ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ବଡଝାଡ଼ ଗ୍ରାମ ପଞ୍ଚାୟତର ଗୋବରଧୂଳି ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ଗାଁ ପୋଖରୀରେ ଗାଧୋଇବାକୁ ଯାଇ ପାଣିରେ ବୁଡ଼ି ଜଣେ ଯୁବକଙ୍କର ମୃତ୍ୟୁ ହୋଇଛି। ଏହି ଘଟଣା ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।

ସୂଚନା ଅନୁଯାୟୀ, ଗୋବରଧୂଳି ଗ୍ରାମର ଗୋଲଖ ପାହାନଙ୍କ ପୁଅ ବାଦଲ ପାହାନ ଗାଁର ଖଳା ପୋଖରୀକୁ ଗାଧୋଇବା ପାଇଁ ଯାଇଥିଲେ। ତେବେ ବହୁ ସମୟ ବିତିଯିବା ପରେ ମଧ୍ୟ ସେ ଘରକୁ ନ ଫେରିବାରୁ ପରିବାର ଲୋକେ ବ୍ୟସ୍ତ ହୋଇପଡ଼ିଥିଲେ। ପରିବାର ସଦସ୍ୟ ଏବଂ ଗାଁର ଯୁବକମାନେ ମିଶି ଚାରିଆଡ଼େ ଖୋଜାଖୋଜି କରିଥିଲେ ସୁଦ୍ଧା ତାଙ୍କର କୌଣସି ପତ୍ତା ମିଳିନଥିଲା।

ଶେଷରେ ସନ୍ଦେହ ଉପୁଜିବାରୁ ପରିବାର ଲୋକେ ସ୍ଥାନୀୟ ପୋଲିସ ଏବଂ ଅଗ୍ନିଶମ ବିଭାଗକୁ ଖବର ଦେଇଥିଲେ। ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ପୋଖରୀରେ ବ୍ୟାପକ ଖୋଜାଖୋଜି କରିବା ପରେ ବାଦଲଙ୍କ ମୃତଦେହ ଉଦ୍ଧାର କରିଥିଲେ। ପୋଲିସ ମୃତଦେହକୁ ଜବତ କରିବା ସହ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି। ଏହି ଖବର ପ୍ରଚାରିତ ହେବା ପରେ ସମଗ୍ର ଗ୍ରାମରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଛି।

ପୁରୀ ଜିଲ୍ଲା ଅନ୍ତର୍ଗତ କୃଷ୍ଣପ୍ରସାଦ ଥାନାରେ ନୂତନ ଅଧିକାରୀ ଭାବେ ବିଚିତ୍ରାନନ୍ଦ ପ୍ରଧାନ ଯୋଗଦେବା ପରେ ସ୍ଥାନୀୟ ଅଞ୍ଚଳରେ ଆଇନଶୃଙ୍ଖଳା ପରିସ୍ଥିତିରେ ବ୍ୟାପକ ସୁଧାର ଆସିଛି। ଚୋରି, ରାହାଜାନି ଓ ନିଶା ବେପାର ଭଳି ଅପରାଧିକ କାର୍ଯ୍ୟକଳାପ ଉପରେ ରୋକ୍ ଲଗାଇବାରେ ପୋଲିସ ସଫଳତା ହାସଲ କରିଛି।

ମାଲୁଦ ବଜାର ଗୁଳିକାଣ୍ଡର ସଫଳ ପର୍ଦ୍ଦାଫାଶ

ନିକଟରେ ମାଲୁଦ ବଜାରରେ ଥିବା ଏକ ସୁନା ଦୋକାନ କର୍ମଚାରୀଙ୍କ ଉପରକୁ ଗୁଳିମାଡ଼ ହୋଇଥିଲା। ଏହି ଘଟଣାର ତଦନ୍ତ କରି କୃଷ୍ଣପ୍ରସାଦ ପୋଲିସ ୬ ଜଣ ଅଭିଯୁକ୍ତଙ୍କୁ ଗିରଫ କରିବାରେ ସକ୍ଷମ ହୋଇଥିଲା। ଏହି ସମ୍ବେଦନଶୀଳ ମାମଲାର ଦ୍ରୁତ ସମାଧାନ କରିବାରେ ଥାନା ଅଧିକାରୀଙ୍କ ପ୍ରମୁଖ ଭୂମିକାକୁ ନେଇ ସାଧାରଣରେ ବେଶ୍ ପ୍ରଶଂସା କରାଯାଉଛି।

କଡ଼ାକଡ଼ି ହେଲା ରାତ୍ରିକାଳୀନ ପାଟ୍ରୋଲିଂ

କେବଳ ଗୁଳିକାଣ୍ଡ ନୁହେଁ, ବରଂ ଦୀର୍ଘ ବର୍ଷ ଧରି ଫେରାର୍ ଥିବା ଅନେକ ଅସାମାଜିକ ବ୍ୟକ୍ତିଙ୍କୁ ପୋଲିସ ୱାରେଣ୍ଟ ବଳରେ ଗିରଫ କରିଛି। ସ୍ଥାନୀୟ ଅଞ୍ଚଳରେ ଶାନ୍ତି ବଜାୟ ରଖିବା ପାଇଁ ରାତ୍ରିକାଳୀନ ପାଟ୍ରୋଲିଂ ବ୍ୟବସ୍ଥାକୁ ଅଧିକ କଡ଼ାକଡ଼ି କରାଯାଇଛି। ବିଗତ ୩ ମାସ ତଳେ ଶ୍ରୀ ପ୍ରଧାନ ଏଠାରେ ଦାୟିତ୍ୱ ଗ୍ରହଣ କରିବା ପରଠାରୁ ଅପରାଧୀଙ୍କ ମନରେ ଛନକା ପଶିଛି।

ବୁଦ୍ଧିଜୀବୀ ମହଲରେ ପ୍ରଶଂସା

କୃଷ୍ଣପ୍ରସାଦ ଅଞ୍ଚଳରେ ଅପରାଧ ନିୟନ୍ତ୍ରଣ ଦିଗରେ ନିଆଯାଇଥିବା ଏଭଳି ଦୃଢ଼ ପଦକ୍ଷେପ ଯୋଗୁଁ ସ୍ଥାନୀୟ ବାସିନ୍ଦାମାନେ ଆଶ୍ୱସ୍ତ ହୋଇଛନ୍ତି। ଥାନା ଅଧିକାରୀଙ୍କ ଦକ୍ଷତା ଏବଂ କାର୍ଯ୍ୟଶୈଳୀକୁ ନେଇ ବର୍ତ୍ତମାନ ଛକବଜାରଠାରୁ ଆରମ୍ଭ କରି ବୁଦ୍ଧିଜୀବୀ ମହଲରେ ସବୁଠି ସକାରାତ୍ମକ ଚର୍ଚ୍ଚା ଜୋର ଧରିଛି।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ଅଲଣ୍ଡା ପଞ୍ଚାୟତର ମଙ୍ଗଳାକୁଦି ଷ୍ଟାଡିୟମ ଠାରେ ଅନୁଷ୍ଠିତ ବ୍ଲକସ୍ତରୀୟ କ୍ରିକେଟ ଟୁର୍ଣ୍ଣାମେଣ୍ଟ ଉଦଯାପିତ ହୋଇଯାଇଛି। ଆୟୋଜକ ତିଛିଣିର ବାବା ତ୍ରିଲୋଚନେଶ୍ଵର କ୍ରିକେଟ ଟିମ୍ ଫାଇନାଲ ମ୍ୟାଚରେ ବିଜୟୀ ହୋଇ ଚାମ୍ପିୟନ ଆଖ୍ୟା ଅର୍ଜନ କରିଛି।

