ରାଜସ୍ଥାନର ରାଜଧାନୀ ଜୟପୁରରେ ଘଟିଥିବା ଏକ ଲୋମହର୍ଷକ ହତ୍ୟାକାଣ୍ଡ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଜଣେ ଝିଅ ନିଜ ଜନ୍ମକଲା ମା'ଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର ରଚିବା ଏବଂ ସୁପାରି କିଲର ଲଗାଇବା ଘଟଣା ସାମ୍ନାକୁ ଆସିଛି। ପୋଲିସର ସୂଚନାନୁସାରେ, ଏଲଏଲବି (LLB) ଶେଷ ବର୍ଷର ଛାତ୍ରୀ ଥିବା ଆୟୁଷୀ ନିଜ ମା' ନୀରଜ ଶର୍ମାଙ୍କୁ ରାସ୍ତାରୁ ହଟାଇବା ପାଇଁ ୭ ଲକ୍ଷ ଟଙ୍କାର ସୁପାରି ଦେଇଥିଲେ। ଗତ ଜୁଲାଇ ୩ ତାରିଖରେ ଜୟପୁରର ପ୍ରତାପ ନଗର ଅଞ୍ଚଳରେ ଏକ ଦ୍ରୁତଗାମୀ ସ୍କର୍ପିଓ ଗାଡ଼ି ମାଡ଼ିଯିବାରୁ ନୀରଜ ଶର୍ମାଙ୍କର ମୃତ୍ୟୁ ଘଟିଥିଲା। ପ୍ରଥମେ ଏହା ଏକ ଦୁର୍ଘଟଣା ବୋଲି ଲାଗୁଥିବା ବେଳେ ପୋଲିସର ତଦନ୍ତ ପରେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ବୋଲି ଜଣାପଡିଛି।

୧୪ କୋଟିର ସମ୍ପତ୍ତି ଓ ସରକାରୀ ଚାକିରି ପାଇଁ ହତ୍ୟା

ଏହି ଜଘନ୍ୟ ହତ୍ୟାକାଣ୍ଡ ପଛର ମୁଖ୍ୟ କାରଣ ହେଉଛି ପରିବାରର ବିପୁଳ ସମ୍ପତ୍ତି ଏବଂ ଏକ ସରକାରୀ ଚାକିରି। ଆୟୁଷୀଙ୍କ ପିତା ବିଜୟ ବଶିଷ୍ଠ ରାଜସ୍ଥାନ ହାଇକୋର୍ଟରେ କୋର୍ଟ ମାଷ୍ଟର ଭାବେ କାର୍ଯ୍ୟରତ ଥିଲେ। ଏପ୍ରିଲ ୨୦୨୫ରେ ତାଙ୍କର ମୃତ୍ୟୁ ପରେ ପରିବାର ନିକଟରେ ପ୍ରାୟ ୧୪ କୋଟି ଟଙ୍କାର ସମ୍ପତ୍ତି (ଚାଷ ଜମି ଏବଂ ପ୍ଲଟ୍) ରହିଥିଲା। ପରିଜନଙ୍କ ଅଭିଯୋଗ ଅନୁଯାୟୀ, ବାପାଙ୍କ ମୃତ୍ୟୁ ପରେ ଆୟୁଷୀ ଅନୁକମ୍ପାମୂଳକ ନିଯୁକ୍ତି ପାଇବା ସହ ସମସ୍ତ ସମ୍ପତ୍ତି ନିଜ ନାମରେ କରିବାକୁ ଚାହୁଁଥିଲେ। ତେବେ ପୋଲିସ ପଚରାଉଚରା ବେଳେ ଆୟୁଷୀ କହିଛନ୍ତି ଯେ ତାଙ୍କ ମା' ତାଙ୍କର ଜଣେ ସ୍ୱତନ୍ତ୍ର କ୍ଷମତାସମ୍ପନ୍ନ (Special child) ଭାଇକୁ ଅଧିକ ଭଲ ପାଉଥିଲେ। ସେ ନିଜକୁ ପରିବାରରେ ଏକାକୀ ଅନୁଭବ କରୁଥିଲେ, ଯେଉଁଥିପାଇଁ ମା'ଙ୍କ ସହ ତାଙ୍କର ସମ୍ପର୍କ ଖରାପ ଥିଲା ଏବଂ ବାରମ୍ବାର ଝଗଡ଼ା ହେଉଥିଲା।

ମାମୁଁଙ୍କ ସାଂଘାତିକ ଅଭିଯୋଗ, ହ୍ୱାଟ୍ସଆପ୍ ଷ୍ଟାଟସରେ ଥିଲା ଇସାରା

ମା'ଙ୍କ ହତ୍ୟା ଘଟଣାର ତଦନ୍ତ ଚାଲିଥିବା ବେଳେ ଆୟୁଷୀଙ୍କ ମାମୁଁ ରାକେଶ ଶର୍ମା ପୋଲିସ ନିକଟରେ ଏକ ସାଂଘାତିକ ଅଭିଯୋଗ ଆଣିଛନ୍ତି, ଯାହା ମାମଲାକୁ ଏକ ନୂଆ ମୋଡ଼ ଦେଇଛି। ତାଙ୍କ କହିବା ଅନୁଯାୟୀ, ପରିବାରରେ ଏହା ପ୍ରଥମ ସନ୍ଦେହଜନକ ମୃତ୍ୟୁ ନୁହେଁ। ଏହାପୂର୍ବରୁ ଏପ୍ରିଲ ୨୦୨୫ରେ ଆୟୁଷୀଙ୍କ ପିତା ବିଜୟଙ୍କ ମୃତ୍ୟୁ ମଧ୍ୟ ସ୍ୱାଭାବିକ ନଥିଲା ଏବଂ ସେହି ଘଟଣାର ପୁନର୍ବିଚାର ହେବା ଆବଶ୍ୟକ। ବ୍ରେନ୍ ଟ୍ୟୁମରରୁ ସୁସ୍ଥ ହେଉଥିବା ବେଳେ ହଠାତ୍ ତାଙ୍କର ମୃତ୍ୟୁ ଘଟିଥିଲା।

ଏହା ବ୍ୟତୀତ, ରାକେଶ ଶର୍ମା ଅଭିଯୋଗ କରିଛନ୍ତି ଯେ ଆୟୁଷୀ ନିଜ ମା'ଙ୍କୁ ଧମକ ଦେଇଥିଲେ। ମୃତ୍ୟୁର କିଛି ଦିନ ପୂର୍ବରୁ ନୀରଜ ଶର୍ମା ନିଜ ହ୍ୱାଟ୍ସଆପ୍ ଷ୍ଟାଟସରେ ଲେଖିଥିଲେ, "ବସ୍ ଆଉ ଦୁଇ ଦିନର ଜୀବନ ବାକି ଅଛି"। ବର୍ତ୍ତମାନ ପୋଲିସ ୧୪ କୋଟିର ସମ୍ପତ୍ତି, ସରକାରୀ ଚାକିରି ଏବଂ ପରିବାରରେ ହୋଇଥିବା ଦୁଇଟି ମୃତ୍ୟୁ ମଧ୍ୟରେ ଥିବା ସମ୍ପର୍କକୁ ନେଇ ଅଧିକ ଖୋଳତାଡ଼ କରୁଛି।

ଦକ୍ଷିଣ ଭିଏତନାମର ଫୁ କୁଓକ ଦ୍ୱୀପ (Phu Quoc Island) ନିକଟରେ ଏକ ବଡ଼ ଧରଣର ଦୁର୍ଘଟଣା ଘଟିଛି। ଶନିବାର ଦିନ ୩୨ ଜଣ ଭାରତୀୟ ପର୍ଯ୍ୟଟକଙ୍କୁ ନେଇ ଯାଉଥିବା ଏକ ସ୍ପିଡ୍ ବୋଟ୍ ସମୁଦ୍ର ମଝିରେ ଓଲଟି ପଡ଼ିବାରୁ ୧୫ ଜଣ ଭାରତୀୟଙ୍କର ପ୍ରାଣହାନି ଘଟିଥିବା ବେଳେ ୨୧ ଜଣଙ୍କୁ ଜୀବିତ ଉଦ୍ଧାର କରାଯାଇଛି।

କିପରି ଘଟିଲା ଦୁର୍ଘଟଣା?

