ପୁଣେ: ମହାରାଷ୍ଟ୍ରର ପୁଣେରେ ଏକ ଅତି ଅଭାବନୀୟ ତଥା ସ୍ପର୍ଶକାତର ଘଟଣା ସାମ୍ନାକୁ ଆସିଛି। ପବିତ୍ର ଶ୍ରାବଣ ମାସରେ ଘରେ ମଟନ୍ ରାନ୍ଧିବାକୁ ଦାବି କରିବାରୁ ଜଣେ ବାପା ନିଜର ୩୦ ବର୍ଷୀୟ ପୁଅକୁ ପିଟିପିଟି ହତ୍ୟା କରିଦେଇଥିବା ଅଭିଯୋଗ ହୋଇଛି । ଏହି ଘଟଣାରେ ପୋଲିସ ମୃତକଙ୍କ ବାପା ଓ ମାଆଙ୍କୁ ଗିରଫ କରି ତଦନ୍ତ ଜାରି ରଖିଛି।

ପୋଲିସର ସୂଚନା ଅନୁଯାୟୀ, ମୃତ ଯୁବକଙ୍କ ନାମ ମହେଶ ଗାଏକ୍‌ୱାଡ଼। ସମଗ୍ର ଭାରତବର୍ଷରେ ହିନ୍ଦୁ ପରିବାରଗୁଡ଼ିକ ଭଗବାନ ଶିବଙ୍କ ଆରାଧନାର ମାସ 'ଶ୍ରାବଣ'ରେ ଆମିଷ ଖାଇବାରୁ ଦୂରେଇ ରହିଥାନ୍ତି। ମହେଶଙ୍କ ପରିବାର ମଧ୍ୟ ଘରେ ଏହି ନିୟମ କଠୋର ଭାବେ ପାଳନ କରୁଥିଲେ। ତେବେ ମହେଶ ଏହି କଟକଣା ନମାନି ଘରେ ମଟନ୍ ଖାଇବାକୁ ଜିଦ୍ ଧରିଥିଲେ। ଏହି କଥାକୁ ନେଇ ବାପା ଓ ପୁଅଙ୍କ ମଧ୍ୟରେ ପ୍ରବଳ ଯୁକ୍ତିତର୍କ ହୋଇଥିଲା, ଯାହା ପରବର୍ତ୍ତୀ ସମୟରେ ଉଗ୍ର ରୂପ ନେଇ ହାତାହାତି ପରିସ୍ଥିତି ସୃଷ୍ଟି କରିଥିଲା।

ରାଗରେ ଜର୍ଜରିତ ହୋଇ ବାପା ନିଜ ପୁଅକୁ ନିସ୍ତୁକ ମାଡ଼ ମାରିଥିଲେ। ଗୁରୁତର ଆଘାତ ଲାଗିବା କାରଣରୁ ମହେଶଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ତେବେ ଆଶ୍ଚର୍ଯ୍ୟର କଥା ହେଉଛି, ଘଟଣା ପରେ ନିଜ ସ୍ୱାମୀଙ୍କୁ ପୋଲିସ କବଳରୁ ବଞ୍ଚାଇବା ପାଇଁ ମହେଶଙ୍କ ମାଆ ରକ୍ତଭିଜା ଘଟଣାସ୍ଥଳରୁ ପ୍ରମାଣ ନଷ୍ଟ କରିବାକୁ ଉଦ୍ୟମ କରିଥିଲେ। ସେ ସମସ୍ତ ଚିହ୍ନ ଲିଭାଇବାକୁ ଚେଷ୍ଟା କରିଥିବା ପୋଲିସ ସୂତ୍ରରୁ ପ୍ରକାଶ।

ମୃତ୍ୟୁର କାରଣ ଏବଂ ପରିସ୍ଥିତିକୁ ନେଇ ସନ୍ଦେହ ହେବାରୁ ୱାର୍ଜେ ମାଲୱାଡି ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ପଚରାଉଚରା ସମୟରେ ପରିବାର ଲୋକଙ୍କ ବୟାନରେ ବ୍ୟାପକ ଅସଙ୍ଗତି ଦେଖାଦେବାରୁ ହତ୍ୟାକାଣ୍ଡର ପର୍ଦ୍ଦାଫାଶ ହୋଇଥିଲା। ବର୍ତ୍ତମାନ ଉଭୟ ବାପା ଓ ମାଆଙ୍କୁ ହତ୍ୟା ଏବଂ ପ୍ରମାଣ ନଷ୍ଟ କରିବା ଅଭିଯୋଗରେ ପୋଲିସ ଗିରଫ କରିଛି। ସେମାନଙ୍କୁ ପୋଲିସ ହେପାଜତରେ ରଖାଯାଇ ପରବର୍ତ୍ତୀ ଆଇନଗତ କାର୍ଯ୍ୟାନୁଷ୍ଠାନ ଜାରି ରହିଛି।

ପଶ୍ଚିମ ଦିଲ୍ଲୀର ତିଲକ ନଗର ଅଞ୍ଚଳରେ ଏକ ଅଭାବନୀୟ ତଥା ଚାଞ୍ଚଲ୍ୟକର ହତ୍ୟାକାଣ୍ଡ ସାମ୍ନାକୁ ଆସିଛି। ବୁଧବାର ସନ୍ଧ୍ୟାରେ ଜଣେ ୨୧ ବର୍ଷୀୟା ଯୁବତୀଙ୍କୁ ତାଙ୍କ ଭଡ଼ା ଘରେ ପଶି ଅତି ନିର୍ମମ ଭାବେ ଛୁରାମାଡ଼ କରି ହତ୍ୟା କରାଯାଇଛି। ମୃତ ଯୁବତୀ ଜଣକ ହେଉଛନ୍ତି ମୁସ୍କାନ, ଯିଏକି ଜଣେ ଛାତ୍ରୀ ହେବା ସହ ପାର୍ଟ-ଟାଇମ୍ ମଡେଲିଂ ମଧ୍ୟ କରୁଥିଲେ। ଘରେ ଏକୁଟିଆ ଥିବା ସମୟରେ ଅଭିଯୁକ୍ତ ଜଣକ ତାଙ୍କ ଉପରେ ଏହି ବର୍ବର ଆକ୍ରମଣ କରିଥିଲା।

ପରିବାରର ସଙ୍ଗୀନ ଅଭିଯୋଗ: ଜିମ୍ ଟ୍ରେନର ଦାୟୀ

ମୃତ ଯୁବତୀଙ୍କ ପରିବାର ଲୋକେ ଏହି ହତ୍ୟାକାଣ୍ଡ ପାଇଁ ମୁସ୍କାନଙ୍କ ଜିମ୍ ଟ୍ରେନର ଇମ୍ରାନ ଉପରେ ସିଧାସଳଖ ଅଭିଯୋଗ ଆଣିଛନ୍ତି। ପରିବାର ଏବଂ ସମ୍ପର୍କୀୟଙ୍କ କହିବା ଅନୁଯାୟୀ, ଗତ ପ୍ରାୟ ଦେଢ଼ ବର୍ଷ ଧରି ଇମ୍ରାନ ମୁସ୍କାନଙ୍କୁ ହଇରାଣ କରିବା ସହ ତାଙ୍କ ପିଛା କରୁଥିଲା। ମୁସ୍କାନ ତାଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିବାରୁ ଏଭଳି ଘଟଣା ଘଟିଥିବା ସନ୍ଦେହ କରାଯାଉଛି। ଘଟଣା ଦିନ ଇମ୍ରାନ ମୁସ୍କାନଙ୍କ ଦ୍ୱିତୀୟ ମହଲାରେ ଥିବା ଘରେ ପଶି ତାଙ୍କ ପେଟ ଏବଂ ଶରୀରର ଅନ୍ୟ ଅଂଶକୁ ଏକାଧିକ ଥର ଛୁଆମାଡ଼ କରି ଫେରାର ହୋଇଯାଇଥିଲା।