ହି ଟୁର୍ଣ୍ଣାମେଣ୍ଟର ଫାଇନାଲ ମ୍ୟାଚ୍ ବାବା ତ୍ରିଲୋଚନେଶ୍ଵର କ୍ରିକେଟ ଟିମ୍ (ତିଛିଣି) ଏବଂ ବାବା ଜଟାଧାରୀ କ୍ରିକେଟ କ୍ଲବ (ସାନଅଁଳ) ମଧ୍ୟରେ ଖେଳାଯାଇଥିଲା। ପ୍ରଥମେ ବ୍ୟାଟିଂ କରି ତିଛିଣି ଦଳ ନିର୍ଦ୍ଧାରିତ ଓଭରରେ ୭୭ ରନ୍ ସଂଗ୍ରହ କରିଥିଲା। ଜବାବରେ ସାନଅଁଳ ଦଳ ନିର୍ଦ୍ଧାରିତ ଲକ୍ଷ୍ୟ ହାସଲ କରିବାରେ ବିଫଳ ହୋଇ ପରାଜୟ ବରଣ କରିଥିଲା।

ଏହି ଫାଇନାଲ ମ୍ୟାଚକୁ ଅମ୍ପାୟାର ଭାବେ ସୁଶାନ୍ତ କୁମାର ପଲେଇ ଏବଂ ରାହୁଲ କୁମାର ତରେଇ ପରିଚାଳନା କରିଥିଲେ। ସେହିପରି ସ୍ୱାଧୀନ କୁମାର ପଲେଇ ଓ ଅଜୟ କୁମାର ପ୍ରଧାନ ଧାରାବିବରଣୀ ପ୍ରଦାନ କରିଥିବା ବେଳେ ସୀତାଂଶୁ ଜେନା ଏବଂ ରତି ଜେନା ସ୍କୋର ବୋର୍ଡ ଦାୟିତ୍ୱ ତୁଲାଇଥିଲେ।

ପୁରସ୍କାର ବିତରଣୀ ଉତ୍ସବରେ ମୁଖ୍ୟ ଅତିଥି ଭାବେ ଅଲଣ୍ଡା ପଞ୍ଚାୟତର ସରପଞ୍ଚ ବିଷ୍ଣୁ ପ୍ରିୟା ବିଶ୍ୱାଳ ଯୋଗ ଦେଇଥିଲେ। ସମ୍ମାନିତ ଅତିଥି ଭାବେ ତିଛିଣି ଗ୍ରାମ୍ୟ କମିଟି ସଭାପତି ଦୀନବନ୍ଧୁ ଜେନା, ଅଲଣ୍ଡା ପଞ୍ଚାୟତ ବିଜେପି ସଭାପତି ଶରତ ଚନ୍ଦ୍ର ଜେନା, ବୀଣାପାଣି ୟୁଥ କ୍ଲବ ସଭାପତି ବସନ୍ତ ପଲେଇ, କୋଷାଧ୍ୟକ୍ଷ ବୁଲୁ କୁମାର ସାହୁ ଏବଂ ସରପଞ୍ଚଙ୍କ ପ୍ରତିନିଧି ଦିଲ୍ଲୀପ କୁମାର ଦଳେଇ ପ୍ରମୁଖ ଉପସ୍ଥିତ ରହି ଉଭୟ ବିଜେତା ଓ ଉପ-ବିଜେତା ଦଳକୁ ଟ୍ରଫି ପ୍ରଦାନ କରିଥିଲେ। ଆୟୋଜକ ବାବା ତ୍ରିଲୋଚନେଶ୍ୱର କ୍ରିକେଟ ଟିମର ସମସ୍ତ ସଦସ୍ୟ ଏହି ପ୍ରତିଯୋଗିତା ପରିଚାଳନାରେ ସକ୍ରିୟ ସହଯୋଗ କରିଥିଲେ।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ଦେଉଳପଡା ତିତିପ ଠାରେ ମହାସମାରୋହରେ ଚାଲିଛି ଭାଇଚାରାର ପର୍ବ ତଥା ଅଞ୍ଚଳର ପ୍ରସିଦ୍ଧ ପଣାଯାତ୍ରା (ଦ୍ୱିତୀୟ ବାଲିଯାତ୍ରା)। ୩୫ ମୌଜା ପରିଚାଳନା କମିଟି ପକ୍ଷରୁ ଆୟୋଜିତ ଏହି ମହୋତ୍ସବର ମଙ୍ଗଳବାର ଦିନ ଶୁଭାରମ୍ଭ ହୋଇଥିବା ବେଳେ ଆଜି ଏହାର ୫ମ ଦିବସ ପାଳିତ ହୋଇଯାଇଛି।

ପଞ୍ଚମ ଦିବସରେ ଯାତ୍ରା ପଡ଼ିଆରେ ବିଭିନ୍ନ ମନୋମୁଗ୍ଧକର ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ବିଶେଷକରି ଅଞ୍ଚଳର ପାରମ୍ପରିକ ସମରକଳା ପାଇକ ଆଖଡା, ଲୋକନୃତ୍ୟ ଭାରତ ଲୀଳା ଏବଂ ସଂକୀର୍ତ୍ତନ କଳାକାରମାନଙ୍କ ଦ୍ୱାରା ପରିବେଷିତ ନୃତ୍ୟ ଦର୍ଶକଙ୍କୁ ବେଶ ଆକୃଷ୍ଟ କରିଥିଲା। ଏହି ଯାତ୍ରା ମହୋତ୍ସବକୁ ସରସ ସୁନ୍ଦର କରିବା ପାଇଁ ବ୍ଲକ, ଜିଲ୍ଲା ତଥା ରାଜ୍ୟ ପ୍ରଶାସନର ଅଧିକାରୀଙ୍କ ସମେତ ସ୍ଥାନୀୟ ଲୋକପ୍ରତିନିଧିମାନଙ୍କୁ ଆମନ୍ତ୍ରଣ କରାଯାଇଛି।