ସୂଚନା ଅନୁଯାୟୀ, ଏହି ସ୍ପିଡ୍ ବୋଟରେ ୩୨ ଜଣ ଭାରତୀୟ ପର୍ଯ୍ୟଟକ ଏବଂ ୪ ଜଣ କର୍ମଚାରୀଙ୍କୁ ମିଶାଇ ସମୁଦାୟ ୩୬ ଜଣ ଯାତ୍ରୀ ସ୍ୱାର ଥିଲେ। ଫୁ କୁଓକ ଦ୍ୱୀପ ନିକଟସ୍ଥ ହୋନ୍ ମେ ରୁଟ୍ ନଗୋଇ ଠାରୁ ପ୍ରାୟ ୪୦୦ ମିଟର ଦୂରରେ ସମୁଦ୍ରର ପ୍ରବଳ ଲହଡ଼ି କାରଣରୁ ବୋଟଟି ଭାରସାମ୍ୟ ହରାଇ ଓଲଟି ପଡ଼ିଥିଲା। ଘଟଣାସ୍ଥଳରେ ଥିବା ଅନ୍ୟ ଡଙ୍ଗାଗୁଡ଼ିକ ତୁରନ୍ତ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ଏବଂ ପରେ ନୌସେନା, ତଟରକ୍ଷୀ ବାହିନୀ ଓ ସୀମା ସୁରକ୍ଷା ବଳ ଘଟଣାସ୍ଥଳରେ ପହଞ୍ଚିଥିଲେ।

ଜୋରଦାର ଉଦ୍ଧାର କାର୍ଯ୍ୟ

ସମୁଦ୍ରରେ ଉଚ୍ଚ ଲହଡ଼ି ଥିବାରୁ ଏବଂ ଅନେକ ଯାତ୍ରୀ ବୋଟ୍ ଭିତରେ ଫସି ରହିଥିବାରୁ ଉଦ୍ଧାର କାର୍ଯ୍ୟରେ ବାଧା ଉପୁଜିଥିଲା। ତଥାପି ସ୍ଥାନୀୟ ପ୍ରଶାସନର କଠିନ ପରିଶ୍ରମ ଫଳରେ ୨୧ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇ ଚିକିତ୍ସା ନିମନ୍ତେ ଡାକ୍ତରଖାନାରେ ଭର୍ତ୍ତି କରାଯାଇଛି। ସମସ୍ତ ମୃତଦେହକୁ ସମୁଦ୍ରରୁ ଉଦ୍ଧାର କରାଯାଇଥିବା ସ୍ଥାନୀୟ କର୍ତ୍ତୃପକ୍ଷ ସ୍ପଷ୍ଟ କରିଛନ୍ତି।

ଭାରତୀୟ ଦୂତାବାସର ପଦକ୍ଷେପ ଓ ହେଲ୍ପଲାଇନ୍

ଏହି ଦୁଃଖଦ ଘଟଣା ପରେ ଭିଏତନାମରେ ଥିବା ଭାରତୀୟ ଦୂତାବାସ ତୁରନ୍ତ ପଦକ୍ଷେପ ଗ୍ରହଣ କରିଛି। ପ୍ରଭାବିତ ପରିବାରକୁ ସାହାଯ୍ୟ କରିବା ପାଇଁ ହୋ ଚି ମିନ୍ ସିଟି ଏବଂ ହାନୋଇ ଠାରେ ସ୍ୱତନ୍ତ୍ର କଣ୍ଟ୍ରୋଲ୍ ରୁମ୍ ଖୋଲାଯାଇଛି। ଜରୁରୀକାଳୀନ ପରିସ୍ଥିତିରେ ଯୋଗାଯୋଗ ପାଇଁ ଦୂତାବାସ ପକ୍ଷରୁ +84 36 281 7930, +84 91 552 37 14, ଏବଂ +84 91 308 9165 ହେଲ୍ପଲାଇନ୍ ନମ୍ବର ଜାରି କରାଯାଇଛି। ସ୍ଥାନୀୟ ପ୍ରଶାସନ ସହିତ ମିଶି ଦୂତାବାସ ପକ୍ଷରୁ ସମସ୍ତ ପ୍ରକାରର ସହାୟତା ଯୋଗାଇ ଦିଆଯାଉଛି।

In a tragic incident, a boat carrying several Indian tourists has capsized near Phu Quoc Island in Vietnam a few hours ago.

Exact details of the incident are being ascertained as search and rescue operations by local authorities are ongoing.

In order to provide information…

— India in Vietnam (@AmbHanoi) July 11, 2026

ନୂଆଦିଲ୍ଲୀ: ଭାରତର ସାମୁଦ୍ରିକ ଶକ୍ତିରେ ଏକ ବଡ଼ ଧରଣର ବୃଦ୍ଧି ଘଟିଛି। ଭାରତୀୟ ନୌସେନାରେ ସାମିଲ ହେଲା INS ମହେନ୍ଦ୍ରଗିରି । ଆଜି ବିଶାଖାପାଟଣା ନାଭାଲ୍ ଡକ୍‌ୟାର୍ଡ ଠାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଷ୍ଟିଲ୍‌ଥ୍ ଫ୍ରିଗେଟ୍ ଆଇଏନଏସ ମହେନ୍ଦ୍ରଗିରି (INS Mahendragiri) କୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି।

ଆତ୍ମନିର୍ଭର ଭାରତ ଅଭିଯାନ ଅଧୀନରେ ନିର୍ମିତ ଆଇଏନଏସ ମହେନ୍ଦ୍ରଗିରି ହେଉଛି ପ୍ରୋଜେକ୍ଟ ୧୭ଏ (Project 17A) ଅଧୀନରେ ଥିବା ଷଷ୍ଠ ସ୍ୱଦେଶୀ ଷ୍ଟିଲ୍‌ଥ୍ ଫ୍ରିଗେଟ୍ ଏବଂ ମାଜାଗନ୍ ଡକ୍ ସିପବିଲ୍ଡର୍ସ ଲିମିଟେଡ୍ (MDL) ଦ୍ୱାରା ନିର୍ମିତ ଚତୁର୍ଥ ଯୁଦ୍ଧପୋତ। ଏଥିରେ ୭୫ ପ୍ରତିଶତରୁ ଅଧିକ ସ୍ୱଦେଶୀ ଉପକରଣ ବ୍ୟବହାର କରାଯାଇଛି, ଯାହା ଭାରତର ବୃଦ୍ଧି ପାଉଥିବା ପ୍ରତିରକ୍ଷା ଉତ୍ପାଦନ କ୍ଷମତାକୁ ପ୍ରଦର୍ଶିତ କରୁଛି। ଏହି ଅବସରରେ ପ୍ରତିରକ୍ଷା ମନ୍ତ୍ରୀ ଶ୍ରୀ ସିଂହ ଆନ୍ଧ୍ରପ୍ରଦେଶକୁ "ଭାରତର ପ୍ରତିରକ୍ଷା ଏବଂ ଏରୋସ୍ପେସ୍ ଉତ୍ପାଦନର ଏକ ନୂତନ ପାୱାରହାଉସ୍" ବୋଲି ବର୍ଣ୍ଣନା କରିଛନ୍ତି। ଏହାବ୍ୟତୀତ ସେ ନୌସେନା କର୍ମଚାରୀ ଓ ଜାହାଜ ନିର୍ମାଣକାରୀଙ୍କୁ ସେମାନଙ୍କର ଅବଦାନ ପାଇଁ ଅଭିନନ୍ଦନ ଜଣାଇଥିଲେ।

ଏହି ଅତ୍ୟାଧୁନିକ ଯୁଦ୍ଧପୋତ ଏକାସାଙ୍ଗରେ ଆକାଶ, ସମୁଦ୍ର ଏବଂ ପାଣି ଭିତରୁ ଆସୁଥିବା ବିପଦର ମୁକାବିଲା କରିବାକୁ ସକ୍ଷମ। ଏହାକୁ ଭୂପୃଷ୍ଠରୁ ଭୂପୃଷ୍ଠକୁ ଲକ୍ଷ୍ୟ ଭେଦ କରିପାରୁଥିବା ଶକ୍ତିଶାଳୀ ବ୍ରହ୍ମୋସ (BrahMos) କ୍ଷେପଣାସ୍ତ୍ର ଦ୍ୱାରା ମଧ୍ୟ ସଜ୍ଜିତ କରାଯାଇପାରିବ। ଶ୍ରୀ ସିଂହ ଜାହାଜର କ୍ରେଷ୍ଟ ବା ପ୍ରତୀକ ଉପରେ ଆଲୋକପାତ କରିଥିଲେ, ଯେଉଁଥିରେ ମହେନ୍ଦ୍ରଗିରି ପର୍ବତ ଉପରେ ଏକ ଛଞ୍ଚାଣ (Goshawk) ବସିଥିବାର ଚିତ୍ର ରହିଛି। ଏହା ତୀକ୍ଷ୍ଣ ଦୃଷ୍ଟି, ଧୈର୍ଯ୍ୟ ଏବଂ ନିର୍ଣ୍ଣାୟକ କାର୍ଯ୍ୟାନୁଷ୍ଠାନର ପ୍ରତୀକ ଅଟେ, ଯାହାକି ଆଧୁନିକ ନୌସେନା କାର୍ଯ୍ୟକଳାପ ପାଇଁ ଅତ୍ୟନ୍ତ ଜରୁରୀ। ଏହି ଯୁଦ୍ଧପୋତଟି ଏବେ ନୌସେନାର ଇଷ୍ଟର୍ଣ୍ଣ ଫ୍ଲିଟ୍ (Eastern Fleet) ରେ ସାମିଲ ହୋଇଛି।