ଚିତ୍କାର ଶୁଣି ଦୌଡ଼ି ଆସିଲେ ପଡୋଶୀ

ଘଟଣା ସମୟରେ ମୁସ୍କାନଙ୍କ ଆର୍ତ୍ତଚିତ୍କାର ଶୁଣି ପଡୋଶୀମାନେ ତାଙ୍କ ଘରକୁ ଦୌଡ଼ି ଯାଇଥିଲେ। ସେଠାରେ ସେ ରକ୍ତାକ୍ତ ଅବସ୍ଥାରେ ପଡ଼ିଥିବା ଦେଖି ତୁରନ୍ତ ତାଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାକୁ ନେଇଥିଲେ। ତେବେ ଡାକ୍ତରଖାନାରେ ପହଞ୍ଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୁସ୍କାନଙ୍କର ଜଣେ ବନ୍ଧୁ କହିଛନ୍ତି ଯେ, ତାଙ୍କ ଭଉଣୀ ଫୋନ୍ କରି ଘଟଣା ସମ୍ପର୍କରେ ଜଣାଇବା ପରେ ସେ ଡାକ୍ତରଖାନାରେ ପହଞ୍ଚିଥିଲେ, କିନ୍ତୁ ସେତେବେଳକୁ ସବୁକିଛି ସରିଯାଇଥିଲା।

ସିସିଟିଭି ଫୁଟେଜ୍ ଯାଞ୍ଚ କରୁଛି ପୋଲିସ

ଏହି ଘଟଣା ସମ୍ପର୍କରେ ଅତିରିକ୍ତ ଡିସିପି ଅଭିଷେକ ଗୁପ୍ତା କହିଛନ୍ତି ଯେ, ପୋଲିସ ହତ୍ୟାକାରୀକୁ ଧରିବା ପାଇଁ ବିଭିନ୍ନ ଟିମ୍ ଗଠନ କରିଛି। ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ୍ ଗୁଡ଼ିକୁ ଯାଞ୍ଚ କରାଯିବା ସହ ମୃତ ଯୁବତୀଙ୍କ ଫୋନ୍ ରେକର୍ଡ ମଧ୍ୟ ଖୋଳତାଡ଼ କରାଯାଉଛି। ବର୍ତ୍ତମାନ ମୁଖ୍ୟ ଅଭିଯୁକ୍ତ ଇମ୍ରାନ ଫେରାର ଥିବା ବେଳେ ତାକୁ ଖୋଜି ବାହାର କରିବା ପାଇଁ ସ୍ଥାନୀୟ ଅଞ୍ଚଳରେ ଏବଂ ସେ କାମ କରୁଥିବା ଜିମ୍ ତଥା ତାଙ୍କ ବନ୍ଧୁମାନଙ୍କ ଘରେ ଚଢ଼ାଉ ଜାରି ରହିଛି। ଅଞ୍ଚଳରେ ଶାନ୍ତି ଶୃଙ୍ଖଳା ବଜାୟ ରଖିବା ପାଇଁ ବ୍ୟାପକ ପୋଲିସ ଫୋର୍ସ ମଧ୍ୟ ମୁତୟନ କରାଯାଇଛି।

ଭୁବନେଶ୍ୱର: ରାଜଧାନୀରେ ପୁଣି ଏକ ପ୍ରେମ ପ୍ରତାରଣା ଘଟଣା ସାମ୍ନାକୁ ଆସିଛି। ପ୍ରତାରଣାର ଶିକାର ହୋଇଥିବା ମହିଳା ଇନଫୋସିଟି ଥାନାରେ ଏତଲା ଦେଇଛନ୍ତି। ପୁଲିସ ଚଣ୍ଡିଖୋଲରେ ଚଢ଼ଉ କରି ପ୍ରେମିକକୁ ଉଠାଇ ଆଣି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତ ହେଉଛି ଢେଙ୍କାନାଳ ଜିଲ୍ଲା କୁସୁମଯୋଡ଼ିର ତପନ କୁମାର ନାଏକ (୩୦)।

ପୁଲିସ ସୂଚନାନୁଯାୟୀ, ବାଲୁଗାଁ ଅଞ୍ଚଳର ଜଣେ ୩୪ ବର୍ଷୀୟା ମହିଳା ୧୫ ବର୍ଷ ପୂର୍ବେ ବିବାହ କରିଥିଲେ। କିନ୍ତୁ କୌଣସି କାରଣରୁ ତାଙ୍କର ଛାଡ଼ପତ୍ର ହୋଇଯାଇଥିଲା ଓ ସେ ତାଙ୍କ ଦୁଇ ପୁଅକୁ ଧରି ଇନଫୋସିଟି ଥାନା ଅଞ୍ଚଳରୁ ରହୁଛନ୍ତି। ୨୦୨୧ ମସିହାରେ ଇନଷ୍ଟାଗ୍ରାମ ଜରିଆରେ ଘରୋଇ ସଂସ୍ଥାରେ ବରିଷ୍ଠ ରୋଷେୟା ଭାବେ କାମ କରୁଥିବା ତପନ ସହ ତାଙ୍କର ପରିଚୟ ହୋଇଥିଲା। ତପନ ତାଙ୍କୁ ପ୍ରେମ ନିବେଦନ କରିବା ପରେ ଉଭୟଙ୍କ ସମ୍ପର୍କ ଆଗକୁ ବଢ଼଼ିଥିଲା। ଛୁଟି ସମୟରେ ତପନ ଭୁବନେଶ୍ୱର ଆସି ମହିଳାଙ୍କ ପାଖରେ ରହୁଥିଲା। ମହିଳା ଜଣକ ମଧ୍ୟ ତାଙ୍କ ପୁଅମାନେ ମଧ୍ୟ ତପନକୁ ବାପା ବୋଲି ସମ୍ବୋଧନ କରୁଥିଲେ। ଉଭୟ ଅନେକ ସମୟରେ ବୁଲାବୁଲି କରିବା ସହ ବିବାହ କରିବାକୁ ପ୍ରତିଶ୍ରୁତି ଦେଇ ତପନ ତାଙ୍କ ସହ ଶାରିରୀକ ସମ୍ପର୍କ ରଖିଥିଲା। ମହିଳାଙ୍କ ପରିବାର ଲୋକ ମଧ୍ୟ ଉଭୟଙ୍କ ସମ୍ପର୍କ ବିଷୟରେ ଅବଗତ ଥିଲେ। 

 ହେଲେ ନିକଟ ଅତୀତରେ ତପନର ପରିବାର ଲୋକେ ତାର ବିବାହ ପାଇଁ ଝିଅ ଖୋଜିବା ଆରମ୍ଭ କରିଥିଲେ। ଏହାପରଠାରୁ ତପନ ମହିଳାଙ୍କ ସହ ଯୋଗାଯୋଗ ରଖିନଥିଲା। ଏହାରି ଭିତରେ ତପନର ବିବାହ ସ୍ଥିତ ହୋଇ ଯାଇଥିଲା। ମହିଳା ଫୋନ୍‌‌ କରିବାରୁ ତପନ ତାଙ୍କୁ ଗାଳିଗୁଲଜ କରିବା ସହ ଜୀବନରେ ମାରିଦେବାକୁ ଧମକ ଦେଇଥିଲା। ଶେଷରେ ମହିଳା ଜଣକ ଇନଫୋସିଟି ଥାନାର ଦ୍ୱାରସ୍ଥ ହେବାପରେ ପୁଲିସ ମାମଲା ରୁଜୁ କରିଥିଲା। ଚଣ୍ଡିଖୋଲରେ ଚଢ଼ଉ କରି ତପନକୁ ଥାନାକୁ ଉଠାଇ ଆଣିଥିଲା। ପ୍ରାଥମିକ ତଦନ୍ତରୁ ପ୍ରମାଣ ମିଳିବା ପରେ ତପନକୁ ଗିରଫ କରି କୋର୍ଟ ଚାଲାଣ କରିଛି।

ଗତ ମାସରେ ଘଟିଥିବା ଏକ ଟ୍ରକ ଅଗ୍ନିକାଣ୍ଡ ଘଟଣାର ପୋଲିସ ଚାଞ୍ଚଲ୍ୟକର ଖୁଲାସା କରିଛି। ପ୍ରଥମେ ଏହାକୁ ଏକ ସଡ଼କ ଦୁର୍ଘଟଣା ବୋଲି ଭାବିଥିବା ପୋଲିସ ତଦନ୍ତ ପରେ ଜାଣିବାକୁ ପାଇଛି ଯେ, ଏହା ଏକ ସୁଚିନ୍ତିତ ହତ୍ୟାକାଣ୍ଡ ଥିଲା। ଏହି ଘଟଣାରେ ମୃତ ଟ୍ରକ ଡ୍ରାଇଭର ବଲୱିନ୍ଦର ସିଂହଙ୍କୁ ତାଙ୍କ ପ୍ରେମିକା ଅମନଦୀପ କୌର ଅତି ନିର୍ମମ ଭାବେ ହତ୍ୟା କରିବା ପରେ ଟ୍ରକରେ ନିଆଁ ଲଗାଇ ଦେଇଥିଲେ। ପୋଲିସ ମୁଖ୍ୟ ଅଭିଯୁକ୍ତଙ୍କୁ ମଙ୍ଗଳବାର ଗିରଫ କରିଛି।

କିପରି ଘଟିଥିଲା ହତ୍ୟାକାଣ୍ଡ?

