ନୂଆଦିଲ୍ଲୀ: ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ (RCB) ଆଇପିଏଲ୍ ୨୦୨୬ (IPL 2026) ଫାଇନାଲରେ ଗୁଜରାଟ ଟାଇଟନ୍ସ (Gujarat Titans) କୁ ପରାସ୍ତ କରି କ୍ରମାଗତ ଦ୍ୱିତୀୟ ଥର ପାଇଁ ଟାଇଟଲ୍ ଜିତି ଇତିହାସ ରଚିଛି। ରବିବାର ଅହମ୍ମଦାବାଦ ଠାରେ ଖେଳାଯାଇଥିବା ଏହି ମ୍ୟାଚ୍ ବିଜୟ ସହ ବେଙ୍ଗାଲୁରୁ ଦଳ ଚେନ୍ନାଇ ସୁପର୍ କିଙ୍ଗସ୍ ଏବଂ ମୁମ୍ବାଇ ଇଣ୍ଡିଆନ୍ସ ପରେ କ୍ରମାଗତ ଭାବେ ଆଇପିଏଲ୍ ଟାଇଟଲ୍ ଜିତିବାରେ ତୃତୀୟ ଦଳ ହୋଇପାରିଛି।

ଏହି ଐତିହାସିକ ବିଜୟର ମୁଖ୍ୟ ବିନ୍ଧାଣୀ ଥିଲେ ଷ୍ଟାର୍ ବ୍ୟାଟର ବିରାଟ କୋହଲି (Virat Kohli)। ସେ ଫାଇନାଲ୍ ମ୍ୟାଚରେ ମାତ୍ର ୪୨ ବଲରୁ ଅପରାଜିତ ୭୫ ରନ୍ ର ଏକ ମ୍ୟାଚ୍ ବିଜୟୀ ଇନିଂସ୍ ଖେଳିଥିଲେ। ତାଙ୍କର ଏହି ବିସ୍ଫୋରକ ଇନିଂସରେ ୯ଟି ଚୌକା ଏବଂ ୩ଟି ଛକା ସାମିଲ ଥିଲା। ଏହି ଚମତ୍କାର ପ୍ରଦର୍ଶନ ପାଇଁ ତାଙ୍କୁ ତାଙ୍କ ଆଇପିଏଲ୍ କ୍ୟାରିୟରର ପ୍ରଥମ ଫାଇନାଲ୍ 'ପ୍ଲେୟାର୍ ଅଫ୍ ଦି ମ୍ୟାଚ୍' ପୁରସ୍କାର ମିଳିଥିଲା।

ଲଗାତାର ଦ୍ୱିତୀୟ ଥର ପାଇଁ ଆଇପିଏଲ୍ ଟ୍ରଫି ଜିତିବା ସହ ୩୭ ବର୍ଷୀୟ ବିରାଟ କୋହଲି ନିଜ କ୍ୟାରିୟରରେ ଆଉ ଏକ ମାଇଲଖୁଣ୍ଟ ସ୍ଥାପନ କରିଛନ୍ତି। ଆଇପିଏଲ୍ ଇତିହାସରେ ପ୍ରଥମ ଖେଳାଳି ଭାବେ ସେ ଦୁଇଟି ଟାଇଟଲ୍ ବିଜୟୀ ସିଜିନରେ ୬୫୦ରୁ ଅଧିକ ରନ୍ ସଂଗ୍ରହ କରିବାର ବିରଳ ରେକର୍ଡ ନିଜ ନାମରେ କରିଛନ୍ତି।

୨୦୨୫ ସିଜିନରେ ଆରସିବି ଚାମ୍ପିୟନ୍ ହେବା ବେଳେ କୋହଲି ୧୫ଟି ମ୍ୟାଚରୁ ୬୫୭ ରନ୍ କରିଥିଲେ ଏବଂ ଏବେ ଆଇପିଏଲ୍ ୨୦୨୬ରେ ୧୬ଟି ଇନିଂସରୁ ୬୭୫ ରନ୍ ସଂଗ୍ରହ କରିଛନ୍ତି। ଏହାପୂର୍ବରୁ କୌଣସି ଖେଳାଳି ଦୁଇଟି ଅଲଗା ଅଲଗା ଟାଇଟଲ୍ ବିଜୟୀ ସିଜିନରେ ୬୫୦ ରନ୍ ପାର କରିନଥିଲେ।

ଫାଇନାଲରେ ଶ୍ରେଷ୍ଠ ଖେଳାଳି ପୁରସ୍କାର ଜିତିବା ସହ କୋହଲି ନିଜର ୨୨ତମ 'ପ୍ଲେୟାର୍ ଅଫ୍ ଦି ମ୍ୟାଚ୍' ପୁରସ୍କାର ହାସଲ କରିଛନ୍ତି। ଏହା ସହିତ ସେ ରୋହିତ ଶର୍ମାଙ୍କ (୨୧ଟି ପୁରସ୍କାର) ରେକର୍ଡକୁ ଅତିକ୍ରମ କରି ଆଇପିଏଲ୍‌ରେ ଜଣେ ଭାରତୀୟ ଭାବେ ସର୍ବାଧିକ ଥର ଏହି ପୁରସ୍କାର ଜିତିବାରେ ଶୀର୍ଷରେ ପହଞ୍ଚିଛନ୍ତି। ଏହି ତାଲିକାରେ ଏମଏସ୍ ଧୋନି ୧୮ଟି ପୁରସ୍କାର ସହ ତୃତୀୟ ସ୍ଥାନରେ ଥିବା ବେଳେ ରବିନ୍ଦ୍ର ଜାଡେଜା ଏବଂ କେଏଲ୍ ରାହୁଲ ପ୍ରତ୍ୟେକେ ୧୭ଟି ଲେଖାଏଁ ପୁରସ୍କାର ପାଇଛନ୍ତି।

କୋହଲିଙ୍କ ଚମତ୍କାର ବ୍ୟାଟିଂ ପୂର୍ବରୁ ଆରସିବି (RCB) ର ବୋଲରମାନେ ମଧ୍ୟ ଶୃଙ୍ଖଳିତ ପ୍ରଦର୍ଶନ କରିଥିଲେ। ପାୱାରପ୍ଲେ ଭିତରେ ଜୋସ୍ ହେଜଲଉଡ୍ ଏବଂ ଭୁବନେଶ୍ୱର କୁମାର ପ୍ରାରମ୍ଭିକ ଝଟକା ଦେଇ ଗୁଜରାଟ ଟାଇଟନ୍ସର ଓପନର୍ ଶୁଭମନ ଗିଲ୍ ଏବଂ ସାଇ ସୁଦର୍ଶନଙ୍କୁ ପ୍ୟାଭିଲିୟନ୍ ପଠାଇଥିଲେ। ବୋଲରଙ୍କ ଏହି ମିଳିତ ଉଦ୍ୟମ ଯୋଗୁଁ ଗୁଜରାଟ ଦଳ ଏକ ସାଧାରଣ ସ୍କୋରରେ ଅଟକି ଯାଇଥିଲା, ଯାହା ଫଳରେ ବିରାଟ କୋହଲି ସହଜରେ ଦଳକୁ ଐତିହାସିକ ବିଜୟ ଭେଟି ଦେଇଥିଲେ।