ନୌସେନା ମୁଖ୍ୟ ଆଡମିରାଲ କ୍ରିଷ୍ଣା ସ୍ୱାମୀନାଥନ ସୂଚନା ଦେଇଛନ୍ତି ଯେ, ପ୍ରୋଜେକ୍ଟ ୧୭ଏ ଅଧୀନରେ ନିର୍ମିତ ହେବାକୁ ଥିବା ସାତୋଟି ଯୁଦ୍ଧପୋତ ମଧ୍ୟରୁ ଆଇଏନଏସ ମହେନ୍ଦ୍ରଗିରି ହେଉଛି ଷଷ୍ଠ ଯୁଦ୍ଧପୋତ। ଏହା ଓଡ଼ିଶାର ଐତିହାସିକ ମହେନ୍ଦ୍ରଗିରି ପର୍ବତ ନାମରେ ନାମିତ ହୋଇଛି। ଏହା ୧୯୭୨ ରୁ ୨୦୧୩ ମସିହା ପର୍ଯ୍ୟନ୍ତ ଦେଶର ସେବା କରିଥିବା ନୀଳଗିରି-କ୍ଲାସ୍ ଫ୍ରିଗେଟ୍ (Nilgiri-class) ର ଐତିହ୍ୟକୁ ବଜାୟ ରଖିଛି ବୋଲି ସେ ପ୍ରକାଶ କରିଛନ୍ତି।

ତେଲେଙ୍ଗାନା: ତେଲେଙ୍ଗାନାର ରଙ୍ଗାରେଡ୍ଡୀ ଜିଲ୍ଲାରେ ଏକ ହୃଦୟବିଦାରକ ଗଣହତ୍ୟା ଘଟଣା ସାମ୍ନାକୁ ଆସିଛି। ଜଣେ ୩୫ ବର୍ଷୀୟ ବ୍ୟକ୍ତି ନିଜ ପତ୍ନୀ ଏବଂ ଦୁଇ ନାବାଳକ ପୁଅଙ୍କୁ ହତ୍ୟା କରିବା ପରେ ତାଙ୍କ ନାମରେ ଯୌନ ନିର୍ଯାତନା ଅଭିଯୋଗ ଆଣିଥିବା ଜଣେ ନାବାଳିକା ଓ ତାଙ୍କ ପରିବାରର ଅନ୍ୟ ଦୁଇ ସଦସ୍ୟଙ୍କୁ ମଧ୍ୟ ଅତି ନିର୍ମମ ଭାବେ ହତ୍ୟା କରିଛନ୍ତି।

ପୋଲିସ ସୂତ୍ରରୁ ପ୍ରକାଶ ଯେ, ଅଭିଯୁକ୍ତ ରାଜକୁମାର ଶୁକ୍ରବାର ରାତିରେ ଏହି ହତ୍ୟାକାଣ୍ଡ ଘଟାଇଛନ୍ତି। ସେ ପ୍ରଥମେ ଶାବାଦ ସ୍ଥିତ ନିଜ ବାସଭବନରେ ନିଜ ପତ୍ନୀ ପାର୍ବତୀ ସରିତା ଏବଂ ତାଙ୍କର ୪ ବର୍ଷ ଓ ୧ ବର୍ଷର ଦୁଇ ପୁଅଙ୍କୁ ହତ୍ୟା କରିଥିଲେ। ପତ୍ନୀଙ୍କ ମୃତଦେହ ଥିବା ରୁମରୁ ସଂଘର୍ଷର ଚିହ୍ନ ମିଳିଥିବା ବେଳେ ଦୁଇ ଶିଶୁଙ୍କୁ ନିଦ୍ରିତ ଅବସ୍ଥାରେ ହତ୍ୟା କରାଯାଇଥିବା ସନ୍ଦେହ କରାଯାଉଛି। ସମ୍ପର୍କୀୟଙ୍କ ଅନୁଯାୟୀ ଘରର କବାଟ ଭିତରପଟୁ ବନ୍ଦ ଥିଲା ଏବଂ ପଙ୍ଖା, ଏସି ଓ କୁଲର୍ ଚାଲୁ ରହିଥିଲା। ରାଜକୁମାର ଏବଂ ପାର୍ବତୀ ୨୦୧୮ ମସିହାରେ ପ୍ରେମ ବିବାହ କରିଥିଲେ।

ନିଜ ପରିବାରକୁ ଶେଷ କରିବା ପରେ ରାଜକୁମାର ଚଳିତ ବର୍ଷ ମେ' ମାସରେ ତାଙ୍କ ବିରୋଧରେ ପୋକ୍ସୋ (POCSO) ଆଇନ ଅଧୀନରେ ମାମଲା ରୁଜୁ କରିଥିବା ୧୭ ବର୍ଷୀୟା ନାବାଳିକାଙ୍କ ଘରେ ପହଞ୍ଚିଥିଲେ। ସେ ନାବାଳିକାଙ୍କ ୪୫ ବର୍ଷୀୟା ମା’ ଏବଂ ୬୫ ବର୍ଷୀୟା ଆଈଙ୍କୁ ଘରେ ହତ୍ୟା କରିଥିଲେ। ଏହାପରେ ନାବାଳିକାଙ୍କୁ ବଳପୂର୍ବକ ନିଜ କାରରେ ଏକ ନିଛାଟିଆ ସ୍ଥାନକୁ ନେଇ ସେଠାରେ ହତ୍ୟା କରିଥିଲେ। ତେବେ ଘଟଣା ସମୟରେ ଉପସ୍ଥିତ ଥିବା ନାବାଳିକାଙ୍କ ୨୦ ବର୍ଷୀୟା ଦିବ୍ୟାଙ୍ଗ ଭଉଣୀଙ୍କୁ ସେ କୌଣସି କ୍ଷତି ପହଞ୍ଚାଇ ନଥିଲେ।

ଗତ ମେ' ମାସରେ ଉକ୍ତ ନାବାଳିକାଙ୍କୁ ପିଛା କରିବା ଓ ଯୌନ ନିର୍ଯାତନା ଦେବା ଅଭିଯୋଗରେ ରାଜକୁମାରଙ୍କୁ ଗିରଫ କରାଯାଇଥିଲା। କିନ୍ତୁ ବିଚାର ବିଭାଗୀୟ ଦଣ୍ଡର ଅବଧି ୭ ବର୍ଷରୁ କମ୍ ଥିବାରୁ ସେ ପରେ ଅଗ୍ରୀମ ଜାମିନ ପାଇବାରେ ସକ୍ଷମ ହୋଇଥିଲେ। ପରିବାର ଲୋକଙ୍କ କହିବା ଅନୁଯାୟୀ, ରାଜକୁମାର ମାନସିକ ସମସ୍ୟା ଦେଇ ଗତି କରୁଥିଲେ ଏବଂ ଜୁଆ ଖେଳ କାରଣରୁ ତାଙ୍କ ଉପରେ ବିପୁଳ ଋଣ ଭାର ଥିଲା। ହତ୍ୟାକାଣ୍ଡ ପରେ ସେ ନିଜ ବାପାଙ୍କୁ ଫୋନ୍ କରି ଦୋଷ ସ୍ୱୀକାର କରିବା ସହ ନିଜେ ମଧ୍ୟ ଆତ୍ମହତ୍ୟା କରିବାକୁ କହି ମୋବାଇଲ୍ ବନ୍ଦ କରିଦେଇଛନ୍ତି। ଫେରାର୍ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ପକ୍ଷରୁ ଏକାଧିକ ଟିମ୍ ଗଠନ କରାଯାଇ ତଦନ୍ତ ଜାରି ରହିଛି। ସାଇଣ୍ଟିଫିକ୍ ଟିମ୍ ସମସ୍ତ ଘଟଣାସ୍ଥଳରୁ ପ୍ରମାଣ ସଂଗ୍ରହ କରୁଛନ୍ତି।

ନୂଆଦିଲ୍ଲୀ: ସୁପ୍ରିମକୋର୍ଟରେ ଶୁକ୍ରବାର ଅଭାବନୀୟ ଘଟଣା ଦେଖିବାକୁ ମିଳିଛି। ଏକ ମାମଲାର ଶୁଣାଣି ବେଳେ ଆବେଦନକାରୀ ଜଣକ ବିଚାରପତିଙ୍କ ଉପରକୁ ଦଲିଲ ଫିଙ୍ଗିବା ସହ ଅଶାଳୀନ ଭାଷାରେ ଗାଳିଗୁଲଜ କରିଥିବା ଜଣାପଡ଼ିଛି। ଘଟଣା ଅନୁଯାୟୀ, ଜଷ୍ଟିସ କେ.ଭି. ବିଶ୍ୱନାଥନ୍‌‌ ଏବଂ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠରେ ଆଲାହାବାଦ ହାଇକୋର୍ଟଙ୍କ ଏକ ନିଷ୍ପତ୍ତି ବିରୋଧରେ ଦାୟର ହୋଇଥିବା ଆବେଦନର ଶୁଣାଣି ହେଉଥିଲା। ଏହି ସମୟରେ କୋର୍ଟରେ ଆବେଦନକାରୀ ଜଣକ ଅତ୍ୟନ୍ତ ଅସଭ୍ୟ ଭାବେ ନିଜର ପକ୍ଷ ରଖିଥିଲେ। ସେ ବିଚାରପତିଙ୍କୁ, ‘ହେ ନ୍ୟାୟିକ ସେବକ, ମୁଁ ତୁମକୁ ଆଦେଶ ଦେଉଛି ଯେ ଲକ୍ଷ୍ନୌର ଏସିପିଙ୍କ ବିରୋଧରେ ଏକ ଏଫ୍‌‌ଆଇଆର୍‌‌ ରୁଜୁ କରିବା ପାଇଁ ନିର୍ଦ୍ଦେଶ ଦିଅ’ ବୋଲି କହିଥିଲେ। ଏଭଳି ଆଚରଣରେ ଆଶ୍ଚର୍ଯ୍ୟ ପ୍ରକଟ କରି ଜଷ୍ଟିସ ବିଶ୍ୱନାଥନ୍‌‌ ପ୍ରଶ୍ନ କରିଥିଲେ, ‘ଆପଣ କଣ ଆମକୁ ଆଦେଶ ଦେଉଛନ୍ତି’ । 