ଶ୍ରଦ୍ଧାଳୁମାନଙ୍କ ସୁବିଧା ପାଇଁ କୃଷ୍ଣପ୍ରସାଦ ବିକାଶ ପରିଷଦ ତରଫରୁ ଗତବର୍ଷ ଭଳି ଚଳିତ ବର୍ଷ ମଧ୍ୟ ମହାପ୍ରଭୁ ଶ୍ରୀଜଗନ୍ନାଥଙ୍କ ପ୍ରସିଦ୍ଧ 'ଟଙ୍କ ତୋରାଣି' ବିତରଣ କରାଯାଉଛି। ପରିଷଦର ସଭାପତି ନବୀନ କୁମାର ଜେନା, ସମ୍ପାଦକ କାଳୁ ଚରଣ ପଲେଇ ଏବଂ ମୁଖ୍ୟ ପରାମର୍ଶଦାତା ସିଏ ଦିବାକର ହରିଚନ୍ଦନଙ୍କ ସମେତ ବହୁ ସଦସ୍ୟ ଏହି କାର୍ଯ୍ୟକ୍ରମରେ ସହଯୋଗ କରିଥିଲେ। ଅନ୍ୟପକ୍ଷରେ, ଯାତ୍ରା ପଡ଼ିଆର ସାମଗ୍ରିକ ସ୍ୱଚ୍ଛତା ଉପରେ ଶ୍ରୀ ଶ୍ରୀ କମଳେଶ୍ବର ଦେବ ଗୋଲଡେନ କ୍ଳବର ସଦସ୍ୟମାନେ କଡା ନଜର ରଖିଛନ୍ତି।

ଯାତ୍ରା ପଡ଼ିଆରେ ଶାନ୍ତି ଶୃଙ୍ଖଳା ବଜାୟ ରଖିବା ଲାଗି କୃଷ୍ଣପ୍ରସାଦ ଥାନା ଆଇଆଇସି ବିଚିତ୍ରାନନ୍ଦ ପ୍ରଧାନଙ୍କ ନେତୃତ୍ୱରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ବିଶୃଙ୍ଖଳା ରୋକିବା ପାଇଁ ପଡ଼ିଆର ବିଭିନ୍ନ ସ୍ଥାନରେ ସିସିଟିଭି କ୍ୟାମେରା ଲଗାଯାଇଛି। ୩୫ ମୌଜା ପରିଚାଳନା କମିଟିର ସଭାପତି ସୁରେନ୍ଦ୍ର ନାଥ ମାଝୀ ଏବଂ ସମ୍ପାଦକ ଦିଲ୍ଲୀପ କୁମାର ଦାଶଙ୍କ ସମେତ ୧୪୭ ଜଣ ସଦସ୍ୟଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଏହି ଐତିହାସିକ ଯାତ୍ରା ପରିଚାଳିତ ହେଉଛି। ଶାନ୍ତି ଶୃଙ୍ଖଳା ରକ୍ଷାରେ ପ୍ରମୁଖ ଭୂମିକା ଗ୍ରହଣ କରିଥିବାରୁ ପରିଚାଳନା କମିଟି ପକ୍ଷରୁ ସ୍ଥାନୀୟ ଆଇଆଇସିଙ୍କୁ ବେଶ ପ୍ରଶଂସା କରାଯାଇଛି।

ସାତପଡ଼ାରୁ ଜହ୍ନିକୁଦା ଅଭିମୁଖେ ଚଳାଚଳ କରୁଥିବା ଘାଟ ଡଙ୍ଗାରେ ଅହେତୁକ ଭଡ଼ା ବୃଦ୍ଧିକୁ ନେଇ ଆଜି ପ୍ରବଳ ଉତ୍ତେଜନା ଦେଖାଦେଇଛି। ଧାର୍ଯ୍ୟ ଶୁଳ୍କଠାରୁ ଅଧିକ ଅର୍ଥ ଦାବି କରାଯାଉଥିବା ଅଭିଯୋଗକୁ କେନ୍ଦ୍ର କରି ଯାତ୍ରୀ ଏବଂ ଡଙ୍ଗା ମାଲିକଙ୍କ ମଧ୍ୟରେ ଧସ୍ତାଧସ୍ତି ଓ ଯୁକ୍ତିତର୍କ ହୋଇଥିବା ସୂଚନା ମିଳିଛି।

ମନଇଚ୍ଛା ଭଡ଼ା ଆଦାୟ ଅଭିଯୋଗ

ସାଧାରଣ ଯାତ୍ରୀଙ୍କ ଅଭିଯୋଗ ଅନୁଯାୟୀ, କିଛି ଡଙ୍ଗା ମାଲିକ ଓ କର୍ମଚାରୀମାନେ ନିୟମକୁ ବେଖାତିର କରି ମନଇଚ୍ଛା ଭଡ଼ା ଆଦାୟ କରୁଛନ୍ତି। ଦୀର୍ଘ ଦିନ ଧରି ଏହି ଭଡ଼ା ଆଦାୟକୁ ନେଇ ଅସନ୍ତୋଷ ଲାଗି ରହିଥିବା ବେଳେ ଆଜି ଏହା ଉଗ୍ର ରୂପ ଧାରଣ କରିଥିଲା। ବର୍ଦ୍ଧିତ ଭଡ଼ା ଦେବାକୁ ଯାତ୍ରୀମାନେ ମନା କରିବାରୁ ଉଭୟ ପକ୍ଷ ମଧ୍ୟରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା।

ବାଧାପ୍ରାପ୍ତ ହେଲା ଯାତ୍ରୀ ପରିବହନ

ଏହି ବିବାଦ କାରଣରୁ ଘାଟରେ କିଛି ସମୟ ପାଇଁ ଯାତ୍ରୀ ପରିବହନ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା। ଫଳରେ ଦୂରଦୂରାନ୍ତରୁ ଆସିଥିବା ପର୍ଯ୍ୟଟକ ଏବଂ ସ୍ଥାନୀୟ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ପ୍ରଶାସନ ତୁରନ୍ତ ହସ୍ତକ୍ଷେପ କରି ଏକ ନିର୍ଦ୍ଦିଷ୍ଟ ଭଡ଼ା ତାଲିକା ସାର୍ବଜନୀନ କରିବା ସହ ବେଆଇନ ଭାବେ ଅଧିକ ଅର୍ଥ ଆଦାୟ କରୁଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଜନସାଧାରଣ ଦାବି କରିଛନ୍ତି।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଳକ ଅନ୍ତର୍ଗତ ତିତିପ ପଞ୍ଚାୟତ ଦେଉଳପଡା ଠାରେ ମହାସମାରୋହରେ ପାଳିତ ହେଉଛି ଦ୍ଵିତୀୟ ବାଲିଯାତ୍ରା ବା ପଣାଯାତ୍ରା। ସୋମବାରଠାରୁ ଆରମ୍ଭ ହୋଇଥିବା ଏହି ଯାତ୍ରାର ଦ୍ବିତୀୟ ଦିବସରେ ଯାତ୍ରା ପଡ଼ିଆରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା, ଯାହା ଦର୍ଶକଙ୍କୁ ବେଶ୍ ଆକୃଷ୍ଟ କରିଛି। ବିଶେଷ କରି ଅଞ୍ଚଳର ପାରମ୍ପରିକ ସମରକଳା ପାଇକ ଆଖଡା, ଲୋକନୃତ୍ୟ ଭାରତ ଲୀଳା ଏବଂ ସଂକୀର୍ତ୍ତନ ପରିବେଷଣ ମାହୋଲକୁ ଆଧ୍ୟାତ୍ମିକ ତଥା ଉତ୍ସବମୁଖର କରିତୋଳିଥିଲା।