କରଞ୍ଜିଆ: ମଣିଷକୁ ଖାଇଗଲା ମହାବଳ ବାଘ ! କରଞ୍ଜିଆ ବନଖଣ୍ଡ ଦୁଧିଆଣୀ ରେଞ୍ଜ ଅଧୀନ କୁମୁଡାବାଡ଼ି ଗାଁ ରାଜାମ୍ ସାହି ନିକଟ ଜଙ୍ଗଲରେ ପଡିଛି ଜଣେ ମଣିଷର ଦୁଇଟି କ୍ଷତାକ୍ତ ଗୋଡ଼ । ବାଘଟି ବ୍ୟକ୍ତିଙ୍କୁ ଆକ୍ରମଣ କରିବା ପରେ ତାଙ୍କ ଶରୀରର ଅଧା ଅଂଶ ଖାଇ ଦେଇଥିବା ଦେଖିବାକୁ ମିଳିଛି। ଆକ୍ରମଣରେ ମୃତ୍ୟୁ ହୋଇଥିବା ବ୍ୟକ୍ତି ଜଣକ ହେଉଛନ୍ତି ଯଶିପୁର ଥାନା ବସନ୍ତପୁର ଗାଁର ସାଧୁ ନାଏକ । ଘଟଣା ସ୍ଥଳରେ ଯଶିପୁର ପୋଲିସ ଓ ବନବିଭାଗ ପହଁଞ୍ଚି ଅଧିକ ତଦନ୍ତ ଜାରି ରଖିଛି  ।

ମିଳିଥିବା ସୂଚନା ଅନୁଯାୟୀ, ଗତ ରବିବାର ସକାଳେ ସାଧୁ ନିଜ ଛେଳିଙ୍କ ପାଇଁ ପତ୍ର ସଂଗ୍ରହ କରିବା ନିମନ୍ତେ ନିକଟସ୍ଥ ଜଙ୍ଗଲକୁ ଯାଇଥିଲେ। ତେବେ ବିଳମ୍ବିତ ରାତି ପର୍ଯ୍ୟନ୍ତ ସେ ଘରକୁ ନ ଫେରିବାରୁ ପରିବାର ଲୋକେ ବହୁ ଖୋଜାଖୋଜି କରିଥିଲେ। ସୋମବାର ସକାଳେ ସ୍ଥାନୀୟ ଗ୍ରାମବାସୀମାନେ ଜଙ୍ଗଲ ମଧ୍ୟରେ ତାଙ୍କର ଦୁଇଟି କଟା ଗୋଡ଼ ଓ ଏକ ରକ୍ତାକ୍ତ ଲୁଙ୍ଗି ପଡ଼ିଥିବାର ଦେଖିବାକୁ ପାଇଥିଲେ।

ପାରିପାର୍ଶ୍ୱିକ ସ୍ଥିତିରୁ ଏକ ବାଘ ତାଙ୍କୁ ଆକ୍ରମଣ କରିବା ସହ ତାଙ୍କ ଶରୀରର ଅଧା ଅଂଶ ଖାଇଦେଇଥିବା ସ୍ପଷ୍ଟ ଅନୁମାନ କରାଯାଉଛି। ଏହି ବିଷୟରେ ଖବର ପାଇବା ମାତ୍ରେ ଯଶୀପୁର ପୋଲିସ ଏବଂ ବନ ବିଭାଗର ଅଧିକାରୀମାନେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ବାଘ ଆକ୍ରମଣର ଏହି ଭୟାନକ ଘଟଣାକୁ ନେଇ ବନ ବିଭାଗ ପକ୍ଷରୁ ଅଧିକ ତଦନ୍ତ ପ୍ରକ୍ରିୟା ଆରମ୍ଭ କରାଯାଇଛି। ଏହି ଘଟଣା ପରେ ସମଗ୍ର ଅଞ୍ଚଳରେ ଲୋକଙ୍କ ମଧ୍ୟରେ କୋକୁଆ ଭୟ ଖେଳିଯାଇଛି।

ବୌଦ୍ଧ: ପକ୍ଷାଘାତ ରୋଗୀଙ୍କୁ ଦୀର୍ଘ ୨ଘଣ୍ଟା ଧରି ବାନ୍ଧି ରଖିଲା ସାପ। ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ୍‌ ଆଡ଼େନିଗଡ଼ ଗ୍ରାମରେ ଘଟିଥିବା ଏପରି ଏକ ଘଟଣା ସ୍ଥାନୀୟ ଅଞ୍ଚଳ‌‌ରେ ଚର୍ଚ୍ଚାର ବିଷୟ ହୋଇଛି। ସୂଚନାନୁଯାୟୀ, ଗାଁର କୃଷ୍ଣଚନ୍ଦ୍ର ସାହୁ ଜଣେ ପକ୍ଷାଘାତ ରୋଗୀ। ସେ ଘରେ ଶୋଇଥିବା ବେଳେ ବିଳମ୍ବିତ ରାତିରେ ଘରର ଝରକା ପଟେ ଗୋଟିଏ ସାପ ଭିତରକୁ ପଶି ଆସି କୃଷ୍ଣଚନ୍ଦ୍ରଙ୍କ ଉପରେ ଚଢ଼ି ଯାଇଥିଲା। ସେ ଏହା ଜାଣିପାରିଥିଲେ ହେଁ ହଠାତ୍‌ ଉଠି ପାରିନଥିଲେ କି କାହାକୁ ପାଖକୁ ଡାକି ପାରିନଥିଲେ। ରୋଗରେ ପୀଡ଼ିତ ଥିବାରୁ ତାଙ୍କ ଶରୀରର ଗୋଟିଏ ପାର୍ଶ୍ବ ସମ୍ପୂର୍ଣ୍ଣ ଅଚଳ ହୋଇପଡ଼ିଛି। କିଛି ସମୟ ପରେ କୃଷ୍ଣ ଉଠିବା ପାଇଁ ଚେଷ୍ଟା କରିଥିଲେ। କିନ୍ତୁ, ସେତେବେଳକୁ ସାପଟି ତାଙ୍କ ହାତକୁ ଏକ ଚେୟାର୍‌ ସହ ଜୋର୍‌ରେ ଗୁଡ଼ାଇ ବାନ୍ଧିସାରିଥିଲା। 

କୃଷ୍ଣଙ୍କ ପାଟି ଶୁଣି ପରିବାର ଲୋକେ ଏହା ଦେଖିବା ପରେ ଭୟଭୀତ ହୋଇପଡ଼ିଥିଲେ। ପରିବାରଲୋକେ ଅତି ସତର୍କତାର ସହ ପ୍ରାୟ ୨ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ସାପ କବଳରୁ କୃଷ୍ଣଙ୍କୁ ସୁରକ୍ଷିତ ଉଦ୍ଧାର କରିଥିଲେ। ପରେ ସାପଟିକୁ ଘର ବାହାରକୁ ସୁରକ୍ଷିତ ଭାବେ ନେଇ ଛାଡ଼ି ଦିଆଯାଇଥିଲା। ଏବେ ଏହି ଆଶ୍ଚର୍ଯ୍ୟଜନକ ଘଟଣା ପୂରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟଛି।

ଭୁବନେଶ୍ୱର: ୭ ଦିନିଆ ଦିଲ୍ଲୀ ଗସ୍ତରେ ଗଲେ ବିରୋଧୀ ଦଳ ନେତା ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ । ରୁଟିନ ଭିଜିଟରେ ଯାଇଛନ୍ତି ନବୀନ । କିଛି ବ୍ୟକ୍ତିଗତ କାମ ସହ ଅନ୍ୟାନ୍ୟ କାର୍ଯକ୍ରମ ମଧ୍ୟ ରହିଛି । ଦିଲ୍ଲୀରେ କିଛି ଲୋକଙ୍କୁ ମଧ୍ୟ ଭେଟି ପାରନ୍ତି ନବୀନ । ପ୍ରାୟ ସପ୍ତାହ ଧରି ରହିବାର କାର୍ଯକ୍ରମ ରହିଛି ବୋଲି ପ୍ରତିକ୍ରିୟା ରଖିଛନ୍ତି ବିଜେଡି ବରିଷ୍ଠ ଉପାସଭାପତି ଦେବୀ ମିଶ୍ର।

