଇଣ୍ଡିଆନ ଅଏଲ କର୍ପୋରେସନ (IOCL) ର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଖାଉଟିଙ୍କ ଉପରେ ଏକାଥରକେ ବୋଝ ନ ପକାଇବା ପାଇଁ ଧୀରେ ଧୀରେ ଦର ବୃଦ୍ଧି କରାଯାଉଛି।

ନୂଆ ପେଟ୍ରୋଲ ଏବଂ ଡିଜେଲ ଦର

ଦ୍ୱିତୀୟ ଥର ଦର ବୃଦ୍ଧି ପରେ ଜାତୀୟ ରାଜଧାନୀ ଦିଲ୍ଲୀରେ ପେଟ୍ରୋଲ ଲିଟର ପିଛା ୯୮.୬୪ ଟଙ୍କା ଏବଂ ଡିଜେଲ ୯୧.୫୮ ଟଙ୍କାରେ ପହଞ୍ଚିଛି। ସେହିପରି ଦେଶର ଆର୍ଥିକ ରାଜଧାନୀ ମୁମ୍ବାଇରେ ପେଟ୍ରୋଲ ଦର ୧୦୭.୫୯ ଟଙ୍କା ଏବଂ ଡିଜେଲ ଦର ୯୪.୦୮ ଟଙ୍କା ଛୁଇଁଛି। ଦୈନନ୍ଦିନ ଖର୍ଚ୍ଚ ଏବଂ ମୁଦ୍ରାସ୍ଫୀତି ବୃଦ୍ଧି ଆଶଙ୍କାକୁ ଦୃଷ୍ଟିରେ ରଖି ତୈଳ କମ୍ପାନୀଗୁଡ଼ିକ ପ୍ରତିଦିନ ସାମାନ୍ୟ ପରିମାଣରେ ଦର ବଢ଼ାଉଥିବା ସୂଚନା ଦେଇଛନ୍ତି।

କାହିଁକି ବଢ଼ୁଛି ତୈଳ ଦର?

IOCL ଅଧିକାରୀ ସ୍ପଷ୍ଟ କରିଛନ୍ତି ଯେ ଆନ୍ତର୍ଜାତୀୟ ବଜାର ସ୍ଥିତି କାରଣରୁ ପେଟ୍ରୋଲ-ଡିଜେଲ ଦର ବଢ଼ାଇବାକୁ ନିଷ୍ପତ୍ତି ନିଆଯାଇଛି। ବିଶେଷକରି ମଧ୍ୟପ୍ରାଚ୍ୟରେ ଯୁଦ୍ଧ ଏବଂ ହରମୁଜ୍ ପ୍ରଣାଳୀ ବନ୍ଦ ହେବା କାରଣରୁ ବିଶ୍ୱ ବଜାରରେ ଅଶୋଧିତ ତୈଳ ଦର ଲଗାତାର ଭାବେ ବୃଦ୍ଧି ପାଉଛି। ତେବେ ଗ୍ରୀଷ୍ମ ଋତୁରେ ତୈଳ ଚାହିଦା ଅଧିକ ରହୁଥିବାରୁ ଏହି ଦର ବୃଦ୍ଧି ଯୋଗୁଁ ତୈଳ ବ୍ୟବହାର କମିବାର କୌଣସି ସମ୍ଭାବନା ନାହିଁ ବୋଲି ଅଧିକାରୀ ଆକଳନ କରିଛନ୍ତି।

୨୦୨୨ ଭଳି ପୁଣି ବଢ଼ିବ କି ଦର?

ଗ୍ରାହକମାନଙ୍କ ମନରେ ଏବେ ପ୍ରଶ୍ନ ଉଠୁଛି ଯେ କଣ ୨୦୨୨ ମସିହା ଭଳି ପୁଣିଥରେ ତୈଳ ଦର ଆକାଶଛୁଆଁ ହେବ? ସୂଚନାଯୋଗ୍ୟ ଯେ, ରୁଷ-ୟୁକ୍ରେନ ଯୁଦ୍ଧ ସମୟରେ ମାର୍ଚ୍ଚ-ଏପ୍ରିଲ ୨୦୨୨ ରେ ତୈଳ କମ୍ପାନୀଗୁଡ଼ିକ ୧୫ ଦିନ ମଧ୍ୟରେ ଲଗାତାର ୧୩ ଥର ଦର ବଢ଼ାଇଥିଲେ, ଯାହାଫଳରେ ତୈଳ ଦର ପ୍ରାୟ ୧୦ ଟଙ୍କା ବୃଦ୍ଧି ପାଇଥିଲା। ଏହି ପ୍ରଶ୍ନର ଉତ୍ତରରେ ଅଧିକାରୀ କହିଛନ୍ତି ଯେ ବର୍ତ୍ତମାନ ସୁଦ୍ଧା ସମୁଦାୟ କେତେ ଟଙ୍କା ବୃଦ୍ଧି କରାଯିବ ସେ ନେଇ କୌଣସି ଲକ୍ଷ୍ୟଧାର୍ଯ୍ୟ କରାଯାଇନାହିଁ। ଖାଉଟିମାନଙ୍କୁ ସମ୍ଭାବ୍ୟ ମୂଲ୍ୟ ବୃଦ୍ଧିରୁ ରକ୍ଷା କରିବା ପାଇଁ କମ୍ପାନୀ ସମ୍ପୂର୍ଣ୍ଣ ପ୍ରୟାସ କରୁଥିବା ସେ ପ୍ରକାଶ କରିଛନ୍ତି।

ବିଶ୍ୱସ୍ତରରେ ତୈଳ ଯୋଗାଣରେ ବାଧା ଏବଂ ମୂଲ୍ୟ ବୃଦ୍ଧି ଆଶଙ୍କା ମଧ୍ୟରେ ଆମେରିକା ଏକ ବଡ଼ ପଦକ୍ଷେପ ନେଇଛି। ରୁଷିଆରୁ ସମୁଦ୍ର ପଥରେ ଆସୁଥିବା ଅଶୋଧିତ ତୈଳ ଉପରେ ଥିବା କଟକଣା କୋହଳ ଅବଧିକୁ ଆମେରିକା ଆଉ ୩୦ ଦିନ ପାଇଁ ବୃଦ୍ଧି କରିଛି। ନୂତନ ଘୋଷଣା ଅନୁଯାୟୀ, ଏହି ରିହାତିର ଅବଧି ଜୁନ ୧୭ ପର୍ଯ୍ୟନ୍ତ ବଳବତ୍ତର ରହିବ। ଆମେରିକା-ଇରାନ ଯୁଦ୍ଧ ଏବଂ ପଶ୍ଚିମ ଏସିଆରେ ଲାଗି ରହିଥିବା ଅଶାନ୍ତି ଯୋଗୁଁ ବିଶ୍ୱ ତୈଳ ବଜାର ପ୍ରଭାବିତ ହୋଇଥିବା ବେଳେ ଏହି ନିଷ୍ପତ୍ତି ନିଆଯାଇଛି।

ଆମେରିକାର ପ୍ରତିକ୍ରିୟା

ଆମେରିକାର ଟ୍ରେଜେରୀ ସେକ୍ରେଟାରୀ (ଅର୍ଥ ମନ୍ତ୍ରୀ) ସ୍କଟ୍ ବେସେଣ୍ଟ୍ ସାମାଜିକ ଗଣମାଧ୍ୟମ 'ଏକ୍ସ'ରେ ସୂଚନା ଦେଇ କହିଛନ୍ତି ଯେ, ଏହି ରିହାତି କେବଳ ସେହି ତୈଳ ପାଇଁ ଲାଗୁ ହେବ ଯାହା ବର୍ତ୍ତମାନ ସମୁଦ୍ରରେ ଜାହାଜରେ ରହିଛି। ସେ କହିଛନ୍ତି, "ଏହି ଅସ୍ଥାୟୀ ସାଧାରଣ ଲାଇସେନ୍ସ ବିଶ୍ୱର ଅଶୋଧିତ ତୈଳ ବଜାରକୁ ସ୍ଥିର କରିବାରେ ସାହାଯ୍ୟ କରିବ। ଏହା ସହିତ ଶକ୍ତି ସଙ୍କଟର ସମ୍ମୁଖୀନ ହେଉଥିବା ଦେଶଗୁଡ଼ିକ ପାଖରେ ତୈଳ ପହଞ୍ଚିବା ସୁନିଶ୍ଚିତ ହେବ।" ଏହାଦ୍ୱାରା ଶସ୍ତା ତୈଳ ମହଜୁଦ କରିବାର ଚୀନର କ୍ଷମତାକୁ ମଧ୍ୟ ହ୍ରାସ କରାଯାଇପାରିବ ବୋଲି ସେ ମତ ଦେଇଛନ୍ତି।

ଭାରତ ପାଇଁ ଏହାର ଅର୍ଥ କ'ଣ?