ଯାତ୍ରାର ଅନନ୍ୟ ପରମ୍ପରା ଓ ସ୍ୱତନ୍ତ୍ର ନୀତିକାନ୍ତି

ଏହି ଦ୍ଵିତୀୟ ବାଲିଯାତ୍ରାର ଏକ ନିଆରା ସ୍ୱତନ୍ତ୍ରତା ରହିଛି, ଯାହା ଓଡ଼ିଶାର ଅନ୍ୟ କୌଣସି ଯାତ୍ରାରେ ସାଧାରଣତଃ ଦେଖିବାକୁ ମିଳେନାହିଁ। ବିଭିନ୍ନ ଦୋଳ, ପଞ୍ଚଦୋଳ କିମ୍ବା ଦଶଦୋଳ ଯାତ୍ରାରେ ଠାକୁରମାନେ ନିଜ ଆସ୍ଥାନରେ ଅବସ୍ଥାନ କରୁଥିବା ବେଳେ ସେଠାରେ ଅନ୍ନ ଭୋଗ ହୋଇନଥାଏ। ମାତ୍ର ଏହି ବାଲିଯାତ୍ରାରେ ପ୍ରତ୍ୟହ ସକାଳ ୭ଟାରୁ ଠାକୁରମାନେ ମନ୍ଦିର ପରିସରରେ ଥିବା ଏକ ସ୍ୱତନ୍ତ୍ର କୋଠରୀରେ ବିଜେ କରିଥାନ୍ତି ଏବଂ ସେଠାରେ ପ୍ରତିଦିନର ମନ୍ଦିର ନୀତି ଅନୁଯାୟୀ ଅନ୍ନ ନୀତି ଭୋଗ ସମର୍ପଣ କରାଯାଇଥାଏ। ପରବର୍ତ୍ତୀ ସମୟରେ, ଅର୍ଥାତ୍ ସନ୍ଧ୍ୟା ୭ଟାରେ ପ୍ରଭୁ ପୁନର୍ବାର ଯାତ୍ରା ପଡ଼ିଆର ଆସ୍ଥାନକୁ ବିଜେ କରିଥାନ୍ତି।

ବ୍ୟାପକ ସୁରକ୍ଷା ବ୍ୟବସ୍ଥା ଓ ପରିଚାଳନା

ଉତ୍ସବକୁ ଶୃଙ୍ଖଳିତ କରିବା ପାଇଁ ବ୍ୟାପକ ପ୍ରସ୍ତୁତି କରାଯାଇଛି। ଯାତ୍ରା ପଡ଼ିଆରେ ଅଘଟଣ ଏବଂ ବିଶୃଙ୍ଖଳା ରୋକିବା ନିମନ୍ତେ ବିଭିନ୍ନ ସ୍ଥାନରେ ସିସିଟିଭି କ୍ୟାମେରା ଲଗାଯାଇଛି। କୃଷ୍ଣପ୍ରସାଦ ଥାନା ଆଇଆଇସି ବିଚିତ୍ରାନନ୍ଦ ପ୍ରଧାନଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବା ସହ ବେପରୁଆ ଗାଡି ଚାଳକଙ୍କୁ ତାଗିଦ କରାଯାଉଛି। ଏହାବ୍ୟତୀତ ବିଭିନ୍ନ ସ୍ୱେଚ୍ଛାସେବୀ ସଂଗଠନ ଯାତ୍ରା ପଡ଼ିଆର ସ୍ୱଚ୍ଛତା ଉପରେ କଡ଼ା ନଜର ରଖିଛନ୍ତି।

ପଣା ଯାତ୍ରା ମହୋତ୍ସବରେ ସ୍ଥାନୀୟ ଲୋକପ୍ରତିନିଧିଙ୍କ ସମେତ ବ୍ଲକ, ଜିଲ୍ଲା ଏବଂ ରାଜ୍ୟ ପ୍ରଶାସନର ଅଧିକାରୀମାନଙ୍କୁ ନିମନ୍ତ୍ରଣ କରାଯାଇଛି। ଏହି ବିଶାଳ ଉତ୍ସବକୁ ୩୫ ମୌଜା ପରିଚାଳନା କମିଟିର ସଭାପତି ସୁରେନ୍ଦ୍ର ନାଥ ମାଝୀ ଏବଂ ସମ୍ପାଦକ ଦିଲ୍ଲୀପ କୁମାର ଦାଶ ସୁଚାରୁରୂପେ ପରିଚାଳନା କରୁଥିବା ବେଳେ କମିଟିର ଅନ୍ୟ ୧୪୭ ଜଣ ସଦସ୍ୟ ଏଥିରେ ସକ୍ରିୟ ସହଯୋଗ କରୁଛନ୍ତି।

ଓଡ଼ିଶାର ଦ୍ୱିତୀୟ ବାଲିଯାତ୍ରା ଭାବେ ସୁନାମ ଅର୍ଜନ କରିଥିବା ଐତିହାସିକ ୭୯ତମ ପଣାଯାତ୍ରା ମହୋତ୍ସବ ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ୍ ଅନ୍ତର୍ଗତ ଦେଉଳପଡ଼ା ତିତିପ ଠାରେ ଉଦ୍‌ଘାଟିତ ହୋଇଯାଇଛି। ୩୫ ମୌଜା ପରିଚାଳନା କମିଟି ଆନୁକୂଲ୍ୟରେ ଆୟୋଜିତ ଏହି ବର୍ଣ୍ଣାଢ଼୍ୟ ମହୋତ୍ସବରେ ପ୍ରତିଦିନ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳୁଛି।

ଦେବଦଳନ ଓ ସାଂସ୍କୃତିକ କାର୍ଯ୍ୟକ୍ରମ

ଏହି ଯାତ୍ରାରେ ୩୫ ମୌଜାର ମୁଖ୍ୟ ପୀଠାଧୀଶ ଶ୍ରୀ କମଳେଶ୍ବର ଦେବଙ୍କ ନେତୃତ୍ୱରେ ବିଭିନ୍ନ ଗ୍ରାମରୁ ୧୮ଟି ଠାକୁର ସୁସଜ୍ଜିତ ମେଢ଼ ଓ ଆତସବାଜି ପଟୁଆରରେ ଆସି ପଣାଯାତ୍ରା ପଡ଼ିଆରେ ପହଞ୍ଚିଥିଲେ। ନିଜ ନିଜ ଆସନରେ ଦେବଦେବୀମାନେ ବିରାଜମାନ କରିବା ପରେ ଭକ୍ତମାନେ ଦର୍ଶନ କରୁଛନ୍ତି। ମନୋରଞ୍ଜନ ପାଇଁ ପାଲା, ସଂକୀର୍ତ୍ତନ, ପାଇକ ଆଖଡ଼ା ଏବଂ ଭାରତଲୀଳା ଆଦି ପ୍ରତିଯୋଗିତା ଆୟୋଜିତ ହେଉଥିବା ବେଳେ ପ୍ରତିଷ୍ଠିତ ୨ଟି ଗଣନାଟ୍ୟ ଦଳ ଖୋଲା ମଞ୍ଚରେ ନାଟକ ପରିବେଷଣ କରୁଛନ୍ତି। କମିଟିର ସଭାପତି ସୁରେନ୍ଦ୍ର ନାଥ ମାଝୀ ଏବଂ ସମ୍ପାଦକ ଦିଲ୍ଲୀପ କୁମାର ଦାଶଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ୫ ଦିନିଆ ଯାତ୍ରା ପରିଚାଳିତ ହେଉଛି।