ଏହାପରେ ପରିସ୍ଥିତି ଅଧିକ ଜଟିଳ ହୋଇଥିଲା। ଆବେଦନକାରୀ ଜଣକ ନିଜ ହାତରେ ଥିବା କେସ୍‌‌ ସମ୍ବନ୍ଧୀୟ କାଗଜପତ୍ରଗୁଡ଼ିକୁ ଶୂନ୍ୟରେ ଫିଙ୍ଗିବା ସହ ମୁଖ୍ୟ ବିଚାରପତିଙ୍କ ବିରୋଧରେ ଅତ୍ୟନ୍ତ ଅପଶବ୍ଦ ବ୍ୟବହାର କରିଥିଲେ। ଉଲ୍ଲେଖଯୋଗ୍ୟ, ମୁଖ୍ୟ ବିଚାରପତି ସୂର୍ଯ୍ୟକାନ୍ତ ସେହି ସମୟରେ ଖଣ୍ଡପୀଠରେ ଉପସ୍ଥିତ ନଥିଲେ। କିନ୍ତୁ ଏହି ହଟ୍ଟଗୋଳ ପରେ ସୁରକ୍ଷାକର୍ମୀମାନେ ତୁରନ୍ତ ଆବେଦନକାରୀଙ୍କୁ କୋର୍ଟରୁମରୁ ବାହାର କରିଦେଇଥିଲେ। ସମ୍ପୃକ୍ତ ଆବେଦନକାରୀଙ୍କ ପରିଚୟ ଏବଂ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ବିଷୟରେ ବର୍ତ୍ତମାନ ପର୍ଯ୍ୟନ୍ତ କୌଣସି ସ୍ପଷ୍ଟ ସୂଚନା ମିଳିନାହିଁ। 

ସୂଚନାଯୋଗ୍ୟ ଯେ, କୋର୍ଟ ରୁମ୍ ଭିତରେ ଆବେଦନକାରୀ ରାଗିଯିବାର ଏହା ପ୍ରଥମ ଘଟଣା ନୁହେଁ। ପୂର୍ବରୁ ଅକ୍ଟୋବର ୨୦୨୫ ରେ ମଧ୍ୟ ଜଣେ ଆଇନଜୀବୀ ତତ୍କାଳୀନ ପ୍ରଧାନ ବିଚାରପତି ଜଷ୍ଟିସ୍ ବି.ଆର୍. ଗଭାଇଙ୍କ ଖଣ୍ଡପୀଠ ଉପରକୁ ଜୋତା ଫିଙ୍ଗିବାକୁ ଉଦ୍ୟମ କରିଥିଲେ, ଯାହା ପରେ ବାର୍ କାଉନସିଲ୍ ଓ ସୁପ୍ରିମକୋର୍ଟ ବାର୍ ଆସୋସିଏସନ୍ ପକ୍ଷରୁ ତାଙ୍କ ବିରୋଧରେ କଡ଼ା ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା।

ନୂଆଦିଲ୍ଲୀ: ଡେନମାର୍କର ପ୍ରସିଦ୍ଧ ଔଷଧ ନିର୍ମାତା କମ୍ପାନୀ ‘ନୋଭୋ ନର୍ଡିସ୍କ’ ଭାରତୀୟ ବଜାରରେ ମଧୁମେହ (ଡାଇବେଟିସ୍‌‌) ରୋଗୀଙ୍କ ପାଇଁ ଏକ ବଡ଼ କ୍ରାନ୍ତିକାରୀ ଔଷଧ ‘ଆୱିକ୍ଲି’ ଲଞ୍ଚ୍‌‌ କରିଛି। ଏହା ବିଶ୍ୱର ପ୍ରଥମ ‘ସପ୍ତାହକୁ ଏକ ସଟ୍‌‌’ ନିଆଯାଉଥିବା ବେସାଲ୍‌‌ ଇନସୁଲିନ୍‌‌। ଏହି ଆଧୁନିକ ଚିକିତ୍ସା ପଦ୍ଧତି ଦ୍ୱାରା ରୋଗୀମାନଙ୍କୁ ଆଉ ପ୍ରତିଦିନ ଇଞ୍ଜେକ୍ସନ ନେବାକୁ ପଡ଼ିବ ନାହିଁ, ଫଳରେ ବର୍ଷକୁ ୩୬୫ ଥର ବଦଳରେ ମାତ୍ର ୫୨ ଥର ଇଞ୍ଜେକ୍ସନ ନେବାକୁ ହେବ। 

ଭାରତରେ ପ୍ରାୟ ୧୦.୧ କୋଟି ମଧୁମେହ ରୋଗୀ ଥିବା ବେଳେ ୧୩.୬ କୋଟି ଲୋକ ପ୍ରି-ଡାଇବେଟିସ୍‌‌ ସ୍ତରରେ ଅଛନ୍ତି। ପ୍ରତିଦିନ ଇଞ୍ଜେକ୍ସନ ନେବାର ଭୟ ଏବଂ ଯନ୍ତ୍ରଣା ଯୋଗୁଁଁ ଅନେକ ରୋଗୀ ପ୍ରାୟ ୭ ରୁ ୯ ବର୍ଷ ପର୍ଯ୍ୟନ୍ତ ଇନସୁଲିନ୍‌‌ ଚିକିତ୍ସା ଆରମ୍ଭ କରିବାରେ ବିଳମ୍ବ କରିଥାନ୍ତି। ଏହି ନୂଆ ସାପ୍ତାହିକ ଇନସୁଲିନ୍‌‌ ରୋଗୀଙ୍କ ମାନସିକ ଓ ଶାରୀରିକ ଚାପକୁ ବହୁ ମାତ୍ରାରେ ହ୍ରାସ କରିବ ବୋଲି ବିଶେଷଜ୍ଞମାନେ ଆଶା ପ୍ରକାଶ କରିଛନ୍ତି। କମ୍ପାନୀ ଏହି ଇନସୁଲିନ୍‌‌କୁ ବହୁତ ଶସ୍ତା ଏବଂ ପ୍ରତିଯୋଗିତାମୂଳକ ମୂଲ୍ୟରେ ବଜାରକୁ ଆଣିଛି। ଏହାର ପ୍ରତି ୟୁନିଟ୍‌‌ ପିଛା ଖର୍ଚ୍ଚ ପ୍ରାୟ ୩.୭୩ ଟଙ୍କା ପଡ଼ିବ, ଯାହା ବର୍ତ୍ତମାନ ବଜାରରେ ମିଳୁଥିବା ଦୈନିକ ଇନସୁଲିନ୍‌‌ ତୁଳନାରେ ୩୦ ରୁ ୪୦ ପ୍ରତିଶତ ଶସ୍ତା। ସାଧାରଣତଃ ସପ୍ତାହକୁ ୭୦ ୟୁନିଟ୍‌‌ ଆବଶ୍ୟକ କରୁଥିବା ଜଣେ ରୋଗୀଙ୍କ ପାଇଁ ସାପ୍ତାହିକ ଖର୍ଚ୍ଚ ପ୍ରାୟ ୨୬୧ ଟଙ୍କା ହେବ। ବଜାରରେ ଏହା ୭୦୦ ୟୁନିଟ୍‌‌ର ପେନ୍‌‌ (ମୂଲ୍ୟ ୨, ୬୧୧ ଟଙ୍କା) ଏବଂ ୨, ୧୦୦ ୟୁନିଟ୍‌‌ର ପେନ୍‌‌ (ମୂଲ୍ୟ ୭, ୮୩୩ ଟଙ୍କା) ଭାରିଆଣ୍ଟରେ ଉପଲବ୍ଧ ହେବ। କ୍ଲିନିକାଲ୍‌‌ ଟ୍ରାୟଲ୍‌‌ରେ ଏହା ରକ୍ତରେ ଶର୍କରା ଅଂଶ ନିୟନ୍ତ୍ରଣ କରିବାରେ ଅଧିକ ପ୍ରଭାବଶାଳୀ ସାବ୍ୟସ୍ତ ହୋଇଛି। ଭାରତରେ ଏହାର ବିତରଣ ପାଇଁ ନୋଭୋ ନର୍ଡିସ୍କ ‘ଆବୋଟ୍‌‌’ କମ୍ପାନୀ ସହ ଚୁକ୍ତି କରିଛି।