ଭାରତ ଭଳି ବୃହତ୍ ତୈଳ ଆମଦାନୀକାରୀ ଦେଶ ପାଇଁ ଆମେରିକାର ଏହି ନିଷ୍ପତ୍ତି ବେଶ ଗୁରୁତ୍ୱପୂର୍ଣ୍ଣ:

ଯୋଗାଣରେ ନାହିଁ ବାଧା: ରିହାତି ଅବଧି ବୃଦ୍ଧି ହେବା ଫଳରେ ରୁଷିଆରୁ ବାହାରି ସାରିଥିବା ଏବଂ ବାଟରେ ଥିବା ତୈଳ ନିର୍ଦ୍ଧାରିତ ସମୟରେ ବିନା କୌଣସି ଆଇନଗତ ସମସ୍ୟାରେ ଭାରତରେ ପହଞ୍ଚିପାରିବ। ଏହାଦ୍ୱାରା ଦେଶରେ ତୈଳ ଅଭାବର ଆଶଙ୍କା ଦୂର ହୋଇଛି।

ରିହାତି ମୂଲ୍ୟରେ ତୈଳ ମିଳିବ: ରୁଷିଆ ବର୍ତ୍ତମାନ ଭାରତ ପାଇଁ ରିହାତି ମୂଲ୍ୟରେ ଅଶୋଧିତ ତୈଳର ଏକ ପ୍ରମୁଖ ଉତ୍ସ ପାଲଟିଛି। ନୂତନ ନିଷ୍ପତ୍ତି ଫଳରେ ଭାରତୀୟ ରିଫାଇନାରୀ ଗୁଡ଼ିକ କମ୍ ଆଇନଗତ ବିପଦ ସହିତ ବର୍ତ୍ତମାନର ବାଣିଜ୍ୟ ପ୍ରବାହକୁ ବଜାୟ ରଖିପାରିବେ।

ଅସ୍ଥିର ବାତାବରଣ: ବାରମ୍ବାର କେବଳ ୩୦ ଦିନ ପାଇଁ ଅବଧି ବୃଦ୍ଧି କରାଯାଉଥିବାରୁ ଏହା ଏକ ଦୀର୍ଘକାଳୀନ ସମାଧାନ ନୁହେଁ। ତେଣୁ ଭବିଷ୍ୟତ ପାଇଁ ଦୀର୍ଘକାଳୀନ ଚୁକ୍ତି କରିବା ଭାରତୀୟ କମ୍ପାନୀଗୁଡ଼ିକ ପାଇଁ କଷ୍ଟକର ହେଉଛି।

ଶକ୍ତି ସୁରକ୍ଷାକୁ ପ୍ରାଥମିକତା: ଅବଶ୍ୟ, ଭାରତୀୟ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ଆମେରିକାର କଟକଣା ସତ୍ତ୍ୱେ ଭାରତ ନିଜର ଶକ୍ତି ସୁରକ୍ଷା ଏବଂ ବ୍ୟବସାୟିକ ସ୍ୱାର୍ଥକୁ ଦୃଷ୍ଟିରେ ରଖି ରୁଷିଆରୁ ତୈଳ କ୍ରୟ ଜାରି ରଖିବ।

ପଶ୍ଚିମ ଏସିଆରେ ଚାଲିଥିବା ଉତ୍ତେଜନା ଏବଂ ଇରାନ ଦ୍ୱାରା ହୋରମୁଜ୍ ପ୍ରଣାଳୀ ବନ୍ଦ ହେବା କାରଣରୁ ବିଶ୍ୱରେ ତୈଳ ଦର ବୃଦ୍ଧି ପାଉଛି। ଏଭଳି ପରିସ୍ଥିତିରେ ଆମେରିକାର ଏହି ରିହାତି ଭାରତକୁ ଏକ ବଡ଼ ଆଶ୍ୱସ୍ତି ପ୍ରଦାନ କରିଛି।

୧୯୯୭ ମସିହାରେ ମାସିକ ମାତ୍ର ୫,୦୦୦ ଟଙ୍କା ଦରମାରେ କାମ କରୁଥିବା ଜଣେ ମହିଳା ଆଜି ୪୮ କୋଟି ଟଙ୍କା ବ୍ୟବସାୟର ମାଲିକାଣୀ ହୋଇପାରିଛନ୍ତି। ଏହି ସଫଳ ମହିଳା ଜଣଙ୍କ ହେଉଛନ୍ତି ଓମ୍‌ ସାଇ ସର୍ଜିକାଲ୍ସ (Om Sai Surgicals) ର ପ୍ରତିଷ୍ଠାତା ନୟନା ବୈଦ୍ୟ। ନିକଟରେ କ୍ରୋର୍ କ୍ଲବ୍ (Crore Club) ନାମକ ଏକ ପଡ୍‌କାଷ୍ଟ୍‌ରେ ସେ ନିଜର ଏହି ପ୍ରେରଣାଦାୟକ ଯାତ୍ରା ବିଷୟରେ ବିସ୍ତୃତ ଭାବରେ ଆଲୋଚନା କରିଛନ୍ତି।

୫,୦୦୦ ରୁ ୪୮ କୋଟି ଟଙ୍କା ପର୍ଯ୍ୟନ୍ତ ଯାତ୍ରା

୧୯୯୭ ମସିହାରେ ନୟନା ଏକ ଫାର୍ମା କମ୍ପାନୀରେ ସେଲ୍ସ ରିପ୍ରେଜେଣ୍ଟେଟିଭ୍ ଭାବରେ କାମ ଆରମ୍ଭ କରିଥିଲେ। ସେତେବେଳେ ତାଙ୍କର ମାସିକ ଦରମା ଥିଲା ମାତ୍ର ୫,୦୦୦ ଟଙ୍କା। ସେହି ସମୟରେ ତାଙ୍କ ସ୍ୱାମୀ ବିଶ୍ୱସ୍ତରୀୟ କମ୍ପାନୀ ଜନସନ୍‌ ଆଣ୍ଡ ଜନସନ୍‌ (Johnson & Johnson) ର ଅଙ୍କୋଲୋଜି ବିଭାଗରେ କାର୍ଯ୍ୟରତ ଥିଲେ। ଯେତେବେଳେ କମ୍ପାନୀ ତାଙ୍କ ସ୍ୱାମୀଙ୍କୁ ଏକ ଡିଲରସିପ୍ ନେବାକୁ ପ୍ରସ୍ତାବ ଦେଲା, ସେତେବେଳେ ଫାର୍ମାସୀ ପଢ଼ିଥିବା ନୟନା ନିଜର ଯୋଗ୍ୟତା ଏବଂ ଲାଇସେନ୍ସ ବ୍ୟବହାର କରି ଏହି ସୁଯୋଗକୁ ହାତଛଡ଼ା କରିନଥିଲେ। ପ୍ରାରମ୍ଭିକ ପର୍ଯ୍ୟାୟରେ ସ୍ୱାମୀ-ସ୍ତ୍ରୀ ମିଶି ଏହି ଡିଲରସିପ୍ ବ୍ୟବସାୟ ଆରମ୍ଭ କରିଥିଲେ। ତେବେ କିଛି ବର୍ଷ ପରେ ତାଙ୍କ ସ୍ୱାମୀ ନିଜର ଏକ ଅଲଗା ବ୍ୟବସାୟ ଆରମ୍ଭ କରିବାରୁ ନୟନା ଏହି ଡିଲରସିପ୍ ର ସମ୍ପୂର୍ଣ୍ଣ ଦାୟିତ୍ୱ ନିଜ କାନ୍ଧକୁ ନେଇଥିଲେ।