ଗତ ୧୦ ଜୁଲାଇ ରାତିରେ ପୂରନପୁର କୋତୱାଲି ଅନ୍ତର୍ଗତ ଜାତୀୟ ରାଜପଥ (NH-730) ଉପରେ ଏକ ଟ୍ରକରୁ ଡ୍ରାଇଭର ବଲୱିନ୍ଦର ସିଂହଙ୍କ ଜଳନ୍ତା ମୃତଦେହ ଉଦ୍ଧାର କରାଯାଇଥିଲା। ସେହିଦିନ ସେ ଉତ୍ତରାଖଣ୍ଡର ରୁଦ୍ରପୁରରୁ ସାମଗ୍ରୀ ନେଇ ନେପାଳ ସୀମା ଅଭିମୁଖେ ଯାଉଥିଲେ। ପୋଷ୍ଟମର୍ଟମ ରିପୋର୍ଟରେ ଧୂଆଁରେ ଶ୍ୱାସରୁଦ୍ଧ ହୋଇ ତାଙ୍କର ମୃତ୍ୟୁ ହୋଇଥିବା ଦର୍ଶାଯାଇଥିଲା। କିନ୍ତୁ ମୃତକଙ୍କ ଭାଇ ଗୁରମିତ ସିଂହ ଏହାକୁ ଏକ ହତ୍ୟାକାଣ୍ଡ ବୋଲି ସନ୍ଦେହ କରି ପୋଲିସରେ ଅଭିଯୋଗ କରିଥିଲେ। ସିସିଟିଭି ଫୁଟେଜ୍ ଯାଞ୍ଚ ପରେ ପୋଲିସର ସନ୍ଦେହ ଦୃଢ଼ ହୋଇଥିଲା ଏବଂ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରାଯାଇଥିଲା।

ବ୍ଲାକମେଲିଂରୁ ହତ୍ୟା

ପୋଲିସ ସୁପରିଣ୍ଟେଣ୍ଡେଣ୍ଟ ସୁକୀର୍ତ୍ତି ମାଧବଙ୍କ ସୂଚନା ଅନୁଯାୟୀ, ୪୦ ବର୍ଷୀୟା ଅଭିଯୁକ୍ତ ମହିଳା ଅମନଦୀପ କୌରଙ୍କ ସହ ବଲୱିନ୍ଦରଙ୍କର ଗତ ଦୁଇ-ତିନି ବର୍ଷ ଧରି ପ୍ରେମ ସମ୍ପର୍କ ଥିଲା। କିନ୍ତୁ ଅମନଦୀପ ଏହି ସମ୍ପର୍କରୁ ମୁକୁଳିବାକୁ ଚାହୁଁଥିଲେ। ଅଭିଯୋଗ ଅନୁଯାୟୀ, ବଲୱିନ୍ଦର ତାଙ୍କର କିଛି ଅନ୍ତରଙ୍ଗ ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ କରିବା ସହ ପରିବାର ଲୋକଙ୍କୁ ଦେଖାଇଦେବେ ବୋଲି ଧମକ ଦେଇ ବ୍ଲାକମେଲ୍ କରୁଥିଲେ।

ଏଥିରେ ଅତିଷ୍ଠ ହୋଇ ଅମନଦୀପ ହତ୍ୟାର ଷଡ଼ଯନ୍ତ୍ର ରଚିଥିଲେ। ଘଟଣା ଦିନ ଟ୍ରକ କ୍ୟାବିନରେ କଥାବାର୍ତ୍ତା ବେଳେ ସେ ଏକ ଲୁହା ରଡରେ ବଲୱିନ୍ଦରଙ୍କ ମୁଣ୍ଡକୁ ପିଟି ଦେଇଥିଲେ। ସେ ବେହୋସ ହୋଇଯିବା ପରେ ପ୍ରମାଣ ନଷ୍ଟ କରିବା ଏବଂ ଏହାକୁ ଏକ ଦୁର୍ଘଟଣାର ରୂପ ଦେବା ପାଇଁ ଅମନଦୀପ ତାଙ୍କ ଉପରେ ଏବଂ ଟ୍ରକ କ୍ୟାବିନରେ ଡିଜେଲ ଢାଳି ନିଆଁ ଲଗାଇ ଦେଇଥିଲେ।

ପୋଲିସର ତଦନ୍ତ ଓ ଗିରଫଦାରୀ

ପୋଲିସ ଅଭିଯୁକ୍ତ ମହିଳାଙ୍କୁ ଗୋମତୀ ଗୁରୁଦ୍ୱାର ନିକଟରୁ ଗିରଫ କରିଛି। ଜେରା ବେଳେ ସେ ନିଜର ଅପରାଧ ସ୍ୱୀକାର କରିଛନ୍ତି। ତାଙ୍କ ସୂଚନା ଆଧାରରେ ପୋଲିସ ହତ୍ୟାକାଣ୍ଡରେ ବ୍ୟବହୃତ ଲୁହା ରଡ୍ ଏବଂ ଡିଜେଲ ଭର୍ତ୍ତି ହୋଇଥିବା ପ୍ଲାଷ୍ଟିକ୍ କ୍ୟାନ୍ ଜବତ କରିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ଆଲୋଡ଼ନ ସୃଷ୍ଟି କରିଛି ଏବଂ ପୋଲିସ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି।

ପଞ୍ଜାବର ଲୁଧିଆନାଠାରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଏଠାରେ ଥିବା ଏକ ପିଜା ଆଉଟଲେଟ୍ ଉପରେ ଦୁର୍ବୃତ୍ତମାନେ ଆଖିବୁଜା ଗୁଳିମାଡ଼ କରିଛନ୍ତି। ଆକ୍ରମଣକାରୀମାନେ ମାତ୍ର ୩ ସେକେଣ୍ଡ ମଧ୍ୟରେ ଲଗାତାର ୩ ରାଉଣ୍ଡ ଗୁଳି ଚଳାଇଛନ୍ତି। ଏହି ଘଟଣା ପରେ ସୋସିଆଲ ମିଡିଆରେ 'ଗୋପୀ ଲହୋରିଆ ଗ୍ରୁପ୍' ନାମକ ଏକ ଆକାଉଣ୍ଟରୁ ଏହି ଗୁଳିମାଡ଼ର ଦାୟିତ୍ୱ ନିଆଯାଇଛି, ଯାହା ପୋଲିସର ଚିନ୍ତା ବଢ଼ାଇ ଦେଇଛି।

ଭୟାବହ ଗୁଳିମାଡ଼ର ସିସିଟିଭି ଦୃଶ୍ୟ

ବିଳମ୍ବିତ ରାତିରେ ଲୁଧିଆନାର ପଶ୍ ଅଞ୍ଚଳ ଭାବେ ପରିଚିତ ଭାଇ ରଣଧୀର ସିଂହ ନଗର (BRS Nagar) ରେ ଏହି ଗୁଳିକାଣ୍ଡ ଘଟିଛି। ସୂଚନା ଅନୁଯାୟୀ, ତିନି ଜଣ ଦୁର୍ବୃତ୍ତ ଏକ ସ୍ପ୍ଲେଣ୍ଡର ବାଇକ୍ରେ ଆସିଥିଲେ। ସେମାନଙ୍କ ମଧ୍ୟରୁ ଜଣେ ବାହାରେ ଅପେକ୍ଷା କରିଥିବା ବେଳେ ଅନ୍ୟ ଦୁଇ ଜଣ ପିଜା ଦୋକାନ ଭିତରେ ପଶି ଆତଙ୍କ ସୃଷ୍ଟି କରିଥିଲେ। ଏହି ସମ୍ପୂର୍ଣ୍ଣ ଘଟଣା ଦୋକାନରେ ଲାଗିଥିବା ସିସିଟିଭି (CCTV) କ୍ୟାମେରାରେ କଏଦ ହୋଇଛି। ଭିଡିଓରେ ଦେଖିବାକୁ ମିଳିଛି ଯେ, ଟୋପି ପିନ୍ଧିଥିବା ଜଣେ ଆକ୍ରମଣକାରୀ ଗୁଳି ଚଳାଇବାକୁ ଚେଷ୍ଟା କରିଥିଲେ ମଧ୍ୟ ତାଙ୍କ ବନ୍ଧୁକରୁ ଗୁଳି ବାହାରି ନଥିଲା। ଏହା ପରେ ସେମାନେ ତୁରନ୍ତ ସେଠାରୁ ଫେରାର ହୋଇଯାଇଥିଲେ।