ବ୍ୟାପକ ବ୍ୟବସାୟ ଓ ଶ୍ରଦ୍ଧାଳୁ ସମାଗମ

ଏହି ଯାତ୍ରାକୁ ପୁରୀ, ଗଞ୍ଜାମ, ଖୋର୍ଦ୍ଧା, ଗଜପତି, ନୟାଗଡ଼ ଏବଂ କଟକ ଜିଲ୍ଲାରୁ ବହୁ ସଂଖ୍ୟାରେ ବ୍ୟବସାୟୀ ଓ ଭକ୍ତ ଆସିଥାନ୍ତି। ମୂଳ ଯାତ୍ରା ୫ ଦିନ ଧରି ଚାଲିବାର ଥିଲେ ମଧ୍ୟ ଏଠାରେ ବ୍ୟବସାୟୀମାନେ ଦୀର୍ଘ ଏକ ମାସ ଧରି ନିଜର ବ୍ୟବସାୟ ଜାରି ରଖିଥାନ୍ତି। ସ୍ୱଚ୍ଛ ପାନୀୟ ଜଳ ଯୋଗାଣ ନିମନ୍ତେ ୨୦ ଗୋଟି ଅସ୍ଥାୟୀ ନଳକୂପ ଏବଂ ପାଣି ଟ୍ୟାଙ୍କର ବ୍ୟବସ୍ଥା କରାଯାଇଛି।

ସୁରକ୍ଷା ବ୍ୟବସ୍ଥା ଓ ପରିଚାଳନା

ଶାନ୍ତି ଶୃଙ୍ଖଳା ରକ୍ଷା ପାଇଁ ପଡ଼ିଆରେ ସିସିଟିଭି କ୍ୟାମେରା ଖଞ୍ଜାଯାଇଛି। କୃଷ୍ଣପ୍ରସାଦ ଥାନା ଆଇଆଇସି ଭାବଗ୍ରାହୀ ରାଉତଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏସ୍‌ଆଇ ଚନ୍ଦ୍ରଶେଖର ନାୟକ ଓ ଏସ୍‌ଆଇ ସୁଜିତ କୁମାର ସାହୁଙ୍କ ସମେତ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି। ବିଶୃଙ୍ଖଳା ସୃଷ୍ଟି କରୁଥିବା ବ୍ୟକ୍ତିବିଶେଷଙ୍କ ପାଇଁ କମିଟି ପକ୍ଷରୁ ଏକ ଅସ୍ଥାୟୀ ହାଜତ ନିର୍ମାଣ କରାଯାଇଛି। ସେହିପରି ପ୍ରଥମ ଦିବସରେ ବ୍ରହ୍ମଗିରିର ପୂର୍ବତନ ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର ଯୋଗଦେଇ ବିଗ୍ରହମାନଙ୍କ ଦର୍ଶନ କରିଥିଲେ। ପଡ଼ିଆର ସ୍ୱଚ୍ଛତା ପ୍ରତି ବାବା କମଳେଶ୍ଵର ଦେବ ଗୋଲ୍ଡେନ କ୍ଳବ ପକ୍ଷରୁ ବିଶେଷ ଦୃଷ୍ଟି ଦିଆଯାଉଛି।

କୃଷ୍ଣପ୍ରସାଦ: ଶିକ୍ଷାର ବିକାଶ ପାଇଁ ସରକାର ତତ୍ପର ହୋଇ ଉଠିଥିବା ବେଳେ ତୃଣମୂଳ ସ୍ତରରେ କିନ୍ତୁ ନିୟମର ଖୋଲାଖୋଲି ଉଲ୍ଲଂଘନ ହେଉଛି। ଖାଲିଥିବା ଶିକ୍ଷକ ପଦବୀ ପୂରଣ ଏବଂ ଶିକ୍ଷା ବ୍ୟବସ୍ଥାରେ ଉନ୍ନତି ଆଣିବାକୁ ସରକାର ପ୍ରୟାସ ଜାରି ରଖିଛନ୍ତି। ତେବେ ଗାଁ ଗାଁରେ ଏବେ କୋଚିଂ ସେଣ୍ଟର ସଂଖ୍ୟା ବୃଦ୍ଧି ପାଉଛି। ସରକାରୀ ନିର୍ଦ୍ଦେଶ ଅନୁଯାୟୀ କାର୍ଯ୍ୟରତ ଶିକ୍ଷକମାନେ ଘରୋଇ ଟିଉସନ କିମ୍ବା କୋଚିଂ ସେଣ୍ଟରରେ ପଢ଼ାଇ ପାରିବେ ନାହିଁ। କିନ୍ତୁ ଏହି ଆଇନକୁ ବେଖାତିର କରି ସରକାରୀ ଶିକ୍ଷକ ଏବଂ ଅଧ୍ୟାପକମାନେ ନିଜେ କୋଚିଂ ସେଣ୍ଟର ଖୋଲି ବସିଛନ୍ତି।

ମାର୍କ କାଟିଦେବାର ଧମକ

ସରକାରୀ ଶିକ୍ଷକମାନେ କେବଳ କୋଚିଂ ସେଣ୍ଟର ଖୋଲି ନାହାଁନ୍ତି, ବରଂ ନିଜ ପାଖରେ ଟିଉସନ ହେବା ପାଇଁ ଛାତ୍ରଛାତ୍ରୀଙ୍କୁ ବାଧ୍ୟ କରୁଥିବା ଅଭିଯୋଗ ହେଉଛି। ଆମ କୋଚିଂ ସେଣ୍ଟରରେ ନପଢ଼ିଲେ ପରୀକ୍ଷାରେ ମାର୍କ କମାଇ ଦିଆଯିବ ବୋଲି ଖୋଲାଖୋଲି ଧମକ ମିଳୁଛି। ଫଳରେ ଭୟଭୀତ ହୋଇ ଶିକ୍ଷାର୍ଥୀମାନେ ସେମାନଙ୍କ ପାଖରେ ପଢ଼ିବାକୁ ବାଧ୍ୟ ହେଉଛନ୍ତି। ଏପରିକି ଟିଉସନ ନିଶାରେ ଶିକ୍ଷକମାନେ ସ୍କୁଲରୁ ତରବର ହୋଇ ବାହାରି ଆସୁଛନ୍ତି, ଯାହା ଫଳରେ ବିଦ୍ୟାଳୟରେ ପାଠପଢ଼ା ମଧ୍ୟ ବ୍ୟାହତ ହେଉଛି।