ଓମ୍‌ ସାଇ ସର୍ଜିକାଲ୍ସ ଏବଂ ବ୍ୟବସାୟିକ ସଫଳତା

ନୟନାଙ୍କ କଠିନ ପରିଶ୍ରମ ଯୋଗୁଁ ବର୍ତ୍ତମାନ ଓମ୍‌ ସାଇ ସର୍ଜିକାଲ୍ସ ସ୍ୱାସ୍ଥ୍ୟସେବା ଉପକରଣ, ବିଶେଷକରି ଅଙ୍କୋଲୋଜି ଏବଂ ସର୍ଜିକାଲ୍ ପ୍ରଡକ୍ଟ ବଣ୍ଟନ କ୍ଷେତ୍ରରେ ଏକ ପ୍ରମୁଖ ନାମ ପାଲଟିଛି। ଡାକ୍ତରଖାନାଗୁଡ଼ିକୁ ସର୍ବୋତ୍ତମ ସ୍ୱାସ୍ଥ୍ୟସେବା ଉପକରଣ ଯୋଗାଇଦେବା ଲକ୍ଷ୍ୟ ନେଇ କମ୍ପାନୀ ଅନେକ ବହୁରାଷ୍ଟ୍ରୀୟ କମ୍ପାନୀଗୁଡ଼ିକର ଏକ ବିଶ୍ୱସ୍ତ ପାର୍ଟନର ହୋଇପାରିଛି। ପଡ୍‌କାଷ୍ଟ୍‌ରେ କଥାବାର୍ତ୍ତା ବେଳେ ନୟନା ପ୍ରକାଶ କରିଛନ୍ତି ଯେ ୨୦୨୬ ଆର୍ଥିକ ବର୍ଷରେ ମାର୍ଚ୍ଚ ସୁଦ୍ଧା ତାଙ୍କ କମ୍ପାନୀର ବାର୍ଷିକ କାରବାର ବା ଟର୍ଣ୍ଣଓଭର୍ ପ୍ରାୟ ୪୮ କୋଟି ଟଙ୍କା ଛୁଇଁଛି।

'ଖୁସି କେବଳ ଟଙ୍କାରୁ ମିଳେନାହିଁ'

ନିଜର ଏତେ ବଡ଼ ବ୍ୟବସାୟିକ ସଫଳତା ସତ୍ତ୍ୱେ ନୟନା ଅତ୍ୟନ୍ତ ସାଧାରଣ ଚିନ୍ତାଧାରା ରଖନ୍ତି। ସେ କୁହନ୍ତି, 'ବ୍ୟବସାୟ ୪୮ କୋଟି ଟଙ୍କାରେ ପହଞ୍ଚିଥିଲେ ମଧ୍ୟ ମୋତେ କୌଣସି ଅସାଧାରଣ ଅନୁଭବ ହେଉନାହିଁ, କାରଣ ଏହି ଯାତ୍ରା ଏବେ ବି ଜାରି ରହିଛି। ପ୍ରକୃତ ଖୁସି କାମ କରିବାରେ ଅଛି, କେବଳ ଟଙ୍କାରେ ନୁହେଁ।' ଏହାଛଡ଼ା ସେ ସୂଚନା ଦେଇଛନ୍ତି ଯେ ୨୦୦୦ ମସିହାରେ ବ୍ୟବସାୟ ଆରମ୍ଭ କରିବା ପରେ ପ୍ରାୟ ୨୦୧୦ ମସିହାରେ ସେ ନିଜର ପ୍ରଥମ କୋଟି ଟଙ୍କା ରୋଜଗାର କରିଥିଲେ। ବର୍ତ୍ତମାନ ତାଙ୍କର ଅନେକ ସମ୍ପତ୍ତି ରହିଛି ଯେଉଁଥିରୁ ଭଡ଼ା ଆକାରରେ ନିୟମିତ ଆୟ ମଧ୍ୟ ଆସୁଛି। ୨୦୧୯ ମସିହାରେ ସେ ଲୋନ୍ କରି ଏକ ଘର କିଣିଥିଲେ, ଯାହାର ବର୍ତ୍ତମାନ ମୂଲ୍ୟ ପ୍ରାୟ ୪ କୋଟି ଟଙ୍କା ହେବ। କମ୍ ଦରମା ପାଉଥିବା ଜଣେ ସାଧାରଣ କର୍ମଚାରୀରୁ ଏକ ବିଶାଳ ବ୍ୟବସାୟର ମାଲିକାଣୀ ହେବା ପର୍ଯ୍ୟନ୍ତ ନୟନା ବୈଦ୍ୟଙ୍କ ଏହି ଯାତ୍ରା ଯେକୌଣସି ଯୁବ ଉଦ୍ୟୋଗୀଙ୍କ ପାଇଁ ଏକ ବଡ଼ ପ୍ରେରଣା।

ଭୁବନେଶ୍ୱର: ଭୁବନେଶ୍ୱର ଖୋଲିବ SEBI( Securities and Exchange bourd of india )ର ନୂଆ ବ୍ରାଞ୍ଚ ଅଫିସ I ଏହା ପୂର୍ବ ଭାରତରେ ସେବିର ପ୍ରଥମ କାର୍ଯ୍ୟାଳୟ ହେବ। ଏନେଇ ଭୁବନେଶ୍ୱରରେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସେବି ଅଧ୍ୟକ୍ଷ ତୁହିନକାନ୍ତ ପାଣ୍ଡେ । ଆସୋସିଏସନ ଅଫ ମ୍ୟୁଚୁଆଲ ଫଣ୍ଡ ଅଫ ଇଣ୍ଡିଆର ଏକ କର୍ମଶାଳାରେ ଯୋଗ ଦେବା ଅବସରରେ ଏହା କହିଛନ୍ତି ସେବି ଅଧ୍ୟକ୍ଷ । 