ତାମିଲନାଡୁର ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ଶୁକ୍ରବାର ଦିନ ନିଜର ପ୍ରଥମ ସରକାରୀ ଗସ୍ତରେ କରୁର ପହଞ୍ଚିଛନ୍ତି। ଚଳିତ ବର୍ଷ ମେ' ମାସରେ ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବା ପରେ ଏହା ତାଙ୍କର ପ୍ରଥମ କରୁର ଗସ୍ତ। ଏହି ଅବସରରେ ମୁଖ୍ୟମନ୍ତ୍ରୀ ଭାବପ୍ରବଣ ହେବା ସହ ଏହି ଘଟଣାରୁ ରାଜନୈତିକ ଫାଇଦା ଉଠାଇବା ପାଇଁ ଉଦ୍ୟମ କରୁଥିବା ବିରୋଧୀଙ୍କୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି ଯେ, "୨୦୨୫ କରୁର ଦଳାଚକଟାରେ ଆମେ ଆମ ଭଉଣୀମାନଙ୍କ ପିଲାମାନଙ୍କୁ ହରାଇଛୁ।"

ପୋଲିସର ଦାୟିତ୍ୱହୀନତା ଉପରେ ବର୍ଷିଲେ ବିଜୟ

ମୁଖ୍ୟମନ୍ତ୍ରୀ ବିଜୟ ଏହି ସମାବେଶରେ ଉଦବୋଧନ ଦେଇ ସେଦିନର ପୋଲିସ ବିଭାଗର କାର୍ଯ୍ୟାନୁଷ୍ଠାନ ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି ଯେ ଘଟଣା ଦିନ ପୋଲିସ ତାଙ୍କୁ ପ୍ରବଳ ଭିଡ଼ ବିଷୟରେ କୌଣସି ସୂଚନା ଦେଇନଥିଲା କିମ୍ବା ସମାବେଶକୁ ବାତିଲ କରିବା ପାଇଁ କୌଣସି ପଦକ୍ଷେପ ନେଇନଥିଲା। ପେରମ୍ବଲୁର ପୋଲିସ ଭିଡ଼ ବଢୁଥିବା ନେଇ ସତର୍କ କରାଇଥିଲେ ମଧ୍ୟ କରୁର ପୋଲିସ ଏନେଇ ନିରବ ରହିଥିଲା। "ପୋଲିସ ପାଖରେ ସଭା ବାତିଲ କରିବାର ସମ୍ପୂର୍ଣ୍ଣ ଅଧିକାର ଥିଲା। ସେମାନେ ଆମକୁ ସତର୍କ କରାଇବା ପରିବର୍ତ୍ତେ ହାଇୱେରେ ଆମକୁ ଏସକର୍ଟ କରି ସଭାସ୍ଥଳକୁ ନେଇଥିଲେ। ମୁଁ ପୋଲିସ ଉପରେ ସମ୍ପୂର୍ଣ୍ଣ ଭରସା କରିଥିଲି, କିନ୍ତୁ ପ୍ରକୃତରେ କ'ଣ ଡ୍ରାମା ଚାଲିଥିଲା ତାହା ମୋତେ ଜଣା ନଥିଲା," ବୋଲି ସେ କ୍ଷୋଭ ପ୍ରକାଶ କରି କହିଛନ୍ତି। ଏତେ ବଡ଼ ଭିଡ଼ ପାଇଁ ପର୍ଯ୍ୟାପ୍ତ ସୁରକ୍ଷା ଯୋଗାଇ ଦିଆଯାଇଥିଲା କି ନାହିଁ ଏବଂ ଏଥିପାଇଁ କିଏ ଦାୟୀ ବୋଲି ସେ ପ୍ରଶ୍ନ କରିଛନ୍ତି।

ଡିଏମକେ (DMK) ଉପରେ ରାଜନୀତି କରିବାର ଅଭିଯୋଗ

ଏହି ଅବସରରେ ସେ ପୂର୍ବତନ ଶାସକ ଦଳ ତଥା ବର୍ତ୍ତମାନର ପ୍ରମୁଖ ବିରୋଧୀ ଡିଏମକେ (DMK)କୁ ଟାର୍ଗେଟ କରିଛନ୍ତି। ସେ ଅଭିଯୋଗ କରିଛନ୍ତି ଯେ କିଛି ଲୋକ ଏହି ଦୁଃଖଦ ଘଟଣାକୁ ନେଇ କେବଳ ନାଟକବାଜି କରୁଛନ୍ତି ଏବଂ ରାଜନୈତିକ ଫାଇଦା ହାସଲ କରିବାକୁ ଚେଷ୍ଟା କରୁଛନ୍ତି। ପୀଡ଼ିତ ପରିବାରକୁ ନ୍ୟାୟ ଦେବା ପରିବର୍ତ୍ତେ ସେମାନେ ଘଟଣାର ଦୋଷ ରାଜନୈତିକ ପ୍ରତିଦ୍ୱନ୍ଦ୍ୱୀଙ୍କ ଉପରେ ଲଦିବାକୁ ଚେଷ୍ଟା କରିଥିଲେ ବୋଲି ସେ ସମାଲୋଚନା କରିଛନ୍ତି।

ପୀଡ଼ିତଙ୍କ ପାଇଁ ସ୍ମୃତିପୀଠ ଓ ସରକାରୀ ଚାକିରି ପ୍ରଦାନ

ଗତ ସେପ୍ଟେମ୍ବର ୨୦୨୫ରେ ଟିଭିକେ ଦଳର ଏକ ରାଜନୈତିକ ସମାବେଶ ବେଳେ ଅତ୍ୟଧିକ ଭିଡ଼ କାରଣରୁ ଏହି ଦଳାଚକଟା ଘଟିଥିଲା, ଯେଉଁଥିରେ ୪୧ ଜଣ ବ୍ୟକ୍ତିଙ୍କର ପ୍ରାଣହାନି ଘଟିଥିଲା ଏବଂ ଶତାଧିକ ଲୋକ ଆହତ ହୋଇଥିଲେ। ମୁଖ୍ୟମନ୍ତ୍ରୀ ଏହି ଗସ୍ତ ସମୟରେ ପୀଡ଼ିତ ପରିବାରଗୁଡ଼ିକୁ ଭେଟିବା ସହ ସେମାନଙ୍କୁ ସରକାରୀ ଚାକିରିର ନିଯୁକ୍ତି ପତ୍ର ପ୍ରଦାନ କରିଛନ୍ତି। କଳା ପୋଷାକ ପରିଧାନ କରିଥିବା ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ଯେ ନିଜ ଦଳ ତାମିଲାଗା ଭେଟ୍ରି କାଜାଗମ୍ (TVK) ପକ୍ଷରୁ କରୁରଠାରେ ମୃତକମାନଙ୍କ ଉଦ୍ଦେଶ୍ୟରେ ଏକ ସ୍ମୃତିପୀଠ ନିର୍ମାଣ କରାଯିବ। କାର୍ଯ୍ୟକ୍ରମ ଶେଷରେ ବିଜୟ ଏକ ରୋଡ୍ ସୋ' କରିଥିଲେ, ଯେଉଁଠାରେ ବହୁ ସଂଖ୍ୟାରେ ଲୋକ ଉପସ୍ଥିତ ରହି ତାଙ୍କୁ ହାତ ଯୋଡ଼ି ସ୍ୱାଗତ କରିଥିଲେ।

ନୂଆଦିଲ୍ଲୀ: ଆଫ୍ରିକା ମହାଦେଶରେ ଇବୋଲା ଭୂତାଣୁର ଆତଙ୍କ ଦେଖାଦେଇଛି। ଆଫ୍ରିକା ସେଣ୍ଟର୍ସ ଫର୍ ଡିଜିଜ୍ କଣ୍ଟ୍ରୋଲ୍ ଆଣ୍ଡ ପ୍ରିଭେନ୍ସନ୍ (ଆଫ୍ରିକା ସିଡିସି) ଅନୁଯାୟୀ, କଙ୍ଗୋ ଏବଂ ଉଗାଣ୍ଡାରେ ବ୍ୟାପିଥିବା ବୁଣ୍ଡିବୁଗ୍ୟୋ ଇବୋଲା (Bundibugyo Ebola) ସଂକ୍ରମଣରେ ମୃତ୍ୟୁସଂଖ୍ୟା ୬୦୦ ଅତିକ୍ରମ କରିଛି। ଦ୍ରୁତ ଗତିରେ ବ୍ୟାପୁଥିବା ଏହି ଭୟଙ୍କର ସଂକ୍ରମଣକୁ ନିୟନ୍ତ୍ରଣ କରିବା ପାଇଁ ବିଶ୍ୱସ୍ତରୀୟ ସହଯୋଗ ଜାରି ରଖିବାକୁ ବିଶେଷଜ୍ଞମାନେ ଆହ୍ୱାନ ଦେଇଛନ୍ତି।