ସୋସିଆଲ ମିଡିଆରେ ଦାୟିତ୍ୱ ନେଲା ଗ୍ୟାଙ୍ଗ୍

ଗୁଳିମାଡ଼ର କିଛି ସମୟ ପରେ ଇନ୍‌ଷ୍ଟାଗ୍ରାମ୍ରେ ଏକ ପୋଷ୍ଟ ସାମ୍ନାକୁ ଆସିବା ପରେ ଘଟଣା ଏକ ନୂଆ ମୋଡ଼ ନେଇଛି। 'ଗୋପୀ ଲହୋରିଆ ଗ୍ରୁପ୍' ନାମକ ହ୍ୟାଣ୍ଡେଲରୁ କରାଯାଇଥିବା ଏହି ପୋଷ୍ଟରେ ଗୁଳିକାଣ୍ଡର ଦାୟିତ୍ୱ ନିଆଯିବା ସହ ପିଜା ଆଉଟଲେଟ୍ ମାଲିକଙ୍କୁ ଧମକ ମଧ୍ୟ ଦିଆଯାଇଛି। ସୂଚନାଯୋଗ୍ୟ ଯେ, ଗୋପୀ ଲହୋରିଆ ହେଉଛି କାନାଡାରେ ଲୁଚି ରହିଥିବା ଜଣେ କୁଖ୍ୟାତ ଗ୍ୟାଙ୍ଗଷ୍ଟର୍, ଯାହାର ନେଟୱର୍କ ପଞ୍ଜାବରେ ଅନେକ ଅପରାଧିକ କାର୍ଯ୍ୟକଳାପରେ ସକ୍ରିୟ ରହିଛି।

ପୋଲିସ ଏବଂ ସାଇବର୍ ସେଲ୍‌ର ତଦନ୍ତ ଜାରି

ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ସୋସିଆଲ ମିଡିଆରେ ଦିଆଯାଇଥିବା ଧମକକୁ ଗମ୍ଭୀରତାର ସହ ନେଇ ପୋଲିସର ସାଇବର୍ ସେଲ୍ ମଧ୍ୟ ସକ୍ରିୟ ହୋଇଛି। ଏହି ଇନ୍‌ଷ୍ଟାଗ୍ରାମ୍ ଆକାଉଣ୍ଟଟି ପ୍ରକୃତରେ ସେହି ଗ୍ୟାଙ୍ଗ ସହ ଜଡ଼ିତ କିମ୍ବା ଆତଙ୍କ ଖେଳାଇବା ପାଇଁ କୌଣସି ଅସାମାଜିକ ବ୍ୟକ୍ତି ଏକ ନକଲି ଆକାଉଣ୍ଟ ଖୋଲିଛି, ତାହାର ଯାଞ୍ଚ କରାଯାଉଛି। ବର୍ତ୍ତମାନ ପୋଲିସ ସିସିଟିଭି ଫୁଟେଜ୍ ଏବଂ ଆକାଉଣ୍ଟର ଆଇପି ଠିକଣା ଆଧାରରେ ଅଭିଯୁକ୍ତମାନଙ୍କୁ ଧରିବା ପାଇଁ ଜାଲ ବିଛାଇଛି。

କୋଲକାତା: କୋଲକାତାର ବହୁ ଚର୍ଚ୍ଚିତ ଆରଜି କର ମେଡିକାଲ କଲେଜ ଏବଂ ହସ୍ପିଟାଲ ଦୁଷ୍କର୍ମ ଓ ହତ୍ୟା ମାମଲାରେ ପଶ୍ଚିମବଙ୍ଗ ପୋଲିସକୁ ଏକ ବଡ଼ ସଫଳତା ମିଳିଛି। ତୃଣମୂଳ କଂଗ୍ରେସର ପୂର୍ବତନ ବିଧାୟକ ତଥା ଦଳର ପୂର୍ବତନ ଚିଫ୍ ହ୍ୱିପ୍ ନିର୍ମଳ ଘୋଷ ଗିରଫ ହୋଇଛନ୍ତି । ୨୦୨୪ ମସିହାରେ ଜଣେ ଡାକ୍ତରୀ ଛାତ୍ରୀଙ୍କ ସହ ଘଟିଥିବା ଅମାନବୀୟ କାଣ୍ଡ ଏବଂ ତା' ପରେ ତରବରିଆ ଭାବେ ମୃତଦେହ ସତ୍କାର କରିବା ମାମଲାରେ ତାଙ୍କୁ ଗିରଫ କରାଯାଇଛି।

ଉତ୍ତର ୨୪ ପ୍ରଗଣା ଜିଲ୍ଲାର ପାନିହାଟି ବିଧାନସଭା କ୍ଷେତ୍ରର ପୂର୍ବତନ ବିଧାୟକ ଥିଲେ ନିର୍ମଳ ଘୋଷ। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀଙ୍କ ନିର୍ଦ୍ଦେଶକ୍ରମେ ବାରାକପୁର ପୋଲିସ କମିଶନରେଟ୍ ପକ୍ଷରୁ ଏହି ଘଟଣାର ତଦନ୍ତ ଆରମ୍ଭ ହୋଇଥିଲା। ଅଭିଯୋଗ ଅନୁଯାୟୀ, ଦ୍ୱିତୀୟ ଶବ ବ୍ୟବଚ୍ଛେଦକୁ ଏଡ଼ାଇବା ପାଇଁ ପୀଡ଼ିତାଙ୍କ ମୃତଦେହକୁ ତରବରିଆ ଭାବେ ପାନିହାଟିର ଏକ ଶ୍ମଶାନରେ ସତ୍କାର କରାଯାଇଥିଲା। ଏହି ସପ୍ତାହ ଆରମ୍ଭରେ ପୀଡ଼ିତାଙ୍କ ବାପା ଖରଦାହ ପୋଲିସ ଷ୍ଟେସନରେ ଏକ ନୂଆ ଅଭିଯୋଗ ଦାଏର କରିଥିଲେ। ଏହି ନୂଆ ଏଫଆଇଆରରେ ନିର୍ମଳ ଘୋଷ, ପାନିହାଟି ପୌରପାଳିକାର ଟିଏମସି କାଉନସିଲର ସୋମନାଥ ଦେ ଏବଂ ପୀଡ଼ିତାଙ୍କ ପଡ଼ୋଶୀ ସଞ୍ଜୀବ ମୁଖାର୍ଜୀଙ୍କ ନାମ ଉଲ୍ଲେଖ ଥିଲା। ଅଗଷ୍ଟ ୯, ୨୦୨୪ ରାତିରେ ସମସ୍ତ ନିୟମ ଉଲ୍ଲଂଘନ କରି ଏହି ତିନି ଜଣଙ୍କ ତତ୍ତ୍ୱାବଧାନରେ ପୀଡ଼ିତାଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା ବୋଲି ଅଭିଯୋଗ ହୋଇଛି।