ଓଡିଶାରେ SIP ର ଚାହିଦା ବଢ଼ିଛି I ୧୦ ବର୍ଷରେ ୧୦ ଗୁଣା ଅଧିକ SIP ଇନଭେଷ୍ଟମେଣ୍ଟ ବୃଦ୍ଧି ପାଇଛି। ହେଲେ ଇନଭେଷ୍ଟମେଣ୍ଟ କ୍ଷେତ୍ରରେ ଏବେ ବି ଓଡିଶା ପଛରେ ରହିଛି। ତେଣୁ ଏହାକୁ ବୃଦ୍ଧି କରିବା ପାଇଁ ସେବୀ ଅଣ୍ଟା ଭିଡ଼ିଛି। ଓଡିଶାରେ municipality bond କୁ ଆରମ୍ଭ କରିବା ପାଇଁ ରାଜ୍ୟ ସରକାରଙ୍କୁ ସେବୀ ପକ୍ଷରୁ ପରାମର୍ଶ ଦିଆଯାଇଛି। ଦେଶରେ ୩୪ଟି ସହରରେ ଏହି bond ଆରମ୍ଭ ହୋଇଛି ଆଗକୁ ଏହାର ଚାହିଦା ବୃଦ୍ଧିପାଇବ । ତେଣୁ ଓଡିଶା ସମିତ ବିଭିନ୍ନ ରାଜ୍ୟ ସରକାରଙ୍କୁ ଏହି bond ଆରମ୍ଭ କରିବା ପାଇଁ ସେବୀ ପକ୍ଷରୁ ପରାମର୍ଶ ଦିଆଯାଇଛି । ଓଡ଼ିଶାରେ ଲୋକଙ୍କ ଆଗ୍ରହ ସୃଷ୍ଟି ହୋଇଥିବାରୁ ନିବେଶକୁ ବୃଦ୍ଧି କରିବା ସହ ଏଥିରେ ହେଉଥିବା ଅନିୟମିତାକୁ ରୋକିବା ପାଇଁ ଖୁବଶୀଘ୍ର ଭୁବନେଶ୍ୱରରେ ସେବୀର ଏକ ବ୍ରାଞ୍ଚ କାର୍ଯ୍ୟଳୟ ଆରମ୍ଭ ହେବାକୁ ଯାଉଛି। ଆଜି ସେ ନେଇ ଏକ MOU ସ୍ବାକ୍ଷର ହେଉଥିବା ବେଳେ କିଛି ମାସ ମଧ୍ୟରେ ତାହା ଆରମ୍ଭ ହେବ ବୋଲି ସେବୀ ଅଧକ୍ଷ ସୂଚନା ଦେଇଛନ୍ତି । 

ଦେଶର ଅଗ୍ରଣୀ ଆଇଟି କମ୍ପାନୀ ଟାଟା କନ୍ସଲଟାନ୍ସି ସର୍ଭିସେସ୍ (TCS) ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ତଥା ପରିଚାଳନା ନିର୍ଦ୍ଦେଶକ କେ କୃତିବାସନ ଆର୍ଥିକ ବର୍ଷ ୨୦୨୫-୨୬ (FY26) ରେ ମୋଟ ୨୮.୧ କୋଟି ଟଙ୍କାର ଦରମା ପାଇଛନ୍ତି। କମ୍ପାନୀର ବାର୍ଷିକ ରିପୋର୍ଟ ଅନୁଯାୟୀ, ଗତ ଆର୍ଥିକ ବର୍ଷ ତୁଳନାରେ ତାଙ୍କ ପାରିଶ୍ରମିକରେ ୬.୩ ପ୍ରତିଶତ ବୃଦ୍ଧି ଘଟିଛି।

ଦରମାର ବିସ୍ତୃତ ବିବରଣୀ

ଟିସିଏସ ପକ୍ଷରୁ ଜାରି କରାଯାଇଥିବା ବାର୍ଷିକ ରିପୋର୍ଟରେ କୁହାଯାଇଛି ଯେ, କୃତିବାସନଙ୍କ ଦରମା ପ୍ୟାକେଜରେ ୧.୬୭ କୋଟି ଟଙ୍କା ମୂଳ ଦରମା (ବେସିକ୍ ସାଲାରୀ) ରହିଥିବା ବେଳେ ୧.୪୩ କୋଟି ଟଙ୍କା ଭତ୍ତା ଏବଂ ଅନ୍ୟାନ୍ୟ ସୁବିଧା ବାବଦରେ ଦିଆଯାଇଛି। ଏହା ବ୍ୟତୀତ ପ୍ରଦର୍ଶନ ଆଧାରିତ କମିଶନ ଭାବେ ତାଙ୍କୁ ସର୍ବାଧିକ ୨୫ କୋଟି ଟଙ୍କା ପ୍ରଦାନ କରାଯାଇଛି। ଅନ୍ୟପକ୍ଷରେ, ଟାଟା ଗ୍ରୁପ୍ ଏବଂ ଟିସିଏସ ଅଧ୍ୟକ୍ଷ ଏନ୍ ଚନ୍ଦ୍ରଶେଖରନ୍ କୌଣସି କମିଶନ ନେଇନଥିବା ବେଳେ ବର୍ଷ ତମାମ କେବଳ ୪.୨ ଲକ୍ଷ ଟଙ୍କାର ସିଟିଂ ଫି ଗ୍ରହଣ କରିଛନ୍ତି।

କର୍ମଚାରୀଙ୍କ ତୁଳନାରେ ୩୩୩ ଗୁଣା ଅଧିକ ଦରମା

ସିଇଓଙ୍କ ଦରମା ଏବଂ ସାଧାରଣ କର୍ମଚାରୀଙ୍କ ଦରମା ମଧ୍ୟରେ ଥିବା ବିରାଟ ବ୍ୟବଧାନ ଏହି ରିପୋର୍ଟରୁ ସ୍ପଷ୍ଟ ହୋଇଛି। ଆର୍ଥିକ ବର୍ଷ ୨୦୨୬ ରେ କମ୍ପାନୀର ମିଡିଆନ୍ (ହାରାହାରି) କର୍ମଚାରୀ ଦରମା ତୁଳନାରେ ସିଇଓଙ୍କ ଦରମା ୩୩୨.୮ ଗୁଣା (ପ୍ରାୟ ୩୩୩ ଗୁଣା) ଅଧିକ ବୋଲି ଉଲ୍ଲେଖ ରହିଛି। ତେବେ ଏହି ଆର୍ଥିକ ବର୍ଷରେ ସାଧାରଣ କର୍ମଚାରୀଙ୍କ ହାରାହାରି ଦରମାରେ ମାତ୍ର ୫.୧ ପ୍ରତିଶତ ବୃଦ୍ଧି ଘଟିଥିବା ଦେଖିବାକୁ ମିଳିଛି। ଭାରତରେ କାର୍ଯ୍ୟରତ ଜୁନିୟର ଏବଂ ମଧ୍ୟମ ସ୍ତରର କର୍ମଚାରୀଙ୍କୁ ହାରାହାରି ୪.୫% ରୁ ୭% ପର୍ଯ୍ୟନ୍ତ ଦରମା ବୃଦ୍ଧି ମିଳିଥିବା ବେଳେ ଉତ୍କୃଷ୍ଟ ପ୍ରଦର୍ଶନ କରିଥିବା କର୍ମଚାରୀଙ୍କୁ ଦୁଇ-ଅଙ୍କ ବିଶିଷ୍ଟ ଇନକ୍ରିମେଣ୍ଟ ମିଳିଛି।

କର୍ମଚାରୀ ଛଟେଇ ଏବଂ କମ୍ପାନୀର ଆଭିମୁଖ୍ୟ

ସିଇଓଙ୍କ ଦରମା ବୃଦ୍ଧି ସମୟରେ ଟିସିଏସର କର୍ମଚାରୀ ସଂଖ୍ୟାରେ ବଡ଼ ଧରଣର ହ୍ରାସ ମଧ୍ୟ ଚର୍ଚ୍ଚାର ବିଷୟ ପାଲଟିଛି। ରିପୋର୍ଟ ମୁତାବକ, ଗତ ଏକ ବର୍ଷ ମଧ୍ୟରେ କମ୍ପାନୀ ନିଜର କର୍ମଚାରୀ ସଂଖ୍ୟାକୁ ବାର୍ଷିକ ଆଧାରରେ ୨୩,୪୬୦ କମାଇଛି। ସାଂଗଠନିକ ପୁନର୍ଗଠନ, କୃତ୍ରିମ ବୁଦ୍ଧିମତ୍ତା (AI) ର ବୃଦ୍ଧି ଏବଂ ଭବିଷ୍ୟତ ପାଇଁ କମ୍ପାନୀକୁ ଅଧିକ କାର୍ଯ୍ୟକ୍ଷମ କରିବା ଉଦ୍ଦେଶ୍ୟରେ ଏହି ପରିବର୍ତ୍ତନ କରାଯାଇଥିବା ଟିସିଏସ ପକ୍ଷରୁ କୁହାଯାଇଛି। ଏହାଫଳରେ ମୋଟ କର୍ମଚାରୀଙ୍କ ସଂଖ୍ୟା ଗତବର୍ଷର ୬,୦୭,୯୭୯ ରୁ ଖସି ଆର୍ଥିକ ବର୍ଷ ୨୦୨୬ ସୁଦ୍ଧା ୫,୮୪,୫୧୯ ରେ ପହଞ୍ଚିଛି।

ନୂଆଦିଲ୍ଲୀ: ପ୍ରାୟ ଚାରି ବର୍ଷର ବ୍ୟବଧାନ ପରେ ଦେଶରେ ପେଟ୍ରୋଲ ଓ ଡିଜେଲ ଦରରେ ହୋଇଥିବା ବୃଦ୍ଧି କେବଳ ଗାଡ଼ି ଚାଳକଙ୍କୁ ନୁହେଁ, ବରଂ ସାଧାରଣ ଖାଉଟିଙ୍କୁ ମଧ୍ୟ ଚିନ୍ତାରେ ପକାଇଛି। ଶୁକ୍ରବାର ଠାରୁ ଲିଟର ପିଛା ୩ ଟଙ୍କା ବଢ଼଼ିବା ପରେ ଅର୍ଥନୀତିଜ୍ଞମାନେ ଚେତାବନୀ ଦେଇଛନ୍ତି ଯେ, ଏହାର ପ୍ରଭାବ ଖୁବଶୀଘ୍ର ଦୈନନ୍ଦିନ ବ୍ୟବହାର୍ଯ୍ୟ ସାମଗ୍ରୀ ଉପରେ ପଡ଼ିବାକୁ ଯାଉଛି। ଡିଜେଲ ଦର ବଢ଼଼ିବା ଯୋଗୁଁଁ ବସ୍‌‌, ଟ୍ରକ୍‌‌ ଏବଂ ଅଟୋ ଭଡ଼ା ବୃଦ୍ଧି ପାଇବାର ସମ୍ଭାବନା ରହିଛି। ମାଲ୍‌‌ ପରିବହନ ଖର୍ଚ୍ଚ ବଢ଼଼ିଲେ ବଜାରରେ ସାମଗ୍ରୀର ମୂଲ୍ୟ ବୃଦ୍ଧି ପାଇବ। ପରିବା, ଫଳ, କ୍ଷୀର ଏବଂ ଶସ୍ୟ ଆଦି ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ନେବା ପାଇଁ ପରିବହନ ଉପରେ ନିର୍ଭର କରିବାକୁ ପଡ଼ିଥାଏ। ଅମୁଲ୍‌‌ ଏବଂ ମଦର ଡାଏରୀ ପରି ସଂସ୍ଥାଗୁଡ଼ିକ ପୂର୍ବରୁ ଲିଟର ପିଛା ୨ ଟଙ୍କା ବଢ଼଼ାଇ ସାରିଛନ୍ତି। 

ଡେଲିଭରି ଆପ୍‌‌ ଏବଂ ଇ-କମର୍ସ ସଂସ୍ଥାଗୁଡ଼ିକ ସେମାନଙ୍କର ସେବା ଶୁଳ୍କ ବଢ଼଼ାଇ ପାରନ୍ତି କିମ୍ବା ରିହାତି କମାଇ ଦେଇପାରନ୍ତି। ଗ୍ରାମାଞ୍ଚଳରେ ଚାଷୀମାନେ ଟ୍ରାକ୍ଟର ଏବଂ ପମ୍ପ ସେଟ୍‌‌ ପାଇଁ ଡିଜେଲ ବ୍ୟବହାର କରନ୍ତି। ତେଲ ଦର ବଢ଼଼ିଲେ ଚାଷ ଖର୍ଚ୍ଚ ବଢ଼଼ିବ, ଯାହା ଶେଷରେ ଖାଦ୍ୟ ଦ୍ରବ୍ୟର ମୂଲ୍ୟ ବଢ଼଼ାଇବ। ଅର୍ଥନୀତି ବିଶେଷଜ୍ଞ ରାହୁଲ ଆହଲୁୱାଲିଆଙ୍କ କହିବା ଅନୁସାରେ, ଆନ୍ତର୍ଜାତୀୟ ବଜାରରେ ଅଶୋଧିତ ତୈଳର ଯୋଗାଣ ଅନିଶ୍ଚିତ ହୋଇପଡ଼ିଥିବାରୁ ଏହି ଦର ବୃଦ୍ଧି ଆବଶ୍ୟକ ଥିଲା। ଯଦି ବଜାର ଦର ଅନୁସାରେ ତେଲ ମୂଲ୍ୟ ସ୍ଥିର ନହୁଏ, ତେବେ ଭବିଷ୍ୟତରେ ଏହା ଆହୁରି ବଡ଼ ଆର୍ଥିକ ସଙ୍କଟ ସୃଷ୍ଟି କରିପାରେ। ଭାରତରେ ପରିବହନ ଖର୍ଚ୍ଚ ପ୍ରତ୍ୟେକ କ୍ଷେତ୍ର ସହିତ ଜଡ଼ିତ। ତେଣୁ ତେଲ ଦର ବୃଦ୍ଧି ହେଲେ ଦୁର୍ବଳ ଶ୍ରେଣୀର ପରିବାର ଓ ଗ୍ରାମୀଣ ଅର୍ଥନୀତି ସବୁଠାରୁ ଅଧିକ ପ୍ରଭାବିତ ହୋଇଥାଏ। ଆଗାମୀ ଦିନରେ ଯଦି ବିଶ୍ୱ ବଜାରରେ ଅଶୋଧିତ ତୈଳ ଦର କମେ ନାହିଁ, ତେବେ ମହଙ୍ଗା ମାଡ଼ରୁ ରକ୍ଷା ପାଇବା ଜନସାଧାରଣଙ୍କ ପାଇଁ କଷ୍ଟକର ହେବ।

ଆମେରିକୀୟ ଡଲାର ତୁଳନାରେ ଭାରତୀୟ ମୁଦ୍ରା ତଥା ଟଙ୍କା ଏହାର ସର୍ବକାଳୀନ ସର୍ବନିମ୍ନ ସ୍ତରରେ ପହଞ୍ଚିଛି। ଶୁକ୍ରବାର ଦିନ ଟଙ୍କାର ମୂଲ୍ୟ ଖସିଯାଇ ଡଲାର ପିଛା ୯୬.୧୪ ରେ ପହଞ୍ଚିଛି। ବିଶ୍ୱ ବଜାରରେ ଇରାନ ଯୁଦ୍ଧ ଏବଂ କ୍ରମାଗତ ଭାବେ ବୃଦ୍ଧି ପାଉଥିବା ଅଶୋଧିତ ତୈଳ ଦର କାରଣରୁ ଭାରତୀୟ ଅର୍ଥନୀତି ଉପରେ ଏହି ବଡ଼ ପ୍ରଭାବ ପଡ଼ିଥିବା ଦେଖିବାକୁ ମିଳିଛି।