ଏହି ଦୁଇ ପ୍ରଭାବିତ ଦେଶରେ ବର୍ତ୍ତମାନ ସୁଦ୍ଧା ମୋଟ ୧,୭୭୯ ସଂକ୍ରମିତ ମାମଲା ଚିହ୍ନଟ ହୋଇଥିବା ବେଳେ ୬୦୨ ଜଣଙ୍କର ମୃତ୍ୟୁ ଘଟିଛି। ଆଫ୍ରିକୀୟ ସଂଘର ସାର୍ବଜନୀନ ସ୍ୱାସ୍ଥ୍ୟ ସଂସ୍ଥାର ରିପୋର୍ଟ ଅନୁଯାୟୀ, ଏହି ରୋଗର ମୃତ୍ୟୁହାର ପ୍ରାୟ ୩୪ ପ୍ରତିଶତ ରହିଛି। ଅନ୍ୟପକ୍ଷରେ ବର୍ତ୍ତମାନ ସୁଦ୍ଧା ୩୦୨ ଜଣ ରୋଗୀ ସୁସ୍ଥ ହୋଇଛନ୍ତି। ଆଫ୍ରିକା ସିଡିସିର ଅଧିକାରୀ ୱେସାମ ମାନକୌଲା ସୂଚନା ଦେଇଛନ୍ତି ଯେ, କେବଳ ଗତ ସପ୍ତାହରେ କଙ୍ଗୋରେ ୩୫୩ ନୂଆ ମାମଲା ସାମ୍ନାକୁ ଆସିଛି, ଯାହାକି ପୂର୍ବ ତୁଳନାରେ ୨୫ ପ୍ରତିଶତ ଅଧିକ। କଙ୍ଗୋରେ ପ୍ରତି ୧୦ ଜଣ ସଂକ୍ରମିତଙ୍କଠାରୁ ଭୂତାଣୁ ପ୍ରାୟ ୧୪ ଜଣ ନୂଆ ଲୋକଙ୍କୁ ବ୍ୟାପୁଛି।

ଆର୍ଥିକ ଅନୁଦାନର ଅଭାବ ଏବଂ ସୁରକ୍ଷିତ ଶବ ସତ୍କାର ବ୍ୟବସ୍ଥାରେ ତ୍ରୁଟି ଏହି ସଂକ୍ରମଣକୁ ଆହୁରି ଜଟିଳ କରୁଛି। ଏଥିରେ ସ୍ୱାସ୍ଥ୍ୟକର୍ମୀମାନେ ଅଧିକ ବିପଦର ସମ୍ମୁଖୀନ ହେଉଛନ୍ତି। ଏବେ ସୁଦ୍ଧା କଙ୍ଗୋରେ ପ୍ରାୟ ୧୧୨ ଜଣ ସ୍ୱାସ୍ଥ୍ୟକର୍ମୀ ଭୂତାଣୁରେ ସଂକ୍ରମିତ ହୋଇଥିବା ବେଳେ ସେମାନଙ୍କ ମଧ୍ୟରୁ ୩୫ ଜଣଙ୍କର ମୃତ୍ୟୁ ଘଟିଛି।

ଏଭଳି ଭୟଙ୍କର ପରିସ୍ଥିତି ମଧ୍ୟରେ କିଛି ଆଶାବାଦୀ ଖବର ମଧ୍ୟ ଆସିଛି। ଲ୍ୟାବ୍ ଟେଷ୍ଟିଂ କ୍ଷମତାରେ ଉନ୍ନତି ଆସିଛି ଏବଂ ବର୍ତ୍ତମାନ ଦୈନିକ ୨,୦୦୦ରୁ ଅଧିକ ପରୀକ୍ଷା କରାଯାଉଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଉଗାଣ୍ଡାରେ ଏବୋଲା ସଂକ୍ରମଣକୁ ନିୟନ୍ତ୍ରଣ କରିବାରେ ବଡ଼ ସଫଳତା ମିଳିଛି। ଜୁନ୍ ୨୧ ପରେ ସେଠାରେ ନୂଆ ମାମଲା ଦେଖିବାକୁ ମିଳିନାହିଁ। ଆଫ୍ରିକା ସିଡିସି ଏବଂ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପକ୍ଷରୁ ମେ ମାସରେ ଏହାକୁ ଜନସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଘୋଷଣା କରାଯାଇଥିଲା। ବର୍ତ୍ତମାନ ଦକ୍ଷିଣ ସୁଦାନ, ରାୱାଣ୍ଡା, କେନିଆ ସମେତ ଅନ୍ୟ ୧୧ଟି ଦେଶକୁ ହାଇ-ରିସ୍କ ଦେଶ ତାଲିକାରେ ରଖାଯାଇଛି।

ହିମାଚଳ ପ୍ରଦେଶରେ ପ୍ରବଳ ମୌସୁମୀ ବର୍ଷା ଯୋଗୁଁ ସାଧାରଣ ଜୀବନଯାତ୍ରା ବ୍ୟାହତ ହୋଇଛି। ଲଗାଣ ବର୍ଷା କାରଣରୁ ରାଜ୍ୟରେ ୭୫ଟି ରାସ୍ତା ବନ୍ଦ ହୋଇଯାଇଛି, ଯାହା ଫଳରେ ଯାତାୟାତରେ ଗୁରୁତର ବାଧା ସୃଷ୍ଟି ହୋଇଛି। ଲଗାତାର ଭୂସ୍ଖଳନ ଏବଂ ବଡ଼ ବଡ଼ ଗଛ ଉପୁଡ଼ିବା କାରଣରୁ ରାସ୍ତାଗୁଡ଼ିକ ଅବରୋଧ ହୋଇଛି।

ବିଦ୍ୟୁତ୍ ଏବଂ ପାନୀୟ ଜଳ ଯୋଗାଣ ପ୍ରଭାବିତ

କେବଳ ରାସ୍ତାଘାଟ ନୁହେଁ, ପ୍ରବଳ ବର୍ଷା ଏବଂ ପବନ ଯୋଗୁଁ ବିଦ୍ୟୁତ୍ ବିତରଣ ଟ୍ରାନ୍ସଫର୍ମର ଏବଂ ପାନୀୟ ଜଳ ଯୋଗାଣ ବ୍ୟବସ୍ଥା ମଧ୍ୟ ବ୍ୟାପକ ଭାବେ ପ୍ରଭାବିତ ହୋଇଛି। ପ୍ରଶାସନ ପକ୍ଷରୁ ସମସ୍ୟାର ସମାଧାନ ତଥା ରାସ୍ତା ସଫା କରିବା ପାଇଁ ପ୍ରୟାସ ଜାରି ରହିଛି, କିନ୍ତୁ ଖରାପ ପାଗ କାରଣରୁ ଏଥିରେ ବିଳମ୍ବ ଦେଖାଦେଇଛି।

ପାଣିପାଗ ବିଭାଗ ପକ୍ଷରୁ ୟେଲୋ ଆଲର୍ଟ

ଭାରତୀୟ ପାଣିପାଗ ବିଭାଗ (ଆଇଏମ୍‌ଡି) ପକ୍ଷରୁ ଆଜି ଅର୍ଥାତ୍ ୧୦ ଜୁଲାଇ ପାଇଁ ସତର୍କ ସୂଚନା ଜାରି କରାଯାଇଛି। ଶିମଲା, ସିରମୌର, ଏବଂ ସୋଲାନ ସମେତ ରାଜ୍ୟର ଅନେକ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ଆଶଙ୍କା ଥିବାରୁ ୟେଲୋ ଆଲର୍ଟ ଜାରି କରାଯାଇଛି। ସାଧାରଣ ଲୋକ ଏବଂ ପର୍ଯ୍ୟଟକମାନଙ୍କୁ ପାହାଡ଼ିଆ ଅଞ୍ଚଳ ଏବଂ ନଦୀ ନାଳଠାରୁ ଦୂରରେ ରହିବାକୁ ସ୍ଥାନୀୟ ପ୍ରଶାସନ ନିବେଦନ କରିଛି।

ମହାରାଷ୍ଟ୍ରର ନାସିକ କୋର୍ଟ ଟିସିଏସ୍ (TCS) ଯୌନ ନିର୍ଯାତନା ଏବଂ ଧର୍ମାନ୍ତରୀକରଣ ମାମଲାରେ ଗିରଫ ହୋଇଥିବା ଅଭିଯୁକ୍ତ ନିଦା ଖାନଙ୍କୁ ଜାମିନ ପ୍ରଦାନ କରିଛନ୍ତି। ଏହି ଜାମିନ ଆଦେଶ ଶୁଣାଇବା ସମୟରେ ଅଦାଲତ ପ୍ରଭୁ ଶ୍ରୀକୃଷ୍ଣଙ୍କ ଜେଲ୍‌ରେ ଜନ୍ମ ହେବାର ପ୍ରସଙ୍ଗ ଉଠାଇଛନ୍ତି। ଅଦାଲତ କହିଛନ୍ତି ଯେ, କାରାଗାରରେ ଶିଶୁ ଜନ୍ମ ହେବା ଭଳି ଏକ ଯନ୍ତ୍ରଣାଦାୟକ ପରିସ୍ଥିତି ଏବଂ ଏହା ସହିତ ଜଡ଼ିତ ସାମାଜିକ କଳଙ୍କକୁ କୌଣସି ଶିଶୁ ସାମ୍ନା କରିବା ଉଚିତ୍ ନୁହେଁ। ଅଭିଯୁକ୍ତ ନିଦା ଖାନ ବର୍ତ୍ତମାନ ୫ ମାସର ଗର୍ଭବତୀ ଅଛନ୍ତି, ତେଣୁ ଜନ୍ମ ହେବାକୁ ଥିବା ଶିଶୁର କଲ୍ୟାଣ ତଥା ଉତ୍ତମ ଭବିଷ୍ୟତକୁ ଦୃଷ୍ଟିରେ ରଖି କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି।