ସୂଚନାଯୋଗ୍ୟ ଯେ, ମୃତଦେହ ସତ୍କାର ବେଳେ ଆବଶ୍ୟକ ଶ୍ମଶାନ ଫି' ଛାଡ଼ କରାଯିବା ସହ ପରିବାରର କୌଣସି ସଦସ୍ୟଙ୍କ ସ୍ୱାକ୍ଷର ବିନା ତରବରିଆ ଭାବେ ଶବ ଦାହ କରାଯାଇଥିଲା। ଦ୍ୱିତୀୟ ପୋଷ୍ଟମର୍ଟମକୁ ରୋକିବା ପାଇଁ ଖୁବ୍ କମ୍ ସମୟ ମଧ୍ୟରେ ସନ୍ଦେହଜନକ ଭାବେ ଶବ ବ୍ୟବଚ୍ଛେଦ ଏବଂ ଇନକ୍ୱେଷ୍ଟ ଶେଷ କରାଯାଇଥିଲା ବୋଲି ଅଭିଯୋଗ ରହିଛି। 

୨୦୨୪ ଅଗଷ୍ଟ ୯ ତାରିଖରେ କୋଲକାତାର ଆରଜି କର ମେଡିକାଲ କଲେଜରେ ୩୧ ବର୍ଷୀୟା ପୋଷ୍ଟଗ୍ରାଜୁଏଟ୍ ଟ୍ରେନି ଡାକ୍ତରଙ୍କୁ ବିଭତ୍ସ ଭାବେ ଦୁଷ୍କର୍ମ ଓ ହତ୍ୟା କରାଯାଇଥିଲା। ଏହି ଘଟଣା ସାରା ଦେଶକୁ ସ୍ତବ୍ଧ କରିଦେଇଥିବା ବେଳେ ଏବେ ପଶ୍ଚିମବଙ୍ଗ ରାଜନୀତିରେ ପୁଣି ଥରେ ହଇଚଇ ସୃଷ୍ଟି ହୋଇଛି ।

ଭୁବନେଶ୍ୱର: ପୁଲିସ ରେକର୍ଡରେ ଜଣେ ଅଭ୍ୟାସଗତ ଅପରାଧୀ ନିଜ ଭାବି ସ୍ତ୍ରୀଙ୍କୁ ସୁନା ହାର ଉପହାର ଦେବାକୁ ମନକଲେ। ହେଲେ ପାଖରେ ଟଙ୍କା ନଥିବାରୁ ଚୋରି କରି ଉପହାର ଦେବାକୁ ସାଙ୍ଗମାନଙ୍କ ସହ ଯୋଜନା କଲେ। ହେଲେ ଶେଷରେ ପୁଲିସ ହାତରେ ଧରାପଡ଼ି ଜଣେ ସାଙ୍ଗ ଏବଂ ସେ ଜେଲ ଗଲେ। ଭାବି ସ୍ତ୍ରୀଙ୍କୁ ଉପହାର ଦେବାକୁ ଯୋଜନା ତାଙ୍କୁ ବଡ଼ ମହଙ୍ଗା ପଡ଼ିଛି। ଚୋରି ଅଭିଯୋଗରେ ଗିରଫ ଅଭିଯୁକ୍ତମାନେ ହେଲେ ରାକେଶ ନାୟକ ଓ ତା ସହଯୋଗୀ ଦେବବ୍ରତ ବରାଳ।

ପୁଲିସ ସୂଚନା ମୁତାବକ, ଗତ ୪ତାରିଖ ସନ୍ଧ୍ୟା ୭.୩୦ ରୁ ୮.୩୦ ମଧ୍ୟରେ ଅଭିଯୋଗକାରିଣୀ ନିଜ ଅଫିସରୁ ଫେରୁଥିବା ବେଳେ ରାଧାବଲ୍ଲଭ ମଠ ନିକଟରେ ତିନି ଜଣ ଅଜ୍ଞାତ ଦୁର୍ବୃତ୍ତ ଏକ ବ୍ଲୁ-ବ୍ଲାକ୍‌‌ ପଲସର ବାଇକରେ ଆସି ତାଙ୍କ ହାତରୁ ଏକ ପୋକୋ ମୋବାଇଲ୍‌‌ ଫୋନ୍‌‌ ଝାମ୍ପି ନେଇ ରବି ଟକିଜ୍‌‌ ଛକ ଆଡ଼କୁ ଫେରାର ହୋଇଯାଇଥିଲେ। ବିଶ୍ୱସ୍ତ ସୂଚନା ଏବଂ ସିସିଟିଭି ଫୁଟେଜ୍‌‌ ଆଧାରରେ ପୁଲିସ ରାକେଶ ନାୟକକୁ ଗୌତମ ନଗର ଅଞ୍ଚଳରୁ କାବୁ କରିଥିଲା। ପଚରାଉଚରା ବେଳେ ସେ ସ୍ୱୀକାର କରିଥିଲା ଯେ, ଖୁବଶୀଘ୍ର ତା’ର ବିବାହ ହେବାକୁ ଯାଉଛି। ନିଜ ଭାବୀ ପତ୍ନୀଙ୍କୁ ଉପହାର ଦେବା ପାଇଁ ଟଙ୍କା ନଥିବାରୁ ସେ ତା’ର ଅନ୍ୟ ଦୁଇ ସାଙ୍ଗ ଦେବବ୍ରତ ଓ ସିଟୁଙ୍କ ସହ ମିଶି ଏହି ଲୁଟ୍‌‌ ଯୋଜନା କରିଥିଲା। 

ରାକେଶର ସୂଚନା କ୍ରମେ ପୋଲିସ କ୍ୟାପିଟାଲ୍‌‌ ହସ୍ପିଟାଲ୍‌‌ ମାର୍କେଟ୍‌‌ କମ୍ପେ୍ଲକ୍ସରୁ ତା’ର ସହଯୋଗୀ ଦେବବ୍ରତ ବରାଳକୁ କାବୁ କରିଥିଲା ଏବଂ ତା’ ନିକଟରୁ ଲୁଟ୍‌‌ ହୋଇଥିବା ମୋବାଇଲ୍‌‌ ଫୋନ୍‌‌ ଉଦ୍ଧାର କରି ଜବତ କରିଛି। ଏଥିସହ ଅପରାଧରେ ବ୍ୟବହୃତ ପଲସର ବାଇକକୁ ମଧ୍ୟ ଜବତ କରାଯାଇଛି। ମୁଖ୍ୟ ଅଭିଯୁକ୍ତ ରାକେଶ ଜଣେ ଅଭ୍ୟାସଗତ ଅପରାଧୀ ହୋଇଥିବା ବେଳେ ତା’ ନାମରେ ପୂର୍ବରୁ ୨ଟି ମାମଲା ରହିଛି। ସଂଗୃହୀତ ପ୍ରମାଣ ଆଧାରରେ ଗତକାଲି ଅଭିଯୁକ୍ତଙ୍କୁ ଗିରଫ କରାଯାଇ ଆଜି କୋର୍ଟ ଚାଲାଣ କରାଯାଇଛି ଏବଂ ଫେରାର ଥିବା ତୃତୀୟ ଅଭିଯୁକ୍ତକୁ ଧରିବା ପାଇଁ ପୋଲିସର ଚଢ଼ାଉ ଜାରି ରହିଛି।

ବିହାରର ନୱାଦା ଜିଲ୍ଲାରୁ ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି। ନିଜ ସ୍ୱାମୀ ଓ ପରିବାରକୁ ଛାଡି ପ୍ରେମିକ ସହ ଫେରାର୍ ହୋଇଥିବା ଜଣେ ବିବାହିତା ମହିଳାଙ୍କୁ ନିର୍ମମ ଭାବେ ହତ୍ୟା କରାଯାଇଛି। କେନ୍ଦ୍ରଶାସିତ ଅଞ୍ଚଳ ଦାମନରେ ଏକ ଭଡ଼ା ଘରୁ ମହିଳାଙ୍କ ମୃତଦେହ ଏକ ଟ୍ରଲି ବ୍ୟାଗ୍ ଭିତରୁ ଉଦ୍ଧାର କରାଯାଇଛି। ମୃତ ମହିଳାଙ୍କ ନାମ ଛୋଟି କୁମାରୀ ହୋଇଥିବା ବେଳେ ତାଙ୍କ ପ୍ରେମିକ ତଥା ମୁଖ୍ୟ ଅଭିଯୁକ୍ତ ଏହି ଘଟଣା ପରେ ଫେରାର୍ ଅଛି।