ତୈଳ ଦର ବୃଦ୍ଧି ଓ ଇରାନ ଯୁଦ୍ଧର ପ୍ରଭାବ

ବର୍ତ୍ତମାନ ଇରାନରେ ଚାଲିଥିବା ଯୁଦ୍ଧ ଯୋଗୁଁ ବିଶ୍ୱ ବଜାରରେ ଅଶୋଧିତ ତୈଳ ଦର ବ୍ୟାପକ ଭାବରେ ବୃଦ୍ଧି ପାଇଛି। ବ୍ରେଣ୍ଟ କ୍ରୁଡ୍ ଅଏଲ୍ (Brent crude) ର ମୂଲ୍ୟ ବ୍ୟାରେଲ ପିଛା ୧୦୯ ଡଲାର ପାର୍ କରିଯାଇଛି। ଭାରତ ବିଶ୍ୱର ତୃତୀୟ ବୃହତ୍ତମ ତୈଳ ଆମଦାନୀକାରୀ ଦେଶ ହୋଇଥିବାରୁ, ତୈଳ ଦର ବୃଦ୍ଧିର ସିଧାସଳଖ ପ୍ରଭାବ ଦେଶର ଅର୍ଥବ୍ୟବସ୍ଥା ତଥା ମୁଦ୍ରା ଉପରେ ପଡ଼ୁଛି। ପୂର୍ବରୁ ଡଲାର ତୁଳନାରେ ଟଙ୍କାର ମୂଲ୍ୟ ୯୫.୯୫ ଥିବା ବେଳେ ବର୍ତ୍ତମାନ ଏହା ଖସିଯାଇ ୯୬.୧୩୫୦ ରେ କାରବାର କରୁଛି।

ବିଦେଶୀ ପୁଞ୍ଜି ପ୍ରତ୍ୟାହାର ଓ ମୁଦ୍ରାସ୍ଫୀତି ଭୟ

ଆମେରିକାରେ ବଣ୍ଡ୍ ୟିଲ୍ଡ (bond yields) ବୃଦ୍ଧି ଏବଂ ଦୃଢ଼ ଡଲାର ସ୍ଥିତି ଯୋଗୁଁ ବିଦେଶୀ ନିବେଶକମାନେ ଭାରତୀୟ ବଜାରରୁ ନିଜର ପୁଞ୍ଜି ପ୍ରତ୍ୟାହାର କରୁଛନ୍ତି। ବର୍ଷ ଆରମ୍ଭରୁ ଏପର୍ଯ୍ୟନ୍ତ ଟଙ୍କାର ମୂଲ୍ୟ ପ୍ରାୟ ୬ ପ୍ରତିଶତ ହ୍ରାସ ପାଇଲାଣି। ଆର୍ଥିକ ବିଶେଷଜ୍ଞଙ୍କ ମତରେ, ଯଦି ଯୁଦ୍ଧ ଲାଗିରହେ ଏବଂ ଅଶୋଧିତ ତୈଳ ଦର ବ୍ୟାରେଲ ପିଛା ୧୪୦ ରୁ ୧୫୦ ଡଲାର ପର୍ଯ୍ୟନ୍ତ ପହଞ୍ଚେ, ତେବେ ଆଗାମୀ ଦିନରେ ଡଲାର ତୁଳନାରେ ଟଙ୍କାର ମୂଲ୍ୟ ୯୭.୫ ରୁ ୯୮.୫ ପର୍ଯ୍ୟନ୍ତ ଖସିଯାଇପାରେ ବୋଲି କୋଟାକ୍ ସିକ୍ୟୁରିଟିଜ୍ (Kotak Securities) ର ଗବେଷଣା ମୁଖ୍ୟ ଅନିନ୍ଦ୍ୟ ବାନାର୍ଜୀ ପ୍ରକାଶ କରିଛନ୍ତି।

ଆରବିଆଇ ହସ୍ତକ୍ଷେପର ଆବଶ୍ୟକତା

ଭାରତୀୟ ମୁଦ୍ରାର ଏହି କ୍ରମାଗତ ଅବନତିକୁ ରୋକିବା ପାଇଁ ବର୍ତ୍ତମାନ କେନ୍ଦ୍ରୀୟ ବ୍ୟାଙ୍କ ତଥା ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (RBI) ର ହସ୍ତକ୍ଷେପ ଜରୁରୀ ହୋଇପଡ଼ିଛି ବୋଲି ଅର୍ଥନୈତିକ ବିଶେଷଜ୍ଞମାନେ ମତ ଦେଉଛନ୍ତି। ଷ୍ଟାଣ୍ଡାର୍ଡ ଚାର୍ଟାର୍ଡ ବ୍ୟାଙ୍କ (Standard Chartered Bank) ର ଇଣ୍ଡିଆ ଇକୋନୋମିକ୍ସ ମୁଖ୍ୟ ଅନୁଭୂତି ସହାୟ ଙ୍କ ଅନୁଯାୟୀ, ଦେଶରେ ମୁଦ୍ରାସ୍ଫୀତି ନିୟନ୍ତ୍ରଣ କରିବା ସହ ଟଙ୍କାର ସ୍ଥିତିରେ ସୁଧାର ଆଣିବା ପାଇଁ ଆରବିଆଇ କୁ କଠୋର ଆର୍ଥିକ ନୀତି ଆପଣାଇବାକୁ ପଡ଼ିପାରେ।

ଦେଶରେ ଚିନି ଦର ବୃଦ୍ଧିକୁ ନିୟନ୍ତ୍ରଣ କରିବା ଏବଂ ଘରୋଇ ବଜାରରେ ଏହାର ପର୍ଯ୍ୟାପ୍ତ ଉପଲବ୍ଧତା ସୁନିଶ୍ଚିତ କରିବା ପାଇଁ କେନ୍ଦ୍ର ସରକାର ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି। ବୁଧବାର ଦିନ ସରକାରଙ୍କ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶନାମା ଅନୁଯାୟୀ, ଆସନ୍ତା ୩୦ ସେପ୍ଟେମ୍ବର ୨୦୨୬ ପର୍ଯ୍ୟନ୍ତ କଞ୍ଚା, ଧଳା ଏବଂ ରିଫାଇଣ୍ଡ (ସଫା) ଚିନି ରପ୍ତାନି ଉପରେ ତୁରନ୍ତ ପ୍ରଭାବ ସହିତ ସମ୍ପୂର୍ଣ୍ଣ କଟକଣା ଲଗାଯାଇଛି। ବାଣିଜ୍ୟ ଏବଂ ଶିଳ୍ପ ମନ୍ତ୍ରଣାଳୟ ଅଧୀନରେ ଥିବା ଡାଇରେକ୍ଟୋରେଟ୍ ଜେନେରାଲ୍ ଅଫ୍ ଫରେନ୍ ଟ୍ରେଡ୍ (DGFT) ଏହି ନିଷ୍ପତ୍ତି ନେଇଛନ୍ତି, ଯାହା ଫଳରେ ଚିନି ରପ୍ତାନି ନୀତିକୁ 'ପ୍ରତିବନ୍ଧିତ'ରୁ 'ନିଷିଦ୍ଧ' ବର୍ଗକୁ ପରିବର୍ତ୍ତନ କରାଯାଇଛି।

କାହିଁକି ଲାଗିଲା ଏହି ରପ୍ତାନି କଟକଣା?