କୋର୍ଟଙ୍କ ଗୁରୁତ୍ୱପୂର୍ଣ୍ଣ ଟିପ୍ପଣୀ ଏବଂ ସର୍ତ୍ତ

ଗତ ଜୁଲାଇ ୬ ତାରିଖରେ ଅତିରିକ୍ତ ଦୌରା ଜଜ୍ କେ.ଜି. ଯୋଶୀ ଏହି ରାୟ ଶୁଣାଇଛନ୍ତି। ଆଦେଶରେ ଉଲ୍ଲେଖ କରାଯାଇଛି ଯେ, ମାମଲାର ତଦନ୍ତ ସମ୍ପୂର୍ଣ୍ଣ ହୋଇସାରିଛି ଏବଂ ପୋଲିସ ଦ୍ୱାରା ଚାର୍ଜସିଟ୍ ମଧ୍ୟ ଦାଖଲ କରାଯାଇଛି। ତେଣୁ ଗର୍ଭବତୀ ଅବସ୍ଥାରେ ଅଭିଯୁକ୍ତଙ୍କୁ ଜେଲ୍‌ରେ ରଖିବାର କୌଣସି ଯଥାର୍ଥତା ନାହିଁ। କୋର୍ଟ ନିଦା ଖାନଙ୍କୁ ୭୫,୦୦୦ ଟଙ୍କାର ବ୍ୟକ୍ତିଗତ ମୁଚାଲିକା ବଦଳରେ ଜାମିନ ପ୍ରଦାନ କରିଛନ୍ତି। ଏଥିସହିତ ଅଭିଯୁକ୍ତଙ୍କ ଉପରେ କିଛି କଠୋର ସର୍ତ୍ତ ଲାଗୁ କରାଯାଇଛି, ଯେପରିକି ସେ ଅଭିଯୋଗକାରିଣୀଙ୍କ ସହ କୌଣସି ପ୍ରକାର ଯୋଗାଯୋଗ କରିପାରିବେ ନାହିଁ କିମ୍ବା ତାଙ୍କ କାର୍ଯ୍ୟାଳୟ ତଥା ବାସସ୍ଥାନ ଆଖପାଖକୁ ଯାଇପାରିବେ ନାହିଁ।

ଟିସିଏସ୍ ନାସିକ ବିପିଓ ମାମଲା କ'ଣ?

ସୂଚନାଯୋଗ୍ୟ ଯେ, ଟିସିଏସ୍ ନାସିକ ବିପିଓ କାର୍ଯ୍ୟାଳୟରେ କାର୍ଯ୍ୟରତ ଥିବା ଜଣେ ମହିଳା କର୍ମଚାରୀଙ୍କ ଅଭିଯୋଗ ଆଧାରରେ ପୋଲିସ ମୋଟ ୯ ଟି ଏଫଆଇଆର (FIR) ରୁଜୁ କରିଥିଲା। ଏହି ମାମଲାରେ ସହକର୍ମୀଙ୍କୁ ଯୌନ ନିର୍ଯାତନା ଦେବା ସହିତ ତାଙ୍କୁ ଇସଲାମ ଧର୍ମ ଗ୍ରହଣ କରିବା ପାଇଁ ବାଧ୍ୟ କରିବା ଅଭିଯୋଗ ହୋଇଥିଲା। ଅଭିଯୋଗ ଅନୁଯାୟୀ, ନିଦା ଖାନ ପୀଡ଼ିତାଙ୍କୁ ଏକ ବୁର୍ଖା ପିନ୍ଧିବାକୁ ଦେବା ସହ ନମାଜ ପଢ଼ିବା ପାଇଁ ବାଧ୍ୟ କରୁଥିଲେ ଏବଂ ତାଙ୍କ ମୋବାଇଲରେ ଧାର୍ମିକ ଆପ୍ ଡାଉନଲୋଡ୍ କରାଇଥିଲେ। ଦୀର୍ଘ ଦିନ ଧରି ଫେରାର ରହିବା ପରେ ଗତ ମେ' ୭ ତାରିଖରେ ତାଙ୍କୁ ଗିରଫ କରାଯାଇଥିଲା। ଏହି ମାମଲାରେ ତାଙ୍କ ସମେତ ମୋଟ ୮ ଜଣ କର୍ମଚାରୀ ଅଭିଯୁକ୍ତ ଅଛନ୍ତି, ଯେଉଁଥିରେ ନିଦା ଏକମାତ୍ର ମହିଳା ଅଟନ୍ତି।

ୟୁକ୍ରେନ ପକ୍ଷରୁ ଋଷର ବିଭିନ୍ନ ତୈଳ ଡିପୋ ଏବଂ ସମୁଦ୍ରରେ ଥିବା ତୈଳ ଟ୍ୟାଙ୍କର ଉପରେ ବଡ଼ ଧରଣର ଡ୍ରୋନ୍ ଆକ୍ରମଣ କରାଯାଇଛି। ବୁଧବାର ଓ ଗୁରୁବାର ରାତିରେ ହୋଇଥିବା ଏହି ଘନଘନ ଆକ୍ରମଣରେ ଆଜୋଭ୍ ସାଗରରେ ଥିବା ୨ଟି ତୈଳ ଟ୍ୟାଙ୍କରରେ ନିଆଁ ଲାଗିଯାଇଛି। ଏହି ଘଟଣା ଏବେ ଋଷ ଏବଂ ୟୁକ୍ରେନ ମଧ୍ୟରେ ଥିବା ଯୁଦ୍ଧ ପରିସ୍ଥିତିକୁ ଆହୁରି ଉତ୍ତେଜନାପୂର୍ଣ୍ଣ କରିଦେଇଛି।

ବିଭିନ୍ନ ଅଞ୍ଚଳରେ ହୋଇଛି ଆକ୍ରମଣ

ଋଷର ଅନେକ ଅଞ୍ଚଳ ଯଥା ଟ୍ଭେର୍ (Tver), ଷ୍ଟାଭ୍ରୋପୋଲ୍ କ୍ରାଇ (Stavropol Krai) ଏବଂ ରୋସ୍ତୋଭ୍ (Rostov) ଅଞ୍ଚଳରେ ଏହି ଡ୍ରୋନ୍ ମାଡ଼ ହୋଇଛି। ଟ୍ଭେର୍ ଏବଂ ଷ୍ଟାଭ୍ରୋପୋଲ୍ ଠାରେ ଥିବା ତୈଳ ଗଚ୍ଛିତ କେନ୍ଦ୍ର (ଅଏଲ୍ ଡିପୋ)ରେ ଭୟାବହ ଅଗ୍ନିକାଣ୍ଡ ଘଟିଛି। ସ୍ଥାନୀୟ ପ୍ରଶାସନର କହିବା ଅନୁଯାୟୀ, ନିଆଁକୁ ଆୟତ୍ତ କରିବା ପାଇଁ ଉଦ୍ୟମ ଜାରି ରହିବା ସହ ସୁରକ୍ଷା ଦୃଷ୍ଟିରୁ ଆଖପାଖ ଅଞ୍ଚଳର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି। ଆଜୋଭ୍ ସାଗରରେ ଆକ୍ରମଣର ଶିକାର ହୋଇଥିବା ଦୁଇଟି ଯାକ ଟ୍ୟାଙ୍କରର କର୍ମଚାରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି ବୋଲି ରୋସ୍ତୋଭ୍ ଗଭର୍ଣ୍ଣର ୟୁରି ସ୍ଲ୍ୟୁସର୍ ପ୍ରକାଶ କରିଛନ୍ତି।

ଋଷର ସାମରିକ ଯୋଗାଣ କାଟିବାକୁ ଉଦ୍ୟମ

ୟୁକ୍ରେନ୍ ସେନା ପକ୍ଷରୁ ସ୍ପଷ୍ଟ କରାଯାଇଛି ଯେ, ଋଷର ସାମରିକ ଏବଂ ଅର୍ଥନୈତିକ କ୍ଷମତାକୁ ହ୍ରାସ କରିବା ପାଇଁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଜୋଭ୍ ସାଗରରେ ମୋଟ୍ ୧୨ଟି ଋଷୀୟ ଟ୍ୟାଙ୍କର, ଗୋଟିଏ ଟଗବୋଟ୍ ଏବଂ ଗୋଟିଏ କାର୍ଗୋ ଜାହାଜ ଉପରେ ୟୁକ୍ରେନ ସଫଳତାର ସହ ଟାର୍ଗେଟ୍ କରିଛି। ଏହି ସବୁ ଜାହାଜ ଗୁଡ଼ିକ ଋଷ ସେନାକୁ ଇନ୍ଧନ ଏବଂ ଅନ୍ୟାନ୍ୟ ସାମଗ୍ରୀ ଯୋଗାଇବା ପାଇଁ ବ୍ୟବହାର ହେଉଥିଲା। ଏହି ଧାରାବାହିକ ଆକ୍ରମଣ ଫଳରେ ଋଷର ଅନେକ ଅଞ୍ଚଳରେ ଇନ୍ଧନ ଅଭାବ ଦେଖାଦେବା ସହ ଗାଡ଼ି ଚାଳକମାନେ ଘଣ୍ଟା ଘଣ୍ଟା ଧରି ପେଟ୍ରୋଲ୍ ପମ୍ପରେ ଲାଇନ ଲଗାଉଥିବା ଦେଖିବାକୁ ମିଳିଛି।