ପ୍ରେମ ପାଇଁ ପରିବାରକୁ କରିଥିଲେ ପର

ମିଳିଥିବା ସୂଚନା ଅନୁଯାୟୀ, ମୃତ ମହିଳା ଜଣକ ବିହାରର ନୱାଦା ଜିଲ୍ଲା ରୋହ ଥାନା ଅନ୍ତର୍ଗତ ସିଉର ଗାଁର ମନୀଷ ଉପାଧ୍ୟାୟଙ୍କ ଝିଅ ଛୋଟି କୁମାରୀ। ସେ ପୂର୍ବରୁ ବିବାହିତା ଥିଲେ ମଧ୍ୟ ନିଜ ଗାଁର ଅନ୍ୟ ଜାତିର ଯୁବକ ଋଷଭ କୁମାରଙ୍କ ପ୍ରେମରେ ପଡିଥିଲେ। ପ୍ରେମ ପାଇଁ ସମାଜ, ସ୍ୱାମୀ ଓ ପରିବାରର ପରୱା ନକରି ୬ ମଇ ୨୦୨୪ ରେ ସେ ନିଜ ପ୍ରେମିକ ଋଷଭଙ୍କ ସହ ଘର ଛାଡି ପଳାଇଥିଲେ। ସେହି ସମୟରେ ପରିବାର ଲୋକେ ରୋହ ଥାନାରେ ଏକ ଅପହରଣ ମାମଲା ମଧ୍ୟ ରୁଜୁ କରିଥିଲେ।

ଟ୍ରଲି ବ୍ୟାଗରୁ ମିଳିଲା ମୃତଦେହ

ଘର ଛାଡିବା ପରେ ଉଭୟ ଛୋଟି ଏବଂ ଋଷଭ ଦାମନରେ ଯାଇ ଏକ ଭଡ଼ା ଘରେ ରହୁଥିଲେ। ତେବେ କୌଣସି କାରଣରୁ ଉଭୟଙ୍କ ମଧ୍ୟରେ ବିବାଦ ସୃଷ୍ଟି ହୋଇଥିଲା। ଏହାପରେ ପ୍ରେମିକ ଋଷଭ ନିର୍ମମ ଭାବେ ଛୋଟିଙ୍କୁ ହତ୍ୟା କରି ତାଙ୍କ ମୃତଦେହକୁ ଏକ ଟ୍ରଲି ବ୍ୟାଗ୍ ଭିତରେ ଭର୍ତ୍ତି କରିଦେଇଥିଲା। ହତ୍ୟାକାଣ୍ଡ ଘଟାଇବା ପରେ ଅଭିଯୁକ୍ତ ପ୍ରେମିକ ଘଟଣାସ୍ଥଳରୁ ଫେରାର୍ ହୋଇଯାଇଛି। ଦାମନ ପୋଲିସ ସମ୍ପୃକ୍ତ ଭଡ଼ା ଘରୁ ବନ୍ଦ ଟ୍ରଲି ବ୍ୟାଗ୍ ସହ ମହିଳାଙ୍କ ଶବ ଜବତ କରିଛି।

ତଦନ୍ତରେ ଜୁଟିଲା ପୋଲିସ

ଏହି ଜଘନ୍ୟ ହତ୍ୟାକାଣ୍ଡ ସମ୍ପର୍କରେ ଦାମନ ପୋଲିସ ରୋହ ଥାନାକୁ ସୂଚନା ଦେଇଥିଲା। ରୋହ ଥାନା ଅଧିକାରୀ ରାହୁଲ ଅଭିଷେକ ତୁରନ୍ତ ଛୋଟିଙ୍କ ପରିବାର ଲୋକଙ୍କୁ ଏହି ଦୁଃଖଦ ଖବର ଜଣାଇଥିଲେ। ଖବର ପାଇବା ପରେ ପରିବାର ସଦସ୍ୟମାନେ ଦାମନ ଅଭିମୁଖେ ବାହାରିଛନ୍ତି। ଅନ୍ୟପଟେ ଦାମନ ପୋଲିସ ଶବକୁ ବ୍ୟବଚ୍ଛେଦ ପାଇଁ ପଠାଇବା ସହ ଫେରାର୍ ଥିବା ଅଭିଯୁକ୍ତ ଋଷଭକୁ ଧରିବା ପାଇଁ ଏକ ସ୍ୱତନ୍ତ୍ର ଟିମ୍ ଗଠନ କରି ତଦନ୍ତକୁ ଜୋରଦାର କରିଛି।

ମହାରାଷ୍ଟ୍ରର ନାଗପୁରଠାରେ ଏକ ଅତ୍ୟନ୍ତ ଅଭାବନୀୟ ତଥା ହୃଦୟ ବିଦାରକ ଘଟଣା ଦେଖିବାକୁ ମିଳିଛି। ରିପୋର୍ଟ ଅନୁଯାୟୀ, ଜଣେ ବ୍ୟକ୍ତି ନିଜର ବାନ୍ଧବୀଙ୍କୁ ନଦୀକୁ ଫିଙ୍ଗି ଦେଇଛନ୍ତି। ଫ୍ରେଣ୍ଡସିପ୍ ଡେ ବା ବନ୍ଧୁତା ଦିବସର ଉପହାର ଏବଂ ବିବାହ ପ୍ରସ୍ତାବକୁ ନେଇ ଉଭୟଙ୍କ ମଧ୍ୟରେ ହୋଇଥିବା ବିବାଦ ଶେଷରେ ଏହିଭଳି ଏକ ଭୟଙ୍କର ରୂପ ନେଇଛି।

ଉପହାର ଓ ବିବାହକୁ ନେଇ ବିବାଦ

ସୂଚନା ଅନୁଯାୟୀ, ଉଭୟ ଯୁବକ ଓ ଯୁବତୀ ଫ୍ରେଣ୍ଡସିପ୍ ଡେ ପାଳନ କରିବା ପାଇଁ ଏକାଠି ବୁଲିବାକୁ ଯାଇଥିଲେ। ସେଠାରେ ଯୁବତୀଜଣକ ଏକ ସ୍ୱତନ୍ତ୍ର ଉପହାର ମାଗିବା ସହ ବିବାହ କରିବା ପାଇଁ ଯୁବକଙ୍କ ଉପରେ ଚାପ ପକାଇଥିଲେ। ଏହି କଥାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ଆରମ୍ଭ ହୋଇଥିଲା। କଥା କଟାକଟି ଏତେ ମାତ୍ରାରେ ବଢ଼ିଯାଇଥିଲା ଯେ, ରାଗିଯାଇ ଯୁବକଜଣକ ତାଙ୍କ ବାନ୍ଧବୀଙ୍କୁ ସେଠାରେ ଥିବା ଏକ ନଦୀ ମଧ୍ୟକୁ ଠେଲି ଦେଇଥିଲେ।

ପୋଲିସର ତଦନ୍ତ ଜାରି

ଘଟଣାସ୍ଥଳରେ ଉପସ୍ଥିତ ଥିବା ସ୍ଥାନୀୟ ଲୋକେ ତୁରନ୍ତ ଏ ସମ୍ପର୍କରେ ପୋଲିସକୁ ଖବର ଦେଇଥିଲେ। ଖବର ପାଇ ନାଗପୁର ପୋଲିସ ଘଟଣାସ୍ଥଳରେ ପହଞ୍ଚିବା ସହ ଯୁବତୀଙ୍କୁ ଉଦ୍ଧାର କରିବା ପାଇଁ ତଲାସି ଅଭିଯାନ ଆରମ୍ଭ କରିଛି। ଏହା ସହିତ ଅଭିଯୁକ୍ତ ଯୁବକଙ୍କୁ ଅଟକ ରଖି ଘଟଣାର ଅଧିକ ଖୋଳତାଡ଼ ଜାରି ରଖିଛି। ବର୍ତ୍ତମାନ ସୁଦ୍ଧା ଯୁବତୀଙ୍କର କୌଣସି ସ୍ପଷ୍ଟ ପତ୍ତା ମିଳିପାରି ନାହିଁ, ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।

ଗୁଜରାଟର ସାବରକାଣ୍ଠା ପୋଲିସ ଏକ ସୁସଂଗଠିତ ହନିଟ୍ରାପ୍ ଗ୍ୟାଙ୍ଗର ପର୍ଦ୍ଦାଫାଶ କରିଛି। ଏହି ଗ୍ୟାଙ୍ଗ ସୋସିଆଲ ମିଡିଆ ମାଧ୍ୟମରେ ବିଶେଷ କରି ବୟସ୍କ ଲୋକଙ୍କୁ ପ୍ରେମ ଜାଲରେ ଫସାଇ ସେମାନଙ୍କଠାରୁ ଲୁଟପାଟ କରୁଥିଲା। ଏହି ଘଟଣାରେ ପୋଲିସ ଦୁଇ ଜଣ ଯୁବତୀଙ୍କ ସମେତ ମୋଟ ୧୦ ଜଣ ଅଭିଯୁକ୍ତଙ୍କୁ ଗିରଫ କରିଛି।

କିଭଳି କରୁଥିଲେ ଠକେଇ?

ପୋଲିସର ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତମାନେ ଫେସବୁକ୍ ଏବଂ ଇନଷ୍ଟାଗ୍ରାମରେ 'ଅଙ୍କିତା ପଟେଲ' ନାମରେ ଏକ ନକଲି (ଫେକ୍) ଆକାଉଣ୍ଟ ଖୋଲିଥିଲେ। ଏହି ନକଲି ଆକାଉଣ୍ଟ ଜରିଆରେ ସେମାନେ ଲୋକଙ୍କ ସହ ବନ୍ଧୁତା ସ୍ଥାପନ କରୁଥିଲେ। ପରେ ସେମାନଙ୍କୁ ଦେଖା କରିବା ବାହାନାରେ ହୋଟେଲ କିମ୍ବା କୌଣସି ନିର୍ଜନ ସ୍ଥାନକୁ ଡାକୁଥିଲେ ଏବଂ ସେଠାରେ ପହଞ୍ଚିବା ପରେ ସେମାନଙ୍କୁ ଭୟଭୀତ କରି ଟଙ୍କା, ମୋବାଇଲ୍ ଓ ଅନ୍ୟାନ୍ୟ ସାମଗ୍ରୀ ଲୁଟି ନେଉଥିଲେ।

ବୃଦ୍ଧଙ୍କ ମୃତ୍ୟୁ ପରେ ସାମ୍ନାକୁ ଆସିଲା ସତ

ଏହି ଗ୍ୟାଙ୍ଗର କଳା କାରନାମା ସେତେବେଳେ ପଦାକୁ ଆସିଲା, ଯେତେବେଳେ ଡେରୋଲ-ହିମ୍ମତନଗର ହାଇୱେରେ ଏକ ଲୁଟପାଟ ଘଟଣା ଘଟିଥିଲା। ଗ୍ୟାଙ୍ଗର ସଦସ୍ୟମାନେ ଜଗଦୀଶ ପ୍ରଜାପତି ନାମକ ଜଣେ ବୃଦ୍ଧ ବ୍ୟକ୍ତିଙ୍କୁ ଆକ୍ରମଣ କରିବା ସହ ତାଙ୍କ ମୋବାଇଲ୍ ଲୁଟି ନେଇଥିଲେ। ଏହି ଆକ୍ରମଣ ପରେ ସଦମା (ଶକ୍) କାରଣରୁ ତାଙ୍କର ମୃତ୍ୟୁ ଘଟିଥିଲା। ଏହି ମାମଲାର ତଦନ୍ତ କରୁ କରୁ ପୋଲିସ ସିସିଟିଭି ଫୁଟେଜ୍ ଆଧାରରେ ଏହି ବିରାଟ ହନିଟ୍ରାପ୍ ଗ୍ୟାଙ୍ଗର ପର୍ଦ୍ଦାଫାଶ କରିବାରେ ସଫଳ ହୋଇଛି ଏବଂ ସମସ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି।

ରାଜସ୍ଥାନର ଜୟପୁର ଠାରେ ଏକ ଚାଞ୍ଚଲ୍ୟକର ହତ୍ୟାକାଣ୍ଡ ସାମ୍ନାକୁ ଆସିଛି। ଏଠାରେ ମଦ ପାର୍ଟିର ବିଲ୍ ଦେବାକୁ କେନ୍ଦ୍ର କରି ଦୁଇ ଜଣ ସାଙ୍ଗ ମିଶି ନିଜର ଅନ୍ୟ ଜଣେ ସାଙ୍ଗକୁ ଗଳାଚିପି ହତ୍ୟା କରିଛନ୍ତି। ହତ୍ୟା କରିବା ପରେ ପୋଲିସଠାରୁ କିପରି ଖସିଯିବେ ଏବଂ ଆଇନଗତ ଦଣ୍ଡବିଧାନ ବିଷୟରେ ଅଭିଯୁକ୍ତମାନେ ୟୁଟ୍ୟୁବ୍ (YouTube) ରେ ସର୍ଚ୍ଚ କରିଥିବା ପୋଲିସ ତଦନ୍ତରୁ ଜଣାପଡ଼ିଛି। ପୋଲିସ ଏହି ଘଟଣାରେ ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରିଛି।

ହୋଟେଲ୍ ରୁମରେ କ'ଣ ଘଟିଥିଲା?

ପୋଲିସର ସୂଚନାନୁସାରେ, ଗତ ଜୁଲାଇ ୨୫ ତାରିଖ ଦିନ ଜୟପୁରର ବିନ୍ଦାୟକା ଅଞ୍ଚଳରେ ଥିବା ଏକ ହୋଟେଲରେ ଦିନେଶ ଓରଫ ଦର୍ଶନ ନାମକ ଜଣେ ଯୁବକଙ୍କ ମୃତଦେହ ସନ୍ଦେହଜନକ ଅବସ୍ଥାରେ ଉଦ୍ଧାର କରାଯାଇଥିଲା। ତଦନ୍ତରୁ ଜଣାପଡ଼ିଥିଲା ଯେ ମୃତକ ଦିନେଶ ତାଙ୍କର ଦୁଇ ସାଙ୍ଗ ସଞ୍ଜୟ କୁମାର କାସୋଟିୟା ଏବଂ ନୀତେଶ ଗାୱରିୟାଙ୍କ ସହିତ ହୋଟେଲରେ ରହିଥିଲେ। ଏକ ଆର୍ଥିକ ଋଣ ବିଷୟରେ ଆଲୋଚନା କରିବା ପାଇଁ ସେମାନେ ଏକାଠି ହୋଇଥିଲେ। ହୋଟେଲରେ ମଦ୍ୟପାନ କରିବା ପରେ କିଏ ମଦ ବିଲ୍ ଦେବ ଏବଂ ପାର୍ଟି କେତେ ସମୟ ଚାଲିବ, ତାହାକୁ ନେଇ ସେମାନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏଥିରେ ଉତକ୍ଷିପ୍ତ ହୋଇ ସଞ୍ଜୟ ଏବଂ ନୀତେଶ ମିଶି ଏକ ଓଢ଼ଣୀ ସାହାଯ୍ୟରେ ଦିନେଶଙ୍କୁ ଶ୍ୱାସରୁଦ୍ଧ କରି ହତ୍ୟା କରିଥିଲେ।

ୟୁଟ୍ୟୁବରେ ଖୋଜୁଥିଲେ ଖସିଯିବାର ଉପାୟ

ହତ୍ୟାକାଣ୍ଡ ଘଟାଇବା ପରେ ପ୍ରମାଣ ନଷ୍ଟ କରିବା ପାଇଁ ଅଭିଯୁକ୍ତମାନେ ମୃତ ଦିନେଶଙ୍କ ମୋବାଇଲ୍ ଫୋନ୍ ନେଇଯିବା ସହ ସିମ୍ କାର୍ଡ ଭାଙ୍ଗି ଦେଇଥିଲେ। ସେମାନେ ନିଜ ନିଜର ମୋବାଇଲ୍ ଫୋନକୁ ଫ୍ଲାଇଟ୍ ମୋଡ୍ ରେ ରଖି ଫେରାର ହୋଇଯାଇଥିଲେ। ପ୍ରଥମେ ସେମାନେ ସିକର ସ୍ଥିତ ଖାଟୁ ଶ୍ୟାମ ମନ୍ଦିରକୁ ଯାଇଥିଲେ ଏବଂ ପରେ ଦୌସାସ୍ଥିତ ଏକ ହୋଟେଲରେ ଲୁଚି ରହି ଗୁଜରାଟ ଖସିଯିବାକୁ ଯୋଜନା କରିଥିଲେ। ଦୌସାରେ ଲୁଚି ରହିଥିବା ସମୟରେ ସେମାନେ ହୋଟେଲ୍ ୱାଇ-ଫାଇ (Wi-Fi) ବ୍ୟବହାର କରି ପୋଲିସ କିପରି ହତ୍ୟାକାଣ୍ଡର ତଦନ୍ତ କରେ, କିପରି ଖସିଯାଇହେବ ଏବଂ ହତ୍ୟା ଅପରାଧ ପାଇଁ କି ପ୍ରକାର ଦଣ୍ଡ ମିଳିଥାଏ, ସେସବୁ ୟୁଟ୍ୟୁବରେ ସର୍ଚ୍ଚ କରିଥିଲେ।

୩୦୦ରୁ ଅଧିକ ସିସିଟିଭି ଯାଞ୍ଚ କରି ପୋଲିସ କଲା ଗିରଫ

ପଶ୍ଚିମ ଜୟପୁରର ଡେପୁଟି କମିଶନର ଅଫ୍ ପୋଲିସ (ଡିସିପି) ପ୍ରଶାନ୍ତ କିରଣ କହିଛନ୍ତି ଯେ ଘଟଣା ସାମ୍ନାକୁ ଆସିବା ପରେ ପୋଲିସ ଏକ ଟିମ୍ ଗଠନ କରି ଅନୁସନ୍ଧାନ ଆରମ୍ଭ କରିଥିଲା। ଅଭିଯୁକ୍ତମାନେ ନିଜ ମୋବାଇଲ ବନ୍ଦ କରି ଫେରାର ହୋଇଯାଇଥିବାରୁ ପୋଲିସକୁ ସେମାନଙ୍କୁ ଟ୍ରାକ୍ କରିବା କଷ୍ଟକର ହୋଇଥିଲା। ତେବେ ତଦନ୍ତକାରୀ ଦଳ ବିଭିନ୍ନ ହୋଟେଲ, ବସ୍ ଷ୍ଟାଣ୍ଡ, ରେଳ ଷ୍ଟେସନ ଏବଂ ଟୋଲ୍ ପ୍ଲାଜାରେ ଥିବା ୩୦୦ରୁ ଅଧିକ ସିସିଟିଭି କ୍ୟାମେରା ଫୁଟେଜ୍ ଯାଞ୍ଚ କରିଥିଲେ। ବୈଷୟିକ ଅନୁସନ୍ଧାନ ଏବଂ ସିସିଟିଭି ଫୁଟେଜ୍ ଆଧାରରେ ଶେଷରେ ପୋଲିସ ଉଭୟ ଅଭିଯୁକ୍ତଙ୍କୁ ଦୌସାରୁ ଗିରଫ କରିବାରେ ସଫଳ ହୋଇଥିଲା। ଜେରା ବେଳେ ସେମାନେ ନିଜର ଦୋଷ ସ୍ୱୀକାର କରିଛନ୍ତି।

ପ୍ରସିଦ୍ଧ 'ମେଘାଳୟ ହନିମୁନ୍ ମର୍ଡର କେସ୍' (ମଧୁଚନ୍ଦ୍ରିକା ହତ୍ୟା ମାମଲା) ରେ ମୁଖ୍ୟ ଅଭିଯୁକ୍ତ ଥିବା ସୋନମ ରଘୁବଂଶୀଙ୍କୁ ଗୁରୁବାର ଦିନ ସୁପ୍ରିମକୋର୍ଟ ଏକ ବଡ଼ ଝଟକା ଦେଇଛନ୍ତି। ସୋନମଙ୍କୁ ମିଳିଥିବା ଜାମିନକୁ ସର୍ବୋଚ୍ଚ ଅଦାଲତ ଖାରଜ କରିଦେବା ସହ ଆସନ୍ତା ୩ ସପ୍ତାହ ମଧ୍ୟରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଛନ୍ତି। ନିଜ ସ୍ୱାମୀ ରାଜା ରଘୁବଂଶୀଙ୍କୁ ହତ୍ୟା କରିବା ଅଭିଯୋଗରେ ସେ ଗିରଫ ହୋଇଥିଲେ।

ମେଘାଳୟ ସରକାରଙ୍କ ଆବେଦନ

ଜଷ୍ଟିସ୍ ଏମ୍.ଏମ୍. ସୁନ୍ଦରେଶ ଏବଂ ଜଷ୍ଟିସ୍ ପି.ବି. ବରାଲେଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରିଥିଲେ। ପୂର୍ବରୁ ହାଇକୋର୍ଟ ଏବଂ ଟ୍ରାଏଲ୍ କୋର୍ଟ ସୋନମଙ୍କୁ ଜାମିନ ପ୍ରଦାନ କରିଥିଲେ। ତେବେ ଏହି ରାୟକୁ ବିରୋଧ କରି ମେଘାଳୟ ସରକାର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସରକାରଙ୍କ ଯୁକ୍ତି ଥିଲା ଯେ, ଏହା ଏକ ଅତ୍ୟନ୍ତ ସମ୍ବେଦନଶୀଳ ତଥା ଗମ୍ଭୀର ମାମଲା। ତେଣୁ ମୁଖ୍ୟ ଅଭିଯୁକ୍ତ ଜେଲ୍‌ ବାହାରେ ରହିଲେ ତଦନ୍ତ ଏବଂ ବିଚାର ପ୍ରକ୍ରିୟା ପ୍ରଭାବିତ ହେବାର ଆଶଙ୍କା ରହିଛି।

ଟାଇପିଂ ତ୍ରୁଟି ପାଇଁ ମିଳିଥିଲା ଜାମିନ!

ସୂଚନାଯୋଗ୍ୟ ଯେ, ଗିରଫଦାରୀ ମେମୋରେ ଏକ ଛୋଟ ଟାଇପିଂ ତ୍ରୁଟି କାରଣରୁ ସୋନମଙ୍କୁ ତଳ କୋର୍ଟରୁ ଜାମିନ ମିଳିଯାଇଥିଲା। ଗିରଫ କାଗଜପତ୍ରରେ ଭାରତୀୟ ନ୍ୟାୟ ସଂହିତା (BNS) ର ହତ୍ୟା ମାମଲା ସମ୍ବନ୍ଧୀୟ ଧାରା ୧୦୩(୧) ବଦଳରେ ଭୁଲ୍‌ବଶତଃ ଧାରା ୪୦୩(୧) ଲେଖାଯାଇଥିଲା। ଏହି ବୈଷୟିକ ତ୍ରୁଟିକୁ ଆଧାର କରି ହାଇକୋର୍ଟ ତାଙ୍କୁ ଜାମିନ ପ୍ରଦାନ କରିଥିଲେ। କିନ୍ତୁ ସୁପ୍ରିମକୋର୍ଟ ଏହାକୁ ଗ୍ରହଣ କରିନଥିଲେ ଏବଂ ସ୍ପଷ୍ଟ କରିଥିଲେ ଯେ, ଏଭଳି ଏକ ସାମାନ୍ୟ ତ୍ରୁଟିକୁ ଆଧାର କରି ଏକ ସଙ୍ଗିନ ହତ୍ୟା ମାମଲାରେ ଜାମିନ ପ୍ରଦାନ କରାଯାଇପାରିବ ନାହିଁ।

ଆଗକୁ କ'ଣ ହେବ?

ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ବର୍ତ୍ତମାନ ସୋନମ ରଘୁବଂଶୀଙ୍କୁ ୩ ସପ୍ତାହ (୨୧ ଦିନ) ଭିତରେ ଟ୍ରାଏଲ୍ କୋର୍ଟ କିମ୍ବା ପୋଲିସ ନିକଟରେ ଆତ୍ମସମର୍ପଣ କରିବାକୁ ପଡ଼ିବ। ଏହା ସହିତ ଅଦାଲତ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଯଦି ଆସନ୍ତା ୬ ମାସ ମଧ୍ୟରେ ବିଚାର ପ୍ରକ୍ରିୟା ଶେଷ ନହୁଏ, ତେବେ ସେ ପୁଣିଥରେ ଜାମିନ ପାଇଁ ନୂଆ ଆବେଦନ କରିପାରିବେ। ଏହି ରାୟ ପରେ ସୋନମଙ୍କୁ ପୁଣିଥରେ ଜେଲ୍ ଯିବାକୁ ପଡ଼ିବ ବୋଲି ସ୍ପଷ୍ଟ ହୋଇଛି।