ଦେଶର ପ୍ରମୁଖ ଆଖୁ ଉତ୍ପାଦନକାରୀ ଅଞ୍ଚଳଗୁଡ଼ିକରେ କ୍ରମାଗତ ଭାବେ ଦ୍ୱିତୀୟ ବର୍ଷ ପାଇଁ ଆଖୁ ଉତ୍ପାଦନ ହ୍ରାସ ପାଇବା ଆଶଙ୍କା କରାଯାଉଛି। ଏହା ସହିତ ଅଲ୍ ନିନୋ (El Nino) ପ୍ରଭାବ ଯୋଗୁଁ ମୌସୁମୀ ବର୍ଷାରେ ବାଧା ଏବଂ ପ୍ରତିକୂଳ ପାଗ ଯୋଗୁଁ ଆଖୁ ଅମଳ ପ୍ରଭାବିତ ହେବାର ସମ୍ଭାବନା ରହିଛି। ପୂର୍ବରୁ ସରକାର ୧୫ ଲକ୍ଷ ମେଟ୍ରିକ୍ ଟନ୍ ଚିନି ରପ୍ତାନି ପାଇଁ ଅନୁମତି ଦେଇଥିଲେ, କିନ୍ତୁ ବର୍ତ୍ତମାନ ଘରୋଇ ଚାହିଦା ତୁଳନାରେ ଉତ୍ପାଦନ କମ୍ ହେବାର ଆଶଙ୍କା ଥିବାରୁ ଦରଦାମ୍ ନିୟନ୍ତ୍ରଣ ପାଇଁ ରପ୍ତାନି ବନ୍ଦ କରିବାକୁ ନିଷ୍ପତ୍ତି ନିଆଯାଇଛି।

କେଉଁ କ୍ଷେତ୍ରରେ ମିଳିବ ଛାଡ଼?

ଏହି କଟକଣା ସତ୍ତ୍ୱେ କିଛି ନିର୍ଦ୍ଦିଷ୍ଟ କ୍ଷେତ୍ରରେ ସରକାର ଛାଡ଼ ପ୍ରଦାନ କରିଛନ୍ତି। CXL ଏବଂ TRQ କୋଟା ଅଧୀନରେ ୟୁରୋପୀୟ ୟୁନିଅନ୍ (EU) ଏବଂ ଆମେରିକା (USA) କୁ ହେଉଥିବା ରପ୍ତାନି ଉପରେ ଏହି ନିୟମ ଲାଗୁ ହେବ ନାହିଁ। ଏହାବ୍ୟତୀତ ଖାଦ୍ୟ ସୁରକ୍ଷା ଆବଶ୍ୟକତା ପୂରଣ କରିବା ପାଇଁ ଅନ୍ୟ ଦେଶର ସରକାରଙ୍କ ଅନୁରୋଧ କ୍ରମେ ସରକାର-ଟୁ-ସରକାର (G2G) ଚୁକ୍ତି ଅଧୀନରେ ତଥା ଆଡଭାନ୍ସ ଅଥୋରାଇଜେସନ୍ ସ୍କିମ୍ (AAS) ମାଧ୍ୟମରେ ରପ୍ତାନି ଜାରି ରହିବ। ଯେଉଁ ଜାହାଜଗୁଡ଼ିକରେ କଟକଣା ଲାଗୁ ହେବା ପୂର୍ବରୁ ଚିନି ଲୋଡିଂ ଆରମ୍ଭ ହୋଇସାରିଛି କିମ୍ବା ବନ୍ଦରରେ କାଗଜପତ୍ର ଦାଖଲ ହୋଇସାରିଛି, ସେଗୁଡ଼ିକୁ ରପ୍ତାନି ପାଇଁ ଅନୁମତି ମିଳିବ।

ବିଶ୍ୱ ବଜାର ଉପରେ ଏହାର ପ୍ରଭାବ

ବ୍ରାଜିଲ ପରେ ଭାରତ ହେଉଛି ବିଶ୍ୱର ଦ୍ୱିତୀୟ ବୃହତ୍ତମ ଚିନି ଉତ୍ପାଦନକାରୀ ଏବଂ ରପ୍ତାନିକାରୀ ଦେଶ। ଭାରତର ଏହି ଅଚାନକ ନିଷ୍ପତ୍ତି ଯୋଗୁଁ ବିଶ୍ୱ ବଜାରରେ ଚିନିର ଅଭାବ ଦେଖାଦେବା ସହ ଦରଦାମ୍ ବୃଦ୍ଧି ପାଇବାର ଆଶଙ୍କା ସୃଷ୍ଟି ହୋଇଛି। ରିପୋର୍ଟ ଅନୁଯାୟୀ, ଏହି ଘୋଷଣା ପରେ ନ୍ୟୁୟର୍କ ବଜାରରେ କଞ୍ଚା ଚିନି ଦରରେ ୨% ଏବଂ ଲଣ୍ଡନ ବଜାରରେ ଧଳା ଚିନି ଦରରେ ୩% ବୃଦ୍ଧି ପରିଲକ୍ଷିତ ହୋଇଛି। ଏହି ପରିସ୍ଥିତିରେ ବ୍ରାଜିଲ ଏବଂ ଥାଇଲାଣ୍ଡ ଭଳି ପ୍ରତିଦ୍ୱନ୍ଦ୍ୱୀ ଦେଶଗୁଡ଼ିକ ଏସିଆ ଓ ଆଫ୍ରିକା ବଜାରରେ ନିଜର ରପ୍ତାନି ବୃଦ୍ଧି କରି ଫାଇଦା ଉଠାଇବାର ସୁଯୋଗ ପାଇବେ।

ନୂଆଦିଲ୍ଲୀ: ପଶ୍ଚିମ ଏସିଆରେ ଲାଗି ରହିଥିବା ବିବାଦ, ବିମାନ ଇନ୍ଧନ ଦର ବୃଦ୍ଧି ଏବଂ ଆକାଶମାର୍ଗ କଟକଣାକୁ ଦୃଷ୍ଟିରେ ରଖି ଏୟାର ଇଣ୍ଡିଆ ଏକ ବଡ଼ ପଦକ୍ଷେପ ନେଇଛି। ଜୁନ୍‌ରୁ ଅଗଷ୍ଟ ୨୦୨୬ ମଧ୍ୟରେ ୨୯ଟି ଅନ୍ତର୍ଜାତୀୟ ରୁଟ୍‌ରେ ବିମାନ ଉଡ଼ାଣ ବାତିଲ ଏବଂ ହ୍ରାସ କରିବାକୁ କମ୍ପାନୀ ବୁଧବାର ଘୋଷଣା କରିଛି।

ବିମାନ ସଂସ୍ଥା ପକ୍ଷରୁ କୁହାଯାଇଛି ଯେ ଇରାନ ଯୁଦ୍ଧ ସଙ୍କଟ ଏବଂ ହରମୁଜ୍ ପ୍ରଣାଳୀ ଅଞ୍ଚଳରେ ଅସ୍ଥିରତା କାରଣରୁ ବିଶ୍ୱବ୍ୟାପୀ ବିମାନ ଚଳାଚଳ ବାଧାପ୍ରାପ୍ତ ହେଉଛି। ତେଣୁ ଯାତ୍ରୀମାନଙ୍କୁ ଶେଷ ମୁହୂର୍ତ୍ତରେ ହେଉଥିବା ଅସୁବିଧାରୁ ରକ୍ଷା କରିବା ଏବଂ ପରିଚାଳନାଗତ ସ୍ଥିରତା ଆଣିବା ପାଇଁ ଏହି ଅସ୍ଥାୟୀ ପରିବର୍ତ୍ତନ କରାଯାଇଛି। କିଛି ନିର୍ଦ୍ଦିଷ୍ଟ ଅଞ୍ଚଳରେ ଆକାଶମାର୍ଗ କଟକଣା ଏବଂ ଅନ୍ତର୍ଜାତୀୟ ଉଡ଼ାଣ ପାଇଁ ରେକର୍ଡସ୍ତରୀୟ ଇନ୍ଧନ ଦର ଯୋଗୁଁ ବାଣିଜ୍ୟିକ କ୍ଷତିକୁ ଏଡ଼ାଇବା ଲାଗି ଏଭଳି ନିଷ୍ପତ୍ତି ନିଆଯାଇଛି।