ବଢ଼ୁଛି ବେକାରୀ ସମସ୍ୟା

ଲକ୍ଷ ଲକ୍ଷ ଟଙ୍କା ଦରମା ପାଉଥିବା ସରକାରୀ ଶିକ୍ଷକମାନେ ନିଜର ଆର୍ଥିକ ଅବସ୍ଥା ଦ୍ଵିଗୁଣିତ କରୁଥିବା ବେଳେ ଶିକ୍ଷିତ ବେକାର ଯୁବକମାନେ ଦୁର୍ଦ୍ଦଶା ଭୋଗୁଛନ୍ତି। ବେକାରୀ ଦୂରୀକରଣ ତଥା ପରିବାର ପୋଷଣ ପାଇଁ ଶିକ୍ଷିତ ଯୁବକମାନେ ଯେଉଁ କୋଚିଂ ସେଣ୍ଟର ଖୋଲିଛନ୍ତି, ସେଠାରେ ପଢ଼ିବାକୁ ପିଲାମାନେ ଭୟ କରୁଛନ୍ତି। ରୋଜଗାର ହରାଉଥିବାରୁ ବାଧ୍ୟ ହୋଇ ଏହି ଶିକ୍ଷିତ ଯୁବକମାନେ ଦାଦନ ଶ୍ରମିକ ସାଜି ରାଜ୍ୟ ବାହାରକୁ କାମ ଅନ୍ୱେଷଣରେ ଚାଲି ଯାଉଥିବା ଦେଖିବାକୁ ମିଳୁଛି।

ପ୍ରଶାସନର ନୀରବତା ଏବଂ ଦାବି

ସରକାରୀ ଶିକ୍ଷକଙ୍କ ଏଭଳି ବେଆଇନ କାର୍ଯ୍ୟକଳାପ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ପରିବର୍ତ୍ତେ ବ୍ଲକ ଶିକ୍ଷାଧିକାରୀ ଏବଂ ବିଭାଗୀୟ କର୍ମଚାରୀମାନେ ନୀରବଦ୍ରଷ୍ଟା ସାଜିଛନ୍ତି। ସଲାସୁତରାରେ ନିୟମକୁ ଅଣଦେଖା କରାଯାଉଥିବା ସାଧାରଣରେ ଆଲୋଚନା ହେଉଛି। ଆଇନ ଉଲ୍ଲଂଘନ କରୁଥିବା ଟିଉସନ ସେଣ୍ଟରଗୁଡ଼ିକ ଉପରେ ଭିଜିଲାନ୍ସ ଚଢ଼ାଉ କରାଯିବା ଆବଶ୍ୟକ। ନିୟମ ଭାଙ୍ଗୁଥିବା ଶିକ୍ଷକ ଏବଂ ସେମାନଙ୍କୁ ସହଯୋଗ କରୁଥିବା ଶିକ୍ଷାଧିକାରୀ କାର୍ଯ୍ୟାଳୟର କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କଲେ ବେକାରୀ ସମସ୍ୟା କିଛି ମାତ୍ରାରେ ଦୂର ହୋଇପାରିବ ବୋଲି ସାଧାରଣରେ ଦାବି ହେଉଛି।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ୍ ଅଞ୍ଚଳରେ ଲାଗିରହିଥିବା କାଳବୈଶାଖୀ ପ୍ରଭାବରେ ଏକ ବଡ଼ ଅଘଟଣ ଘଟିଯାଇଛି। ସନ୍ଧ୍ୟା ସମୟରେ ସାତପଡ଼ା ଘାଟରୁ ଜହ୍ନିକୁଦା ଅଭିମୁଖେ ଯାଉଥିବା ଏକ ସରକାରୀ ଭସାପୋଲ ଦିଗହରା ହୋଇ ମଝି ଚିଲିକାରେ ବାଟବଣା ହୋଇଯାଇଥିଲା। ଫଳରେ ଏଥିରେ ଥିବା ୫୦ରୁ ଅଧିକ ଯାତ୍ରୀ ଏବଂ ବହୁ ଯାନବାହନ ଦୀର୍ଘ ସମୟ ଧରି ପାଣିରେ ଫସି ରହିଥିଲେ।

କାଳବୈଶାଖୀ ଯୋଗୁଁ ବିଗିଡ଼ିଲା ସ୍ଥିତି

ଗତ କିଛି ଦିନ ହେବ ସ୍ଥାନୀୟ ଅଞ୍ଚଳରେ ପାଗ ଖରାପ ରହିଛି। ଭସାପୋଲଟି ଯାତ୍ରା କରୁଥିବା ସମୟରେ ହଠାତ୍ ପବନ ଓ ପ୍ରବଳ ବର୍ଷା ଆରମ୍ଭ ହୋଇଯାଇଥିଲା। କାଳବୈଶାଖୀ ଜନିତ ଅନ୍ଧକାର କାରଣରୁ ଭସାପୋଲର ଚାଳକ ଦିଗ ନିର୍ଣ୍ଣୟ କରିବାରେ ବିଫଳ ହୋଇଥିଲେ। ନିଜର ଗନ୍ତବ୍ୟସ୍ଥଳକୁ ଯାଇନପାରି ଏହି ଭସାପୋଲଟି ମଇଁଷା ବ୍ରହ୍ମପୁର ଗାଁ ନିକଟରେ ଅଟକି ରହିଥିଲା। ସୂଚନା ଅନୁଯାୟୀ, ଏହି ଭସାପୋଲରେ ଯାତ୍ରୀଙ୍କ ସମେତ ୫ଟି କାର୍ ଏବଂ ୧୦ଟି ବାଇକ୍ ମଧ୍ୟ ରହିଥିଲା। ଚତୁର୍ଦ୍ଦିଗରେ ଘନ ଅନ୍ଧକାର ଓ ପାଣି ଘେରି ରହିଥିବାରୁ ଯାତ୍ରୀମାନେ ଅତ୍ୟନ୍ତ ଭୟଭୀତ ହୋଇ ମୋବାଇଲ୍ ଫୋନ୍ ଯୋଗେ ପ୍ରଶାସନକୁ ଉଦ୍ଧାର ପାଇଁ ନିବେଦନ କରିଥିଲେ।

ପୋଲିସ ଓ ପ୍ରଶାସନର ତ୍ୱରିତ ପଦକ୍ଷେପ

ଖବର ପାଇବା ମାତ୍ରେ କୃଷ୍ଣପ୍ରସାଦ ପୋଲିସ ଏବଂ ସ୍ଥାନୀୟ ପ୍ରଶାସନ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ପାଣିପାଗ ଖରାପ ଏବଂ ରାତିର ଅନ୍ଧକାର ଯୋଗୁଁ ଉଦ୍ଧାର କାର୍ଯ୍ୟରେ ପ୍ରାରମ୍ଭିକ ବାଧା ଉପୁଜିଥିଲେ ମଧ୍ୟ ବିପର୍ଯ୍ୟୟ ପରିଚାଳନା ଟିମ୍ ସହାୟତାରେ ଉଦ୍ଧାର ପ୍ରକ୍ରିୟା ଜାରି ରହିଥିଲା। ବିଳମ୍ବିତ ରାତିରେ ପୋଲିସ ଏବଂ ଉଦ୍ଧାରକାରୀ ଦଳ ଡଙ୍ଗା ସାହାଯ୍ୟରେ ଯାତ୍ରୀ ଏବଂ ମୋଟରସାଇକେଲ୍ ଗୁଡ଼ିକୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ପରବର୍ତ୍ତୀ ସମୟରେ, ଅର୍ଥାତ୍ ଆଜି ସକାଳେ ଭସାପୋଲଟିକୁ ଜହ୍ନିକୁଦା ପେଣ୍ଠ ଜେଟି ନିକଟକୁ ଅଣାଯାଇ ସେଥିରେ ଥିବା କାର୍ ଗୁଡ଼ିକୁ ମଧ୍ୟ ସୁରକ୍ଷିତ ଭାବେ କୂଳକୁ ଅଣାଯାଇଛି।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଅନ୍ତର୍ଗତ ସାତପଡ଼ା ପଞ୍ଚାୟତ ସ୍ନାତକ ଶିକ୍ଷା ଓ ବୈଷୟିକ ମହାବିଦ୍ୟାଳୟରେ ଆୟୋଜିତ ହୋଇଥିବା ଗ୍ରୀଷ୍ମକାଳୀନ ସ୍ୱତନ୍ତ୍ର ଜାତୀୟ ସେବା ଶିବିର (NSS) ମହାସମାରୋହରେ ଉଦଯାପିତ ହୋଇଯାଇଛି। ସମାଜ ସେବା ତଥା ଛାତ୍ରଛାତ୍ରୀଙ୍କ ବ୍ୟକ୍ତିତ୍ୱ ବିକାଶ ଲକ୍ଷ୍ୟରେ ଆୟୋଜିତ ଏହି ସାତ ଦିନିଆ ଶିବିରରେ ବହୁ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।