ଭୁବନେଶ୍ୱର: ଚଳନ୍ତା ଆମ୍ବୁଲାନ୍ସରେ ଲାଗିଲା ନିଆଁ । ଖଣ୍ଡଗିରି ନିକଟ ଜାଗମରା ଠାରେ ଆମ୍ବୁଲାନ୍ସରେ ଅଗ୍ନିକାଣ୍ଡ। ରୋଗୀ ଆଣିବାକୁ ଯାଉଥିବା ବେଳେ ଘଟିଛି ଅଘଟଣ । ତେବେ ଗାଡିଟି ସମ୍ପୂର୍ଣ୍ଣ ଜଳିଯାଇଥିବା ବେଳେ କେହି ଆହତ ହୋଇନାହାନ୍ତି । ଘଟଣାସ୍ଥଳରେ ତମାଣ୍ଡୋ ଅଗ୍ନିଶମ ବାହିନୀ ଟିମ ପହଞ୍ଚି ନିଆଁକୁ ଆୟତ୍ତ କରିଛି । 

ଗଞ୍ଜାମ: ପୁଣି ଥାନାରେ ଥାର୍ଡ ଡିଗ୍ରି । ପୋଲିସର ନିସ୍ତୁକ ମାଡ଼ରେ ଯୁବକଙ୍କ ମୃତ୍ୟୁ ଅଭିଯୋଗ । ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ପୋଲିସ ବିରୋଧରେ ଆସିଛି ଏପରି ସାଂଘାତିକ ଅଭିଯୋଗ । ଥାନାରେ ଯୁବକଙ୍କୁ ମାଡ଼ ପରେ ଗୁରୁତର ହେଲେ, ମାତ୍ର ଡାକ୍ତରଖାନାରେ ଯୁବକଙ୍କୁ ମୃତ ଘୋଷଣା କଲେ ଡାକ୍ତର । ମୃତ ଯୁବକ ହେଲେ ସୁଶାନ୍ତ କୁମାର ସାହୁ । 

ଯୁବକକୁ କୌଣସି ଏକ ମାମଲାର ତଦନ୍ତ ପାଇଁ ପୋଲିସ ଉଠାଇ ନେଇ ଅକଥନୀୟ ମାଡ଼ ମାରିଥିବା ଅଭିଯୋଗ ହୋଇଛି । ସେ ଗୁରୁତର ହେବା ପରେ ପରିବାର ଲୋକଙ୍କୁ ଡକାଇ ଗୁରୁତର ଅବସ୍ଥାରେ ପଠାଇ ଦେଇଥିଲା ପୋଲିସ । ଆଜି ତାଙ୍କର MKCGରେ ଚିକିତ୍ସା ଅବସ୍ଥାରେ ମୃତ୍ୟୁ ଘଟିଛି ।  ତେବେ ପୋଲିସ କର୍ମଚାରୀଙ୍କ ମାଡ଼ରେ ସମ୍ପୃକ୍ତ ଯୁବକ ଜଣକଙ୍କର ମୃତ୍ୟୁ ହୋଇଥିବା ପରିବାର ଲୋକ ଅଭିଯୋଗ କରିଛନ୍ତି । ତେବେ ପୋଲିସ ମାଡ଼ରେ ଯୁବକଙ୍କ ମୃତ୍ୟୁ ହୋଇଛି ନା ଅନ୍ୟ କେଉଁ କାରଣ ପାଇଁ ମୃତ୍ୟୁ ହୋଇଛି ତାହା ମେଡ଼ିକାଲ ରିପୋର୍ଟରୁ ହିଁ ସ୍ପଷ୍ଟ ହେବ।

କଟକ: କଟକ ପ୍ରେସଛକ ମାଛ ମାର୍କେଟ ରେ ଭୟଙ୍କର ଅଗ୍ନିକାଣ୍ଡ। ଅଗ୍ନିକାଣ୍ଡରେ ପୁରା ମାଛ ମାର୍କେଟ ଜଳିପୋଡି ଛାରଖାର ହୋଇଯାଇଛି। ପାଖାପାଖି ୩୦ରୁ ଅଧିକ ଦୋକାନ ପୋଡ଼ିଯାଇଛି । ମାଛ ମାର୍କେଟ୍ ନିକଟସ୍ଥ ବ୍ୟାଙ୍କ ଅଫ୍ ଇଣ୍ଡିଆରେ ମଧ୍ୟ ନିଆଁ ଲାଗିଯାଇଛି । ନିଆଁ ସର୍ଟସର୍କିଟ ଯୋଗୁ ଅଗ୍ନିକାଣ୍ଡ ହୋଇଥିବା ଅନୁମାନ କରାଯାଉଛି । ନିଆଁର ପ୍ରକୋପ ଏତେ ଥିଲା ଯେ, ଓଭରବ୍ରିଜ ଉପର ଯାଏଁ ନିଆଁ ଉଠିଥିଲା । ଅଗ୍ନିକାଣ୍ଡରେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା କୁହାଯାଉଛି । ଘଟଣା ସମ୍ପର୍କରେ ବକ୍ସିବଜାର ଅଗ୍ନିଶମ କେନ୍ଦ୍ର ଖବର ପାଇବା ପରେ ଉଭୟ ବକ୍ସି ବଜାର ଓ ଚାଉଳିଆଗଞ୍ଜରୁ ତିନୋଟି ଗାଡ଼ି ପହଁଚି ନିଆଁ ଲିଭାଇବାକୁ ଉଦ୍ୟମ କରିଥିଲା । ସାଢ଼େ ୭ ଘଣ୍ଟା ପରେ ବି ନିଆଁ ଆୟତ୍ତକୁ ଆସି ନଥିବା ଜଣାପଡିଛି ।

ଘଟଣାସ୍ଥଳନରେ ପହଞ୍ଚି ସ୍ଥିତି ପରଖିଛନ୍ତି କଟକ ମେୟର ସୁବାଷ ସିଂହ ଏବଂ ବରିଷ୍ଠ ରାଜନେତା ପ୍ରଭାତ ବିଶ୍ବାଳ । ତେବେ ଏହି ଘଟଣାକୁ ନେଇ ପ୍ରତିକ୍ରିୟା ରଖିଛନ୍ତି ମେୟର । ସେ କହିଛନ୍ତି କି, ପାଖରେ ଥିବା ଜରାଜୀର୍ଣ୍ଣ ବିଲ୍ଡିଂ ପାଇଁ ସରକାର ସ୍ବତନ୍ତ୍ର ବ୍ୟବବରାଦ କଲେ ଏହାକୁ ଭଙ୍ଗାଯିବ । ପ୍ରଶାସନ କଠୋର ହେବା ସହ ସହରରେ ଥିବା ଏଭଳି ଜରାଜୀଣ୍ଣ୍ଣ ବିଲ୍ଡିଂକୁ ଚିହ୍ନଟ କରି ଭାଙ୍ଗିବା ଜରୁରୀ । ହଜାରେ ବର୍ଷର ସହର ଅର୍ଥାତ ନିଆଁ ଲାଗିବାର ସାଢ଼େ ୭ ଘଣ୍ଟା ପରେ ବି ଆୟତ୍ତକୁ ନଆସିବା ଦୁଃଖର ବିଷୟ । ସରକାର କଠୋର ହେଲେ ପ୍ରକିୟା ଆଗେଇବ ବୋଲି କହିଛନ୍ତି ମେୟର ।

ମେଷ: ଭାଗ୍ୟ ଆପଣଙ୍କ ସାଥ୍‌ ଦେବ। ମନ ପ୍ରସନ୍ନ  ରହିବ। ଅବିବାହିତଙ୍କ ପାଇଁ ବିବାହ ପ୍ରସ୍ତାବ ଆସିପାରେ। କର୍ମଚଞ୍ଚଳ ରହିବେ। ଆୟ ବ୍ୟୟ ସମାନ ରହିବ। 