ଉଡ଼ାଣ ହ୍ରାସ ସତ୍ତ୍ୱେ କମ୍ପାନୀ ପକ୍ଷରୁ କୁହାଯାଇଛି ଯେ, ପ୍ରତି ମାସରେ ପାଞ୍ଚଟି ମହାଦେଶକୁ ୧୨୦୦ରୁ ଅଧିକ ଅନ୍ତର୍ଜାତୀୟ ବିମାନ ଚଳାଚଳ ଜାରି ରହିବ। ଏଥିରେ ଉତ୍ତର ଆମେରିକାକୁ ସପ୍ତାହକୁ ୩୩ଟି ଉଡ଼ାଣ, ୟୁରୋପକୁ ୪୭ଟି, ବ୍ରିଟେନକୁ ୫୭ଟି, ଅଷ୍ଟ୍ରେଲିଆକୁ ୮ଟି, ଦୂର ପ୍ରାଚ୍ୟ, ଦକ୍ଷିଣ-ପୂର୍ବ ଏସିଆ ଓ ସାର୍କ ଅଞ୍ଚଳକୁ ୧୫୮ଟି ଏବଂ ମରିସସକୁ ୭ଟି ଉଡ଼ାଣ ସାମିଲ ରହିଛି।

ଗତ ଆର୍ଥିକ ବର୍ଷରେ ଏୟାର ଇଣ୍ଡିଆ ପ୍ରାୟ ୨୨,୦୦୦ କୋଟି ଟଙ୍କାରୁ ଅଧିକ କ୍ଷତି ସହିଥିବା ଆକଳନ କରାଯାଇଛି। ଖର୍ଚ୍ଚ ନିୟନ୍ତ୍ରଣ ପାଇଁ କମ୍ପାନୀ ମେ ମାସରେ ମଧ୍ୟ ଦୈନିକ ପ୍ରାୟ ୯୦ଟି ବିମାନ ଉଡ଼ାଣ ହ୍ରାସ କରିଥିଲା। ଏହି ନୂଆ ପରିବର୍ତ୍ତନ ଯୋଗୁଁ ପ୍ରଭାବିତ ହୋଇଥିବା ଯାତ୍ରୀମାନଙ୍କୁ ବିନା ମୂଲ୍ୟରେ ତାରିଖ ପରିବର୍ତ୍ତନ କିମ୍ବା ସମ୍ପୂର୍ଣ୍ଣ ରିଫଣ୍ଡ (ଅର୍ଥ ଫେରସ୍ତ) ସୁବିଧା ଯୋଗାଇ ଦିଆଯିବ ବୋଲି ବିମାନ ସଂସ୍ଥା ପ୍ରତିଶ୍ରୁତି ଦେଇଛି। ଏଥିସହ ଖର୍ଚ୍ଚ କାଟ୍ ପାଇଁ ଘରୋଇ ତଥା ସ୍ୱଳ୍ପ ଦୂରଗାମୀ ଅନ୍ତର୍ଜାତୀୟ ଉଡ଼ାଣରେ ଭୋଜନ ସେବାକୁ ଇଚ୍ଛାଧୀନ କରିବାକୁ ମଧ୍ୟ ବିଚାର କରାଯାଉଛି।

ସୂଚନାଯୋଗ୍ୟ, ପଶ୍ଚିମ ଏସିଆ ବିବାଦ କାରଣରୁ ଅଶୋଧିତ ତୈଳ ଦର ବୃଦ୍ଧି ପାଇଛି ଏବଂ ବିମାନଗୁଡ଼ିକୁ ସୁରକ୍ଷିତ ଆକାଶମାର୍ଗ ଦେଇ ଅଧିକ ବାଟ ବୁଲି ଯିବାକୁ ପଡ଼ୁଛି। ବିଶ୍ୱବ୍ୟାପୀ ଦେଖାଦେଇଥିବା ଏହି ଆର୍ଥିକ ତଥା ଇନ୍ଧନ ସଙ୍କଟ ମଧ୍ୟରେ ବୈଦେଶିକ ମୁଦ୍ରା ସଂରକ୍ଷଣ ପାଇଁ ଅନାବଶ୍ୟକ ବିଦେଶ ଯାତ୍ରାକୁ ସ୍ଥଗିତ ରଖିବା ସହ ଘରୁ କାମ (Work from Home) ଏବଂ ଭର୍ଚୁଆଲ ମିଟିଂକୁ ଆପଣାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ଦେଶବାସୀଙ୍କୁ ନିବେଦନ କରିଥିଲେ।

ନୂଆଦିଲ୍ଲୀ: ୧୬ ଦଫାର ବିଭିନ୍ନ ଦାବିନେଇ ସାରା ଦେଶରେ ଷ୍ଟେଟବ୍ୟାଙ୍କ ଅଫ୍‌ ଇଣ୍ଡିଆର କର୍ମଚାରୀମାନେ ୨୫ ଓ ୨୬ ମେରେ ଦୁଇ ଦିନିଆ ଦେଶବ୍ୟାପୀ ହଡ଼ତାଳ ଡ଼ାକରା ଦେଇଛନ୍ତି। କର୍ମଚାରୀଙ୍କ ଅଧିକାର ସୁରକ୍ଷା, କାର୍ଯ୍ୟକ୍ଷେତ୍ରରେ ପରିବେଶର ସୁଧାର ଓ ଗ୍ରାହକ ସେବାକୁ ଧ୍ୟାନରେ ରଖି ଏହି ଡ଼ାକରା ଦିଆଯାଇଥିବା କୁହାଯାଉଛି। ବ୍ୟାଙ୍କରେ ଖାଲି ମେସେଞ୍ଜର୍‌ ପଦରେ ସ୍ଥାୟୀ ନିଯୁକ୍ତି, ସୁରକ୍ଷା ପାଇଁ ପର୍ଯ୍ୟାପ୍ତ ସୁରକ୍ଷାକର୍ମୀଙ୍କ ନିଯୁକ୍ତି,  ପେନସନ ଫଣ୍ଡ ମ୍ୟାନେଜର୍‌ ବାଛିବାର ସୁବିଧା, ଇଣ୍ଟର ସର୍କଲ୍‌ ଟ୍ରାନ୍ସଫର ସୁଯୋଗ, ଆଉଟସୋର୍ସିଂ ବନ୍ଦ, ପର୍ଯ୍ୟାପ୍ତ କର୍ମଚାରୀ ନିଯୁକ୍ତି, ବେତନ ଓ ସୁବିଧାରେ ସମାନତା, ଅବସରପ୍ରାପ୍ତ କର୍ମଚାରୀଙ୍କୁ ଅଧିକ ସୁବିଧା, ଡ଼ାକ୍ତରୀ ସେବାର ସରଳୀକରଣ ଆଦି ପାଇଁ କର୍ମଚାରୀମାନେ ଦାବି କରିଛନ୍ତି । 

କର୍ମଚାରୀମାନଙ୍କ ଆନ୍ଦୋଳନ ଯୋଗୁଁ ଦେଶରେ ବ୍ୟାଙ୍କ ସେବା ବ୍ୟାପକ ପ୍ରଭାବିତ ହେବା ଆଶଙ୍କା କରାଯାଉଛି। ୨୩ ମଇ ଚତୁର୍ଥ ଶନିବାର ଓ ୨୪ ମଇ ରବିବାର ଥିବାରୁ ବ୍ୟାଙ୍କ ବନ୍ଦ ରହିବ। ୨୫ ଓ ୨୬ ମଇରେ କର୍ମଚାରୀଙ୍କ ଆନ୍ଦୋଳନ ଓ ୨୭ ମଇରେ ବକ୍ରିଦ୍‌ ପାଇଁ ବ୍ୟାଙ୍କ ବନ୍ଦ ରହିଲେ କ୍ରମାଗତ ୫ ଦିନ ପର୍ଯ୍ୟନ୍ତ ଗ୍ରାହକ ସେବା ବାଧାପ୍ରାପ୍ତ ହେବା ଆଶଙ୍କା ରହିଛି ।