ଅତିଥିଙ୍କ ଯୋଗଦାନ ଓ ପ୍ରମାଣପତ୍ର ବଣ୍ଟନ

ଏହି ଉଦଯାପନୀ ସମାରୋହରେ ସାତପଡ଼ା ପଞ୍ଚାୟତର ସରପଞ୍ଚ ଶ୍ରୀମତୀ ରଶ୍ମିତା ସାମନ୍ତରାୟ ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ। ସେ ନିଜ ବକ୍ତବ୍ୟରେ ଛାତ୍ରଛାତ୍ରୀମାନଙ୍କୁ ସମାଜ ସେବା ଦିଗରେ ବ୍ରତୀ ହେବାକୁ ଉତ୍ସାହିତ କରିବା ସହ କୃତୀ ଶିବିରାର୍ଥୀମାନଙ୍କୁ ମାନପତ୍ର ବଣ୍ଟନ କରିଥିଲେ। କାର୍ଯ୍ୟକ୍ରମରେ ମହାବିଦ୍ୟାଳୟର ଅଧ୍ୟକ୍ଷ ଡ଼ଃ ପ୍ରକାଶ କୁମାର ଜେନା ସଭାପତିତ୍ୱ କରିଥିଲେ। ସେ ଶିବିରରେ ଅଂଶଗ୍ରହଣ କରିଥିବା ଛାତ୍ରଛାତ୍ରୀଙ୍କ ସାତ ଦିନର ଅନୁଭୂତି ଶୁଣିବା ସହ ସେମାନଙ୍କର ସେବା ମନୋଭାବକୁ ନେଇ ଅତ୍ୟନ୍ତ ଖୁସି ବ୍ୟକ୍ତ କରିଥିଲେ।

ଶିବିର ପରିଚାଳନା ଓ ସହଯୋଗ

ଏହି ସ୍ୱତନ୍ତ୍ର ସେବା ଶିବିରରେ ମୋଟ ୫୦ ଜଣ ବାଳକ ଏବଂ ୫୦ ଜଣ ବାଳିକା ସକ୍ରିୟ ଭାବେ ଅଂଶଗ୍ରହଣ କରିଥିଲେ। ଶିବିରକୁ ବାଳକ ବିଭାଗର ଯୋଜନା ଅଧିକାରୀ ଶ୍ରୀଯୁକ୍ତ ପ୍ରସନ୍ନ କୁମାର ସାହୁ ଏବଂ ବାଳିକା ବିଭାଗର ଯୋଜନା ଅଧିକାରୀ ପ୍ରତାପ ଚନ୍ଦ୍ର ଦଳେଇ ସୁଚାରୁରୂପେ ପରିଚାଳନା କରିଥିଲେ। ଶେଷରେ ସେମାନଙ୍କ ପକ୍ଷରୁ ଆନୁଷ୍ଠାନିକ ଭାବେ ଧନ୍ୟବାଦ ଅର୍ପଣ କରାଯାଇଥିଲା। ଏହି ସମ୍ପୂର୍ଣ୍ଣ କାର୍ଯ୍ୟକ୍ରମକୁ ସଫଳ କରିବାରେ ମହାବିଦ୍ୟାଳୟର ଅଧ୍ୟାପକ ପବିତ୍ର ମୋହନ ଦାସଙ୍କ ସମେତ ସମସ୍ତ ଅଧ୍ୟାପକ, ଅଧ୍ୟାପିକା ଏବଂ କର୍ମଚାରୀମାନେ ପୂର୍ଣ୍ଣ ସହଯୋଗ କରିଥିଲେ।

ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକର ଏକମାତ୍ର ପୁସ୍ତକ ମେଳା ପଞ୍ଚୁଦୋଳ ପୁସ୍ତକ ମେଳାର ଏକ ଗୁରୁତ୍ୱପୂର୍ଣ୍ଣ ବୈଠକ ମାଲୁଦ ପଞ୍ଚୁଦୋଳ ପଡ଼ିଆରେ ଅନୁଷ୍ଠିତ ହୋଇଯାଇଛି। ଏହି ସଭାରେ ସ୍ଥାୟୀ ସଭାପତି ଉଲ୍ଲାସ ଚନ୍ଦ୍ର ଜେନା ସଭାପତିତ୍ୱ କରିଥିଲେ। ସ୍ଥାନୀୟ ଅଞ୍ଚଳରେ ସାହିତ୍ୟ ଏବଂ ସଂସ୍କୃତିର ପ୍ରସାର ଦିଗରେ ଏହି ମେଳାର ଏକ ସ୍ୱତନ୍ତ୍ର ପରିଚୟ ରହିଛି।

ଉକ୍ତ ବୈଠକରେ ସମ୍ପାଦକ ବିଷ୍ଣୁ ପ୍ରସାଦ ଦଳେଇ ବିଗତ ପୁସ୍ତକ ମେଳାର ଆୟ-ବ୍ୟୟର ହିସାବ ଉପସ୍ଥାପିତ କରିଥିଲେ। ଏହି ଆଲୋଚନାରେ ସର୍ବସମ୍ମତି କ୍ରମେ ପୁସ୍ତକ ମେଳାକୁ ସରକାରୀ ଭାବେ ରେଜିଷ୍ଟ୍ରେସନ ବା ପଞ୍ଜୀକରଣ କରିବା ପାଇଁ ନିଷ୍ପତ୍ତି ଗ୍ରହଣ କରାଯାଇଥିଲା। ଏଥିସହ ଆଗାମୀ ଦିନରେ ଏହି ପୁସ୍ତକ ମେଳା କିପରି ଅଧିକ ସୁଚାରୁ ରୂପେ ପରିଚାଳିତ ହେବ ଏବଂ ବ୍ୟାପକ ସଫଳତା ହାସଲ କରିବ, ସେହି ବିଭିନ୍ନ ଦିଗ ଉପରେ ସଦସ୍ୟମାନଙ୍କ ମଧ୍ୟରେ ବିସ୍ତୃତ ଆଲୋଚନା କରାଯାଇଥିଲା।