୭୩ଟି ଡ୍ରୋନ୍ ଖସାଇଥିବା ଦାବି କଲା ଋଷ

ଅନ୍ୟପଟେ ଋଷର ପ୍ରତିରକ୍ଷା ମନ୍ତ୍ରଣାଳୟ ଦାବି କରିଛି ଯେ, ସେମାନେ ନିଜର ବାୟୁ ପ୍ରତିରକ୍ଷା ବ୍ୟବସ୍ଥା ଦ୍ୱାରା ୟୁକ୍ରେନର ପ୍ରାୟ ୭୩ଟି ଡ୍ରୋନ୍ କୁ ଆକାଶ ମାର୍ଗରେ ନଷ୍ଟ କରିଦେଇଛନ୍ତି। ସୂଚନାଯୋଗ୍ୟ ଯେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁକ୍ରେନକୁ ପ୍ୟାଟ୍ରିଅଟ୍ ବାୟୁ ପ୍ରତିରକ୍ଷା ବ୍ୟବସ୍ଥା ନିର୍ମାଣ ପାଇଁ ଲାଇସେନ୍ସ ଦେବାକୁ ଘୋଷଣା କରିବାର ଗୋଟିଏ ଦିନ ପରେ ୟୁକ୍ରେନ୍ ପକ୍ଷରୁ ଏହି ବଡ଼ ଧରଣର ଆକ୍ରମଣ କରାଯାଇଛି। ଏହା ଋଷ ପାଇଁ ଏକ ବଡ଼ ଝଟକା ବୋଲି ସାମରିକ ବିଶେଷଜ୍ଞମାନେ ମତ ଦେଇଛନ୍ତି।

ଦିଲ୍ଲୀ-ଏନସିଆର ଏବଂ ଲକ୍ଷ୍ନୌ ଅଞ୍ଚଳରେ ବେଆଇନ ନିର୍ମାଣ, ଅଗ୍ନିକାଣ୍ଡ ଓ କୋଠା ଭୁସୁଡ଼ିବା ଘଟଣାକୁ ନେଇ ସର୍ବୋଚ୍ଚ ନ୍ୟାୟାଳୟ (ସୁପ୍ରିମକୋର୍ଟ) ସମ୍ପୃକ୍ତ କର୍ତ୍ତୃପକ୍ଷଙ୍କୁ କଡ଼ା ଭର୍ତ୍ସନା କରିଛନ୍ତି। କେବଳ ଦୋଷ ଲୁଚାଇବା ପାଇଁ ଅଧିକାରୀମାନେ 'ମୁହଁ ରକ୍ଷା' (Face-saving) ଭଳି ପଦକ୍ଷେପ ନେଉଛନ୍ତି ବୋଲି କୋର୍ଟ କ୍ଷୋଭ ପ୍ରକାଶ କରିଛନ୍ତି। ଦିଲ୍ଲୀର ସାକେତ କୋଠା ଭୁସୁଡ଼ିବା ଏବଂ ମାଲବୀୟ ନଗର ଓ ଲକ୍ଷ୍ନୌ ଅଗ୍ନିକାଣ୍ଡ ଭଳି ମର୍ମନ୍ତୁଦ ଘଟଣାର ଉଦାହରଣ ଦେଇ ଖାମଖିଆଲି ମନୋଭାବ ପୋଷଣ କରୁଥିବା ଅଧିକାରୀଙ୍କୁ କୋର୍ଟ ତାଗିଦ କରିଛନ୍ତି।

ବିଚାରପତି ଅହସାନୁଦ୍ଦିନ ଅମାନୁଲ୍ଲା ଏବଂ ବିଚାରପତି ଶୀଲ ନାଗୁଙ୍କୁ ନେଇ ଗଠିତ ଖଣ୍ଡପୀଠ ଶୁଣାଣି ସମୟରେ କହିଛନ୍ତି ଯେ, ଏଭଳି ଘଟଣାରେ କେବଳ ବିଲ୍ଡର ଏବଂ ଅନ୍ୟ ଲୋକଙ୍କୁ ଗିରଫ କରାଯାଉଛି, କିନ୍ତୁ ବ୍ୟାପକ ନିୟମ ଉଲ୍ଲଂଘନ ହୋଇଥିବା ଅଞ୍ଚଳର ଦାୟିତ୍ୱରେ ଥିବା ସରକାରୀ ଅଧିକାରୀଙ୍କୁ ଛାଡ଼ି ଦିଆଯାଉଛି। ପ୍ରକୃତ ଦୋଷୀମାନଙ୍କୁ ସୁରକ୍ଷା ଦେଇ ପ୍ରଶାସନ କେବଳ ଲୋକଦେଖାଣିଆ କାର୍ଯ୍ୟାନୁଷ୍ଠାନ ଗ୍ରହଣ କରୁଛି। ଗତ ମେ' ୨୦ ତାରିଖରେ ଦିଆଯାଇଥିବା ନିର୍ଦ୍ଦେଶ ସତ୍ତ୍ୱେ ଅଧିକାରୀମାନେ କୌଣସି ଆଖିଦୃଶିଆ ପଦକ୍ଷେପ ନେଇନଥିବାରୁ କୋର୍ଟ ଅସନ୍ତୋଷ ପ୍ରକାଶ କରିଛନ୍ତି।

ବିପଜ୍ଜନକ କୋଠା ଓ ପ୍ରଶାସନର ନିଷ୍କ୍ରିୟତା

ସୁପ୍ରିମକୋର୍ଟ ନିଜ ମେ' ୨୦ ଆଦେଶରେ ଦିଲ୍ଲୀର ଲାଜପତ ନଗର ଏବଂ ସରୋଜିନୀ ନଗର ଭଳି ଅଞ୍ଚଳରେ ଥିବା ବେଆଇନ ନିର୍ମାଣ ବିଷୟରେ ଚେତାବନୀ ଦେଇଥିଲେ। ଏହିସବୁ ଅସୁରକ୍ଷିତ ଢାଞ୍ଚା ଅତ୍ୟଧିକ ଭାର ସହିବାକୁ ସକ୍ଷମ ନୁହେଁ ଏବଂ ଯେକୌଣସି ମୁହୂର୍ତ୍ତରେ ବିପଦ ସୃଷ୍ଟି କରିପାରେ ବୋଲି ଦର୍ଶାଇଥିଲେ। କିନ୍ତୁ ଏହା ପରେ ମଧ୍ୟ ଲକ୍ଷ୍ନୌ ଅଲିଗଞ୍ଜ ଅଗ୍ନିକାଣ୍ଡ (ଯେଉଁଠି ୧୫ ଜଣଙ୍କ ମୃତ୍ୟୁ ଘଟିଥିଲା) ଏବଂ ସାକେତ କୋଠା ଭୁସୁଡ଼ିବା (୬ ଜଣଙ୍କ ମୃତ୍ୟୁ) ଭଳି ଘଟଣା ସାମ୍ନାକୁ ଆସିଥିଲା। ଏହିସବୁ ଘଟଣା ଅଞ୍ଚଳରେ ହୋଇଥିବା ନିୟମର ବ୍ୟାପକ ଉଲ୍ଲଂଘନକୁ ସ୍ପଷ୍ଟ କରୁଛି ବୋଲି କୋର୍ଟ ଦର୍ଶାଇଛନ୍ତି।

ପରବର୍ତ୍ତୀ କାର୍ଯ୍ୟାନୁଷ୍ଠାନ

ସମ୍ପୃକ୍ତ କର୍ତ୍ତୃପକ୍ଷଙ୍କୁ ମେ' ୨୦ ନିର୍ଦ୍ଦେଶ ଅନୁଯାୟୀ ନିଆଯାଇଥିବା ପଦକ୍ଷେପର ଏକ ବିସ୍ତୃତ ରିପୋର୍ଟ ଦାଖଲ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଆସନ୍ତା ଅଗଷ୍ଟ ୪ ତାରିଖରେ ଏହି ମାମଲାର ପରବର୍ତ୍ତୀ ଶୁଣାଣି ହେବ। ଏହି ଦିନ ବରିଷ୍ଠ MCD (ଦିଲ୍ଲୀ ମହାନଗର ନିଗମ) ଅଧିକାରୀମାନଙ୍କୁ କୋର୍ଟରେ ବ୍ୟକ୍ତିଗତ ଭାବେ ହାଜର ହେବାକୁ ସୁପ୍ରିମକୋର୍ଟ ସମନ ଜାରି କରିଛନ୍ତି। ନିୟମ ଉଲ୍ଲଂଘନ ପାଇଁ ଦାୟୀ ଅଧିକାରୀଙ୍କ ବିରୋଧରେ ଆଗାମୀ ଦିନରେ କଠୋର ଦଣ୍ଡବିଧାନ କରାଯିବ ବୋଲି ଖଣ୍ଡପୀଠ ସତର୍କ କରାଇ ଦେଇଛନ୍ତି。