ବୃଷ: ପାରିବାରିକ ଜୀବନ ସୁଖମୟ ହେବ। ବ୍ୟବସାୟକୁ ନେଇ ଦୂର ସ୍ଥାନକୁ ଯାତ୍ରା କରିପାରନ୍ତି। ମହିଳାମାନେ ଘର କାର୍ଯ୍ୟରେ ବ୍ୟସ୍ତ ରହିପାରନ୍ତି। କଳା ଓ ସାହିତ୍ୟ ପ୍ରତି ରୁଚି ବଢ଼ିବ।  

ମିଥୁନ: ଅଚାନକ ଖୁସି ଖବର ମିଳିପାରେ। ବିଦ୍ୟାର୍ଥୀ କ୍ୟାରିୟରକୁ ନେଇ ଚିନ୍ତାରେ ରହିପାରନ୍ତି। ପରିବାର ପାଇଁ ସମୟ ବାହାର କରିବେ। ଅଯଥା ଖର୍ଚ୍ଚାନ୍ତ ହୋଇପାରନ୍ତି।

କର୍କଟ: ଅଫିସ୍‌ରେ ପଦୋନ୍ନତି ସମ୍ଭାବନା ଅଛି। ଗୁରୁଜନଙ୍କ ପରାମର୍ଶ ନେଇ ନୂତନ ବ୍ୟବସାୟ ଆରମ୍ଭ କରିପାରନ୍ତି। ଛାତ୍ରଛାତ୍ରୀ ଖେଳକୁଦରେ ସମୟ ଅତିବାହିତ କରିବେ। 

ସିଂହ: ଆତ୍ମବିଶ୍ବାସ ବୃଦ୍ଧି ପାଇବ। କୋର୍ଟ କଚେରୀ ମାମଲାରେ ବିଜୟ ଲାଭ କରିବେ। ସାମାଜିକ କାର୍ଯ୍ୟକ୍ରମରେ ସାମିଲ ରହିବେ। ନିଜ ଲୋକ ଶତ୍ରୁ ସାଜି ପାରନ୍ତି। ଖର୍ଚ୍ଚ ବଢ଼ିପାରେ। 

କନ୍ୟା: ଛାତ୍ରଛାତ୍ରୀଙ୍କ ପାଇଁ ଦିନଟି ଭଲ। ମହିଳାମାନେ ଘର କାର୍ଯ୍ୟରେ ବ୍ୟସ୍ତ ରହିପାରନ୍ତି। ଅଫିସ୍‌ କାର୍ଯ୍ୟ ପାଇଁ ଦୂରସ୍ଥାନକୁ ଯାତ୍ରା କରିପାରନ୍ତି। ପୁରୁଣା ନିବେଶରୁ ଲାଭ ମିଳିପାରେ। 

ତୁଳା: ମନ ପ୍ରସନ୍ନ ରହିବ। ଦିନଟି ଶୁଭଫଳ ପ୍ରଦାନ କରିବ। ବ୍ୟବହାରରେ ସଂଯମତା ରକ୍ଷା କରିବେ। ନୂଆ ଲୋକଙ୍କ ସଂସ୍ପର୍ଶରେ ଆସିପାରନ୍ତି। ଚକ୍ଷୁ ସମସ୍ୟା ଦେଖାଦେବ।  

ବିଛା: ଜମିବାଡ଼ିକୁ ନେଇ ବିବାଦ ଦେଖା ଦେବ। ଉଚ୍ଚଶିକ୍ଷା ପାଇଁ ବିଦେଶ ଯାତ୍ରା କରିପାରନ୍ତି। ମାନସମ୍ମାନ ବୃଦ୍ଧି ପାଇବ। ଶାରୀରିକ କଷ୍ଟ ଭୋଗିପାରନ୍ତି। ଅଫିସ୍‌ ସହକର୍ମୀଙ୍କ ସହଯୋଗ ମିଳିପାରେ।  

ଧନୁ: ଧାର୍ମିକ କାର୍ଯ୍ୟ ଆୟୋଜନ କରିବେ। ମନ ପ୍ରସନ୍ନ ରହିବ। ସନ୍ତାନଙ୍କ ଭବିଷ୍ୟତ ପାଇଁ ନୂଆ ଯୋଜନା କରିବେ। ସମସ୍ତ ଇଚ୍ଛା ପୂରଣ ହେବ। ଅପ୍ରିୟ ସତ କଥା  କହି ସମସ୍ୟାରେ ପଡ଼ିପାରନ୍ତି। 

ମକର: ବିବାଦୀୟ କାର୍ଯ୍ୟରୁ ଦୂରେଇ ରହିବେ। ସ୍ବାସ୍ଥ୍ୟରେ ଉନ୍ନତି ପରିଲକ୍ଷିତ ହେବ। ପରିବାର ସଦସ୍ୟଙ୍କ ସହ ହସଖୁସିରେ ସମୟ ଅତିବାହିତ କରିବେ। ସଙ୍ଗୀତ ପ୍ରତି ରୁଚି ବଢ଼ିବ। 

କୁମ୍ଭ: ନୂଆ କାର୍ଯ୍ୟ ଆରମ୍ଭରୁ ଦୂରେଇ ରହିବେ। ଅଫିସ୍‌ରେ ସହକର୍ମୀଙ୍କ ସାହାଯ୍ୟ ମିଳିପାରେ। ଦାମ୍ପତ୍ୟ ଜୀବନ ସୁଖମୟ ହେବ। ପିଲାମାନେ ଖେଳକୁଦରେ ବ୍ୟସ୍ତ ରହିପାରନ୍ତି। 

ମୀନ: ଆଶା କରିଥିବା ଦିଗରୁ ଧନ ମିଳିପାରେ। ସ୍ବାସ୍ଥ୍ୟ ସମସ୍ୟା ଦୂର ହେବ। ବନ୍ଧୁ ମିଳନ କାର୍ଯ୍ୟକ୍ରମରେ ଯୋଗ ଦେବେ। ଅସହାୟଙ୍କୁ ସାହାଯ୍ୟ କରିବେ। ରାଜନେତାଙ୍କ ପାଇଁ ଦିନଟି  ବହୁତ ଭଲ। 

ମେଷ: ରବି, ସୋମବାରରେ ପରିବାରରେ ସମସ୍ୟା ସୃଷ୍ଟି ହୋଇପାରେ। ବେପାରରେ ଅଧିକ ପରିଶ୍ରମ କରିବାକୁ ପଡ଼ିପାରେ। ମଙ୍ଗଳ,ବୁଧବାରରେ ଆର୍ଥିକ ସ୍ଥିତି ସ୍ବଚ୍ଛଳ ରହିବ। ଗୁରୁ, ଶୁକ୍ର,ଶନିବାରରେ ସାମାଜରେ ଧନସମ୍ମାନପ୍ରାପ୍ତି। ଗୁରୁଜନଙ୍କ ଆଶୀର୍ବାଦ ପାଇବେ।

ବୃଷ: ରବି, ସୋମବାରରେ ଅଟକି ରହିଥିବା କାର୍ଯ୍ୟ ପୂରଣ ହେବ। ସନ୍ତାନସନ୍ତତିଙ୍କ ପାଇଁ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେବେ। ମଙ୍ଗଳ,ବୁଧବାରରେ କର୍ମକ୍ଷେତ୍ରରେ ପ୍ରଭାବଶାଳୀ ରହିବେ। ଗୁରୁ, ଶୁକ୍ର,ଶନିବାରରେ ମୂଲ୍ୟବାନ ବସ୍ତୁ କ୍ରୟ କରିପାରନ୍ତି। ଉଚ୍ଚ ଅଧିକାରୀଙ୍କଠାରୁ ପ୍ରଶଂସା ପାଇବେ।

ମିଥୁନ: ରବି, ସୋମବାରରେ କାର୍ଯ୍ୟ ମନ୍ଥରତା ଦେଖାଦେବ। ଆର୍ଥିକ ଉନ୍ନତି ହେବ। ମଙ୍ଗଳ, ବୁଧବାରରେ ଆୟର ନୂତନ ପଥ ଉନ୍ମୁକ୍ତ ହେବ। ଗୁରୁ, ଶୁକ୍ର, ଶନିବାରରେ ଅବହେଳାର ଶିକାର ହେବେ। ବ୍ୟବସାୟିକ ଆୟବ୍ୟୟ ସମାନ ରହିବ। 

କର୍କଟ: ରବି, ସୋମବାର ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇ ଆଗକୁ ବଢ଼ିବେ। ଭାଇଭଉଣୀଙ୍କର ସହଯୋଗ ମିଳିବ। ମଙ୍ଗଳ,ବୁଧବାରରେ ମନସ୍ତାପରେ ରହିପାରନ୍ତି। ଗୁରୁ, ଶୁକ୍ର, ଶନିବାରରେ ପରିଶ୍ରମ ମୁତାବକ ଫଳପ୍ରାପ୍ତି। ବରିଷ୍ଠ ବ୍ୟକ୍ତିଙ୍କଠାରୁ ସହଯୋଗ ପାଇବେ।

ସିଂହ: ରବି, ସୋମବାରରେ ସମୟର ସଦୁପଯୋଗ କରିବେ। କଠିନ ପରିଶ୍ରମ କରି ସଫଳ ହେବେ। ମଙ୍ଗଳ, ବୁଧବାରରେ ଆର୍ଥିକ କ୍ଷେତ୍ରରେ ପାରିବାରିକ ସହଯୋଗ ପାଇବେ। ଗୁରୁ, ଶୁକ୍ର,ଶନିବାରରେ ଜୀବନସାଥୀଙ୍କ ସହ ନୂତନ ଯୋଜନା ପ୍ରସ୍ତୁତ କରିବେ। ଧନଲାଭ ଯୋଗ ରହିଛି।

କନ୍ୟା: ରବି, ସୋମବାରରେ  କର୍ମକ୍ଷେତ୍ରରେ  ପଦୋନ୍ନତି ମିଳିପାରେ। ଅଧିକ ପରିଶ୍ରମୀ ହେବେ। ମଙ୍ଗଳ, ବୁଧବାରରେ ମହତ୍ତ୍ବପୂର୍ଣ୍ଣ ସଫଳତା ପାଇବେ। ଗୁରୁ, ଶୁକ୍ର, ଶନିବାରରେ ସୁଖଶାନ୍ତି ବୃଦ୍ଧି ପାଇବ। ଅକସ୍ମାତ୍ ଧନଲାଭ ଯୋଗ ରହିଛି। 

ତୁଳା: ରବି, ସୋମବାରରେ କର୍ମକ୍ଷେତ୍ରରେ ସହଯୋଗ ପାଇବେ। ସନ୍ତାନସନ୍ତତି ଉନ୍ନତି କରିବେ। ମଙ୍ଗଳ, ବୁଧବାରରେ ଅର୍ଥପ୍ରାପ୍ତିର ଯୋଗ ରହିଛି। ଗୁରୁ, ଶୁକ୍ର, ଶନିବାରରେ ମନରେ ପ୍ରସନ୍ନତା ଓ ଚଞ୍ଚଳତା ଭରି ରହିବ। 

ବିଛା: ରବି, ସୋମବାରରେ ସରକାରୀ କାର୍ଯ୍ୟରେ ସଫଳତା ପାଇବେ। କର୍ମକ୍ଷେତ୍ରରେ ନିଜର ପରାକ୍ରମ ଦେଖାଇବେ। ମଙ୍ଗଳ,ବୁଧବାରରେ ଅର୍ଥହାନି ଓ ଶତ୍ରୁବୃଦ୍ଧି ହୋଇପାରେ। ଗୁରୁ, ଶୁକ୍ର, ଶନିବାରରେ ଗୁରୁଜନଙ୍କ ଆଶୀର୍ବାଦ ଭାଗ୍ୟ ଉଦୟରେ ସହଯୋଗ ହେବ। ବ୍ୟବସାୟରେ ଲାଭବାନ ହେବେ।

ଧନୁ: ରବି, ସୋମବାରରେ ଅଭାବ ଓ ଅସୁବିଧା ଦେଖାଦେବ। ଋଣ ଦେଇଥିବା ଅର୍ଥ ଫେରି ପାଇବେ। ମଙ୍ଗଳ, ବୁଧବାରରେ ଗୁରୁଜନଙ୍କ ସହଯୋଗ ମିଳିବ। ଗୁରୁ, ଶୁକ୍ର, ଶନିବାରରେ ବ୍ୟବସାୟିକ ପ୍ରସାର ହେବ। ଶତ୍ରୁମାନଙ୍କର କୂଟଚକ୍ରାନ୍ତର ଶିକାର ହୋଇପାରନ୍ତି।

ମକର: ରବି, ସୋମବାରରେ ଗୁରୁଜନଙ୍କ ସହଯୋଗ ମିଳିବ। କାର୍ଯ୍ୟକ୍ଷେତ୍ରରେ ବାଧା ସୃଷ୍ଟି ହୋଇପାରେ। ମଙ୍ଗଳ, ବୁଧବାରରେ ଦ୍ରବ୍ୟାଦି ଲାଭ ହେବ। ଗୁରୁ ,ଶୁକ୍ର, ଶନିବାରରେ ସକାରାତ୍ମକ ଚିନ୍ତା ରଖି ଆଗକୁ ବଢ଼ିବେ। ନିଜ ବୁଦ୍ଧି ବଳରେ ସଫଳତା ପାଇବେ।

କୁମ୍ଭ: ରବି, ସୋମବାରରେ ଦୂରଯାତ୍ରା କରିପାରନ୍ତି। ଦ୍ରବ୍ୟାଦି କ୍ରୟ କରିପାରନ୍ତି। ମଙ୍ଗଳ,ବୁଧବାରରେ ଜୀବନରେ  ଅକସ୍ମାତ୍ ପରିବର୍ତ୍ତନ ପରିଲକ୍ଷିତ ହେବ। ଗୁରୁ, ଶୁକ୍ର, ଶନିବାରରେ ଦୃଢ଼ମନା ହେବେ। ନୂତନ ନିଯୁକ୍ତି ହୋଇପାରେ। 

ମୀନ: ରବି, ସୋମବାରରେ ସ୍ବାସ୍ଥ୍ୟଜନିତ ସମସ୍ୟା ଦେଖାଦେବ। ଭବିଷ୍ୟତ ଯୋଜନାରେ ସଫଳ ହେବେ। ମଙ୍ଗଳ, ବୁଧବାରରେ ପ୍ରିୟଜନଙ୍କ ପାଇଁ ସମ୍ବେଦନଶୀଳ ରହିବେ। ଗୁରୁ, ଶୁକ୍ର,ଶନିବାରରେ ଅର୍ଥପ୍ରାପ୍ତି, ବ୍ୟବସାୟିକ ଆୟ ଭଲ ହେବ। 

ଭୁବନେଶ୍ୱର: ରାଜ୍ୟର ବୟସ୍କ, ଭିନ୍ନକ୍ଷମ ଓ ବିଧବା ମାନଙ୍କୁ ୨ ମାସ ହେଲା ଭତ୍ତା ପ୍ରଦାନ ନ କରି ହନ୍ତସନ୍ତ କରୁଛନ୍ତି ରାଜ୍ୟ ସରକାର । ପ୍ରତିଦିନ ଭତ୍ତା ପାଇବା ପାଇଁ ପଞ୍ଚାୟତ ଅଫିସ୍, ବ୍ୟାଙ୍କ ଆଗରେ ଧାଡ଼ିରେ ଛିଡ଼ା ହୋଇ ହିତାଧିକାରୀମାନେ ଅକଥନୀୟ ଦୁର୍ଦ୍ଦଶା ଭୋଗୁଥିବା କହି ସରକାରଙ୍କୁ କଡ଼ା ସମାଲୋଚନା କରିଛି ବିଜୁ ଜନତା ଦଳ ।

ଆଜି ଶଙ୍ଖ ଭବନରେ ଆୟୋଜିତ ସାମ୍ବାଦିକ ସମ୍ମିଳନୀରେ ପୂର୍ବତନ ମନ୍ତ୍ରୀ ତଥା ଦଳର ନୟାଗଡ଼ ବିଧାୟକ ଡ଼ ଅରୁଣ ସାହୁ, ବିରୋଧୀ ଦଳ ମୁଖ୍ୟ ସଚେତକ ଶ୍ରୀମତୀ ପ୍ରମିଳା ମଲ୍ଲିକ ଓ ଦଳର ଭୋଗରାଇ ବିଧାୟକ ଶ୍ରୀ ଗୌତମବୁଦ୍ଧ ଦାସ କହିଛନ୍ତି ଯେ, ବିଜେପି ସରକାରକୁ ଆସିବା ପରେ ସବୁ କ୍ଷେତ୍ରରେ ଲୋକଙ୍କୁ ଧାଡ଼ିରେ ଛିଡ଼ା କରାଉଛି । ବୟସ୍କଙ୍କୁ ଧାଡ଼ିରେ ଛିଡ଼ା କରାଇ ସରକାର ତାଙ୍କୁ ଯେଉଁ ଯନ୍ତ୍ରଣା ଦେଉଛନ୍ତି ତାହା ଅତ୍ୟନ୍ତ ନିନ୍ଦନୀୟ ।

ଡ଼ ଅରୁଣ ସାହୁ କହିଥିଲେ, ଡିଜିଟାଲ ଇଣ୍ଡିଆର ବାହାବାହା ନେଉଥିବା ଡବଲ ଇଞ୍ଜିନ ସରକାର ଅସହାୟ ମାନଙ୍କୁ ଆକାଉଣ୍ଟ ମାଧ୍ୟମରେ କି ଘର ପାଖରେ ଭତ୍ତା ଦେଇପାରୁନି । ସରକାରୀ ସ୍କୁଲ ଛାତ୍ରଛାତ୍ରୀ ୟୁନିଫର୍ମ ପାଇପାରୁ ନାହାନ୍ତି । ସରକାରୀ କର୍ମଚାରୀ ଠିକ୍ ସମୟରେ ଦରମା ପାଉନାହାନ୍ତି । ପୂର୍ବତନ ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକ ଘରେ ଭତ୍ତା ପହଞ୍ଚାଇବାର ବ୍ୟବସ୍ଥା କରିଥିଲେ । କିନ୍ତୁ ବର୍ତ୍ତମାନର ବାହାପିଆ ବିଜେପି ସରକାର ବୟସ୍କଙ୍କୁ ଖର୍ଚ୍ଚାନ୍ତ କରାଇ ଧାଡ଼ିରେ ଛିଡ଼ା କରାଉଛନ୍ତି ।

ଶ୍ରୀମତୀ ପ୍ରମିଳା ମଲ୍ଲିକ କହିଥିଲେ, ପ୍ରଚାର ସର୍ବସ୍ୱ ରାଜ୍ୟ ସରକାର ନବୀନ ବାବୁଙ୍କ ସବୁ ଯୋଜନାର ରଙ୍ଗ ଓ ନାମ ପରିବର୍ତ୍ତନ କରିଚାଲିଛନ୍ତି । ପ୍ରତି ମାସର ୧୫ ତାରିଖ ପୂର୍ବରୁ ହିତାଧିକାରୀ ମାନଙ୍କ ଘରେ ଭତ୍ତା ପହଞ୍ଚାଇବାର ଯେଉଁ ବ୍ୟବସ୍ଥା ନବୀନ ବାବୁ କରିଥିଲେ, ସେ ବ୍ୟବସ୍ଥାକୁ ସରକାର ସମ୍ପୂର୍ଣ୍ଣ ବନ୍ଦ କରିଦେଇଛନ୍ତି । ନବୀନ ବାବୁ ଭତ୍ତାର ପରିମାଣ ୩୦୦ ଟଙ୍କାରୁ ବୃଦ୍ଧି କରି ୧୦୦୦ ଟଙ୍କା କରିଥିଲେ । ମଧୁବାବୁ ପେନସନ ଯୋଜନାରେ ୧୨ ଲକ୍ଷରୁ ୩୮ ଲକ୍ଷ ଲୋକଙ୍କୁ ସାମିଲ କରିଥିଲେ । କିନ୍ତୁ ବିଜେପି ସରକାର କ୍ଷମତାକୁ ଆସିଲା ପରେ ବୟସ୍କ ମାନଙ୍କୁ ଏଭଳି ଡହଳବିକଳ କରି କି ଆନନ୍ଦ ପାଉଛନ୍ତି ବୋଲି ଶ୍ରୀମତୀ ମଲ୍ଲିକ ପ୍ରଶ୍ନ କରିଥିଲେ ।

ଶ୍ରୀ ଗୌତମବୁଦ୍ଧ ଦାସ କହିଥିଲେ, ବିଜୁ ଜନତା ଦଳର ସଭାପତି ଶ୍ରୀ ନବୀନ ପଟ୍ଟନାୟକ କହିଥିଲେ ପ୍ରତିଟି ଜୀବନ ମୂଲ୍ୟବାନ । ପ୍ରତ୍ୟେକ ମଣିଷର ବଞ୍ଚିବାର ଅଧିକାର ଅଛି । ତାଙ୍କ ଶାସନ ସମୟରେ ହୋଇଥିବା ବିଭିନ୍ନ ଯୋଜନା ମଧ୍ୟରୁ ଏକ ଉଲ୍ଲେଖନୀୟ ଯୋଜନା ହେଲା ମଧୁବାବୁ ପେନସନ ଯୋଜନା । କିନ୍ତୁ ଯେବେଠୁ ବିଜେପି ସରକାରକୁ ଆସିଛି, ସେବେଠୁ ବୃଦ୍ଧବୃଦ୍ଧା, ଭିନ୍ନକ୍ଷମ, ବିଧବା ଓ ଅସହାୟ ମାନେ ନାହିଁ ନଥିବା ଦୁର୍ଦ୍ଦଶା ଭୋଗୁଛନ୍ତି । ପଞ୍ଚାୟତ ଅଫିସ୍, ବ୍ୟାଙ୍କ ଆଗରେ ଯେଉଁପରି ଅସହାୟ ଅବସ୍ଥାରେ ହିତାଧିକାରୀ ବସୁଛନ୍ତି ତାହା ସମଗ୍ର ରାଜ୍ୟବାସୀଙ୍କୁ ବିଚଳିତ କରୁଛି । ଏ ସରକାର ପାଖରେ ସମ୍ବେଦନଶୀଳତା ବୋଲି କିଛି ନାହିଁ । ଲାଗୁଛି ସରକାର ଏବେ ଦେବାଳିଆ ହୋଇଗଲେଣି । ୨୦୦୦ ମସିହା ପୂର୍ବରୁ ସରକାରୀ କର୍ମଚାରୀଙ୍କୁ ଦରମା ଦେବା ପାଇଁ ତତ୍କାଳୀନ ସରକାର ଓଭରଡ୍ରାଫ୍ଟ କରୁଥିଲେ । ବର୍ତ୍ତମାନ ତାହାର ପୁନରାବୃତ୍ତି ଘଟିବାକୁ ଯାଉଛି । ବୟସ୍କଙ୍କୁ ଧାଡ଼ିରେ ଛିଡ଼ା କରାଇ ଯନ୍ତ୍ରଣା ଦେଉଥିବା ଏ ସରକାରକୁ ଆଗାମୀ ଦିନରେ ଓଡ଼ିଶାବାସୀ ଉଚିତ୍ ଜବାବ ଦେବେ ।

ନୂଆଦିଲ୍ଲୀ: ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ କେବଳ ନିଜର ଶାରୀରିକ ସୁସ୍ଥତା ବଜାୟ ରଖିବାକୁ ଚାହୁଁନାହାଁନ୍ତି, ବରଂ ଜୈବିକ ବାର୍ଦ୍ଧକ୍ୟକୁ ରୋକିବା ପାଇଁ ଏକ ନୂଆ ପ୍ରୟାସ ଆରମ୍ଭ କରିଛନ୍ତି। ନିକଟରେ ପ୍ରକାଶିତ 'ଦି ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ୍'ର ଏକ ରିପୋର୍ଟ ଅନୁଯାୟୀ, ରୁଷିଆ ସରକାର ଦେଶର ନାଗରିକମାନଙ୍କ ଆୟୁଷ ବୃଦ୍ଧି କରିବା ପାଇଁ "ନ୍ୟୁ ହେଲ୍ଥ ପ୍ରିଜରଭେସନ୍ ଟେକ୍ନୋଲୋଜି" ନାମକ ଏକ ବୃହତ୍ ଜାତୀୟ ପ୍ରକଳ୍ପ ଆରମ୍ଭ କରିଛନ୍ତି।

ଏହି ଅତ୍ୟାଧୁନିକ ମେଡିକାଲ୍ ପ୍ରକଳ୍ପ ପାଇଁ ସରକାରୀ ପାଣ୍ଠିରୁ ପ୍ରାୟ ୨୬ ବିଲିୟନ ଡଲାର ଖର୍ଚ୍ଚ କରାଯାଉଛି। କୃତ୍ରିମ ଅଙ୍ଗପ୍ରତ୍ୟଙ୍ଗ ପ୍ରତିରୋପଣ ଏବଂ ମାନବ କୋଷର ଆୟୁଷ ବୃଦ୍ଧି କରିବା ଏହି ପ୍ରକଳ୍ପର ମୁଖ୍ୟ ଲକ୍ଷ୍ୟ। ସିଏନ୍ଏନ୍ (CNN) ରିପୋର୍ଟ ଅନୁଯାୟୀ, ଗତ ବର୍ଷ ଚୀନ୍‌ରେ ଆୟୋଜିତ ଏକ ସାମରିକ ପରେଡ୍ ସମୟରେ ରାଷ୍ଟ୍ରପତି ପୁଟିନ ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କୁ କହିଥିଲେ ଯେ କ୍ରମାଗତ ଅଙ୍ଗ ପ୍ରତିରୋପଣ ଦ୍ୱାରା ମଣିଷ ଅମରତ୍ୱ ଲାଭ କରିପାରିବ। ଏହାର ଉତ୍ତରରେ ଚୀନ୍ ରାଷ୍ଟ୍ରପତି ମଧ୍ୟ ଦାବି କରିଥିଲେ ଯେ, ଆଗାମୀ ଦଶନ୍ଧିରେ ମଣିଷର ହାରାହାରି ବୟସ ୧୫୦ ବର୍ଷରେ ପହଞ୍ଚିପାରିବ।

ରୁଷିଆର ରାଷ୍ଟ୍ର-ପୃଷ୍ଠପୋଷକତାରେ ପରିଚାଳିତ ଲାବୋରେଟୋରୀଗୁଡ଼ିକ ଶାରୀରିକ ଅବକ୍ଷୟକୁ ରୋକିବା ପାଇଁ ମୁଖ୍ୟତଃ ଦୁଇଟି ଅଭିନବ କୌଶଳ ଉପରେ କାମ କରୁଛନ୍ତି:

୩ଡି ବାୟୋ-ପ୍ରିଣ୍ଟିଂ (3D Bio-Printing): ଉନ୍ନତ ଜ୍ଞାନକୌଶଳ ସମ୍ପନ୍ନ ୩ଡି ପ୍ରିଣ୍ଟର ବ୍ୟବହାର କରି ଗବେଷକମାନେ କାର୍ଯ୍ୟକ୍ଷମ ଜୀବନ୍ତ ଟିସୁ ଏବଂ ଅଙ୍ଗ ପ୍ରସ୍ତୁତ କରୁଛନ୍ତି। ସେମାନେ ନିଜ ପରୀକ୍ଷାଗାରରେ ମାନବ କାର୍ଟିଲେଜ୍ ଏବଂ ମୂଷାର ଥାଇରଏଡ୍ ସଫଳତାର ସହ ବିକଶିତ କରିଥିବା ଜଣାପଡିଛି।

ଜେନେଟିକ୍ ଇଞ୍ଜିନିୟରିଂ (Genetic Engineering): ବୈଜ୍ଞାନିକମାନେ ମାନବ ଶରୀରରେ ପ୍ରତିରୋପଣ ପାଇଁ ଉପଯୁକ୍ତ ଅଙ୍ଗ ସୃଷ୍ଟି କରିବା ଉଦ୍ଦେଶ୍ୟରେ ଜିନ୍-ଏଡିଟେଡ୍ ମିନି-ଘୁଷୁରିମାନଙ୍କର ବଂଶବୃଦ୍ଧି କରାଉଛନ୍ତି। ଏହି ନୂତନ ଅଙ୍ଗ ପ୍ରତିରୋପଣ ପ୍ରକ୍ରିୟାକୁ ୨୦୩୦ ମସିହା ସୁଦ୍ଧା କାର୍ଯ୍ୟକ୍ଷମ କରିବାକୁ ରୁଷିଆ ସରକାର ଲକ୍ଷ୍ୟ ରଖିଛନ୍ତି।

ଏହି ବହୁମୂଲ୍ୟ ଏବଂ ଗୁରୁତ୍ୱପୂର୍ଣ୍ଣ ପ୍ରକଳ୍ପ ଉପରେ ସମ୍ପୂର୍ଣ୍ଣ ନିୟନ୍ତ୍ରଣ ରଖିବା ପାଇଁ କ୍ରେମଲିନ୍ ନିଜର ବିଶ୍ୱସ୍ତ ଲୋକଙ୍କୁ ଦାୟିତ୍ୱ ଦେଇଛି। ପୁଟିନଙ୍କ ବଡ଼ ଝିଅ ତଥା ପେସାଦାର ଏଣ୍ଡୋକ୍ରାଇନୋଲୋଜିଷ୍ଟ ମାରିଆ ଭୋରୋଣ୍ଟସୋଭା (Maria Vorontsova) ଏହି ମେଡିକାଲ୍ ସାଇନ୍ସ ପ୍ରୋଜେକ୍ଟର ସିଧାସଳଖ ତଦାରଖ କରୁଛନ୍ତି। ତାଙ୍କ ସହିତ ପ୍ରସିଦ୍ଧ ପଦାର୍ଥବିଜ୍ଞାନୀ ମିଖାଇଲ୍ କୋଭାଲଚୁକ ମଧ୍ୟ କାର୍ଯ୍ୟ କରୁଛନ୍ତି, ଯାହାଙ୍କୁ ଏହି ଆୟୁଷ ବୃଦ୍ଧି ଯୋଜନାର ମୁଖ୍ୟ ବିନ୍ଧାଣୀ ବୋଲି ବିବେଚନା କରାଯାଉଛି।

ମସ୍କୋ ପକ୍ଷରୁ ବିପୁଳ ପରିମାଣର ଅର୍ଥ ବିନିଯୋଗ କରାଯାଉଥିଲେ ମଧ୍ୟ ବିଶ୍ୱ ବୈଜ୍ଞାନିକ ସମୁଦାୟ ଏବଂ ରୁଷିଆର କିଛି ବିଶେଷଜ୍ଞ ଏହି ଯୋଜନାକୁ ନେଇ ସନ୍ଦେହ ପ୍ରକାଶ କରିଛନ୍ତି। ରୁଷିଆ ଛାଡ଼ି ପଳାଇଥିବା ବିଶିଷ୍ଟ ବୈଜ୍ଞାନିକ ଆଲେକ୍ସଜାଣ୍ଡାର୍ ଓଷ୍ଟ୍ରୋଭସ୍କି (Alexander Ostrovsky)ଙ୍କ ମତରେ, ଯେପର୍ଯ୍ୟନ୍ତ ଏହି ପ୍ରକଳ୍ପର ଫଳାଫଳକୁ ବୈଜ୍ଞାନିକ ଭାବେ ପ୍ରମାଣିତ କରାଯାଇନାହିଁ, ସେପର୍ଯ୍ୟନ୍ତ ଏହା କେବଳ ଏକ ରାଜନୈତିକ କଳ୍ପନା। ପୁଟିନଙ୍କୁ ଖୁସି କରିବା ଏବଂ ବିପୁଳ ପାଣ୍ଠି ହାତେଇବା ଲାଗି ପ୍ରକଳ୍ପ ନିର୍ଦ୍ଦେଶକମାନେ ଗବେଷଣାର ସ୍ଥିତି ସମ୍ପର୍କରେ କ୍ରେମଲିନକୁ ମିଥ୍ୟା ତଥ୍ୟ ଦେଉଥାଇ ପାରନ୍ତି ବୋଲି ସେ ଦାବି କରିଛନ୍ତି।

ଭୁବନେଶ୍ବର: ଚନ୍ଦ୍ରଶେଖରପୁରରେ କାର୍‌ ଚଢ଼ାଇ ହତ୍ୟା ପଛରେ ନୂଆ ଟୁଇଷ୍ଟ । ଦୁର୍ଘଟଣା ନୁହେଁ ବରଂ ପ୍ରେମ ପାଇଁ ସାଙ୍ଗକୁ ମାରିଦେଲା ସାଙ୍ଗ। ପ୍ରେମ ପାଇଁ ପ୍ରେମିକଙ୍କ ମଧ୍ୟରେ ବିବାଦ ନେଇଛି ହତ୍ୟାର ରୂପ । ତ୍ରିକୋଣୀୟ ପ୍ରେମରୁ କାର୍‌ ଚଢ଼ାଇ ହତ୍ୟା କରାଯାଇଛି କହିଲେ ଡିସିପି । ମୃତ ବରେନ୍ୟ ରାଉତରାୟଙ୍କ ପ୍ରେମିକାକୁ ପୂର୍ବରୁ ଭଲ ପାଉଥିବା ପ୍ରେମିକ ଘଟାଇଛି ଏପରି ଜଘନ୍ୟ କାଣ୍ଡ। ଯୋଜନାବଦ୍ଧ ଭାବେ ମିଳିମିଶି ହତ୍ୟା କରିଛନ୍ତି ହତ୍ୟାକାରୀ । ଆଚାର୍ଯ୍ୟ ହରିହର କଲେଜ ଛକରେ ଘଟିଥିବା ଦୁର୍ଘଟଣା ପଛର ହତ୍ୟାର ପ୍ରମାଣ ପାଇବା ସହ ପାଞ୍ଚ ଜଣଙ୍କୁ ଗିରଫ କରି ପଚରାଉଚରା କରୁଛି ପୋଲିସ।

ସୂଚନାଯୋଗ୍ୟ, ମେ ୨୯ ତାରିଖ ବିଳମ୍ବିତ ରାତିରେ ନୀଳାଦ୍ରି ବିହାର ଏଟିଏମ୍ ଛକ ନିକଟରେ ଏକ ବାଇକକୁ ପଛପଟୁ ଶକ୍ତ ଧକ୍କା ଦେଇଥିଲା ଦ୍ରୁତଗାମୀ ଥାର୍ ଗାଡ଼ି । ବାଇକରେ ଥିଲେ ୩ ଜଣ ଯୁବକ । ଧକ୍କା ଏତେ ଜୋରଦାର ଥିଲା ଯେ ସେମାନଙ୍କ ମଧ୍ୟରୁ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ହୋଇଥିଲା। ମୃତ ଯୁବକଙ୍କ ଘର ଖୋର୍ଦ୍ଧା ଜିଲ୍ଲା କାଇପଦର ଅଞ୍ଚଳର । ଅନ୍ୟ ଦୁଇଜଣ ଗୁରୁତର ଭାବେ ଆହତ ହୋଇଥିଲେ। ପ୍ରଥମରୁ ଏହା ଦୁର୍ଘଟଣା ପରି ମନେ ହେଉଥିଲା। କିନ୍ତୁ ପରିବାର ଲୋକଙ୍କ ଅଭିଯୋଗ ପରେ ଚନ୍ଦ୍ରଶେଖରପୁର ପୋଲିସ ଆରମ୍ଭ କରିଥିଲା ତଦନ୍ତ।

ଆହତ ଓ ପ୍ରତ୍ୟକ୍ଷଦର୍ଶୀଙ୍କୁ ପଚରାଉଚରା ପରେ ଏହା ହତ୍ୟା ବୋଲି ସନ୍ଦେହ କରିଥିଲା ପୋଲିସ। କୌଣସି ବିଳମ୍ବ ନକରି ଦୁର୍ଘଟଣା ଘଟାଇଥିବା ଅଭିଯୁକ୍ତ ଯେପରି ଖସି ଯାଇନପାରିବେ, ସେଥିପାଇଁ ପୂରା ଲାଗିପଡ଼ିଥିଲା। ରାତାରାତି ସବୁ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଥିଲା ପୋଲିସ। ତଦନ୍ତରୁ ଜଣାପଡ଼ିଲା, ଏହା ଦୁର୍ଘଟଣା ନୁହେଁ ବରଂ ସଂଘବଦ୍ଧ ହତ୍ୟା।

ପ୍ରେମ ବ୍ୟାପାରକୁ ନେଇ ଲସି ଦୋକାନରେ ଗଣ୍ଡଗୋଳ ହୋଇଥିଲା। ବାଇକରେ ଆସିଥିବା ମୃତକ ଓ ତାଙ୍କ ସହଯୋଗୀ ଆଉ ଅଭିଯୁକ୍ତଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। କିନ୍ତୁ ଏହାର କିଛି ସମୟ ପରେ ବାଇକରେ ଫେରୁଥିବା ବେଳେ ଅଭିଯୁକ୍ତମାନେ ଥାର୍ ଗାଡିରେ ସେମାନଙ୍କ ପିଛା କରିଥିଲେ। ଶେଷରେ ବାଇକ୍ ଆରୋହୀଙ୍କୁ ରାସ୍ତାରେ ଗାଡି ଚଢ଼ାଇ ହତ୍ୟା କରିଥିଲେ। ସେହିପରି ମୃତକଙ୍କ ଭଉଣୀ କହିଛନ୍ତି- ଭାଇର ହତ୍ୟା ପଛରେ ତା'ର ସାଙ୍କମାନଙ୍କ ହାତ ରହିଛି। ଏମିତିକି ସେମାନଙ୍କ ମଧ୍ୟରୁ ଜଣେ ତାଙ୍କ ପିଲାଦିନର ବନ୍ଧୁ। ପ୍ରଥମେ ତାଙ୍କୁ ମାରପିଟ୍ କରିଥିଲେ। ତା'ପରେ ଗାଡ଼ି ଚଢ଼ାଇ ହତ୍ୟା କରିଥିଲେ।