ଉତ୍କଳ ଦିବସ ପାଳନ ଓ କବିତା ପାଠ

ଏହି ବୈଠକ ଅବସରରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନର ସ୍ମୃତିରେ ଉତ୍କଳ ଦିବସ ମଧ୍ୟ ପାଳିତ ହୋଇଥିଲା। ଏହି ଉପଲକ୍ଷେ ଉପସ୍ଥିତ କବି ଓ ଲେଖକମାନଙ୍କ ଦ୍ୱାରା ଏକ କବିତା ପାଠୋତ୍ସବ ଅନୁଷ୍ଠିତ ହୋଇଥିଲା। କାର୍ଯ୍ୟକ୍ରମରେ ଯୋଗଦେଇ କବିତା ପାଠ କରିଥିବା ସ୍ରଷ୍ଟାମାନଙ୍କ ମଧ୍ୟରେ ପ୍ରଦୀପ କୁମାର ଦାସ, କାଶୀନାଥ ଜେନା, ଦେବରାଜ ଜେନା, ଅଶୋକ କୁମାର ଜେନା, ବିଦ୍ୟାଧର ପ୍ରଧାନ, ବାବୁଲା ନାୟକ, ରୁପାଲୀ ପଲେଇ, ପ୍ରବୀଣା ଦାସ, ମଧୁସୂଦନ ସାହୁ, ମହେନ୍ଦ୍ର ବେହେରା, ସଦାନନ୍ଦ ଗୌଡ଼, ସୁରେନ୍ଦ୍ର ପ୍ରଧାନ, ଲଳିତ କୁମାର ସ୍ୱାଇଁ, ପ୍ରେମଚାନ୍ଦ ପତ୍ର, ପ୍ରଭାଞ୍ଜନ ଦାଶ ଏବଂ ମନୋଜ କୁମାର ବାରିକ ପ୍ରମୁଖ ସାମିଲ ଥିଲେ।

କୃଷ୍ଣପ୍ରସାଦ: ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ୍ ଅନ୍ତର୍ଗତ ଅଲଣ୍ଡା ପଞ୍ଚାୟତର ବାଲିଗୋଠଠାରେ ୪୨ ମୌଜା ପରିଚାଳନା କମିଟି ପକ୍ଷରୁ ଆୟୋଜିତ ଦ୍ୱିତୀୟ ପାରିକୁଦ ମହୋତ୍ସବ ସଫଳତାର ସହ ଶେଷ ହୋଇଛି। ତେବେ ମହୋତ୍ସବ ଶେଷ ହେବା ପରେ ପଡ଼ିଆରେ ପଡ଼ିଥିବା ଅଳିଆ ଆବର୍ଜନା ଓ ପ୍ଲାଷ୍ଟିକ୍ ସଫା କରିବା ପାଇଁ ଏକ ବୃହତ୍ ସ୍ୱଚ୍ଛତା ଅଭିଯାନ ହାତକୁ ନିଆଯାଇଛି।

ପ୍ଲାଷ୍ଟିକ୍ ମୁକ୍ତ ଅଭିଯାନ

ପୁରୀ, ଗଞ୍ଜାମ ଓ ଖୋର୍ଦ୍ଧା ଜିଲ୍ଲାରୁ ହଜାର ହଜାର ଦର୍ଶକ ଏହି ମହୋତ୍ସବରେ ସାମିଲ ହୋଇଥିବା ବେଳେ ୧ ହଜାରରୁ ଊର୍ଦ୍ଧ୍ୱ ବ୍ୟବସାୟୀ ଦୋକାନ ଖୋଲିଥିଲେ। ପ୍ରବଳ ଭିଡ଼ ଯୋଗୁଁ ମହୋତ୍ସବ ପଡ଼ିଆରେ ବିପୁଳ ମାତ୍ରାରେ ପ୍ଲାଷ୍ଟିକ୍ ବୋତଲ, ପଲିଥିନ୍ ଏବଂ ଅନ୍ୟାନ୍ୟ ଆବର୍ଜନା ଜମା ହୋଇଥିଲା। ଏହାକୁ ଦୃଷ୍ଟିରେ ରଖି ୪୨ ମୌଜା ପରିଚାଳନା କମିଟିର ସଭାପତି କୈଳାଶ ଚନ୍ଦ୍ର ପଟ୍ଟନାୟକ, ସମ୍ପାଦକ ପ୍ରଶାନ୍ତ କୁମାର ପଲେଇ ଏବଂ କୋଷାଧ୍ୟକ୍ଷ ମୋଚିରାମ ନାୟକଙ୍କ ନେତୃତ୍ୱରେ ପଡ଼ିଆ ସଫେଇ ଆରମ୍ଭ କରାଯାଇଥିଲା। ଗ୍ରୀନ୍ ପାରିକୁଦର 'ଗଛ ମଣିଷ' ଭାବେ ପରିଚିତ ଅମିତା ତରେଇ, ଶଙ୍କର ପଲେଇ, ମୀନାରାଣୀ ସାହୁ, ନକୁଳ ସୁନ୍ଦରାଙ୍କ ସମେତ ଅନେକ ସ୍ୱେଚ୍ଛାସେବୀ ଏହି ପ୍ଲାଷ୍ଟିକ୍ ମୁକ୍ତ ଅଭିଯାନରେ ସକ୍ରିୟ ଭାବେ ସାମିଲ ହୋଇଥିଲେ।

ଜନପ୍ରତିନିଧି ଓ ମହିଳାଙ୍କ ସହଯୋଗ

ଏହି ସଫେଇ କାର୍ଯ୍ୟକ୍ରମରେ ସ୍ଥାନୀୟ ଜନପ୍ରତିନିଧିମାନେ ମଧ୍ୟ ପୂର୍ଣ୍ଣ ମାତ୍ରାରେ ସହଯୋଗ କରିଥିଲେ। ପାଞ୍ଚଟି ପଞ୍ଚାୟତର ସରପଞ୍ଚ ଯଥା ବିଷ୍ଣୁପ୍ରିୟା ବିଶ୍ୱାଳ, ରବିନାରାୟଣ ମାଝୀ, ଆଦିତ୍ୟ ରଞ୍ଜନ ପଲେଇ, ବୀଣାପାଣି ପ୍ରଧାନ, ଇତିଶ୍ରୀ ସିଂହ ଏବଂ ପୂର୍ବତନ ସରପଞ୍ଚ ମିଟୁ ସିଂ ସାମନ୍ତ ଓ କୁମାର ସିଂହ ଉପସ୍ଥିତ ଥିଲେ। ଏଥିସହ ସରପଞ୍ଚଙ୍କ ପ୍ରତିନିଧି ପ୍ରଫୁଲ୍ଲ ପ୍ରଧାନ, ଧର୍ମେନ୍ଦ୍ର ବିଶ୍ୱାଳ, ବିଦ୍ୟାଧର ପଲେଇ, ରମେଶ ଚନ୍ଦ୍ର ତରେଇ, ବିଶ୍ୱମ୍ବର ପ୍ରଧାନଙ୍କ ସମେତ ପାଞ୍ଚଟି ପଞ୍ଚାୟତର ଶତାଧିକ ମହିଳା ଏକାଠି ହୋଇ ପଡ଼ିଆକୁ ସମ୍ପୂର୍ଣ୍ଣ ସଫା କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ।